समाज कल्याण परिषद्मा ५० हजार संस्था दर्ता, एकैवर्ष थपिए २ हजार
काठमाडौं । समाज कल्याण परिषद्मा २०७५ साल भित्र २ हजार २ सय २७ संस्था दर्ता भएका छन् । परिषद्मा वि.सं. २०३४ साल कार्तिक ११ गते नेपाल रेडक्रस सोसाइटी गैर सरकारी संस्थाका रुपमा पहिलो पटक दर्ता भएको थियो । परिषद्को तथ्याङ्ग अनुसार २०७६ साल बैशाख ६ गतेसम्म ४९ हजार ९ सय ४१ गैरसरकारी संस्था दर्ता भएका छन् । दर्ता भएका ती संस्थामध्ये करीब ३ हजार मात्र सक्रियरुपमा कार्यरत रहेको परिषद्ले जनाएको छ । संघसंस्था दर्ता ऐन २०३४ को अनुसार संस्था दर्ता भएपनि सो संस्था बन्द गर्न पाउने व्यवस्था नरहेकाले दर्ता संख्या धेरै देखिएको जनाइएको छ ।
यूनाईटेड फाइनान्सको सीईओमा मिश्र नियुक्त
काठमाडौं । यूनाईटेड फाइनान्स लिमिटेडको प्रमुख कार्यकारी अधिकृत(सीईओ)मा अजयकुमार मिश्र नियुक्त भएका छन् । संस्थाको संचालक समितिको २३२औँ बैठकले मिश्रलाई सीईओ पदमा नियुक्त गरेको हो । समितिले गत वैशाख ६ गतेदेखि लागू हुने गरी मिश्रलाई संस्थाको सीईओमा नियुक्त गरेको हो ।
स्वास्थ्य राज्यमन्त्री यादवको अस्पतालमा नर्स मृत फेला
काठमाडौं। स्वास्थ्य राज्यमन्त्री डा. सुरेन्द्र यादवको जनकपुर स्थित निजी अस्पतालमा कार्यरत एक नर्स मृत अवस्थामा फेला परेकी छिन्। जनकपुर स्थित जानकी हेल्थ केयर एण्ड रिसर्च सेन्टरको शौचालयमा उही अस्पतालमा कार्यरत नर्स झुण्डिएको अवस्थामा फेला परेको हो। महोत्तरी स्थायी घर भएकी नर्सको नाम रक्षा आले बताईएको छ। आइतबार बिहान उनका आफन्त पुगेपछि प्रहरीले प्रक्रिया पुर्याएर शव पोष्टमार्टमका लागि जनकपुर अञ्चल अस्पताल लगेको छ। अस्पतालले घटनालाई आत्महत्या गरेको बताए पनि परिवारले घटना रहस्यमय बनेको भन्दै छानबिन हुनुपर्ने माग गरेका छन्।
लुम्बिनी इन्स्योरेन्स आमन्त्रित गल्फ प्रतियोगिता सम्पन्न
काठमाडौँ । लुम्बिनी जनरल इन्स्योरेन्सको आयोजनामा बैशाख ६ र ७ गते रोयल नेपाल गल्फ क्लब एयरपोर्टमा दुईदिने आमन्त्रित गल्फ प्रतियोगिता सम्पन्न भएको छ । युवा र प्रौढ गरी दुई समूहमा विभाजन गरिएको उक्त टुर्नामेन्ट २०१९ मा ९७ जना खेलाडीको सहभागिता रहेको थियो । जसमा १२ जना साना र ८५ जना सिनियर खेलाडीहरु रहेका थिए । खेलकुद मार्फत पनि आफ्नो गुडविललाई बजारमा लैजान सकिन्छ र खेलको विकासमा सानै भएपनि यस किसिमको सहयोग खेलाडी एवं क्लबलाई गर्न पाएकोमा आफुहरु खुशी भएको लुम्बिनी जनरल इन्स्योरेन्सका अध्यक्ष मनोहरदास मुलले बताए । सो आमन्त्रित गल्फ प्रतियोगिताको उपाधि फिन्टसो लामाले हात पारेका थिए । । विजयी खेलाडीहरुलाई रोयल नेपाल गल्फका अध्यक्ष प्रचण्डबहादुर श्रेष्ठ, इन्स्योरेन्सका अध्यक्ष मनोहरदास मुल र कम्पनीका सिइओ नुरप्रकाश प्रधानले अर्वाड हस्तान्तरण गरेका थिए । वि.सं. २०६१ सालमा स्थापित लुम्बिनी जनरल इन्स्योरेन्सले फेयर अण्डरराइटिङ, स्मार्ट क्लेम सर्भिस र क्वालिटी म्यानेजमेन्टमा आइएसओ मान्यता प्राप्त गर्न सफल भएको छ ।
