उर्जा उत्पादकको चेतावनीः लगानी सम्मेलनका विदेशी लगानीकर्तालाई भड्काउनु नपरोस्
काठमाडौं । स्वतन्त्र उर्जा उत्पादकहरुले लगानी सम्मेलनमा आउने विदेशी लगानीकर्ताहरुलाई भड्काईदिने चेतावनी दिएका छन् । स्वदेशी उर्जा उत्पादकहरुका एक दर्जन माग पुरा नगरेको सरकारले विदेशी लगानीकर्तालाई पनि आश्वासन मात्रै बाढ्छ भनेर उनीहरुलाई भड्काईदिने चेतावनी उनीहरुले दिएका हुन् । स्वतन्त्र उर्जा उत्पादकहरुको संस्था(इपान)ले सोमबार राजधानीमा पत्रकार सम्मेलन गरेरै त्यस्तो चेतावनी दिएको हो । इपानका अध्यक्ष, उपाध्यक्ष र महासचिवले स्वदेशी लगानीकर्तासँग गरिएका पुर्व प्रतिवद्धताहरु समेत पुरा नगरेको सरकारले विदेशी लगानी कर्तालाई पनि ललिपप मात्रै देखाउने दावी गरेका हुन् । ‘देश भित्रका लगानीकर्ताहरु सरकारी निति तथा निर्णयहरुका कारणले पिल्सिरहंदा, विदेशीहरुले यस क्षेत्रमा लगानी गर्लान् भन्नु यथार्थपरक नुहुने देखिन्छ ।’, इपानले भनेको छ । इपानका अध्यक्ष शैलेन्द्र गुरागाईँले भने,‘हाम्रा माग पुरा भएनन् भने हामी लगानी सम्मेलनमा आएका विदेशी लगानीकर्तालाई भनिदिन्छौं, हामीसँग गरिएका सम्झौता त कार्यान्वयन भएको छैन्, विदेशीका कुरा कसरी पुरा हुन्छन भन्छौं’, अध्यक्ष गुरागाईँले भने । उनले स्वदेशी लगानीकर्ताको माग पुरा नगरि आयोजना गरिएको लगानी सम्मेलन सुद्रिपुजा जस्तै हुने बताए । ‘हामी त्यहाँ(लगानी सम्मेलनमा) गएर यो सरकार ढाट्छ, छलकपट गर्छ, वदनियत पूर्वक सम्झौता गर्छ भनेर भन्नु उपयुक्त हुँदैन भनेर हामीले आफ्ना माग पत्रकार सम्मेलन मार्फत राखेका हौं, समयमै यो सूचना पठाएका हौं’, अध्यक्ष गुरागाईँले भने । उनले स्वदेशी लगानीकर्ता र विदेशी लगानी कर्ता तथा विदेशमा पनि देशैपिच्छेका लगानीकर्तालाई फरक फरक व्यवहार गरिएको आरोप पनि लगाए । ‘विदेशी लगानी ल्याउने हो भने यो मोडलबाट काम गर्छाै भन्नु परो, काले, गोरे, उत्तर र दक्षिणका लगानीकर्ताका लागि फरक फरक विभेदकारी नीति आउनु हुन्न । सबैलाई समान खालको व्यवहार गर्नु पर्छ ।’, गुरागाईँले भने । यस्ता छन् स्वतन्त्र उर्जा उत्पादकका माग १) नेपाल सरकारले विभिन्न २५ प्रवद्र्घकहरुसंग दोहोरो सम्झौता (पोष्टेड रेट) गरी विद्युत खरीद बिक्री सम्झौता गरेता पनि सो संशोधित सम्झौता अनुसार हालसम्म ति आयोजनाहरुले शर्तअनुसार भुक्तानी प्राप्त नगरेको । २) २०७२ को उर्जा संकट कार्ययोजना अन्तर्गत प्रवद्र्घकहरुले मुल्य अभिवृद्घि कर तिरे वापत रु ५० लाख प्रति मेगावाट एकमुष्ठ रकम फिर्ता गर्ने निर्णय भई आर्थिक विधेयकमा समेत रकम विनियोजन हुँदा पनि कुनै पनि आयोजनाले उक्त रकम प्राप्त गर्न सकेका छैनन्। ग. विद्युत