नेपाल बैंकको सेयर मूल्य एफपीओको नजिक, एकै दिन १४ रुपैयाँ घट्यो
काठमाडौं । नेपाल बैंकको सेयर मूल्यमा निरन्तर गिरावट आएको छ । आइतबार बैंकको सेयर मूल्य १४ रुपैयाँ घटेर प्रतिकित्ता ३०० रुपैयाँमा कारोबार भएको छ । आइतबार बैंकको १ करोड ३४ लाख रुपैयाँ बराबरको सेयर किनबेच भएको छ । बैंकले धितोपत्र बोर्डबाट प्रतिकित्ता २८० रुपैयाँमा थप निष्कासन (एफपीओ) ल्याउने स्वीकृति पाएको छ । बैंकको प्रतिसेयर १०० रुपैयाँ अंकित मूल्यमा १८० रुपैयाँ प्रिमियम थपेर एफपीओ निष्कासन हुनेछ । एफपीओबाट बैंकले ४ अर्ब ९५ करोड १७ लाख रुपैयाँ संकलन गर्नेछ । एफपीओ निष्कासनको हल्ला चलेपछि बैंकको सेयर मूल्यमा निरन्तर गिरावट आएको छ । बजार मूल्य भन्दा एफपीओ २० रुपैयाँ कम छ । घटदो क्रम नरोकिए केही दिनभित्र सेयर मूल्य एफपीओको हारहारीमा आउने छ । साधारण सेयर भन्दा एफपीओ मूल्य बढी भएमा बिक्री नहुने जोखिम रहन्छ । यद्यपी १०० प्रतिशत एफपीओको प्रत्याभूति (अण्डरराइटिङ) भएकाले बाँकी मर्चेन्ट बैंकरले सकार्ने छन् । पछिल्लो समयमा सेयर मूल्य घट्दै गएपछि पुरै एफपीओ खरिदका लागि आवेदन पर्न छाडेको छ । बजारले बैंकलाई कसरी हेर्छ त्यसमा निर्भर रहने नेपाल बैंकका महाप्रवन्धक दुर्गाराज रेग्मी बताउछन् । विकास न्युजसंग कुरा गर्दै सार्वजनिक निष्कासन बजारले कस्तो रिस्पन्स दिन्छ हेर्न बाँकी रहेको बताए । इक्रा नेपालले बैंकलाई ३ प्लस रेटिङ दिएको उनले सुनाए । आईपीओको विवरणपत्रको काम सुरु भएको उनले जानकारी दिए । बैंकको एफपीओ निष्कासन तथा बिक्री प्रवन्धकमा सिद्धार्थ क्यापिटल लिमिटेड नियुक्त भएको छ । मर्चेन्ट बैंकरले ४ अर्ब ९५ करोड १७ लाख रुपैयाँको अण्डरराइटिङ गरेका छन् । बैंकले पुँजीगत आधार अझ मजवुत बनाउन बैंकले प्रिमियम मूल्यमा बैंकले १ करोड करोड ७६ लाख ८४ हजार ८५८ कित्ता एफपीओ निष्कासन गर्न लागेको हो । एफपीओ निष्कासनपछि चुक्तापुँजी बढेर ९ अर्ब ८१ करोड ११ लाख रुपैयाँ पुग्ने छ । एफपीओबाट ४ अर्ब ९५ करोड १७ लाख रुपैयाँ प्राप्त हुने छ । १ अर्ब ७६ करोड ८४ लाख रुपैयाँ चुक्तापुँजीमा र बाँकी संचित कोषमा जम्मा हुनेछ । संचित कोषबाट लगानीकर्ताले वर्षेनी लाभांश पाउने छन् । बैंकको चुक्तापुँजी ८ अर्ब ४ करोड रुपैयाँ छ । बैंकमा सरकारको ६२.२१ प्रतिशत र सर्वसाधारणको ३७.७९ प्रतिशत स्वामित्व छ । एफपीओ निष्कासनपछि बैंकमा सरकारी स्वामित्व ६२.२१ बाट घटेर ५१ प्रतिशत कायम हुने छ । यस्तै सर्वसाधारणको ४९ प्रतिशत हिस्सा रहने छ । यसमध्ये एफपीओबाट प्रवेश गर्नेको स्वामित्व १७ प्रतिशत हुनेछ । बैंकले ९ महिनामा २ अर्ब ५६ करोड रुपैयाँ खुदनाफा गरेको छ ।
