सिप्रदीले ल्यायो युवालक्षित योजना, १२ लाखमै टाटा सुमो दिने
काठमाडौँ । सिप्रदी ट्रेडिङ प्राइभेट लिमिटेडले आइतबारदेखि युवालाई लक्षित गरि निःशुल्क तालिम र रुटको व्यवस्था सहितको टाटा सुमोगोल्ड जिप नेपाली बजारमा ल्याएको छ । सिप्रदीले ड्राइभिङ र मेकानिकल तालिम, सुलभ फाइनान्स, १ वर्षको बीमाको सुबिधा दिने भएको छ । सुरुमा १२ लाख रुपैयाँ बुझाएपछि सुमो दिने जनाएको छ । टाटा मोटर्सको नेपालका लागि एक मात्र आधिकारिक बिक्रेता सिप्रदीले आफ्नो गाडी आफै सवारी नामक व्यबसायिक अभियान सुरु गरेको हो । सो अभियानमा सहभागी हुनेलाई सस्तो दरमा पुँजीको पनि ब्यवस्था गरिदिने भएको छ । यसले स्वदेशमा नै रोजगारीको सृजना गर्न सिप्रदीकाे भनाइ छ । राजनबाबु श्रेष्ठ, प्रमुख कार्यकारी अधिकृत, सिप्रदी ट्रेडिङ प्रा. लि. सिप्रदीका प्रमुख कार्यकारी अधिकृत (सीईओ) राजनबाबु श्रेष्ठले नेपालीलाई विदेश जान रोक्न र विदेशबाट आएकाले पनि सो अभियानमा भाग लिएर मासिक १ लाख रुपैयाँसम्म कमाउन सकुन भन्ने उद्धेश्यले अभियान सुरु गरेको बताए । यो अभियानमा २०० भन्दा धेरै सहभागी गराउने लक्ष्य रहेको उनले जानकारी दिए । सो अभियानमा कम्पनीले पत्रकार रवि लामिछानेलाई ब्राण्ड एम्बेस्डर बनाएको छ । हाल नेपालमा टाटाको ५७ वटा वर्कसप, ४५ वटा सोरुम र २४ वटा मोवाइल भ्यानहरु संचालनमा रहेका छन् । साथै मोवाइल वर्कसप पनि संचालनमा ल्याउदै छ । नेपालमा हाल ७० भन्दा बढि रुटमा ५ हजार टाटा सुमोहरु संचालन भैरहेको छ ।
त्रिशूली–काठमाडौं २२० केभी भूमिगत प्रसारणलाइनको काम ४८ प्रतिशत सकियो
काठमाडौं । नेपालमै पहिलोपटक बनिरहेको भूमिगत विद्युत प्रसारणलाइन निर्माणको काम ४८ प्रतिशत सकिएको छ । त्रिशूली–काठमाडौं २२० केभी डबल सर्किट प्रसारणलाइनको मातातीर्थमा १ हजार ३०९ मिटर भूमिगत लाइन बनाउनु पर्छ । त्यसमध्ये हालसम्म ६३० मिटरको काम सकिएको हो । भूमिगतरुपमा २४ वटा तार राख्न मिल्ने गरी संरचना बनिरहेको छ । ऊर्जा, जलस्रोत तथा सिंचाइ मन्त्री वर्षमान पुन, सचिव अनुपकुमार उपाध्याय, नेपाल विद्युत प्राधिकरणका कार्यकार्य निर्देशक कुलमान घिसिङले आइतबार आयोजनाको स्थलगत निरीक्षण गरी भूमिगत लाईनको सिभिल संरचना निर्माणको बाँकी काम दुई महिनाभित्र सम्पन्न गर्न आयोजना र ठेकेदार कम्पनीलाई निर्देशन दिएका छन् । ठेकेदार कम्पनीले निर्माणमा भइरहेको स्थानीय अवरोध हटाई सुरक्षाको प्रत्याभूति दिइएमा र वन क्षेत्रको समस्या तत्काल समाधान भएमा दुई