आजदेखि काठमाडौं–नयाँदिल्ली सातामा ६ उडान
फाइल फाेटाे काठमाडौं । सरकारले काठमाडौं–नयाँदिल्ली रुटमा उडान संख्या विस्तार गरेको छ । यसअघि दैनिक २ उडान हुँदै आएको नयाँदिल्लीमा सरकारले उडान थप गर्दै सातामा ६ उडान बनाएको हो । सोमबारदेखि उक्त गन्तव्यमा बिहीबारबाहेक दैनिक एक/एक उडान हुनेछन । एयरबबल अवधारण अनुसार गत पुसदेखि दैनिक एक/एक उडान हुँदै आएको थियो । नेपाल नागरिक उडड्यन प्राधिकरण (क्यान) ले साउन १५ गतेसम्म सातामा ६ वटा उडान संख्या तोकेको हो । उक्त उडानमा नेपाल वायुसेवा निगम र एयर इन्डियाले ३/३ उडान हुनेछ । सिमित संख्यामा मात्र उडान हुँदा वायुसेवा कम्पनीले चर्काे भाडादर लिएको भन्दै यात्रुले गुनासो गर्दै आएका थिए । कोरोना महामारी अघि १२ हजार रुपैयाँ भाडादर रहेको उक्त गन्तव्यमा पछिल्लो समय ५० हजारभन्दा बढी भाडा लिईएको थियो । नेपाल वायुसेवा निगम र एयर इन्डियाको एकाधिकार र सिमित उडान हुँदा दुई सरकारी वायुसेवा कम्पनीले चर्काे शुल्क लिदैँ आएका थिए । उडान संख्या विस्तार भएसगैँ भाडादर घट्ने अनुमान गरिएको छ । २०७६ चैतदेखि बन्द भएको उक्त गन्तव्यमा ०७७ पुसबाट मात्रै एयरबबल अवधारणा अन्तर्गत उडान सञ्चालनमा ल्याइएको थियो ।
काठमाडौं–दमाम उडानमा बढी भाडा लिईएको छैन : हिमालय एयरलाइन्स
काठमाडौं । नेपाल–चीन संयुक्त लगानीमा सञ्चालित हिमालय एयरलाइन्सले साउदीको दमाम उडानमा बढी भाडा नलिईएको जनाएको छ । साउदी उडानका क्रममा बढी भाडा लिएको भन्दै विरोध भएपछि हिमालयले एक विज्ञप्ती जारी गर्दै बढी भाडा नलिएको जनाएको हो । पछिल्लो सयम हिमालय एयरलाइन्सले उडान गर्दै आएको गन्तव्यको उडान तथा होटल क्वारेन्टीन खर्चमा चर्काे शुल्क लिदाँ नेपाली श्रमिक मारमा परेका थिए । दोस्रो लहरको कोरोना भाइरस संक्रमणलाई ध्यानमा राख्दै नेपाल सरकारले नियमित उडान बन्द गरेपछि दमाममा हिमालयले १० वटा चार्टर्ड उडान गरेको थियो । ‘नेपाल सरकार र साउदी अरब सरकारले अनिवार्य नियामक निर्देशिका प्रकाशित गरेको थियो, जसमा अपरिहार्य भाडाअन्तर्गत हवाईभाडा, प्रवासमा क्वारेन्टिइन सुविधा र सम्बन्धित कोभिड–१९ स्वास्थ्य सुविधासहित समावेश गरिएको थियो । सोही निर्देशिकाको पालनामा हाम्रो एयरलाइन्सले यस क्षेत्रमा उडानहरू सञ्चालन गर्न सबै आवश्यक सुविधासहितको बन्डल भाडा सुरू गरेको हो,’ कम्पनीद्वारा जारी विज्ञप्तिमा उल्लेख छ । हालको अवस्थामा, विभिन्न समाचार तथा सामाजिक सञ्जालमा एअरलाइन्स्ले काठमाडौंदेखि