ब्ल्याकभ्यू ट्याब मेगा २ नेपालमा सार्वजनिक
काठमाडौं । प्रविधि कम्पनी ब्ल्याकभ्यूले आफ्नो नयाँ ट्याब्लेट, ब्ल्याकभ्यू ट्याब मेगा २, नेपाली बजारमा सार्वजनिक गरेको छ । ब्ल्याकभ्यू ट्याब मेगा २ मा १२ इन्चको एचडी आईपीएस डिस्प्ले रहेको छ, जसले १२०० * २००० पिक्सेल रिजोलुसन र ६० हर्ट्ज रिफ्रेस रेट प्रदान गर्छ । यो ट्याब्लेट युनिसक टाइगर टी ६१५ अक्टा-कोर प्रोसेसरद्वारा सञ्चालित छ र यसमा ८ जीबी वा १२ जीबी र्याम साथ २५६ जीबी आन्तरिक स्टोरेज उपलब्ध छ। स्टोरेजलाई माइक्रोएसडी कार्डमार्फत २ टेराबाइटसम्म विस्तार गर्न सकिन्छ । यो ट्याब्लेटमा ९,००० एमएएचको ब्याट्री छ, जसले १८ वाट फास्ट चार्जिङलाई समर्थन गर्छ। क्यामेराको कुरा गर्दा, यसमा १६ मेगापिक्सेलको रियर क्यामेरा र ८ मेगापिक्सेलको फ्रन्ट क्यामेरा समावेश छ । ट्याब्लेटले एन्ड्रोइड १५ अपरेटिङ सिस्टममा आधारित डोक ओएस ५.० चलाउँछ, जसले प्रयोगकर्तालाई सहज र अद्यावधिक अनुभव प्रदान गर्छ। यसमा डुअल(बक्स स्पिकर, वाइडभाइन एल १ सपोर्ट, र डुअल ४ जी सिम स्लट पनि छन्। नेपालमा यो ट्याब्लेटको मूल्य ३१ हजार ९९९ रुपैयाँ तोकिएको छ । खरिदका लागि दाराज नेपाल र यन्त्र नेपाल मार्फत अनलाइन अर्डर गर्न सकिन्छ । ब्ल्याकभ्यूका नेपाल प्रतिनिधिका अनुसार, यो ट्याब्लेट मनोरञ्जन, काम र अध्ययनका लागि उपयुक्त छ । यो ट्याब्लेटले नेपाली बजारमा किफायती मूल्यमा आधुनिक सुविधाहरू प्रदान गर्ने लक्ष्य राखेको छ ।
नेपाल मोबिलिटी एक्स्पो २०२५ को बुकिङ बन्द
काठमाडौं । नेपाल अटोमोबाइल इम्पोर्टर्स एन्ड मेनुफ्याक्चरर्स एसोसिएसन (नाइमा) ले नेपाल मोबिलिटी एक्स्पो २०२५ को पहिलो संस्करणको लागि बुकिङ बन्द भएको घोषणा गरेको छ । यो एक्स्पो २०८२ साउन २१ देखि २५ गते ९२०२५ अगस्ट ६ देखि १०० सम्म भृकुटीमण्डप, काठमाडौंमा आयोजना हुनेछ । ४८ वटा स्टलको लागि आवेदन आएको नाइमाकी अध्यक्ष रितुसिंह वैद्यले बताइन् । नाइमाले राष्ट्रिय तथा अन्तर्राष्ट्रिय स्तरमा नेपालको मोबिलिटी क्षेत्रको प्रतिनिधित्व, रणनीतिक सहयोग, विकास र सामूहिक आवाज उठाउन एकीकृत मञ्चको रूपमा काम गर्ने प्रतिबद्धता जनाएको छ । नेपाल मोबिलिटी एक्स्पो २०२५ ले अत्याधुनिक मोबिलिटी समाधानहरू र नेपालमा विकसित हुँदै गरेको मोबिलिटी संस्कृतिलाई प्रदर्शन गर्दै यसअघिका भन्दा धेरै अनुभव दिने एक नयाँ प्रकारको अटोमोबाइल प्रदर्शनीको रूपमा एक माइलस्टोन इभेन्ट रहेको वैद्यले जानकारी दिइन् । मोबिलिटी एक्स्पोमा