आन्तरिक उडानमा विदेशी र नेपालीको असमान भाडादरमा इजरायलका राजदुतको चासो
काठमाडौं । संस्कृति, पर्यटन तथा नागरिक उड्डयन मन्त्री प्रेमबहादुर आले र नेपालका लागि इजरायलका राजदूत हेनान गोदरले बिच आज सोमबार मन्त्रालयमा शिष्टाचार भेटवार्ता भएको छ । भेटवार्ता दुई देशबीचको सम्बन्ध, आपसी सहकार्य र सहयोगको विषयमा केन्द्रीत रहेको थियो । भेटवार्ताका क्रममा राजदूत गोदरले इजरायल र काठमाडौँ बिच सिधा हवाई उडानका लागि इजरायल सरकारले पहल गर्ने आश्वासन दिदैँ इजरायल–भैरहवा सिधा हवाइ उडान गर्न इजरायल सरकार इच्छुक रहेको बताएका थिए । भेटवार्ताका क्रममा मन्त्री आलेसँग उनले दुइ हप्ता भित्रमा कम्तीमा पनि एक हजार नेपाली कामदार इजरायल लैजाने कार्यक्रम रहेको र सोका लागि नेपाल वायुसेवा निगमको जहाँज भाडामा लिन इच्छुक रहेको समेत बताएका थिए । यस्तै उनले नेपालको आन्तरिक हवाइ उडानमा बिदेशी र नेपालीको असमान हवाइ भाडादरको विषयमा चासो राखेको मन्त्रालयले जनाएको छ । राजदूतसँग पर्यटनमन्त्री आलेले नेपाल र इजरायल बिच सिधा हवाइ सम्पर्कका लागि आफुहरु तयार रहेको जानकारी गराएका थिए । मन्त्री आलेले नेपालको विविधि क्षेत्रमा इजरायले गर्दै आएको सहयोगप्रति धन्यवाद व्यक्त गर्दै आगामी दिनमा समेत सहयोगले निरन्तरता पाउने विश्वास समेत व्यक्त गरेका थिएउ । उनले नेपाल सरकारले निजगढमा निर्माण गर्न लागेको दोस्रो अन्तर्राष्ट्रिय विमानस्थल निर्माणका लागि लगानीकर्ता जुटाइ दिन राजदुत गोदरसँग आग्रह गरेको सचिवालयले जनाएको छ ।
मन्त्रालय तानिए निगमका महाप्रबन्धक पौडेल
काठमाडौं । नेपाल वायुसेवा निगमका महाप्रबन्धक डिमप्रकाश पौडेल मन्त्रालय तानिएका छन् । संस्कृति, पर्यटन तथा नागरिक उडड्यन मन्त्री प्रेम आलेले गत कात्तिक ८ गते मन्त्रीस्तरीय निर्णय गर्दै पौडेललाई मन्त्रालय तानेका हुन् । वायुसेवा निगमलाई निजीकरण गर्न लागिएको भन्दै कर्मचारीले गत असार १८ गतेबाट आन्दोलन गरी उनलाई कार्यालय प्रवेशमा रोक लगाएसँगै पौडेल मन्त्रालयमा नै हाजीर गर्दै आएका थिए । उनी विवादमा तानिएपछि गत कात्तिक ८ गते नै बसेको मन्त्रिपरिषद् बैठकले निगमको कार्याकारी अध्यक्षमा युवराज अधिकारीलाई नियुक्ती गर्ने निर्णय गरेको थियो । कार्यकारी अधिकार खोसिएपछि कामविहीन भएका पौडेललाई मन्त्री आलेले मन्त्रालयमा नागरिक उड्डयनको विज्ञका रुपमा काम गर्ने गरी तानेका हुन । महाप्रबन्धक पौडेलले सोमबार सामाजिक सञ्जालमा एक स्ट्याटस लेख्दै आफू निगमको कुनै पनि कार्यकारी भूमिकामा नरहेको बताएका छन् ।
हवाई इन्धनको मूल्य बढाएको भन्दै वायुसेवा कम्पनीले बढाए हवाई भाडा
काठमाडौं । नेपाल आयल निगमले हवाई इन्धनको मूल्य बढाएको भन्दै भाडादर बढाएको छ । यसअघि गत कात्तिक १७ गते प्रति उडान साढे ४ सय रुपैयाँसम्म भाडा बढाएका वायुसेवा सञ्चालकले ११ दिनको अवधिमा पुनः भाडा बढाएका हुन । वायुसेवा सञ्चालकले आईतबार सार्वजनिक गरेको नयाँ हवाई भाडादर अनुसार प्रति उडान २२० रुपैयाँसम्म भाडा बढाएका छन् । बढाएको भाडा अनुसार अब काठमाडौं–धनगढी रुटमा सबैभन्दा धेरै ४ हजार ४६० रुपैयाँ पुगेको छ । आईतबार सो रुरटमा २२० रुपैयाँ भाडा बढेको हो । सघंले जारी गरेको सूची अनुसार काठमाडौं– सुर्खेतमा १८५, भ्रदपुरमा १५०, विराटनगरमा १२०, जनकपुरमा ६५, भरतपुरमा ५५ रुपैयाँ मूल्य बढाएका छन् । यस्तै, पोखरा–विराटनगरमा १८०, काठमाडौं–माउन्टेन उडानमा १७० रुपैयाँ र विराटनगर माउन्टेन उडानमा १६० रुपैयाँ भाडा बढाएका छन् । [pdf id=301983]