बिर्तामोडमा अजोड इन्स्योरेन्स लिमिटेडको शाखा
काठमाडौँ । अजोड इन्स्योरेन्स लिमिटेडको बिर्तामोड शाखा कार्यालय उद्घाटन भएको छ । सांसद श्रीप्रसाद मैनाली तथा अजोड इन्स्योरेन्स लि.का संचालक समितिका अध्यक्ष डा. बिनोदप्रसाद बिष्टले संयुक्त रुपमा उद्घाटन गरेका हुन् । उक्त उद्घाटन समारोहमा संस्थाका सहायक महाप्रबन्धक महेशराज खरेलले संस्थाको परिचय, समग्र अवस्था, गतिबिधि, भावीकार्य योजन तथाकम्पनीको समग्र अवस्थाका बारेमा प्रकाश पारे । उक्त अवसरमा अजोड इन्स्योरेन्स लि.का बिर्तामोड शाखा प्रमुख प्रशान्तकुमार राजवंशीबाट स्वागत मन्तव्य व्यक्त गरेका थिए । नेपाल उद्योग वाणिज्य महासंघ केन्द्रीय सदस्य उमेश डालमियाले शुभकामना मन्तव्य व्यक्त गरेका थिए ।
१३१ व्यवसायिक संस्थालाई कर तिर्न राजश्वको ताकेता, कारोबार रोक्का गर्ने
काठमाडौँ । आन्तरिक राजश्व कार्यालय नोपलगञ्ज बाँकेले कर बक्यौता नतिर्ने १३१ वटा व्यवसायिक संस्था र फर्महरुलाई कर तिर्न ताकेता गरेको छ । विभिन्न मितिमा बक्यौता बुझाउन फोन सम्पर्क, पत्राचार र संकलन भ्रमण समेत गरी बक्यौता रकम दाखिल गर्न भनिएकोमा हालसम्म पनि बुझाएका छैनन् । कार्यालयको कार्यक्षेत्रमा पर्ने बाँके र बर्दिया जिल्लाका व्यवसायिक संस्था र फर्मलाई १५ दिन भित्र बक्यौता रकम बुझाउन वा बुझाएको भए प्रमाण पेश गर्न अनुरोध गरेको छ । यो अवधि भित्र बक्यौता नबुझाएमा आयकर ऐन २०५८ को दफा १०४ देखि १११ सम्मको कुनै प्रक्रिया वा मूल्य अभिबृद्धि कर ऐन २०५२ को दफा २१(१) बमोजिम तरिका अपनाई व्यवसायिक कारोबार रोक्का, बैंक खाता रोक्का र घरजग्गा रोक्का लगायतका कारवाही गरि बक्यौता असुल गरिने कार्यालयले जनाएको छ । कर बक्यौता नतिर्नेहरुको सूचिः
नेपाली चिनी उद्योग संकटमा, ‘लागत भन्दा घटीमा बिक्री’
काठमाडौँ । नेपाल चिनी उद्योग संघले चिनी उद्योगीहरु संकटमा पर्दै गएको जनाएको छ । नेपालमा उत्पादित चिनीको बिक्री न्यून हुनु र लागत भन्दा घटी मूल्यमा बिक्री गर्नु गरेकाले संकट उत्पन्न भएको जनाइएको छ । संघले स्वदेशी चिनी उद्योगहरुको वस्तु स्थिति सार्वजनिक गर्दै गतवर्षको उखु क्रसिङ सिजनमा २ अर्ब २५ करोड घाटा व्यहोरेको जनाएको छ । उखु कृषकहरुलाई भुक्तानी दिनका लागि चिनी उद्योगीहरु लागत मूल्य भन्दा पनि घटी कारखाना मूल्य ६३ रुपैयाँ प्रतिकेजीमा चिनी बिक्री गर्न तयार