नेपाल बङ्गलादेश बैंकबाटै सुर्य लाईफको इन्स्योरेन्स सेवा पाइने
काठमाडौं । अब नेपाल बङ्गलादेश बैंक लिमिटेडबाटै सुर्य लाईफ इन्स्योरेन्सको बीमा सेवा पाइने भएको छ । सोमबार दुई संस्थाबीच बैंकास्योरेन्स सेवा सम्बन्धि सम्झौता भएको छ । उक्त सम्झौतामा बैंकको तर्फबाट बैकका प्रमुख कार्यकारी अधिकृत ज्ञानेन्द्रप्रसाद ढुंगाना तथा इन्स्योरेन्सका तर्फबाट प्रमुख कार्यकारी अधिकृत शिवनाथ पाण्डेले हस्ताक्षर गरेका थिए । यस सम्झौता पश्चात बैंकका ग्राहकहरुले बैंकको जुनसुकै शाखाहरुबाट सजिलै जीवन बीमा लेख प्राप्त गर्न, प्रिमियम भुक्तानी गर्न, दावी भुक्तानी लगायत सम्पूर्ण बीमा सेवा प्राप्त गर्न सक्नेछन् ।
तीन महिनामा ५ अर्ब ७६ करोडको बोनस सेयर दर्ता, १ अर्ब ८८ करोडको आईपीओ जारी गर्न अनुमति
काठमाडौं । चालु आर्थिक वर्षको पहिलो तीन महिनामा नेपाल धितोपत्र बोर्डले १७ वटा संस्थाहरुकोे ५ अर्ब ७६ करोड रुपैयाँ बराबरको बोनस सेयर दर्ता गरेको छ । जुन अघिल्लो आवको सोही अवधिको तुलनामा संख्यात्मक हिसाबले ८८.८९ प्रतिशत तथा रकमको हिसाबले ५४३.५४ प्रतिशत बढि हो । बोर्डका अनुसार आर्थिक वर्षको प्रथम त्रैमाससम्ममा जम्मा २५ वटा संगठित संस्थाहरुले प्रारम्भिक सार्वजनिक निष्काशन (आईपीओ) को अनुमतिका लागि बोर्डमा पेश गरेको निवेदन अनुमतिको प्रकृयामा रहेका थिए । निवेदन दिएका मध्ये ३ वटा जलविद्युत कम्पनीहरु र १ वटा लघुवित्त वित्तीय संस्था गरी जम्मा ४ वटा संगठित संस्थाहरुलाई १ अर्ब ८८ करोड रुपैयाँ बराबरको आईपीओ निष्काशन गर्न अनुमति प्रदान गरिएको छ । आईपीओ अनुमतिको प्रकृयामा रहेका मध्ये १० वटा संगठित संस्थाको निवेदन प्रारम्भिक पूनरावलोकनको प्रकृयामा रहेका छन् । जसमा २ वटा संस्थालाई आवश्यक थप कागजात पेश गर्न सूचित गरिएको छ भने प्रकृयामा रहेका ४ वटा लघुवित्त वित्तीय संस्थाहरुलाई आईपिओ निष्काशन गर्न सूचित गरिएको बोर्डले जनाएको छ । त्यस्तै, प्रकृयामा रहेका मध्ये गर्जाङ उपत्यका हाइड्रो पावर लि., लाफिङ्ग बुद्ध पावर नेपाल लि. र यूनिक हाइडेल कम्पनी लि.लाई आवश्यक कागजात तथा प्रकृया पूरा गर्न सूचित गरिएको बोर्डले बताएको छ । यस आवको पहिलो त्रैमासमा मात्र ११ वटा संगठित संस्थाले आईपीओको अनुमतिका लागि बोर्डमा निवेदन पेश गरेका छन् । गत आवको सोही अवधिमा जम्मा १९ वटा संगठित संस्थाहरुको निवेदन आईपिओ अनुमतिको प्रकृयामा रहेका थिए । गत आ.ब. को सोही अवधिमा जम्मा १ वटा कम्पनीलाई १ करोड ८० लाख रुपैयाँ बराबरको आईपीओ निष्काशन अनुमति प्रदान गरिएको थियो । सोही अवधिको तुलनामा चालु आवको पहिलो त्रैमासमा आईपीओ अनुमतिको संख्या र रकम दुवैमा उल्लेख्य वृद्धि भएको बोर्डले जानकारी दिएको छ । यस अवधिमा २ वटा संगठित संस्थाले हकप्रद सेयर निष्काशन गर्न निवेदन पेश गरेको समेत गरी जम्मा ११ वटा संगठित संस्थाहरुको