सहभागी फोर ह्वीलर ब्रान्डमा बीवाईडी, सिट्रोन, फर्थिङ, ग्रेट वाल मोटर्स, हेनरी भोल्ट्स, हुन्डाई, केई, किया, लीपमोटर, लेभ वान, महिन्द्रा, म्याक्सस, माज्दा, एमजी, मित्सुबिसी, निसान, ओमोडा एन्ड जेको, पिजुट, प्रोटोन, रिनल्ट, टोयोटा, फक्सवागन र जिक्र रहेका छन् । एक्स्पोमा टु ह्वीलरमा एम्पेरे, एथर, बजाज, बेनेली, सीएफमोटो, गोगोरो, होन्डा, केटीएम, महिन्द्रा, एनआईयू, रिभोल्ट, रोयल इन्फिल्ड, सेगवे-नाइनबोट, सुजुकी, ट्रायम्फ, टीभीएस, अल्ट्राभाओलेटी, याडिया र जीहो रहेका छन् । सहभागी कमर्सियल वाहन ब्रान्डहरूमा चेरी वान्डा, डोनफेङ, फारिजोन, हुवाजी, कम, कारी, किङलङ र सनलङ रहेका छन् ।
५ करोडमा झेँदी पुल निर्माण सम्पन्न, स्थानीयवासी भए खुशी
गुल्मी । मुसिकोट नगरपालिका–३ बडागाउँ र ७ को वामी जोड्ने झेँदी पुल निर्माण सम्पन्न भएको छ । स्वीस सरकारबाट प्राप्त पाँच करोड १७ लाख ५० हजार ६६५ रुपैयाँमा निर्माणको काम सम्पन्न भएको हो । सडक पुल कार्यक्रमका इञ्जिनियर श्रीराम प्रजापतिका अनुसार ५६.३० मिटर लामो यो पुल लामो समयको प्रयासपछि पूरा भएको हो । पक्की बनाउन नसकिने स्थानमा यस्ता निर्माण गरिने उनले बताए । यो पुल २०७६ र २०७७ साल वैशाखमा दुईपटक भाँचिएपछि प्रारुप परिवर्तन गरेर नयाँ बनाइएको हो । पुलका संरचना भाँचिदा राज्यलाई हानि भएको थियो ।
ट्रम्पद्वारा १७५ अर्ब अमेरिकी डलरको ‘गोल्डेन डोम’ मिसाइल ढाल परियोजनाको अनावरण
काठमाडौं । अमेरिकी राष्ट्रपति डोनाल्ड ट्रम्पले मंगलवार ‘गोल्डेन डोम’ नामक १७५ अर्ब अमेरिकी डलरको मिसाइल प्रतिरक्षा प्रणालीको घोषणा गरेका छन् । जसलाई ट्रम्पले ‘म्यानहट्टन परियोजना–स्तरीय’ पहलको रूपमा वर्णन गरेका छन् । जसको नेतृत्व गर्न अमेरिकी अन्तरिक्ष बलका जनरल माइकल गुएटलिनलाई नियुक्त गरे । अमेरिकी रक्षा सचिव पिट हेगसेथ र गुएटलिनसँगै ओभल अफिस घोषणाको क्रममा ट्रम्पले यो परियोजना तीन वर्ष भित्र पूरा हुने र क्यानडासहित सम्पूर्ण महाद्वीपीय संयुक्त राज्य अमेरिकालाई हवाई खतराबाट जोगाउने खुलासा गरे । अमेरिकाको लागि यो एक महान दिन भएको ट्रम्पले घोषणा गरे । महत्वाकांक्षी प्रणाली आगमन मिसाइलहरू पत्ता लगाउन, ट्र्याक गर्न र अवरोध गर्न सक्षम उपग्रहहरूको एक व्यापक नेटवर्क सिर्जना गर्न डिजाइन गरिएको हो । ट्रम्पले यो प्रणाली विश्वको अन्य छेउबाट प्रहार गरिए पनि र अन्तरिक्षबाट प्रहार गरिए पनि क्षेप्यास्त्रहरूलाई रोक्न सक्षम हुने दाबी गरे । यो परियोजनाले