सुनिल गिरी र पुनम मिश्रको “कोसेली” बजारमा
काठमाडौं । गायक सुनिल गिरी र पुनम मिश्रको नयाँ गीत भिडियो सहित सार्वजनिक भएको छ ।गीतको लय तथा संगीत सुनिल गिरीकै रहेको सो गीतमा गिरीलाई अभिनयमा अन्जली मगरले साथ दिएकी छन् । सर्जन थापा मगरले निर्देशन गरेको सो म्युजिक भिडियो अनिल मानन्धरले क्यामेरामा कैद गरेका थिए । ‘को होला त्यो’, ‘देउराली’, ‘परदेशी’ ‘सोल्टीना’ आदि चर्चित गीत निकालेका गिरीले “कोसेली” गीतको भिडियो युट्युबमा सार्वजनिक भएको छ । भिडियो हेर्न तल क्लिक गर्नु होस् ।
एकल बिन्दु सेवा केन्द्रको भवन अझै बनेन्, उद्योगी/व्यवसायीले सेवा पाउने कहिले ?
काठमाडौं । उद्योग विभाग अन्तरगतको एकल बिन्दु सेवा केन्द्रको कार्यालय भवन २ पटक समय सकिंदा समेत निर्माण सम्पन्न भएको छैन । उद्योगी व्यवसायीलाई सहज ढंगले सेवा पुर्याउन केन्द्रको कार्यालय निर्माण गर्न लागिएको हो । केन्द्रको भवन निर्माणका लागि स्वच्छन्द जयमाता जेभीले १२ करोड २६ लाख ४४ हजार २४९ रुपैयाँमा ठेक्का पाएको छ । २०७५ असार ७ गते भवन सम्पन्न गर्ने सम्झौता भएको थियो । तर २ पटक समय सकिंदा पनि भवन पूर्ण भएको छैन । सम्झौतामा उल्लेख भएको मिति सकियो, तर काम भने सकिएन । काम पूरा गर्नको लागि २०७५ पुस ७ गतेसम्म मिति थप भएको थियो । यो समयसम्म पनि काम सकिएन । स्वच्छन्द जयमाता जेभीका सञ्चालक वृहस्पती गौतमले सम्झौता गरे अनुसारको बजारमा सामान नै नपाउँदा समयमा काम सम्पन्न गर्न नसकेको बताए । अहिले भवनको काम ९८ प्रतिशत सकिएको गौतमले बताए । भवनमा सेरामिट स्टिम जडान गर्ने सम्झौता भएको थियो तर बजारमा त्यसका लागि समान नै पाइएन, त्यसकारण निर्माण पूरा हुन ढिलाई भएको हो–गौतमले बताए । सम्झौता भएको समानमात्र प्रयोग गर्न पाइन्छ, अर्को समान प्रयोग गर्न अनुमति चाहिन्छ उनले भने । कहिले शुरु हुन्छ सेवा ? उद्योग मन्त्रालय अन्तरगत औद्योगिक प्रबद्र्धन महाशाखाका प्रमुख दिनेश भट्टराईले एकल विन्दु सेवा केन्द्र सञ्चालनका लागि राजपत्रमा सूचना प्रकाशन गर्ने प्रक्रियामा रहेको र सूचना प्रकाशित भएपछि भवन निर्माण पूरा नभएपनि अन्य भवनबाट सेवा सञ्चालन हुने बताए । एकल विन्दु सेवा केन्द्र सञ्चालनबाटव्यवसायीले एकै स्थानबाट उद्योग दर्ता, नविकरण लगायतका सम्पूर्ण काम गर्न सक्छन् । व्यवसायीहरुको काम सजिलोसँग गर्नका लागि सो केन्द्रमा राजश्व कार्यालय, अध्ययगमन विभाग, कम्पनी रजिष्ट्रारको कार्यालय, वातावरण कार्यालय, भूमि तथा व्यवस्थापन कार्यालय, उद्योग वाणिज्य महासंघ लगायतका प्रतिनिधिको कार्यालय हुने जनाइएको छ । भवन निर्माण सम्बन्धी विवरण :