खरीद बिक्री सम्झौतामा नेपाल विद्युत प्राधिकरणले जिम्मा लिएको प्रसारण लाइन, विद्युत उत्पादन शुरु भएको वर्षौ सम्म पनि सम्पन्न नहुँदा आयोजना प्रवद्र्घकको करोडौं रुपैयाँ क्षति भइसक्दा पनि नेपाल सरकार र ने. वि. प्रा. ले न त क्षतिपुर्ति को ब्यवस्था गरेका छन्न त सो प्रसारण लाइन निर्माण सम्पन्न गरेका छन् । यस्तो अवस्थामा सरकार लगानीकर्ताहरुप्रति संवेदनशील छ भनेर कसरी भन्ने ? प्रसारण लाइन समयमा सम्पन्न गर्ने र गर्न नसकेमा न्यायोचित क्षतिपुर्तिको ब्यवस्था गर्न सरकारको ध्यान जानु अत्यावश्यक छ । ३) सरकारले बारम्बार घोषणा गरेको ऊर्जा विकासमा सिंगल डेस्कको व्यवस्था हालसम्म पनि दस्तावेजमा मात्र सिमित रहेको र ऊर्जा प्रवर्धकहरुले आयोजना विकासको लागि सरकारी अनुमतिका लागि विभिन्न मन्त्रालय, विभाग तथा अन्य कार्यालयहरुमा वर्षौसम्म धाउनुपर्ने बाध्यता हटेको छैन । ४) वनको जग्गा प्राप्ति तथा रुख कटानको स्विकृति पाउन वर्षौं लाग्ने गरेको सर्व विदितै छ । यो समस्याको समाधानकोलागि कुनैपनि सार्थक पहल भएको छैन । ५) २०६८ साल भन्दा अगाडी विद्युत खरीद सम्झौता गरेका जलविद्युत आयोजनाहरु हाल रुग्ण अवस्थामा रहेका छन्। बैंकको बढ्दो व्याजदर, प्राकृतिक प्रकोप, आयोजन निर्माण सामाग्रीको मुल्यबृद्धि जस्ता विविध कारणले जलविद्युत आयोजनाहरु रुग्ण अवस्थामा पुगेका छन्। जसका कारण ती जलविद्युत आयोजनाहरु बैंकको व्याज समेत तिर्न सक्ने अवस्थामा छैनन् । फलस्वरुप उद्यमीहरु हतोत्साहित भएको स्थिती छ । त्यस्ता जलविद्युत आयोजनाहरुको आर्थिक अवस्था सुदृढ गर्नको लागि हाल चलनचल्तीमा रहेको विद्युत खरीद दरको व्यवस्था गर्नुपर्ने आवश्यकता देखिन्छ । यसोगर्दा ऊर्जा क्षेत्रमा लागेका उद्यमी तथा हजारौंको संख्यामा रहेका सर्वसाधारण सेयरधनीहरुले न्यायोचित निकास प्राप्त गर्न सक्ने स्थिती रहन्छ । ६) राजनैतिक स्थयित्व आएर संघियतामा मुलुक प्रवेश गरे पश्चात सुशासन का नयाँ चुनौती आएका छन्। संघिय, प्रदेश र स्थानिय सरकारहरु बिच समन्वयको अभाव र अधिकारको स्पष्ट बाँडफाँट नहुँदा प्रवद्र्घकहरु थप पिडित हुन परेकोछ । यसका साथै स्थानिय तहमा आयोजना तथा कार्यरत कर्मचारीको सुरक्षको प्रत्याभुति अझै प्राप्त हुन सकेको छैन । ७) सरकारले विभिन्न समयमा जारी गरेका उर्जा संकट कार्य योजना, श्वेत पत्र, तथा निर्देशिकाहरुमा प्रवद्र्धकहरुलाई असजिलो पार्ने तथा लागत बढाउने प्रावधानहरु कार्यान्वयन गर्न सरकार आतुर रहेको तर प्रवद्र्धकहरुलाई दिने राहत र सुविधा उपलब्ध गराउन सरकार उदासिन रहेको छ । सन्दर्भः कार्ययोजनामा Community Support Program मा निश्चित रकम खर्च गर्न एकलौटि