प्रधानन्यायाधीशबाट शपथ लिएर डा. पौडेलले सम्हाले गभर्नरको जिम्मेवारी
काठमाडौं । प्रधानन्यायाधीश प्रकाशमान सिंह राउतले नेपाल राष्ट्र बैंकको नवनियुक्त गभर्नर डा. विश्वनाथ पौडेललाई पद तथा गोपनीयताको शपथ ग्रहण गराएका छन् । सर्वोच्च अदालतमा आज आयोजित समारोहमा प्रधानन्यायाधीश राउतले अर्थविद् डा पौडेललाई शपथ ग्रहण गराएका हुन् । मङ्गलबार बसेको मन्त्रिपरिषद्को बैठकले अर्थविद् डा पौडेललाई गभर्नर पदमा नियुक्त गर्ने निर्णय गरेको थियो । सरकारले गभर्नर चयनका लागि उपप्रधानमन्त्री एवं अर्थमन्त्री विष्णुप्रसाद पौडेलको संयोजकत्वमा तीन सदस्यीय समिति गठन गरेको थियो ।
ऐनले दिएको अधिकार प्रयोग गर्छु, कसैसँग झगडा गर्दिनँ : गभर्नर पौडेल
काठमाडौं । नवनियुक्त गभर्नर डा. विश्व पौडेलले ऐनले दिएको अधिकार प्रयोग गरेर काम गर्ने बताएका छन् । बुधबार राष्ट्र बैंक पुगेर पदभार ग्रहण गर्दै उनले अब आफूले ऐनका अधिकार प्रयोग गरेर काम गर्ने र कुनै र कसैसँग झगडा नगर्ने धारणा राखेका हुन् । मौद्रिक नीतिले वित्तीय नीतिको लक्ष्य सफल बनाउन भूमिका खेल्ने बताएका हुन् । यस्तै, उनले कार्यकारी निर्देशक डा. गुणाकर भट्टको राजीनामा स्वीकृत सम्बन्धीमा पनि धारणा राखेका छन् । उनले भने, ‘मेरो हातमा केही आएको छैन । अब पुरानो अवस्था नहोला ।’
नवनियुक्त गभर्नर विश्व पौडेलको अर्थमन्त्रीसँग भेट, समन्वयमा काम गर्ने सहमति
काठमाडौं । उपप्रधानमन्त्री एवं अर्थमन्त्री विष्णुप्रसाद पौडेललाई नेपाल राष्ट्र बैंकका नवनियुक्त गभर्नर डा. विश्व पौडेलले भेटेका छन् । बुधबार बिहान अर्थ मन्त्रालय पुगी नवनियुक्त गभर्नर पौडेलले अर्थमन्त्री पौडेललाई भेटेका हुन् । सो अवसरमा अर्थमन्त्री पौडेलले हार्दिक बधाइ दिँदै सफल कार्यकालको शुभकामना दिए । अर्थमन्त्री पौडेलले वित्त नीति र मौद्रीक नीतिबीच समन्वय गरी अघि बढ्ने उल्लेख गर्दै नवनियुक्त गभर्नर पौडेलले अर्थतन्त्र र मौद्रीक क्षेत्रमा देखा परेका समस्या समाधानमा महत्वपूर्ण पहल गर्ने विश्वास व्यक्त गरे । नवनियुक्त गभर्नर पौडेलले अर्थ मन्त्रालयले देशको अर्थतन्त्रको नेतृत्व गर्ने र नेपाल राष्ट्र बैंकले मौद्रिक नीतिमार्फत वित्त नीति कार्यान्वयनमा सहयोग पुर्याउने बताए । उनले वित्तीय क्षेत्रको प्रभावकारिताका लागि राष्ट्र बैंकको सुपरीवेक्षकीय क्षमतामा जोड दिने बताए । सो अवसरमा उद्योग, वाणिज्य तथा आपूर्तिमन्त्री दामोदर भण्डारी, अर्थ सचिव घनश्याम उपाध्याय, राजस्व सचिव दिनेशकुमार घिमिरे लगायत नवनियुक्त गभर्नर पौडेललाई बधाइ तथा शुभकामना दिएका थिए ।
फूलमालासहित गभर्नरको पर्खाइमा राष्ट्र बैंकका कर्मचारी {तस्बिरहरू}
