अर्थतन्त्र दबाबमै छ, अहिलेको काममा हामी पनि सन्तुष्ट छैनौं : अर्थमन्त्री पौडेल
काठमाडौं । उपप्रधान तथा अर्थमन्त्री विष्णुप्रसाज पौडेलले लामो समयदेखि दबाबमा रहेको अर्थतन्त्रले अझै पनि सकस भोगिरहेको बताएका छन् । राष्ट्रिय वाणिज्य बैंकको ६०औं वार्षिकोत्सब कार्यक्रमका प्रमुख अतिथिकाे रूपमा बाेल्दै उनले देशको अर्थतन्त्र अझै पनि दबाबमा रहेको बताएका हुन् । ‘अर्थतन्त्र दबाबमै छ, यसलाई चिर्दै अगाडि बढिरहेका छौं, त्यसमा केही सफलता पनि मिलेको छ । हामी पनि त्यसमा हामी सन्तुष्ट छैनौं, कामको रफ्तार अझै बढाउनु पर्नेछ,’ उनले भने । उनका अनुसार अर्थतन्त्र सुधारका लागि बैंकहरुको भूमिका पनि महत्वपूर्ण हुन्छ । तरलतालाई उत्पादन र रोजगारी सिर्जना हुने क्षेत्रमा लगानी गरेर देशको अर्थतन्त्रमा प्रयोग गर्नुपर्ने उनको भनाइ छ । उनले अहिले सरकारले औसत काम गरेर बस्ने स्थिति नरहेको धारणा राखे । ‘हामीले त्यतिकै दिन बिताएर बस्ने अवस्था छैन, छोटो अवधिमा दूरगामी प्रभाव पार्ने काम गरिरहेका छौं, हामी दिन गनेर बसेका छैनौं, त्यसका केही संकेत पनि देखिएको छ,’ उनले भने । अर्थमन्त्री पाैडेलले यो बीचमा सरकारले २९ वटा ऐनलाई शंसोधन गरेर अध्यादेश ल्याएको बताउँदै संसद चलेपछि त्यसलाई अनुमोदन गरेर कार्यान्वयन गर्ने धारणा राखे । ‘हामीसँग समयको चाप छ, मानिसहरुमा निराशा छ, त्यसलाई चिर्नुपर्ने अवस्था छ, देशभित्र रोजगारी सिर्जना गर्न र देशमै भविशय देखाउनका लागि महत्वपूर्ण काम गरिरहेका छौं, सुशासन, विदेशी लगानी र रोजगारी सिर्जनामा प्रगति गर्न चाहिरहेका छौं,’ उनले भने । उनले राष्ट्रिय वाणिज्य बैंकले अन्य बैंकको तुलनामा थप उपलब्धि हासिल सफल भएको बताए ।
यी हुन् अफ्रिकाका सबैभन्दा धनी व्यक्ति जसको व्यवसाय चिनी, नुन र तेलसम्म फैलिएको छ
काठमाडौं । एलोन मस्क विश्व र अमेरिकाको सबैभन्दा धनी व्यक्ति हुन् । युरोपमा फ्रान्सका बर्नार्ड अर्नाल्ट धनको हिस्सामा शासन गर्छन् भने एसियाका राजा मुकेश अम्बानी हुन् । के तपाईंलाई थाहा छ अफ्रिकाको सबैभन्दा धनी मानिस को हो ? उत्तर हो- अलिको डाङ्गोटे । ब्लूमबर्ग बिलियनेर्स इन्डेक्सका अनुसार नाइजेरियाली अर्बपति अलिको डाङ्गोटेको कुल सम्पत्ति २७.३ अर्ब डलर छ । उनी विश्वका धनी व्यक्तिहरूको सूचीमा ७४ औं स्थानमा छन् । अंग्रेजी फुटबल क्लब आर्सनलका ठूला प्रशंसक डांगोटे उप-सहारा अफ्रिकाको सबैभन्दा ठूलो सिमेन्ट उत्पादक डांगोटे इन्डस्ट्रीजका मालिक हुन् । यसमा अफ्रिकाको सबैभन्दा ठूलो तेल रिफाइनरी पनि छ । डाङ्गोटे इन्डस्ट्रीजको मुख्य कार्यालय लागोसमा छ । सिमेन्ट र रिफाइनरी बाहेक यसको व्यवसाय चिनी, नुन, तेल, मल र प्याकेज गरिएको खानामा पनि फैलिएको छ । उनकाे सबैभन्दा ठूलो सम्पत्ति डाङ्गोटे तेल रिफाइनरी हो, जुन अफ्रिकाको सबैभन्दा ठूलो रिफाइनर हो । यो गत वर्षको सुरुमा सञ्चालनमा आएको थियो । यसको मूल्य लगभग २० अर्ब डलर छ र डाङ्गोटेको यसमा ९२.