तरिकाले सरकारले इजाजत पत्रमानै तोकिदिने तर सोहि कार्ययोजनामा दिने भनिएको सहुलियत नदिने । ८) वैदेशिक लगानी भित्र्याउन अपरिहार्य भनिएको hedging mechanism को रुपरेखा वर्षौंसम्म प्रष्ट भएको छैन । कुन आधारमा वैदेशिक लगानी नेपालमा भित्र्याउने र सो बाट आर्जित मुनाफा कसरी आफ्नो देशमा लैजाने भन्ने बारेमा कुनै प्रष्ट नीति बन्न सकेको छैन ।
चितवनमा स्टार लेवलको सुविधा दिने प्रेसिडेन्ट सेकुवा सञ्चालन, उपमेयर शाहद्धारा उद्धघाटन
चितवन । चितवनको सदरमुकाम भरतपुरमा खानाका पारखीहरुका लागि नयाँ रेष्टुरेन्ट “प्रेसिडेन्ट सेकुवा” सञ्चालन आएको छ । राजधानी काठमाडौंमा चर्चित बनेको “प्रेसिडेन्ट सेकुवा” को आठौँ शाखा चितवनको भरतपुर ओरालोमा सञ्चालन आएको हो । आठौँ शाखाको एक समारोहकाबीच भरतपुर महानगरीकी उमेयर पार्वती शाहले उद्धघाटन गरेकी थिईन् । उनले फरकपनसहित मौलिक खानाको स्वाद लिन चाहाने खानाका पारखीहरुलाई प्रेसिडेन्ट निकै उपयोगी हुने बताईन् । मुलुककै उत्कृष्ट महानगर बनाउन विभिन्न सूचक आवश्यक पर्ने भन्दै उपमेयर शाहले महानगरमा गुणस्तरीय विभिन्न खानाका स्वाद पस्कीनेसगैँ स्वदेशमा नै युवालाई रोजगारी यस्ता खालका रेष्टुरेन्ट सफल हुने बताईन् । यस्तै सोही अवसरमा बोल्दै चितवन उद्योग वाणिज्य संघका अध्यक्ष सहनलाल प्रधानले आर्थिक रुपमा ईर्मेजिङ्ग सिटि भरतपुरमा अनुभवी रेष्टुरेन्टले थप उचाई दिलाउने बताए । यस्तै कार्यक्रममा बोल्दै चितवन उद्योग संघका बरिष्ठ उपाध्यक्ष राजु पौडेलले औद्योगिक क्षेत्रको रुपमा विकसित हुँदै गएको चितवनमा चेन रेष्टुरेन्टहरु आउनु खुसीको कुरा भएको बताए । बैदेशिक रोजगारीबाट फर्केका र नेपालमा नै केही गर्नु पर्दछ भन्ने विचार भएका १० युवाहरुले २०६३ मा खुलेको पे्रसिडेन्ट ग्रपले राजधानी काठमाडौँमा ६ वटा होटल तथा रेष्टुरेन्ट खोलको सो ग्रुपले राजधानी बाहिर लुम्बिनीपछि आठौ शाखाको रुपमा भरतपुरमा यस क्षेत्रका उपभोक्तालाई ध्यान राखेर डिलक्स, स्टार लेवलको सुविधामा रेष्टुरेन्ट खोलेको संस्थाका अध्यक्ष शंकर भण्डारीले जानकारी दिए । सेकुवालाई विशेष प्राथमिकतामा राखेर सञ्चालन भएको प्रेसिडेन्ट सेकुवामा सबै प्रकारका खानाका पारखीहरुका लागि (मल्टी क्विजन) फेमिली रेष्टुरेन्ट हुने उनले बताए । देशकै केन्द्र भागमा रहेको चितवनको भरतपुरमा होटल बिस्तार संगै चितवनवासी र यहाँको तासको स्वाद भन्दा फरक स्वादको परिकार सेकुवालाई पनि चितवनवासीले माया गर्ने अध्यक्ष भण्डारीको दावी छ । जहाँ सयम अनुसारको सुविधा सम्पन्न किड्स प्ले रुम, पारिवारिक रुम का साथै ठुलो स्किृनमा लिरिक्स हेर्दै गीत गाएर मनोरञ्जन लिने जापानीज शैली ‘काराओके’ समेत मुख्य विशेष हो । रेष्टुरेन्टमा विभिन्न कलात्मक आट्र्सले श्रृगारिएको छ । करिव एक करोड लगानीमा संचालन आएको प्रेसिडेन्ट भरतपुर शाखाले ३० जनालाई प्रत्यक्ष रोजगारी दिएको छ भने देशभर १ सय ५० जनालाई प्रत्यक्ष रोजगारी दिई सकेको अध्यक्ष भण्डारीले बताए । मिटिङ हलमा १ सय ५० सहित रेष्टुरेन्टमा एक पटकमा १ सय जनालाई एकैसाथ सेवा प्रदान गर्न सक्ने सो रेष्टुरेन्टले शुभारम्भको अवसरमा विशेष छुटको समेत ब्यवस्था गरेको जनाईएको छ ।
काठमाडौँ नयाँ बजारमा सिद्धार्थ बैंकको नयाँ शाखा
काठमाडौँ । सिद्धार्थ बैंकले सोमबार काठमाडौंको नयाँ बजारमा नयाँ शाखा सञ्चालनमा ल्याएको छ । उक्त क्षेत्रका सर्वसाधारण तथा उद्यमीेमाझ सबै प्रकारका निक्षेप तथा कर्जा कारोबार सुविधा, रकम भुक्तानी लगायत सम्पूर्ण बैंकिङ्ग सेवा पुर्याउने उद्देश्यले उक्त शाखा सञ्चालनमा ल्याएको हो । त्यस्तै बैंकले अत्याधुनिक प्रविधियुक्त इन्टरनेट बैंकिङ्ग सेवा, मेबाइल बैंकिङ्ग सेवा प्रदान गर्दै आइरहेको छ । साथै, बैंकिङ्ग प्रणालीलाई थप प्रविधिमैत्री बनाउन सिद्धार्थ बैंकले इन्टरनेटको माध्यमबाट आफ्नो रोजाइको बचत खाता खोल्न सकिने सुविधा ल्याएको छ, जसले गर्दा ग्राहकहरुलाई थप सुविधा पुग्ने बैंकले जनाएको छ ।
एओटिएस जापान-परिसंघबीच छलफल, ‘आर्थिक प्रगतिको पथमा नेपाल’
काठमाडौँ । एओटिएस जापानका अध्यक्ष सिन्ह्या कुवायमाको नेतृत्वमा आएको एक प्रतिनिधि मण्डलले आज नेपाल उद्योग परिसंघका पदाधिकारीसँग द्विपक्षीय प्राविधिक सहयोग सम्बन्धमा विस्तृत छलफल गर्यो । सो छलफलमा एओटिएस जापानका अध्यक्ष सिन्ह्या कुवायमाले नेपाल आर्थिक प्रगतिको पथमा तीव्र गतिले अगाडि बढी रहेको सन्दर्भमा विगतमा जस्तै आउँदा दिनहरुमा पनि जापान तथा नेपालमा समेत मानव संशाधनको विकासका क्षेत्रमा तालिमको माध्यमबाट सहयोग वृद्धि गर्ने संकेत गरे । त्यसको लागि निजी क्षेत्र बढी क्रियाशील भई कुन क्षेत्रमा कस्तो सहयोग, तालिम वा गोष्ठी गर्दा नेपाल र नेपालीको हीतमा हुन्छ सो प्रष्ट हुनु पर्ने बताए । आफ्नो संस्थाले यसका लागि जेट्रोसँग सहकार्य गर्दै सहयोगीभूमिका खेल्ने उल्लेख गरे । सो अवसरमा प्रतिनिधि मण्डलको स्वागत गर्दै नेपाल उद्योग परिसंघका अध्यक्ष हरिभक्त शर्माले मुलुक आर्थिक समृद्धितर्फ अग्रसर भएको साथै सुखी नेपाली समृद्ध नेपालको नारा सहित समग्र मुलुकत्यसतर्फ लागी रहेको प्रसंग उल्लेख गर्दै हालै सम्पन्न नेपाल उद्यमशीलता सम्मेलनबाट नयाँशीप, ज्ञान र नवीनतम सोचको टड्कारो आवश्यकता महशुस भएको उल्लेख गरे ।
पूँजी वृद्धि योजनामा राष्ट्रिय बीमा संस्थानलाई बम्पर छुट, १० महिने ‘ग्रेस अवधि’ !
