झापामा नवीकरणीय ‘पेलेट ऊर्जा’ उत्पादन, भारत निर्यात गरिने
काठमाडौं । खेर गइरहेको स्थानीय स्रोत र साधनको सदुपयोग गरेर झापाको मेचीनगर नगरपालिका-१५ ज्यामीरगढीमा नवीकरणीय ऊर्जा ‘पेलेट’को उत्पादन सुरु गरिएको छ । ‘पेलेट ऊर्जा’लाई वातावरणमा न्यून असर पार्ने इन्धनको स्रोत मानिँदै आएको हुँदा यसलाई पत्थर कोइला, दाउरा र अन्य खनिज इन्धनको विकल्पका रूपमा मानिएको छ । पराजुली बायोमास व्रिकेट उद्योगले ‘पेलेट ऊर्जा’को उत्पादन सुरुआत गरेको हो । उद्योगको १२ घण्टामा ७० हजार किलोग्रामसम्म ‘पेलेट ऊर्जा’ उत्पादन गर्ने क्षमता रहेको जनाउँदै उद्योगका सञ्चालक आदित्य पराजुलीले यहाँबाट उत्पादित पेलेटलाई झापामा मात्र नभएर नेपालका विभिन्न जिल्ला र छिमेकी मुलुक भारतमा समेत निर्यात गरिने बताए । चिया, सिमेन्ट, इँटा, फलामलगायतका उद्योगहरूलाई सस्तो र वातावरणमैत्री इन्धनका रूपमा ‘पेलेट ऊर्जा’को प्रयोग बढिरहेको हुँदा उद्योगले खेर जाने कमल भेनियर सिट, उखुको खोस्टा, सुकेका पातपतिङ्गर, बाँसका चोइटा र काठका टुक्रालाई अत्याधुनिक प्रविधिबाट मेसिनमा प्रशोधन गरी दानेदार ऊर्जा तयार गरिने सञ्चालक पराजुलीले जानकारी दिए । पेलेटले पत्थर कोइलाको आयातलाई प्रतिस्थापन गरेर मुलुकलाई इन्धनमा आत्मनिर्भर बन्न योगदान पुर्याउने भद्रपुर नगरपालिकाका प्रमुख गणेश पोखरेल बताउँछन् ।
पत्रकार महासंघ, रिपोर्टर्स क्लबसहित १८ व्यक्ति तथा संस्थाले अझै तिरेनन् भाडा, कुनको कति ?
काठमाडौं । समाज कल्याण परिषदले नेपाल पत्रकार महासंघ, रिपोर्टर्स क्लब नेपाल लगायत १८ जना व्यक्ति तथा संस्थालाई ७ दिनभित्र बक्यौता बुझाउन ताकेता गरेको छ । समाज कल्याण परिषदले भृकुटीमण्डप क्षेत्रमा रहेका स्टल, भवन तथा संरचना भाडामा लिएर प्रयोग गरिरहेका व्यक्ति तथा संस्थाहरूलाई बक्यौता भाडा बुझाउन पुनः ७ दिनको अन्तिम म्याद दिएको हो । यसअघि परिषदले २०८२ चैत ३० गते तालाबन्दी गरी वैशाख १ गते ७ दिने म्यादसहित सूचना प्रकाशित गरेको थियो । उक्त अवधिमा केही व्यवसायी तथा संस्थाले आंशिक रकम बुझाए पनि अधिकांशले अझै भाडा नतिरेको परिषदले जनाएको छ । परिषदका अनुसार अब थपिएको ७ दिनभित्र पनि बक्यौता नबुझाएमा प्रचलित कानूनअनुसार असुलउपर तथा अन्य कानुनी कारबाही अघि बढाइनेछ । बक्यौता नतिर्ने सूचीमा उपभोक्ता मंच नेपाल, नेपाल पत्रकार महासंघ, रिपोर्टर्स क्लब नेपाल, काठमाडौं उपत्यका सार्वजनिक