वित्तीय क्षेत्रकाे समस्या समाधान गर्ने समितिमा दुर्इ लगानीकर्ता संघकाे प्रतिनिधित्व
काठमाडौं । मुद्रा बजार र पुँजी बजारको विषयमा अध्ययन गर्न गत साता गठन गरिएको उच्चस्तरीय अध्ययन समितिमा सरकारले लगानीकर्तासम्बद्ध दुर्इ संघका प्रतिनिधिलार्इ समावेश गरेकाे छ । नेपाल इन्भेष्टर्स फोरम र पुँजीबजार लगानीकर्ता संघका प्रतिनिधिलाई उक्त समितिमा राखेको हाे । अर्थमन्त्री डा. युवराज खतिवडाले नेपाल राष्ट्र बैंकका डेपुटी गभर्नर शिवराज श्रेष्ठको संयोजकत्वमा धितोपत्र बोर्डका अध्यक्ष, अर्थमन्त्रालयका सहसचिव, बैंकर्स संघका अध्यक्ष, दुर्इ लगानीकर्ताको प्रतिनिधि रहने एक अध्ययन समिति गठन गरेका थिए । उक्त समितिमा लगानीकर्ताको तर्फबाट फोरमका अध्यक्ष अम्बिका प्रसाद पौडेल र पुँजीबजार लगानीकर्ता संघका तर्फबाट अध्यक्ष राधा पाेखरेलले प्रतिनिधित्व गर्ने भएका छन् । उक्त समितिमा लगानीकर्ताको प्रतिनिधि कसरी छनौट गर्ने भन्ने विवाद थियो । हाल अम्बिका प्रसाद पौडेल अध्यक्ष भएको नेपाल इन्भेष्टर फोरम, उत्तम अर्याल अध्यक्ष भएको सेयर लगानीकर्ता संघ, राधा पोखरेल अध्यक्ष भएको पुँजी बजार लगानीकर्ता संघ दर्ता भईका संस्था सक्रिय छन् । साथै दर्ता नभएको तर संगठित रुपमा दवाव समूहको रुपमा काम गर्ने अन्य समूह पनि सक्रिय रहेका छन् । सरकारले दुर्इ लगानीकर्ता संघकाे प्रतिनिधित्व सुनिश्चित गरे पनि अाफुहरुलार्इ वास्ता नगरेपछि शेयर लगानीकर्ता संघ सरकारसँग असन्तुष्ट भएकाे छ। सेयर लगानीकर्ता संघको उपाध्यक्ष ताराप्रसाद फुल्लेलले सरकारी निर्णयको आलोचना गरे । ‘कानुनी रुपमा सक्रिय सबै संस्थाको प्रतिनिधि रहेको समितिले मात्र समस्यामा समाधान गर्न सक्छ । उक्त समितिमा हाम्रो पनि प्रतिनिधित्व हुनुपर्छ’ फुल्लेलले भने ।
सन नेपाल लाइफद्धारा १० लाखको मृत्यु दावी भुक्तानी
काठमाडौं । सन नेपाल लाइफ इन्स्योरेन्स कम्पनीले १० लाख रुपैयाँ बराबरको मृत्यु दावी भुक्तानी गरेको छ । कम्पनीले बीमित स्वःश्याम सुन्दर महतोको बीमा गरेको २ महिना ६ दिनमै मृत्यु भएकोले निजको श्रीमती पवित्री देवीलाई सो रकमको चेक हस्तान्तरण गरेको हो । मृतक महतोले ९४ हजार ३३६ रुपैयाँको बीमा शुल्क भुक्तानी गरि जीवन बीमा गरेका थिए । साथै, कम्पनीले बर्दिवासमा बीमा जागरण अभियान गरेको छ । कम्पनीले मंसिर २३ र २४ गते सिन्धुली र महोत्तरी जिल्लामा स्थानीय र अभिकर्ताहरुको उपस्थितीमा बृहत बीमा जागरण कार्यक्रम सम्पन्न गरेको जनाएको छ । स्थानिय निकायका जनप्रतिनिधि, आम सर्वसाधारण र अभिकर्ताहरुको बाक्लो उपस्थिती रहेको उक्त कार्यक्रममा महाप्रबन्धक कमलराज गौतमले जीवन बीमाको महत्व तथा लाभका बारेमा प्रकाश पारेका थिए ।
