सिद्धबाबा सुरुङमार्गको भोलि ब्रेकथ्रू, एक वर्षभित्र गाडी चल्ने
काठमाडौं । सिद्धार्थ राजमार्गअन्तर्गत निर्माण भइरहेको सिद्धबाबा सुरुङमार्गको ब्रेकथ्रु शुक्रबार हुँदैछ । सुरुङमार्ग ब्रेकथ्रु प्रधानमन्त्री केपी शर्मा ओलीले गर्ने कार्यक्रम रहेको आयोजनाले जनाएको छ । प्रधानमन्त्रीबाट अन्तिम ब्रेकथ्रू गर्ने कार्यक्रमको सबै तयारी भएको आयोजनाका प्रमुख कृष्णराज अधिकारीले जानकारी दिए । कार्यक्रममा प्रधानमन्त्रीसँगै भौतिक पूर्वाधारमन्त्री देवेन्द्र दाहाल मन्त्रालयका सचिवलगायत अन्य सरकारी अधिकारी उपस्थित हुने जनाइएको छ । अधिकारीका अनुसार हालसम्म सुरुङमार्गको भौतिक ४० प्रतिशत भएको छ भने वित्तीय प्रगति ३९.९ प्रतिशत सम्पन्न भइसकेको छ । हाल टनेलको ढलान र लाइटिङको काम भइरहेको छ । उनले भने, ‘भौतिक कार्यहरूमा १ हजार १ सय २६ मिटरको मेन टनेल खन्ने काम सकिएको छ । पेन्टिङ तल लेभल मिलाउने, टनेलको दुबैतिरबाट छिचोलिने काम भोलिदेखि जोडिनेछ । बाँकी प्राविधिक भवन, कङ्क्रिटको लाइन, बिजुलीको काम, सेफ्टी, भेन्टीलेन्सनलगायत यी सबै कामहरू भइरहेको छन् ।’ प्रमुख अधिकारीले मेन टनेल बाइपाससहित गरेर जम्मा टनेल १ हजार ५ सय ३० रहेको जानकारी दिए । उक्त सुरुङमार्गको सम्झौता सन् २०२२ मा भएको थियो । यो सुरुङमार्ग २०२७ मार्चसम्ममा बनाइ सक्ने लक्ष्य लिइएको छ । उनका अनुसार कुनै रोकावट नभए र हालकै गतिमा काम भयो भने अबको एक वर्षभित्र टनेल सञ्चालमा आउने र गाडी गुड्ने दाबी गरे । उनले त्यसपछि ४८० मिटर रकसेटसहित टनेलको बाहिरपट्टि काम थालिने उनको भनाइ छ । उनले भने, ‘चिडियाखोलादेखि दोभानसम्म जम्मा २ हजार ३ सय ९५ मिटर सडक रकसेट निर्माण हुनेछ । हामी काम गर्ने टोली त्यही बसेर सातै दिन २४ घण्टा रकसेटसहित मर्मत गर्नेछौं । त्यहाँ दुईवटा बिल्डिङ र कन्ट्रोल सिस्टमहरू हुनेछन् । काम गर्ने टोली छिर्ने ठाउँमा २ वटा पोर्टलहरू बनाइनेछ । जसमा साउथ र नर्थ रहनेछन् । अतिरिक्त आकस्मिक सेवाका लागि साउथ र नर्थ पोर्टलमा दुईवटा हेलिप्याड हुनेछन् ।’ उक्त सुरुङमार्ग १ हजार १ सय २६ किलोमिटर सिद्धबाबा मन्दिरदेखि दोभानसम्म रहेको जनाइएको छ । हाल सुरुङमार्गको काम निरन्तर रूपमा चलिरहेको उनले बताए । प्रमुख अधिकारीले भने, ‘हाल अस्थाई सपोर्ट दिएर सुरुङमार्गको काम भैरहेको छ । लाइनिङको काम बाँकी नै छ ।’ कति छ बजेट, कति भयो खर्च ? दोभानदेखि चिडियाखोलासम्म ४ किमि सडक अत्यधिक पहिरोग्रस्त मानिन्छ र यसलाई ‘मृत्युमार्ग’ का रूपमा समेत परिचय दिन थालेपछि सरकारले सुरुङमार्गको अध्ययन गरेर बजेट व्यवस्था गरेको थियो । सिद्धबाबा सुरुङका लागि २०७७ साल मंसिर १ मा मन्त्रिपरिषद् बैठकले बजेट सहमति प्रदान गरेको थियो । २०७८ साल जेठ ९ मा सडक विभागले ग्लोबल टेन्डरमार्फत ठेक्का आह्वान गरेको थियो । सोहीअनुसार कम बजेट प्रस्ताव गर्ने चिनियाँ कम्पनी सीएससीईसीले सुरुङ निर्माणको जिम्मेवारी पाएको छ । यसमा जम्मा बजेट ७ अर्ब ३४ करोड रहेको आयोजनाले जनाएको छ । हालसम्म ३९ प्रतिशत अर्थात २ करोड ८६ लाख खर्च भइसकेको छ । आयोजनामा हाल बजेटको अभाव नभएको अधिकारीको भनाइ छ । नारायणगढ-बुटवल सडक खण्डको कामको ठेक्का पाएकै कम्पनीले सुरुङमार्गको काम गरिरहेको छ । कति छन् कामदार ? प्रमुख अधिकारीका अनुसार सिद्धबाबा सुरुङमार्गमा १ सय ५० बढी कामदारहरूले काम गरिरहेका छन् । दुवैतिरको भाग छिचोलिएपछि नाली निर्माण, भेन्टिलेसन, लाइट जडान, सडक कालोपत्रे र अन्तिम लाइनिङको काम भइरहेको छ । विस्फोटक पदार्थ प्रयोग गरेर काम गर्न थालिएपछि निर्माणले गति लिएको बताइएको छ । नागरिकहरू पश्चिम क्षेत्रमा निर्माण भइरहेको यो एकमात्रै सुरुङमार्ग भएकाले उत्साहित छन् । उक्त सुरुङमार्गबाट लुम्बिनीसहित गण्डकी प्रदेशका नागरिकहरू प्रत्यक्ष लाभान्वित हुनेछन् । वर्षाको समयमा मृत्युमार्गको रूपले चिनिने सिद्धबाबा सडक सुरुङमार्ग निर्माणले केही राहत मिल्ने यात्रुले आशा राखेका छन् । सुरुङमार्गको कुल लम्बाइ १.१२६ किलोमिटर यो सुरुङमार्गको पोर्टल बुटवल-तानसेन सडकखण्डमा रहेको सिद्धबाबाको मन्दिरस्थित चिडियाखोलानजिकै हुने सडक विभाग अन्तर्गत गुणस्तर अनुसन्धान तथा विकास केन्द्रका सूचना अधिकारी प्रदीप भण्डारीले बताए । उनले दुई लेनको हुने यस सुरुङमार्गको कुल लम्बाइ १.१२६ किलोमिटर रहने जानकारी दिए । सुरुङमार्गको निर्माण ‘एसियन हाइवे स्ट्यान्डर्ड’ को हुने उनको भनाइ छ । सुरुङमार्ग ५ वर्षसम्म सञ्चालन र मर्मतसम्भार गर्ने जिम्मेवारी ठेक्का पाउने कम्पनीकै हुनेछ । सूचना अधिकारी भण्डारीले सुरुङमार्ग प्रयोग गरी सवारीसाधन गुडाउनेले शुल्क तिर्नुपर्ने वा नपर्ने विषयमा अहिले मोडालिटी तयार नभएको बताए । ‘सुरुङमार्ग निर्माणकै क्रममा रहेको छ । यसको प्रयोग गर्ने सवारीसाधनले शुल्क तिर्नुपर्ने वा नपर्ने विषयमा अहिले मोडालिटी तयार भएको छैन । सुरुङमार्गमा ६० किलोमिटर प्रतिघण्टाको दरले सवारीसाधन गुडाउन पाइने व्यवस्था रहेको छ,’उनले भने । सिद्धबाबाको अति जोखिम झन्डै पाँच किलोमिटर क्षेत्रमध्ये उपल्लो सिद्धबाबादेखि रामापिथेकस पार्कसम्म सो सुरुङमार्ग निर्माण भइरहेको हो ।
