सरकारले भन्यो-जे सुकै भएपनि तोकिएको समयमै मेलम्चीको पानी आउँछ
काठमाडौं । खानेपानी मन्त्रालयले ४५ दिनभित्रै काठमाडौंमा खानेपानी ल्याइपुर्याउने घोषणा गरेको छ । मेलम्ची खानेपानी आयोजना निर्माण गरिरहेको इटालीको सीएमसीले आफ्नो कम्पनी टाट पल्टेको घोषणा गर्दै काम गर्न नसक्ने भनेपछि सिर्जना भएको अन्यौललाई चिर्दै मंगलबार मन्त्रालयले प्रेस विज्ञप्ति प्रकाशित गरेर तोकिएको समयभित्रै खानेपानी काठमाडौं ल्याएर वितरण गरिसक्ने प्रतिवद्धता जनाएको हो । मन्त्रालयले हालकाे ठेकेदार कम्पनी सिएमसीले कामै नगरेकाे अवस्थामा विकल्प खाेजेरै भए पनि समयमा अायाेजना निर्माण सम्पन्न गर्ने दृढता समेत व्यक्त गरेकाे छ । मन्त्रालयले मेलम्ची आयोजनाको ९० प्रतिशत काम सकिएको, मेलम्ची सुन्दरीजलको २७ किलोमिटर सुरुङमार्ग खोलिएको, सुरुङको ढलान र फिनिसिङको काम पनि गरिसकिएको अवस्थामा अब भेन्टिलेसन साफ्ट, हेड वक्र्स, अडिट टनेलको गेट, सेन्सर क्यामेरा जडान लगायतका केही काम मात्र बाँकी रहेको कुनै विशेष परिस्थिति सिर्जना भएको अवस्था बाहेक अन्य अवस्थामा समयमै आयोजना निर्माण हुने प्रष्ट पारेको हो । मन्त्रालयले आयोजनाको निर्माण कार्य अघि बढिरहेकै अवस्थामा ठेकेदार कम्पनीका प्रमुख क्रिस्टियानो ग्रेको लगायतका टोलीले अनुमतिबिना आयोजनास्थलबाट भागेर नेपाल छोड्न लागेको थाहा भएपछि उनीहरुको अवस्था बुझ्न गृह मन्त्रालयलाई आग्रह गरेको र गृहले उनीहरुलाई निगरानीमा राखेको जनाएको छ । मन्त्रालयले पछिल्लो घटनाक्रमले आयोजनाको काम प्रभावित नहुने बताएको छ । मन्त्रालयले सोमबार र मंगलबार दिनभर मेलम्चीका सरोकारवाला पक्षहरुसँग छलफल गरिरहेको र परामर्शदाता कम्पनीलाई एक हप्ताभित्र मेलम्ची आयोजना सुरुङको प्राविधिक विश्लेषणसहितको प्रतिवेदन तयार पारी एक हप्ताभित्र पेश गर्न निर्देशन दिएको समेत जानकारी दिएको छ । राष्ट्रिय गाैरवकाे मेलम्ची आयोजना बनाउन ठेकेदार कम्पनी सिएमसीले २०७० साल असार मसान्तमा ठेक्का पाई ३ वर्षभित्र सम्पन्न गर्ने भने पनि भुकम्प र नाकाबन्दीका कारण आयोजनाकाे निर्माण ढिलाे हुन गएकाे थियाे । वर्तमान् खानेपानीमन्त्री आएपछि आयोजनाकाे काम द्रुततर ढंगले अघि बढिरहेकाे दाबी समेत मन्त्रालयले गरेकाे छ ।
गण्डकी विकास बैंकको १४.२० प्रतिशत नगद लाभांश राष्ट्र बैंकबाट स्वीकृत