स्वीस नेपाल प्रविधि हस्तान्तरण कार्यशाला आयोजना हुँदै, विजेताले २ हजार डलर पाउने
काठमाडौं । स्वीजरल्यान्डमा अध्ययनरत तथा कार्यरत नेपाली विद्यार्थी एवं पेशाकर्मीहरूको संस्था नेपालिज साइन्टिफिक एसोसियसन इन स्वीजरल्यान्ड (नेपसास)ले ‘स्वीस नेपाल प्रविधि हस्तान्तरण कार्यशाला–२०१९’को आयोजना गर्दैछ । यो नेपालमा आयोजना गरिएको यस्तो प्रविधि हस्तान्तरणसम्बन्धी तेस्रो संस्करण हो । संस्थाले युवाहरूमाझ विज्ञान तथा प्रविधिमा आधारित उद्यम (स्टार्टअप)हरू प्रबद्र्धन गर्दै आइरहेको छ । नेपसासले हालको प्रतिभा पलायन (ब्रेन ड्रेन)लाई दिगो र समृद्ध प्रतिभा प्राप्तिमा बदलिने लक्ष्य राखेको छ । यो लक्ष्य प्राप्तिका लागि संस्थाले युवालाई त्यस्ता विज्ञता हासिल गरेका व्यक्तिहरू जो अनुभवी परामर्शकर्ता/गुरुका रूपमा योगदान दिन इच्छुक हुन्छ, उहाँहरूसँग सम्पर्क गराउने मञ्चहरू उपलब्ध गराउँदै आइरहेको नेपसासका अध्यक्ष रञ्जन मिश्र बताउँछन् । यस्तो किसिमको मञ्चमध्ये स्वीस नेपाल प्रविधि हस्तान्तरण कार्यशाला एक हो । सन् २०१७ देखि नेपसासले स्थानीय चुनौती र अवसरहरूलाई सम्बोधन गर्दै सम्भाव्य नवउद्यम (स्टार्टअप)मा परिणत गर्ने वैज्ञानिक अवधारणाहरूलाई सहयोग गर्न काठमाडौंमा वार्षिक कार्यशालाको आयोजना गर्दै आएको छ । दुई कार्यशालाहरूको सफल आयोजनापछि नेपसासले गेट कलेजको आतिथ्यमा २०७५ पुस १५ देखि १९ गतेसम्म ९२९ डिसेम्बर २०१८–३ जनवरी २०१९० सम्म तेस्रो ‘स्वीस नेपाल प्रविधि हस्तान्तरण कार्यशाला’ आयोजना गर्दैछ । यस कार्यशालामा सहभागिताका मंसिर २९ गतेसम्ममा आवेदन गर्न सकिने छ भने यो आवेदकहरूका लागि निःशुल्क छ । “हामी काठमाडौं उपत्यकाभन्दा बाहिरका सहभागीहरूलाई सहयोगका लागि यातायात वृत्तिसमेत उपलब्ध गराउने छौँ,” अध्यक्ष मिश्रले भने। कार्यशालामा सहभागिताका लागि ५० सहभागीहरूको चयन गरिनेछ । सबै सहभागीहरूलाई विभिन्न समूहमा बाँडिनेछ, जसले प्रथम स्थानका लागि एकअर्कासँग प्रतिष्पर्धा गर्नेछन् । विजेताहरूलाई २ हजार अमेरिकी डलरको नगद पुरस्कार प्रदान गरिनेछ । “हामी हाम्रो कार्यशालामा ५०–५० प्रतिशतको लैङ्गिक समानता र विविधता कायम रहोस् भन्ने कुरामा प्रतिबद्ध छौं तथा महिला एवं सीमान्तकृत समुदायबाट आवेदनका लागि प्रोत्साहित गर्दछौं,’ नेपसासले भनेको छ । चार दिने कार्यशालामध्ये पहिलो दिन पुस १४ गते कार्यशाला आरम्भका साथै आवश्यक जानकारी प्रवाह गरिनेछ । दोस्रो र तेस्रो दिन सहभागीहरूको समूहगत प्रस्तुतिका साथै उनीहरूले तयार पारेको व्यावसायिक