एक महिनामा बैंक तथा वित्तीय संस्थाकाे ३२४ नयाँ शाखा, कृषिमा १४ हजारलाई सस्तो ब्याजको ऋण
काठमाडौं । एक महिनाको अवधिमा बैंक तथा वित्तीय संस्थाका ३२४ ओटा शाखाहरु विस्तार भएका छन् । फागुन महिनाभरिमा उक्त संख्यामा शाखा विस्तार भएको राष्ट्र बैंकले जनाएको छ । आर्थिव वर्षको पहिलो ८ महिनामा भने जम्मा १४३७ ओटा शाखाहरु विस्तार भएका छन् । विस्तार भएका शाखामध्ये ३९ ओटा वाणिज्य बैंक, १५ ओटा विकास बैंक, ३ ओटा फाइनान्स कम्पनी र बाँकी २६७ ओटा लघुवित्त संस्थाहरु रहेको राष्ट्र बै्रकले जनाएको छ । उक्त संख्यामा शाखा विस्तार गरेसँगै फागुन महिनासम्ममा बैंक तथा वित्तीय संस्थाको कुल शाखा संख्या ८ हजार ५५ पुगेको छ । उक्त संख्यामध्ये ३३०५ वाणिज्य बैंक, ११९६ ओटा विकास बैंक, २०० ओटा फाइनान्स कम्पनी र ३३५४ ओटा लघुवित्त कम्पनी छन् । फागुन महिनामा वाणिज्य बैंकहरुको शाखा संख्यालाई लघुवित्तको संख्याले उछिनेको छ । वाणिज्य बैंकहरुले भने हालसम्म देशरका ७११ ओटा स्थानीय तहमा शाखा विस्तार गरेका छन् भने बाँकी ४२ ओटामा विस्तार हुन बाँकी छ । शाखा विस्तारसँगै बैंक तथा वित्तीय संस्थाहरुको निक्षेप र कर्जाको आकार समेत बढेको छ । फागुन मसान्तसम्म ३१११ अर्ब ४८ कराेड निक्षेप संकलन गरी बैंकहरुले २७८६ अर्ब ६६ कराेड कर्जा प्रवाह गरेका छन् । यो अघिल्लो आर्थिक वर्षको क्रमशः ८.७ प्रतिशत र ९.२ प्रतिशत हो । फागुन महिनामा भने निक्षेपको आकार ९ प्रतिशतले बढ्दा कर्जा १३ प्रतिशतले बढेको छ । व्यवसायकाे आकार बढ्दै जाँदा वाणिज्य बैंकहरुको औसत आधारदर तथा ऋणकाे औसत ब्याजदर घटेकाे छ । माघ महिनामा १०.३६ प्रतिशत रहेकाे आधारदर फागुनमा ९.६५ प्रतिशत र ऋणकाे भारित औसत ब्याजदर एक महिनामा १२.३३ बाट ११.९६ प्रतिशतमा झरेकाे हाे । कृषि व्यवसाय गर्ने १४ हजारलाई सस्तो ब्याजको ऋण सरकारको सहुलियतपूर्ण कर्जा कार्यक्रम अन्तर्गत कृषि व्यवसायमा लाग्ने १४११३ जना कृषकहरुलाई ५ प्रतिशत ब्याज अनुदानसहित सहुलियतपूर्ण कर्जा पाएका छन् । राष्ट्र बैंकका अनुसार उक्त संख्याका ऋणीहरुलाई जम्मा २३ अर्ब ४१ करोड रुपैंया ऋण दिएकोमा सरकारले ९८ करोड २२ लाख ब्याज अनुदान दिइएको हाे । अघिल्लो महिनामा यो संख्या १० हजार ४८७ जना थियो भने कुल कर्जा प्रवाह १८ अर्ब ६४ करोड रुपैंया वितरण भई व्याज अनुदान ८८ करोड ५५ लाख प्रदान गरिएको थियो । यी दुई आँकडा अनुसार एक महिनामो अवधिमा थप ३६२६ जनाले उक्त ऋण पाएकोमा थप ४ अर्ब ७७ करोड रुपैंया कर्जा प्रवाह भएको देखिएको छ । भुकम्पपीडितका लागि निजी आवास अनुदानका लागि भने हालसम्म १५७७ जनाले २ अर्ब ६८ करोड रुपैंया ऋण लिएका छन् । फागुन महिनामा उक्त संख्या १ जनामात्र थपिएको तथ्याङ्कमा उल्लेख छ ।
