पूर्व डेपुटी गभर्नर शिवाकोटीको ‘दोहमना घुम्न जाउँ’ सार्वजनिक
काठमाडौं । नेपाल राष्ट्र बैंकका पूर्व डेपुटी गभर्नर चिन्तामणि शिवाकोटीको २१औं गित ‘दोहमना घुम्न जाउँ’ सार्वजनिक भएको छ । नेपाल राष्ट्र बैंकको संचालक समिति सदस्य रहेका शिवाकोटीले रचना गरेको सो गितमा तुलसी पराजुलीले संगित भरेका छन् भने स्वर पनि पराजुली र प्रविशा अधिकारीको छ । गितको एरेन्जर चन्दु गोर्खाली हुन भने भिडियोमा दिपेन्द्र तिमल्सेना, स्मारिका ढकाल र विवेक शिवाकोटीको अभिनय छ । भिडियोको निर्देशक निर्देशक कमल खालिङले गरेका हुन् । सो गितमा मोरङ जिल्लाको दोहमना क्षेत्रमा आन्तरिक पर्यटन बढाउन सो क्षेत्रको प्रचार प्रसार गरिएको छ । रचनाकार शिवाकोटीले कक्षा ४ देखि १० सम्म सोही स्थानको विद्यालयमा अध्ययन गरेका थिए । सोही कारण आफ्नो क्षेत्रको प्रचार प्रसार गर्न गित रचना गरिएको शिवाकोटीले बताए । गितमा सो क्षेत्रको चालचलन, रहनसहन, खानपान जस्ता विषयको चर्चा गरिएको छ । सो क्षेत्रका ऐतिहासिक र पौराणिक स्थानहरु सुनबर्सी महाराज र काँटा महाराजको क्षेत्रको चर्चा गरिएको छ । सुनबर्सीमा बैशाख १ गते र काँटामा बैशाख २ गते ठूलो मेला लाग्ने गरेको छ । सो गित पूर्वेली भाकामा छमछम नाच्न मिल्ने लयमा रहेको शिवाकोटीले बताए ।
नारायणगढ-मुग्लिन सडक र मध्यपहाडी लोकमार्ग अवरुद्ध
तस्विरः सामाजिक सञ्जाल काठमाडौं । वर्षासँगै खसेको पहिराका कारण नारायणगढ-मुग्लिन सडक अवरुद्ध भएको छ । चितवनको इच्छाकामना-६ तोपेखोलास्थित नाम्सी पुलमा पहिरो खसेका कारण गए रातिदेखि सडक अवरुद्ध भएको जिल्ला प्रहरी कार्यालयका प्रवक्ता नरहरि अधिकारीले जानकारी दिए । जेठ २६ गते बिहानैदेखि पहिरो हटाएर राजमार्ग सुचारु गराउने प्रयास भइरहेको अधिकारीले बताए। पहिराकै कारण मुग्लिन-नौबिसे सडक पनि अवरुद्ध भएको छ । इच्छाकामना-४ स्थित नाग्दिखोलामा गए राति पहिरो खसेका कारण सडक दुईतर्फी अवरुद्ध भएको प्रवक्ता अधिकारीले जानकारी दिए । मध्यपहाडी लोकमार्ग अवरुद्ध त्यस्तै, दुई दिनदेखिको वर्षासँगै खसेको पहिराका कारण मध्यपहाडी लोकमार्गको बागलुङ खण्डअन्तर्गत घोडाबाँधे-हटिया सडक गए रातिदेखि अवरूद्ध भएको छ । सडक अवरुद्ध हुँदा लोकमार्ग भएर चल्ने लामो तथा छोटो दुरीका सवारीसाधन बाटोमै थन्किएका छन् । यात्रुले सास्ती व्यहोरिरहेका छन् । ठाउँठाउँमा खसेका पहिराले लोकमार्ग क्षतविक्षत बनेको छ । गलकोट नगरपालिकाका प्रवक्ता हेमन्त भण्डारीका अनुसार अहिले डोजरले पहिरा पन्छाएर अवरुद्ध सडक खुलाउने काम भइरहेको छ । रासस
माछापुच्छ्रे बैंकले चन्द्रागिरिमा गर्यो वृक्षारोपण
काठमाडौं । माछापुच्छ्रै बैंकले चन्द्रागिरि नगरपालिका वडा नं. ३ स्थित सेती देवी, दुमाल डाँडा, जेसिज वनमा वृक्षारोपण गरेको छ । बैंकले विश्व वातावरण दिवस २०२२ को उपलक्ष्यमा आफ्नो संस्थागत सामाजिक उत्तरदायित्व अन्तर्गत जेठ २२ गते उक्त स्थानमा वृक्षारोपण गरेको हो । बैंकले सफा, सुन्दर र हरितमय वातावरण बनाउन जेसिज थानकोट र लुम्बिनी वल्र्ड पिस फोरमसँगको सहकार्यमा दश लाख वृक्षारोपण अभियान अन्तर्गत विश्व वातावरण दिवसको अवसरमा उक्त वृक्षारोपण कार्यक्रममा सहभागी भएको हो । बैंकले बैंकिङ्ग सेवाको साथमा आफ्नो संस्थागत सामाजिक उत्तरदायित्व अन्तर्गत यसअघि पनि विभिन्न संघ सस्थाहरुलाइ सहयोग गर्दै आएको थियो । त्यस्तै, बैंकले विभिन्न समयमा देशमा आइपर्ने प्राकृतिक विपत्तिहरुमा पनि सरकारलाई सहयोग गर्दै आएको छ । बैंकले हाल देशका ७ वटै प्रदेशमा १६५ शाखा, ८ एक्सटेन्सन काउन्टर, १६६ शाखारहित बैंकिङ्ग सेवा, २०५ एटीएम मार्फत १३ लाखभन्दा बढी ग्राहकलाई सेवा प्रदान गर्दै आइरहेको छ ।