योजना र नमुना प्रस्तुत गर्ने तथा तिनमा सुधार गर्ने र आकार प्रदान गर्ने काम हुनेछ । चौथो दिन सहभागी समूहरूले निर्णायकहरूसमक्ष आफ्नो अन्तिम कार्ययोजना प्रस्तुत गर्नुपर्नेछ, निर्णायकमा शैक्षिक क्षेत्र एवं औद्योगिक–व्यावासायिक क्षेत्र दुवैतर्फ विज्ञहरू सहभागी रहने छन् । निर्णयहरूले प्रस्तुत अवधारणाको प्रभाव, नव–आविष्कारका मौलिकता र उद्यमशीलता क्षमताका आधारमा विजेता समूह घोषणा गर्नेछन् । विगतका सहभागीहरू यस्ता नवउद्यम (स्टार्टअप) र नव–आविष्कारका राष्ट्रिय एवं अन्तर्राष्ट्रिय प्रतिष्पर्धाहरूमा भाग लिन गइसकेका छन् । उदाहरणका लागि सन् २०१८ को कार्यशालका विजेताहरूले ‘वल्र्ड इनोभेसन फोरम’मा नेपाललाई प्रतिनिधित्व गर्नुका साथै प्रतियोगिताका विजेतासमेत बने । उनीहरूले नेपालस्थित स्विजरल्यान्डको राजदूतावासद्वारा १२ लाख रुपैयाँको अनुदानसमेत प्राप्त गरे । कार्यशालाको विशिष्ट पक्षमा परामर्श कार्यक्रम रहेको छ, जुन कार्यशालापछि पनि सहभागीहरूलाई निरन्तर आफ्नो लक्ष्य हासिल गर्न सक्षम बनाउने गरि परिकल्पना गरिएको छ । यस वर्ष नेपालका लागि स्वीजरल्यान्डकी राजदूत महामहिम एलिजावेथ भन कापलर, हाम्रा परामर्शकर्ता (मेन्टर)हरूमध्ये एक रहनु भएको छ । यस वर्षदेखि नेपसासले कार्यशालामा प्रस्तुत गरिने उत्कृष्ट अवधारणाहरूका लागि वर्षभरिकै परामर्श, सँगै कार्य गर्ने स्थल र बीज पुँजी प्रदान गर्ने लक्ष्य राखेको छ । आवश्यक परेको समयमा उत्कृष्ट अवधारणाले आन्स्टाइनले अध्ययन गरेको विश्वविद्यालय स्वीस फेडरल इन्स्टिच्यूटका इनोभेसन सेन्टरहरूमा पहुँच पाउने व्यवस्था गरिएको छ । विजेता अवधारणले गत वर्षजस्तै ‘वल्र्ड इनोभेसन फोरम’मा नेपाललाई प्रतिनिधित्व गर्नेछ । यस कार्यशालामा स्वीस फेडरल इन्स्टिच्युट अफ टेक्नोलोजीका जैविक विज्ञान (सेल बायोलोजी र बायोकेमेस्ट्री)का प्राध्यापक म्याथिस पिटर, वल्र्ड इनोभेसन फोरमका प्रमुख कार्यकारी अधिकृत एक्सेल स्कल्जलगायतका विश्वभरिका प्रमुख वक्ताहरूले सम्बोधन गर्नेछन् । कार्यशालाले खानपिन, चिया–कफी ब्रेक र अन्य यस्तै समयमा आफ्नो सम्पर्क सञ्जाल विस्तारका अवसर पनि प्रदान गर्नेछ ।
कांग्रेसको आर्थिक नीति केन्द्रीय कार्यसमितिको बैठकबाट पारित
काठमाडौं । नेपाली कांग्रसको केन्द्रीय कार्यसमितिको बैठकले सहमहामन्त्री डा. प्रकाशशरण महत संंयोजक रहेको समग्र आर्थिक नीति प्रस्ताव समितिको प्रस्ताव सुझाव समेत समेटेर पारित गरेको छ । डा. महतको प्रस्तावमा केन्द्रीय सदस्यहरुले आफ्नो धारणा राखेका थिए । केन्द्रीय सदस्यहरुको सुझावलाई समेटेर प्रस्ताव पारित भएको सहमहामन्त्री एंव समितिका संयोजक डा. महतले जानकारी दिए । यो प्रस्ताव कांग्रेसको महासमितिको मंसिर २८ गतेबाट सुरु हुने बैठकमा प्रस्तुत हुनेछ । प्रारम्भिक मस्यौदा केहि साता अघि पत्रकार सम्मेलन गरेर सार्वजनिक गरिएको थियो ।