पुस्तकालय समाज, नेपाल फोटो पत्रकार महासंघ, राष्ट्रिय अपाङ्ग महासंघलगायत विभिन्न संघसंस्था तथा व्यक्तिहरू रहेका छन् । परिषदका अनुसार उपभोक्ता मंच नेपालको ४५ लाख ५७ हजार ९०७ रुपैयाँ, लोकतान्त्रिक सहिद तथा घाइते समाजको १४ लाख ६१ हजार ३७० रुपैयाँ, नेपाल पत्रकार महासंघको ३३ लाख ७ हजार ४२१ रुपैयाँ बक्यौता रहेको छ । यस्तै, मनकला श्रेष्ठको ३ लाख ८२ हजार ४०३ रुपैयाँ, टीकाराम सिटौलाको ११ लाख ८० हजार ६२५ रुपैयाँ, कृष्णप्रसाद लामिछानेको ५ लाख ९८ हजार १६३ रुपैयाँ, रिपोर्टर्स क्लब नेपालको ६३ लाख ४० हजार ९०१ रुपैयाँ, सेन्थेसिस एक्जिविसन एण्ड इभेन्ट्सको ११ लाख २७ हजार १२१ रुपैयाँ बक्यौता रहेको छ । काठमाडौं उपत्यका सार्वजनिक पुस्तकालय समाजको २ करोड ९० लाख २३ हजार ३७६ रुपैयाँ, हरि अमात्यको ५ लाख १५ हजार ६६४ रुपैयाँ, बुद्धिराम भुसालको ६ लाख ८७ हजार ७३४ रुपैयाँ, नेपाल फोटो पत्रकार महासंघको २० लाख ६७ हजार ६७२ रुपैयाँ, नेपाल राष्ट्रिय मानव अधिकार संरक्षण मञ्चको २१ लाख ८५ हजार ९५७ रुपैयाँ, राष्ट्रिय अपाङ्ग महासंघको १ करोड १६ लाख ३२ हजार २७ रुपैयाँ बक्यौता रहेको छ । यस्तै, बालबालिकाका निम्ति गैरसरकारी संस्थाहरूको महासंघ नेपालको ८९ लाख ९० हजार ७६४ रुपैयाँ, यशोदा कुमारी सेठीको १० लाख १९ हजार १५६ रुपैयाँ, चित्रबहादुर पण्डित क्षेत्रीको १ लाख ४१ हजार ५७३ रुपैयाँ र मञ्जु तिमिल्सिनाको ८ लाख ७ हजार ७१० रुपैयाँ उठ्न बाँकी रहेको परिषदले जनाएको छ ।
२७.९३ प्रतिशत बढ्यो मञ्जुश्री फाइनान्सको नाफा, वितरणयोग्य रकम साढे ३० करोड
काठमाडौं । मञ्जुश्री फाइनान्सको चालु आर्थिक वर्ष २०८२/८३ को तेस्रो त्रैमासमा खुद नाफा २७.९३ प्रतिशत बढेर २१ करोड ८९ लाख १० हजार रुपैयाँ आर्जन गरेको छ । गत वर्षको सोही अवधिमा फाइनान्सले १७ करोड ११ लाख १९ हजार रुपैयाँ खुद नाफा आर्जन गरेको थियो । चालु आवको चैत मसान्तसम्ममा फाइनान्सको खुद ब्याज आम्दानी १०.२४ प्रतिशत बढेर ६८ करोड ४७ लाख ७२ हजार रुपैयाँ आर्जन गरेको छ । गत वर्षको सोही अवधिमा फाइनान्सले ६२ करोड ११ लाख ६५ हजार रुपैयाँ खुद ब्याज आम्दानी गरेको थियो । समीक्षा अवधिमा फाइनान्सको खुद शुल्क तथा कमिशन आम्दानी २.९५ प्रतिशत बढेर ९ करोड २ लाख ४५ हजार रुपैयाँ, कुल सञ्चालन आम्दानी १०.१५ प्रतिशत बढेर ८० करोड ३ लाख १४ हजार रुपैयाँ र सञ्चालन नाफा १०.