बल्की डिजाइनमा विल्कुलै नयाँ स्कुटर ‘बर्गम्यान स्ट्रीट’, यस्ता छन् विशेेषता (भिडियाे सहित)
काठमाडौं । १२५ सीसी सेग्मेन्टका स्कुटरहरुको राजा मानिएको सुजुकी एक्सेसले बजारमा आधिपत्य जमाइरहेका वेला यसलाई टक्कर दिनेगरी अन्य स्कुटरहरु पनि बजारमा आउन थाले । यस्तो अवस्थामा सुजुकीले पनि प्रतिक्रिया दिन आवश्यक थियो । फलस्वरुप यसले बल्की डिजाइनमा विल्कुलै नयाँ स्कुटर-बर्गम्यान स्ट्रीट नेपाली बजारमा ल्याएको हो । जिक्सर र इन्ट्रुडरलाई जसरी नै बर्गम्यान स्ट्रीटलाई पनि सुजुकीले अन्तर्राष्ट्रिय बजारमा पाइने मोडल भन्दा कमसीसीको इन्जिन लगाएर नेपाल र भारत लगायतका देशहरुमा लिएर आएको हो । सुजुकीले यस स्कुटरलाई म्याक्सी स्कुटरका रुपमा पहिलो पटक नेपाली बजारमा भित्र्याएको हो । म्याक्सी स्कुटर भन्नाले टुरिङ स्कुटरलाई जनाइन्छ । जसको आकार ठूलो हुनुका साथै पावरफुल इन्जिन समेत रहेको हुन्छ । म्याक्सी स्कुटरको मुख्य उद्देश्य भनेकै चालकलाई सजिलो अर्थात आरामदायी प्रदान गर्नु हो । नेपाली बजारमा पहिलो पल्ट आएको यस किसिमको स्कुटरले बजारमा फड्को मार्ने कम्पनीले दावी गरेको छ । यस स्कुटरको डिजाइन सामान्य स्कुटरको तुलनामा ठूलो देखिने र सडक उपस्थिति राम्रो रहेको छ । त्यस्तै, चौडा एप्रोन, ठूलो वाइन्डस्क्रिन, लामो र चौडा सीट जस्ता विशेषता रहेको छ । त्यसैगरी यसको आरामदायक राईडिङ स्थितीले यसलाई म्याक्सी स्कुटर बनाउनमा मद्दत पुर्याएको छ । यसमा जडान गरिएको फुल एलईडी हेडलाइटको चमक मोटरसाइकलको जस्तै रहेको छ । एलईडी टेल लाईट र दुबै साइडमा जडान गरिएको स्टाइलिस पोजिसन लाइटहरूले यस स्कुटरलाई अन्यको तुलनामा यूनिक बनाएको छ । त्यस्तै, एप्रोनको बीच भाग लगायत अन्य विभिन्न ठाउँहरुमा जडित क्रोमले यस स्कुटरलाई स्ट्याण्डर्ड लुक्स् दिएको छ । यसमा फुल्ली डिजिटल कन्सोल, स्पीडोमिटर, ओडोमिटर, ट्रीपमिटर, क्लक र त्यसैगरी फ्युलगेज लगायतका कुराहरु समावेस गरिएको छ । बल्की एक्जस्टका कारण स्पोर्टी लुक्स प्राप्त गरेको यो स्कुटरलाई यसको एल्युमिनियम फुटपेग्स्, रियर बडी ग्रयाब