विदेशबाट पठाएको रकम ‘आईएमई पे’ बाट प्राप्त गर्दा ५०० रुपैयाँ बोनस
काठमाडौं । विदेशबाट ‘आईएमई पे’ मार्फत नेपाल पठाएको रकम प्राप्त गर्दा ५०० रुपैयाँ बोनस प्राप्त गर्न सकिने भएको छ । विश्वको जुनकुनै देशबाट आईएमई पे मार्फत नेपाल पठाएको पैसा प्राप्त गर्दा ५०० रुपैयाँ बोनस प्राप्त गर्न सकिने आईएमई पे ले जनाएको छ । आईएमई पेमा रकम प्राप्त गर्दा १० हजार रुपैयाँसम्ममा ७५ रुपैयाँ बोनस प्राप्त हुनेछ । त्यस्तै, कारोबारको रकम अनुसार ५० हजार, एक लाख र दुई लाखसम्म क्रमशः १००, २०० र ५०० रुपैयाँसम्म बोनस प्राप्त गर्न सकिनेछ । कारोबारमा संलग्न एकजनाले महिनाको दुई पटकसम्म बोनस प्राप्त गर्न सक्नेछन् । यो योजना मार्फत आईएमई पेमा रकम प्राप्त गर्दा बोनस मात्रै नभएर रकम सुरक्षित तवरले घरसम्मै पुग्ने विश्वासको समेत वृद्धि हुने कम्पनीले जनाएको छ । विदेशबाट पठाएको रकम आईएमई पे मार्फत प्राप्त गर्दा बोनस प्राप्त गर्न सकिने योजना निकै उपलब्धिमूलक बन्न सक्ने आईएमई पेका प्रमुख कार्यकारी अधिकृत प्रविण रेग्मीले जानकारी दिए ।
राष्ट्रिय वाणिज्य बैंकको ६० औं वार्षिकोत्सव सम्पन्न
काठमाडौं । राष्ट्रिय वाणिज्य बैंक लिमिटेडको ६० औं वार्षिकोत्सव समारोह बिहीबार एक समारोहका बीच सम्पन्न भएको छ । कार्यक्रममा माननीय अर्थमन्त्री विष्णुप्रसाद पौडेलले मुलुकको अर्थतन्त्र केही समयदेखि दबाबमा रहेको तर अहिले सुधार हुँदै गएको बताए । अहिलेको बढ्दो तरलतालाई बैंकले उत्पादन र रोजगारी सृजनामा अगाउन आग्रह गर्दै औसत कार्य भन्दा असाधारण कार्य गर्नको लागि अनुरोध गरे । उनले राष्ट्रिय वाणिज्य बैंक परिवारलाई अरू बैंकलाई उछिन्ने गरी कार्य गर्नका लागि शुभकामना दिए । प्रमुख अतिथि एवं माननीय उपप्रधानमन्त्री तथा अर्थमन्त्री विष्णुप्रसद पौडेलले बैंकको ६० औं वार्षिककोसवको अवसरमा प्रकाशन गरिएको विशेषाङ्क स्मारिका उपहार २०८१ विमोचन गरेका थिए । बैंकको ६० औं वार्षिककोसवको अवसरमा राष्ट्रिय वाणिज्य बैंकका हालै सञ्चालनमा आएका २७ वटा शाखा कार्यालयहरुको बटम थिचेर डिजिटल माध्यमबाट औपचारिक रुपमा