काठमाडौं । पुँजी वृद्धिसम्बन्धी बीमा समितिको निर्देशन राष्ट्रिय बीमा संस्थानको लागि लागु नहुने भएको छ । बीमा समितिले बीमा कम्पनीहरुलाई यसै आर्थिक वर्षभित्र पुँजी वृद्धि गरी जीवनबीमा कम्पनीलाई २ अर्ब र निर्जीवन बीमा कम्पनीलाई १ अर्ब पुँजी वृद्धि गर्न पछिल्लोपटक निर्देशन दिएको थियो । त्यसअघि समितिले गत आर्थिक वर्षभित्रै पुँजी पुर्याउन भने पनि पछि छ महिनाको समय थप गरेको थियो । तर पुस मसान्तसममा पनि पुँजी पुर्याउन नसकेपछि समितिले कार्ययोजना पेश गरे आगामी असार मसान्तसम्मको अवधिमा पुँजी बढाउन सकिने सुविधा दिएको थियो । राष्ट्रिय बीमा संस्थानले भने नयाँ बीमा ऐन संसदमा रहेको र उक्त ऐनअनुसार ऐन लागु भएको बीमा संस्थान कम्पनीमा रुपान्तरण हुनुपर्ने प्रावधान रहेकोले कम्पनीमा जाने समयसम्म आफुहरुले चुक्ता पुँजी बढाउने समयावधि पाउने जनाएको छ । बीमा संस्थानका प्रशासक कविप्रसाद पाठकले यसबारे बीमा समितिसँग मौखिक सहमति भइसकेको बताए । उनले संस्थान कम्पनीमा गएपछि सर्वसाधारणका लागि आईपीओ जारी हुने समेत बताए । बीमा समितिले उक्त सहमतिको पुष्टि गरेको छ । समिति स्रोतका अनुसार छुट्टै ऐनका आधारमा सञ्चालनमा रहेको र सो ऐनमा संस्थानको अधिकृत पुँजी न ५० करोड रहेकोले अहिले नै पुँजी २ अर्ब पुर्याउन कानूनी बाधा रहेको अवस्थामा अहिले नै ऐन संशोधन गर्नुभन्दा कम्पनीमा गएपछि पुँजी पुर्याउने छुट दिइएको हो । ‘बीमा संस्थान पूर्ण सरकारी कम्पनी हो, उसको पुँजी पुर्याउने सरकारको प्रतिवद्धता पनि छ, यस्तो अवस्थामा हामीले संस्थानको हकमा त्यो छुट दिएका हौं ।’ बीमा समिति उच्च अधिकारीले विकासन्यूजसँग भने । बीमा संस्थानकाे हालकाे पुँजी १८ कराेड छ । २ अर्ब पुँजी पुर्याउन ११ गुणा भन्दा बढी पुँजी बढाउनुपर्ने अवस्था छ । प्रशासक पाठकले संस्थानकाे २०६६/६७ सालदेखि साधारणसभा नभएकोले पुँजी १८ कराेडमा सीमित भएकाे देखिए पनि संस्थानले बाेनसबाटै करिब ५५ कराेड पुँजी पुर्याउने र कम्पनीमा गएलगत्तै तोकिएको ताेकिएकाे पुँजी पुर्याउने बताए । त्यसका लागि हकप्रद शेयर जारी गर्ने वा अरु पुँजी वृद्धिका विधि प्रयाेग गर्ने साधारणसभाले निर्णय गर्ने बताए ।
युकेमा सिटी एक्सप्रेस मनी ट्रान्सफरको सेवा शुरू
काठमाडौं । सिटी एक्सप्रेस मनी ट्रान्सफरको सेवा युकेमा शुरु भएको छ । सिटी एक्सप्रेस मनी ट्रान्सफर, युकेबाट भालापे मोबाईल एप् र ईन्टरनेट बैंकिङ्ग मार्फत पनि सहज कारोबार गर्न सकिने सम्झौता भएको छ । उक्त सम्झौतापत्रमा सिटी एक्सप्रेसको तर्फबाट सिटी एक्सप्रेस मनी ट्रान्सफरका प्रबन्ध निर्देशक चन्द्र टण्डन र सिटी एक्सप्रेस मनी ट्रान्सफर,युकेको तर्फबाट प्रबन्ध निर्देशक करमबहादुर गुरुङ्गले हस्ताक्षर गरेका थिए । यो सेवा सुरु भएसँगै युकेबाट नेपालमा सिटी एक्सप्रेस मनी ट्रान्सफरको ७ हजार भन्दा बढि एजेन्टहरु मार्फत सिधैं भुक्तानी एवं कुनै पनि बैंकको खातामा रकम जम्मा गर्न सकिने भएको छ । सिटी एक्सप्रेस नेपालले रेमिटान्स क्षेत्रमा विगत १२ वर्ष देखि आफ्नो रेमिट एजेन्ट्हरु बाट ७ हजार भन्दा बढी नेपालको एजेन्ट्हरु मार्फत भुक्तानी प्रदान गर्दै आइरहेको छ ।
प्रतिनिधिसभामा ‘लुट्न सके लुट…’को चर्चा, कुन सांसदले के भने ?
