कांग्रेस आधिकारिकता विवाद हेर्दाहेर्दैमा, भोलि गगन–विश्व पक्षको बहस
काठमाडौं । नेपाली कांग्रेसको आधिकारिकता विवादसम्बन्धी मुद्दामा सुनुवाइ भोलि (शुक्रबार) पनि निरन्तर हुने भएको छ । पार्टीको १५औं महाधिवेशनको कार्यतालिका स्थगनको मागसहित दायर उक्त रिट सर्वोच्च अदालतमा हेर्दाहेर्दैमा राखिएको छ । न्यायाधीशद्वय शारंगा सुवेदी र नृपध्वज निरौलाको संयुक्त इजलासमा परेको मुद्दामा आज रिट निवेदक पक्षका कानुन व्यवसायीहरूले बहस गरेका थिए । साथै निर्वाचन आयोगको तर्फबाट सरकारी वकिलले पनि आफ्नो धारणा राखेका थिए । अब भोलि गगन–विश्व पक्षका वकिलहरूले बहस गर्ने कार्यतालिका छ । त्यसपछि दुवै पक्षबीच जवाफी बहस हुनेछ । कानुन व्यवसायीहरूका अनुसार बहस प्रक्रिया सकिएमा भोलि नै आदेश आउन सक्ने सम्भावना पनि छ। विशेष महाधिवेशनबाट निर्वाचित गगन थापा नेतृत्वलाई आधिकारिकता दिने निर्वाचन आयोगको निर्णयविरुद्ध तत्कालीन सभापति शेरबहादुर देउवा पक्षले सर्वोच्च अदालतमा रिट दायर गरेको हो ।
११ समिति सभापति निर्विरोध, एकमा मतदान हुने
काठमाडौं । संसद्का ११ ओटा समितिका सभापति निर्विरोध निर्वाचित हुँदा एक समितिमा भने मतदान हुने भएको छ । संसद्को संयुक्त समिति अन्तर्गत राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्याङ्कन समितिमा दुई उम्मेदवारले मनोनयन गरेसँगै उक्त समितकिो सभापति चयन मतदानवाट हुने भएको हो । समिति सभापतिकालागी नेपाली कम्युनिष्ट पार्टीले गरिमा शाहलाई उम्मेदवार बनाएको छ । यस्तै राष्ट्रिय स्वतन्त्र पार्टीले गणेश कार्कीलाई उम्मेदवार बनाएको छ । नेपाली काँग्रेस र नेकपा एमालेले नेपाली कम्युनिष्ट पार्टीका उम्मेदवार शाहलाई समर्थन गरेका छन् ।
रास्वपाको उपनेतामा गणेश पराजुली नियुक्त
काठमाडौं । राष्ट्रिय स्वतन्त्र पार्टी (रास्वपा) ले संसदीय दलको उपनेतामा गणेश पराजुलीलाई नियुक्त गरेको छ । रास्वपाले आजै कविन्द्र बुर्लाकोटीलाई मुख्य सचेतकमा र प्रकाशचन्द्र परियार र क्रान्तिशिखा धिताललाई सचेतकमा नियुक्त गरेको थियो । रास्वपाले संसदीय दलको कामकारबाहीलाई व्यवस्थित र सक्रिय बनाउने उद्देश्यले यी नियुक्तिहरू गरिएको जनाएको छ ।