२६ आयाेजनामा २५ खर्बको लगानी प्रतिवद्धता, २७ आयाेजनाको छनाैट अगस्टभित्रै हुने
काठमाडौं । लगानी सम्मेलनपछि नेपालमा २५ अर्बको प्रतिबद्धता आएको छ । लगानी बोर्डका अनुसार सरकारी शोकेशमा रहेका ७७ ओटा परियोजनामध्ये २३ ओटा र शोकेशमा समावेश नभएका २६ ओटा परियोजना ४३ ओटा र शोकेशभन्दा बाहिरका ५ ओटा समेत गरी जम्मा ४८ ओटा परियोजनामा उक्त परिमाणमा आवेदन प्राप्त बोर्डले जनाएको हो । प्रतिवद्धता आएका आयोजनाहरुमध्ये कृषि पूर्वाधारमा ५ आयोजनामा ७ ओटा, स्वाथ्य तथा शिक्षा पूर्वाधारमा २ ओटा परियोजनामा २ ओटा, उर्जा पूर्वाधारमा ७ ओटा परियोजनामा ८ ओटा, उद्योगमा एउटा परियोजनामा एउटा, पर्याटनका ३ परियोजनामा ३, यातायातका ९ परियोजनामा २२ ओटा तथा शहरी पूर्वाधारका ४ परियोजनामा ५ ओटा आवेदन प्राप्त भएको बोर्डले जनाएको हो । बोर्डले उक्त आयोजनाहरुमध्ये २७ आयोजनाका लागि अगस्ट २० तारिखभित्रै विकासकर्ता छनौट गरिसक्ने जनाएको छ । त्यस्तै १७ आयोजनाको विकासकर्ता ९ महिनाभित्र छनौट भइसक्ने र बाँकी ६ ओटाका लागि भने १४ महिनाको समय लाग्ने जनाएको छ ।
श्रीलङ्कामा प्रतिष्ठित होटल र गिर्जाघरमा आक्रमण, १८५ जनाको मृत्यु(अपडेट)
कोलम्बो । श्रीलङ्काको राजधानी कोलम्बोका प्रतिष्ठित होटल एवं गिर्जाघर (चर्च) सहित देशका पूर्वी भेगमा आइतबार भएका छ वटा शृङ्खलाबद्ध बिस्फोटमा मृत्यु हुनेको संख्या १८५ जना पुगेको प्रहरी र अस्पताल स्रोतले जनाएको छ । मृत्यु हुनेमा ३५ जना विदेशी नागरिक समेत छन् । बिस्फोटका कारण अरु करिब ५०० व्यक्ति घाइते भएका छन् ।राजधानी कोलम्बोको सेन्ट एन्थोनी चर्च र होटलमा गरी ४५ जनाको ज्यान गएको छ भने राजधानी नजिकको नेगोम्बोस्थित सेन्ट सेबास्टियन चर्च बिस्फोटमा ६७ जनाको मृत्यु भएको छ । सेन्ट एन्थोनी बिस्फोटमा कम्तीमा १६० जना घाइते भएका र उनीहरुलाई उपचारका लागि कोलम्बो नेसनल अस्पतालमा भर्ना गरिएको छ । चर्च सहित राजधानीका तीनवटा पाँचतारे होटलमा पनि बम बिस्फोटनका घटना भएको प्रहरीले जनाएको छ । राजधानी कोलम्बोका साङ्ग्रिला, सिनमन ग्रान्ड र किङ्सबरी होटलमा पनि बिस्फोट भएका छन् । मुलुकको पूर्वी क्षेत्र बाट्टिकोलोवा नगरको चर्चमा भएको बिस्फोटमा २५ जनाको