महिनाभित्र काम सक्ने प्रतिबद्धता जनाइएको छ । निर्माणका लागि अहिले २७० श्रमिक परिचालित छन् । रुख कटानमा समस्या रहेको जानकारी भएपछि मन्त्री पुनले आयोजनास्थलबाटै वन तथा वातावरण मन्त्री शक्तिबहादुर वस्नेतलाई फोन गरी गाँठो फुकाइदिन आग्रह गरेका थिए । ‘स्थानीयलाई मिलाउँछौं, गृह मन्त्रीसँग कुरा भइसकेकाले कार्यस्थलमा सुरक्षा दिन्छौ, रुख कटानमा रहेको समस्या समाधान गछौं’,मन्त्री पुनले भने,‘सिभिल संरचना निर्माणको काम तोकिएको मापदण्ड र गुणस्तरमा दुई महिनाभित्रमा जसरी पनि सक्नु पर्छ ।’ मन्त्रिपरिषद्ले महालक्ष्मी मातातीर्थ सामुदायिक वन उपभोक्ता समिति अन्तर्गत पर्ने ६८२ वटा रुख काट्न स्वीकृति दिएको थियो । तर, अहिले प्रसारणलाइनको रुट केही परिर्तन हुँदा काट्नु पर्ने रुखको संख्या घटेर ३३६वटा पुगेको छ । रुख कटानका स्वीकृतिका लागि फाइन वन विभागका पुगेगको छ । रुखको संख्या घटेकाले स्वीकृतिका लागि पुन पेश गर्नु परेको आयोजनाले जनाएको छ । काट्नु पर्ने रुखमा टाँचा लगाइसकिएको छ । भूमिगत लाइनका लागि सडक खनिएकाले वर्षादको बेला हिलो भएकाले स्थानीयले काममा अवरोध गर्दै आएका छन् । मन्त्री पुनले हिलो बाटोमा ढुंटागिट्टी हाल्दा समस्या समाधान हुने देखिएकाले सोही अनुसार गर्न निर्देशन दिएका छन् । प्रसारण लाइन तत्कालका लागि ६० मेगावाटको माथिल्लो त्रिशूली ३ ए को विद्युत काठमाडौं ल्याउन निर्माण गरिएको हो । माथिल्लो त्रिशूली ३ एको निर्माण आगामी पुसभित्रमा सक्ने लक्ष्य राखिएको छ । त्यसले पनि प्रसारणलाइन सोही अवधिभित्र बनासक्नु दवाव छ । ४५ किलोमिटर प्रसारण लाइनको १४० वटा टावरमध्ये १२७ को जग हालिसकिएको आयोजना प्रमुख फडिन्द्रराज जोशीले जानकारी दिए । यो प्रसारण लाइन आगामि दिनमा त्रिशूली करिडोरमा निर्माण भइरहेका जलविद्युत आयोजनाको विद्युत काठमाडौं ल्याउनसमेत प्रयोग गरिने प्राधिकरणले जनाएको छ । प्रसारणलाइन सरकार तथा प्राधिकरणको लगानी र चिनियाँ एक्जिम बैकको सहुलियतपूर्ण ऋणमा बनिरहेको हो ।
एनसीसी बैंक र प्राईम लाईफ इन्स्योरेन्सबीच बैंकास्योरेन्स सम्झौता
काठमाडौं । नेपाल क्रेडिट एण्ड कमर्स(एनसीसी) बैंक लिमिटेड र प्राईम लाईफ इन्स्योरेन्स कम्पनी लिमिटेडबीच बैंकास्योरेन्स सम्झौता भएको छ । सम्झौता अनुसार एनसीसी बैंकको कर्पोरेट तथा विभिन्न शाखा कार्यालयहरुबाट प्राईम लाईफ इन्स्योरेन्सको पोलिसी बिक्री गरिनेछ । सम्झौतामा एनसीसी बैंकका तर्फबाट प्रमुख कार्यकारी अधिकृत रमेशराज अर्याल र प्राईम लाईफ इन्स्योरेन्सका तर्फबाट प्रमुख कार्यकारी अधिकृत मनोजकुमार भट्टराईले संयुक्त रुपमा हस्ताक्षर गरेका छन् ।