३ प्रतिशत हिस्सेदारी छ । यसमा एउटा मल कारखाना पनि छ जसले वार्षिक २८ लाख टन युरिया उत्पादन गर्छ । डाङ्गोटे समूहका धेरै कम्पनीहरू नाइजेरियन स्टक एक्सचेन्जमा सूचीबद्ध छन्। व्यवसाय कहाँ-कहाँ फैलिएको छ ? नाइजेरियामा ८६ प्रतिशत सिमेन्ट उत्पादन डाङ्गोटे सिमेन्टबाट हुन्छ । डाङ्गोटेको डाङ्गोटे सुगर, नास्कन एलाइड इन्डस्ट्रिज र युनाइटेड बैंक फर अफ्रिकामा पनि सेयर छ । यसबाहेक उनको लागोसमा छवटा आवासीय र व्यावसायिक सम्पत्तिहरू पनि छन् । सन् १९५७ मा कानोमा जन्मिएका डाङ्गोटेका हजुरबाले कोला र बदामको व्यापार गरेर धेरै सम्पत्ति कमाएका थिए । डाङ्गोटेले आठ वर्षको हुँदा आफ्नो बुबा गुमाए । इजिप्टको अल-अजहर विश्वविद्यालयबाट डिग्री हासिल गरेपछि उनी नाइजेरिया फर्किए र सिमेन्ट व्यवसायमा हात हाले । १९८१ मा उनले डाङ्गोटे समूह स्थापना गरेका थिए। १९८० र १९९० को दशकमा डाङ्गोटे आफ्नो व्यवसायलाई धेरै क्षेत्रहरूमा विस्तार गरे । १९९६ मा उनी उत्पादन अध्ययन गर्न ब्राजिल गए र त्यसपछि कम्पनीको ध्यान व्यापारबाट उत्पादनमा सरे । १९९९ मा उनले चिनी रिफाइनरी, पिठो मिल र पास्ता कारखानाहरू निर्माण गर्न थाले । एक वर्षपछि उनले सरकारबाट बेनु सिमेन्ट कम्पनी अधिग्रहण गरे । त्यसपछि उनले ओबाजाना सिमेन्ट प्लान्ट सुरु गरे, जुन आज उप-सहारा अफ्रिकाको सबैभन्दा ठूलो सिमेन्ट उत्पादन हाे ।
ट्रम्प राष्ट्रपति बनेसँगै साउदी राजकुमार खुसी, ६ सय अर्ब डलरको व्यापार गर्न इच्छुक
काठमाडौं । साउदी अरेबियाका युवराज मोहम्मद बिन सलमानले आफ्नो देशले आगामी ४ वर्षमा अमेरिकामा ६०० अर्ब डलरको लगानी र व्यापार गर्न इच्छुक रहेको घोषणा गरेका छन् । युवराज अमेरिकाको सत्तामा डोनाल्ड ट्रम्प आएसँगै निकै खुसी भएको अन्तर्राष्ट्रिय सञ्चारमाध्यमहरूले जनाएका छन् । यसअघि जो बाइडेन राष्ट्रपति हुँदा राजकुमारसँग उनको सम्बन्ध तिक्ततापूर्ण रह्यो । साउदी पत्रकार जमाल खशोग्गीको हत्याको सम्बन्धमा मानव अधिकारका मुद्दाहरूमा दुई जनाबीच विवाद भएको थियो । साउदी राजकुमारले बुधबार डोनाल्ड ट्रम्पसँग फोनमा कुरा गरेको र राष्ट्रपति बनेकोमा बधाई दिएको साउदी अरबको सरकारी समाचार एजेन्सीले जनाएकाे छ । मोहम्मद बिनले यदि धेरै अवसरहरू उपलब्ध भएमा यो लगानी योभन्दा पनि बढी हुन सक्ने उल्लेख गरे । साउदी राजकुमारले ट्रम्पलाई आफ्नो देश नयाँ प्रशासनको सुधारबाट सिर्जना भएका अवसरहरूको फाइदा उठाउँदै साझेदारी र लगानी गर्न खोजिरहेको बताएका थिए । ट्रम्पको पहिलो कार्यकालदेखि नै साउदी अरेबिया र अमेरिकाबीच धेरै घनिष्ठ सम्बन्ध रहेको छ । ट्रम्प र साउदी राजकुमार पश्चिम एसियामा शान्ति र स्थायित्व ल्याउन चाहन्थे । उनीहरूले आतंकवादसँग मिलेर लड्ने पनि मनसाय राखेका छन् । परिवर्तनको अवधिमा खाडी, ट्रम्प र मोहम्मद बिनको नजर यस विषयमा भने ह्वाइट हाउसले अहिलेसम्म कुनै वक्तव्य दिएको छैन । ट्रम्प र युवराजबीचको यो कुराकानी यस्तो समयमा भएको हो जब पश्चिम एशिया धेरै द्रुत गतिमा परिवर्तन भइरहेको छ । साउदी अरेबियाको प्रतिद्वन्द्वी इरान र इजरायल हमास र हिजबुल्लाहसँगको युद्धका कारण कमजोर भएका छन् । इरानका नजिकका सहयोगी बसर अल-असदले सिरियामा सत्ता छोडेका छन् । यसबाहेक गाजामा युद्धविराम भएको छ जसका कारण हमास र इजरायलबीचको लडाइँ रोकिएको छ । ६०० अर्ब डलरको प्रस्ताव गरेर साउदी राजकुमार ट्रम्पको साउदी अरेबिया भ्रमण सुनिश्चित गर्न चाहन्छन् भन्ने विश्वास गरिन्छ । २०१७ मा अमेरिकाको राष्ट्रपति बनेका ट्रम्पले पहिलो पटक साउदी अरेबियाको भ्रमण गरेका थिए । त्यसबेला पनि साउदी अरेबिया र अमेरिकाबीच एउटा ठूलो सम्झौता भएको थियो जसमा अर्बौं डलरको हतियार समावेश थियो । यसअघि ट्रम्पले साउदी अरेबियाले ४५० अर्ब वा ५०० अर्ब डलरको हतियार किन्यो भने उनी फेरि भ्रमण गर्न पाउँदा खुसी हुने बताएका थिए । अब साउदी राजकुमारले उनलाई अझ बढी ५०० बिलियन प्रस्ताव गरेका छन् ।
कुमारी बैंकका ग्राहकलाई लुम्बिनी मेडिकल कलेजमा २५ प्रतिशतसम्म छुट
काठमाडौं । कुमारी बैंक लिमिटेड र लुम्बिनी मेडिकल कलेज एण्ड टिचिङ हस्पिटल लिमिटेड, पाल्पाबीच सम्झाैता भएकाे छ । बैंकका ग्राहकलाई हस्पिटलबाट प्रदान गरिने सेवामा विशेष छुट प्रदान गर्ने सम्बन्धमा सम्झौता भएको हो । सम्झौताअनुसार हस्पिटलबाट प्रदान गरिने सेवामा ग्राहकलाई ओपीडी टिकट तथा सामान्य बेड शुल्कमा २५ प्रतिशत, आईसीयु, शल्यक्रिया तथा एक्स-रे/युएसजीमा १० प्रतिशत र ल्याब टेस्टमा ५ प्रतिशतसम्म छुट प्रदान गरिनेछ । विगत २३ वर्षदेखि कुमारी बैंकले आफ्ना देशभर रहेका ३०२ शाखा सञ्जाल, ३१६ एटिएम, ५० एक्सटेन्सन काउन्टर तथा ५४ शाखा रहित बैंकिङ इकाइहरूमार्फत आफ्ना ग्राहकलाई सेवा प्रदान गर्दै आइरहेको छ
६ महिनामा नेपालीले खाए ५० करोड रुपैयाँको विदेशी सुन्तला
काठमाडौं । चालु आर्थिक वर्षको ६ महिनाको अवधिमा ५० करोड रुपैयाँ बढीको सुन्तला आयात भएको छ । चालु आवको पौष मसान्तसम्म ५० करोड ६१ लाख ७१ हजार रुपैयाँको सुन्तला आयात भएको भन्सार विभागले जनाएको छ । विभागका अनुसार ७० लाख ४८ हजार ५३७ किलो सुन्तला आयात भएको छ । उक्त सुन्तला आयात हुँदा ९ करोड ७५ लाख रुपैयाँ बढीको राजस्व संकलन भएको छ । नेपालमा सुन्तला चीन, इजिप्ट, भारत र साउथ अफ्रिकाबाट आयात हुने गरेको भन्सार विभागको तथ्यांकले देखाएको छ । सबैभन्दा धेरै