रेल र एलईडी डीआरएलले थप आकर्षक बनाएको छ । यस स्कुटरको अगाडिको भागमा २ ओटा स्टोरेज पकेटहरु रहेका छन् । दाहिने तर्फको पकेटमा १ लिटर सम्मको वाटर बोतल र त्यसैगरी देव्रेतर्फको पकेटमा पर्स, मोवाइल, पन्जा लगायतका सामाग्रीहरु राख्न सकिन्छ । यसै पकेट भित्र चार्जिङ सकेटको पनि व्यवस्था गरिएको हुनाले स्कुटर कुदाउँदै मोवाइल चार्ज समेत गर्न सकिन्छ । यस स्कुटरको अण्डर सीट क्यापासीटी २१.५ लिटर रहेको छ जसमा फुल साइज हेलमेट पनि सजिलै अट्न सक्छ । ठूलो स्पेस बनाइए तापनि यहाँ बुट लाइटको व्यवस्था भने गरिएको छैन । यस स्कुटरका टायरहरू ट्युवलेस रहेका छन् । जसले यात्रा गर्दा टायरको कारण पाइने झन्झटबाट भने मुक्त बनाउँछ । त्यसैगरी स्कुटरमा कम्बाइन्ड ब्रेकिङ सिस्टम रहेको छ जसले स्कुटरको ब्रेकिङलाई थप सुरक्षित बनाएकाे कम्पनीले जनाएको छ । स्कुटरमा १२४ सीसीको इन्जिन रहेको छ जसले ८.५ बीएचपीको पावर र त्यसैगरी १०.२ एनएमको टर्क प्रदान गर्दछ । तर बर्गम्यानको इन्जिन एक्सेसकोे तुलनामा अलि बढि रिफाइन्ड गरिएको हुन्छ । ५.६ लिटर पेट्रोल अटाउने क्षमता भएको यस स्कुटरले प्रतिलिटर ५५ किलोमिटरको माइलेज दिने कम्पनीको दावी रहेको छ । अगाडिको भागमा १२ इन्चको र त्यसैगरी पछाडिको भागमा १० इन्चको एलाेए व्हील लगाइएको यस स्कुटरको सीट हाइट ७८० मिलिमिटर रहेको छ । त्यसैगरी, ग्राउन्ड क्लियरेन्स भने १६० मिलिमिटर रहेको छ । नेपाली बजारमा हाल यो स्कुटर दुई लाख २९ हजार ९०० रुपैयाँमा विभिन्न तीन रङ (ब्ल्याक, ह्वाइट र ग्रे) मा उपलब्ध छ । आकर्षक विशेषता रहेको यस स्कुटरमा पार्किङ ब्रेक, पास बाइ स्वीच र इन्जिन किल स्वीच चाहिँ समावेस गरिएको छैन । यदि यी कुराहरु पनि समावेस गरिएको थियो भने अझ सुनमा सुगन्ध थपिने थियो । भिडियो हेर्न तलको फोटोमो क्लिक गर्नुहोस्ः
‘स्प्राईट डबल डोज रिफ्रेसपनि रिचार्जपनि’ अफरमा ४ बढी पुरस्कृत
काठमाडौ । स्प्राईटको समर क्याम्पेन, स्प्राईट डबल डोज रिफ्रेस पनि रिचार्ज पनि उपभोक्ता माँझ उत्साहपूर्ण ढङ्गले अगाडि बढिरहेको छ । फेब्रुअरी १ देखि शुरु भएको यो रिफ्रेसिङ्ग रिचार्ज क्याम्पेनबाट हालसम्म ४.