देशभर ६ वटा चार तारे होटल
काठमाडौं । चार तारे होटलको संख्या ६ वटा पुगेको छ । काठमाडौंदेखि नेपालगञ्ज, पोखरा, सिमरामा खुलेका चार तारे होटलहरुको संख्या ६ वटा पुगेको हो । काठमाडौंमा होटल शंकर, ललितपुरमा होटल हिमालय, महेन्द्रनगरमा होटल ओपेरा, नेपालगञ्जमा होटल कृष्णा, सिमरामा होटल इच्छा र नगरकोटमा होटल मिस्टकले चार तारे होटलको सेवा दिईरहेका छन् । यी होटलहरुको कुल कोठा संख्या ४५१ रहेको छ । यी होटलहरुको निर्माण लागत ९९ लाखदेखि ५५ करोेड रुपैंयाँसम्म रहेको छ । सरकारले सन २०२० लाई नेपाल भ्रमण बर्ष घोषणा गरेर २० लाख पर्यटक भित्र्याउने लक्ष्य राखेको छ । नेपालमा पाँच तारे होटलहरुको संख्या धमाधम वृद्धि भैइरहे पनि चार तारे होटल भने पछिल्लो समय थपिएका थिएनन् । होटल हिमालयले २०६६ असार १५ गते चार तारे मान्यता पाएको थियो भने होटल शंकरले २०६९ साउन १२ गते चार तारे होटलको मान्यता पाएको हो । ओपेराले २०७३ चैत २८ गते स्तरोन्नति भएर चार तारे बनेको थियो । त्यस्तै, कृष्णाले २०७४ भदौ २९ गते चार तारे मान्यता लिएको हो । त्यस्तै, इच्छा कामनाले २०७४ मंसिर १९ गते र मिस्टक माउण्टेनले २०७४ साल चैत ५ गते तार तारेको मान्यता पाएको हो ।
शाश्वतधामलाई बेस्ट टुरिस्ट डेस्टिनेसन अवार्ड, दर्शनको लागि मासिक ढेड लाख पर्यटक पुग्ने
काठमाडौं । शाश्वतधामले ‘बेस्ट टुरिस्ट डेस्टिनेसन अफ नेपाल’ अवार्ड प्राप्त गरेको छ । विश्वपर्यटन दिवस २०७५ को अवसरमा सँस्कृति, पर्यटन तथा नागरिक उड्ययन मन्त्रालयद्वारा आयोजित समारोहमा सोही मन्त्रालयका मन्त्री रविन्द्र अधिकारीले शाश्वतधामलाई अवार्ड प्रदान गरेका छन् । समारोहमा पर्यटन राज्यमन्त्री धनबहादूर बुढा, पर्यटन बोर्डका कार्यकारी अधिकृत दीपक जोशी लगायतपर्यटन क्षेत्रका अधिकारीहरुको उपस्थिति थियो । नेपालको पर्यटन प्रवर्धनमा उत्कृष्ट योगदान पु¥याए वापत शाश्वतधामले उक्त अवार्ड प्राप्त गरेको हो । शाश्वतधाममा नेपालका अतिरिक्त भारतीय पर्यटकहरूको समेत घुईचो लाग्ने गरेको छ । नेपाल भ्रमणमा आउने विश्वका पर्यटकहरूले समेत पछिल्लो समय शाश्वतधामलाई आफ्नो गन्तब्य बनाउदै आएका छन् । ‘शाश्वतधाम स्थापनाको छोटो समयमै नेपालको पर्यटन उद्योगमा उच्च योगदान पु¥याउन सकेकोमा हामीलाई खुसी लागेको छ । सम्मानका लागि सँस्कृती पर्यटन तथा नागरिक उड्ययन मन्त्रालयलाई हार्दिक धन्यवाद दिन्छु’ शाश्वतधामका फाउण्डिङ ट्रष्टी एवं चौधरी ग्रुपका अध्यक्ष विनोद चौधरीको भनाई उल्लेख गर्दै चौधरी ग्रुपका महाप्रबन्धक मधुसुधन पौडेलद्धारा जारी गरेको विज्ञप्ती उल्लेख गरिएको छ । चौधरीले भनेका छन्–‘शाश्वतधाममा सम्पदाहरू थपिने क्रम जारी रहेको र भविष्यमा नेपालको प्रमुख पर्यटकीय गन्तव्यमा सूचिकृत हुनेछ भन्ने हाम्रो विश्वास छ ।’ शाश्वतधाम धार्मिक पर्यटकीय केन्द्रका रूपमा स्थापित हुदै गएको छ । हाल यहाँप्रतिमहिना डेढ लाखसम्म पर्यटकहरू आउने गरेको बताइएको छ ।