पोखरा फाइनान्सको १ दिने निःशुल्क स्वास्थ्य शिविर सम्पन्न
पोखरा । पोखरा फाइनान्स लिमिटेडले संस्थागत सामाजिक उत्तरदायित्व अन्तर्गत कास्कीको घान्द्रुकस्थित मेश्रम बराह मा.वि.को प्राड्डणमा १ दिने निःशुल्क स्वास्थ्य शिविर कार्यक्रम सम्पन्न गरेको छ । फाइनान्सले हिमालय आँखा अस्पताल, घारीपाटन पोखरा तथा मेधा कार्डियो केयर स्वास्थ्य क्लिनिक, नयाँ बजार, पोखरा समेतको प्राविधिक सहयोगमा उक्त कार्यक्रमको आयोजना गरेको हो । उक्त शिविरमा सो क्षेत्रका विभिन्न उमेरका करिव २०० व्यक्तिहरुले आँखा, रक्तचाप, मधुमेह आदिको जाँच गराउएकाे छ । साथै विशेषज्ञको सल्लाहमा चस्मा तथा औषधि समेत वितरण गरिएको संस्थाका कार्यकारी प्रमुख रविचन्द्र गुरुङले जानकारी दिए ।
सिद्धार्थ बैंकको नयाँ शाखा योगीकुटीमा
काठमाडौं । सिद्धार्थ बैंक लिमिटेडले रुपन्देहीको योगीकुटीमा नयाँ शाखा कार्यालय सञ्चालनमा ल्याएको छ । यो शाखामार्फत नेपाल सरकार एवं नेपाल राष्ट्र बैंकको निर्णय बमोजिम स्थानीय सरकारको सम्पूर्ण खाता कारोवारको संचालन हुनेछ । बैंकले उक्त क्षेत्रका सर्वसाधारण तथा उद्यमीमाझ सबै प्रकारका निक्षेप तथा कर्जा कारोवार सुविधा, रकम भुक्तानी लगायत सम्पूर्ण बैंकिङ्ग सेवा पुर्याउने उद्देश्यले उक्त शाखा सञ्चालनमा ल्याएको हो । बैंकले अगामी दिनहरुमा पनि थपशाखाहरु विस्तार गर्दै नवीनतम र आधुनिक बैंकिङ्ग सेवा प्रदान गर्ने योजना बनाएको छ । हालै सञ्चालनमा आएको शाखासहित बैंकले १२९ वटा शाखा (३ एक्स्टेन्सन् काउन्टर सहित), ९९ शाखारहित बैंकिङ्ग सेवा, १३५ एटीएम र १,००० भन्दा बढी पीओएस् मेसिनमार्फत् गुणस्तरीय बैैकिङ्ग सेवा प्रदान गर्दै आएको छ ।
निजी निवास बनाउने सोचमा हुनुहुन्छ ? जानुस्, चावहिलको मोडर्न होम बिल्डर्स
काठमाडौं । निजी निवास बनाउने सोच राख्नु भएको छ ? छ भने जानुस् काठमाडौंको चावहिलमा रहेको मोडर्न होम बिल्डर्स प्रा. लि. । निजी निवास बनाउने सोच राख्नेलाई लक्षित गरि खुलेको मोडर्न होम बिल्डर्सले विशेषगरी आवाशीय घरहरु निर्माण गर्नुका साथै पुरानो घरहरु सबलीकरण गर्ने, घरको फिनिशिंग गर्ने तथा उचित परामर्श दिने काम पनि गर्नेछ । नेपालमा अहिले घर निर्माण गर्ने इच्छा भएको तर समय अभावले गर्दा निर्माण कार्य शुरु गर्न नसकेका व्यक्तिहरुलाई यस कम्पनी सहयोगी साबित हुनेछ । उच्च गुणस्तरको निर्माण