काठमाडौँ । प्रतिनिधिसभा आजको बैठकमा अख्तियार दुरुपयोग अनुसन्धान आयोगका एक आयुक्तको भ्रष्टाचार र एक लोकगायकको ‘लुट्न सके लुट’ बोलको गीतले चर्चा पाएको छ । बैठकमा सांसदहरुले भ्रष्टाचारमा मुछिएका आयुक्त राजनारायण पाठकले पदबाट राजीनामा गरेका सम्बन्धमा सत्यतथ्य पत्ता लगाउन माग गरे । उहाँहरुले संवैधानिक पदमा रहेर भ्रष्टाचार गर्ने व्यक्तिले पदबाट राजीनामा दिँदैमा छुट पाउन नहुनेमा पनि जोड दिए । सांसद अमृता थापा र गणेश पहाडीले दोषी देखिए पाठकलाई कारवाही हुनुपर्ने माग गरे । सांसद अमरेशकुमार सिंहले गायक शर्माको हालै सार्वजनिक गीतलाई रोक लगाइएको भन्ने सूचना सही हो भने त्यसले लोकतान्त्रिक अधिकार हनन हुने टिप्पणी गरे । सांसद झपटबहादुर रावलले गायक शर्माको गीतमा सरकारले कुनैपनि प्रतिबन्ध नलगाएको जिकिर गरे । सांसद उमाशङ्कर अर्गरियाले ठेकेदारले बाटो निर्माणमा गरेको ढिलाइले नागरिकको स्वास्थ्यमा असर परेकोे भन्दै सरकारको ध्यानाकर्षण गराए । सांसद घनश्याम खतिवडाले मोरङमा ठेकेदारले बाटो निर्माणमा गरेको ढिलासुस्ती र कमसल निर्माणले जनताले दुःख पाएको भन्दै त्यस्ता ठेकेदारमाथि कडा कारवाही गर्न माग भयो । बैठकमा सांसद अमनलाल मोदीले किसानलाई सहज र सुलभरुपमा मलको व्यवस्था गराउन सरकारको ध्यानाकर्षण गराए । सांसद आशाकुमारी विकले हालै बझाङमा भएका सवारी दुर्घटनामा मृत्यु भएकालाई क्षतिपूर्ति र घाइतेको उपचारमा प्रभावकारी काम गर्न सरकारले आवश्यक कदम चाल्नुपर्ने बताए । सांसद इन्दुकुमारी शर्माले बर्दिबासको रातुखोलामा मापदण्डविपरीत ढुङ्गा, गिटी, बालुवाको दोहन बढेको भन्दै सरकारको ध्यानाकर्षण गराए । सांसद उमा रेग्मीले मालपोत कार्यालयको अनलाइन प्रणाली अस्तव्ययस्त भएको र एक व्यक्तिको नाम अर्को व्यक्तिका नाममा दर्ता हुने समस्या भएको भन्दै तुरुन्त यसमा आवश्यक सुधार गर्न माग गरे । सांसद कलिला खातुनले मुसलमान विद्यार्थीको छात्रवृत्ति काटिएको छ भन्दै तत्काल उचित व्यवस्था गर्न माग गरिन् । सांसद कृष्णप्रसाद दाहालले काठमाडौँमा भएको प्रदूषणले वाग्मती नदी भएर बग्ने अन्य जिल्लामा समेत असर परिरहेको र नदीमा जलचर प्राणीको विनाश भएको छ भन्दै आवश्यक सुधारका लागि सम्बन्धित निकायको ध्यानाकर्षण गराए । सांसद गणेशसिंह ठगुन्नाले दार्चुलामा