नेपालका ३ विद्यार्थी क्याम्ब्रिज विश्वविद्यालयको शीर्ष स्थानमा
काठमाडौँ । नेपालका तीन विद्यार्थी क्याम्ब्रिज इन्टरनेसनल परीक्षा ‘ए’ लेभलमा शीर्ष स्थानमा आएका छन् । मल्पी इन्स्टिच्युटका साकृत कर्माचार्य, जेभियर इन्टनेसनल कलेजका रीतिक यादव र जेम्स इन्स्टिच्युट अफ हाइयर एजुकेसनकी प्रजिता बुढाथोकीले २०१८ को जुन र नोभेम्बरमा सञ्चालित क्याम्ब्रिज इन्टरनेशनल परीक्षामा अब्बल स्थान ल्याएका हुन् । यसैगरी, अन्य ५३ नेपाली विद्यार्थीले उत्कृष्ट क्याम्ब्रिज लर्नर अवार्ड जितेका छन् । हरेक वर्ष प्रदान गरिने अवार्डमा गतवर्ष भन्दा यसपालि नेपाली विद्यार्थीले विभिन्न विधामा गरी ४० प्रतिशत बढी सफलता प्राप्त गरेका हुन् । उत्कृष्ट विद्यार्थीलाई चैत २९ गते सम्मान गरिएको थियो । सम्मान कार्यक्रममा क्याम्ब्रिज इन्टरनेसनलका दक्षिण एसिया क्षेत्र हेर्ने क्षेत्रीय निर्देशक रुचिरा घोसले नेपाली विद्यार्थीको उत्कृष्ट प्रदर्शन देखेर धेरै नै उत्साहित भएको बताइन् ।
लिटल थिएटर ग्यारेजको पाँचौ संस्करणमा रमाउँदै बालबालिका
काठमाडौं । लिटल थिएटर ग्यारेजको पाँचौ संस्करणमा बालबालिका अभिनय कार्यशालामा रमाइरहेका छन्र । हामी बालबालिका हौं, देख्न, सुन्न, महसुस गर्न, सोच्न र कल्पना गर्न सक्छौ’ भन्ने मूल भावका साथ लिटल थिएटर ग्यारेजः बालबालिकाको लागि नाट्य तथा अभिनय कार्यशाला यस वर्ष पनि भइरहेको छ । थिएटर मल र थिएटर सेन्टर फर चिल्ड्रेन (टिसीसी नेपाल) ले हरेक वर्ष गर्ने कार्यशालाको यस वर्ष पाँचौ संस्करण चलिरहेको हो । कीर्तिपुरस्थित राराहिल स्कुलको सहकार्यमा स्थापित थिएटर मलमा सञ्चालन भइरहेको लिटल थिएटर ग्यारेजका ३३ जना बालबालिका रमाइरहेका छन् । काठमाडौं उपत्यकाका विभिन्न स्थानबाट ५ देखि १३ वर्ष उमेर समूहका बालबालिका कार्यशालामा सहभागी भएका हुन् । थिएटरका विभिन्न खेल तथा क्रियाकलापहरु मर्फत अभिनयको साथमा उनीहरुको व्यक्तित्व विकासका सघाउ पुर्याउने उद्धेश्य साथ कार्यशालाको ढाँचा तयार पारिएको छ । उनीहरुले कार्यशालामा कथावाचान, चित्रकला, नृत्य, वतृत्वकला, क्ले आर्ट तथा अभिनयका विभिन्न क्रियाकलापमा सहभागी भइसकेका छन् । कार्यशालाको अन्तिम दिन उनीहरुले अतिथि र अभिभावकका माझ ३ वटा नाट्य प्रस्तुति दिँदैछन् । साथमा कार्यशालामा सिकेका र अभ्यास गरेका अन्य प्रस्तुति पनि रहनेछन् । हरेक वर्ष चैत २० गतेबाट सुरु हुने १५ दिने कार्यशाला बैशाख ७ मा सम्पन्न हुनेछ । बालरंगमञ्च सम्बन्धी अन्तर्राष्ट्रिय संगठनको नेपाल सेन्टर आसितेज नेपालको सहकार्यमा कार्यशालालाई थिएटर मल र टिसीसी नेपालले २०७१ सालदेखि निरन्तरता दिँदै आएको छ । नेपालमा बाल रंगमञ्चलाई चेतनासहित स्थापना गर्न लागिरहेका युवा