काठमाडौं । गण्डकी विकास बैंकको प्रस्तावित १४.२० प्रतिशत नगद लाभांश नेपाल राष्ट्र बैंकबाट स्वीकृत भएको छ । उक्त नगद लाभांशलाई बैंकको आगामी वार्षिक साधारणसभाबाट पारित भएपछि मात्र सेयरधनीहरुमा वितरण हुनेछ । सभाले पारित गरेपछि बैंकले सेयरधनीलार्इ गत आर्थिक वर्षको संचित मुनाफाबाट चुक्ता पुँजीको सो मात्राको नगद लाभांश वितरण गर्ने छ । बैंकले आर्थिक वर्ष २०७५/७६ को प्रथम त्रैमासमा संचालन मुनाफा १५ करोड ३० लाख रुपैयाँ आर्जन गर्न सफल भएको थियो । सोही अवधीसम्म निक्षेप २३ अर्ब ७२ करोड रुपैयाँ र कर्जा तर्फ २१ अर्ब २४ करोड रुपैयाँ पुर्याएको छ । साथै, बैंकको निष्कृय कर्जाको मात्रा अत्यन्तै न्यून रहेको बैंकले जनाएको छ ।
२३ प्रतिशत बोनस घोषणापछि समीट माइक्रो फाइनान्सको सेयर मूल्य १० प्रतिशतले बढ्यो
काठमाडौं । मंगलबार समीट माइक्रोफाइनान्स वित्तीय संस्था लिमिटेडको सेयर मूल्य १० प्रतिशतले बढेको छ । अघिल्लो दिनको तुलनामा संस्थाको सेयर मूल्य ७९ रुपैयाँले बढेर प्रतिकित्ता ८६९ रुपैयाँ पुगेको छ । संस्थाले सेयरधनीलाई चुक्ता पुँजीको २३.५३ प्रतिशत बोनस सेयर दिने भएपछि लगानीकर्ता यस संस्थाको सेयरमा लाभान्वित भएका छन् । हाल संस्थाको चुक्ता पुँजी १७ करोड रुपैयाँ रहेको छ । सो मात्राको बोनस पछि संस्थाको चुक्ता पुँजी २१ करोड रुपैयाँ पुग्ने छ । साथै, संस्थाले बोनस सेयरको कर प्रयोजनको लागि २१ लाख ५ हजार २६३ रुपैयाँ नगद लाभांश वितरण गर्ने प्रस्ताव गरको छ । उक्त प्रस्तावलाई पारित गर्न संस्थाले आगामी पुस २७ गते वार्षिक साधारणसभा बोलाएको छ । उक्त सभा सो दिन बिहान साँढे ८ बजे झापाको बिर्तामोडमा बस्दै छ । सो प्रयोजनको लागि पुस १७ गतेदेखि २७ गतेसम्म संस्थाको बुक क्लोज रहने जानकारी गराएको छ ।
चिडियाखानामा संरक्षित जीवजन्तुको मृत शरीरकाे प्रतिकृति निर्माण गर्दै
काठमाडौं । सदर चिडियाखानाले अवलोकनकर्ताका लागि संरक्षित जीवजन्तुको मृत शरीरको प्रतिकृति बनाएर राख्ने भएको छ । चिडियाखानाका व्यवस्थापक प्रमुख डा चिरञ्जीवी खनालले विभिन्न कारण वा उमेर पुगेका मृत्यु भएका जनावरको प्रतिकृति बनाउने प्रचलन थिएन, यो पहिलो पटक गर्न लागिएको हो । चिडियाखानामा संरक्षित गरी अवलोकनका लागि राखिएका जनावर मरेमा ती जीवजनावरको भित्री भागलाई फालेर छालाको मात्रै प्रयोग गरी प्रतिकृति निर्माण गरिने छ । मृत जनावरको प्रतिकृति बनाउनका लागि स्थान निर्माणको काम भइरहेको छ, केही महीनाभित्र उक्त स्थान निर्माणको काम