२९ प्रतिशत बढेर ३२ करोड ३३ लाख ३९ हजार रुपैयाँ रहेको छ । गत वर्षको चैत मसान्तसम्ममा फाइनान्सको खुद शुल्क तथा कमिशन आम्दानी ८ करोड ७६ लाख ६१ हजार रुपैयाँ, कुल सञ्चालन आम्दानी ७२ करोड ६५ लाख ७५ हजार रुपैयाँ र सञ्चालन नाफा २९ करोड ३१ लाख ६० हजार रुपैयाँ थियो । चालु आवको चैतसम्ममा फाइनान्सको वितरणयोग्य नाफा ३० करोड ५४ लाख ५८ हजार रुपैयाँ रहेको छ । १ अर्ब ३५ करोड १५ लाख ५२ हजार रुपैयाँ चुक्ता पुँजी रहेको फाइनान्सको जगेडा कोषमा ८० करोड ५५ लाख १७ हजारर रुपैयाँ रहेको छ । चालु आवको चैत मसान्तसम्म फाइनान्सले २२ अर्ब ७३ करोड ८७ लाख ९८ हजार रुपैयाँ निक्षेप संकलन गरी १९ अर्ब ८५ करोड ४७ लाख ९ हजार रुपैयाँ कर्जा लगानी गरेको छ । गत वर्षको चैतसम्म फाइनान्सले २१ अर्ब ३ करोड ४६ लाख ३० हजार रुपैयाँ निक्षेप संकलन गरी १७ अर्ब ७१ करोड ७९ लाख ३० हजार रुपैयाँ कर्जा लगानी गरेको थियो । समीक्षा अवधिमा फाइनान्सको निक्षेप ८ प्रतिशत र कर्जा लगानी १२ प्रतिशत बढेको देखिन्छ । साथै चैत मसान्तमा फाइनान्सको कर्जा निक्षेप अनुपात ८४.९९ प्रतिशत रहेको छ । समीक्षा अवधिमा फाइनान्सले खराब कर्जा घटाएको छ । गत वर्षको चैतमा ४.२ प्रतिशत रहेको खराब कर्जा चालु आवको चैतमा ३.९९ प्रतिशतमा झारेको हो । फाइनान्सका अनुसार आधार दर ६.३८ प्रतिशतमा झरेको छ । जबकि गत वर्षको चैतमा ८.७५ प्रतिशत थियो । फाइनान्सको नाफा बढेसँगै प्रतिसेयर आम्दानी पनि बढेर २१.६० रुपैयाँ पुगेको छ । यस्तै, फाइनान्सको प्रतिसेयर नेटवर्थ १८२.२ रुपैयाँ छ भने मूल्य आम्दानी अनुपात ३८.८४ गुणा छ ।
ईपीएस कोरिया शाखाले ७६ करोड रुपैयाँ बैंकमा लगानी गर्ने
काठमाडौं । श्रम, रोजगार तथा सामाजिक सुरक्षा मन्त्रालय अन्तर्गत वैदेशिक रोजगार विभाग (ईपीएस कोरिया शाखा)ले आफ्नो कोषमा रहेको ७६ करोड रुपैयाँ एक वर्षे मुद्दती निक्षेपमा लगानी गर्ने भएको छ । नेपाल राष्ट्र बैंकबाट ‘क’ वर्गको इजाजत प्राप्त वाणिज्य बैंकहरूलाई आफूले लिन चाहेको रकम र प्रस्तावित ब्याजदर खुलाएर शिलबन्दी प्रस्ताव पेश गर्न विभागले आग्रह गरेको हो । वैशाख १५ गतेसम्म बोलपत्र प्रस्ताव पेश गर्नुपर्नेछ । प्रस्ताव पेश गर्ने बैंकहरूले निष्क्रिय कर्जा (एनपीएल) कुल कर्जाको ५ प्रतिशतभन्दा कम भएको, खुद तरल सम्पत्ति स्वदेशी निक्षेपको कम्तीमा २० प्रतिशत वा सोभन्दा बढी भएको लगायतका सर्त तोकिएको छ । त्यस्तै, बैंकले हालसम्म समस्याग्रस्त घोषणा नभएको वा भएमा कम्तीमा ६ महिना अघि फुकुवा भएको हुनुपर्ने, सञ्चालन मुनाफामा रहेको तथा राष्ट्र बैंकको मापदण्डभित्र रहेर सञ्चालन भएको हुनुपर्ने सर्त पनि राखिएको छ । एकभन्दा बढी बैंकबाट प्रस्ताव प्राप्त भएमा सबैभन्दा उच्च ब्याजदर प्रस्ताव गर्ने बैंकलाई प्राथमिकताका आधारमा छनोट गरिने विभागले जनाएको छ ।