काठमाडौं । नेपाल राष्ट्र बैंकले नवनियुक्त गभर्नर डा. विश्व पौडेलको स्वागतको तयारी गरेको छ । राष्ट्र बैंकले कर्मचारीहरुलाई तयारका साथ फुलमालासहित प्रवेश द्वारमा तयार अवस्थामा राखेको छ । पौडेलले सर्वोच्च अदालतबाट सपथ लिएर राष्ट्र बैंक जाँदैछन् । उनले सर्वोच्च अदालत पुगेर प्रधानन्यायाधीश प्रकाशमान सिंह राउतसँग सपथ लिएका थिए । अब उनी पदभार ग्रहणका लागि राष्ट्र बैंक जाँदैछन् । उनलाई मंगलबार बसेको मन्त्रिपरिषद् बैठकले गभर्नरमा नियुक्त गरेको थियो । उनीसँगै तीन जनाको नाम सिफारिस भएको थियो ।
रवि लामिछानेको रिटमा सुनुवाइ स्थगित, इजलास बस्न सकेन
काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेको बन्दीप्रत्यक्षीकरणसम्बन्धी रिटमा बुधबार सुनुवाइ हुने भनिए पनि स्थगित भएको छ । मंगलबारदेखि न्यायाधीश नहकुल सुवेदी र बालकृष्ण ढकालको संयुक्त इजलासमा सुरु भएको सुनुवाइ नसकिएकाले मुद्दा आजका लागि ‘हेर्दाहेर्दै’मा राखिएको थियो । तर बुधबार न्यायाधीश सुवेदी संवैधानिक इजलासमा व्यस्त रहेका कारण संयुक्त इजलास बस्न नसकेपछि सुनुवाइ स्थगित गरिएको हो । मंगलबार लामिछानेको तर्फबाट अधिवक्ताहरू सुदीज्ञ पन्त, सुशील पन्त, सुरेन्द्र थापा, दीपेन्द्र झा, नारायणदत्त कँडेल र विवेक राउतले बहस गरिसकेका छन् । वरिष्ठ अधिवक्ता रमण श्रेष्ठको बहस भने अझै बाँकी छ । त्यसपछि पूर्वडीआईजी छविलाल जोशीको तर्फबाट कानुन व्यवसायीहरूले बहस गर्नेछन् भने अन्त्यमा सरकारी वकिल र पीडित पक्षका वकिलको तर्फबाट बहस हुनेछ ।
टेस्लाको रोबोट्याक्सी परीक्षण : मस्कले खोल्दैछन् भविष्यको ढोका !
काठमाडौं । टेस्लाले अष्टिन, टेक्सासमा रोबोट्याक्सी सेवाको परीक्षण जुन महिनाको अन्त्यसम्ममा समयमै सुरु गर्ने तयारी गरेको छ । कम्पनीका प्रमुख कार्यकारी एलन मस्कले मंगलबार उक्त जानकारी दिएका हुन् । यद्यपि कम्पनी अमेरिकी नियामकको तर्फबाट उठाइएका सुरक्षासम्बन्धी प्रश्नहरूको सामना गरिरहेको छ । मस्कले सीएनबीसीलाई दिएको अन्तर्वार्तामा भने अनुसार टेस्लाले सुरुमा सहरका केही भागहरूमा करिब १० वटा स्वचालित सवारीहरू सञ्चालनमा ल्याउनेछ र केही महिनाभित्र त्यसलाई विस्तार गर्दै करिब १ हजार पुर्याउने योजना बनाएको छ । 'हामी खासमा पूरै अष्टिन क्षेत्रमा होइन, केवल सबैभन्दा सुरक्षित भागहरूमा मात्र रोबोट्याक्सी तैनाथ गर्दैछौं,' मस्कले भने । टेस्लाको बिक्री विश्वभर घटिरहेको छ, किनभने प्रतिस्पर्धा तीव्र बन्दै गएको छ र मस्कको दक्षिणपन्थी राजनीतिक दृष्टिकोणका कारण उनी आलोचित भइरहेका छन् । मस्कले भनेका छन् कि उनले ट्रम्पको लागि गर्ने काम घटाउने र टेस्लामा ध्यान केन्द्रित गर्नेछन् । 