भारतको स्वीकृति नभएर केही स्थानमा झोलुङ्गे पुल निर्माण हुन नसक्दा जनताले दुःख पाएको भन्दै यस सम्बन्धमा सरकारले पहल गर्न माग गरे । सांसद गोपालबहादुर बमले संसद्को शून्य समयको सुनुवाइ पनि शून्य भएको छ भन्दै यसको सुनुवाइ प्रभावकारी बनाउनुपर्ने माग गरे । सांसद गङ्गा चौधरीले महिलाको महिनावारी हुनु प्राकृतिक विषय हो भन्दै यसमा रहेको कुप्रथालाई नियन्त्रण गर्न तीनै तहको सरकारले महाअभियानका रुपमा लैजानुपर्ने बताइन् । रासस यस्ताे छ ‘लुट्न सके लुट…’ गीत, पुनःयूट्युबमा राख्न पशुपति शर्मालाई दवाव
नबिल बैंकको सेयरमा झुम्मिए लगानीकर्ता, एकैदिन चार करोड ७७ लाख बढीको कारोबार
काठमाडौं । सोमबारको बजारमा लगानीकर्ताहरु नबिल बैंकको सेयरमा आकर्षित देखिएका छन् । बैंकको एकैदिन संथापक र साधारण सेयर गरी चार करोड ७७ लाख रुपैयाँ बढीको सेयर कारोबार भएको छ । सोमबार मात्रै बैंकको २ करोड ४३ लाख ९२ हजार ५६४ रुपैयाँ बराबरको प्रमोटर सेयर किनबेच भएको छ । जसको सेयर मूल्य प्रतिकित्ता ७४७ रुपैयाँ रहेको छ । जुन अघिल्लो दिनको तुलनामा २३ रुपैयाँले बढेर प्रतिकित्ता ७४७ रुपैयाँमा कारोबार भएको छ । आइतबार बैंकको प्रमोटर सेयर मूल्य प्रतिकित्ता ७२४ रुपैयाँ रहेको थियो । त्यस्तै, बैंकको २ करोड ३३ लाख ६३ हजार २१२ रुपैयाँ बराबरको साधारण सेयर बिक्री भएको छ । बैंकको सेयर कारोबारमा वृद्धि भएपछि कारोबार रकममा भने गिरावट देखिएको छ । अघिल्लो दिनको तुलनामा बैंकको साधारण सेयर प्रतिकित्ता २४ रुपैयाँले घटेर ७८३ रुपैयाँमा झरेको छ । आइतबार बैंकको साधारण सेयरको मूल्य प्रतिकित्ता ८०७ रुपैयाँ रहेको थियो । त्यस्तै, अपर तामाकोशी हाइड्रो पावर र एनएमबि बैंकको एक करोड रुपैयाँ बराबरको सेयर किनबेच भएको छ । बजारमा कुल १६१ कम्पनीको २३ करोड ४५ लाख रुपैयाँ बराबरको सेयर कारोबार भएको छ । समग्रमा सोमबारको नेप्से परिसूचक ७.२१ अंकले घटेर ११०२ अंकमा अडिएको छ । बजारमा चौतारी लघुवित्त वित्तीय संस्थाका लगानीकर्ताले सबैभन्दा बढी कमाएका छन् । संस्थाका लगानीकर्ताले एकैदिन ९.९५ प्रतिशत कमाएका छन् । वर्ल्ड मर्चेन्ट बैंकिङ एण्ड फाइनान्सको भने सेयर मूल्य ९.०९ प्रतिशतले घटेको छ । सो दिन होटल र उत्पादनमूलक समूह बाहेक कारोबारमा आएका सबै समूह राताम्मे देखिएका छन् ।
