कर्जा विस्तार २० प्रतिशतमा सीमित गरिने, सीआरआर ४ प्रतिशत
काठमाडौं । नेपाल राष्ट्र बैंकले आगामी आर्थिक वर्षमा कर्जा विस्तार २० प्रतिशतमा सीमित गर्ने भएको छ । यस्तै रिपो दर यथावत राखेको छ भने सीआरआर सबैलाई ४ प्रतिशत कायम गरिएको छ ।
२५ वाणिज्य बैंकको चुक्ता पुँजी पुग्यो, १ को नपुग्ने
काठमाडौं । २८ मध्ये २५ वाणिज्य बैंकले चुक्ता पुँजी ८ अर्ब रुपैयाँ पुर्याएका छन् । यी मध्ये २ वटा बैंकले पुर्याउँदै छन् भने १ बैंकले नपुर्याउने देखाएको हो । आगामी आर्थिक वर्षको मौद्रिक नीति सार्वजनिक गर्दै नेपाल राष्ट्र बैंकका गभर्नर डा. चिरन्जीवि नेपालले २८ वाणिज्य बैंकको कुल चुक्ता पुँजी २ खर्ब २७ अर्ब ९४ करोड रुपैयाँ पुगेको जानकारी दिए । १६२ बैंक तथा वित्तीय संस्था मर्जर र प्राप्ति प्रक्रियामा सहभागी भई ४१ कायम भएका छन् ।
चम्पक गुरुङको शब्द, स्वरुपराज आचार्य र जुनु रिजालको स्वरमा नयाँ म्युजिक भिडियो सार्वजनिक
काठमाडाैं । चम्पक गुरुङको शब्द ,स्वरुपराज आचार्य र जुनु रिजालको स्वरमा नयाँ गीतको म्युजिक भिडियो बुधबार सार्वजनिक गरिएको छ । सो म्युजिक भिडियो रामेछापका प्रतिनिधीसभा सदस्य श्यामकुमार श्रेष्ठले सार्वजनिक गरेका छन् । गीतमा रामेछापलाई जन्म भुमीको रुपमा चिनाइएको छ । गीतमा नेपालको भौगोलिक अवस्थासगै रामेछापका विभिन्न पर्यटकीय स्थललाई समेटिएको छ । मेरो प्यारो रामेछाप ’ टाइटलको यो गीतमा नेपाललाई सुन्दरताको देशको रुपमा चिनाइएको छ । नेपालमा राम्रा ठाउँ हुँदाहुँदै घुम्नका हंङकङ, सिंगापुर लगायतका विदेशमा जाने गरेको भन्दै नेपालमै टूर गर्न सुझाव दिइएको छ । मध्य पहाडी लोकमार्गको परिकल्पना, जलविद्युत निर्माण, आन्तरिक पर्यटन प्रबद्धृन, युवालाई स्वदेशमै रोजगारी दिएर नेपाललाई समृद्ध बनाउनु पर्ने सुझाव गीतबाट दिइएको छ ।
धौलागिरिमा ‘एक गाउँ एक उत्पादन’ कार्यक्रम शुरु, रोजगारी र आम्दानीको अवसर सिर्जना गर्ने उद्देश्य
म्याग्दी । धौलागिरि गाउँपालिकामा ‘एक गाउँ एक उत्पादन’ कार्यक्रम शुरु भएको छ । हावापानी र माटो अनुकूलको खाद्यबाली, तरकारी, फलफूल र जडीबुटी खेतीको विकास गरी रोजगारी र आम्दानीको अवसर सिर्जना गर्ने उद्देश्यले गाउँपालिकाले एक गाउँ एक उत्पादन कार्यक्रम शुरु गरेको हो । पहिलो वर्ष यसपालि वडा नं २ लुलाङ र वडा नं ६ मराङलाई एक गाउँ एक उत्पादन कार्यक्रमका लागि छनोट गरिएको गाउँपालिकाको कृषि शाखाका प्रमुख योगेन्द्र राईले जानकारी दिए । लुलाङमा आलु र मराङमा अलैँची खेतीका लागि एक गाउँ एक उत्पादन कार्यक्रम शुरु गरिएको राईले बताएका छन् । मराङको हाङबाङमा गठन भएको मालीका कृषक समूहमार्फत दुई हेक्टर क्षेत्रफलमा रामशाही जातको अलैँचीको बिरुवा