महालक्ष्मी विकास बैंकको रुपन्देही शाखा स्थानान्तरण
काठमाडौं । महालक्ष्मी विकास बैंक लिमिटेडले रुपन्देही जिल्लाको लुम्बिनी सांस्कृतिक नगरपालिकाको शाखा स्थानान्तरण गरेको छ । बैंकले उक्त शाखा स्थानान्तरण गरी सूर्यपुरामा आफ्नो सेवा सञ्चालनमा ल्याएकोे छ । बैंकको यस शाखाले स्थानीय स्तरमा उत्कृष्ट सेवा प्रदान गर्ने बैंकको प्रतिबद्धता रहेको छ । बैंकले हाल ७३ वटा शाखा तथा ३५ वटा एटिएमहरुमार्फत सेवा प्रदान गरिरहेको छ । साथै, बैंकको ग्राहक संख्या ४ लाख ६० हजार भन्दा बढि रहेको छ । बैंकले गत असार मसान्तसम्म २७ अर्ब २७ करोड रुपैयाँ निक्षेप संकलन गरी २१ अर्ब ६५ करोड रुपैयाँ कर्जा प्रवाह गरेको छ ।
१६७ प्रतिशत हकप्रद पछि सिटी एक्स्प्रेस फाइनान्सको सेयर मूल्य समायोजन
काठमाडौं । सोमबार सिटी एक्स्प्रेस फाइनान्सको सेयर मूल्य समायोजन भएको छ । नेपाल स्टक एक्स्चेञ्ज(नेप्से)ले फाइनान्सको १६७ प्रतिशत हकप्रद सेयर पछिको मूल्य समायोजन गरेको हो । समायोजन पछि संस्थाको सेयर मूल्य प्रतिकित्ता १०८.६१ रुपैयाँ रहेको छ । जसको औसत आधार मूल्य प्रतिकित्ता १५४.३१ रुपैयाँ रहेको थियो ।
काठमाडौं स्टीलले उत्पादन दोब्बर बनाउँदै, ४० करोड लगानी थप्ने तयारी
काठमाडौं । निजी लगानीमा स्थापना भएको काठमाडौं स्टील प्राइभेट लिमिटेडले उत्पादन दोब्बर बढाउने भएको छ । उद्योगले स्टील उत्पादन क्षमता दोब्बर बढाएर वार्षिक १ लाख ५० हजार टन पुर्याउने भएको हो । नवलपरासीको सरावल १ मा रहेको कारखानाको क्षमता विस्तार गरेर आगामी डेढ वर्षभित्र स्टील उत्पादन दोब्बर पार्न लागेको प्रमुख कार्यकारी अधिकृत (सीईओ) केशवराज पोखरेलले बताए । उत्पादन विस्तार गर्न उद्योगले ४० करोड रुपैयाँ थप लगानी गर्ने पोखरेलले जानकारी दिए । केशवराज पोखरेल, सीईओ-काठमाडौं स्टील हाल उद्योगले वार्षिक ६० हजार टन स्टील उत्पादन गरिरहेको छ । स्टीलको माग बढ्दै गएकाले त्यसलाई पुरा गर्न उद्योगले उत्पादन क्षमतामा विस्तार गरेको उनले स्पष्टपारे । उद्योगले उत्पादन बढाउन वातावरणीय प्रभाव मूल्याँकन (ईआएए) को काम शुरु गरेको छ । नेपाल इन्भारोमेन्टल एन्ड साइनटिफिक सर्भिसेजले ईआईएको काम थालेको छ । वातावरण मन्त्रालयबाट ईआईए स्वीकृति हुनसाथ उद्योग विस्तारको काम थालिने उनले जानकारी दिए । उद्योगको क्षेत्रफल ३ विगाह रहेको छ । टीएमटी बार फलामे छठ उद्योगले उत्पादन गर्दै आएको छ । उद्योगको स्थिर पुँजी लगानी ९२ करोड २८ लाख रुपैयाँ छ । २०६८ सालमा स्थापना भएको उद्योगले २०७० सालदेखि स्टील उत्पादन गर्दै आएको छ । उद्योगले ‘रिडवार