सम्पन्न हुनेछ । चिडियाखानामा राखिएका जनावर मरेपछि पहिले कस्ता किसिमका जनावर राखिएको थियो भन्ने जानकारी दर्शकले प्रतिकृति मार्फत पाउनेछन् । स्थानको अभाव र सधैँ सबै प्रकारका जनावर नपाउने भएको हुँदा पनि कुन समयमा कुन जनावर सर्वसाधारणका लागि राखिएको थियो, अहिले उक्त जानवर छ कि छैन भन्ने जानकारी अवलोकन कर्तालाई दिनु यसको मुख्य उद्देश्य रहेको चिडियाखानाले जनाएको छ । सबै संरक्षित जीवको प्रतिकृति राख्न नसके पनि मुख्यगरी बाघ, भालु, गैँडा,हात्ती,रेड पाण्डा, वन मान्छे, रिङटेल्ड लिमर, मयुँर डाँफे जस्ता जीव जनावरको प्रतिकृति बनाइने छ । टिकटघर नजीकै तय गरिएको उक्त प्रतिकृति स्थल दर्शकले भित्र प्रवेश गर्ने बित्तिकै देख्न पाउनेछन् । हाल चिडियाखाना ६ हेक्टर क्षेत्रफलमा १२७ प्रजातिका एक हजार दुई १९ जीवजन्तु छन् । केही वर्षअघि ८०० जीवजन्तु रहेको यहाँ गत वर्ष धेरै चरा ल्याइएकाले सङ्ख्या बढेको छ । गत आर्थिक वर्षमा अवलोकनकर्ताबाट रु १४ करोडको आम्दानी गरेको चिडियाखानामा एक लाख स्वदेशी र विदेशी पाहुना जीवजन्तु हेर्न पुगेका थिए । चिडियाखाना अवलोकन गर्न १२ वर्षमुनिकालाई रु ५०, विद्यार्थीलाई रु १००, सर्वसाधारणलाई रु १५०, सार्क राष्ट्रका पाहुनालाई रु २२० र अन्य देशका नागरिकलाई रु ७५० प्रवेश शुल्क तोकिएको छ । अघिल्लो आर्थिक वर्षमा अवलोकन कर्ताबाट रु १२ करोड आम्दानी गरिएको थियो । तत्कालीन प्रधानमन्त्री जुद्धशम्शेर राणाले आफ्नो निजी प्रयोगका लागि निर्माण गरेको उक्त चिडियाखाना तेइस वर्षदेखि राष्ट्रिय प्रकृति संरक्षण कोष अन्तर्गत रही व्यवस्थापन हुँदै आएको छ । अहिले चिडियाखानामा ७५ कर्मचारी कार्यरत रहेका छन् । चिडियाखानाले अहिले जीवजनावरलाई गर्नुपर्ने व्यवहार कस्तो हो भन्ने शिक्षा दिनका लागि ‘जुको साथी’ भन्ने कार्यक्रम शुरु गरेको छ । जसअन्तर्गत काठमाडौँ उपत्यकाका पाँच सय विद्यालयका ८० विद्यार्थीले साथीका रुपमा रही आलोपालो गरी चिडियाखानामा रहेका जीवजनावरलाई खुवाउने र स्याहारसम्भार गर्ने गरेको चिडियाखानाका सूचना अधिकारी लिना चालिसेले बताएका छन् । पछिल्लो समय चिडियाखानाले राति पनि अवलोकन गर्न सक्ने व्यवस्था गरेको छ । राति अवलोकन गर्दा थप मनोरञ्जन लिन सकिने बाघ, भालुजस्ता १४ स्तनधारी जनावरको अवलोकन गर्न अवलोकनकर्ता आउने गरेका छन् । रासस
एनसीसीकाे ७९ लाख कित्ता शेयर लिलामी ११ गतेदेखि, कतिसम्ममा पाइएला ?