भारतबाट सुन्तला आयात भएको छ । भारतबाट ४० करोड ७५ लाख रुपैयाँ बढीको सुन्तला आयात भएको छ । साथै, दोस्रोमा इजिप्टबाट ४ करोड ६२ लाख रुपैयाँ बढीको आयात भएको छ । साउथ अफ्रिकाबाट २ करोड ८५ लाख रुपैयाँ र चीनबाट २ करोड ३७ लाख रुपैयाँ बढीको सुन्तला आयात भएको भन्सार विभागको तथ्यांकले जनाएको छ । भारतबाट ६२ लाख ४१ हजार किलो सुन्तला आयात भएको छ । साथै, चीनबाट १ लाख ९५ हजार किलो, इजिप्टबाट ४ लाख २७ हजार किलो र साउथ अफ्रिकाबाट १ लाख ८४ हजार किलो सुन्तला आयात भएको छ । भारतबाट सुन्तला आयात हुँदा ७ करोड ७५ लाख रुपैयाँ बढीको राजस्व संकलन भएको छ । साथै, चीनबाट ४७ लाख ४६ हजार, इजिप्टबाट ९४ लाख ७३ लाख र साउथ अफ्रिकाबाट ५७ लाख १७ हजार रुपैयाँ राजस्व संकलन भएको छ ।
हिमोफिलियाका बिरामीलाई निःशुल्क औषधी उपलब्ध गराउने मन्त्री प्रदीप पौडेलको निर्णय
काठमाडौं । रगत नजम्ने वंशाणुगत समस्या हिमोफिलिया रोगका बिरामीलाई निःशुल्क औषधी दिने स्वास्थ्य तथा जनसंख्यामन्त्री प्रदीप पौडेलले निर्णय गरेका छन् । निकै महँगो औषधी अवश्यक पर्ने रोगको उपचारका लागि धेरै बिरामी तथा सरोकारवालामार्फत सरकारले आफै व्यवस्था गर्न सरकारलाई आग्रह गर्दै आएका थिए । जटिल किसिमको वंशाणुगत तथा पछिसमेत देखिने यस रोगको उपचारका लागि आवश्यक औषधी अब स्वास्थ्य तथा जनसंख्या मन्त्रालयले मातहतका संघीय अस्पताल तथा प्रादेशिक अस्पतालका अलावा अन्य सरकारी अस्पतालबाट समेत उपलब्ध गराउनेछ । ‘विश्व हिमोफिलिया महासंघबाट अनुदान प्राप्त गरी सरकारी अस्पतालबाट बिरामीलाई उपलब्ध गराउने निर्णय गरेका छौं,’ मन्त्री पौडेलले भने, ‘धेरै पीडित तथा सरोकारवालाबाट महँगो उपचार सरकारमार्फत होस् भन्ने अनुरोध स्वीकार गरेका छौं ।’ स्वास्थ्य तथा जनसंख्या मन्त्रालयले यस औषधीका लागि राज्यकोषमा भार नपर्ने गरी विश्व हिमोफिलिया महासंघमार्फत प्राप्त गर्ने मन्त्रालयअन्तर्गतको नीति, योजना तथा अनुगमन महाशाखा प्रमुख डा. कृष्ण पौडेलले बताए । नेपालमा हाल करिब नौ सय जना यो रोगका बिरामीका रूपमा पहिचान भएका छन् । तर विश्व स्वास्थ्य संगठनले नेपालमा पहिचान हुन नसकेका यस्ता करिब ५ हजार बिरामी रहेको अनुमान गरेको छ । २०७८ को जनगणनामा २.२ प्रतिशतमा अपांगता देखिएका मध्ये ०.८ मा हिमोफिलिया भएको हुनसक्ने ठानिएको छ । मन्त्रालयले संघीय, सरकारी तथा प्रादेशिक तहमा मागका आधारमा औषधी उपलब्ध गराउने तयारी गरेको मन्त्री पौडेलको सचिवालयले जनाएको छ ।
केई एक्स थ्री प्रो अब ९९ किलोवाटमा उपलब्ध, सुरुआती मूल्य ४३ लाख ९६ हजार