विथ कपलर सिस्टम’ को स्टील उत्पादन गर्दै आएको छ । यस्तो प्रविधि प्रयोगमा ल्याउने दक्षिण एशियामा काठमाडौं पहिलो स्टील कम्पनी हो । यसका उत्पादनलाई जहाँ काटेर पनि त्यसमा जोड्न सकिन्छ । जीआई पाइपमा सकेट राखेझै काठमाडौं स्टीलका रडहरु जोड्नको लागि सजिलो हुने पोखरेलले जानकारी दिए । यसरी जोडिएको भागको स्ट्रेन्थ तथा बेन्डिङ मोमेन्ट रडको परम्परागत डिजाइनको तुलनामा धेरै राम्रो हुने उद्योगको भनाई छ । परम्परागत स्टीलहरु जोर्तीमा ओभरल्याप (एक रडमाथि अर्को रड) गरिन्छ । निर्माणलाई बलियो बनाउन रडहरु जोर्तीमा नखप्टी हुँदैन । त्यसो गर्दा धेरै रड खपत हुन्छ । निर्माताको खर्च बढी हुन जान्छ । एउटा पुल बनाउन १०० टन रड लाग्छ भने १० टन रड ज्वाइन्टमा मात्र खपत हुन्छ । २० प्रतिशत रड टुक्रा हुने गर्छ । त्यसको पनि ८० प्रतिशत अर्थात १६ टन रड टुक्रिनबाट जोगिने भएकाले काठमाडौं स्टीलको लागत कम हुने उनको भनाई छ । काठमाडौं स्टीलले रड उत्पादनपछि ह्याण्डलिङ एण्ड डिस्प्याचको काम मेसिनले गर्ने प्रविधि विकास गरेको छ । यस्तो प्रविधि पहिलो पटक नेपालमा विकास भएकोले यस प्रविधिमा आधारित मेसिन बनाएर विश्व बजारमा निर्यात गर्ने कम्पनीले जनाएको छ । यस प्रविधिमा आधारित मेसिनको प्रयोगसँगै दैनिक १३० जना मानिसले गर्ने काम ४ जनाले गर्न सक्ने उनले बताए । नेपालको १६ वटा स्टील उद्योगले यो मेसिन प्रयोग गर्दा ५ हजार मजदुर कटौति हुने उनले जानकारी दिए ।
एनआईसी एशिया क्यापिटलद्धारा संध्याकालीन काउण्टर संचालनमा
काठमाडौं । एनआईसी एशिया क्यापिटल लिमिटेडले संध्याकालीन काउण्टर संचालनमा ल्याएको छ । यस संध्याकालीन काउण्टर मार्फत सेवाग्राहीहरुले दैनिक कार्यालय समभन्दा अतिरिक्त समय सेवा प्राप्त गर्न सक्ने छ्न्। एनआईसी एशिया क्यापिटलको बबरमहल कार्यालयमा आईतबारदेखि बिहीबारसम्म बिहान १० बजेदेखि दिउसो ३ बजेसम्म तथा संध्याकालिन काउण्टर दिउसो ४ बजेदेखि बेलुका ६ बजेसम्म खुल्ने छ । त्यस्तै, शुक्रवार बिहान १० बजेदेखि दिउसो १ बजेसम्म तथा संध्याकालिन काउटर दिउसो २ः०० बजेदेखि बेलुका ५ बजेसम्म सञ्चालन हुने क्यापिटलले जनाएकाे छ । बैंकले सेवाग्राहीहरुको व्यस्ततालाई मध्येनजर राख्दै यो सेवा सञ्चालनमा ल्याएको हो । यो सेवाले कामकाजी सेवाग्राहीहरु तथा व्यस्त समयमा सेवा लिन असुविधा हुने सेवाग्राहीहरुलाई विषेश उपयोगी हुनेछ ।
वर्ल्डकपमा सबैभन्दा बढी भविष्य बाणी मिलाएका मान्नधरले पाए ४३ इन्चको टिभी