लगाइएको छ । यहाँ ४३ कृषकले १४ हजार अलैँचीका बिरुवा रोपेका छन् । गाउँपालिकाले अलैँचीका बिरुवा निःशुल्क उपलब्ध गराएको थियो । यसैगरी एक गाउँ एक उत्पादन कार्यक्रमका लागि आलुखेती छनोट भएको लुलाङमा बीउ भण्डारण गृह (रस्टिक स्टोर) निर्माण भएको छ । गत वर्ष जिल्ला कृषि विकास कार्यालयको दुई लाख ७० हजार रूपैयाँ अनुदानमा बनाइएको भवनमा यसपाली फर्निचर र अन्य पूर्वाधारको व्यवस्था गरेर पूर्णता दिइएको छ । रासस
एकसिंगे गैंडाको एक जोडी बिहीबार चीन जाँदै
काठमाडौं । नेपाल सरकारले चीनलाई उपहार दिन लागेको दुर्लभ एकसिंगे गैंँडाको एक जोडी ‘रुपसी र भद्र’ काठमाडौं ल्याइएको छ । चितवनबाट मंगलबार एक कार्यक्रमकाबीच बिदाई गरिएको गैंँडा गएराति काठमाडौं ल्याइएको हो । राष्ट्रिय प्रकृति संरक्षण कोष सौराहाका प्रमुख रामकुमार अर्यालले सडकमार्ग भएर गैंँडा सहज रुपमा काठमाडौं भित्र्याइएको जानकारी दिए । काठमाडौं ल्याइएको गैँडा चीन पठाउने तयारी भइरहेको छ । अहिले उक्त गैंँडाको जोडीलाई ललितपुरको खुमलटारस्थित राष्ट्रिय प्रकृति संरक्षण कोषको केन्द्रीय कार्यालयमा राखिएको छ । विसं २०७३ असार २६ गते नेपाल सरकारले चीनलाई दुई जोडी गैंँडा उपहार दिने निर्णय गरेको थियो । त्यसको ठिक दुई वर्षपछि बिहीबार एकजोडी गैँंडा चीनलाई उपहारस्वरुप प्रदान गरिँदै छ । सरकारले पोथी गैँडाको नाम रुपसी र भालेको नाम भद्र राखेको छ । “सडकमा हुनसक्ने विभिन्न अवरोधलाई ध्यानमा राखेर गैँंडालाई एक दिन अगावै काठमाडौँ ल्याइएको हो,” चितवन राष्ट्रिय निकुञ्जका प्रमुख संरक्षण अधिकृत बेदकुमार ढकालले भने। उनीपनि गैँंडासँगै काठमाडौं आएका छन् । “बाटोमा कुनै समस्या भएन, सहज रुपमा गैँंडा काठमाडौं ल्याइयो,” उनले भने, “भोलि चीन पठाइने तयारीमा जुटेका छौँ ।” बाटोमा घाँस, केरा, बन्दागोभी, स्याउ र पानी खुवाउँदै गैँंडा ल्याइएको हो । राष्ट्रिय निकुञ्ज सुरक्षार्थ खटिएको बटुकदल गणका सह-सेनानी शिवराम खड्काको नेतृत्वमा आएको १० जना सैनिकसहितको टोलीले गैंँडालाई स्कटिङ गरेको थियो । काठको खोरभित्र राखिएको भद्रलाई ना५ख ७९९६ नं र रुपसीलाई ना७ख १२७० नं को ट्रकमा हालेर ल्याइएको हो । गैंँडा ल्याउन चितवन निकुञ्जका प्रमुख ढकाल र राष्ट्रिय प्रकृति संरक्षण कोष सौराहाका प्रमुख अर्यालको नेतृत्वमा भेटेरीनरी प्राविधिज्ञ, वन्यजन्तु प्राविधिज्ञ, मिस्त्री, संरक्षणकर्मी, तथा नेपाली सेना गरी ३५ जनाको टोली सहभागी थियो । पशु चिकित्सकसहित तीन जना चिनियाँ प्रतिनिधि पनि टोलीमा थिए । “गैँडालाई चाहिने खानेकुरा र आवश्यक जनशक्तिसहित हामी गैँंडा लिएर आएका छौंँ, बीचमा समस्या परे तत्कालै समाधान गर्ने टिम सँगै छ,” कोषका चितवन प्रमुख