सर्वोत्तम पेन्ट्सले वैशाख २१ गतेदेखि आईपीओ बिक्री गर्ने
काठमाडौं । सर्वोत्तम पेन्ट्स इण्डष्ट्रिज लिमिटेडले वैशाख २१ गतेदेखि आईपीओ निष्काशन तथा बिक्री खुला गर्ने भएको छ । कम्पनीले पहिलो चरणमा वैदेशिक रोजगारीमा रहेका नेपालीहरूका लागि आईपीओ बिक्री गर्न लागेको हो । कम्पनीले जारी पुँजी ३४ करोड रुपैयाँको २५ प्रतिशत अर्थात् ८ करोड ५० लाख रुपैयाँको १ सय रुपैयाँ अंकित मूल्य दरका ८ लाख ५० हजार कित्ता सेयर जारी गर्नेछ । जसमध्ये १० प्रतिशत अर्थात् ८५ हजार कित्ता विदेशमा रोजगार गरिरहेका नेपालीलाई बिक्री गर्नेछ । कम्पनीको आईपीओमा वैदेशिक रोजगारीमा रहेका नेपालीहरूले न्यूनतम् १० कित्तादेखि अधिकतम ५ हजार कित्ता सेयरका लागि आवेदन दिन सक्नेछन् । कम्पनीको आईपीओमा वैदेशिक रोजगारीमा रहेका नेपालीहरूले छिटोमा वैशाख २४ गते र ढिलोमा जेठ ४ गतेसम्म आवेदन दिन सक्नेछन् । कम्पनीको आईपीओ निष्काशन तथा बिक्री प्रबन्धक ग्लोबल आइएमई क्यापिटल रहेको छ । कम्पनीको आईपीओमा वैदेशिक रोजगारीमा रहेका नेपालीहरूले सिआस्बा सदस्य बैंक तथा वित्तीय संस्था र मेरो सेयर एपमार्फत आवेदन दिन सक्नेछन् ।
वडा कार्यालय पुग्न २४ किलोमिटर दूरी पार गर्नुपर्ने
काठमाडौं । बाँकेको राप्तीसोनारी गाउँपालिकाको विकट क्षेत्रमा रहेको बासखली चुनभट्टी क्षेत्रका वस्तीबाट वडा कार्यालय पुग्न करिब २४ किलोमिटर दूरी पार गर्नुपर्ने बाध्यता रहेको छ । भारतीय सीमावर्ती क्षेत्रमा अवस्थित बासखली, चुनभट्टी, खैरभट्टी, कुन्टेपानी, महेशपुर, गुर्दनगौडी, जुरुवा र तल्लो बासखली लगायतका क्षेत्रबाट वडा कार्यालय राप्तीसोनारी-४ बैजापुर पुग्न कम्तीमा चार घण्टा लाग्ने बैजापुरका स्थानीय अगुवा तुलसीराम थारूले बताए । ‘सडक नहुँदा वडा कार्यालयमा सेवा लिन ४ घण्टा हिँडेर पुग्नुपर्ने बाध्यता रहेको छ । यहाँका जनताले स्थानीय सरकारको अनुभूतिसम्म गर्न नपाएकाले अब सहज सेवा सुविधाको लागि छुट्टै वडा कायम गर्नुपर्दछ,’ थारूले भने । उनका अनुसार, राप्तीसोनारी गाउँपालिकाको दुर्गम क्षेत्रका रूपमा चिनिने गुर्दनगौडी र खयरभट्टी