काठमाडौं । वर्ल्ड कप गेमहरुमा सबैभन्दा बढी भविष्य बाणी मिलाएका बनेपाका राज मान्नधरले ४३ इन्चको टिभी पाएका छन् । कम्पनीले मिनभवनमा रहेको आफ्ना ब्राण्ड शोरुममा एक कार्यक्रम आयोजना गरी उक्त टिभी मान्नधरलाई हस्तान्तरण गरेको हो । एलजीले वल्र्डकपको अवसरमा सञ्चालन गरेको प्रिडिक्ट एण्ड वाइन क्यामपिङ मार्फत ४ जना विक्ली बम्पर लक्की ड्र विजेतालाई ४३ इन्चको स्मार्ट टिभी. प्रदान गरेको थियो । कम्पनीले गत असार महिनाभर सञ्चालन रहेको वर्ल्ड कप अफरमा टिभी खरिदमा भारी छुट दिएको थियो ।
सम्पति शुद्धिकरणः ३३.५ करोडका तीन मुद्धा, २ करोड ९५ लाख विभागकाे जित
काठमाडौं । सम्पत्ति शुद्धिकरण विभागले गत बर्षमा ३३ करोड ५० लाख रुपैंयाँ बिगो दावी सहित ३ वटा मुद्धा दर्ता गरेको छ । बिभागका सूचना अधिकृत बिनोद लामिछानेका अनुसार विभागले गत आर्थिक बर्षमा ३ वटा मुद्धा दायर गरेकोमा २ वटा मुद्धा जितेको छ । विभागले पुर्व सांसद सञ्जय शाह विरुद्ध ३२ करोड ५० लाख विगो दावीसहित बिशेष अदालतमा मुद्धा दायर गरेको छ । त्यस्तै, दिनेश खड्का विरुद्ध ४२ लाख ५० हजार र गुट्टुकुमार विरुद्ध ४० लाख रुपैयाँ बिगो दावीसहित मुद्धा हालेको हो । विभागले गत आर्थिक बर्षमा पुराना २ वटा मुद्धा जितेर २ करोड ९५ लाख ५० हजार रुपैंयाँ बिगो असुल गराउने फैसला गराउन सफल भएको हो । विभागले बालु जगन्नाथ घोङको विरुद्धको मुद्धा जितेको थियो । सो मुद्धा वापत २ करोड १९ लाख रुपैंयाँ असुल गर्ने फैसाला बिशेष अदालतले गरेको थियो । त्यस्तै, बलराम प्रसाद गुप्तासँग ७३ लाख ५० हजार रुपैंयाँ असुल्ने पर्ने फैसला पनि बिशेष अदालतले गरेको थियो । सम्पति सुद्धिकरण सम्बन्धी अन्तराष्ट्रिय मान्यताहरुमा प्रतिवद्धता जनाईसकेको नेपालको सन २०२०/२१ सालमा म्युचुअल इभ्यालुएसन हुँदैछ । सो इभ्यालुएसनपछि नेपालले पनि सम्पत्ति सुद्धिकरणमा अत्याधिक चनाखो हुनुपर्ने लामिछानेले बताए । उनले श्रोत नखुलेको सम्पति र कालोधनमा फरक हुने बताउँदै श्रोत नखुलेको सम्पति विभागको कार्यक्षेत्रमा नपर्ने स्पष्ट पारे । विभागले आपराधिक गतिबिधी, लागु औषध कारोबार, आतंककारी गतिबिधीबाट आर्जन भएको कालोधनको अनुसन्धान गर्ने उनले स्पष्ट पारे । यस्तै विभागले ४ जना चिनियाँ नागरिकलाई सम्पत्ति शुद्धिकरण विषयमा एक साताभित्र हाजिर हुन बोलाएको छ । चीनका लु बाउइ, लिउ चुनकुन, मा जियाओङ र उ पोलाई बोलाएको विभागले जानकारी दिएको छ । विभागले उजुरी परेको भन्दै यसको छानविनका लागि उजुरी परेकाले आउन भनेको हो । तोकिएको समयभित्र हाजिर नभए कानून बमोजिम कारवाही हुने विभागले चेतावनी दिएको छ ।
सिद्धार्थ बैंकको नाफा ३४ प्रतिशतले बढेर १८५ करोड, २१.८६ प्रतिशत लाभांश ?
