नाफा वृद्धिमा कुमारी आक्रमक बन्दा एनआईसी एक नम्बर, सनराइज ओरालो लाग्यो, कुन बैंकको कति ?
काठमाडौं । चालु आर्थिक वर्षको पहिलो ३ महिनामा वाणिज्य बैंकहरुले आफ्नो वित्तीय विवरण सार्वजनिक गरिसकेका छन् । चालु आर्थिक वर्षको ३ महिनामा वाणिज्य बैंकहरुको खुद नाफा ६ प्रतिशत बढेको छ । तरलता असहज रहेको अवस्थामा बैंकहरुको नाफा नढ्ने अनुमान गरिएकोमा ३ महिनामा ६ प्रतिशत मात्रै बढाएका हुन् । २६ वटा वाणिज्य बैंकहरुको खुद नाफा ५.९३ प्रतिशत बढेर १८ अर्ब ७५ करोड ५६ लाख १५ हजार रुपैयाँ आर्जन गर्न सफल भएका हुन् । गत आर्थिक वर्षको सोही अवधिमा बैंकहरुले १७ अर्ब ७० करोड ५७ लाख ४३ हजार रुपैयाँ खुद नाफा आर्जन गरेका थिए । २६ वटा बैंकहरुमध्ये १२ वटा बैंकको खुद नाफा भने घटेको छ भने बाँकी १४ वटा बैंकको नाफा बढेको छ । तीन महिनाको अवधिमा एक अर्ब भन्दा बढी नाफा आर्जन गर्नेमा ६ वटा वाणिज्य बैंक रहेका छन् । अन्य सबै बैंकको नाफा करोड क्लबमा छ । जसमध्ये सबैभन्दा धेरै एनआईसी एशिया बैंकको नाफा बढेको छ । बैंकले यस अवधिमा १ अर्ब ७५ करोड ६७ लाख ७९ हजार रुपैयाँ खुद नाफा आर्जन गरेको छ । यस्तै, दोस्रोमा नबिल बैंकले १ अर्ब ५७ करोड १५ लाख ३७ हजार रुपैयाँ, तेस्रोमा राष्ट्रिय वाणिज्य बैंकले १ अर्ब २४ करोड ६६ लाख ७८ हजार रुपैयाँ, चौंथोमा ग्लोबल आइएमई बैंकले १ अर्ब १८ करोड ९५ लाख ४५ हजार रुपैयाँ र पाँचौंमा नेपाल इन्भेष्टमेन्ट बैंकले १ अर्ब १४ करोड ५ लाख९७ हजार रुपैयाँ खुद नाफा आर्जन गरेका छन् । यस्तै, कुमारी बैंकले १ अर्ब १४ लाख ५९ हजार रुपैयाँ खुद नाफा आर्जन गरेको छ । गत वर्ष एनएमबि बैंकले तीन महिनमा नै १ अर्ब नाफा कमाएकोमा यस वर्ष भने घटेर ९० करोड ४१ लाख ३४ हजार रुपैयाँ मात्रै आर्जन गरेको छ । यस अवधिमा सबैभन्दा कम नाफा सनराइज बैंकको रहेको छ । बैंकले १६ करोड ५८ लाख २७ हजार रुपैयाँ आर्जन गरेको छ । यस्तै, कृषि विकास बैंकले २२ करोड ९ लाख ५३ हजार रुपैयाँ, बैंक अफ काठमाण्डूले २८ करोड ६ लाख १५ हजार रुपैयाँ, सेञ्चुरी बैंकले ३१ करोड ८५ लाख १५ हजार रुपैयाँ, सिभिल बैंकले ४१ करोड ५० लाख ९१ हजार रुपैयाँ, माछापुच्छ्रे बैंकले ४५ करोड ११ लाख ८३ हजार रुपैयाँ, सिद्धार्थ बैंकले ४९ करोड ८२ लाख ५० हजार रुपैयाँ खुद नाफा आर्जन गरेको छन् । यस्तै, प्राइम कमर्सियल बैंकले ८७ करोड ४१ लाख ७० हजार रुपैयाँ, एभरेष्ट बैंकले ८६ करोड २२ लाख ३७ हजार रुपैयाँ, स्ट्याण्डर्ड चार्टर्ड बैंकले ८१ करोड १३ लाख ९७ हजार रुपैयाँ, प्रभु बैंकले ७० करोड ५० लाख ६ हजार रुपैयाँ, नेपाल एसबिआई बैंकले ६२ करोड ७३ लाख ५७ हजार रुपैयाँ, नेपाल बैंकले ६० करोड ४० लाख ९८ हजार रुपैयाँ, सानिमा बैंकले ५४ करोड ८२ लाख २० हजार रुपैयाँ, हिमालयन बैंकले ५३ करोड २४ लाख ७५ हजार रुपैयाँ, एनसीसी बैंकले ५१ करोड ६८ लाख ३६ हजार रुपैयाँ, मेगा बैंकले ५० करोड ९१ लाख ६९ हजार रुपैयाँ, लक्ष्मी बैंकले ५० करोड ३४ लाख ७२ हजार रुपैयाँ र सिटिजन्स बैंकले ५० करोड १२ लाख १५ हजार रुपैयाँ खुद नाफा आर्जन गरेका छन् । तीन महिनाको अवधिमा कुमारी बैंकल सबैभन्दा धेरै वृद्धि गरेको छ । बैंकले ८५ प्रतिशत नाफा वृद्धि गरेको हो । यस अवधिमा सनरइाज बैंकको नाफा भने झनै खस्किएको छ । सनराइज बैंकको नाफा भने ६१.४९ प्रतिशतले गिरावट आएको छ । (रकम हजारमा)