अर्यालले भने । घाँस काट्ने मान्छे, खोर बनाउने मिस्त्री, उपचारका लागि औषधिसहितका चिकित्सकसँगै ल्याएको अर्यालले बताए । बाटोमा ठाउँठाउँमा गाडी रोकेर गैंँडालाई दाना पानी खुवाइएको थियो । बेलाबेलामा गर्मीबाट जोगाउन नुहाइदिँदै गैंँडालाई काठमाडौं ल्याइएको हो । रुपसी र भद्रलाई चीनको चिमोलङ सफारीपार्कमा राखिने छ । बाँकी एक जोडी गैँंडा राष्ट्रिय प्रकृति संरक्षण कोषको निगरानीमा कोषकै प्रांगणमा बनाइएको पिट बोमा(सानो खोर)मा राखिएको छ । सरकारी निर्णय अनुसार उक्त जोडी गैंँडालाई आगामी आर्थिक वर्षमा पठाइने छ । काठमाडौँबाट गैंँडालाई विशेष कार्गो जहाजमा चीन पठाइने छ । केही समय गैंँडाको रेखदेख र चिनियाँ प्रतिनिधिलाई सिकाउनका लागि चितवन निकुञ्जका वरिष्ठ पशु चिकित्सक डा कमल गैरेको नेतृत्वमा कोषका भेटेरिनरी प्राविधिज्ञ किरण रिजाल, वन्यजन्तु प्राविधिज्ञ तीर्थ लामा, दिपप्रसाद चौधरी र विनोद दराई गैँंडासँगै चीन जाँदै छन् । चीनमा गैंँडाको आवश्यक चिकित्सकीय सेवा र उसको स्याहार सुसारमा यहाँ भएका प्रक्रियाबारे चिनियाँ प्रतिनिधिलाई सिकाइने रिजालले बताए । गएको वैशाख १५ गते अन्दाजी दुई वर्षको भद्रलाई निकुञ्जको पश्चिम क्षेत्र खोरीया मुहान र वैशाख १७ गते रुपसीलाई सुकिभार क्षेत्रबाट समातेर ल्याइएको थियो । नेपालले अहिलेसम्म विभिन्न देशमा गरेर २६ गैंँडा उपहार दिएको छ । विश्वमै दुर्लभ मानिने एकसिंगे गैँडा नेपाल र भारतमा मात्रै पाइन्छ । नेपालमा पछिल्लो गणनाअनुसार ६४५ वटा गैँडा रहेको छ । चितवनमा मात्रै ६०५ गैंँडा रहेको तथ्यांक छ । रासस
गृहमन्त्री रामबहादुर थापाको यातायातमन्त्री रघुवीर महासेठलाई चुनाैति- चलखेल नगर्नुस् सिण्डिकेट अब फर्किदैन
काठमाडौं । भौतिक पुर्वाधार तथा यातायात व्यवस्थामन्त्री रघुवीर महासेठले सिण्डिकेट फर्काउने तयारी गरेका बेला गृहमन्त्री रामबहादुर थापाले उनलाई काउन्टर दिदै नफर्किने दावी गरेका छन् । युनाइटे ट्रान्सपोर्ट भलाइ एन्ड इन्भेष्टमेन्टले बुधबार राजधानीमा आयोजना गरेको यातायात क्षेत्रको विद्यमान अन्यौल र चुनौति विषयक अन्तरक्रिया कार्यक्रमलाई सम्बोधन गर्दै गृहमन्त्री थापाले अब सिण्डिकेट कहिले नफर्किने बताएका हुन् । उनले नेपालको हवाइ, रेल र सडकमा ठुलो लगानी भित्रिने अवस्थामा पुगेका बेला षडयन्त्र हुन थालेको दावी गर्दै गृहमन्त्री थापाले यसलाई कुनै पनि हालतमा सक्रिय हुन नदिने स्पष्टपारेका छन् । भौतिक पुर्वाधारमन्त्री महासेठले ३ वटा यातायात व्यवसायीको रोक्का भएको खाता खोल्नका लागि बैंकलाई पत्राचार गरेको भोलिपल्ट गृहमन्त्री थापाले उनलाई चुनौति दिदै सिण्डिकेट कुनै पनि हालतमा लागु हुन नदिने दावी गरे । मन्त्री महासेठप्रति लक्षित गर्दै गृहमन्त्री थापाले जतिसुकै दवाव र षडयन्त्र भएपनि सिण्डिकेट कार्यन्वयनमा आउन नसक्ने जिकिर गरे । उनले पुरानो व्यवस्थाबाट यातायात क्षेत्र चल्न नसक्ने पनि स्पष्टपारे ।
