सर्वसाधारणको सुविधाका लागि कामना सेवाले राख्यो यात्रु प्रतिक्षा बेन्च
काठमाडौं । कामना सेवा विकास बैंकले संस्थागत सामाजिक उत्तरदायित्व (सीएसआर) अन्तर्गत ललितपुरको कुमारीपाटी–जावलाखेल क्षेत्रमा पाँच वटा यात्रु प्रतिक्षा बेन्च स्थापना गरेको छ । बैंकले कुमारीपाटी–जावलाखेल व्यापार संघसँगको सहकार्यमा सर्वसाधारण तथा यात्रुहरूको सुविधा लक्षित गर्दै प्रतिक्षा बेन्च निर्माण तथा स्थापना गरेको जनाएको छ । प्रतिक्षा बेन्च स्थापना कार्यक्रम बैंकका काठमाडौं प्रदेश प्रमुख केदारनाथ शर्माको अध्यक्षता तथा कुमारीपाटी–जावलाखेल व्यापार संघका अध्यक्ष वीरेन्द्र शाक्यको प्रमुख आतिथ्यतामा सम्पन्न भएको थियो । बैंकका अनुसार दैनिक आवतजावत गर्ने यात्रु तथा स्थानीय बासिन्दालाई केही समय विश्राम गर्न सहज होस् भन्ने उद्देश्यले सार्वजनिक स्थानमा प्रतिक्षा बेन्च राखिएको हो । कार्यक्रममा व्यापार संघका अध्यक्ष शाक्यले सर्वसाधारणको प्रत्यक्ष उपयोगमा आउने संरचना निर्माण गरेकोमा कामना सेवा विकास बैंकलाई धन्यवाद दिँदै यसबाट स्थानीयवासी र यात्रु दुवैलाई सुविधा पुग्ने विश्वास व्यक्त गरे । काठमाडौं प्रदेश प्रमुख शर्माले बैंकले बैंकिङ सेवासँगै सामाजिक उत्तरदायित्वलाई पनि प्राथमिकतामा राख्दै समुदायको आवश्यकता अनुसार यस्ता सेवामूलक कार्यक्रम सञ्चालन गर्दै आएको बताए । उनले स्थानीय समुदायको हितमा यस्ता गतिविधिलाई आगामी दिनमा पनि निरन्तरता दिइने जानकारी दिए । कार्यक्रममा बैंकका कर्मचारी तथा कुमारीपाटी–जावलाखेल व्यापार संघका प्रतिनिधिहरूको सहभागिता रहेको थियो ।
ओली-पोखरेल भेट, विधि मिचे प्रतिवादको चेतावनी
काठमाडौं । नेकपा एमालेको जारी केन्द्रीय कमिटी बैठकमा अध्यक्ष केपी शर्मा ओली र महासचिव शंकर पोखरेलबीच दूरी बढेको संकेत देखिएको छ । बैठक सञ्चालनको प्रक्रिया, एजेण्डा तय गर्ने शैली र नेताहरूमाथि प्रस्तावित कारबाहीका विषयमा असन्तुष्टि जनाउँदै पोखरेलले ओलीलाई पार्टीको स्थापित विधि मिचेर अघि बढे आफूहरूले प्रतिवाद गर्ने चेतावनी दिएका छन् । सोमबार ललितपुरमा सुरु भएको केन्द्रीय कमिटी बैठकको उद्घाटन सत्र सकिएपछि महासचिव पोखरेल ओलीसँग छलफल गर्न भक्तपुरको गुण्डुस्थित निवास पुगेका थिए । साँझ करिब ७ बजे गुण्डु पुगेका पोखरेल राति १०ः३० बजे त्यहाँबाट फर्किएका थिए । ओलीको सचिवालयका अनुसार भेटवार्ता अधिकांश समय अध्यक्ष र महासचिवबीच मात्रै भएको थियो । बीचमा सुदूरपश्चिमका केही नेतासँग करिब १५ मिनेट छलफल भए पनि बाँकी समय ओली र पोखरेलबीचै कुराकानी भएको सचिवालयका एक सदस्यले बताए । पोखरेलनिकट एक पदाधिकारीका अनुसार महासचिवले बैठकलाई एकलौटी ढंगले सञ्चालन गर्ने प्रयास दोहोरिए त्यसको प्रतिवाद हुने स्पष्ट संकेत ओलीलाई दिएका