तपाईको दुई पांग्रे सवारी बिग्रियो ? चिन्ता नलिनुस्, अब एक क्लीक मै सबै समस्या समाधान
काठमाडौं । के तपाई आफ्नो दुई पांग्रे सवारी बिग्रेर चिन्तामा हुनुहुन्छ ? चिन्ता नलिनुस्, अब एक क्लीक मै दुई पांग्रेका सबै समस्याहरु समाधान हुनेछन् । अब ‘थर्ड ह्वील नेपाल’ले नै सबै समस्याको समाधान गर्नेछ । थर्ड ह्वील नेपालले भर्खरै दुई पांग्रे सवारी साधन प्रयोगकर्ताका लागि नयाँ ‘थर्ड ह्वील नेपाल’ नामक मोबाईल एप्स सार्वजनिक गरेको छ । जसमा आफ्नो जानकारी अनि सवारी साधनको विवरणहरू दर्ता गराएपछि चाहिएको समयमा थर्ड ह्वीलमा केवल एक बटन र क्लीक मात्र गरेपछि दुई पांग्रेका सबै समस्या समाधान हुने कम्पनीले जनाएको छ । एप्सले दुई पांग्रे सवारीमा आएका विभिन्न समस्यालाई समाधान गर्न सहयोग गर्नेछ । इम्याट आइटीले सवारी साधन प्रयोगकर्ताका लागि मर्मत, सर्बिसिङ तथा पाटपूर्जाका लागि उक्त एप्स बजारमा ल्याएको हो । थर्ड ह्विल नेपालका अरूण कुमार राउतले भने, ‘मध्यमबर्गीय आर्थिक स्तर भएका अधिकांश नेपालीहरु दुई पाँग्रे सवारीसाधनमा निर्भर रहेका छौं, यसको मर्मत, संभार लगायत आकस्मिक समय अनि डोहोर्याएर बनाउने ठाँउसम्म लिएर जाँदा हाम्रो धेरै समय अनि मेहनत खर्च हुने गर्दछ ।’ साथै, उनले यस्तो अवस्थामा थर्ड ह्वील अर्थात तेश्रो चक्का, दुई पांग्रे सवारीसाधन धनी नेपालीहरुका लागि यस एप्स एउटा बरदान सावित हुने बताएका छन् । सर्भिसिङ या अन्य केही बाइकको मर्मत चाहिएमा घर या कार्यलयबाटै बाइक मर्मतका तेस्रो पांग्रामार्फत लागि पठाउन सकिने कम्पनीले बताएको छ । समयमै गुणस्तरीय सेवालाई प्रमुख आधार बनाएर निर्माण गरिएको यस एप्सले दैनिक जीवनमा सहज र परिवर्तन ल्याउने कम्पनीको दाबी छ । कसरी सेवा लिने? सबैभन्दा पहिले प्ले स्टोर र एप स्टोरमा गएर ThirdWheelNepal एप्स डाउनलोड गर्ने । त्यसपछि दिइएको फारम भर्नुपर्ने छ । जसमा आफ्नो बाइक नम्बर दर्ता गर्नुपर्छ त्यसपछि मात्रै सेवा लिन सकिने कम्पनीले जनाएको छ । अथवा यसको वेवसाइटबाट पनि सेवा लिन सकिन्छ ।
सन नेपाल लाइफद्धारा बिमितलाई ३ लाख रुपैयाँको चेक हस्तान्तरण