काठमाडौं । घट्दो बजार, बढ्दो ब्याजदर र बजार सुधारका लागि भइरहेको आन्दोलनका बीच एनसीसी बैंकले ७९ लाख १० हजार ९ सय ९३ कित्ता शेयर लिलामीमा ल्याउने भएको छ । बैंकले संस्थापक समूहतर्फ ६५ लाख १६ हजार ७ सय ९५ कित्ता र सर्वसाधारण समूहतर्फ १३ लाख ९४ हजार १ सय ९८ कित्ता गरी उक्त परिमाणको शेयर लिलामीमा ल्याउने भएको हो । बैंकको हकप्रद निष्काशन तथा बिक्री प्रबन्धकको रुपमा रहेको सनराइज क्यापिटलले यही पुस ११ गतेदेखि २० गतेसम्म उक्त लिलामी खुल्ला गर्ने भएको छ । उक्त लिलामीका लागि सनराइज क्यापिटलको कमलपोखरीस्थित मुख्य कार्यालय र एनसीसी बैंकका विराटनगर, वीरगञ्ज, बुटवल, पोखरा, नेपालगञ्ज, सुर्खेत, धनगढी, बनेपा, नारायणगढ र बागबजार कार्यालयबाट फर्म प्राप्त गर्न र आवेदन दिनसक्ने व्यवस्था रहेको बताइएको छ । उक्त शेयरका लागि संस्थापकतर्फ न्युनतम १००० कित्ता र साधारणतर्फ न्यूनतम १०० कित्ताका लागि आवेदन दिन सकिन्छ तर १० ले भाग जाने संख्यामा मात्र आवेदन दिनुपर्नेछ भने संस्थापकतर्फ अधिकतम ६५ लाख १६ हजार ७ सय ९५ कित्ता र साधारणतर्फ अधिकतम सीमासम्मकाे शेयरका लागि अावेदन दिन सकिन्छ । संस्थापक शेयर लिन इच्छुकहरुले भने कालोसूचिमा नरहेको प्रमाणपत्र, करचुक्ता प्रमाणपत्र, आयश्रोत विवरण र स्वघोषणा विवरण समेत बुझाउनुपर्ने जनाइएको छ । घट्दो बजारको प्रभाव शेयरमूल्यमा पर्नसक्ने त्रिकोणात्मक समस्याबाट ग्रसित बजारमा लगानीकर्ताहरुको मनोविज्ञान कमजोर हुँदा उक्त शेयरका लागि कममात्र मूल्यमा बोलकबोल हुनसक्ने सम्भावना रहन्छ । गत साउनमा प्रभु बैंक लिमिटेडको शेयर बजारमा १८० रुपैंया हाराहारी हुँदा उक्त शेयरको लिलामीमा १५८ रुपैंयासम्म प्रस्ताव गर्नेले समेत शेयर प्राप्त गरेका थिए । तत्कालै बजारमा आएको सुधार र बैंकको राम्रो वित्तीय विवरणका कारण शेयरमूल्य बढेर २६० भन्दा माथि पुगेको थियो । त्यसैले घट्दो बजारबीच अक्सनको लगानी छोटो समयमै मुनाफादायक समेत हुनसक्छ । यद्यपि यसले बैंकको रिजर्भमा थपिने प्रिमियम मूल्यमा भने असर गर्नसक्छ । तर लिलामी खुल्ने उक्त दिनसम्म बजारमा ठुलाे सुधार भर्इ लगानीकर्ताकाे मनाेबल उच्च भएमा भने अवस्था ठीक त्यस्ताे नहुन पनि सक्छ । वाणिज्य बैंकहरुको ‘अन्तिम’ लिलामी नेपाल राष्ट्र बैंकले तोकेको पुँजी वृद्धिका प्रयोजनका लागि जारी गरिएको हकप्रदमध्ये एनसीसी बैंकको हकप्रद अन्तिम हो र यसर्थमा बैंकको अक्सन समेत अन्तिम हुनेछ । अन्य विविध कारणले बजारमा शेयर लिलामीमा आउन सक्ने भए पनि हकप्रदमा नबिकेको शेयरका लागि यो लीलामी नै अन्तिम लिलामी हुनेछ । अब यति ठूलो परिमाणको शेयर लिलामीमा आउन सम्भवतः अर्को पुँजीवृद्धि योजना नै कुर्नुपर्नेछ ।