सामग्री, दक्ष इन्जिनियर र कामदारहरु ले निर्माण कार्य गर्ने हुँदा यस कम्पनीले निर्माण गरेका घरहरु गुणस्तरीय हुने कुरामा ढुक्क हुन यस कम्पनीका प्रबन्ध निर्देशकले देवराज लामाले आग्रह गरेका छन् । बजारमा अहिले विभिन्न निर्माण कम्पनीहरु रहे पनि गुणस्तरीय र विश्वसनीय ढंगमा काम नगर्ने हुँदा निर्माण गरेका घरहरु कमसल हुने विभिन्न समस्याहरु आउनुका साथै समयमा नै निर्माण सम्पन्न गरि हस्तान्तरण नगर्दा समस्या हुने गरेको छ । उक्त समस्यालाई न्युनिकरण गर्दै मोर्डन होम बिल्डर्सले भने आफुले निर्माण गरेको घरहरु उच्च गुणस्तरको मात्र नभएर समयमा नै निर्माण सम्पन्न गरि हस्तान्तरण गर्ने रहेको बताए । नेपालमा अहिले पनि पुरानै ढाँचामा घर निर्माण भैरहेकोमा यस कम्पनीले अत्याधुनिक प्रविधिको विस्तार गर्दै कामदारहरु को सुरक्षालायी समेत बिशेष प्राथमिकतामा राखेर काम गर्ने बताएको छ । कम्पनीले अहिले चलन चल्तीमा रहेको काम गर्ने तरिकालाई समेत परिमार्जन गरि स साना कुराहरुको सुक्ष्म अध्यन गरि संरचना निर्माण गर्ने बताएको छ । सो क्रममा कोहि कसैलै बाधा अबरोध नहुने गरि काम गर्ने प्रतिबद्ता समेत कम्पनीले व्यक्त गरेको छ ।
राजश्व छल्ने ४२ व्यवसायी विरुद्ध ५ अर्ब ७७ करोड दावीसहित अदालतमा मुद्दा
काठमाडौं । राजश्व अनुसन्धान विभागले राजश्व चुहावट गर्ने ४२ फर्महरुका विरुद्ध ५ अर्ब ७७ करोड विगो दावीसहित अदालतमा मुद्दा दायर गरेको छ । विभागले विगत ७ माहिनाको अवधीमा विभिन्न ४२ वटा फर्महरुका विरुद्ध ५ अर्ब ७७ करोड १७ लाख ६ हजार १ सय २६ रुपैंयाँ ४० पैसा विगो दावीसहित विभिन्न अदालतहरुमा मुद्दा दायर गरेको विभागका महानिर्देशक दीर्घराज मैनालीले जानकारी दिए । राजश्व चुहावटकाे मुद्दामा काे काे परे ? मैनालीले विभागको जिम्मेवारी सम्हालेपछि सो मात्रामा विगो दावीसहित मुद्दा दायर गरिएको हो । मैनालीले जेठ ७ गते राजश्व अनुसन्धान विभागको जिम्मेवारी सम्हालेका थिए । विभागले ४२ वटा फर्मसँग ३ अर्ब २७ करोड ५२ लाख ४६ हजार ६ सय ८३ रुपैंयाँ ४० पैसा धरौटी माग गरेको छ । ती फर्महरुले २२ करोड ५७ लाख ९८ हजार १ सय ३९ रुपैंयाँ धरौटी बुझाएका छन् । उनीहरु विरुद्ध ३ बर्षसम्म कैद सजाय माग गरिएको छ । प्रधानमन्त्री केपी ओलीले राजश्व अनुसन्धान विभागलाई प्रधानमन्त्री कार्यालय मातहत ल्याएपछि विभागले आफ्नो काममा तिब्रता दिएको थियो । ७ महिना नपुग्दै विभागले ४२ व्यवसायी विरुद्ध राजश्व अनुसन्धानको मुद्दा हालेको हो । अख्तियार दुरुपयोग अनुसन्धानको प्रवक्ता रहेका मैनालीले विभागको नेतृत्व सम्हालेपछि विभागको सक्रियता बढेको हो ।