रंगकर्मी केदार श्रेष्ठको नेतृत्वमा कार्यशालाले सनरन्तरता पाइरहेको छ । उनी आयोजक संस्थाका कला निर्देशक पनि हुन् । साथमा युवा कलाकर्मीहरु इलिना नकर्मी, सञ्जिता पराजुली, सविर चुरौटै, अरुण पौडेल, सुजन महत, सुजिता महर्जन छन् । नेपालमा बाल रंगमञ्च स्थापना गर्दै यसको नियमितता र विकासका लागि खोलिएको थिएटर सेन्टर फर चिल्ड्रेनले आफ्ना नाट्य प्रस्तुतिहरु राष्ट्रियदेखि अन्तर्राष्ट्रिय स्तरसम्म मञ्चन गरिसकेको छ । गत फागुन नेपाल अन्तर्राष्ट्रिय नाट्य महोत्सवसहित कीर्तिपुरमा पुनःस्थापना भएको थिएटर मलले यही महिनाबाट नियमित नाटक मञ्चन थाल्दैछ ।
साताको चौथो दिन सुन प्रतितोला ५९ हजार ३ सयले कारोबार
काठमाडौं । बुधबार सुन प्रतितोला ५९ हजार ३ सय रुपैयाँमा कारोबार भईरहेको छ । मंगलबार प्रतितोला ५९ हजार ६ सय रुपैयाँमा कारोबार भएको सुन ३ सय रुपैयाँ घटेर सो मुल्यमा कारोबार भईरहेको हो । त्यस्तै मंगलबार तेजावी सुन प्रतितोला ५९ हजार ३ सय रुपैयाँमा बिक्री भएको सुन बुधबार प्रतितोला ५९ हजार रुपैयाँमा कारोबार भईरहेको छ । त्यस्तै चाँदी मंगलबारको तुलनामा ५ रुपैयाँ बढेर ७२५ रुपैयाँमा बिक्री भईरहेको नेपाल सुनचाँदी महासंघले जानकारी दिएको छ ।
सम्झौता भन्दा १५ फिट अग्लो भवन बन्ने भएपछि विमानस्थलको अन्डर पार्किङ असुरक्षित
काठमाडौं । त्रिभुवन अन्तर्राष्ट्रिय विमानस्थलको अन्डर पार्किङ असुरक्षित देखिएको छ । निर्माण जिम्मा लिएको रसुवा केडी जेभीले सम्झौता विपरित पार्किङ निर्माण गरेपछि अन्डर पार्किङ असुरक्षित देखिएको हो । जेभीले नागरिक उड्ययन प्राधिकरणसँग गरेको सम्झौता अनुसार ३७ फिट अग्लो व्यापारिक भवन निर्माण गर्ने उल्लेख गरिएको थियो । तर, अन्डर ग्राउण्ड पार्किङ सहित १५ फिट बढाएर ५२ फिटको भवन निर्माण गरेको हो । महालेखा परीक्षकको प्रतिवेदन अनुसार रिभाइज ड्रइङ कार्यालयबाट स्वीकृत नभई निर्माण कार्य थालेकोले गुणस्तरको पार्किङ बन्न नसकेको हो । ठेक्का शर्तमा रहेको संरचना अनुसारको भवन निर्माण नगरी पृथक शैलीमा निर्माण गर्दा प्राधिकरणलाई आर्थिक तथा गुणस्तरमा गम्भीर असर पर्नेमा कार्यालयले सजग गराएको छ । कम्पनीले सो भवन काठमाडौं महानगरपालिकाबाट नक्सा पास नगरी बनाएको छ । ३० वर्षपछि प्राधिकरणको स्वामित्वमा आउने सो जग्गाको भाडा वार्षिक ७८ लाख रुपैंया तोकिएको छ । तर, समयमै निर्माण कार्य सम्पन्न नहुँदा प्राधिकरणले हालसम्म भाडा वापतको रकम प्राप्त गर्न सकेको छैन् । ५० रोपनी १५ आना ३ दाम क्षेत्रमा फैलिएको यो भवन वरपर सवारी पार्किङ, बाहिरिने मार्ग, यात्रु प्रतिक्षालय, चमेनागृह, बनाउने सम्झौता भएपनि नबन्ने पक्का भएको छ । यस्तै, सहमति अवधिबाटै वार्षिक भाडा बुझाउने सम्झौता भएपनि ७ वर्षसम्म कम्पनीले भाडा तिरेको छैन । सम्झौताको बुदाँ ३ मा सवारी बाहिरिने मार्ग व्यवसायीले निर्माण गर्नुपर्ने उल्लेख गरिएको छ । तर, प्राधिकरणले नै अर्को ठेक्काको वन्दोबस्त गरी ३ करोडमा बाहिरिने बाटो निर्माण गराएको छ । हाल पार्किङमा रहेको सवारी मार्गबाट चक्रपथ निक्कने गरेका छन् । विमानस्थलमा संरचना निर्माण गर्न कम्पनीले २०६७ भदौ १७ गते सहमति लिएको थियो । सहमतिमा २१ महिनामै निर्माण कार्य सम्पन्न उल्लेख गरेतापनि कम्पनीले हालसम्म निर्माण कार्य सम्पन्न गरेको छैन ।
बालुवाटार जग्गा प्रकरणः अख्तियारभित्रै सेटिङ प्रयास
काठमाडौँ । बालुवाटारस्थित ललिता निवासको जग्गा कानुनविपरीत व्यक्तिका नाममा दर्ता गरिएको विषयमा छानबिन प्रभावित पार्न खोजेको पुष्टि भएपछि अख्तियार दुरुपयोग अनुसन्धान आयोगले एक महाशाखा प्रमुखलाई ‘अघोषित कारबाही’ गरेको छ । अख्तियारले अनुसन्धान महाशाखाका प्रमुख हरिप्रसाद जोशीलाई महान्यायाधिवक्ता कार्यालयमा फिर्ता पठाएको हो । ‘ललिता निवासको जग्गासम्बन्धी उजुरी छानबिनका लागि अख्तियारले उहाँलाई नै अनुसन्धान अधिकृत तोकेको थियो,’ स्रोतले भन्यो, ‘उहाँका कतिपय क्रियाकलापबारे उजुरी आएपछि निगरानी बढाएका थियौं, केही क्रियाकलाप पदीय मर्यादा र आचारसंहिताविपरीतको पुष्टि भएपछि यहाँ राख्नु ठीक हुँदैन भनेर महान्यायाधिवक्ता कार्यालय फिर्ता गरिदिन आग्रह गरेका हौं, उहाँ फिर्ता जाँदै हुनुहुन्छ ।’ जोशीले ललिता निवासबारे पेस गरेको अनुसन्धान प्रतिवेदनसमेत विश्वासिलो नभएपछि अख्तियारले छिट्टै नयाँ अनुसन्धान अधिकृत तोक्ने तयारी गरेको छ । महान्यायाधिवक्ता अग्नि खरेलको सचिवालयले भने जोशीको नियमित सरुवा भएको फ्रतिक्रिया दियो । अर्को स्रोतका अनुसार सरकारी वकिल समूहका सहन्यायाधिवत्ता जोशीले ललिता निवासको जग्गासम्बन्धी उजुरीबारे बुझ्नुपर्ने भन्दै उजुरीकर्ताहरूलाई अख्तियारभित्रै बोलाएका थिए । एक उजुरीकर्ताका अनुसार उनले बोलाएर कार्यालयमा उजुरीपत्र खोज्न थाले तर भेटेनन् । ‘त्यसपछि जिल्ला अदालतमा विचाराधीन मुद्दा फैसला भइसकेको भन्दै त्यसको पुनरावेदन नहुने वातावरण बनाउन आग्रह गरे,’ एक अधिकृतले भने, ‘तपाईंहरूको समूहले आफ्नै पहलमा मुद्दामामिला गरेको हो कि कुनै संस्थाको सहयोग छ भन्दै उहाँले सबैतिर मिलिसकेकाले पुनरावेदनको झन्झटमा नफस्न सुझाव दिए ।’ स्रोतका अनुसार त्यतिबेला जोशीले यति आत्मविश्वासका साथ कुराकानी गरेका थिए कि, केही अधिकृतहरू वरपर नै भए पनि उनले परवाह गरेनन् । आजको कान्तिपुर दैनिकमा समाचार छ ।
जेठ ३ देखि ५ गतेसम्म नेपाल इन्टरनेशनल जेम एण्ड ज्वेलरी एक्स्पो हुने