'ह्वाइट हाउसमा मेरो मोटामोटी योजना हरेक केही हप्तामा केही दिनको लागि त्यहाँ हुने र जहाँ सहयोग गर्न सकिन्छ, त्यहाँ सहयोग गर्ने हो,' उनले भने । टेस्लाका लागि सफल रोबोट्याक्सी परीक्षण अत्यन्तै महत्वपूर्ण छ किनभने मस्कले कम्पनीको ध्यान सस्तो विद्युतीय सवारी निर्माणबाट हटाएर रोबोट्याक्सी सेवा र यसको अप्टिमस ह्युमनाइड रोबोटहरूमा केन्द्रित गराएका छन् । टेस्लाको बजार मूल्यको ठूलो हिस्सा यही आशामा आधारित छ । 'दीर्घकालीन रूपमा वास्तवमा महत्त्वपूर्ण कुराहरू भनेका स्वचालित प्रणाली (अटोनोमी) र अप्टिमस हुन्,' मस्कले सीएनबीसीलाई बताए । स्वचालित सवारी प्रविधि व्यवसायिक रूपमा प्रयोगमा ल्याउन कठिन साबित भएको छ, कडा नियम तथा ठूलो लगानीका कारण धेरै कम्पनीहरूले हार मानिसकेका छन् । अझै दौडमा रहेका कम्पनीहरू, जस्तै अल्फाबेटको वेमो पनि बढ्दो निगरानीमा परेका छन् । अमेरिकी राष्ट्रिय राजमार्ग यातायात सुरक्षा प्रशासन (एनएचटीएसए) ले गत अक्टोबरदेखि कम दृश्यता भएका अवस्थामा टेस्लाको ‘फुल सेल्फ ड्राइभिङ’ (एफएसडी) प्रविधि संलग्न दुर्घटनाहरूको अनुसन्धान गरिरहेको छ । सो नियामकले गत हप्ता टेस्लालाई यसको भुक्तानयोग्य रोबोट्याक्सी सेवा सुरु गर्दा ती सवारीहरू खराब मौसममा कसरी प्रदर्शन गर्नेछन् भन्नेबारे जानकारी मागेको थियो । मस्कका अनुसार टेस्ला अन्य ठूला अटो कम्पनीहरूसँग आफ्नो एफएसडी सफ्टवेयर लाइसेन्स गर्नका लागि कुराकानीमा छ, जुन यसको रोबोट्याक्सीहरूको मुख्य आधार बन्नेछ । आफ्नो व्यापक कृत्रिम बौद्धिकता (एआई) योजनालाई अगाडि बढाउन मस्कको एक्सएआई स्टार्टअपले थप उन्नत मोडेल प्रशिक्षणका लागि डेटा केन्द्र क्षमतामा विस्तार गरिरहेको छ र टेनेसीको मेम्फिसमा रहेको यसको सुपरकम्प्युटर कोलोस्ससलाई संसारकै ठूलो भनिएको छ । एक्सएआईले मेम्फिस नजिकै नयाँ केन्द्रमा एनभीडीयाका एक मिलियन अत्याधुनिक ब्ल्याकवेल चिपहरू प्रयोग गर्ने मस्कले बताए । एक्सएआईले टेनेसीको दक्षिणपश्चिम मेम्फिसमा १० लाख वर्गफुट क्षेत्रफलको सम्पत्ति किनेको ग्रेटर मेम्फिस चेम्बरले मार्चमा जनाएको थियो । मस्कले मार्चमा एक्सएआईलाई आफ्नो सामाजिक सञ्जाल प्लेटफर्म एक्ससँग गाभेका थिए । उनले टेस्ला र एक्सएआईबीच गाभ्ने योजना हालका लागि नभए पनि त्यसलाई असम्भव भने नभएको बताए ।
गभर्नर पौडेलले सर्वोच्च अदालत पुगेर लिए सपथ, पदभारका लागि पुगे राष्ट्र बैंक
काठमाडौं । नेपाल राष्ट्र बैंकका नवनियुक्त गभर्नर डा. विश्वनाथ पौडेलले सपथ लिएका छन् । उनले सर्वोच्च अदालत पुगेर प्रधानन्यायाधीश प्रकाशमान सिंह राउतसँग सपथ लिएका हुन् । राष्ट्र बैंक ऐनमा गभर्नरले प्रधानन्यायाधीशबाट सपथ लिनुपर्ने व्यवस्था छ । पौडेल सपथ ग्रहणसँगै पदभार ग्रहण गर्न राष्ट्र प्रस्थान गरेका छन् । उनलाई मंगलबार बसेको मन्त्रिपरिषद् बैठकले गभर्नरमा नियुक्त गरेको थियो । उनीसँगै तीन जनाको नाम सिफारिस भएको थियो ।