मृत्यु भएको छ । बाट्टिकोलोवा अस्पतालका एक अधिकारीले चर्चमा भएको बिस्फोटबाट घाइते भएका ३०० भन्दा बढी व्यक्तिलाई अस्पतालमा भर्ना गरिएको बताएका छन् । बिस्फोट निकै शक्तिशाली भएका कारण चर्चभित्र व्यापक क्षति भएको देखिएको छ । चर्चको भुँइ टुटेफुटेका टाइल, भाँचिएका काठपात र रगत लतपतिएको देखिएको छ । बौद्धमार्गी बहुल श्रीलङ्कामा करिब ६ प्रतिशत क्याथोलिक सम्प्रदायका मानिस छन् । गिर्जाघरहरुमा बिस्फोट हुँदा इसाई धर्मावलम्बीहरु इस्टर पर्वका अवसरमा आयोजित धार्मिक कार्यक्रममा सहभागी रहेको बताइएको छ । दश दिन अगाबै चेतावनी दिइएको थियो श्रीलंकाका प्रहरी प्रमुख पुजुथ जयासुन्दराले १० दिनअघि नै राजधानी कोलम्बोसहित देशका विभिन्न भागका महत्वपूर्ण चर्चहरुमा आत्मघाती आक्रमण हुनसक्ने भन्दै अलर्ट जारी गरेका थिए । एएफपीका अनुसार प्रहरी प्रमुख पुजुथले अप्रिल ११ का दिन प्रहरीका वरिष्ट अधिकारीहरुलाई गोप्य सूचना पठाएका थिए । “एउटा विदेशी गुप्तचर निकायले राष्ट्रिय थोवित जमाथ ९एनटीजे० नामको समूहले प्रमुख चर्चहरु र कोलम्बोस्थित भारतीय उच्चायुक्तको कार्यालयमा आत्मघाती आक्रमण गर्ने योजना बनाएको खबर प्राप्त भएको छ,” प्रहरी प्रमुखको चेतावनीमा उल्लेख छ । एनटीजे श्रीलङ्कामा सक्रिय अतिवादी मुस्लिम सङ्गठन हो र यो सङ्गठनका बारेमा गत वर्षमात्र जानकारी आएको थियो । यस सङ्गठनले गत वर्ष बौद्धमूर्तिहरुको तोडफोड गरेको पाइएको थियो । राष्ट्रपति र प्रधानमन्त्रीको समवेदना श्रीलङ्काका राष्ट्रपति मैत्रीपाला सिरिसेनाले राष्ट्रका नाममा सम्बोधन गर्दै देशबासीलाई शान्त रहन अनुरोध गरेका छन् । उनले कायरतापूर्वक गरिएको यस आक्रमणका दोषीलाई पक्राउ गरी कानुनी कठघरामा ल्याउन सरकारले कुनै कसर बाँकी नराख्ने प्रतिबद्धता व्यक्त गरेका छन् । त्यस्तै प्रधानमन्त्री रनिल विक्रमसिङ्घेले आतङ्कवादी हमलाका कारण राष्ट्र शोकको घडीमा रहेको बताउँदै सबैलाई धैर्य रहन, घाइतेको उपचारमा विशेष ध्यान दिन तथा हमलाकारीको खोजीमा सरकारी सुरक्षाफौज सक्रिय रहने बताएका छन् । कोलम्बो नजिकको होटलमा पुनः बिस्फोट, २ जनाको मृत्यु शृङ्खलाबद्ध बम आक्रमणबाट प्रताडित श्रीलङ्काको राजधानी कोलम्बोको नजिक देहीवालामा आइतबार अपराह्न पुनः बम बिस्फोट भएको छ । बिस्फोटबाट दुई जनाको मृत्यु भएको श्रीलङ्काली प्रहरीका प्रवक्ताले जनाएका छन् । प्रहरी प्रवक्ता रुवान गुनसेकराले आइतबार