क्षेत्रका जनताको अवस्था निकै कष्टकर छ । यस क्षेत्रका जनताले अझै पनि आधारभूत सेवा सुविधाबाट वञ्चित हुनुपरेको छ । वडा कार्यालयबाट खयरभट्टीसम्म करिब १४ किलोमिटर दूरी भए पनि भारतीय सीमा क्षेत्रमा रहेको महेशपुर थप १० किलोमिटर टाढा रहेको छ । वडा कार्यालयको केन्द्र बैजापुरबाट टाढा र दुर्गममा पर्ने भएकाले खयरभट्टी क्षेत्रमा सेवा प्रवाहमा कठिनाइ हुने गरेको वडाध्यक्ष मीनराज खड्काले जानकारी दिए । खयरभट्टी क्षेत्रका नागरिक न्यूनतम आधारभूत सेवाबाट वञ्चित रहँदै आएका छन् । ३५० घरधुरी र करिब ४०० मतदाता रहेको यो क्षेत्रलाई छुट्टै वडा र मतदान केन्द्र कायम गर्नुपर्ने माग अनौपचारिक रुपमा उठ्दै आए पनि औपचारिक रुपमा प्रवेश हुन नपाएको उनले बताए। गाउँसम्म पुग्ने सडक नहुँदा पैदल यात्रा गर्नुपर्ने बाध्यता रहेको छ । स्वास्थ्य, शिक्षा र खानेपानीको समस्या रहेको छ । गाउँपालिकाका प्रवक्तासमेत रहेका वडाध्यक्ष खड्काले नागरिकलाई पायक पर्ने स्थानमा वडा कार्यालय र मतदान केन्द्र कायम गरिनुपर्ने माग औपचारिक रुपमा माग आए कार्यपालिकामा पेस गरेर प्रक्रिया अगाडि बढाइने बताए । यो क्षेत्रमा स्वास्थ्य चौकी वा सहज स्वास्थ्य सेवाको पहुँच नहुँदा सामान्य बिरामी पर्दा निकै टाढासम्म जानुपर्ने र प्रसूति सेवाको अभावमा जोखिमपूर्ण अवस्थामा बस्नुपर्ने बाध्यता छ । शिक्षाको अवस्था नाजुक छ । बालबालिकाहरू लामो दुरी पैदल हिँडेर विद्यालय जान बाध्य छन्, जसले गर्दा विद्यालय छोड्ने दर उच्च छ । बाँकेका प्रमुख जिल्ला अधिकारी दीलबहादुर तामाङले मतदान केन्द्र स्थापना गर्ने कार्य समस्या नरहेको बताए । वडा विभाजनको कुरा औपचारिक रुपमा कार्यपालिकाबाट निर्णय भएर आए आफूले आवश्यक समन्वयका साथ अगाडि बढाउने उल्लेख गरे ।
६४ करोडको ठेक्कामा ४.२२ करोड घुस, अधिकारीको बैंक खातामा रकम जम्मा
काठमाडौं । अख्तियार दुरुपयोग अनुसन्धान आयोगले भ्रष्टाचार र सम्पत्ति शुद्धीकरण गरेको अभियोगमा पुरातत्व विभागका तत्कालीन सिनियर डिभिजनल इञ्जिनियर पूर्णबहादुर श्रेष्ठ र सहायक पथ प्रदर्शक देउकला अधिकारी विरुद्ध विशेष अदालतमा मुद्दा दायर गरेको छ । निर्माण सेवाका सञ्चालक तथा सम्बद्ध संयुक्त उपक्रमहरूको बैंक खाताबाट देउकला अधिकारीको नाममा रहेको बैंक खातामा रकम जम्मा गराएको पाइएको छ । आयोगका अनुसार, त्यसरी प्राप्त भएको घुस रकमबाट संयुक्त रुपमा सम्पत्ति खरिद गरेको पाइएको