उद्घाटन गरे । अर्थमन्त्री पौडेलले कार्यक्रममा कोहलपुर र महेन्द्रनगरमा नवनिर्मित भवनहरुको स्वीच थिचेर डिजिलट माध्यमबाट उद्घाटन गरे । कार्यक्रममा पूर्वकर्मचारी सम्मान कार्यक्रमका साथै उत्कृष्ट शाखा कार्यालय, सर्वोत्कृष्ट÷उत्कृष्ट बैंक सेवा पुरस्कार घोषणा गरिएको थियो । कार्यक्रममा नेपाल राष्ट्र बैंकका गभर्नर महाप्रसाद अधिकारीले विभिन्न आरोह आवरोह पार गर्दै आएको यो बैंकको अहिलेको अवस्था गर्व गर्न लायक भएको बताए । यो बैंकको पुँजीको विकासको लागि आउने प्रस्तावप्रति राष्ट्र बैंक उदार रहेको बताए । बैंक सञ्चालक समितिका अध्यक्ष दिलीपकुमार ढुङ्गानाले नेपाल सरकारले प्राथमिकताप्राप्त क्षेत्र धनी घोषणा गरेका क्षेत्रहरु जस्तै कृषि, उर्जा, पर्यटन तथा उत्पादनशील क्षेत्रमा कर्जा प्रवाह गर्न बैंक निरन्तर लागि परेको बताए । उनले यस बैंकले सुन खरीद बिक्री गर्ने कार्य समेत सुरु गरेको बताउँदै बैंकिङ सेवा सुविधाहरूमा गुणस्तरीयता अभिवृद्धि गर्दै अझ बढी विश्वसनीय, सुरक्षित, प्रविधियुक्त तथा ग्राहकमैत्री बनाउन प्राथमिकताका साथ कार्य गरिरहेको बताए । बैंकका प्रमुख कार्यकारी अधिकृत (सीईओ) देवेन्द्ररमण खनालले बैंकको वर्तमान स्थिति र समग्र योजनाको बारेमा जानकारी गराउनु हुँदै हामीले भर्खरै आर्थिक वर्ष २०८०/०८१ को वार्षिक लेखापरीक्षण सम्पन्न गरी २०८१ पौष २९ गते १९ औं वार्षिक साधारण सभा सम्पन्न गरिसकेको जानकारी गराए । २०८१ पौष मसान्तमा बैंकको कुल निक्षेप ४ खर्ब ५० अर्ब रुपैयाँ, कुल कर्जा सापट २ खर्ब ८४ अर्ब रुपैयाँ, चुक्तापुँजी १५ अर्ब ६३ करोड, कुल सम्पत्ति ५ खर्ब २६ अर्ब तथा नेटवर्थ ५२ अर्ब पुगेको छ । उनले २०८१ पौष मसान्तमा बैंकको कोषको लागत ३.८१ प्रतिशत तथा आधारदर ५.४४ प्रतिशत रहेको बताए । यसैबीच बैंकको ६०औं वार्षिकोत्सवको पूर्वसन्ध्यामा बैंकको केन्द्रीय कार्यालय परिसरबाट वित्तीय साक्षरताका लागि प्रभातफेरि कार्यक्रमको आजै बिहान आयोजना गरिएको छ । बैंक सञ्चालक समितिका अध्यक्ष दिलीपकुमार ढुङ्गाना तथा प्रमुख कार्यकारी अधिकृत देवेन्द्ररमण खनालले बैंकको ६०औं वार्षिकोत्सवको अवसरमा शुभकामना मन्तव्य व्यक्त गर्दै सर्वसाधारण प्रति बैंकिङ्ग संचेतना गर्ने उद्धेश्यले समाज प्रतिको उत्तरदायीत्व बहन गर्दै बैंकले वित्तीय साक्षरताका लागि प्रभातफेरी कार्यक्रमको आयोजना गरिएको बताए । बैंकको केन्दीय कार्यालयबाट शुरु