छन् । सोमबारको बैठकमा प्रस्तुत प्रस्ताव र एजेण्डाबारे पर्याप्त छलफल तथा सरसल्लाह नभएको भन्दै पोखरेलले असन्तुष्टि जनाएका थिए । बैठकमा अध्यक्ष ओलीले प्रस्तुत गरेका प्रस्तावलाई तत्काल अनुमोदन गराउने र त्यसपछि बैठक टुंग्याउने तयारी भएको सूचना पाएपछि पोखरेल छलफलका लागि गुण्डु पुगेको स्रोतको दाबी छ । पोखरेलले बैठक सञ्चालनको स्थापित विधि र पार्टीभित्रको संस्थागत प्रक्रियालाई बेवास्ता गरेर अघि नबढ्न ओलीलाई आग्रह गरेको बताइएको छ । यसैबीच, उपमहासचिव योगेश भट्टराई, पूर्वपोलिट्ब्यूरो सदस्य कर्ण थापालगायत नेतामाथि ‘पार्टी अनुशासन उल्लंघन’ को आरोपमा कारबाही प्रक्रिया अघि बढाउने तयारी भएको चर्चाले पनि एमालेभित्र असन्तुष्टि बढाएको छ। यही विषयमा समेत पोखरेलले ओलीसँग चासो राखेको उनीनिकट नेताहरूको भनाइ छ । यसअघि भानुभक्त ढकाल र विशाल भट्टराई पनि गुण्डु पुगेका थिए । उनीहरूसहित केहीबेर छलफल भएपछि ओली र पोखरेलबीच छुट्टै भेटवार्ता भएको थियो । एमाले केन्द्रीय कमिटीको बैठकमा मंगलबार महासचिव पोखरेलको सांगठनिक प्रतिवेदन तथा पार्टी पुनर्गठनसम्बन्धी कार्यदलको प्रतिवेदन पेश गर्नुपर्ने माग केही केन्द्रीय सदस्यहरूले उठाउने तयारी गरेका छन् । बैठकमा यी प्रतिवेदन प्रस्तुत हुने वा अध्यक्ष ओलीले अघि सारेका प्रस्तावकै आधारमा छलफल अगाडि बढ्ने भन्ने विषयले आजको बैठकमा थप तनाव सिर्जना गर्न सक्ने देखिएको छ ।
पुष्पलाल इन्भेष्टमेन्टले आईपीओ ल्याउने, बिक्री प्रबन्धकमा लक्ष्मी सनराइज
काठमाडौं । पुष्पलाल इन्भेष्टमेन्ट कम्पनी लिमिटेडले सर्वसाधारणका लागि प्रारम्भिक सार्वजनिक निष्काशन (आईपीओ) जारी गर्ने भएको छ । कम्पनीले आईपीओ निष्काशन तथा बिक्री प्रबन्धकका रूपमा लक्ष्मी सनराइज क्यापिटल लिमिटेडलाई नियुक्त गरेको छ । सम्झौताअनुसार कम्पनीले प्रति कित्ता १०० रुपैयाँ अंकित दरका १५ लाख कित्ता साधारण सेयर निष्काशन गर्नेछ । यसबाट कम्पनीले १५ करोड रुपैयाँ बराबरको आईपीओ जारी गर्ने तयारी गरेको हो । आईपीओ निष्काशन तथा बिक्री प्रबन्धनसम्बन्धी सम्झौतामा लक्ष्मी सनराइज क्यापिटलका अध्यक्ष राजीव सापकोटा र पुष्पलाल इन्भेष्टमेन्टका अध्यक्ष लालप्रसाद सावा लिम्बुले हस्ताक्षर गरेका छन् । सम्झौता कार्यक्रममा लक्ष्मी सनराइज क्यापिटलका प्रमुख कार्यकारी अधिकृत विजयलाल श्रेष्ठको पनि उपस्थिति रहेको थियो । पुष्पलाल इन्भेष्टमेन्ट कम्पनीले नेपालको अर्थतन्त्रमा दिगो वृद्धि र विकासमा योगदान पुर्याउने लक्ष्यसहित लगानी गर्दै आएको जनाएको छ । कम्पनीले ‘सानो लगानी, ठूलो अवसर, राष्ट्र निर्माणमा’ भन्ने नारासहित ऊर्जा, सूचना तथा प्रविधि, सञ्चार र पर्यटनलगायत विभिन्न क्षेत्रमा रणनीतिक लगानी गर्दै आएको जनाएको छ ।