सिद्धार्थ बैंकको नाफासँगै ईपीएस पनि घट्यो
काठमाडौं । सिद्धार्थ बैंकको चालु आर्थिक वर्षको पहिलो त्रैमासमा खुद नाफा ४७.४८ प्रतिशत घटेको छ । बैंकले यस अवधिमा ४९ करोड ८२ लाख ५० हजार रुपैयाँ नाफा आर्जन गरेको छ । गत वर्षको सोही अवधिमा बैंकले ९४ करोड ८७ लाख ३७ हजार रुपैयाँ खुद नाफा आर्जन गरेको थियो । बैंकको खुद ब्याज आम्दानी २१.६२ प्रतिशत बढेर २ अर्ब १२ करोड रुपैयाँ आर्जन गरेको छ । यस्तै बैंकको सञ्चालन नाफा ४६.८६ प्रतिशत घटेर ७२ करोड ८ लाख रुपैयाँमा सिमित भएको छ । बैंकको वितरणयोग्य नाफा ३११.३९ प्रतिशत बढेर १ अर्ब २२ करोड ५१ लाख रुपैयाँ पुगेको छ । बैंकको प्रतिसेयर आम्दानी १८ रुपैयाँ घटेर १५ रुपैयाँ ६१ पैसामा सिमित भएको छ । बैंकको प्रतिसेयर नेटवर्थ १७७ रुपैयाँ १५ पैसा छ । बैंकको चुक्ता पूँजी १४.२५ प्रतिशत बढेर १२ अर्ब ५२ लाख रुपैयाँ, जगेडा कोष ५.११ प्रतिशत बढेर ८ अर्ब ४३ करोड रुपैयाँ, निक्षेप संकलन ५.१४ प्रतिशत बढेर १ खर्ब ९२ अर्ब ९५ करोड रुपैयाँ र कर्जा ३.९० प्रतिशत बढेर १ खर्ब ७९ अर्ब ९३ करोड रुपैयाँ पुगेको छ ।
धेरै बीमा कम्पनीले सेयरधनीलाई लाभांश दिन सकेनन् : अध्यक्ष सिलवाल
काठमाडौं । बीमा समितीका अध्यक्ष सुर्य प्रसाद सिलवालले धेरै बीमा कम्पनीहरुले सेयरधनीलाई लाभांश दिन नसकेको बताएका छन् । सोमबार सानिमा जनरल इन्स्योरेन्स र जनरल इन्स्योरेन्सबीच एकीकृत कारोबार शुभारम्भ कार्यक्रममा उनले यस्तो बताएका हुन् । उनले मर्जरपश्चात भने कम्पनीहरुको राम्रो परिमाण आउने र सेयरधनीहरुले पनि लाभांश पाउने विश्वास व्यक्त गरेका छन् । सिलवालले बीमा बजारलाई व्यवस्थित गर्न र जोखिम कम गर्न बीमामा मर्जर सुरु भएको बताए । बीमाको बजार बढाउन आवश्यक रहेको बताउँदै उनले अझै धेरै काम गर्नु बाँकी रहेको बताएका छन् । यस्तै, सिलवालले कात्तिक २२ गतेदेखि नयाँ ऐन लागू हुने जानकारी दिएका छन् । ‘सबैको प्रयासले नयाँ ऐन आएको छ, अहिले पनि बीमा कम्पनी अहिले पनि पुरानो ऐन २०४९ अनुसार चल्नु पर्ने बाध्यता छ, पुरानो ऐन अनुसार चल्नु भनेको पुरानाे तरिकामा चल्नु हो, त्यसैले समय परिस्थिति अनुसार नयाँ ऐन आएको हो,’ उनले भने । सिलवालले दुईटा फरक धार भएका कम्पनी एक भएकोमा सानिमा जनरल इन्स्योरेन्स र जनरल इन्स्योरेन्स बधाई दिएका छन् । उनले भोलिका दिनमा दुई ठाउँबाट आएको विचार एक भएपछि कम्पनीले अझै राम्रो प्रगति गर्ने बताए । यस्तै, उनले सरकारले बीमाको बारेमा बुझ्नुपर्ने धारणा राखेका छन् । ‘बीमा बारे बुझाउँदा सधै सरकारसँग झगडा गर्नुपरेको छ त्यसैले अब तीनै तहका सरकारलाई बीमाका बारेमा राम्रोसँग जानकारी दिनुपर्ने छ,’ उनले भने । साेमबार सानिमा जनरल इन्स्योरेन्स र जनरल इन्स्योरेन्सबीच एकीकृत कारोबार शुभारम्भ भएको छ । दुई कम्पनीकाे मर्जर पश्चात् सानिमा जिआईसी इन्स्योरेन्सको नामबाट कारोबार हुनेछ ।