रहेको संघले जनाएको छ । क्रसिङ सिजन २०७४/०७५ मा चिनी उत्पादन लागत कारखानाद्वारा मूल्य ६२ रुपैयाँ र २०७५/०७६ मा ६४ रुपैयाँ ३० पैसा रहेको छ । नेपाल सरकारबाट २०७४ बैशाख ४ गते चिनीमा भन्सार महशुल १५ प्रतिशत वाट ३० प्रतिशत कायम गर्दा पनि विदेशी चिनी निर्वाध रुपमा आयात भएको महालेखाको प्रतिवेदनले समेत पुष्टी गरेको संघले जनाएको छ । २०७५ भदौको अन्तिम साता चिनी आयातमा परिणात्मक बन्देज पश्चात मात्र स्वदेशी चिनी बिक्री भएबाट अधिकांश चिनी उद्योगहरुले गत सिजनमा २०७४/०७५ को उखुको भुक्तानी गर्न सक्षम रहेको संघले जनाएको छ । संघले सार्वजनिक गरेको विवरण अनुसार चालु क्रसिङ सिजनको २०७५ चैत २५ गतेसम्ममा १ लाख ६२ हजार २ सय ५० मेट्रिक टन उत्पादन भएको छ । क्रसिङ चालु रहेकाले २८ हजार २ सय ५० मेट्रिक टन थप चिनी उत्पादन हुनेछ ।अघिल्लो वर्षको मौज्दात ७६ हजार ५ सय ४२ मेट्रिक टन रहेकाले २ लाख ६७ हजार ४२ मेट्रिक टन कूल मौज्दात रहने संघले जनाएको छ । नेपालमा वार्षिक २ लाख ५० हजार मेट्रिक टन चिनीको माग छ । देशको मागलाई पूरा गरी २० हजार मेट्रिक टन चिनी मौज्दात रहने छ ।
पोखरा विश्वविद्यालयका ३४४ विद्यार्थीको बिचल्ली, ठगी गर्ने कलेजलाई के हुन्छ कारबाही ?
काठमाडौं। अन्तत: पोखरा विश्वविद्यालयमा अन्तर्गत रहेका कलेजहरुमा अध्ययनरत डी प्लस ल्याएका ३४४ बिद्यार्थीको रजिष्ट्रेशन नरहने भएको छ। यो संगै ११ र १२ मा ‘डि’ ग्रेड ल्याउने विद्यार्थीले पोखरा विश्वोविद्यालयमा पढ्न नपाउने भएका छन्। विश्वोविद्यालयले शनिबार विज्ञप्ती निकाल्दै आफु अन्तर्गत रहेका कुनै पनि कलेजले डी प्लस ल्याएका बिद्यार्थी भर्ना गरेको पाइए वा पुनः नियम उलंघन गरेको अवस्थामा सम्बन्धित कलेजको सम्बन्धन खारेज हुन सक्ने पनि बताएको छ। विश्वोविद्यालय लामो समय देखी डि ग्रेड ल्याएका विद्यार्थीको रजिस्ट्रेसको बिषयलाई लिएर चर्काचर्की चलिरहेको थियो। गत जेठ्मा विश्वविद्यालय प्राज्ञिक परिषद् बैठकले स्नातक तहमा भर्ना हुन पाउने योग्यतासम्बन्धी सूचना जारी गरेको थियो जसमा कक्षा ११ र १२ मा हरेक बिषयमा न्युनतम सि ग्रेड ल्याउने विद्यार्थीले पोखरा विश्वोविद्यालयमा अध्ययन गर्ने पाउने बताईएको थियो। तर विश्वविद्यालयबाट मान्यता प्राप्त कलेजले भने मापदण्ड आफुखुसी व्याख्य गरेर समग्रमा सि ग्रेड ल्याउने विद्यार्थीलाई पनि भर्ना गरेका थिए। विश्वोविद्यालयबाट सम्बन्ध प्राप्त ४२ कलेज मध्ये ३८ कलेजले मापदण्ड मिचेर भर्ना लिएको पाईएको परिक्षा नियन्त्रण कार्यलयले बताएको छ। यसमा पनि सबैभन्दा धेरै एपेक्स र क्वेस्ट इन्टरनेसनल कलेजले २२-२२ जना विद्यार्थी मापदण्ड विपरित भर्ना गरेका छन्।