जापानमा वृद्धवृद्धाको संख्या ऐतिहासिक उचाइमा : हरेक दशमध्ये तीनजना ज्येष्ठ नागरिक
काठमाडौं । जापानमा ६५ वर्ष वा सोभन्दा बढी उमेरका नागरिकको संख्या हालसम्मकै उच्च बिन्दुमा पुगेको छ । जापान सरकारले सार्वजनिक गरेको पछिल्लो तथ्यांकअनुसार मुलुकको कुल जनसंख्याको २९.६ प्रतिशत अर्थात् करिब ३ करोड ६२ लाख ४० हजार नागरिक ६५ वर्षमाथिका छन् । ‘ज्येष्ठ नागरिक सम्मान दिवस’को पूर्वसन्ध्यामा सार्वजनिक यो तथ्यांकले जापानको गहिरिँदो जनसांख्यिक संकटलाई पुनः उजागर गरेको छ । जापानको आन्तरिक मामिला तथा सञ्चार मन्त्रालयले सार्वजनिक गरेको विवरणअनुसार गत वर्षको तुलनामा ज्येष्ठ नागरिकको संख्यामा करिब २० हजारले वृद्धि भएको छ । लिङ्गका आधारमा हेर्दा पुरुषको तुलनामा महिला ज्येष्ठ नागरिकको संख्या बढी छ । जसमा महिला २ करोड ५४ लाख र पुरुष १ करोड ५७ लाख रहेका छन् । उमेर समूहका आधारमा ७० वर्षमाथिका २ करोड ९१ लाख, ७५ वर्षमाथिका २ करोड १६ लाख र ८० वर्षमाथिका १ करोड २८ लाख नागरिक रहेका छन् । जनसंख्याको वृद्धिसँगै जापानको श्रम बजारमा ज्येष्ठ नागरिकको सहभागिता पनि बढ्दो छ । तथ्यांकअनुसार सन् २०२४ मा ६५ वर्ष वा सोभन्दा बढी उमेरका करिब ९४ लाख ३० हजार मानिस रोजगारमा संलग्न छन् । यो संख्या लगातार २२औँ वर्षसम्म बढेको हो । कुल जापानी रोजगारीमा ज्येष्ठ नागरिकको हिस्सा १३.८ प्रतिशत पुगेको छ, जुन आफैँमा एउटा नयाँ कीर्तिमान हो । विशेषगरी थोक तथा खुद्रा व्यापार क्षेत्रमा सबैभन्दा धेरै करिब १३ लाख १० हजार ज्येष्ठ नागरिक सक्रिय रहेको पाइएको छ । जापानको जनसंख्याको बनोटमा आइरहेको यो बदलावले भविष्यका लागि गम्भीर चुनौती खडा गरेको छ । नेसनल इन्स्टिच्युट अफ पपुलेसन एन्ड सोसल सेक्युरिटी रिसर्चका अनुसार सन् २०४० सम्ममा ६५ वर्षमाथिका नागरिकको हिस्सा बढेर ३४.८ प्रतिशत पुग्ने अनुमान गरिएको छ । सन् १९७१ देखि १९७४ सम्म जन्मिएको पुस्ता (सेकेन्ड बेबी बुमर्स) ६५ वर्ष उमेर पार गरेपछि यो अनुपात अझ तीव्र गतिमा बढ्ने निश्चितप्रायः छ । घट्दो जन्मदर र बढ्दो आयुका कारण उत्पन्न यो जनसांख्यिक संरचनाले जापानको सामाजिक सुरक्षा र अर्थतन्त्रमा दीर्घकालीन प्रभाव पार्ने विज्ञहरूको चेतावनी छ ।
३५ जनाले सफलतापूर्वक गरे ६ हजार ३५५ मिटर अग्लो दङ्गा पिक आरोहण
काठमाडौं । ताप्लेजुङको ६ हजार ३५५ मिटर अग्लो दङ्गा पिक ३५ जनाको टोलीले सफलतापूर्वक आरोहण गरेको छ । नेपाल पर्वतारोहण सङ्घ र दिगो पर्यटन परियोजनाको संयुक्त आयोजनामा सञ्चालित दोस्रो ग्रीष्मकालीन सीप विकास तालिममा सहभागी २९ जना र ६ जना प्रशिक्षकसहित ३५ जनाले दङ्गा पिक आरोहण गरेका हुन् । व्यावसायिक पर्वतीय पथप्रदर्शक बन्न आवश्यक ज्ञान, सीप र उच्च हिमाली क्षेत्रमा काम गर्ने व्यावहारिक अनुभव प्रदान गर्ने उद्देश्यले तालिम