सदर चिडियाखानामा शैक्षिक केन्द्र उद्घाटन, इन्भेस्टमेन्ट बैंकको ५० लाख सहयोग
काठमाडौँ । जावालाखेल स्थित सदर चिडियाखानामा ‘फिल्ड मार्शल सर जोन च्यापल शैक्षिक केन्द्र’को उद्घाटन भएको छ । वन तथा वातावरण मन्त्री एवम् राष्ट्रिय प्रकृति संरक्षण कोषका अध्यक्ष शक्तिबहादुर बस्नेतले मंगलबार केन्द्रको उद्घाटन गरेका हुन् । सो समारोहमा नेपालका लागि बेलायती राजदूत रिचार्ड मोरिसले सर जोन च्यापलको प्रतिनिधित्व गरेकोे थियो । समारोहमा वन तथा वातावरण मन्त्रालयका सचिव डा. बी.एन. ओली, राष्ट्रिय प्रकृति संरक्षण कोष-सदर चिडियाखानाको परियोजना व्यवस्थापक डा. चिरञ्जीवीप्रसाद पोखरेल तथा नेपाल इन्भेस्टमेन्ट बैंक लिमिटेडका प्रमुख कार्यकारी अधिकृत ज्योतिप्रकाश पाण्डे लगायतको उपस्थिति रहेको थियो । ११ लाखले गरे अवलोकन आर्थिक वर्ष २०७४/७५मा ११ लाख ५९ हजार ११४ जनाले सदर चिडियाखानाको अवलोकन गरेका छन् । विद्यालयमा अध्ययनरत बालबालिकाहरूमा संरक्षण शिक्षासम्बन्धी कार्यक्रम सञ्चालित गरिने सदस्यतामा आधारित कार्यक्रम ‘फ्रेन्ड्स अफ जू’ मा हाल काठमाडौं उपत्यका भित्रका १२३ विद्यालयका ८० हजार विद्यार्थीहरू सदस्य भइसकेका छन् । इन्भेस्टमेन्ट बैंकको सहयोग नेपाल इन्भेस्टमेन्ट बैंकले आफ्नो संगठित व्यावसायिक उत्तरदायित्व रणनीति अन्तर्गत नेपाल प्राकृतिक संरक्षण कोषको यस कार्यमा सहकार्य गरेको छ । नेपालको एकमात्र चिडियाखानामा शैक्षिक श्रव्यदृष्य केन्द्र स्थापना गर्न स्वेच्छिक सहयोग गरेको हो । प्रविधिको प्रयोगबाट सिकाईको अनुभवद्वारा बढाउन सकिन्छ भन्नेमा विश्वास नेपाल इन्भेस्टमेन्ट बैंकले लिएको छ । चिडियाखानामा संरक्षण र सार्वजनिक शिक्षा, विशेषतः युवा पिढीका लागि सूचना केन्द्रको आवश्यकता देखिएको छ । त्यसैले नेपाल इन्भेस्टमेन्ट बैंकले राष्ट्रिय प्रकृति संरक्षण कोषलाई ५० लाखको वित्तीय सहयोग उपलब्ध गराउने निर्णय गरेको छ । जसले अन्ततः केन्द्रीय चिडियाखानामा आगन्तुकहरूको सिकाइका अनुभव र समग्र वन्यजन्तुको व्यवस्थापनमा सुधार गर्ने बैंकले जनाएको छ ।
सुजुकी बर्गम्यान १२५ सीसी स्कूटरको बिक्री शुरु, भैरहवामा शोरुम उद्घाटन