बजार १४ अंकले घट्दा दुई कम्पनीका लगानीकर्ताले कमाए ९ प्रतिशत बढी
काठमाडौं । आइतबारको सेयर बजार निरन्तर ओरालो लागेको छ । सो दिनको बजार खुलेदेखि दिनभर ओरालो लागेर बजार बन्द हुँदा १२३३ अंकमा झरेको छ । सम्रगमा बजार १४ अंकले घटेको छ । दोहोरो अंकले घटेको बजारमा पनि दुई कम्पनीका लगानीकर्ताले ९ प्रतिशत बढी कमाएका छन् । सबैभन्दा बढी राधी विद्युत कम्पनीका लगानीकर्ताले १० प्रतिशत बढी कमाएका छन् । त्यस्तै, समता माइक्रोफाइनान्स वित्तीय संस्थाको सेयर मूल्य ९.९८ प्रतिशतले बढेको छ । यी दुई कम्पनीको सेयर मूल्य प्रतिकित्ता क्रमशः ३१९ र १७८५ रुपैयाँ रहेको छ । समता माइक्रोफाइनान्सले हकप्रद सेयर जारी गर्दै छ, त्यसैले कम्पनीको सेयर मूल्यमा वृद्धि भएको हो । कम्पनीले ५० प्रतिशत हकप्रद जारी गर्नको लागि असार १२ गते बुक क्लोजको मिति घोषणा गरिसकेको छ । आइतबारको बजारमा १५८ कम्पनीको २४ करोड ५० लाख रुपैयाँ बराबरको सेयर कारोबार भएको छ । सबैभन्दा बढी ग्रामीण विकास लघुवित्त वित्तीय संस्थाको २ करोड रुपैया बराबरको सेयर कारोबार भएको छ । बजारमा होटल बाहेक सबैसमूहको सूचक ओरालो लागेको छ । सबैभन्दा बढी बीमा समूह ७२ अंकले झरेको छ ।
प्रभुले समुहले ल्यायो फ्रिक्वाेइन्सीबाट चल्ने टिभी, मूल्य ८००
काठमाडौं । प्रभु समुहले नपालमै पहिलो पटक मोबाल फ्रिकोइन्सीबाट चल्ने भिडियो प्रशारण (डीभीबी टी२) प्रविधी भित्र्याएको छ । तार र एनटीना बिना नै टीभी हेर्न सकिने गरी समुहले आइतबार टिभी सार्वजनिक गरिएको हो । यस प्रविधीबाट मोबाईल, ट्याब्लेट तथा ल्यापटपमा समेत टेलिभिजन हेर्न सकिने समुहका अध्यक्ष प्रकाश भट्टचनले बताए । प्रविधीको उद्घाटन गर्दै भट्टचनले भने -‘यो प्रविधी शुरुमा काठमाडौं, चितवन र पोखरामा सञ्चालन गरिएको छ, भावी दिनमा बुटवल भैरहवा, नेपालगञ्ज, कोहलपुर लगायतको स्थानहरुमा समेत लैजाने तयारी गरेका छौं ।’ उनका अनुसार मासिक ३ सयमा २७ एचडी च्यानल सहित ६० च्यानल हेर्न सकिनेछ । विस्तारै च्यानल बढाएर १२० वटा सम्म पुर्यायाउने कम्पनीले जनाएको छ । कम्पनीका अनुसार टिभी सजिलै ग्राहकले नै जडान गर्न सक्नेछन् । शुरुमा प्रयोग गर्ने सेवाग्राहीले सेट अप बक्सको एक हजार र ६ महिनाको शुल्क १८ सय रुपैया तिर्नु पर्नेछ । संस्थाहरुको लागि भने कम्पनीले सेटअप बक्स ८ सयमै पाउनेछन् भने मासिक शुल्क २ सय तिर्नु पर्नेछ । यस प्रविधीको प्रयोगबाट अब सेवाग्राहीले तार एनटिना भद्धा बक्सको झन्झटबाट मुक्त हुने कम्पनीले दाबी गरेको छ । प्रभु समुहले हाल देशभर बैकिङ बिमा, लघुवित्त, क्यापिटल मार्केट, हेलिकप्टर,व्यवस्थापन संचारसँग सम्बन्धित विभिन्न कम्पनीहरु आबद्ध रहेका छन् ।
वहुप्रतिक्षित भैरहवा सेजकाे निर्माण कार्य असार दोस्रो हप्तादेखि शुरु
काठमाडौं । भैरहवास्थित विशेष आर्थिक क्षेत्र (सेज)को निर्माण कार्य आगामी दोस्रो हप्ताभित्र शुरु हुने भएको छ । विशेष आर्थिक क्षेत्र प्राधिकरणका कार्यकारी निर्देशक डा. चन्डीकाप्रसाद भट्टले आगामी दुईहप्ताभित्र वहुप्रतिक्षित भैरवा सेज निर्माण शुरु हुने बताए । नेपाल आर्थिक पत्रकार समाज (सेजन)ले गरेको अन्तरक्रिया कार्यक्रममा आफ्नो प्रस्तुतिको अवसरमा उनले सेज निर्माण कार्यको सम्पूर्ण तयारी पूरा भइसकेकाे जानकारी दिए । उनका अनुसार दुई महिनाअघिसम्म १३ उद्योगले ३८ ओटा प्लटहरु लिइसकेको थियो । त्यसपछिको केही महिना पुनः १३ उद्योगले ३१ ओटा प्लट लिएको छ । अहिले भैरवा क्षेत्रमा रहेको कुल ६९ प्लट सबै उद्योगीहरुले लिइसकेको उनकाे भनाइ छ । अब कुनै पनि बाँकी छैन । ‘हामीले उक्त २६ उद्योगलाई अनुमति पनि दिइसकेका छौं,’ उनले भने ‘अहिले उद्योग दर्ताको प्रक्रियामा अघि बढेकाे छ । अबको दुई हप्ताभित्रै उद्योग निर्माण कार्य अघि बढ्नेछ ।’ प्राधिकरणको अनुसार अबको दुई हप्ताभित्र उद्योगहरुसँग सञ्चालनकाे लागि सम्झौता हुनेछ । सम्झौतपछि उद्योगहरुले भाडा बुझाउन शुरु गर्नेछन् । उद्योगहरुले स्वत निर्माण कार्य शुरु गर्ने उनले बताए । सोही कार्यक्रममा नेपाल विद्युत प्राधिकरणका कार्यकारी निर्देशक कुलमान घिसिङले समेत उद्योगलाई अवश्यक पर्ने जति पनि विद्युत उपलब्ध गराउने बताए । ‘सेजमा विद्युतको समस्या होइन,’ उनले भने ‘सेजलाई आवश्यक पर्ने जति पनि विद्युत उपलब्ध गराउने छौं ।’ सो भैरहवास्थित विशेष आर्थिक क्षेत्र सेजको २०७१ सालमै उद्घाटन गरिएको हो । प्राधिकरणको अनुसार सेजमा उद्योग सञ्चालनको लागि विगतमै आईडीएस इलेक्ट्रिक प्रालि, सुगम नानो हर्बल इन्डष्ट्रिज, किरण सुज म्यानुफ्क्चर, जगदम्बा सिन्थेटीक्स प्रालि, ट्रान्स हिमालयन बेभरेज, सिद्धार्थ पेट प्लाष्ट, सिद्धार्थ पेट प्लाष्ट (पीभीसी म्याट), एक्सन पोलिमोर, सरोज श्रेष्ठ गार्मेण्ट ले अनुमति पत्र लिइसकेका थिए । त्यस्तै पछिल्लो चरणमाा महेन्द्रकुमार गोयल, इन्टरटेक पाइप्स एण्ड फीटीङ, एशियन थाइ फुड्स, मिनरल वाटर इण्डष्ट्रिज लगायतले अनुमति पत्र लिएका हुन्। प्राधिकरणको अनुसार सेजभित्र सबै उद्योग सञ्चालनमा आउँदा ५ अर्ब रूपैयाँ लगानी हुनेछ । २ हजार जनाले प्रत्यक्ष रोजगारी पाउने छन् । सञ्चालनको लागि अनुमति पाएको १ वर्षभित्र उद्योगले व्यापारिक उत्पादन गर्नुपर्ने प्रावधान छ । त्यस्तै सेजमा सञ्चालन हुने उद्योगहरुले ७५ प्रतिशत उत्पादन निर्यात गर्नै पर्ने व्यवस्था छ ।
झण्डै २ दशकपछि नेपालमा बिजुली छ्यालव्याल, माग भन्दा १०० मेगावाट आपूर्ति बढी
काठमाडौं । लामो समयपछि प्रणालीमा माग भन्दा बढी बिजुली आपूर्ति भएको छ । प्रणालीमा अहिले माग भन्दा झण्डै १०० मेगावाट हारहारीमा बिजुली बढी रहेको छ । हाल बिजुलीको माग ११७५ देखि १२०० मेगावाट रहेको छ । तर आपूर्ति भने १३०० मेगावाट रहेको नेपाल विद्युत प्राधिकरण प्रणाली सञ्चालन विभाग प्रमुख विष्णु श्रेष्ठले बताए । उनले लामो समयपछि प्रणालीमा बढी बिजुली आपूर्ति भएको जानकारी दिए । श्रेष्ठका अनुसार विद्युत प्राधिकरणका आयोजनाबाट ४५०, भारतबाट ५०० र निजी उत्पादकबाट ३५० देखि ४०० मेगावाट बिजुली आपूर्ति भइरहेको छ । माग भने बढीमा १२०० मेगावाट पुग्ने गरेको छ । आन्तरिक उत्पादनबाट मात्रै ९०० मेगावाट हारहारीमा बिजुली आपूर्ति हुने गरेको छ । हाल ठुला आयोजना कालिगण्डकी, १४४, मध्यमस्र्याङदी ७०, तल्लोमस्र्याङदी ६९ मेगावाट बिजुली उत्पादन भइरहेको छ । वर्षाद सुरु भएपछि सबै आयोजना पुर्ण क्षमतामा सञ्चालन भइरहेको प्रमुख श्रेष्ठले बताए । यस्तै एक मात्र जलासययुक्त आयोजना कुलेखानीमा पानीको सतह १ हजार ५०५ मिटर रहेको छ । गत वर्षको भन्दा ५ मिटर बढी रहेको उनले सुनाए । उद्योगलाई ३०० मेगावाट व्यवस्था गरेपनि २०० मेगावाट हारहारीमा खपत हुने गरेको छ । बढी बिजुलीको माग हुने साँझमा उद्योग सञ्चालन कम हुने भएकाले त्यसबेला बिजुलीको माग कम भएको उनको भनाई छ । दुई दशकपछि नेपालमा पहिलो पटक बिजुली छ्यालव्याल भएको हो । मुलुक लोडसेडिङमुक्त भएपछि बिजुलीको मागमा पनि कमी आएको छ । विद्युत प्राधिकरणले यो वर्ष बिजुलीको माग १५०० मेगावाट बढी हुने प्रक्षेपण गरेपनि १२०० मेगावाटको हारहारीमा मात्र माग भएको छ । लोडसेडिङ भइरहेको भए यो माग १५०० मेगावाट नाघने थियो ।