सरकारी षड्यन्त्रकाे गन्ध चाल पाएपछि बजार बन्दकाे आह्वान फिर्ता लियाैं : अनशनकारी
काठमाडौं । नेपाल स्टक एक्सचेञ्ज अगाडि आमरण अनसनरत शेयर लगानीकर्ता दबाब समूहका सदस्य सरकारी षड्यन्त्रको शिकार आफूहरु भएपछि आन्दोलनका लागि सडकमा फर्किएको बताएका छन् । आमरण अनसनको दोस्रो दिन मंगलबार विकास न्यूजसँग कुरा गर्दै आमरण अनशनरत तिलक कोइरालाले सरकारले षड्यन्त्र गर्न आफूहरुलाई वार्तामा बोलाएको बताउँदै त्यो थाहा पाउनेबित्तिकै आफूहरु पुनः आन्दोलनका लागि सडकमा आएको दाबी गरे । जुन मागका सम्बन्धमा छलफल गर्ने भनेर हामीलाई बोलाइएको थियो, हाम्रा मागहरुमाथि छलफल नै गर्न चाहेनन्, अर्थमन्त्री खतिवडाले नगर्नु भनेको विषयमा कुरै गर्न नचाहेपछि पूर्वघोषित कार्यक्रमअनुसार आमरण अनसन बसेको भन्दै सरकारको प्रभावमा परेर मिडियाहरुले समेत आफूहरुविरुद्ध लेखेको बताए । ‘हामीले मागेको भनेको बजारका समस्याहरु समाधानका लागि नीतिगत सुधार हो, तर कतिपयले बजार बढाउन आन्दोलन गरेको आरोप हामीमाथि लगाइएको छ ।’ कोइरालाले भने – ‘अहिले बजार घट्नु बजारको कारणले होइन, अहिलेको सरकार र सबै नियामक निकायहरुका प्रमुखहरुको नीति र कर्यशैली हो, त्यसैले हामीले सबै निकायका प्रमुखहरुको राजीनामालाई प्रमुख माग बनाएका हौं ।’ अर्थ मन्त्रालय र नियामक निकायहरुले तीन वर्ष अघि नै गर्छौ भनेर प्रतिवद्धता जनाएका विषयहरु जुन नेतृत्वले चाहेमा तत्कालै वा केही दिनभित्रै हुन सक्छन्, त्यसका लागि हाम्रो दबावपूर्ण अभियान हो, यो आफूहरुको मात्र नभई बजारमा लगानी गर्ने सम्पूर्ण लगानीको आवाज भएको भन्दै अन्य लगानीकर्ता संघका प्रतिनिधिहरु व्यक्तिगत स्वार्थमा अघि बढेको आरोप उनीहरुको आरोप थियो । स्वतस्फुर्त बजार बन्द गर्न अाफुहरुले गरेकाे अाह्वानविरुद्ध सरकारी षड्यन्त्रकाे गन्ध देखिएपछि अाफुहरु साे निर्णय फिर्ता लिएकाे दाबी गरे ।
ब्याजदर वृद्धिकाे पीडाले उपचार पाएन, एकअर्काकाे मुख हेरेर टाेलाउँदै राष्ट्र बैंककाे बैठक समाप्त