प्रशासनको पहिलो हप्तामा अमेरिकाको लागि आइरन डोमको रूपमा घोषणा गरिएको भन्दा ठूलो विकासको प्रतिनिधित्व गर्दछ । जुन फेब्रुअरीमा पेन्टागनले गोल्डेन डोम नामकरण गर्नुअघि सम्भवतः इजरायलको अवस्थित आइरन डोम प्रणालीसँग ट्रेडमार्क चिन्ताको कारणले गर्दा भएको हुनसक्छ । गुएटलिनले पहिले अमेरिकी अन्तरिक्ष बलसँग अन्तरिक्ष सञ्चालनका उपप्रमुखको रूपमा सेवा गरिसकेका थिए । मिसाइल रक्षा र अन्तरिक्ष–आधारित क्षमताहरूमा व्यापक अनुभव छ । ट्रम्पले घोषणा गरेको १७५ अर्ब डलरको मूल्य ट्याग काँग्रेसनल बजेट अफिसको पहिलेको अनुमानभन्दा धेरै कम छ । जसले सुझाव दिएको थियो कि प्रणालीको लागत २० वर्षमा १६१ अर्ब देखि ५४२ अर्ब डलरसम्म हुनसक्छ । २०१२ को राष्ट्रिय अनुसन्धान परिषद्को एक अध्ययनले अनुमान गरेको छ कि अन्तरिक्ष–आधारित, बूस्ट–फेज मिसाइल रक्षा प्रणालीको कुल लागत ८३१ अर्ब डलर (२०२५ डलरमा) सम्म हुनसक्छ । रक्षा विश्लेषकहरूले परियोजनाको प्राविधिक सम्भाव्यताको बारेमा पनि प्रश्न उठाएका छन् ।
कामना सेवा विकास बैंकद्वारा चितवनका विद्यार्थीलाई पोशाक वितरण
चितवन । कामना सेवा विकास बैंक लिमिटेडले आफ्नो संस्थागत सामाजिक उत्तरदायित्व अन्तर्गत चितवनको श्री राष्ट्रिय आधारभूत विद्यालय, ज्योतिनगरका विद्यार्थीहरूलाई पोशाक वितरण गरेको छ । बैंकको नारायणगढ क्षेत्रका प्रविण बर्तौलाले विद्यालयका प्रधानाध्यापक रमाकान्त न्यौपानेको उपस्थितिमा विद्यार्थीहरूलाई पोशाक हस्तान्तरण गरे । सो अवसरमा प्रधानाध्यापक न्यौपानेले बैंकको सहयोगले विद्यार्थीहरूलाई पढाइमा थप उत्साह मिल्ने विश्वास व्यक्त गरे । बैंक प्रतिनिधि बर्तौलाले भरतपुर महानगरपालिकासँगको समन्वयमा समुन्नत समाज निर्माणमा हातेमालो गर्न पाएकोमा खुशी व्यक्त गरे । कार्यक्रममा बैंकका कर्मचारी, विद्यालयका शिक्षक, विद्यार्थी तथा अभिभावकहरूको उल्लेख्य उपस्थिति रहेको थियो । कामना सेवा विकास बैंकले आगामी दिनहरूमा पनि यस्ता सामाजिक उत्तरदायित्व सम्बन्धी साक्षरता र सहयोग कार्यक्रमहरूलाई निरन्तरता दिने जनाएको छ ।
एनएमबि बैंकद्वारा एक्यान सदस्यलाई लक्षित वित्तीय सेवाहरूको घोषणा