काठमाडौं । सन नेपाल लाइफ इन्स्योरेन्स कम्पनी लिमिटेडले यस कम्पनीमा बीमा गराएकी बिमित गिता नेपालीको श्रीमान रमेश नेपालीलाई बिमाङ्क बराबरको रकम ३ लाख रुपैयाँको चेक हस्तान्तरण गरेको छ । कम्पनीले बिमित गिताको यही असार १३ गते हृदयघातको कारण मृत्यू भएकोे हुनाले मृतकको श्रीमान रमेश नेपालीलाई सो बराबरको चेक हस्तान्तरण गरेको हो । उक्त चेक कम्पनीका महाप्रबन्धक कमलराज गौतम तथा ब्राण्ड एम्बेसडर एबं सामाजिक अभियन्ता सिताराम कट्टेल (धुर्मुस)ले हस्तान्तरण गरेका हुन् । मृतक नेपालीले गत २०७४ फागुन १० गते प्रथम बीमा शुल्क २५ हजार ३७३ रुपैयाँ जम्मा गरेकी थिइन् । कम्पनीले रुकुम उप-शाखाको उद्घाटन गरेको छ । उक्त उप-शाखा उद्घाटन कम्पनीका महाप्रबन्धक गौतम तथा ब्राण्ड एम्बेसडर धुर्मुसले संयूक्त रुपमा गरेका हुन् । त्यसैगरी, कम्पनीले सल्यानमा पनि बीमा जागरण अभियान सम्पन्न गरेको छ । उक्त अभियानमा करिब ३०० जनाको उपस्थिति रहेको कम्पनीले जनाएको छ ।
आगामी वर्ष भारतमै बिजुली छ्यालव्याल हुँदै, नेपालबाट नकिन्ने सम्भावना बढ्यो
काठमाडौं । आगामी वर्षदेखि वर्षादमा बढी भएको बिजुली बेच्ने नेपालले तयारी गरिरहेका बेला भारतमा माग भन्दा आपूर्ति धेरै हुने भएको छ । भारतको केन्द्रीय विद्युत प्राधिकरण (सीईए) ले आगामी वर्ष सन् २०१८/०१९ मा बिजुली माग भन्दा बढी आपूर्ति हुने देखाएको हो । प्राधिकरणका अनुसार न्युनतम २.५ देखि अधिकतम ४.६ प्रतिशत बढी बिजुली आपूर्ति हुनेछ । प्राधिकरणले आगामी वर्ष बिजुली बढी आपूर्ति हुने संकेत देखाएको फाइनान्सियल एक्सप्रेसले जनाएको छ । यता नेपालमा ४५६ मेगावाट क्षमताको माथिल्लो तामाकोसी आयोजना सञ्चालनमा आएपछि वर्षादमा बिजुली बढी हुने र सुख्खामा कम हुने प्रक्षेपण नेपाल विद्युत प्राधिकरणले गरेको छ । वर्षादमा बढी भएको बिजुली भारतलाई बेचेर सुख्खामा आयात गर्नका लागि ऊर्जा बैंक अवधारणा कार्यान्वयनका लागि दुई देशबीच हाल छलफल चलिरहेका छ । छलफल चलिरहेका बेला भारतमै बिजुली बढी हुने प्रतिवेदन सार्वजनिक भएपछि नेपालको बिजुली बेच्ने योजना असफल हुने संकेत देखिएको हो । गत आर्थिक वर्षको सुख्खायाममा विद्युत प्राधिकरणले भारतबाट ५०० मेगावाटसम्म बिजुली आयात गरिसकेको छ । यो वर्ष माथिल्लो तामाकोसीलगायत साना ठुला गरी एक दर्जन आयोजना सम्पन्न भई प्रणालीमा ७५४ मेगावाट बिजुली थप हुने अनुमान गरिएको छ । भारतको केन्द्रीय प्राधिकरणले गत वर्ष नै बिजुली बचत हुने प्रक्षेपण गरेको थियो । तर यो वर्ष बिजुली पिक पावर २.१ र समग्रमा ०.