सञ्चालन गरिएको नेपाल पर्वतारोहण सङ्घका अध्यक्ष फुर गेल्जे शेर्पाले जानकारी दिए । उनका अनुसार तालिमअन्तर्गत सहभागीलाई काठमाडौंमा सैद्धान्तिक ज्ञान, चट्टान आरोहणलगायत प्रारम्भिक तथा तयारीसम्बन्धी प्रशिक्षण दिइएको थियो । त्यसपछि ताप्लेजुङको कञ्चनजङ्घा क्षेत्रमा रहेको दङ्गा पिकमा लगेर हिमाली वातावरणमा प्रत्यक्ष अभ्यास गराइएको थियो । उच्च हिमाली क्षेत्रमा पर्वतीय पथप्रदर्शकका रूपमा काम गर्दा सामना गर्नुपर्ने चुनौती र जोखिमबारे प्रत्यक्ष अनुभव गराउनु तालिमको मुख्य उद्देश्य रहेको सङ्घले जनाएको छ । हिमाली क्षेत्रमा पुगेर अभ्यास गर्दा सहभागीले हिमाली भूगोल, आरोहण प्रविधि, सुरक्षा तथा कठिन परिस्थितिमा काम गर्ने सीपलाई व्यवहारमै प्रयोग गर्ने अवसर पाएका थिए । सहभागीका अनुसार तालिमले उच्च हिमाली क्षेत्रमा काम गर्ने व्यावहारिक ज्ञान र आत्मविश्वास बढाउन सहयोग गरेको छ । अध्यक्ष शेर्पाका अनुसार दङ्गा पिक आरोहण तालिमको महत्वपूर्ण हिस्सा हो । ६ हजार मिटरभन्दा अग्लो हिमालमा गराइने यस्तो अभ्यासले सहभागीको प्राविधिक क्षमता परीक्षण गर्नुका साथै व्यावसायिक पर्वतीय पथप्रदर्शकका रूपमा काम गर्न आवश्यक दक्षता र आत्मविश्वास बढाउने पर्वतारोही तेम्बा छिरी शेर्पाले बताए । दोस्रो ग्रीष्मकालीन सीप विकास तालिम ६ जना प्रशिक्षकसहित २९ जना सहभागीको सहभागितामा सञ्चालन भएको थियो । तालिम तथा दङ्गा पिक आरोहण सफलतापूर्वक सम्पन्न गरेपछि नेपाल पर्वतारोहण सङ्घको प्रशिक्षण टोली काठमाडौं फर्किएको सङ्घका दीपक गुरुङले जानकारी दिए । यो तालिम प्राविधिक शिक्षा तथा व्यावसायिक तालिम परिषद्बाट स्वीकृत १ हजार ६९६ घण्टे व्यावसायिक पर्वतीय पथप्रदर्शक पाठ्यक्रमअन्तर्गत सञ्चालन गरिएको हो । पाठ्यक्रममा पर्वतीय पथप्रदर्शकका लागि आवश्यक सैद्धान्तिक ज्ञानसँगै चट्टान आरोहण, हिमाली क्षेत्रमा गरिने अभ्यास तथा वास्तविक पर्वतीय वातावरणमा काम गर्ने सीपलाई समेटिएको छ । सङ्घले तालिम सफलतापूर्वक सम्पन्न गरी दङ्गा पिक आरोहण गर्न सफल सबै सहभागीलाई बधाई दिएको छ । साथै, तालिम सञ्चालनमा महत्वपूर्ण भूमिका निर्वाह गर्ने ६ जना प्रशिक्षक तथा सम्पूर्ण प्रशिक्षण टोलीप्रति आभार व्यक्त गरेको छ । नेपालको पर्वतीय पर्यटन विस्तारसँगै दक्ष र व्यावसायिक पथप्रदर्शकको आवश्यकता बढिरहेका बेला यस्ता व्यावहारिक तालिमले हिमाली पर्यटनलाई थप सुरक्षित, व्यवस्थित र व्यावसायिक बनाउन योगदान पुग्ने अपेक्षा गरिएको छ ।
महासभामा सहभागी हुन प्रधानमन्त्री शाह आज न्युयोर्क जाँदै