भएको यो बिस्फोट सातौं रहेको जानकारी दिनुभयो । यसअघि देशको राजधानी कोलम्बोसहित छ वटा शृङ्खलाबद्ध बिस्फोट भएका थिए । यस्तै, राजधानी कोलम्बोको उत्तरी ओरुगोदावाट्टामा पनि आठौं बिस्फोट भएको छ । विश्वका नेताहरुद्वारा भत्र्सना श्रीङ्कामा भएको रक्तपातपूर्ण आक्रमणको पाकिस्तान, बेलायत, इजरायल, युरोपेली युनियन समेका मुलुक एवं संस्थाहरुले भत्र्सना गरेका छन् । कोलम्बोमा कफ्र्यु घोषणा श्रीलङ्काको राजधानी कोलम्बोमा पुनः दुईवटा बम बिस्फोटन भएपछि सरकारले आइतबार साँझदेखि सोमबार बिहानसम्मका लागि निषेधाज्ञा (कफ्र्यु) जारी गरेको छ । रासस/एएफपी
सेयर बजारमा उछालः नेप्से ३१ अंकले बढ्दा कारोबार रकमले एक अर्ब नाघ्यो
काठमाडौं । साताको पहिलो कारोबारमा सेयर बजारमा उछाल देखिएको छ । आइतबार नेप्से परिसूचक र कारोबार रकम दुबैमा उच्च वृद्धि भएको छ । सो दिन नेप्से परिसूचक ३१.८९ अंकले बढेर १२६४.२० अंकमा पुगेको छ । जुन अघिल्लो कारोबारको तुलनामा २.५९ प्रतिशत बढी हो । गत बिहीबार नेप्से परिसूचक १२३२ अंकमा पुगेर बजार बन्द भएको थियो । त्यस्तै, आइतबार कुल १७१ कम्पनीको एक अर्ब २ करोड रुपैयाँ बराबरको सेयर कारोबार भएको छ । जुन बिहीबारको तुलनामा २६ करोड ९२ लाख रुपैयाँ बढी हो । गत बिहीबार कुल १६५ कम्पनीको ७५ करोड १२ लाख रुपैयाँ बराबरको सेयर किनबेच भएको छ । सबैभन्दा बढी नेपाल बैंकको १४ करोड ८० लाख रुपैयाँ बराबरको सेयर कारोबार भएको छ । त्यस्तै कारोबारमा आएका दुई समूह बाहेक बाँकी समूह हरिया देखिएका छन् । निर्जीवन बीमा र उत्पादनमूलक समूह क्रमशः ७.२२ र ११.९२ अंकले ओरालो लागेका छन् ।
सिटिजन्स बैंकको वार्षिकोत्सवमा सिइओ पोखरेलसहित ५६६ जनाले गरे रक्तदान
काठमाडौँ । सिटिजन्स बैंक इन्टरनेसनल लिमिटेडले बाह्र वर्ष पूरा गरी तेह्रौँ वर्षमा प्रवेश गरेको बैंकका विभिन्न शाखाहरुमा रक्तदान कार्यक्रम आयोजना गरिएको छ । रक्तदान कार्यक्रममा बैंकका प्रमुख कार्यकारी अधिकृत(सिइओ) गणेशराज पोखरेल सहित कुल ५६६ जनाले रक्तदान गरेका छन् । बैंकले उपत्यका भित्र बैंकको केन्द्रीय कार्यालय नारायणहिटी पथ अतिरिक्त भक्तपुर, भैसेपाटी, कुपण्डोल र उपत्यका बाहिरका बिराटनगर, दमक, धरान, जनकपुर, बिरगंज, बनेपा, हेटौडा, नारायणघाट, पोखराको सिमलचौर, बुटवल, घोराही, नेपालगंज, सुर्खेत, महेन्द्रनगर र विर्तामोड गरी कुल उन्नाइस स्थानबाट रक्तदान कार्यक्रम गरिएको हो । केन्द्रीय कार्यालय नारायणहिटी पथमा ४६, भक्तपुर शाखामा ४३, भैसेपाटी शाखामा ४१, कुपण्डोल शाखामा ७ जनाले रक्तदान गरेका हुन् । उपत्यका बाहिरका बिराटनगर शाखामा २१, दमक शाखामा २७, धरान शाखामा २८, जनकपुर शाखामा २५, बिरगंज शाखामा ३९, बनेपा शाखामा १७, हेटौडा शाखामा ३५, नारायणघाट शाखामा ४१, पोखराको सिमलचौर शाखामा ३०, बुटवल शाखामा २६, घोराही शाखामा १८, नेपालगंज शाखामा ४५, सुर्खेत शाखामा १७, महेन्द्रनगर शाखामा १९ र विर्तामोड शाखामा ४१ गरी कुल ५६६ जना रक्तदाताहरुले रक्तदान गरेका छन् । सिटिजन्सले २०६४ बैशाख ७ गतेदेखि २० औँ वाणिज्य बैंकको रुपमा स्थापना भई बैंकिंग सेवा पुर्याउँदै छ ।
राष्ट्रिय भर्ना अभियानमा संस्थागत विद्यालयकाे असहयाेग: महँगाे शुल्क, बैशाख नलाग्दै भर्ना बन्द
काठमाडौं । काठमाडौं सबैभन्दा धेरै विद्यार्थी भएको र राम्रो विद्यालयमा गनिने हात्तीवन स्थित लिटिल एन्जल्स स्कुलले २०७६ को भर्ना कार्यक्रम चैत ३० गते बन्द गर्यो । ललितपुर जिल्लाकै रातो बंग्ला स्कुलले पनि आफ्नो भर्ना केही दिन अघि मात्र बन्द गरेको छ । काठमाडौंका ठूला र महँगा मानिने चाँदबाग स्कुल, द एक्सिलेसर स्कुल, रुपिज इन्टरनेशनल स्कुल लगायतले पनि आफ्नो भर्ना कार्यक्रम सकिएको भन्दै नयाँ विद्यार्थी र अभिभावकलाई फर्काउने गरेका छन् । यी त उदाहरण मात्रै हुन् । तुलनात्मक रुपमा राम्रा भनिएका ‘क’ वर्गका अधिकांश विद्यालयहरुको भर्ना कार्यक्रम चैत नलाग्दै सुरु हुन्छ । यसबाहेक काठमाडौंका धेरै विद्यालयहरुले २०७६ को लागि भर्ना बन्द गरिसकेका छन् । तर सरकारले भने आफ्नो भर्ना सत्र सुरु पनि गरेको छैन । सरकारले बैशाख २ गतेदेखि राष्ट्रिय भर्ना अभियान सुरु गरेको हो। सरकारले घोषणा गरेको उक्त मितिदेखि काठमाडौंका सबै स्थानीय तहले भर्ना गरिरहेका छन् । काठमाडौं महानगरपालिका, ललितपुर महानगरपालिका यो अभियानमा सामिल छन्। काठमाडौंले “हाम्रो नगर, हाम्रो गाउँ सबै बालबालिकालाई विद्यालय पुर्याउँ” भन्ने नाराको साथ २ गतेदेखि १४ गतेसम्म भर्ना अभियान सञ्चालन भईरहेको र विद्यालयबाहिर रहेका बालबालिकालाई पढाइको पहुँचमा ल्याउने उद्देश्यले अभियान सुरु गरिएको कामपाको शिक्षा विभागले जनाएको छ । त्यस्तै ललितपुर जिल्लाको शिक्षा विभाग तथा समन्वय ईकाइले पनि ललितपुरमा भर्ना अभियान चलिरहेको बताएको छ। तर संस्थागत विद्यालयहरुले आफ्नो मर्जी गरिरहेका