७ प्रतिशत कम हुने भएको छ । तर आगामी वर्ष बढी हुने प्राधिकरणको माग र आपूर्ति सन्तुलन प्रतिवेदनले देखाएको हो । भारतमा जडित क्षमता बढेर ३ लाख ४४ हजार मेगावाट अर्थात ३४४ गिगावाट पुग्ने अनुमान त्यहाँको केन्द्रीय विद्युत प्राधिकरणको छ । यस्तै माग भने १ लाख ७० हजार मेगावाट मात्र अर्थात १७० गिगावाट मात्र हुने प्राधिकरणले जानकारी दिएको छ । प्रतिवेदनका अनुसार भारतको पश्चिममा १.९, उत्तरमा १४.८, उत्तरपूर्वि क्षेत्रमा २२.९ प्रतिशत बिजुली बढी हुनेछ । यद्यपी दक्षिणी र पुर्वी क्षेत्रमा ऊर्जाको अभाव क्रमशः ४.२ र ०.७ प्रतिशत हुने छ । यी दुई क्षेत्रमा कम भएपनि अन्य क्षेत्रमा बढी हुने देखिएको हो । २०१८/०१९ मा भारतमा बिजुली १३ खर्ब ९८ अर्ब ७० करोड युनिट बिजुली आपूर्ति हुने छ । यो आपूर्ति जलविद्युत, खनिज इन्धन, कोइला र आणविक ऊर्जाबाट पूर्ति हुने छ । कोइलाबाट मात्रै १० खर्ब ४ अर्ब ४२ करोड युनिट बिजुली उत्पादन हुने छ ।
दुई वर्षदेखि ढुवानी नगर्दा पेट्रोलमा कालोबजारी, उपभोक्ता चर्को मूल्य तिर्न बाध्य
काठमाडौं । बैतडी जिल्लामा पेट्रोलमा कालोबजारी बढेको छ । जिल्लाको सतबाँझस्थित एक मात्र ‘भण्डारी आयल स्टोर’ले दुई वर्षदेखि पेट्रोल ढुवानी नगरेका कारण कलोबजारी बढेको हो । उपभोक्ता पेट्रोलको चर्को मूल्य तिर्न बाध्य छन् । प्रतिलिटर रु १०४ पर्ने पेट्रोल जिल्लाका उपभोक्ताले १३५ रुपैयाँ देखि १५० रुपैयाँ सम्ममा खरिद गर्दै आएका छन् । “चर्को मूल्य तिरेर पेट्रोल किन्न बाध्य छौँ,” जिल्ला स्वास्थ्य कार्यालयका स्वास्थ्य सहायक सन्तोष पाण्डेले भने । सीमावर्ती भारतीय बजार झुलाघाट तथा छिमेकी जिल्ला डडेल्धुराबाट पेट्रोल खरिद गर्नुपरिरहेको उनले बताए । अभाव हुँदा उपभोक्ता महँगो र मिसावट गरिएको पेट्रोल किन्न बाध्य छन् । दुई वर्षयता उपभोक्ताले चर्को मूल्यमा पेट्रोल किन्नु परिरहेको दशरथचन्द नगरपालिका–१ का अमरबहादुर टेर बताउँछन् । उनले भने, “सधैँ महँगोमा पेट्रोल किन्न बाध्य छौँ, सम्बन्धित निकाय मौन छ ।” सतबाँझ तथा गोठलापानी बजारका विभिन्न पसलबाट पेट्रोलको कालोबजारी भइरहेको छ । घाटा भएपछि पेट्रोल ढुवानी गर्न बन्द गरेको भण्डारी आयल स्टोरका सञ्चालक लालबहादुर भण्डारीले बताए । पेट्रोलमा भइरहेको कालोबजारीका बारेमा सम्बन्धित पक्षसँग छलफल गरिने प्रमुख जिल्ला अधिकारी चन्द्रप्रकाश गैरेले बताए । यसैबीच पेट्रोलमा भइरहेको कालोबजारीविरुद्ध आइतबार(आज) सतबाँझदेखि गोठलापानीसम्म मोटरसाइकल ¥याली निकालिएको छ । रासस
आगामी वर्ष माउन्टेन हाइड्रोको नाफा ८२.८८ प्रतिशत बढ्ने, लगानीकर्ताले कति पाउने छन् लाभांश ?