नेपालको स्वास्थ्य सुधारबारे विश्वलाई जानकारी, स्वास्थ्यमा पहुँच बढाउन विश्वव्यापी सहकार्य आवश्यक
काठमाडौं । स्वास्थ्य तथा जनसंख्या मन्त्री प्रदीप पौडेलले सबैमा स्वास्थ्य पहुँचका लागि श्रोत र प्राथमिकता जोड्दै विश्वव्यापी सहकार्य आवश्यक रहेकोमा जोड दिएका छन् । स्वीट्जरल्याण्डको जेनेभामा जारी ७८ औं विश्व स्वास्थ्य सम्मेलनमा सम्बोधन गरेका उनले विद्यमान स्वास्थ्य चुनौतीले सामना गर्ने नवीन समाधानको खोजी गरिरहेको भन्दै यसमा विश्व स्वास्थ्य संगठनको भूमिका अझ महत्वपूर्ण देखिएको उल्लेख गरे । मन्त्री पौडेलले महामारी नियन्त्रण पूर्वतयारीका लागि समतामूलक स्वास्थ्य सेवा र दह्रिलो विश्वव्यापी सहकार्य आवश्यक भन्दै महामारी नियन्त्रणका लागि संगठनले गरेको सम्झौताको स्वागत गरे । मन्त्री पौडेलले यसका लागि सदस्यहरूबीच बलियो सहकार्यका लागि आह्वान समेत गरे । नेपालको स्वास्थ्य सुधारबारे विश्व समुदायलाई जानकारी मन्त्री प्रदीप पौडेलले नेपालले मातृ शिशु मृत्युदर न्यूनीकरणमा तथा पोलियो उन्मुलनमा प्राप्त गरेको सफलताबारे विश्व समुदायलाई जानकारी गराएका छन् । नेपालले खोपको पहुँच विस्तारमा समेत प्रगति गरेको उल्लेख गर्दै पोलियो उन्मुलनसँगै सबै तहमा आधारभूत स्वास्थ्य सेवा विस्तार गरेको उल्लेख गरेका छन् । ‘महिला सामाजिक स्वास्थ्य स्वयंसेविका तथा विद्यालय स्वास्थ्य कार्यक्रममार्फत सकारात्मक नतिजा प्राप्त गरेका छौं,’ मन्त्री पौडेलले भने । सूर्तीजन्य पदार्थको प्रयोग नियन्त्रणमा नेपालले पहल थालेको भन्दै मन्त्री पौडेलले यसले सकारात्मक नतिजा दिने विश्वास गरे । नेपालले स्वास्थ्य बीमा कार्यक्रम लागु गरेको चर्चा गर्दै उनले निरोधात्मक स्वास्थ्य सेवा, महामारी पूर्वतयारी तथा डिजिटल स्वास्थ्यमा समेत जोड दिएको मन्त्री पौडेलले उल्लेख गरे । जलवायु परिवर्तनको स्वास्थ्यमा प्रभावबारे ध्यानाकर्षण नेपालसामु बढिरहेको वृद्ध जनसंख्या, न्यून जन्मदर, आन्तरिक बसाईसराई तथा नसर्ने रोग र मानसिक रोगजस्ता स्वास्थ्य चुनौती खडा भएकाले यसको सामनाका लागि विश्व समुदायसँग सहकार्यका लागि आग्रह गरे । मन्त्री पौडेलले जलवायु परिवर्तनका कारण समेत नेपाली स्वास्थ्य क्षेत्र प्रभावित भएको प्रसँग उठाए । ‘जलवायु परिवर्तनका कारण हाम्रो स्वास्थ्य क्षेत्रमा गम्भीर असर छ,' उनले भने, ‘हामीले सगरमाथा सम्वादका माध्यमबाट विश्वको ध्यानाकर्षण गर्यौँ ।' मन्त्री पौडेलले जलवायु स्वास्थ्य विषयमा नेपालले अन्तर्राष्ट्रिय सम्मेलन गर्ने समेत घोषणा गरे । जेनेभामा रहेका मन्त्री पौडेलले विभिन्न देशका उच्चस्तरीय स्वास्थ्य अधिकारीहरूसँग नेपालको स्वास्थ्य सेवा सुधारबारे सहकार्यको प्रस्ताव गर्दै वार्ता गरिरहेका छन् ।