५ लाख भन्दा बढि विजेताहरुले टक टाइम जितिसकेका छन् र उपभोक्ताबाट पनि उत्साहपूर्ण प्रतिक्रियाहरु प्राप्त भइरहेको कम्पनीले जनाएको छ । उपभोक्ताहरुले २५० एमएलको शिशाको बोतलको कोका–कोला, स्प्राईट, फान्टा ओरेन्ज, फान्टा लेमन र किन्ले सोडा किनेर रु १० देखि १० हजारसम्मको टक टाईम जित्नुका साथै सामसङ्ग ग्यालेक्सी नोट ९ पनि जित्न सक्नेछन् । गोरखाका प्रकाश गुरुङ, बनस्थलीका भुवन सिंह तामाङ, बनस्थलीका राज किशोर सिंह, अनामनगरका कुमार गिरी, सिनामङ्गलका प्रदीप गैरी, चाबहिलका राज कुमार लिम्बु, माच्छापोखरीका बिनोद नेपाल, झापाकी एलिना सुवेदी ललितपुरका प्रेम शोभा तन्दुकरले सामसङ्ग ग्यालेक्सी नोट ९ जितेका छन् । विजेताहरु सामसङ्ग ग्यालेक्सी नोट ९ प्राप्त गर्दा खुसी भएका थिए र यस्तो अद्भूत योजना ल्याएकोमा कोका–कोला कम्पनीलाई धन्यवाद प्रकट गरेका छन् । सहभागीहरुको उत्साहपूर्ण प्रतिक्रियासँगै, कम्पनीले यस योजना अवधिलाई थप गरेर महिनाको अन्त्यसम्म अर्थात ३० अप्रिलसम्म पुर्याएको छ । यस योजनामा सहभागी हुन, बिर्कोको तल्लो भागमा रहेको ८ अंकको यूनिक कोर्ड ३६७६८ मा एसएमएस गर्नुहोस् । यस अफर समावेश नभएका बोतलहरु पनि बजारमा उपलब्ध छ । नियम र शर्तहरुका बारेमा राष्ट्रिय दैनिक पत्रिका, अनलाइन र कोका–कोला नेपालको फेसबुक पेजबाट जानकारी लिन सकिने जनाइएको छ ।
सरकारको ढुकुटीमा १३१ अर्ब मात्रै, भित्रिने भन्दा बाहिरिने रकमले बढायो चिन्ता
काठमाडौं । नेपालको ढुकुटीमा जम्मा १३१ अर्ब ९४ करोड रुपैयाँ बाँकी रहेको छ । नेपाल राष्ट्र बैंकले सार्वजनिक गरेको फागुन मसान्तसम्मको तथ्यांक अनुसार नेपाल सरकारको ढुकुटीमा १ खर्ब ३१ अर्ब ९४ करोड रुपैंयाँ मात्रै रहेको देखाएको हो । सो रकममध्ये पनि ५० अर्ब ९६ करोड रुपैंया भने स्थानीय तहको पैसा हो । ८ महिनाको चालु घाटा विस्तार भएर १९१ अर्ब १३ करोड पुगेको छ । जुन अघिल्लो वर्षको सोही अवधीमा जम्मा १५४ अर्ब ९९ करोड मात्रै रहेको थियो । ८ महिनामा शोधनान्तर स्थिति ५८ अर्ब ९९ करोडले घाटामा रहेको छ । अघिल्लो वर्षको सोही अवधिमा शोधनान्तर स्थिति २४ अर्ब ७३ करोडले घाटामा रहेको थियो । अमेरिकी डलरमा शोधनान्तर स्थिति अघिल्लो वर्षको आठ महिनामा २४ करोड १४ लाखले घाटामा रहेकोमा समीक्षा अवधिमा ५१ करोड ८१ लाखले घाटामा रहेको छ ।
अजोड इन्स्योरेन्स लिमिटेडको बिराटनगर शाखा उद्घाटन