काठमाडौं । निजी लगानीमा प्रवद्र्धित माउन्टेन हाइड्रो नेपाल लिमिटेडले आउँदो आर्थिक वर्षमा नाफा ८२.८८ प्रतिशत बढ्ने प्रक्षेपण गरेको छ । कम्पनीले साधारण सेयर (आईपीओ) निष्कासन प्रयोजनका लागि सार्वजनिक गरेको वित्तीय विवरणमा आगामी आर्थिक वर्ष ०७६/०७७ मा नाफा बढेर ६ करोड २२ लाख रुपैयाँ पुग्ने अनुमान गरेको छ । गत आर्थिक वर्षमा २ करोड ३ लाख रुपैयाँ नोक्सानमा गएको कम्पनी चालु आर्थिक वर्षमा ३ करोड ४० लाख रुपैयाँ खुदनाफा गर्ने लक्ष्य लिएको छ । नाफामा भएको वृद्धिसंगै कम्पनीको प्रतिसेयर नेटवर्थ बढेर १०४ रुपैयाँ र प्रतिसेयर आम्दानी (ईपीएस) ५ रुपैयाँ पुग्ने अनुमान गरिएको छ । आगामी वर्ष कम्पनीले बिजुली बिक्रीबाट ५८ करोड १७ लाख रुपैयाँ आम्दानी गर्ने छ । चालु आर्थिक वर्षमा ५६ करोड ४९ करोड रुपैयाँ पुग्ने अनुमान गरिएको छ । २१.६ मेगावाटको तल्लो हेवाखोला आयोजना बनाउन ३ अर्ब ९५ करोड २९ लाख रुपैयाँ खर्च हुने अनुमान गरिएको छ । यसको लागत प्रतिमेगावाट १८ करोड ३० लाख रुपैयाँ पुग्ने अनुमान गरिएको छ । यो सस्तो लागत हो । आयोजना सञ्चालनमा आएको ८ वर्षमा लगानी फिर्ता हुने अनुमान गरिएको छ । आयोजना बाट प्राप्त हुने आयमा पहिलो १० वर्ष आयकर छुट प्राप्त भएको हुँदा लाभांशको दर बढी रहेको कम्पनीले जानकारी दिएको छ । अायाेजनाबाट असाेजदेखि बिजुली उत्पादन थाल्ने छ , सेञ्चुरी कमर्शियल बैंकको अगुवाइमा एक दर्जन बैंकले आयोजनामा २ अर्ब ६३ करोड ७५ लाख रुपैयाँ ऋण लगानी गरेका छन् । माउन्टेनले असार २२ गतेदेखि १२ करोड ५० लाख रुपैयाँ बराबरको १२ लाख ५० हजार कित्ता आईपीओ निष्कासन गरेको छ । आयोजना प्रभावितलाई छुट्टाइएको मध्ये ७ करोड ५० लाख रुपैयाँ बराबरको ७ लाख ५० हजार कित्ता पाँचथरको फिदिम नगरपालिका र हिलिहाङ गाउँपालिकाका लागि छुट्टाइएको छ । यस्तै ५ करोड रुपैयाँ बराबरको ५ लाख कित्ता आईपीओ पाँचथरका अन्य क्षेत्रका स्थानीयबासिन्दालाई निष्कासन गरिएको निष्कासन तथा बिक्री प्रवन्धक सिद्धार्थ क्यापिटल लिमिटेडले जनाएको छ । आयोजनामा ८० प्रतिशत संस्थापक र २० प्रतिशत सर्वसाधारणको लगानी हुने छ । १० प्रतिशत आयोजना प्रभावित स्थानीयबासिन्दा र १० प्रतिशत सर्वसाधारणलाई आईपीओ निष्कासन गर्ने कम्पनीले जनाएको छ ।