काठमाडौं । सिद्धार्थ बैंकले आफ्नो नाफा ३४.०५ प्रतिशतले बढाएको छ । बैंकले गत आर्थिक बर्ष २०७४।७५ मा आफ्नो नाफा ४७ करोडले बढाएर एक अर्ब ८५ करोड नाफा आर्जन गर्न सफल भएको हो । जुन अघिल्लो आर्थिक बर्ष २०७३।७४ मा एक अर्ब ३८ करोड नाफा कमाउन सफल भएको थियो । नयाँ लेखा प्रणाली एनएफआरएस अनुसार सार्वजनिक गरिएको अपरिष्कृत वित्तीय विवरण अनुसार बैंकले १ खर्ब १ अर्ब निक्षेप संकलन गरेको छ जुन अघिल्लो बर्षको भन्दा २४ अर्बले बढी हो । बैंकले आव २०७३।७४ मा ७७ अर्ब निक्षेप संकलन गर्न सफल भएको थियो । सिद्धार्थले ३ अर्ब ५४ करोड खुद ब्याज आम्दानी गर्दा खुद नाफा २ अर्ब ४५ करोड आर्जन गरेको हो । बैंकको वितरण योग्य नाफा भने १ अर्ब ८५ करोड मात्रै हुन आउँछ । बैंकको खराब कर्जा १.०५ प्रतिशत छ । सिद्धार्थको प्रति सेयर आम्दानी ३४.१६ रुपैंयाँ रहेको छ । बैंकले २१.८६ प्रतिशत लाभांश दिन सक्नेछ देखिन्छ ।
बुहारी भगाएर गुरु न्यौपानेको सम्पत्ति हत्याउने प्रयास, डिभोर्ससँगै आधा सम्पत्ति मागिन् पुजाले
काठमाडौं । जलविद्युत, बैंक, रियलस्टेट लगायतका क्षेत्रमा व्यवसाय गर्दै आएका गुरुप्रसाद न्यौपानेको सम्पत्तिमा तेस्रो पक्षले पनि आँखा गाडेको छ । काठमाडौंको व्यापारमा फ्लप खाएपछि अष्ट्रेलियामा बसोबास गर्दै आएका किरणमान जोशीमाथि न्यौपानेको सम्पत्ति हत्याउने प्रयास गरेकाे आरोप लागेको छ । न्यौपानेको आधा सम्पत्ति हत्याउने योजनासहित जोशीले गुरु न्यौपानेकी जेठी बुहारी पुजा दाहालसँग साँठगाँठ मिलाएको बताइएको छ । जोशीसँग प्रेम सम्बन्ध प्रगाढ भएपछि दाहालले सतिश न्यौपानेसँग सम्बन्ध विच्छेद मागेकी छिन् । उनले दुई छाेरा र अाफ्नाे लागि कानुन अनुसार सम्पत्तिको माग गर्दै जिल्ला अदालत काठमाडौंमा मुद्दा दायर गरेकी छिन् । गुरु न्यौपानेको दुई छोरा मध्ये सतिश जेठा छोरा हुन् । सतिश र पुजाबीच १८ वर्षअघि परम्परागत शैलीमा विवाह भएको थियो । उनीहरुबाट जन्मिएको जुम्लिया २ छोराहरु छन् । दुबै छाेरा पुजाले अष्ट्रेलिया लगेकी छिन् । ठूलो जिम्मेवारी: ठूलै घात जानकारहरुका अनुसार कडा स्वभावकी पुजा र नरम स्वभावका सतिशबीच बेलाबखत विवाद हुँदै आएको थियो । राम्रो पढाई, खरो स्वभाव र मिल्दो कार्यशैली भएकाले छोरा-बुहारीको विवादमा गुरुले बुहारीलाई साथ दिने गरेका थिए । पुजाले पनि घरका अन्य सदस्यलाई होच्याएर व्यवहार गर्दै आएकी थिइन भने ससुरालाइ धेरै माया गर्थिन् । कम्पनीमा पनि त्यस्तै थियो । लामो समय न्यौपानेको लगानी रहेका कम्पनीमा काम गरेका एक जना पूर्वकर्मचारीले भने–‘पुजा कर्मचारीप्रति अति रुखो रुपमा प्रस्तुत हुन्थिन तर ससुरालाइ माया गर्थिन । पुजाले ससुरालाई गर्ने व्यवहार बनावटी र चाकडी शैलीको देखिन्थ्यो ।’ नेपाल इन्जियिरिङ क्याम्पसबाट सिभिल इन्जिनियरिङ, काठमाडौं विश्वविद्यालयबाट इएमबीए गरेकी पुजा दाहालप्रति गुरुले पनि धेरै विश्वास गर्दथे । उनले बुहारीलाई अरुण भ्याली हाइड्रोपावर लिमिटेड, सिद्धकालि पावर लिमिटेड, मकालु डेभलपर्स लिमिटेड, कंचङजंगा हाउजिङ लिमिटेड, लगायत कम्पनीमा सञ्चालक बनाएका थिए । ७२ मेगावाट क्षमताको जलविद्युत आयोजना बनाउदै गरेको सिद्धकालि पावर लिमिटेडमा बुहारी पुजालाई प्रमुख कार्यकारी अधिकृतको जिम्मेवारीमा समेत दिएका थिए । सबै कम्पनीबाट पद मुक्त पुजा दाहालको फेसबुक प्रोफाइलमा उनी पब्लिक कम्पनीहरुको सञ्चालक तथा प्रबन्ध निर्देशक छिन् । उनले तिनै कम्पनीको सेयर अर्थात श्रीमान सतिश न्यौपाने तथा ससुरा गुरुप्रसाद न्यौपानेको सम्पत्ति दावी गरेर मुद्दा हालेकी छिन् । यसले ती कम्पनीको व्यवस्थापन र सेयर स्वामित्वमा विवाद ल्याउने देखिन्छ । यस विषयमा कुरा गर्दै पुजाले विकासन्युजसँग भनिन्–‘मैले सबै कम्पनीबाट राजीनामा दिएको छु र कम्पनीहरुले मेरो राजीनामा स्वीकृत गरिसकेका छन् ।’ दाहालले श्रीमान सतिश न्यौपानेसँग सम्बन्ध विच्छेद गर्न र कानुन अनुसार मानापाथि भराईदिन माग गर्दै गत फागुन २० गते जिल्ला अदालतमा मुद्दा दायर गरेकी हुन् । सम्बन्ध विच्छेद गर्नु पर्ने कारण के थियो ? विकासन्युजको प्रश्नमा पुजाले टेलिफाेन सम्बादमा भनिन्–यो मेरो निजी मामिला हो ।’ पुजाको पक्षमा वकालत गर्दै आएका बरिष्ठ अधिवक्ता डा. सुरेन्द्र भण्डारीले पनि सम्बन्ध विच्छेदको कारणबारे बताउन मानेन् । ‘क्लाइन्टको सेक्रेसीको कुरा आउँछ । मेरो प्रोफेशनल इथिक्सले पनि भन्न मिल्दैन’ भण्डारीले भने । पुजाले आफूलाई धोका दिएको, डिभोर्स माग्नुपूर्व ठूलो सम्पत्ति नोक्सान गराएको र अदालतमा डिभोर्स माग्दै सम्पत्ति पनि माग गरेकोले आफू पीडित बन्न पुगेको सतिशले बताए । को हुन् किरणमान जोशी किरणमान जोशी काठमाडौंका रैथाने नेवार हुन् । उनको पहिलो विवाह डा. सुन्दरमणि दिक्षीतको छोरीसँग भएको थियो । त्यो विवाह अन्तरजातीय प्रेम विवाह थियो । स्रोतका अनुसार जोशी र दिक्षितबीचकाे दाम्पत्य जीवन लामो समय टिकेन । दुई छोरा जन्माएपछि जोशी र दिक्षित बीचको सम्बन्ध विच्छेद भएको छ । छोराहरु हाल रातो वंगला स्कूलमा पढ्छन् । जोशीले पाटनको धनाढ्य दिक्षित परिवारसँग नाता जोडेर ठूलो आर्थिक लाभ लिएका थिए । भनिन्छ अर्काको धनले कोही ठूलो हुँदैन । ससुराली जति धनी भएपनि उनी व्यापारमा सफल भएनन् । पछिल्लो समय शेर्पा महलमा खोलेको रेष्टुरेन्ट व्यापार पनि फ्लप खाएपछि जोशी विरक्तिएर विदेशीएका थिए । अष्ट्रेलियामा बसेर उनले जनता बैंकको विजनेश पार्टनर तथा पछिल्लो समय व्यवसायमा जम्दै गएको गुरु न्यौपानेको बुहारी भगाउन सफल भएका छन् । न्यौपाने र जोशी दुबै जनता बैंकका प्रवद्र्धक हुन् । स्रोतका अनुसार जोशी र दाहालबीचको प्रेम सम्बन्ध पहिले देखिनै टुसाएको थियो । पछिल्लो समय पुजा दाहाल पीएचडी गर्ने भनेर बारम्बार अष्ट्रेलिया पुग्थिन र लामो समय उतै बिताउँथिन् । सतिशसँगको सम्बन्ध विच्छेदपछि दुबै जना विवाह गर्न राजी भएको बताइएको छ । तर यो विवाद जिल्ला अदालत, उच्च अदालत र सर्वोच्च अदालत पुगेर अन्तिम टुङ्गोमा पुग्न ५/७ वर्ष लाग्ने एक बरिष्ठ अधिबक्ताले बताए ।