एनएमबी बैंकले १५ प्रतिशत बोनस सेयर दिने, एफपीओ किन्ने लगानीकर्ताले पनि पाउने
काठमाडौं । एनएमबी बैंकको थप निष्कासन (एफपीओ) खरिद गर्ने लगानीकर्ताले १५ प्रतिशत बोनस सेयर पाउने भएका छन् । बैंकको मंगलबार बसेको ३५९ औं सञ्चालक समिति बैठकले एफपीओ बाँडफाँडपछि चुत्तापुँजी अर्थात ७ अर्ब ६० करोड ३२ लाख ९० हजार रुपैयाँ पुग्ने र सोको १५ प्रतिशत बोनस सेयर दिने प्रस्ताव गरेको छ । नेपाल राष्ट्र बैंकबाट स्वीकृति र वार्षिक साधारणसभाबाट पारित भएपछि बोनस सेयर दिने बैंकले स्पष्टपारेको छ । बैंकले गत आर्थिक वर्षमा गरेको नाफाबाट सेयरधनीलाई १ अर्ब १४ करोड ४ लाख ९३ हजार रुपैयाँ बराबरको बोनस सेयर दिने प्रस्ताव गरेको छ । बैंकले चुत्तापुँजी बढाउन १ अर्ब १४ करोड १५ लाख १६ हजार रुपैयाँ बराबरको एफपीओ निष्कासन गरेको छ । एफपीओका लगानीकर्ताले समेत बोनस सेयर पाउने भएपछि बैंकको चुत्तापुँजी बढेर ८ अर्ब ७४ करोड ३७ लाख रुपैयाँ पुग्ने छ । बैैंकले गत आर्थिक वर्ष २०७३/०७४ मा एक अर्ब ५१ करोड १३ लाख ८६ हजार रुपैयाँ नाफा कमाएको छ । यस्तो नाफा अघिल्लोको तुलनामा ३९ करोड ६३ लाखले बढेको छ ।
मुक्तिनाथ विकास बैंकको ७९ औं शाखा काठमाडौंको कोटेश्वरमा
काठमाडौं । मुक्तिनाथ विकास बैंकले राजधानीको कोटेश्वरमा ७९ औं शाखा सञ्चालनमा ल्याएको छ । शाखाको वरिष्ठ इतिहासविद् सत्यमोहन जोशीले उद्घाटन गरेका थिए । उनले बचत खाता खोली औपचारीक रुपमा बैंकिङ कारोबार सुरु गरेको बैंकले जनाएको छ । मुक्तिनाथले आधुनिक बैंकिङ्ग, ग्रामीण बैंकिङ्ग र लघुवित्त सेवा एकै साथ सञ्चालन गर्दै आएको छ । उक्त कार्यक्रममा बैंकका ब्रान्ड एम्बेसडर सिताराम कट्टेल (धुर्मुस) ले हरहमेसा बैंकसँगै रहने प्रतिबद्धता सहित बैंकको सफलताको शुभकामना व्यक्त गरेका थिए । प्रमुख कार्यकारी अधिकृत प्रद्युमन पोखरेलले बैंकको वर्तमान अवस्था र सेवा विस्तारमा बैंकले लिने भावी रणनीतिको बारेमा जानकारी गराएका थिए । बैंकले लिएको समावेशी वित्तीय पहुँच विस्तारलाई अझै विस्तार गरी लघुउद्यम तथा लघु व्यवसाय विस्तारमा जोड दिने योजना रहेको सुनाए । बैंकको हालसम्म उपत्यकाभित्र कोटेश्वर, महाराजगंज, कमलादी, सीतापाईला, कुलेश्वर, लगनखेल, न्यूरोड, नयाँबानेश्वर, चावहिल, माछापोखरी र भक्तपुरको कमलविनायक गरी ११ शाखाहरु संचालनमा आई सकेका छन् । यस्तै जोरपाटी, ठमेल, कुपण्डोल, बत्तीसपुतलीबाट पनि शीघ्र औपचारिक रुपमा सेवा सञ्चालनको तयारीमा रहेको बैंकले जनाएको छ ।
