आइतबारदेखि अन्तर्राष्ट्रिय उडान खुला, यी ११ वायुसेवा कम्पनीले गर्दैछन् उडान
काठमाडौं । दोस्रो लहरको कोरोना संक्रमणका कारण बन्द भएको अन्तर्राष्ट्रिय उडान आइतबारदेखि नियमित रुपमा सुरु हुने भएको छ । विश्व महामारीका रुपमा फैलिएको कोरोना भाइरसको कारण गत वैशाख २३ गतेदेखि बन्द रहेको अन्तर्राष्ट्रिय उडान आइतबारदेखि पुनः सुरु हुने भएको हो । सरकारले केही समय अघिमात्र सीमित गन्तव्यका लागि खुला गरेको थियो । कोरोना समयभन्दा अगाडीकै तुलनामा आईतबारदेखि विभिन्न गन्तव्यमा ११ वटा वायुसेवा कमपनीले नियमित उडान सुरु गर्ने तयारी गरेको छन् । मन्त्रिपरिषद्को निर्णय अनुसार नेपाल नागरिक उडड्यन प्राधिकरण (क्यान) ले उडान तालिका समेत स्वीकृत गरिसकेको छ । कुन गन्तव्यमा कसकाे उडान ? प्राधिकरणले सरकारी स्वामित्वमा सञ्चालित नेपाल वायुसवा निगमले कतारको दोहा, दुवई, भारतको नयाँदिल्ली, क्वाललाम्पुर गरी चार गन्तव्य तथा नेपाल-चीन संयुक्त लगानीमा सञ्चालित हिमालय एयरलाइन्सले दुवई, दमाम, दोहा, चीनको चोंग्किंग, क्वाललाम्पुर गरी पाँच गन्तव्यमा उडानको अनुमति दिएको क्यानका प्रवक्ता राजकुमार क्षेत्रीले जानकारी दिए । उनका अनुसार कतार एयरवेजले दोहा, टर्की एयरलाइन्सले स्तानाबुल, जजीरा एयरलाइन्सले कुवेत, प्लाइ दुबैले दुवई, सलाम एयरले मस्कट, एयर अरेबिया र एयर दुवईले आबुदावी, एयर इन्डियाले नयाँदिल्ली र सिंगापुर एयरलाइन्सले सिंगापुरमा उडान गर्ने गरी अनुमति दिइएको छ । अन्य गन्तव्यमा आइतबारदेखि नियमित उडान सुरु भएतापनि चीन, हङकङ, बंगलादेश, थाइल्यान्डमा नियमित उडान हुनसकेको छैन भने सिंगापुर, यूएई, कुवेतमा एकतर्फी मात्रै उडान भइरहेको छ । नेपालले चीन उडानको लागि तालिका नै सार्वजनिक गरे पनि चीन सरकारले अनुमति नदिँदा त्यहाँ नियमित उडान हुन सकेकाे छैन । त्रिभुवन अन्तर्राष्ट्रिय विमानस्थलमा चीन–नेपाल नियमित उडान गर्ने एयर चाइना, चाइना इस्टर्न एयरलाइन्स, चाइना साउदर्न एयरलाइन्स, सिचुवान एयरलाइन्सले उडान गर्न सकेका छैनन् । त्यस्तै, हङकङ–काठमाडौं उडान गर्ने क्याथे ड्रयागन, सिंगापुरको सिल्क एयर, थाइल्यान्डको थाई एयर, काठमाडौं–बंगलादेश उडान गर्ने विमान बंगलादेश एयरलाइन्सले नियमित उडान गर्न पाएका छैनन् । मागका आधारमा आन्तरिक उडान प्राधिकरणले आइतबारदेखि विभिन्न गन्तव्यका लागि अन्तर्राष्ट्रिय उडानको तालिका सार्वजनिक गरेतापनि आन्तरिक उडानको तालिका सार्वजनिक भएको छैन । मन्त्रिपरिषद्को निर्णयले सिमित