काठमाडौँ । अजोड इन्स्योरेन्स लिमिटेडको बिराटनगर शाखा कार्यालयको उद्घाटन भएको छ । योजना आयोग प्रदेश नं. १ का उपाध्यक्ष सुवोधराज प्याकुरेल तथा अजोड इन्स्योरेन्स लि.का संचालक समितिका अध्यक्ष डा. बिनोदप्रसाद बिष्टबाट उद्घाटन भएको हो । उक्त उद्घाटन समारोहमा संस्थाका सहायक महाप्रबन्धक महेशराज खरेलले संस्थाको परिचय, समग्र अवस्था, गतिबिधि, भावी कार्य योजना तथा कम्पनीको समग्र अवस्थाका बारेमा प्रकाश पारे । उक्त अवसरमा अजोड इन्स्योरेन्स लि.का क्षेत्रीय शाखा प्रबन्धक तथा बिराटनगर शाखा प्रमुख केदारबहादुर खत्री र नेपाल पत्रकार महा संघ १ नं. प्रदेश समिति अध्यक्ष विक्रम लुइटेलले मन्तव्य व्यक्त गरेका थिए । कार्यक्रमलाई समापन गर्दै कार्यक्रमका अध्यक्ष तथा संचालक समितिका अध्यक्ष डा. बिनोदप्रसाद बिष्टले संस्थाको प्रधान कार्यालय सहित ३० वटा शाखा संचालनमा रहेको बताए ।
भारतको मैसुरमा कुमारी बैंक लिमिटेड पुरस्कृत
काठमाडौँ । भारतको मैसुरमा सम्पन्न Infosys Finacle Client Innovation Award 2019 मा कुमारी बैंक लिमिटेड पुरस्कृत भएको छ । यसरी Infosys Finacle बाट सम्मानित हुनेमा अहिले सम्म कुमारी बैंक पहिलो नेपाली बैंक हो । आफ्नो कोर बैंकिङ्ग सफ्टवेयर जम्मा ४.५ महिनाको छोटो अवधिमा फिनाकल भर्सन १० मा माइग्रेशन प्रक्रिया सम्पन्न गरेकोमा कुमारी बैंक उक्त अवार्डले सम्मानित भएको हो । प्राविधिक रुपान्तरण, सही प्रयोग तथा श्रृजनशीलता जस्ता बुंदाहरुलाई आधार मानेर उक्त अवार्ड दिने गरिन्छ । Infosys Finacle को उक्त समारोहको यस संस्करणमा “Accelerated Transformation” विधामा कुमारी बैंक विजेता भएको हो । सोही विधामा अरु बैंकमध्ये पन्जाब नेशनल बैंक विजेता तथा ICICI Bank, Andhra Bank र Emirates NDB (UAE) उपविजेता भएका छन् । अन्र्तराष्ट्रिय मञ्चमा नवीन बैंकिङ्ग प्रविधिमा प्रतिष्ठित मानिने उक्त अवार्डले सम्मानित भए पश्चात् आगामी दिनमा अझ आधुनिक एवं प्रभावकारी बैंकिङ्ग सेवाहरु प्रदान गर्दै जाने प्रतिबद्धता बैंकले जनाएको छ ।
सिराहाको लाहानमा अजोड इन्स्योरेन्सको नयाँ शाखा
काठमाडौँ । अजोड इन्स्योरेन्स लिमिटेडले सिरहाको लाहानमा शाखा बिस्तार गरेको छ । लाहान शाखा कार्यलयको उद्घाटन प्रमुख कार्यकारी अधिकृत कुमारबहादुर खत्रीको अध्यक्षता तथा उद्योग वाणिज्य संघ सिराहाका अध्यक्ष अशोकलाल अमात्यबाट सम्पन्न भएको छ । सो उद्घाटन समारोहमा संस्थाका नायब कार्यकारी अधिकृत सुरेन्द्र थापाले संस्थाको परिचय, समग्र अवस्था, गतिबिधि, भावी कार्य योजन तथा कम्पनीको समग्र अवस्थाका बारेमा प्रकाश पारे । उक्त अवसरमा शेख मिडिया हाउस प्रालिका अध्यक्ष फिरोज शेख तथा रेडियो समग्र