काठमाडौँ । भैरहवामा सुजुकी बर्गम्यान १२५ सीसी स्कूटरको बिक्री शुरु भएको छ । फागुन ७ गते सुजुकी टु ह्वीलर्सको लागि शोरुम पनि उद्घाटन भएको छ । भैरहवा लुम्बिनी गेट नजिकै सिद्धार्थ मोटर्सबाट सो स्कूटरको बिक्री शुरु गरिएको छ । पत्रकार सम्मेलन गरी शोरुम उद्घाटन र सुजुकी बर्गम्यान बिक्री शुभारम्भ तथा र्याली सम्पन्न गरेको कम्पनीले जनाएको छ । भैरहवा उद्योग बाणिज्य संघका अध्यक्ष कुलप्रसाद न्यौपाने सुजुकी बर्गम्यान १२५ सीसीको बिक्री शुभारम्भ साथै शोरुम उद्घाटन भएको हो । विशिष्ट अतिथिहरुमा लाइन्स कल्ब अफ सिदार्थ नगर का अध्यक्ष थिरिन्द्र श्रेष्ठ , प्रहरी अफिसर नारद कार्की, सिदार्थ बैंकका भैरहवा शाखा म्यानेजर जीबन घिमिरे, मुक्तिनाथ बिकास बैंकका म्यानेजर बिकल छेत्रीको उपस्थिति रहेको थियो । कार्यक्रममा भी जी सुजुकी कम्पनीका एरिया सेल्स म्यानेजर धनीराम भुसाल र भी जी सुजुकीका मार्केटिंग म्यानेजर नबराज कोइरालाले पनि दैनिक जीबनमा मानबको लागी स्कूटर जीबन साथी जस्तै भएको बताए । कार्यक्रममा सुजुकी भैरहवा को सुजुकी बिक्रेता सिद्धार्थ मोटर्सका अध्यक्ष दिनेसमान अमात्यले कार्यक्रमको सभापतित्व गरेका थिए । आकर्षक तथा सुविधाजनक यो स्कूटर म्याक्सी–स्कूटर हो, जसमा १४ इन्च आकारको ट्युबलेस ठूला टायरहरु छन्, सुजुकी बर्गम्यान १२५ मा ७५०० आरपिएममा ८.७ बिएचपिको शक्ति उत्पादन गर्ने क्षमता बोकेको १२५ सिसिको शक्तिशाली इन्जिन जडित छ । स्कूटरको अग्र भागमा डिस्क ब्रेक छ भने ५.६ लिटर क्षमताको प्रेट्रोल अट्ने क्षमता राख्दछ । डिजिटल ड्यासबोर्ड रहेको यो स्कूटरमा एलइडि हेड लाइट, एलइडि टेल ल्याम्प जडान गरिएका छन् । फरक खालको बनावटको कारणले यो स्कुटर अत्यन्त आकर्षक देखिनुका साथै बाक्लो र विस्तारित सिटले यसलाई चलाउँदा छुट्टै प्रकारको अनुभूति महशुस हुन्छ । यो स्कूटर १२५ सिसिका स्कूटरहरुको समूहमा एक बेन्चमार्कको रुपमा स्थापित हुने सिद्धार्थ मोटर्स भैरहवाका अध्यक्ष दिनेशमान अमात्य बताए । हाल यसको नेपालको बजार मूल्य २ लाख २९ हजार ९ सय रुपैयाँ कायम गरिएको छ ।
गाउँपालिका महासंघ प्रदेश ३ को अध्यक्षमा पोखरेल निर्वाचित, समितिमा को-को परे ?