गन्तव्यका लागि अन्तर्राष्ट्रिय उडान खुला गरेतापनि आन्तरिक उडान पूर्ण रुपमा खुला गर्ने निर्णय गरेको थियो । आन्तरिक उडानमा धेरै वायुसेवा कम्पनीले उडान गर्दा भिडभाड बढ्ने अनुमान गर्दै भिडभाड कम गर्ने तयारीसहित उडान तालिका सार्वजनिक गर्ने तयारी भएको प्राधिकरणले जनाएको छ । विमानस्थलमा भिड कम गर्न प्राधिकरण र त्रिभुवन अन्तर्राष्ट्रिय विमानस्थलका अधिकारीहरु बीच छलफल गरेर तालिका सार्वजनिक गरिने प्रवक्ता क्षेत्री बताउँछन् । ‘यसअघि तोकिएको समयाबधि र कोटा प्रणाली हटाएर हामी छिटै भिडभाड कम गरी संक्रमण रहित आन्तरिक उडान खुलाउने तयारीमा छौँ । उडानको तालिका सार्वजनिक गरेर सम्बन्धित वायुसेवा कम्पनीलाई पठाएपछि पूर्ण रुपमा आन्तरिक उडान खुल्ला हुन्छ’, उनले भने । गत बैशाख २० गतेदेखि बन्द भएको आन्तरिक उडान सिमित कोटा राख्दै गत असार १७ गतेबाट पुनः सुरु भएको हो ।
पोखराका पर्यटन व्यवसायी भन्छन : खोप नपाएसम्म व्यवसाय सञ्चालन गर्न सक्दैनौँ
काठमाडौं । पोखराका पर्यटन व्यवसायीले सरकारले पर्यटन क्षेत्रका मजदुर, कर्मचारी एवं व्यवसायीलाई खोप उपलब्ध नगराएसम्म व्यवसाय सञ्चालन गर्न नसक्ने बताएका छन् । पोखरा पर्यटन परिषद्ले बिहीबार पत्रकार सम्मलेन गरी कोरोना कहर पर्यटन व्यवसायीका लागि जहर सावित भएको जनाउँदै खोपको सुनिश्चिता नभएसम्म व्यवसाय सञ्चालन गर्न नसक्ने बताएको हो । परिषद्का अध्यक्ष गोपी भट्टराईले पर्यटन क्षेत्रमा आबद्ध मजदुर, कर्मचारी र व्यवसायीलाई ‘फ्रन्टलाइनर’का रूपमा लिएर यथाशीघ्र खोप उपलब्ध गराउनुपर्ने बताए । “अहिले पूर्णरूपमा व्यवसाय सञ्चालन हुनसकेको छैन, यदि सरकारले व्यवसाय सञ्चालको अनुमति दिए पनि हामी खोप नपाएसम्म व्यवसाय सञ्चालन गर्न सक्दैनौँ”, उनले भने । कतिपय अन्तर्राष्ट्रिय बुकिङ पनि पर्यटन क्षेत्रका मजदुर कर्मचारीले खोप लगाएका छन् कि छैनन् भनेर ‘इन्क्वायरी’ आउने गरेको जनाउँदै खोप नभएसम्म पर्यटन क्षेत्र सुरक्षित र चलायमान हुन नसक्ने बताए । अध्यक्ष भट्टराईले गत वर्षको मौद्रिक नीति र यस वर्षको सरकारले ल्याएको नीति तथा कार्यक्रम र बजेटले सम्बोधन गरिएका आर्थिक नीति तथा कार्यक्रम अविलम्ब सबै तहका सरकारले कार्यान्वयन गर्नुपर्नेमा जोड दिए । पर्यटन क्षेत्रमा लगानीको किस्ता र ब्याज पर्यटन सहजरूपमा सञ्चालन नहुँदासम्म तिर्न नसकिने जनाउँदै सो अवधिको ब्याज सरकारले तिर्नुपर्ने माग पनि परिषद्को छ । कोभिड–१९ को प्रभावसँगै व्यवसायको जिम्मेवारीमा पर्ने व्यवसाय