काठमाडौं । संयुक्त राष्ट्रसङ्घको ८१औँ महासभामा सहभागी हुन उच्चस्तरीय नेपाली प्रतिनिधिमण्डलको नेतृत्व गर्दै प्रधानमन्त्री वालेन्द्र शाह आज संयुक्त राज्य अमेरिकाको न्युयोर्क प्रस्थान गर्दै छन् । प्रधानमन्त्री शाह त्रिभुवन अन्तर्राष्ट्रिय विमानस्थलबाट कतार एयरवेजको उडानमार्फत न्युयोर्क प्रस्थान गर्नेछन् । प्रधानमन्त्री शाहको प्रतिनिधिमण्डलमा प्रमुख सल्लाहकार कुमार ब्यञ्जनकार, प्रमुख स्वकीय सचिव सुवास शर्मा, निजी सचिव प्रदीप परियार, फोटोग्राफर विनय शाक्यलगायत रहेका छन् । प्रधानमन्त्री शाहले महासभाको उच्चस्तरीय सत्रलाई असोज ८ गते अर्थात् सेप्टेम्बर २४ मा सम्बोधन गर्ने कार्यक्रम रहेको छ । नेपाली प्रतिनिधिमण्डलमा परराष्ट्रमन्त्री शिशिर खनालसहितका अधिकारीको सहभागिता रहनेछ । न्युयोर्कमा रहँदा प्रधानमन्त्री शाहले संयुक्त राष्ट्रसङ्घका महासचिव एन्टोनियो गुटेरेससँग भेटवार्ता गर्ने कार्यक्रम तय भएको छ । प्रधानमन्त्री शाह असोज १० गते स्वदेश फर्कनेछन् । प्रधानमन्त्रीका रूपमा शाहको यो पहिलो विदेश भ्रमण हो ।
बस आगलागीमा घाइते चालकको उपचारका क्रममा मृत्यु
काठमाडौं । काठमाडौंको त्रिपुरेश्वरमा बसमा आगलागी हुँदा घाइते भएका चालकको उपचारका क्रममा मृत्यु भएको छ । सोमबार राति कीर्तिपुरस्थित बर्न अस्पतालमा उपचारका क्रममा चालकको मृत्यु भएको प्रहरीले जनाएको छ । प्रहरीका अनुसार रिद्धिसिद्धी यातायातको बा ५ ख ४२७४ नम्बरको बसका चालकको उपचारका क्रममा मृत्यु भएको हो । मृतक चालकको पहिचान भने खुल्न सकेको छैन । यसअघि ती व्यक्ति बागमती गाउँपालिकाका दावा लामा रहेको भनिएको थियो । सोही नामको चालक अनुमतिपत्रसमेत प्रहरीले फेला पारेको थियो । तर दावा लामा नाम गरेका व्यक्ति सम्पर्कमा आएपछि आगलागीमा घाइते भएका चालक अर्कै व्यक्ति रहेको खुलेको हो । चालकका आफन्तसमेत हालसम्म सम्पर्कमा नआएकाले उनको सनाखत हुन नसकेको प्रहरीले जनाएकाे छ ।
डाटा हबको समस्या समाधान, आजदेखि सेयर कारोबार खुल्ने
काठमाडौं । र्यान्समवेयर आक्रमणका कारण सोमबार रोकिएको सेयर कारोबार आज मंगलबारदेखि पूर्ववत् रूपमा सञ्चालन हुने भएको छ । ७२ वटा ब्रोकर कम्पनीको कारोबार व्यवस्थापन प्रणालीको ब्याकअप राखिएको डाटा हब प्रालिको डाटा सेन्टरमा देखिएको प्राविधिक समस्या समाधान भएसँगै सेयर कारोबार नियमित हुने नेपाल स्टक एक्सचेन्जले जनाएको छ । नेपाल स्टक एक्सचेन्जले मंगलबार बिहान सूचना जारी गर्दै डाटा हब प्रालिमा देखिएको प्राविधिक समस्या समाधान भएको जानकारी प्राप्त भएकाले आजदेखि नेप्सेमा पूर्ववत् रूपमा कारोबार सञ्चालन हुने जनाएको हो । डाटा हब प्रालि नेपाल स्टक एक्सचेन्जका ७२ वटा कारोबार सदस्यका डाटा सेन्टरका रूपमा रहेको छ । सोही डाटा सेन्टरमा समस्या देखिएपछि सोमबार सेयर कारोबार स्थगित गरिएको थियो । नेप्सेका अनुसार समस्या समाधान भएसँगै ७२ वटै ब्रोकर कम्पनीको कारोबार व्यवस्थापन प्रणालीमार्फत सेयर कारोबार नियमित रूपमा सञ्चालन हुनेछ ।