काठमाडौँ । गाउँपालिका राष्ट्रिय महासंघ प्रदेश ३ को सम्मेलन दोलखाको किर्नेटारमा सम्पन्न भएको छ । गाउँपालिका जनप्रतिनिधिको सम्मेलनबाट अध्यक्षमा ईश्वरचन्द्र पोखरेल निर्वाचित भएका छन् । सम्मेलनलले समितिको उपाध्यक्षमा धावा लामा, सचिवमा विनोदराज तिमल्सिनालाई निर्वाचित गरेको छ । लामा रामेछाप सुनापति गाउँपालिकाका अध्यक्ष हुन् भने तिमिल्सिना धादिङ ज्वालामुखी गाउँपालिकाका अध्यक्ष हुन् । सिन्धुपाल्चोक सुनकोसी गाउँपालिकाकी उपाध्यक्ष लक्ष्मी पौडेल सहसचिव र धादिङका ज्वालामुखी गाउँपालिकाकी उपाध्यक्ष जानुका सिम्खडा कोषाध्यक्ष निर्वाचित भएकी छिन् । यसैगरी, सदस्यहरुमा नुवाकोट दुप्चेश्वर गाउँपालिकाका अध्यक्ष योविन्द्रसिंह तामाङ, नुवाकोट ककनी गाउँपालिकाका उपाध्यक्ष सिता खतिवडा लामा, नुवाकोट तारकेश्वर गाउँपालिकाका उपाध्यक्ष तारादेवी रिमाल, सिन्धुली तिनपाटन गाउँपालिकाका अध्यक्ष कर्णवहादुर थापा, रामेछाप गोकुलगंगा गाउँपालिकाका अध्यक्ष खड्गबहादुर सुनुवार, काभ्रेपलाञ्चोक भुम्लु गाउँपालिकाका अध्यक्ष गुमानध्वज कुँवर, ललितपुर महाँकाल गाउँपालिकाका उपाध्यक्ष कमला तामाङ, सिन्धुली फिक्कल गाउँपालिकाका उपाध्यक्ष पार्वती सुनुवार चयन भएका छन् । त्यसैगरी, रसुवा कालिका गाउँपालिकाका उपाध्यक्ष भवानीप्रसाद न्यौपाने, मकवानपुर मनहरी गाउँपालिकाका अध्यक्ष एकराज उप्रेती, रामेछाप उमाकुण्ड गाउँपालिकाका उपाध्यक्ष उर्मिला कार्की, सिन्धुली हरिहरपुरगढी गाउँपालिकाका उपाध्यक्ष अनिताकुमारी राई, धादिङको बेनिघाट गाउँपालिकाका अध्यक्ष हरि दर्लाकोटी र दोलखा तामाकोशी गाउँपालिका १ भिरकोटका अध्यक्ष महेश्वर काफ्ले सदस्य निर्वाचित भएका छन् । निर्वाचित कार्य समितिको कार्यावधि बर्तमान स्थानीय सरकारको अवधिभर हुने जनाइएको छ । सम्मेलनमा प्रदेश ३ का ७४ वटा गाउँपालिकाका अध्यक्ष ,उपाध्यक्ष र गाउँसभा सदस्यहरु गरी २ सय २२ जना प्रतिनिधिहरु सहभागी थिए ।
नुवाकोट आदिवासी महोत्सव फागुन १६ देखि, साकुरा नेपालले सहप्रायोजन गर्ने
काठमाडौँ । प्रथम नुवाकोट आदिवासी महोत्सव २०७५ को सहप्रायोजन साकुरा नेपाल कन्सल्टेन्सीले गर्ने सम्झौता भएको छ। काठमाडौं, सामाखुशी चोक स्थित साकुरा नेपाल कन्सल्टेन्सीका प्रबन्ध निर्देशक अनुजकुमार श्रेष्ठ र आदिवासी जनजाति महासंघ नुवाकोटका सचिव बुद्धिबहादुर तामाङबीच सह प्रायोजकको निम्ति सम्झौता भएको आर्थिक उपसमितिका सदस्य प्रकाश लामाले जानकारी दिए । पर्यटन, उद्योग, व्यापार, कृषिमा बिकास गरी आर्थिक समृद्धिका साथ स्वावलम्बन, प्रथम नुवाकोट आदिवासी महोत्सव लोपोन्मूख भाषा, सांस्कृतिक भेषभुषा, संस्थागत संरक्षण र जातीय पहिचान भन्ने मूल नारा सहित २०७५ फागुन १६ देखि २६ गतेसम्म नुवाकोटको व्यापारिक केन्द्र बट्टार बजारमा हुदैछ । महोत्सव साँस्कृतिक एवं व्यापरिक दृष्टिकोणले महत्त्वपूर्ण मानिएको छ।