नवीकरण, अद्यावधिक शुल्क, घरभाडा कर, यातायात कर साथै सम्पूर्ण पर्यटन व्यवसायका शीर्षकका शुल्क र दस्तुर पूर्णरूपमा मिनाहा हुनुपर्ने र पर्यटनमा आश्रित मजदुरको सुरक्षाका लागि विशेष राहत र रोजगार सिर्जनाका प्याकेजका कार्यक्रम ल्याउनुपर्नेमा पनि परिषद्ले जोड दिएको छ । परिषद्का पूर्वअध्यक्ष गणेशबहादुर भट्टराईले पर्यटकले सुरक्षित स्थानलाई मात्रै रोज्ने हुँदा त्यसका लागि खोपलाई पहिलो प्राथमिकता दिनुपर्नेमा जोड दिए । नेपाल पर्यटन बोर्डका पूर्वसदस्य वासु त्रिपाठीले राजधानीका पर्यटन व्यवसायीलाई सरकारले १० हजार खोपको व्यवस्था गरे पनि पर्यटकीय नगरी पोखराका व्यवसायीप्रति सरकारले ध्यान नदिएको गुनासो व्यक्त गरे । आन्तरिक पर्यटन पुनरुत्थान गण्डकीका संयोजक अग्नि कँडेलले पर्यटन व्यवसायीको हकमा स्पष्ट नीति निर्धारण गरी यस क्षेत्रलाई चलायमान गराउन भूमिका खेल्नुपर्ने धारणा राखेका थिए । परिषद्का उपाध्यक्ष पोमनारायण श्रेष्ठले परिषद्ले लामो समयदेखि ‘नो भ्याक्सिन, नो टुरिजम’ को नारासहित सामाजिक सञ्जाललगायत विभिन्न सञ्चारमाध्यमबाट सरकारलाई दबाब दिएतापनि त्यसको सुनुवाइ नभएको बताए । उनले माग पूरा नभए सरकारलाई पर्यटन व्यवसायीले तालाचाबी बुझाउन बाध्य हुने चेतावनीसमेत दिए । श्रेष्ठले गण्डकी प्रदेशको पर्यटन क्षेत्रमा हालसम्म पाँच खर्ब १५ करोडको लगानी रहेकोमा कोरोना कहरबाट ३० प्रतिशतभन्दा बढी पर्यटन व्यवसायी पलायन भइसकेका जानकारी दिए । रासस
बुद्धले असार २५ गतेबाट पुनः राजविराज उडान गर्दै
काठमाडाैं । निजी क्षेत्रका लगानीमा सञ्चालित बुद्ध एयरले शुक्रबार (असार २५) गतेबाट पुनः राजविराज उडान सञ्चालन गर्ने तयारी गरेको छ । दोस्रो लहरको कोरोना संक्रमणका कारण गत बैशाख २० गतेबाट रोकिएको हवाई उडान पुनः सुरु भएसगैँ बुद्धले उक्त गन्तव्यमा उडानको तयारी गरेको हो । बुद्धले उक्त गन्तव्यमा असार २५ गतेबाट दैनिक एक उडान हुने जनाएको छ । बुद्धसँग हाल ७२ सिट क्षमतायुक्त एटिआर ७२–५०० सिरिजका जहाज १० थान, ४७ सिट क्षमतायुक्त ‘एटिआर४२–३२०’ सिरिजका तीनथान र १९ सिटयुक्त ‘बिचक्राफ्टख१९००डी’ खसिरिजका दुईथान गरी १५ जहाजवाट विभिन्न गन्तव्यमा उडान गर्दै अाएकाे छ । निषेधाज्ञाअघि बुद्धले दैनिक १ सय २० भन्दा बढी उडानमार्फत औसत ७ हजारहाराहारी यात्रुलाई गन्तव्य पु¥याउँदै आएको थियो। अहिले निषेधाज्ञाबीच सरकारले कूल आन्तरिक उडानको ५० प्रतिशतमात्र गर्न दिएका कारण बुद्धको दैनिक करिब ३१ वटा उडान गर्दै आएको छ ।