छ । निर्माण सेवा प्रालिले एकल वा संयुक्त उपक्रममा समावेश भई विभागले गरेको ठेक्का सम्झौता मध्ये कुल ६४ करोड २१ लाख ८९ हजार रुपैयाँ बराबरको ठेक्कामा ४ करोड २२ लाख ७५ हजार, ९८५ रुपैयाँ बराबरको रकम घुस लिएको आयोगको आरोप छ । भ्रष्टाचार गरेर आर्जन गरेको रकमबाट आपसी मिलेमतो र योजनामा जग्गा एवं सुन खरिद गरेको तथा विभिन्न व्यक्तिलाई भुक्तानी समेत गरेको पाइएको आयोगले जनाएको छ । गैरकानुनी रुपमा आर्जन गरेको सम्पत्ति लुकाउने रुपान्तरण तथा हस्तान्तरण गर्ने गराउने कार्य गैरकानुनी कार्य भएको ठहर गरिएको छ । पुरातत्व विभागका तत्कालीन सिनियर डिभिजनल इञ्जिनियर श्रेष्ठ र सहायक पथ प्रदर्शक अधिकारी विरुद्ध समान ४ करोड २२ लाख ७५ हजार ९८५ रुपैयाँ बराबरको बिगो दावी गर्दै मुद्दा दायर गरिएको आयोगका प्रवक्ता सुरेश न्यौपानेले जानकारी दिए ।
पहाडी भू-भागमा आंशिक बादल, तराईमा तातो लहर
काठमाडौं । हाल नेपालमा पश्चिमी र स्थानीय वायुको आंशिक प्रभाव रहेको छ । यसको प्रभाव रहँदा देशका हिमाली भू-भागमा सहित कोशी प्रदेशका पहाडी भू-भागमा आंशिक बादल लागेको छ भने बाँकी भू-भागमा मौसम मुख्यतया सफा रहेको छ । जल तथा मौसम विज्ञान विभाग, मौसम पूर्वानुमान महाशाखाद्वारा जारी मौसम ‘बुलेटिन’का अनुसार हाल कोशी प्रदेशको एक/दुई स्थानमा हल्का वर्षा भइरहेको छ । महाशाखाका अनुसार आज दिउँसो कोशी, बागमती र गण्डकी प्रदेशका हिमाली भू-भागमा साधारणतया बादल लाग्नेछ । बाँकी प्रदेशका हिमाली भू-भागका साथै कोशी, बागमती, गण्डकी र कर्णाली प्रदेशका पहाडी भू-भागमा आंशिक बादल लाग्ने र बाँकी भू-भागमा मौसम सफा रहनेछ । कोशी प्रदेशको हिमाली र पहाडी भू-भागलगायत बागमती र गण्डकी प्रदेशका हिमाली भू-भागका केही स्थानमा मेघगर्जन/चट्याङसहित मध्यम सम्मको वर्षा÷हिमपातको सम्भावना रहेको छ । मधेश प्रदेशलगायत बागमती, गण्डकी, लुम्बिनी र सुदूरपश्चिम प्रदेशका तराई साथै उपत्यका र खोँचहरूमा तातो दिन हुने सम्भावना रहेको छ भने लुम्बिनी र सुदूरपश्चिम प्रदेशका तराई क्षेत्रमा तातो लहरको पनि सम्भावना देखिन्छ । त्यसैगरी आज राति कोशी प्रदेशको हिमाली र पहाडी भू-भागलगायत बागमती र गण्डकी प्रदेशका हिमाली भू-भागमा आंशिक बादल लाग्ने र बाँकी हिमाली, पहाडी र तराई भू-भागमा मौसम मुख्यतया सफा रहनेछ । कोशी प्रदेशको हिमाली भू-भागका एक/दुई स्थानमा हल्का वर्षा र हिमपातको सम्भावना रहेको छ ।