काठमाडौँ । नेपाल सरकार, उद्योग, वाणिज्य तथा आपूर्ति मंत्रालय, खानी तथा भूगर्भ विभाग र नेपाल सुनचाँदी रत्न तथा आभूषण महासंघको संयुक्त आयोजनामा २०७६ जेठ ३, ४ र ५ गते काठमाडौंमा “नेपाल अन्तर्राष्ट्रिय जेम एण्ड ज्वेलरी एक्स्पो” आयोजना हुने भएको छ । स्वदेशी रत्न पत्थर तथा खनिजको प्रवद्र्धन गरी आभुषणको निर्यात विस्तार एवम् आयात प्रतिस्थापनमा टेवा पुर्याउने मूल उद्देश्यका साथ एक्स्पो आयोजना हुन लागेको आयोजकले जनाएका छन् । नेपालको भूगर्भमा रहेका विभिन्न रत्न पत्थर खनिज एवम् नेपाली गरगहनाको मौलिकता, विविधता, विशिष्टता आदि पक्षलाई राष्ट्रिय तथा अन्तर्राष्ट्रिय क्षेत्रमा उजागर गरी निर्यात प्रवद्र्धन, रोजगारी विस्तार एवं राजश्व अभिवृद्धिमा थप योगदान गर्ने मूलभूत उद्देश्यका साथ यस एक्स्पोको आयोजना गरिएको हो । रत्न पत्थर खनिजको प्रवद्र्धन एवं नेपाली आभुषणलाई अन्तर्राष्ट्रिय बजारमा निर्यात गर्न व्यवसायीहरुलाई अभिपे्ररित गर्न र विदेशी आभुषण व्यवसायीलाई नेपालीमा पूँजी तथा प्रविधि निवेश गर्न प्रोत्साहित गर्ने हुँदा प्रत्यक्ष कारोबार भन्दा पनि अर्थतन्त्रमा यसले पु¥याउने दूरगामी प्रभाव अझ महत्वपूर्ण हुने सम्भावना छ । विभाग परिसरमा हुने एक्स्पोमा स्वदेशी र विदेशी गरी ७० वटा कम्पनीहरुको सहभागिता रहनेछ । एक्स्पोमा सहभागिता एवं सहयोगका लागि मुलुकभरका यस क्षेत्रका खनिजजन्य उद्यमी, गरगहना व्यवसायीहरुका प्रतिनिधिमूलक महासंघ, संघहरुको सहभागिता रहने छ । अन्तर्राष्ट्रिय क्षेत्रमा भारत, श्रीलंका लगायत सम्पूर्ण सार्क राष्ट्रहरु, चीन, थाइल्याण्ड, र जापान तथा युरोपियन राष्ट्रहरुमा समेत सहभागीको लागी अनुरोध गरिने आयोजकले जनाएका छन् ।
शिक्षा र स्वास्थ्यको बजेटलाई रकमान्तर गर्दै मेयर छोरालाई मन्त्रीको २४ करोड
जनकपुर । शिक्षा र स्वास्थ्यको बजेटलाई रकमान्तर गरेर प्रदेश २ का सामाजिक विकासमन्त्री नवलकिशोर साहले छोरा मेयर रहेको नगरपालिकालाई २४ करोड रुपैयाँ फुटकर योजनामा विनियोजन गरेका छन् । आर्थिक वर्षको अन्त्यतिर कर्मचारी र व्यवस्थापन समस्या देखाउँदै मन्त्रालयले शिक्षा र स्वास्थ्यमा खर्च गर्न विनियोजन गरिएको ७० करोड रुपैयाँ फुटकर योजनामा रकमान्तर गरेको हो । सप्तरीको हनुमाननगर नगरपालिकामा मात्रै २४ करोड रुपैयाँ फुटकर विनियोजन गरिएको छ । हनुमाननगर नगरपालिकाका मेयर शैलेशकुमार साह मन्त्री नवलकिशोरका जेठो छोरा हुन्। राष्ट्रिय जनता पार्टी (राजपा) बाट बाबुछोराले चुनाव जितेका हुन्। छोरा मेयर रहेको हनुमाननगर नगरपालिका मन्त्री साहको संसदीय क्षेत्र पनि हो । आजको कान्तिपुर दैनिकमा समाचार छ ।
सरकारलाई छल्दै एनजीओद्वारा ६ अर्ब ३८ करोड खर्च