काठमाडौं । नेपाल राष्ट्र बैंकको नियमन तथा सुपरीवेक्षण विभागको पहलमा मंगलबार दिउँसो राष्ट्र बैंकका अधिकारीहरू, नेपाल बैंकर्स संघ, डेभलपमेट बैंकर्स एशोसिएशन र नेपाल वित्तीय संस्था संघका अध्यक्षहरु र व्याजदर बढाउने प्रतिस्पर्धामा हाेमिएका बैंकका प्रमुख कायर्कारीकाे बैठक राष्ट्र बैंकमा बस्याे । विषय थियाे निक्षेपकाे बढ्दाे व्याजदर कसरी राेक्ने ? बैंठकमा सबैले आफ्ना धारणा राखे । समस्या सुनाए । समस्याकाे समाधान कसैले दिन सकेनन् । बैठक विना निष्कर्ष सकियाे । बैठकमा सहभागी नेपाल वित्तीय संघका अध्यक्ष सरोजकाजी तुलाधरले चर्काे व्याजदर वित्तिय क्षेत्र जाेखिममा जाने चिन्ता राष्ट्र बैंकका अधिकारीले व्यक्त गरे । व्याजदर वृद्धिकाे प्रतिस्पर्धामा नजान बैंकहरूलार्इ सुझाव दिए । राष्ट्र बैंक वा अर्थमन्त्रालय कसैले पनि व्याजदरकाे सीमा ताेक्न नसक्ने उनीहरूकाे धारणा थियाे । बैंठकमा बैंकहरूले आफ्नाे पीडा सुनाए । सीसीडी रेसियाे ८० प्रतिशत छुन लागेकाे, नयाँ कर्जा लगानी बन्द गरेर बस्नु परेकाे, व्यवसाय वृद्धि ठप्प भएकाे बैंकर्सहरूले बताए । स्राेतका अनुसार राष्ट्र बैंकका अधिकारीहरूले घुमाउराे भाषामा बैकर्स संघलाई विगतमा झै भद्र सहमति गरी व्याजदर वृद्धि राेक्न सुझाव दिए । बैंकर्सहरूले राष्ट्र बैंकले नै व्याजकाे अधिकतम सीमा ताेकिदिए स्थिति सहज हुने भनाई राखे । ‘व्याजदर वृद्धिकाे पीडा सबैले महसुस गरेका छन् तर उपचार हुन सकेकाे छैन । विगतमा झै सबैले पुराना कुरा राखे । एकले अर्काकाे मुख हेर्ने र टाेलाएर बस्ने काम मात्र भयाे’ स्राेतले भन्याे । असर निजी क्षेत्रकाे लगानीमा खुलेकाे पहिलाे र धेरै काेणबाट उदारणीय बन्दै आएकाे नविल बैंकले पनि मंगलबार १३.५ प्रतिशतमा मुद्दती खातामा पैसा राख्न सर्बसाधारणालार्इ व्यवसायिक अपिल गरेकाे छ । उसले निक्षेपकाे व्याज मासिक रूपमा भुक्तानी दिने जनाएकाे छ । नविलले जस्तै हिमालयन, कुमारी, सिभिल लगायत धेरै बैंकले १३.५ प्रतिशत व्याजमा निक्षेप आह्रवान गरेका छन् । वाणिज्य बैंकहरु नै चर्को ब्याजदर प्रतिस्पर्धामा उत्रँदा त्यसको असर विकास बैंक र फाइनान्स कम्पनीहरुमा समेत देखिएको छ । डेभलपमेन्ट बैंकर्स एशोसिएसनका अध्यक्ष गोविन्द ढकालले वाणिज्य बैंकहरुको ब्याजदर प्रतिस्पर्धाका कारण सेफ जोनमा रहेको विकास बैंकको क्षेत्रमा समेत असर गर्न थालेको बताए । ‘विकास बैंकहरुको औसत सीसीडी अनुपात ७४ प्रतिशत थियो, अहिले औसत नै ७८ प्रतिशत छ । केही बैंकहरुको त ७९ प्रतिशत नाघिसकेको छ । यो हाम्रो कर्जा प्रवाहको कारणले नभई बैंकहरुको ब्याज प्रतिस्पर्धाको कारणले भएको हो’– अध्यक्ष ढकालले विकासन्यूजसँग भने । नेपाल वित्तीय संस्था संघले