समता माइक्रोफाइनान्सको असार १२ गते बुक क्लोज, हकप्रद सेयर जारी गर्दै
काठमाडौं । समता माइक्रोफाइनान्स वित्तीय संस्थाको आगामी असार १२ गते बुक क्लोज हुने भएको छ । संस्थाको हालै सम्पन्न ६४औँ बैठकले हकप्रद सेयर जारी गर्ने प्रयोजनको लागि उक्त एक दिन कम्पनीको कारोबार बन्द गर्ने निर्णय गरेको हो । फाइनान्सले २ बराबर १ को अनुपात अर्थात ५० प्रतिशत हकप्रद सेयर निष्काशन गर्न लागेको हो । हाल संस्थाको चुक्ता पुँजी ३ करोड ७९ लाख रुपैयाँ रहेको छ । ५० प्रतिशत हकप्रद पछि संस्थाको पुँजी ५ करोड ६८ लाख रुपैयाँ पुग्ने छ ।
माउन्टेन हाइड्रोले १२ करोड ५० लाखको आईपीओ निष्कासन गर्न बोर्डबाट पायो अनुमति
काठमाडौं । माउन्टेन हाइड्रो नेपाल लिमिटेडले साधारण सेयर (आईपीओ) निष्कासन गर्न अनुमति पाएको छ । नेपाल धितोपत्र बोर्डले कम्पनीलाई १२ करोड ५० लाख रुपैयाँ बराबरको १२ लाख ५० हजार कित्ता आईपीओ निष्कासन गर्न अनुमति दिएको हो । बोर्डले अनुमति दिएकाले आईपीओ निष्कासन गर्न माउन्टेनलाई बाटो खुला भएको छ । कम्पनीले आयोजना प्रभावित स्थानीय बासिन्दालाई आईपीओ निष्कासन गर्न लागेको हो । कम्पनीको सेयर निष्कासन तथा बिक्री प्रवन्धकमा सिद्धार्थ क्यापिटल लिमिटेड रहेको छ । कम्पनीले पाँचथरमा २१.६ मेगावाटको तल्लो हेवाखोला आयोजना सम्पन्न गरेको छ । स्थानीयलाई बाँडफाँड गरेपछि कम्पनीले सर्वसाधारणलाई आईपीओ निष्कासन गर्नेछ ।
महालक्ष्मी विकास बैंकद्धारा मृतकका परिवारलाई ७ लाख रुपैयाँ सहयोग
काठमाडौं । महालक्ष्मी विकास बैंक लिमिटेडले मृतकका परिवारलाई ७ लाख रुपैयाँ सहयोग गरेको छ । बैंकले तुलसीपुर शाखामा कार्यरत किसोरकुमार बडुको असामयिक निधन भएकोमा बडुको परिवारलाई सो मात्राको रकम सहयोग गरेको हो । बैंकले गत जेठ ३० गते बैतडी शाखामा आयोजित एक कार्यक्रमबीच शोक सन्तप्त परिवारलाई उक्त रकम प्रदान गरेको हो । सोही अवसरमा बैंकका सञ्चालक समितिका अध्यक्ष राजेश उपाध्यायले पनि व्यक्तिगत तर्फबाट २५ हजार रुपैयाँ सहयोग गरेका थिए । उक्त रकमको चेकहरु स्व. बडुका पिता जनकबहादुर बडुलाई बैंकका प्रमुख कार्यकारी अधिकृत कृष्णराज लामिछानेले हस्तान्तरण गरेका हुन् । संस्थाका कर्मचारी बडुको २०७४ साल चैत्र ११ गते मोटरसाइकल दुर्घटना परी असामयिक निधन भएको थियो ।