निवेदन प्रकृयामा रहेका थिए । गत आवको सोही अवधिसम्ममा जम्मा ३१ वटा संगठित संस्थाहरुको हकप्रद सेयर निष्काशन अनुमति सम्बन्धी निवेदन प्रकृयामा रहेका थिए । बोर्डका अनुसार यस आवको पहिलो त्रैमासमा हकप्रद निष्काशनको संख्या तथा रकममा कमी आएको छ । अधिकांश बैंक तथा वित्तीय संस्थाहरुले नेपाल राष्ट्र बैंकले तोकेको न्यूनतम चुक्ता पूँजी पुर्याइसकेको देखिएकोले हकप्रद शेयर निष्काशनमा कमी आएको बोर्डले जनाएको छ । प्रकृयामा रहेका मध्ये यस अवधिमा ३ वटा लघुवित्त वित्तीय संस्थाहरुलाई १६ करोड ९० लाख रुपैयाँ बराबरको हकप्रद सेयर निष्काशन गर्न अनुमति प्रदान गरिएको छ । गत आवको सोही अवधिमा जम्मा १४ वटा कम्पनीलाई ५ अर्ब ९८ करोड रुपैयाँ बराबरको हकप्रद निष्काशन अनुमति प्रदान गरिएको थियो । त्यस्तै, यस अवधिमा बोर्डले २ वटा संगठित संस्थालाई ३ अर्ब ८३ करोड रुपैयाँ बराबरको ऋणपत्र सार्वजनिक निष्काशन गर्न समेत अनुमति प्रदान गरेको छ ।
अपर तामाकोशीको आइपीओमा ६ अर्ब बढीको आवेदन, सवा तीन लाखले भरे सेयर
काठमाडौं । अपर तामाकोशी हाइड्रोपावर लिमिटेडको आइपीओमा ६ अर्ब बढीको आवेदन परेको छ । सोमबार ५ बजेसम्ममा ३ लाख १७ हजार भन्दा बढि आवेदकहरुले ६ अर्ब भन्दा बढीको आवेदन दिएको कम्पनीका प्रमुख कार्यकारी अधिकृत विज्ञान श्रेष्ठले विकासन्युजलाई जानकारी दिए । श्रेष्ठका अनुसार बैंक तथा वित्तिय संस्थाहरुले लिएको अफलाइन फारमहरुका आवेदन समेत जोड्दा आवेदकको संख्या र रकम समेत वृद्धि हुन सक्नेछ । बैंक तथा वित्तिय संस्थाहरुले सोमबार राति १२ बजेसम्म आफुले संकलन गरेका अफलाइन आवेदनहरुको तथ्यांक अद्यावधिक गर्न सक्ने पनि उनले जानकारी दिए । कम्पनीले कात्तिक १५ गते बिहिबारदेखि १९ गते सोमबारसम्म एक करोड ५८ लाख ८५ हजार कित्ता आइपीओ जारी गरेको थियो । स्थानीयबासिन्दाका लागि कम्पनीले १ अर्ब ५ करोड ९० लाख बराबरको १ करोड ५ लाख ९० हजार कित्ता आईपीओ निष्कासन गरिसकेको छ । आयोजनाले यसअघि नै सञ्चय कोषका सञ्चयकर्ता र स्थानीयबासी समेत गरी ५ लाख भन्दा बढीलाई २४ प्रतिशत आईपीओ निष्कासन गरिसकेको छ ।
राराको कलात्मक सुन्दरता हेर्नुहोस् तस्बिरमा
मुगु । ‘कर्णाली रारा पर्यटन वर्ष २०७५ प्रधानमन्त्री केपी ओली शर्माले उद्घाटन गरेसँगै रारा पुग्ने आन्तरिक तथा बाह्य पर्यटकमा बृद्धि हुँदै गएको छ । अहिले रारामा दैनिक १ सय जिप १० वटा बस, ३ सय मोटरसाइकल र हवाइमार्गबाट समेत रारा अवलोकन गर्ने पर्यटकको संख्या बढिरहेको छ । नेपालकै सबैभन्दा ठूलो ताल यस्तो देखियो तस्बिरमा बिहानीपख देखिने रारा तालको दृश्यः निलो आकाश कन्चन तालको पानी र हरीयो घना वन । समयसगैं रङ फेर्दै स्वर्गकी अप्सरा रारा । रारा तालको विशेषता के छ भने यसको रङ छिनछिनमा परिर्वतन हुने गर्छ । रारा राष्ट्रिय निकुन्ज नजिकै घोडा चढेर रमाउँदै बाल घोडा चालकः रारा ताल