भएको उक्त कार्यक्रममा वित्तीय साक्षरता सम्बन्धी बैंकको लोगो अंकित विभिन्न प्लेकार्ड बोकेर बाजागाजा व्यानर सहित भद्रकाली, शहिदगेट, न्युरोडगेट, रत्नपार्क, राष्ट्रिय सभागृह मोड र पुनः भद्रकाली हुदैं केन्द्रीय कार्यालयमा पुगेर समापन भएकोे थियो । आज भन्दा ६० वर्ष अघि २०२२ साल माघ १० गते मुलुकको आर्थिक क्षेत्रकोे विकासमा टेवा पु¥याउने उद्धेश्यका साथ स्थापना भएको यो बैंकसँग कारोवार गर्ने कुल ग्राहकको संख्या करिब ४६ लाख भन्दा बढी पुगेको छ भने भौगोलिक उपस्थितिको हिसाबले ७ वटै प्रदेशका ७७ वटै जिल्ला र सबै जिल्ला सदरमूकाममा समेत गरी जम्मा २९४ शाखा कार्यालयहरु सञ्चालनमा रहेका छन् । डिजिटल बैंकिङ्ग क्षेत्रमा समेत बैंकले उल्लेखनीय फड्को मारेको छ । कार्यक्रममा बैंकका शेयरधनीहरु, नेपाल राष्ट्र बैंकका कार्यकारी निर्देशकहरु, बैंक सञ्चालक समितिका सदस्यहरु, पूर्व अध्यक्षहरु, पूर्व प्रमुख कार्यकारी अधिकृतहरु, विभिन्न संस्थानहरुका प्रमुखहरु, बैंकका नायव प्रमुख कार्यकारी अधिकृतहरु, उपकार्यकारी अधिकृतहरु, विभागीय प्रमुखहरु, उपप्रमुखहरु, शाखा प्रबन्धकहरु लगायत कर्मचारीहरुको भव्य उपस्थिति रहेको थियो ।
थानकोटदेखि धुलिखेलसम्म बस सेवा सञ्चालनमा
काठमाडौं । महानगर यातायात प्रालीले चन्द्रागिरि प्राथमिक अस्पताल थानकोटदेखि धुलिखेलसम्म बस सेवा सञ्चालनमा ल्याएको छ । चालीस वटा सार्वजनिक बस सेवाले विशेष गरी पर्यटकीयस्थल चन्द्रागिरि र धुलिखेलका बीचमा आवतजावत गर्न सजिलो हुने अपेक्षा गरिएको छ । आजदेखि शुभारम्भ गरिएको सो बस सेवा हालका लागि चन्द्रागिरि– गोदाम –चेक पोष्ट –गुर्जुधारा – सतुगंल– कलङ्की –बल्खु– कोटेश्वर –भक्तपुर – बनेपा – धुलिखेलसम्म सञ्चालनमा आउने छन् । चन्द्रागिरि नगरपालिकाका प्रमुख घनश्याम गिरीले ‘प्राथमिक अस्पताल थानकोट–धुलिखेल यातायात सेवा’को शुभारम्भ गर्दै चन्द्रागिरि र धुलिखेलका बीचमा आवतजावत गर्न बस सेवाले सजिलो हुने अपेक्षा व्यक्त गरे । उनले नगरभित्रको सार्वजनिक यातायातलाई सुधार गर्न नगरपालिकाले उच्च प्राथमिकता दिएको जानकारी दिए ।
महालक्ष्मी विकास बैंक बिजचित्र फोटोग्राफी प्रतियोगिता संस्करण- २ को पुरस्कार वितरण सम्पन्न