काठमाडौं । एनएमबि बैंकले एसोसिएसन अफ चार्टर्ड एकाउन्टेन्ट्स अफ नेपाल एक्यानसँग सम्झौता गरेको छ । एक्यानमा आबद्ध रहेका सदस्यहरूलाई लक्षित गरी विशेष वित्तीय सेवाहरू प्रदान गर्ने प्रतिबद्धता बैंकले उक्त सम्झौतामा उल्लेख गरेको छ । यो सहकार्य एनएमबि बैंकको समावेशी र मूल्य-आधारित बैंकिङ सेवाको प्रतिबद्धता र नेपालमा रहेका पेशागत समुदायलाई टेवा प्रदान गर्ने उद्देश्यले सम्पन्न गरिएको हो । एनएमबि बैंकले वित्तीय साक्षरताको प्रवर्द्धन र आर्थिक विकासमा उनीहरूको भूमिकालाई मान्यता दिँदै विशेष सेवा तथा ऋण योजनाहरू प्रस्तुत गरेको हो। एक्यान सदस्यहरूले बैंकबाट कर्जा उपभोग गर्दा ऋण प्रशासनिक शुल्कमा छुट, सरल कागजात प्रक्रिया, एनएमबि भिसा प्लेटिनम क्रेडिट कार्ड तथा ग्रीन सेभिङ खातासहितका डिजिटल र कार्ड सेवाहरूको उपभोग गर्न सक्नेछन्। साथै, एनएमबिको प्राथमिक बैंकिङ सेवा अन्तर्गत व्यक्तिगत सम्बन्ध व्यवस्थापन तथा विशेष सुविधाहरू पनि प्रदान गरिनेछ । यो प्रयास एनएमबि बैंकको पोर्टफोलियो विस्तार गर्ने साथै पेशागत वर्गहरुलाई पहुँचयोग्य तथा दीगो बैंकिङ समाधान प्रदान गर्ने लक्ष्यको प्रतिबिम्ब हो । हाल एनएमबि बैंकले देशभर २०२ शाखा, १८७ एटिएम र ९ एक्सटेन्सन काउन्टरमार्फत व्यापक वित्तीय सेवा प्रदान गर्दै आइरहेको छ ।
थाइल्यान्डमा चांगानको दुई लाख उत्पादन क्षमताको इभी प्लान्ट सञ्चालनमा
काठमाडौं । चिनियाँ अटोमोबाइल कम्पनी चांगान अटोमोबाइलले थाइल्यान्डको रायोंग क्षेत्रमा आफ्नो पहिलो अन्तर्राष्ट्रिय न्यु इनर्जी भेहिकल प्लान्टबाट औपचारिक रूपमा कार उत्पादन सुरु गरेको छ । ‘कम्पनीका अनुसार भास्ट ओसियन प्लान’अन्तर्गत कम्पनीले चिनियाँ भूमिबाट कार निर्यात गर्नुको सट्टा अब विदेशी भूमिमा नै इन्डस्ट्रियल इकोसिस्टम विस्तार गर्ने रणनीति अघि बढाएको छ । रायोंग प्लान्ट अत्याधुनिक प्रविधि, अनुसन्धान तथा विकास ९ र दीर्घकालीन सप्लाई चेनयुक्त संरचना हो । जसबाट ग्रिन र स्मार्ट इभी कार उत्पादन गरिनेछ। सुरुमा वार्षिक १ लाख युनिट उत्पादन क्षमता रहेको प्लान्टको उत्पादन क्षमता सन् २०२७ सम्म २ लाख युनिट पुर्याइने लक्ष्य राखिएको छ। यस प्लान्टबाट उत्पादित कारहरू दक्षिणपूर्वी एशिया, मध्यपूर्व, अफ्रिका, दक्षिण अमेरिका र युरोएसिया बजारमा निर्यात गरिनेछन् । थाइल्यान्डमा सन् २०२३ मा प्रवेश गरेपछि हालसम्म १४ हजार युनिट चांगान गाडी विक्री भइसकेका छन् । कम्पनी हाल थाइल्यान्डमा ‘टप फोर एनईभी ब्रान्ड’ बन्न सफल भएको छ। रायोंग प्लान्ट उद्घाटनसँगै राइट ह्यान्ड ड्राइभ 'दीपल एस०५' सार्वजनिक गरिएको छ, जुन चाँडै नेपालमा पनि प्रवेश गर्ने कम्पनीले जनाएको छ । रायोंग प्लान्टको उद्घाटनसँगै चांगानको कुल उत्पादन २ करोड ८५ लाख ९० हजार युनिट पुगेको छ । ३ लाख ९२ हजार वर्गमिटर