नजिकै व्यावसायीक प्रयोजनका लागी त्यहाका स्थानीयले घोडा राखेका हुन्छन् । मुगुको लेकमा भेडा चराउँदै भेडी गोठालो । रारा ताल माथि देखिने सुन्दर छायाँनाथ हिमालः छायाँनाथ हिमाल कर्णाली बासीको धार्मिक आस्थाको केन्द्रको रूपमा रहेको छ । यहाँ वर्षमा धेरै संख्यामा भक्तजनहरू आफ्नो मनोकामना लिएर पुजापाठ गर्न जाने र त्यहां पुजा गरे छायाँनाथले आफ्नो मनोकामना पुरा गरिदिने जनविश्वास रहेको छ । सफा मौसममा लोभ लाग्दो राराको दृश्य । मुगुको सदरमुकामः गमगढी बजारमा परेको घामको पहिलो झुल्को ।
विद्या सुन्दर शाक्यको दुखेसोः मेलम्चीले धुलो पार्यो, १६ सय कर्मचारीले सफाई गरेनन्
काठमाडौं । काठमाडौं महानगरपालिकाका मेयर विद्या सुन्दर शाक्यले मेलम्ची खानेपानी आयोजनाका कारण धुले बढेको तर आफुलाई गाली गरिएको भन्दै आपक्ति जनाएका छन् । ‘हामीले काठमाडौंलाई धुलोमुक्त बनाउँछौं भनेका थियौं । मेलम्चीले आफ्नो काम तत्काल सम्पन्न नगर्दा त्यसको प्रत्यक्ष असर काठमाडौं महानगरलाई परिरहेको छ ।’, शाक्यले भने । काठमाडौंलाई स्वच्छ, धुवाँ र धुलोमुक्त सहर बनाउनको लागि महानगरले जेट र ब्रुमरजस्ता आवश्यक उपकरण खरिद भैसकेको जनाउँदै उनले भने,‘अहिले ५ वटा ब्रुमर आउने प्रक्रियामा छन् । अहिले मासिक २५ करोड रुपैयाँ सफाईका कर्मचारीको लागि खर्च भैरहेको छ । तर, पनि काठमाडौं सफा भैरहेको छैन् ।’ उनका अनुसार महानगपालिकासँग हाल एक हजार ६ जना फोहोरसम्बन्धी कर्मचारीहरु छन् तर उनीहरुले राम्रोसँग काम नगरेकाले पनि सरसफाईमा सुधार नभएको आरोप पनि लगाए । उनले फोहर संकलन हटाएर ब्रुमरको संख्या बढाउने तयारी भैरहेको पनि जानकारी दिए । काठमाडौंका विभिन्न सडकहरुमा फोहोर थुप्रिँदा यसबारेमा काठमाडौंको मेयर र महानगरपालिकालाई भन्नु स्वभाविक भएको उल्लेख गर्दै उनले भने,‘जो सँग आश छ, जसलाई विश्वास गरिन्छ, उसैले भन्ने हो । तर, काठमाडौं महानगरपालिकाले आफ्नो मात्रै हाईन, प्रदेश र संघीय सरकारको पनि काम गरिरहेको छ । उहाँहरुले गर्नुपर्ने दायित्व पूरा गरिरहेका छौं । अहिले सिसडोलमा काठमाडौं महानगरपालिकाको मात्रै होईन, काठमाडौं जिल्लाको १८ वटा नगरपालिकाहरुको फोहोर जान्छ । काभ्रेको फोहोर त्यहाँ जान्छ। धादिङको फोहोर त्यहाँ जान्छ । के सबैको जिम्मेवारी काठमाडौं महानगरपालिकाको मेयरको हो र ? होईन नि। तर, नहुँदा नहुँदैपनि काठमाडौं महानगरपालिका पूरानो र धार्मिक सोच भएको सहर, राजनीतिक सहर भएको नाताले प्रदेश र संघीय सरकारले गर्नुपर्ने काम हामीले गर्दै आईरहेका छौं ।’ सम्बन्धित मन्त्रालयका सचिवहरुसँग लामो छलफलपछि बञ्चरे डाँडो कसले बनाउने ? सेन्ट्रल ल्याण्डफिल्ड कसले बनाउने ? भन्नेबारे टुँगो लागिसकेको पनि उनले जनाए । उनले भने,‘त्यसको लागि हामीले तीन वटा निर्णय गरेका छौं । पहिलो निर्णय भनेको बञ्चरे डाँडो नै अन्तिम गन्तव्य हो । सिसडोलमा अहिले हामी फोहोर फाल्न सक्दैनौं । बढिमा तीन महिनापछि अब त्यो फोहोर बञ्चरे डाँडोमा लैजानुपर्छ । त्यसको लागि चाहिने बाटो, पूर्वाधारहरु नेपाल सरकारले बनाउनुपर्छ भनेर हामीले भनेका थियौं । अहिले धमाधम डिपिआरको काम भैरहेको छ ।’ त्यस्तै उनले तीन पिप्लेदेखि बञ्चरे डाँडासम्मको सडक कसले बनाउने भन्नेबारे पनि आफूहरुले छलफल गरिसकेको बताए । उनले भने,‘कमसेकम अब यो बाटो दुई लेनको बनाउनुपर्छ । यसबारेमा पनि हामीले निर्णय लिईसकेका छौं । यो बनाउने जिम्मा पनि संघीय सरकारले लिईसकेको छ । अर्को भनेको बालाजुदेखि तिनपिप्लेसम्मको पासाङ ल्हामु राजमार्ग बनाउने कुरा हो । अब कार्यान्वयन सुरु हुन्छ ।’ काठमाडौंमा मोनोरेल चलाएरै छाड्ने प्रतिवद्धता त्यस्तै उनले मोनो रेल चलाउनेबारे सम्भाव्यता अध्ययन पूरा भैसकेको र अहिले प्राविधिक अध्ययनको काम जारी रहेको बताए । उनले भने,‘नेपालमा मोनो रेल विज्ञ कोही छैनन् । हामीले बुट मोडलमा बनाउने तयारी गरेका छौं ।’ मेयर शाक्यले आफू मेयरमा निर्वाचित भएर काम सुरु गरेको यो डेढ वर्षको अवधिमा धेरै काम सम्पन्न गरिसकेको स्पष्ट पारेका छन् । उनले भने,‘म मेयर भएको अहिले १७ महिना पूरा भएर १८ महिना लाग्यो । यो अवधिमा हामीले धेरै कुराहरु सिकेका छौं । हिजोभन्दा आज धेरै कामहरु भएका छन् । यथार्थ धरातलमा रहेर समिक्षा गर्नुपर्छ ।’ पूर्ननिर्माण सम्बन्धी कामहरुमा सम्पदा पूर्ननिर्माणको २/४ वटा कामहरु बाँकी रहेको सुनाए ।
मालिकाले छाप्यो ३० हजार स्मार्ट लाइसेन्स्, प्राविधिक समस्याले छपाइमा ढिलाई
काठमाडौं । स्मार्ट लाइसेन्स छपाईको जिम्मा पाएको मालिका इन्कर्पोरेट लिमिटेडले ३० हजार लाइसेन्स् छापेको छ । गत असोजदेखि छपाई सुरु गरेको लिमीटेडले एक महिना बित्न लाग्दा ३० हजार मात्रै लाइसेन्स छापेकाे हो । मन्त्रिपरिषदले नै लाइसेन्स छपाइ गर्ने जिम्मा निजी क्षेत्रलाई दिने निर्णय गरेपछि कार्पोरेटले लाइसेन्स छपाई सुरु गरेको हो । यातायात व्यवस्था विभागले कार्पोरेटसँग ४५ दिनभित्र ५ लाख स्मार्ट लाइसेन्स् छाप्ने गरी सहमति गरेको छ । तर प्राविधिक समस्या देखिएपछि लाइसेन्समा समस्या देखिएको हो । भारतबाट प्राविधिकहरु ल्याएर काम भैरहेको कार्पोरेटका निर्देशक सुरेन्द्र ढकालले बताए । हामीले हालसम्म ३० हजार कार्ड छपाइ गरेका छौं, डाटा उपलब्ध नहँुदा हामीसँग रहेको मेसिनले पुर्ण क्षमतामा काम गर्न सकेका छैनौं ढकालले विकासन्युजसँग भने प्राविधिक समस्या हटेपछि केहि छिटो गतिमा छपाई हुनेछ । ढकालले छापिएको लाइसेन्सस् केहि दिनमै विभागलाई दिने तयारी भैरहेको बताए । विभागले छरितो रुपमा लाइसेन्स छाप्न नसकेपछि मालिका इन्कर्पोरेट लिमिटेडलाई जिम्मा दिएको हो । पाँच लाख बढी सेवाग्राहीले हाल परीक्षा उत्तीर्ण गरी अनुमति पत्र लिन प्रतीक्षा सूचीमा बसेको विभागका प्रवक्ता गोर्कण उपाध्यायले जानकारी दिए। कार्ड छापेवापत कम्पनीले एउटा बराबर रु १५ पाउँनेछ । कार्ड, विद्युत लगायत भौतिक साधन भने विभागले नै उपलब्ध गराउनेछ । कम्पनीले कार्ड विभागको मीनभवनस्थित कार्यालयमै छापिरहेको छ । विभागका अनुसार सबैभन्दा धेरै मोटरसाइकल परिक्षा पास गर्ने कार्ड प्रिन्ट गर्न बाँकी रहेको छ ।