काठमाडौं । महालक्ष्मी विकास बैंकले अगस्ट १९ मा मनाइने विश्व फोटोग्राफी दिवसको अवसरमा आयोजना गरेको ‘महालक्ष्मी विकास बैंक बिजचित्र फोटोग्राफी प्रतियोगिता- संस्करण २’ को पुरस्कार वितरण कार्यक्रम सम्पन्न भएको छ । काठमाडौंमा आयोजित एक कार्यत्रमका बीच प्रथम, द्वितीय र तृतीय स्थान हासिल गर्नेलाई पुरस्कार वितरण गरियो । उक्त प्रतियोगितामा सुवास श्रेष्ठ प्रथम, शौरभ बज्राचार्य दोस्रो र पारसराज बर्जाचार्य तेस्रो हुन सफल भए । विजेताले प्रमाणपत्रका साथमा क्रमश: २० हजार, १५ हजार र १० हजार रुपैयाँको नगद पुरस्कार प्राप्त गरे । पब्लिक च्वाईसमा सबैभन्दा बढी भोट प्राप्त गरी घनश्याम श्रेष्ठले पब्लिक च्वाइस अवार्ड जित्न सफल भए । उनले प्रमाणपत्रको साथै ५ हजार रुपैयाँ प्राप्त गरेका छन्। यसका साथै पुरस्कार वितरण कार्यक्रममा बैंकको तर्फबाट उत्कृष्ट १५ फोटोग्राफरहरूलाई प्रमाणपत्र प्रदान गरिएको थियो । उक्त प्रतियोगितामा सहभागी हुनका लागि स्थानीय साना तथा मझौला व्यापारहरू झल्कने फोटोहरू खिचेर पठाउनुपर्ने नियमअनुसार विभिन्न फोटोग्राफरमार्फत विभिन्न फोटोहरू प्राप्त भएका थिए । प्रतियोगितामा समावेश सम्पूर्ण फोटोहरू उत्कृष्ट तथा स्थानीय तहमा सञ्चालित व्यवसायहरु मार्फत सकारात्मक सन्देश प्रदान गर्ने खालका थिए । प्रतियोगिताको मूल्याङ्कनको लागि छानिएको ३ सदस्यीय निर्णायक समिति मार्फत १५ वटा उत्कृष्ट तस्बिरहरू छानिएको थियो । यस्ता कार्यहरुबाट स्थानीय व्यवसाय, उद्यमशिलता, स्थानीय कलाको प्रबद्र्धन तथा प्रचारप्रसार गर्न सहयोग पुग्ने विश्वास बैंकले लिएको छ ।
गृहमन्त्री लेखक र एडीबी निर्देशकबीच भेटवार्ता
काठमाडौं । गृहमन्त्री रमेश लेखक र एसियाली विकास बैंक (एडीबी)का यहाँस्थित देशीय निर्देशक आर्नो कोस्वाबीच बिहीबार भेटवार्ता भएको छ । सिंहदरबारस्थित गृहमन्त्रालयमा भएको भेटवार्तामा गृहमन्त्री लेखकले भौतिक पूर्वाधार निर्माणमा एडीबीले पुर्याएको योगदानप्रति धन्यवाद ज्ञापन गरे । साथै मन्त्री लेखकले पूर्व-पश्चिम राजमार्गको गड्डाचौकी-कोहलपुर खण्ड स्तरोनन्ति, सुदूरपश्चिमको महत्त्वपूर्ण व्यापारिक नाकाका रूपमा विकास गर्न थालिएको महाकाली करिडोरको सडक निर्माणमा सहयोग, कैलालीको गोदावरीदेखि डडेल्धुरासम्मको सडक स्तरोन्नती, भारतीय सहयोगमा निर्माणको प्रक्रियामा रहेको दोधारा चादँनी सुख्खा बन्दरगाह वरपर अन्य भौतिक संरचना निर्माण गरी नमूना सुख्खा बन्दरगाह निर्माणमा सहयोग गर्न एडीबीसित आग्रह गरे । त्यसैगरी, मन्त्री लेखक र एडिबी निर्देशक कोस्वाबीच सुदूरपश्चिम पालिकामा एडीबीको