स्याउ खेतीका किसानलाई राहत, शिखर इन्स्योरेन्सले दियाे साढे २ करोड रुपैयाँको भुक्तानी
काठमाडौं । शिखर इन्स्योरेन्सले मौसम सुचकांकमा आधारित स्याउ खेतीको बीमा गरेका कर्णालीका किसानलाई साढे २ करोड ५५ लाख रुपैयाँ बराबरको दावी रकम भुक्तानी गरेको छ । माथिल्लो कर्णालीका जुम्ला, कालिकोट र मुगुका गरी १ हजार ३ सय ९१ जना किसानलाई २ करोड ५५ लाख रुपैयाँ दावी भुक्तानी हस्तान्तरण गरिएको हो । जुम्ला जिल्लामै सबैभन्दा बढी ७ सय बिरुवाको बीमा गराउने पातारासीका किसान अधिराज विष्टले १ लाख ८९ हजार बराबरको भुक्तानी रकम बुझेका छन् । भुक्तानी पाएपश्चात विष्टले शिखर इन्स्योरेन्सले समग्र कर्णालीका किसानको मर्म र सहायताका लागि खेलेको भूमिका महत्वपूर्ण रहेको भन्दै कृतज्ञता पनि व्यक्त गरेका छन् । जुम्लामा ७ सय ४७ जना किसानले ४९ हजार बिरुवाको बीमा गराएका थिए । जुम्लामा मात्र प्रतिबिरुवा २ सय ७० रुपैयाँका दरले १ करोड बीमा दावी रकम भुक्तानी पाएका छन् । यसैगरी, प्रतिबिरुवा २ सय ७० रुपैयाँका दरले कालिकोटका ३ सय २६ किसानले ७० लाख २० हजार दावी भुक्तानी पाएका छन् । कालिकोटमा ३ सय २६ जना किसानले २ हजार ६ सय बिरुवाको मौसमी सुचकांकमा आधारित स्याउ बीमा गराएका थिए । यस्तै मुगुका ३ सय १८ जना किसानले १ हजार ९ सय बिरुवाको बीमा गरे बापत ५१ लाख रुपैयाँ बराबरको भुक्तानी पाएका छन् । शिखर इन्स्योरेन्स कम्पनी लिमिटेड शाखा कार्यालय जुम्लाले बीमा गरेका किसानलाई घरदैलोमै गएर क्षतिपूर्ति रकम अर्थात दाबी भुक्तानी दिएको बीमा कम्पनीका कर्णाली इन्चार्ज ऋषिराम पाण्डेले बताए । कर्णालीका किसानले गत वर्ष नै स्याउ फल्ने बेला स्याउ खेतीको बीमा गरेका थिए । सोही बीमा गराएका कारण उनीहरुले अहिले दाबी भुक्तानी पाएका हुन् । असिना र सुख्खा खडेरीले क्षति पुर्याएको तथा स्याउ उत्पादन घट्दा घाटा व्यहोरेका किसानले बीमा रकम पाउँदा राहत महसुस गरेका छन् । सुरुको वर्ष ४७ जना किसानले स्याउको बीमा गराएका थिए भने गत वर्ष १८ सय किसानले स्याउ खेतीको बीमा गराएका इन्स्याेरेन्सले जनाएकाे छ । इन्स्योरेन्सले ५ वर्ष अगाडि मौसमी सूचकांकको आधारमा गरिने बीमामा स्याउ खेतीका लागि नै भनेर कर्णाली प्रदेशमा यो बीमा पोलिसी शुरु गरेको थियो । गएको ३ वर्षयता हरेक वर्ष शिखर इन्स्योरेन्सले स्याउ किसानलाई दावी भुक्तानी गर्दै आइरहेको छ । आगामी दिनमा शिखर इन्स्योरेन्सले मौसम सुचकांक बीमा योजनालाई विभिन्न जिल्लामा विस्तार गर्ने योजना बनाएको छ ।
अजोड इन्स्योरेन्सले ५० प्रतिशत हकप्रद सेयर जारी गर्ने, पारित गर्न डाक्यो एजीएम
काठमाडौं । अजोड इन्स्योरेन्सले चुक्ता पुँजीको ५० प्रतिशत हकप्रद सेयर जारी गर्ने विशेष प्रस्ताव गरेको छ । उक्त प्रस्ताव चैत १६ गते बसेको कम्पनी सञ्चालक समितिको बैठकले गरेको हो । बैठकले एक अर्ब रुपैयाँ चुक्ता पुँजीको ५० प्रतिशत अर्थात २ बराबरको १ का दरले हकप्रद सेयर जारी गर्ने विशेष प्रस्ताव गरेको छ । जुन प्रस्तावलाई कम्पनीको आगामी वार्षिक साधारणसभाले पारित गर्दै छ । कम्पनीको आगामी अर्थात तेश्रो वार्षिक साधारणसभा २०७८ साल बैशाख ७ गते मंगलबार बस्दै छ । उक्त सभा सो दिन बिहान ११ बजे काठमाडौंको त्रिपुरेश्वर स्थित अमन हल तेश्रो तल्लाको युनाइटेड वल्ड ट्रेड सेन्टरमा बस्दै छ । त्यस्तै, सभाले समूह ख अन्तर्गत सर्वसाधारण सेयरधनीको तर्फबाट प्रतिनिधित्व गर्ने सञ्चालकमा २ जनालाई निर्वाचित गर्दै छ । यससँगै सभामा जाने प्रयोजनको लागि कम्पनीको आगामी चैत २४ गतेदेखि बैशाख ७ गतेसम्म इन्स्योरेन्सको बुक क्लोज हुने छ ।
एनएमबि बैंकले शिखर इन्स्योरेन्स मार्फत भुक्तानी गर्याे बीमा दावी
काठमाडौं । एनएमबि बैंकको थापाथली शाखामा ‘एनएमबि सहारा बचत खाता’ खोली कारोबार गर्दै आएका निर्विकार अमात्यलाई स्वास्थ्य विमा बापत बीमितले पाउने १० लाख रुपैयाँ हस्तान्तरण गरिएको छ । बैंकका प्रदेश ३ प्रमुख गणेश पराजुली, एरिया म्यानेजर स्मृति भण्डारी र शाखा प्रमुख लजना तुलाधरले संयुक्त रुपमा आमत्यलाई स्वास्थ्य बीमावापतको रकमको चेक हस्तान्तरण गरेका हुन् । बैंकको उक्त खाता योजनामा शुन्य मौज्दातमै खाता खोल्न सकिने, नेपाल भरी पैसा झिक्दा अतिरिक्त शुल्क नलाग्ने डिलाइट एटीएम, दश लाखसम्मको दुर्घटना बीमाको साथै १८ घातक रोगहरुमा स्वास्थ्य उपचार विमा सुविधा प्रदान गर्दै आइरहेको छ । बैंकले शिखर इन्स्योरेन्स मार्फत उक्त भुक्तानी प्रदान गरेको हो । बैंकले सबै क्षेत्र र वर्गसम्म बैंकिङ्ग सेवाको पहुँच पुर्याउने उद्देश्यले विभिन्न स्थानमा शाखा, विस्तारित सेवा तथा शाखा रहित बैंकिङ्ग सेवामार्फत आफ्ना ग्राहक माझ सेवा पुर्याउँदै आईरहेको छ ।