क्षेत्रफलमा फैलिएको उक्त प्लान्टमा वेल्डिंग, पेन्टिङ, एसेम्ब्ली, इन्जिन र ब्याट्री उत्पादनका ५ कार्यशाला छन् । यसको वातावरणमैत्री डिजाइनमा सौर्य उर्जा, डे-लाइट प्रणाली र पानी पुनः प्रयोग जस्ता उपाय अपनाइएको छ। यहाँबाट चांगान, दीपल र अवतार ब्रान्ड अन्तर्गतका विद्युतीय सवारी साधन उत्पादन हुनेछन् । चांगानले अबको नीति स्थानीयकरण र सस्टेनेबिलिटीमा आधारित राखेको जनाएको छ। थाइल्यान्डमा आफ्नो उपस्थिति सार्वजनिक गरेपछि कम्पनीले दीपल एस०७, अवतार ११ सहित ७ मोडेल सार्वजनिक गरिसकेको छ। कम्पनी अध्यक्ष जु हुरोंगले रायोंग प्लान्टले चांगानको ४१ वर्षे अनुभवलाई विश्व बजारमा थप मजबुत बनाउने बताए । उनका अनुसार थाई समन्वय र चिनियाँ प्रविधिको समिश्रणले आर्थिक वृद्धि र अन्तर्राष्ट्रिय बजार विस्तारमा टेवा पुर्याउनेछ।
बिर्तामोडमा एक अर्ब बढीको लागतमा १४ किलोमिटर सडक कालोपत्र
बिर्तामोड । संघ, प्रदेश र स्थानीय तहको लगानीमा बिर्तामोड नगरपालिकामा १४ किलोमिटर सडक धमाधम कालोपत्र भइरहेको छ । सडक डिभिजन कार्यालयका सबइञ्जिनियर मदन साहका अनुसार हर्कलाल मार्ग, बुट्टाबारी (प्याकुरेल चोक) सडक, गोकुल जोशी मार्ग र सहिदचन्द्र मार्ग सडकको स्तरोन्नति अन्तिम चरणमा पुगेको छ । नगरका २, ३, ४, ६, ७ र ९ नम्बर वडालाई जोड्ने ती सडकको निर्माण लागत एक अर्बभन्दा बढी छ । चालु आर्थिक वर्षमा सम्पन्न गर्ने लक्ष्यका साथ धमाधम कालोपत्र भइरहेको छ । विश्व बैंकको आर्थिक सहयोग रहेको वडा नम्बर ६, ७ र ८ जोड्ने छ किलोमिटर २५८ मिटर लामो सडकमा हाल कालोपत्र भइरहेको छ । जेठको तेस्रो सातासम्ममा निर्माण सम्पन्न हुने आरपी समता जेभीका मनोज उप्रेतीले बताए । यो सडक आरपी समता जेभीले ५८ करोडमा निर्माणको ठेक्का लिएको हो । बिर्तामोड नगरपालिकालाई हल्दिबारी गाउँपालिकासँग जोड्ने सहिद चन्द्रमार्गको दुई किलोमिटर सडक आगामी १५ दिनभित्र सम्पन्न गर्ने लक्ष्यका साथ तीन खण्डमा कालोपत्र भइरहेको छ । दुई किलोमिटर लामो उक्त सडकको पहिलो खण्डमा पाँच करोड ६० लाखको ठेक्का सिद्धीथुम्का एभरग्रिन जेभीले, दोस्रो खण्डमा ट्रस्ना निर्माण सेवाले ६८ लाखमा र तेस्रो खण्डमा नाम्लाक निर्माण सेवाले एक करोड पाँच लाखमा निर्माणको जिम्मा लिएको छ । वडा नम्बर २ देखि ३ हुँदै कनकाई नगरपालिका जोड्ने चारपाने–घैलाडुब्वा एक किलोमिटर सडकको छ करोडको ठेक्कामा शान्ति निर्माण सेवा प्रालिले धमाधम निर्माण गरिरहेको वडाध्यक्ष किशोर बुढाथोकीले बताए । रासस