लाहानका अध्यक्ष भैरब गेलालले शुभकामना मन्तव्य व्यक्त गरेका थिए । कार्यक्रमलाई समापन गर्दै संस्थाका प्रमुख कार्यकारी अधिकृत खत्रीले संस्थाको प्रधान कार्यालय सहित ३० वटा शाखा सञ्चालनमा रहेको र संस्थाले निर्जीवन बीमाका सम्पूर्ण सेवा सुबिधाहरु तथा दावी भुत्तानी छिटो र छरितो तरिकाले उपलब्ध गराउन शाखाको स्थापना गरिएको जानकारी गराए ।
१४ क्यासिनोले पर्यटन विभागलाई तिरेनन् २८ करोड, तीन क्यासिनो इजाजत बिनै सञ्चालन
काठमाडौँ । मुलुकका विभिन्न स्थानमा सञ्चालित क्यासिनोले रु २८ करोडभन्दा बढी बक्यौता रकम तिर्न अटेर गरेका छन् । चार क्यासिनो सञ्चालकका १४ क्यासिनोले नियामक निकाय पर्यटन विभागलाई रु २८ करोड ७५ लाख ५४ हजार २५ बक्यौता तिर्न बाँकी छ । क्यासिनो ह्याप्पीआवर प्रालिले सञ्चालन गरेको चार क्यासिनोबाट रु १४ करोड ६६ लाख ४३ हजार ७५० बक्यौता रहेको छ । ह्याप्पीले आर्थिक वर्ष २०७१ सालदेखि २०७४ सालसम्मको रोयल्टी रकम बुझाएको छैन । यो कम्पनीले होटल स्वीटड्रिम महेन्द्रनगर, होटल लाकौल भैरहवा, होटल स्नेहा नेपालगञ्ज र होटल ढाका काँकडभिट्टामा गरी चार स्थानमा क्यासिनो सञ्चालन गर्दै आएका छन् । त्यस्तै रक इन्टरनेशनल प्रालिबाट रु पाँच करोड ६९ लाख ४५ हजार २७५ बक्यौता तिर्न बाँकी छ । काठमाडौँको ओरियन्टल होटलमा सञ्चालन गरेको क्यासिनो र्याडसहित विभिन्न जिल्लाका पाँच स्थानमा क्यासिनो सञ्चालन गरेको छ । होटल साथी धनगढी, होटल सुरज वीरगञ्ज, होटल नान्स भैरहवा, होटल रियाज काँकडभिट्टामा क्यासिनो सञ्चालन गरेका छन् । गील्ट इन्भेष्टमेन्ट प्रालिको रु आठ करोड ३९ लाख ६५ हजार बक्यौता रकम बुझाउन बाँकी छ । उक्त कम्पनीअन्तर्गत होटल याक एण्ड यतिमा सञ्चालन गरेको रोयल क्यासिनोले तीन वर्षदेखि रोयल्टी रकम बुझाएको छैन । त्यस्तै, सेन्ट्ररल मिडिया प्रालिले सञ्चालन गरेको सि एमजी क्लब मिनी क्यासिनोले होटल ओपेरा महेन्द्रनगर, होटल भिस्वा वीरगञ्ज, होटल रत्ना विराटनगर, होटल प्लाटिनियम काठमाडौँमा गरी चार स्थानमा सञ्चालन गरेको क्लबको समेत बक्यौता रहेको विभागले जनाएको छ । र्याड क्यासिनो, रोयल क्यासिनो, एमजी क्लब (मिनी क्यासिनो) सर्वोच्च अदालतको अन्तरिम आदेशको भरमा चलिरहेका छन् । क्यासिनो नियमावली २०७० बमोजिम पर्यटन विभागमा सात क्यासिनो दर्ता भएका छन् । ठूला क्यासिनो छ र मिनि क्यासिनो एक गरी सात नयाँ क्यासिनो दर्ता भएको पर्यटन