फास्ट ट्रयाकको डीपीआरमा सेनाले पठायो सुझाव, बुदुनेमा ‘इन्टर सेक्सन’, खोकनामा ‘जिरो किलो’
काठमाडौं । काठमाडौं निजगढ फास्ट ट्रयाकको डीपीआर माथी नेपाली सेनाले सुझाव दिएको छ । कोरियाली कम्पनी सुसुङले तयार पारेको डीपीआरको प्रारम्भिक रिपोर्टमा नेपाली सेनाले आवश्यक सुझाव दिएको हो । सुसुङले तयार पारेको डीपीआर रिपोर्टमा मकवानपुरको बुदुनेमा इन्टर सेक्सन राख्न प्रस्ताव गरिएको छ । यस अघि मकवानपुरकै राजदमार र ललितपुरको महादेवटारमा समेत इन्टर सेक्सन राख्न स्थानीयले माग गरेका थिए । सुसुङले बुदुनेमै इन्टर सेक्सन राख्नुपर्ने प्रतिवेदन तयार पारेको हो । धरान चतरा हेटौँडा सडक र फास्ट ट्रयाकको मिलन बिन्दुका रुपमा रहेको बुदुनेमै इन्टर सेक्सन पक्का भएको हो । धरान र हेटौँडाबाट आएका सवारी साधनहरु बुदुनेबाटै फास्ट ट्रयाकमा प्रवेश गरेर काठमाडौं आउनेछन् । त्यस्तै, अब फास्ट ट्रयाकको काठमाडौं तर्फको प्रस्थान विन्दु पनि खोकना नै हुने भएको छ । भौतिक मन्त्रालयले खोकनालाई नै काठमाडौं तर्फको फास्ट ट्रयाकको प्रस्थान विन्दु खोकना नै बनाउने निर्णय गरेको हो । त्यस्तै, अब सुरुङको संख्या पनि थपिने भएको छ । एडीबीले प्रस्ताव गरेको महादेव डाँडाँ धेद्रेको १.३७ किलोमिटरको साटो ३.३ किलोमिटरको सुरुङ निर्माण हुनेछ । त्यस्तै, धेद्रे खोला देखि जितपुर खोलामा अर्काे १.३७ किलोमिटरको सुरुङ निर्माण हुनेछ । तेश्रो सुरुङ भने जितपुर खोला देखि बाँदरे खोलासम्म १.४ किलोमिटरको निर्माण हुनेछ । ३ वटा सुरुङहरुको कुल लम्बाई ६.०७ किलोमिटर हुनेछ । सुरुङहरु ११ मिटर चौँडाई र ५.५ मिटर उचाईको हुनेछन् ।आगामी एक साता भित्र डीपीआर तयार हुने सेनाको ड्रईङ एण्ड डिजाइन विभाग प्रमुख सरदलाल श्रेष्ठले जानकारी दिए । भिडियाे
नक्कले भुवनको ‘ओई नक्कली’ बजारमा
काठमाडौं । उदियमान मोडल भुवन श्रेष्ठको नयाँ भिडियो बजारमा आएको छ । चकलेटी लुक्सका भुवनको नयाँ भिडियो बजारमा आएको हो । ओई नक्कली बोलको गीतमा भुवनले आफ्नो कलाकारिता देखाएका छन् । भ्यालेन्टाइन्स डेको अवसर पारेर बजारमा आएको गीतको भिडियोमा बवुल गिरीको शब्द तथा संगीत र एरेन्ज रहेको छ । गितलाई प्रकाश मिश्रले मिक्सिङ गरेका छन । म्युजिक भिडियोमा रोहित शर्मा को छायाँकन, मिलन विश्वकर्माको सम्पादन र संगीत सागरको निर्देशन रहेको छ । उक्तगीतमा भुबन श्रेष्ठ , करिष्मा श्रेष्ठ , अभि सुनारको फिचरिङ रहेको छ । चकलेटी लुक्सका कारण पछिल्लो समय भुवनलाई नयाँ पुस्ताका आशा लाग्दा मोडलका रुपमा समेत हेर्न थालिएको छ । युवा पुस्तामाझ लोकप्रिय बन्दै गएका भुवनले नयाँ नयाँ म्युजीक भिडियोका लागि अफर आउने क्रम बढेको पनि बताए ।
वीरगञ्ज आसपासका ३० व्यापारी माथि राजश्व अनुसन्धानको छानविन, को को परे ?