केही दिनअघि नै त्यसअघिको निर्णय पुनर्विचार गरी आफू सम्बद्ध संस्थाहरुमा १३ प्रतिशत ब्याजदरको सीमा निर्धारण गरिसकेको छ । सामान्यतया वाणिज्य बैंकहरुको भन्दा आफूहरुको ब्याजदर उच्च हुने भए पनि ब्याजदर प्रतिस्पर्भाको दौडमा आफूहरु नरहेको सन्देश दिँदै आफ्नो निक्षेप जोगाउन उक्त निर्णयमा पुग्नु परेको संघका अध्यक्ष सरोजकाजी तुलाधारले यसअघि नै बताएका छन् । चर्को ब्याजदरकाबीच वाणिज्य बैंक सम्बद्ध बैंकरहरु पनि सन्तुष्ठ भने छैनन् । नेपाल राष्ट्र बैंकले यस्तो अवस्था समाधानका लागि छिट्टै एक्सनमा उत्रियोस भन्ने चाहेका थिए । तर केन्द्रीय बैंक हस्तक्षेपकारी भूमिकाबाट पन्छिएपछि अब अरु बैंकहरुका लागि पनि ब्याजदर प्रतिस्पर्धाको विकल्प बाँकी नरहने अवस्था देखिन्छ । ‘राष्ट्र बैंकले पहलकदमी भूमिका खेल्छ भन्नेमा विश्वस्त थियौं, अघिल्लो हप्ता राष्ट्र बैंकले समिति गठन गरेका छौं, एक हप्ता कुर्नुहोस् भनेको थियो र हामी चुप लागेर बसेका थियौं, दिनप्रतिदिन निक्षेप घट्दो छ, निक्षेप जोगाउनकै लागि भए पनि अब ब्याजदर बढाउन बाध्य छौं’, एक बैंकरले भने ।
बैंकिङ व्याजदर वृद्धिको असर नेप्सेमा, सेयर बजार पुनः करेक्सनको बाटोमा
काठमाडौं । साताको दुई दिन निरन्तर दोहोरो अंकले बढेको बजार मंगलबार दोहोरो अंकले घटेर पुनः करेक्सनको बाटोतर्फ लागेको छ । मंगलबारकाे नेप्से परिसूचक १४.६१ अंकले घटेर ११६८.१७ अंकमा झरेको छ । बैंक तथा वित्तीय संस्थाहरुले बढाएको निक्षेप व्याजदरका कारण सेयर बजार घटेको जानकारहरु बताउँछन् । बैंकहरुले मासिक व्याज भुक्तानीमा वार्षिक १३.५ प्रतिशतसम्म व्याज दिने भएका छन् । उक्त आकर्षक व्याज पाउने लोभमा लगानीकर्ताहरु सेयर बजारमा भन्दा बैंकतिर आकर्षित भएका देखिन्छ । यसले गर्दा मंगलबारकाे सेयर बजारमा गिरावट देखिएकाे हाे । बजार दोहोरो अंकले घट्दा निर्जीवन बीमा समूह उच्च अंकले ओरालो छ । यो समूह एकैदिन १९२ अंकले घटेको छ । जीवन बीमा ४९, विकास बैंक २०, माइक्रोफाइनान्स १८, हाइड्रोपावर १६ र बैंकिङ् समूह १५ अंकले राताम्मे भएका छन् । सो दिन उत्पादनमूलक र अन्य समूह क्रमशः ९ र ५ अंकले हरिया देखिएका छन् । मंगलबार नेप्से परिसूचकमा गिरावट भएपनि सेयर कारोबारमा भने सुधार भएको छ । दिनभर १५९ कम्पनीको ५३ करोड रुपैयाँ बराबरको सेयर किनबेच भएको छ । जुन अघिल्लो दिनको तुलनामा ११ करोड रुपैयाँ बढी हो । सोमबारको बजारमा ४२ करोड रुपैयाँ बराबरको सेयर कारोबार भएको थियो ।