सहयोगमा बनिरहेका आधुनिक सहरको निर्माणलाई थप निरन्तरता र सुदूरपश्चिमको धार्मिक पर्यटकीय क्षेत्रको पूर्वाधार विकासमा सहयोगका विषयमा छलफल भएको छ। एडीबी प्रतिनिधिसितको छलफलमा मन्त्री लेखकले गत वर्ष एडिबीले सुदूरपश्चिमको पर्यटकीय विकासका लागि गरेको ‘सर्वे रिपोर्ट’ कार्यान्वयनमा समेत जोड दिए । एडीबीका निर्देशक कोस्वाले उक्त विषयमा एडीबीको माथिल्लो तहसित छलफल गरी जवाफ दिने बताए ।
चीनमा हरेक वर्ष १ करोड २८ लाख ईभी बिक्री
काठमाडौं । हालैका महिनाहरूमा विश्वभर विद्युतीय कार (ईभी) को बिक्री प्रभावित भएको छ । तर चीन पछिल्लो १० वर्षदेखि विद्युतीय कार बिक्रीको हिसाबले नम्बर १ रहेको देश रहँदै आएको छ । चीनसँग त्यस्तो के छ जसले गर्दा त्यहाँका मानिसहरूले यति धेरै विद्युतीय कारहरू किनिरहेका छन् ? वास्तवमा विद्युतीय कारको बिक्रीमा चार्जिङ स्टेशनहरूले महत्त्वपूर्ण भूमिका खेल्छन् र चीन यस सन्दर्भमा अग्रणी छ । चीनमा नयाँ ऊर्जा सवारीसाधन अर्थात् विद्युतीय सवारीसाधनको बिक्रीलाई केही तथ्याङ्कहरूमार्फत हेरौं। चीनमा विद्युतीय कारको वार्षिक उत्पादन १ करोड २८ लाख ८८ हजार युनिट छ र सबैभन्दा रोचक कुरा के छ भने तीमध्ये १ करोड २८ लाख ६६ हजार युनिट प्रत्येक वर्ष बिक्री हुन्छन् । विद्युतीय सवारीसाधनसँग सम्बन्धित प्रदर्शनी र राम्रो चार्जिङ पूर्वाधारका साथै राम्रो प्रणालीका कारण त्यहाँ मानिसहरूले ठूलो संख्यामा विद्युतीय कारहरू किनिरहेका छन् । चीनमा विशेषगरी बीवाईडी कम्पनीका कारहरू निकै लोकप्रिय छन् । सुविधासम्पन्न विद्युतीय कार चीनमा विद्युतीय कारहरूको औसत एकल चार्ज दायरा ५०० किलोमिटर छ । चीनमा १ करोड २८ लाख १८ हजार चार्जिङ पाइल र ४ हजार ४४३ ब्याट्री स्वाप स्टेशनहरू छन् । त्यसैले मानिसहरूले आफ्नो कारको ब्याट्री सकिएमा कहाँ चार्ज गर्ने भनेर चिन्ता लिनु पर्दैन । विभिन्न स्थानहरूमा द्रूत चार्जिङको सुविधाले ईभी गाडी किनाउन उल्लेखनीय वृद्धि गरेको छ । नयाँ प्रविधि र राम्रा नीति चीन पछिल्लो १० वर्षदेखि नयाँ ऊर्जा सवारीसाधनको उत्पादन र बिक्रीमा विश्वको नम्बर एक स्थानमा रहेको छ । यो जानकारी चीनको उद्योग तथा सूचना प्रविधि मन्त्रालयका उपमन्त्री चियाङ युनमिङले दिएका हुन् । २०२४ मा चीनले १ करोड २८ लाखभन्दा बढी विद्युतीय कारहरू उत्पादन र बिक्री गर्यो । यसका साथै ब्याट्री बनाउने सामग्री र पावर ब्याट्रीको उत्पादनमा