काठमाडौं । व्यापारीक नाका वीरगञ्जलाई केन्द्र बनाएर व्यवसायी सञ्चालन गरिरहेका ३० जना व्यवसायी विरुद्ध राजश्व अनुसन्धान विभागले छानविन थालेको छ । विभागले झुठा विवरण तथा नक्कली बिजक जारी गरेर राजश्व छलेको भन्दै छानविन अघि बढाएको हो । प्रारम्भिक छानविनमा राजश्व छलेको प्रमाण भेटिएपछि विभागले कार्यालयमा उपस्थित हुन पत्र काटेको थियो । तर व्यवसायीहरु सम्पर्कमा नआएपछि विभागले ७ दिनभित्र हाजिर हुन सार्वजनिक सूचनै प्रकाशित गरेको छ । अबको ७ दिनभित्र पनि ती व्यवसायीहरु विभागमा उपस्थित नभएमा सिधै अदालतमा मुद्दा दायर गर्ने विभागको तयारी छ । विभागले ७ दिने म्याद दिएका ३३ व्यवसायीमध्ये ३० जना बारा र पर्सा जिल्लाका छन् । बाँकी ३ जना भने सर्लाही जिल्लाका छन् । नेपालको प्रमुख भन्सार नाका बिरगञ्ज आसपासका ती व्यवसायीले झुठा विवरण तथा नक्कली बिजक मार्फत अरबौं राजश्व छलेको विभागका एक अधिकारीले जानकारी दिए । अबको ७ दिनभित्र हाजिर नभएमा उनीहरु माथि राजश्व चुहावटको मुद्दा दायर हुनेछ । विभागले ती फर्मका मालिकहरुको ३ पुस्ते विवरण नै सार्वजनिक गरिदिएको छ । प्रधानमन्त्री कार्यालय मातहत ल्याएर सहसचिव दीर्घराज मैनालीले जिम्मेवारी सम्हालेपछि विभागको सक्रियता बढेको देखिन्छ । यसअघि पनि विभागले राजश्व छली तथा हुण्डी कारोबारमा संलग्न दर्जनौंलाई अर्बाैँ विगो दावीसहित मुद्दा दायर गरिसकेको छ ।
लण्डनमा नेपाल विकास सम्मेलन, बेलायती लगानीकर्तालाई अर्थमन्त्रीको ‘ब्रिफिङ’
काठमाडौं । बेलायतको राजधानीमा लण्डनमा नेपाल विकास सम्मेलनको आयोजना गरिएको छ । चैत १५ र १६ नेपालमा आयोजना हुन लागेको लगानी सम्मेलनबारे बेलायती लगानीकर्तालाई ब्रिफिङ गर्न नेपाल विकास सम्मेलनको आयोजना गरिएको हो । सम्मेलनलाई अर्थमन्त्री डा. युवराज खतिवडाले बिशेष सम्बोधन गर्नेछन् । फागुन १० गते आयोजना हुने नेपाल विकास सम्मेलनमा वेलायती लगानीकर्ताहरुलाई नेपालमा लगानी गर्न प्रोत्साहित गर्ने तथा बिशेष आव्हान गर्ने कार्यक्रम रहेको छ । नेपाली दुतावासले आयोजना गरेको सम्मेलनमा अर्थमन्त्री डा. खतिवडाले नेपालले वैदेशिक लगानी प्रवद्र्धनका लागि हालसम्म गरेका प्रयास, अब हुने नीतिगत सुधार तथा उपलब्ध लगानीका क्षेत्रबारेमा बिशेष सम्बोधन गर्नेछन् । साथै, डा. खतिवडाले गैर आवासीय नेपाली सघ, वेलायत र नेपाल वेलायत चेम्वर अफ कमर्शको कार्यक्रमहरुमा सम्बोधन गर्ने कार्यक्रम तय भएको अर्थमन्त्रालयले जनाएको छ । नेपाली राजदूतावासमा आयोजना हुने सम्मेलनमा वेलायत सरकारको अन्तराष्ट्रिय सहयोग विभाग र काठमाडौंस्थित वन टु वाच संस्थाको समेत सहकार्य रहनेछ । सम्मेलनमा वेलायती संसदका तीन जना माननीय सांसदहरु, काठमाडौंस्थित वेलायती सहयोग नियोगका प्रमुख रुरिक मार्सडेन, वेलायत सरकारका अन्तराष्ट्रिय व्यापार विभागका उप निर्देशक इण्डी म्याक कोब्रेयले सम्बोधन गर्ने कार्यक्रम रहेको छ ।