काठमाडौं । केई मोटर्सको नेपालका लागि आधिकारिक विक्रेता लक्ष्मी ई मोबिलिटीले ९९ किलोवाट मोटर पावर क्षमताको केई एक्स थ्री प्रो ईभी नेपालमा भित्र्याएको छ । यसको सुरुआती मूल्य ४३ लाख ९६ हजार रुपैयाँ तोकिएको छ । यो अफर केही अवधिको लागि मात्रै लागू हुने बिक्रेताले जनाएको छ । कम्प्याक्ट एसयूभी सेगमेन्टमा यो सबैभन्दा अफोर्डेवल एसयूभी हुने कम्पनीको दावी छ । एक्स थ्री प्रो इलेक्ट्रिक सवारीसाधन मात्रै नभएर अत्याधुनिक प्रविधि, स्लिक डिजाइन र अतुलनिय पर्मफेन्सको संगमसमेत हो । यसमा ५३.६ किलोवाट आवर क्षमतायुक्त सीएटीएल (क्याटल) को लिथियम आइरन फस्फेट ब्याट्री जडान छ । जसले २६० एनएमसम्मको उच्चतम टर्क प्रदान गर्छ । सिंगल चार्जमा ३७० किलोमिटरसम्मको रेन्ज दिने यो एसयूभीको ब्याट्री फुल चार्ज गर्न ५ देखि ७ घण्टाको समय लाग्छ । यसलाई घरमा ७ किलोवाटको एसी चार्जर प्रयोग गरी ८ घण्टामा चार्ज गर्न सकिन्छ । त्यस्तै, डीसी फास्ट चार्जरको सहयोगमा ३० देखि ८० प्रतिशतसम्म चार्ज गर्न सकिन्छ । एक्स ३ प्रो ईभीको लम्बाई ४ हजार ४४३ एमएम, चौडाई १ हजार ८३१ एमएम र उचाई १ हजार ६४६ एमएम छ भने यसको ह्विलवेस २ हजार ६२२ एमएम छ । ५ सिट क्षमताको यो गाडीमा पर्याप्त इन्टेरियर स्पेस छ । केई एक्स ३ प्रोको फ्रन्टमा म्याकफर्सन इन्डिपेन्डेन्ट सस्पेन्सन र रियरमा मल्टी लिंक इन्डिपेन्डेन्ट सस्पेन्सन छ । यसको ग्राउन्ड क्लिरेन्स १८३ एमएम छ । विभिन्न पाँच कलर अप्सनमा केई एक्स ३ प्रो ईभीमा उपलब्ध छ । केई नेपालले भाटभटेनी नक्साल, धनगढी, नेपालगञ्ज, दाङ, भैरहवा, भरतपुर, हेटौडा, दमक र बिर्तामोडस्थित नौवटा शोरुम सञ्चालन गर्दैआएको छ ।
सिमेन्टको मूल्यमा मन्त्री र उद्योगीबीच मिलेमतोको आरोप, महासंघ भन्छ- सहमतिको हल्ला फैलाइयो
काठमाडौं । नेपाल निर्माण व्यवसायी महासंघले सिमेन्ट उत्पादक संघसँग सहमति नभएको बताएको छ । महासंघले उद्योग वाणिज्य तथा आपूर्तिमन्त्री दामोदर भण्डारीले बोलाएको र त्यसमा निर्माण व्यवस्था विकास परिषद् (नेकपा एमाले) को संगठन, लोकतान्त्रिक निर्माण व्यवसायी महासंघ, (नेकपा माओवादी), राप्रपाबाट समर्थित संगठन र निर्माण व्यवसायी महासंघसँग आवद्ध केही पदाधिकारीसमेत गरी ४ वटा निर्माण व्यवसाय त्यहाँ पुगेको जनाएको छ । गत आइतबार उद्योग वाणिज्य तथा आपूर्ति मन्त्रालयमै मन्त्री भण्डारी र वाणिज्य आपूर्ति तथा उपभोक्ता संरक्षण विभागका महानिर्देशक राजन पौडेलको उपस्थितिमा उनीहरूबीच छलफल भएपनि सहमति भने नभएकाे महासंघका अध्यक्ष रवि सिंहले विकासन्यूजसँग बताए । उनले उद्योग वाणिज्य तथा आपूर्तिमन्त्री भण्डारीले आफूहरूलाई यसबारे कुनै जानकारी नदिएको बताए । उनले भने, ‘आधिकारिक रूपमा हाम्रोतर्फबाट त्यहाँ कोही पनि गएका होइनन् । उनीहरू गए पनि व्यक्तिगत रूपमा गएका हुन सक्छन् । तर महासंघको निर्देशनमा हामी जान्छौं भनेर गएकाे होइन । उनीहरू त्यहाँ पुगेर महासंघका पूर्व पदाधिकारी भनेर बसेछन् । हामीलाई यसबारे कुनै जानकारी नै भएन । बोलाएको पनि छैन ।’ अध्यक्ष सिंहले उनीहरूले यो सहमति गरेको कुरा हिजो बुधबार लेखा समितिको बैठकमा उल्लेख गरेकाले थाहा पाएकाे बताए । उनले मंसिर १८ गते मन्त्रीको रोहबरमा सहमति गराएको र त्यो सहमति मन्त्रीले कार्यान्वयनमा ल्याउन नसकेको आक्रोश व्यक्त गरे । अध्यक्ष सिंहले भने, ‘जति सक्छौं लुट भन्नुबाहेक अरू विकल्प छैन । जबकि मन्त्रीले आफ्नो मातहतमा रहेको छलफललाई एक महिनाभन्दा बढी बितिसक्दा पनि कार्यान्वयन नगरी छलफल नै भनेर बसेका छन् । यसमा सिमेन्ट उद्योगी र सरकार दुबैको मिलोमत छ भन्ने बुझ्नुपर्छ ।’ उनले उद्योगमन्त्रीले सिमेन्ट उद्योगीलाई सहयोग गरिहेको बताउँदै सिमेन्ट उद्योगीलाई नाफा गराइरहेको आरोप लगाए । जनतालाई उनीहरूले अपहेलना गरेको जिकिर उनले गरे । अध्यक्ष सिंहले भने, ‘मंसिर १८ गते जुन सहमति भएको थियो । त्यहींअनुसार चल्नुपथ्यो । ४४० रुपैयाँमा पीपीसी सिमेन्ट र ५४० मा ओपीसी सिमेन्ट उपलब्ध गराउने गरी सहमति भएको थियो । तर यो लागू भएन । अब हामीबाट जुन रकम लिनुभएको छ, सिमेन्ट उद्योगीहरूले त्यो रकम फिर्ता गर्नुपर्छ ।’ उनले उद्योगीहरूले ४४० रुपैयाँमा पीपीसी सिमेन्ट र ५४० रुपैयाँ ओपीसी सिमेन्ट मूल्यबाहेक बाँकी ठगेको मूल्य फिर्ता गर्नुपर्ने माग गरे । अध्यक्ष सिंहले उपप्रधानमन्त्री तथा विभिन्न मन्त्रीहरू, पार्टीका अध्यक्षलगायत अन्य निकायसमक्ष ज्ञापनपत्र बुझाइसकेको जानकारी दिए । आगामी १५ गतेसम्म अल्टिमेटम दिइएको र त्यसअघिसम्म कसैले आफूहरूका माग सम्बोधन नगरे आन्दोलनका कार्यक्रम अघि बढ्ने उनले जानकारी दिए । सिमेन्ट उद्योगीहरूले निर्माण व्यवसायीहरूले आफूहरूविरुद्ध द्वन्द्व बढाउने काम गरिरहेको बताएको छ । नेपाल सिमेन्ट उत्पादक संघका महासचिव केशव उप्रेतीले भने, ‘हामीले कहिले पनि हुँदैन भनेका छैनौं । जुन सहमति भएको छ, त्यहींअनुसार हामीले सिमेन्ट उपलब्ध गराइरहेका छौं । त्यो सबै हावा कुरो हो ।’ उनले उद्योगमन्त्रीले जुन सहमति गरेका थिए त्यहींअनुसार सिमेन्ट उपलब्ध गराइरहेको दाबी गरे । उनले निर्माण व्यवसायीहरूले यसलाई ठूलो इस्सु बनाउँदै लगिरहेको उनको भनाइ । यसैगरी, यता सार्वजनिक लेखा समितिले पनि सिमेन्टको मूल्यवृद्धि तत्काल नियन्त्रण गर्न सरकारलाई निर्देशन दिएको छ । बुधवार बसेको संघीय संसद अन्तर्गतको सार्वजनिक लेखा समितिले पछिल्लो समय अस्वाभाविक रूपमा बढेको सिमेन्टको मूल्यमा सरकारले हस्तक्षेप गरी नियन्त्रण गर्न सरकारलाई निर्देशन दिएको बताइएको छ । समिति सभापति ऋषिकेश पोखरेलले समितिले हाल सिमेन्टको मूल्यमा अस्वाभाविक मूल्यवृद्धि भएको निष्कर्षमा समिति पुगेकाले तत्काल नियन्त्रण गर्न उद्योग वाणिज्य तथा आपूर्ति मन्त्रालयलाई निर्देशन दिए ।