दमाम सम्मको उडानका लागि उच्च हवाइ भाडा तथा क्वारेन्टिन सेवाशुल्क लिइरहेको झुटा जानकारी र रिपोर्ट लेखिएर आरोप प्रत्यारोप लगाइएको भन्दै एयरलाइन्सले आरोप समेत लगाएको छ । एअरलाइन्स् आधार भाडा, सबै नियामक करहरू, होटल यातायात र ७ रात होटेल बसोबास शुल्क, (बिहानको खाजा, खान, डिनर सामेल) र दमााम आइपुग्दा गरिने २ पीसीआर परीक्षण सुविधालाई प्याकेज बनाएर शुल्क लिएकोे विज्ञप्तीमा भनिएको छ । साउदी सरकारले तोकेको होटलमा क्वारेन्टिन राख्दा नियमित हवाइ बन्डल भाडाको तुलनामा अहिलेको भाडा अलि महँगो भएको जनाईएको छ ।
बुद्ध एयर सर्वेक्षण : खोप लगाएका यात्रु बढ्दो क्रममा
काठमाडौं । निजी वायुसेवा कम्पनी बुद्ध एयरले गरेको एक सर्वेक्षणले कोरोना भाइरसविरुद्धको खोप लगाउने हवाई यात्रुको संख्या बढ्दो क्रममा रहेको देखाएको छ। पछिल्लो समय बुद्ध एयरले आप्ना जहाजमा यात्र गर्ने यात्रुमध्ये ४२ प्रतिशत यात्रुले कोरोना विरुद्धको खोप लगाइसकेका तथा कोभिडलाई जितेर प्राकृतिक प्रतिरक्षा क्षमता विकास भइसकेकाहरु रहेको पाइएको जनाएको हो । बुद्धले उक्त सर्वेक्षणमा उडान हुने सम्पूर्ण गन्तव्यहरु तुम्लिङटार, भद्रपुर, विराटनगर, राजविराज, जनकपुर, सिमरा, भरतपुर, पोखरा, भैरहवा, नेपालगञ्ज, सुर्खेत, धनगढी र काठमाडौंमा यात्रा गरेका ती यात्रीमाझ सर्वेक्षण गरेको थियो। उक्त सर्वेक्षणमा २४ हजार ९३ जना यात्रुहरुको सहभागिता रहेको थियो । सर्वेक्षणमा जम्मा जम्मी दुई प्रश्नहरु सोधिएको थियो । जसमा खोप लगाएको तथा नलगाएका तथा २०७७ वैशाख यता कोभिड संक्रमण भएका रनभएका प्रश्च सोधिएको थियो । जसमा ९ हजार ६६८ जना खोप लगाइसकेका यात्रुहरुमध्ये पहिलो खोप लगाउनेको संख्या २ हजार ६६४ तथा दुबै खोप लगाउनेहरु ७ हजार ४ जना रहेको थिए । सर्वेक्षणमा सहभागीमध्ये १४ हजार ४ सय २५ ले खोप लगाएका थिएनन् भने २ सय ९० जना संक्रमित भएर निको भइसकेका यात्रु थिए। कूल यात्रुमध्ये १४ हजार १ सय ३५ जना संक्रमण नभएका यात्रु रहेको बुद्धले जनाएको छ। बुद्धका बिक्री तथा बजार निर्देशक रुपेश जोशीले कम्पनीका सबै कर्मचारीले दुवै डोज खोप लगाइसकेका छन्। ‘हामी संक्रमणरहित यात्राका लागि प्रतिबद्ध छौं,’ उनले भने। बुद्धसँग हाल ७२ सिट क्षमतायुक्त एटिआर ७२–५०० सिरिजका जहाज १० थान, ४७ सिट क्षमतायुक्त ‘एटिआर४२–३२०’ सिरिजका तीनथान र १९ सिटयुक्त ‘बिचक्राफ्ट१९००डी’ सिरिजका दुईथान गरी १५ वटा जहाज वाट विभिन्न गन्तव्यमा उडान गर्दै अाएकाे छ ।