पनि चीनले विश्वमा आफ्नो प्रभुत्व कायम राखेको छ । चिनियाँ सरकार नयाँ प्रविधि र नीतिहरू मार्फत यस क्षेत्रमा आफ्नो विकासलाई निरन्तरता दिन चाहन्छ । चीनको प्रभुत्व चीनमा बनेका विद्युतीय कारहरू ७० भन्दा बढी देशहरूमा निर्यात गरिन्छ । चीनमा बनेका विद्युतीय सवारीसाधन पहिलेभन्दा राम्रो र लामो समयसम्म टिक्ने भएका छन् । विश्वमा प्रयोग हुने ७० प्रतिशत ब्याट्री सामग्री र ६० प्रतिशत पावर ब्याट्रीहरू चीनबाट आउँछन्। चीनमा चार्जिङ सुविधा पनि राम्रो छ । त्यहाँ १.२८ करोडभन्दा बढी चार्जिङ पोइन्ट र ४ हजार ४४३ ब्याट्री स्वाप स्टेशनहरू छन् । यो विश्वको सबैभन्दा ठूलो चार्जिङ नेटवर्क हो। चीनमा पनि द्रुत चार्जिङ प्रविधि उपलब्ध छ, जसको मद्दतले कारको ब्याट्री मात्र १५ मिनेटमा ८० प्रतिशतसम्म चार्ज हुन्छ । इन्डिया मोबिलिटी ग्लोबल एक्स्पो- २०२५ मा ईभीको प्रभुत्व, भिनफास्ट र बीवाईडीमा धेरै आकर्षण भारतीय कार निर्माताले २०२५ मा ईभी बजार बिस्तार गर्ने, मागको भने कमी बीवाईडीको इन्डोनेसिया प्लान्ट यस वर्षको अन्त्यमा सम्पन्न हुने, बर्सेनि डेढ लाख ईभी उत्पादन हुने अटो उद्योगको निद्रा बिथोल्ने बीवाईडी, जसको रोकिने नामोनिशान छैन चीनमा इभीको वर्चश्व बढ्दै, अरू विदेशी कम्पनी टिक्न सकस बेलायतमा ईभीको वर्चश्व बढ्दै, आगामी दशकसम्म पेट्रोलबाट चल्ने कारको संख्या आधा घट्ने
११ अंकले घट्यो सेयर बजार, ७ अर्ब बढीको कारोबार
काठमाडौं । साताको अन्तिम कारोबार दिन बिहीबार सेयर बजार घटेको छ । नेपाल स्टक एक्सचेन्ज (नेप्से) का अनुसार आज नेप्से ११.१० अंकले घटेर २६५४.३५ बिन्दुमा कायम भएको छ । आज ३१८ स्टकको ८४ हजार ७ पटक कारोबारमा एक करोड ५१ लाख ५ हजार ३३ सेयर खरिद-बिक्री हुँदा ७ अर्ब ८५ करोड बढी रुपैयाँ बराबरको कारोबार भएको छ । आज ८६ कम्पनीको सेयर मूल्य बढ्दा १५० वटाको घटेको छ भने ७ कम्पनीको मूल्य स्थिर रहेको छ । १३ उपसमूहमध्ये विकास बैङ्कमा हरियाली छाउँदा निर्माण कम्पनीहरू सामान्य बढेका छन् भने अन्य उपसमूह राताम्मे छन् । कारोबार रकमको आधारमा सप्तकोशी डेभलपमेन्ट बैंकको सर्वाधिक ३० करोड ७९ लाख बढी रुपैयाँको कारोबार भएको छ । दोस्रोमा एनआरएन इन्फ्रास्ट्रक्चरको २१ करोड ३८ लाख, मार्दी हाइड्रोपावरको १९ करोड ५५ लाख, सिन्धु विकास बैंकको १७ करोड १६ लाख र हिमालयन रिइन्स्योरेन्सकाे १६ करोड ८६ लाख रुपैयाँ बढीको कारोबार भएकाे छ ।