विभागको घरबास ‘होमस्टे’ शाखाले जनाएको छ । ठूला क्यासिनोका लागि रु तीन करोड र साना क्यासिनोलाई ७५ लाख शुल्क तोकिएकोमा आव २०७५/७६ देखि क्यासिनो सञ्चालन रोयल्टी शुल्कमा वृद्धि भएको छ । आव २०७१/७२ देखि क्यासिनोले बक्यौता बुझाएका छैनन् । क्यासिनो सञ्चालक बक्यौता शुल्क नबुझाई अदालत जाने गर्दा बक्यौता रकम थपिने गरेको पर्यटन विभागले जनाएको छ । नयाँ नियमावलीअनुसार ठूला क्यानिसो सञ्चालन गर्दा चार करोड र साना क्यासिनो सञ्चालनका लागि रु एक करोड तिर्नुपर्छ । ठूला क्यासिनो सञ्चालन गर्न २५ करोड पूँजी र सानो क्यासिनो सञ्चालन गर्न १५ करोड पूँजी आवश्यक पर्छ । तीन क्यासिनो बिना इजाजत सञ्चालनमा हाल सञ्चालनमा रहेका तीन क्यासिनोले इजाजतपत्र नलिएको पाइएको छ । महालेखा परीक्षकको ५६ औँ वार्षिक प्रतिवेदनले तीन क्यासिनोले स्वीकृति नलिई सञ्चालन गरेको भन्दै कारवाहीमा गरी दुई कम्पनीको रु एक करोड र चार स्थानमा सञ्चालित एक कम्पनीको रु दुई करोडसमेत गरी रु चार करोड इजाजतपत्र दस्तुर असुल गर्नुपर्ने ठहर गरेको छ । आर्थिक ऐन, २०७४ अनुसार आर्थिक वर्ष सकिएको दुई महीनाभित्र रोयल्टी नबुझाउने निकायलाई रोयल्टी रकमको वाषिर्क १५ प्रतिशतका दरले शुल्क र त्यस्तो म्याद नाघेको मितिले तीन महीनासम्ममा रकम नबुझाएमा वार्षिक १५ प्रतिशतका दरले थप शुल्कसमेत लगाई क्यासिनोको रोयल्टी असुल गर्नुपर्ने व्यवस्था छ । गत वर्ष एक कम्पनीले रु तीन करोड र अर्को एक कम्पनीले रु पाँच करोड ७३ लाख ९० हजारसमेत आठ करोड ७३ लाख ९० हजार रोयल्टी नबुझाएको हुँदा थप शुल्कसमेत लगाई असुल गर्नुपर्ने महालेखाको प्रतिवेदनमा उल्लेख छ । आधुनिक मेशिन वा उपकरणको माध्यमबाट खेलाइने खेल (क्यासिनो) को लागि एक इजाजतपत्रबाट एक स्थानमा मात्र त्यस्तो खेलाउन सकिनेमा एक मिनी क्यासिनोबाट महेन्द्रनगर, वीरगञ्ज, विराटनगर र काठमाडौँसमेत चार ठाउँमा सञ्चालन गरी एक स्थानको मात्र नवीकरण दस्तुर रु ५० लाख दाखिला गरेको पनि भेटिएको छ । ऐनको व्यवस्थाबमोजिम कारवाही गरी नपुग नवीकरण दस्तुर रु एक करोड ५० लाख असुल गर्न सरकारलाई महालेखाले भनेको छ । केही क्यासिनो सञ्चालकले इजाजत दस्तुर नबुझाई विगतदेखि क्यासिनो सञ्चालन गरिरहेकै स्थानमा नयाँ नामबाट क्यासिनो सञ्चालन हुँदै आएकामा क्यासिनो नियमावली, २०७० अनुसार विभागबाट अनुगमन मूल्याङ्कन तथा कारवाही हुनुपर्नेमा नभएको पाइएको छ । रासस