काठमाडौं । नेपालका विभिन्न गैरसरकारी संघसंस्थाले सरकारलाई छलेर आफूखुसी ६ अर्ब ३८ करोडभन्दा बढी रकम खर्च गरेको पाइएको छ । ती गैरसरकारी संघसंस्थाले गत तीन वर्षको अवधिमा अर्थ मन्त्रालयको सहायता व्यवस्थापन सूचना प्रणाली ९एएमपी० र समाज कल्याण परिषद्समेतलाई थाहै नदिई दाताबाट रकम ल्याएर आफूखुसी खर्च गरेका हुन् । परियोजना नै स्वीकृत नगराई गैरकानुनी रूपमा आर्थिक वर्ष २०७४/७५ मा ६३ वटा संस्थाले ४ अर्ब २३ करोड २३ करोड ५५ लाख ११ हजार रुपैयाँ खर्च गरेका छन् । यस्तै, आर्थिक वर्ष २०७२/७३ मा ४२ संस्थाले ६१ करोड ८८ लाख ८९ हजार रुपैयाँ खर्च गरेका थिए भने आर्थिक वर्ष २०७३/७४ मा १५८ संस्थाले १ अर्ब ५२ करोड ७२ लाख २० हजार रुपैयाँ खर्च गरेका छन् । महालेखा परीक्षकको कार्यालयले त्यसरी आफूखुसी खर्च गर्ने गैरसरकारी संस्थामाथि छानबिन गरी कारबाही गर्न सरकारलाई सुझाएको छ । महालेखा परीक्षक टंकमणि शर्माले गैरसरकारी संस्थाले सरकारी निकायलाई छलेर परियोजना नै स्वीकृत नगराई अर्बौँ रुपैयाँ खर्चनु अनियमितताको उग्ररूप भएको बताए । ‘त्यस्ता गैरसरकारी संस्थामाथि सरकारले छानबिन गरी दोषीमाथि कारबाही गर्नुपर्छ,’ महालेखा परीक्षक शर्माले भने । कानुनतः नेपालका गैरसरकारी संस्थाले आईएनजीओ र दातामार्फत रकम ल्याउँदा समाज कल्याण परिषद्मा अनिवार्य रूपमा परियोजना र बजेट स्वीकृत गराउनुपर्छ भने त्यसको जानकारी अर्थ मन्त्रालयको सहायता व्यवस्थापन सूचना प्रणालीलाई गराउनुपर्छ तर ती एनजीओले यी दुवै प्रक्रिया पूरा नगरी हचुवाका भरमा अर्बौँ रुपैयाँ खर्च गरेको पाइएको हो । परियोजना नै स्वीकृत नगराई नेपाल अपांग महिला संघ, काठमाडौँले एजेडब्लुएस (अमेरिका)बाट आर्थिक वर्ष २०७४/७५ मा ३ अर्ब ३७ करोड १४ लाख ४४ हजार रुपैयाँ खर्च गरेकाले सो रकममाथि समेत प्रश्न चिह्न सिर्जना भएको छ । महालेखा परीक्षकको कार्यालयले त्यसरी सरकारलाई छल्दै अर्बौँ रुपैयाँ खर्चने गैरसरकारी संस्थामाथि छानबिन गरी कानुनअनुसार दण्डको व्यवस्था गर्न सरकारलाई सुझाएको हो । समाज कल्याण नियमावली, २०४९ को नियम १२ मा समाज कल्याण परिषद्ले नेपालभित्र समाज कल्याणसम्बन्धी काममा सहयोग गर्न चाहने अन्तर्राष्ट्रिय संस्थालाई अनुमति दिने र नेपालभित्र काम गर्नुअघि परिषद्सँग सम्झौता गर्नुपर्ने प्रावधान छ । परिषद्द्वारा जारी वैदेशिक सहयोग स्वीकृतसम्बन्धी निर्देशिका, २०७१ मा पनि सम्झौताबिना नै कार्यक्रम गरेमा दण्डात्मक व्यवस्था गर्ने उल्लेख गरिएको छ तर सो विपरीतको काम हँुदासमेत परिषद्ले कुनै कारबाही गर्न सकेको छैन । समाज कल्याण परिषद्का सदस्य सचिव राजेन्द्रकुमार पौडलले महालेखाले दिएको सुझावका आधारमा परियोजना स्वीकृतबिना नै अर्बौँ रुपैयाँ खर्चने गैरसरकारी संस्थामाथि आवश्यक छानबिन थालिने जानकारी दिए । आजको राजधानी दैनिकमा समाचार छ ।