स्वर्गद्वारी विमानस्थल निर्माण गर्न ७७ करोड बजेट, वातावरण प्रभाव मूल्याङ्कन सम्पन्न
प्यूठान । प्यूठानमा निर्माण हुन लागेको स्वर्गद्वारी (चाल्नेटार) विमानस्थल निर्माणका लागि रु ७७ करोड लाग्ने योजना सार्वजनिक गरिएको छ । नेपाल नागरिक उड्डयन प्राधिकरणको प्रस्तावमा परामर्शदाता संस्था प्याक्ट कन्सल्ट्यान्ट प्रालिले वातावरण प्रभाव मूल्याङ्कन गरी यसबारे स्थानीयवासीलाई जानकारी गराएको हो । स्वर्गद्वारी आन्तरिक विमानस्थलको आयोजनाको वातावरणीय प्रमाव मूल्याङ्कन अध्ययनसहित कूल बजेटबारे सार्वजनिक सुनुवाइ सम्पन्न भएको छ । स्वर्गद्वारी नगरपालिकाको बर्जिवाङ चाल्नेटारमा निर्माण हुन लागेको विमानस्थल करीब ६०.७९ हेक्टर क्षेत्रफल ओगटेको छ । आयोजना निर्माणले चाल्नेटारका १२ र माथिल्लो दमारका दुई गरी १४ घरधुरीमा प्रभाव हुने र १३ घरधुरीका १०७ जना विस्थापित हुनुपर्ने मूल्याङ्कनमा समेटिएको छ । आयोजना निर्माणका क्रममा ५५.१८ हेक्टर वन अधिग्रहण गर्दा १८ प्रजातिका ६ हजार २५६ बिरुवा नोक्सान हुने वातावरण प्रभाव मूल्याङ्कन टोलीका प्रमुख डा महेन्द्रनाथ सुवेदीले बताए । यस्तै ०.४ हेक्टर आवास लगायतका अन्य संरचनामा स्थायीरुपले असर पुग्ने उहाँले जानकारी दिनुभयो । वातावरण मूल्याङ्कन प्रभाव प्रतिवेदन सार्वजनिक भएसँगै आयोजनास्थलका प्रभावित बासिन्दाले उचित क्षतिपूर्तिबिना आफूहरु बस्दै आएको बसोबास नछोड्ने बताएका छन् । वातावरण प्रभाव मूल्याङ्कन प्रतिवेदनमा अधिग्रहण गरिने निजी जमीनको प्रतिरोपनी रु तीन लाखका दरले क्षतिपूर्ति दिइने प्रस्ताव गरे पनि त्यो रकम आफूहरुका लागि न्यायोचित नभएको स्थानीयवासीको गुनासो छ । जमीन तथा भौतिक संरचनाको उचित क्षतिपूर्ति र रोजगारीको सुनिश्चित भएमा मात्रै आफूहरु जन्मथलो छोड्न तयार रहेको स्थानीयवासी भोजराज खड्काले बताउनुभयो । प्रतिरोपनी तीन लाखका दरले क्षतिपूर्तिका लागि रु दुई करोड ७७ लाख पाँच हजार ६२५, पुनर्वास र पुनः स्थापनाका लागि रु तीन करोड ३९ लाख ८१ हजार ११० र क्षति हुन जाने अन्नबालीको रु ६७ हजार ६७७ गरी कूल रु ६ करोड १७ लाख ६२ हजार ४१२ खर्च हुने प्रतिवेदनमा उल्लेख छ । आयोजनाको कूल लागत रु ७७ करोडमध्ये वातावरणीय प्रभाव न्यूनीकरण, अनुगमन लगायतका २०.६२ प्रतिशतबाट हुन आउने करीब रु १५ करोड ८८ लाख १७ हजार ८२९ छुट्याइएको छ ।