सिटिजन्स बैंकद्धारा ज्येष्ठ नागरिकलाई भोजनकाे प्रबन्ध
काठमाडौं । सटिजन्स बैंक इन्टरनेसनल लिमिटेडले राजधानीको मीनभवन स्थित निःसहाय सेवा सदन, ज्येष्ठ नागरिक आवास गृहका ४० वृद्धवृद्धालाई भोजनको प्रबन्ध गरेको छ । बैंकले स्थापनाकाल देखिनै उक्त आवास गृहमा रहेका ज्येष्ठ नागरिकलाई भोजनको प्रबन्ध गर्दै आएको छ । यसैको निरन्तरता स्वरूप यस वर्ष पनि बैंकले उक्त कार्यक्रम संचालन गरेको हो । बैंकले देखाएको यस अग्रसरताले ज्येष्ठ नागरिकको हेरचाहमा टेवा पुग्ने धारणा बैंकले लिएको छ । निकट भविष्यमा बैंकले संस्थागत सामाजिक उत्तरदायित्व कार्यक्रम अन्तर्गत सामाजिक, आर्थिक, सांस्कृतिक, शैक्षिक आदि जस्ता क्षेत्रमा सकारात्मक परिवर्तन ल्याउनका निम्ति विभिन्न कार्यक्रम संचालन गर्ने कुरा बैंकले जानकारी दिएको छ ।
एनआईसी एशियाले फेरि ल्यायो ‘चमत्कारीक बचत खाता’, मौज्दातमा सुन तथा चाँदी उपहार
काठमाडौं । एनआईसी एशिया बैंकले शुभ दिपावलीको पावन अवसरमा नेपाली नारीहरुको लागि फेरी “चमत्कारीक बचत खाता” योजना संचालनमा ल्याएको छ । बैंकले सुन तथा चाँदीको उपहारहरु सहित चमत्कारीक विशेषताहरु भएको उक्त बचत खाता संचालनमा ल्याएको हो । यस योजना अन्तर्गत ग्राहकले ७ प्रतिशत वार्षिक ब्याज पाउने छन् । त्यस्तै, न्युनतम मौज्दात एक हजार रुपैयाँ, दैनिक न्यूनतम मौज्दातको आधारमा त्रैमासिक ब्याज भूक्तानी लगायत वार्षिक औसत मौज्दातको आधारमा सुन तथा चाँदी उपहार रहेको यस योजनाको विशेष विशेषता हो । साथै, अनलाइनबाटै शुन्य मौज्दातमा खाता खोल्न सकिने छ । उपहारहरु: १.१० ग्राम चाँदीको सिक्काः यस बचत खाता खोलेपछि ग्राहकहरुको आफ्नो खातामा न्युनतम वार्षिक औसत मौज्दात एक लाख रुपैयाँ भएमा १० ग्राम चाँदीको सिक्का बैंकको तर्फबाट उपहार स्वरुप पाउन सक्नेछन् । २. २५ ग्राम चाँदीको सिक्का: यस बचत खाता खोले पछि ग्राहकहरुको आफ्नो खातामा न्युनतम वार्षिक औसत मौज्दात दुई लाख रुपैयाँ भएमा २५ ग्राम चाँदीको सिक्का बैंकको तर्फबाट उपहार स्वरुप पाउन सक्नेछन् । ३. २.५ ग्राम सुनको सिक्का: यस बचत खाता खोलेपछि ग्राहकहरुको आफ्नो खातामा न्युनतम वार्षिक औसत मौज्दात १५ लाख रुपैयाँ भएमा २.५ ग्राम सुनको सिक्का बैंकको तर्फबाट उपहार स्वरुप पाउन सक्नेछन् । ४. ५ ग्राम सुनको सिक्का: यस बचत खाता खोलेपछि ग्राहकहरुको आफ्नो खातामा न्युनतम वार्षिक औसत मौज्दात ३० लाख रुपैयाँ भएमा ५ ग्राम सुनको सिक्का बैंकको तर्फबाट उपहार स्वरुप पाउन सक्नेछन् ।