छन् । विद्यालयहरुले भर्ना कहिले खुल्ने र बन्द हुने समयको बारेमा धेरै अभिभावक अलमलमा छन् । सबैले एकै समयमा सँगै भर्ना सत्र सुरु नगर्दा धेरै विद्यार्थीले आफु पढ्न चाहने विद्यालयमा पढ्न पाएका छैनन् । संस्थागत विद्यालयहरु भने समयावधि भन्दा अगाडि भर्ना सुरु गरेर बन्द गर्ने विद्यालयहरुमाथि राज्यप्रतिको उत्तरदायि नभएको र नाफामुखी मात्र भएको आरोप लाग्न थालेको छ । संस्थागत र सामुदायिक विद्यालयहरु एक अर्काका परिपुरक भए पनि र देशको शिक्षाको उनीहरुको पनि उत्तिकै योगदान हुने भएकोले सरकारी अभियानलाई असहयोग गर्ने सरकारी विद्यालयलाई कारबाही हुनुपर्ने माग समेत सरोकारवालाहरुले गरेका छन् । सरकारले कारबाही गर्नसक्छ ? बैशाख नलाग्दै भर्ना बन्द गर्ने विद्यालयलाई सरकारले कारबाही हुने महानगर शिक्षा विभागले जनाएको छ। काठमाडौं महानगरपालिका शिक्षा विभागले काठमाडौं महानगर क्षेत्रभित्र रहेका विभागको नियमन क्षेत्रभित्र पर्ने विद्यालयहरुले बैशाख २ गतेदेखि १४ गतेसम्म भर्ना सञ्चालन गर्नुपर्ने भन्दै तोकिएको समयभन्दा अघि भर्ना बन्द गर्ने विद्यालयलाई कारबाही गर्ने चेतावनी दिएको छ । काठमाडौं महानगरपालिका शिक्षा विभागकी प्रमुख निर्मला केसीले विद्यालयहरुले समय नै नभई भर्ना कार्यक्रम सञ्चालन गर्न र भर्ना बन्द गर्न नपाउने भन्दै त्यस्तो देखिए कारबाही गर्ने बताएकी हुन् । ‘विभागले बैशाख २ देखी बैशाख १४ गतेलाई भर्ना सत्र तोकेको छ। विद्यार्थीहरुको भर्ना सोही समयभित्र गर्नुपर्छ । त्यसभन्दा अघि कुनैपनि क्रियाकलापलाई विभागले मान्यता दिँदैन । त्यस्तो भेटिए कारबाही हुन्छ । त्यस्तो कारबाही २५ हजार रुपैंया जरिवानादेखि विद्यालयको दर्ता खारेजीसम्म हुनसक्छ ।’– प्रमुख केसीले भनिन् । त्यस्तै ललितपुरका शिक्षा विभाग तथा समन्वय प्रमुख गुणराज पोखरेलले पनि यदी विद्यालयहरुले बैशाख अगाडी विद्यालयको भर्ना बन्द गरेको पाईएमा सरकारी नियम अनुसार कारबाही हुने बताएका छन् ।
बैंक अफ काठमाडौँमा खाता खोल्दा ज्योतिलाईफको बीमा सेवा पाइने
काठमाडौँ । बैंक अफ काठमाण्डौले संचालनमा ल्याउन लागेको नयाँ बचत खाता योजना अन्तर्गत खाता खोल्ने ग्राहकहरुलाई जीबन बीमा तथा घातक रोग उपचार सेवा उपलब्ध गराउने सम्बन्धमा ज्योति लाईफ इन्स्योरेन्ससँग सम्झौता भएको छ । उक्त सेवाअन्तर्गत बैंक अफ काठमाण्डौका ग्राहकहरुको कुनै पनि कारणले हुने मृत्यु तथा १५ वटा घातक रोगहरु मध्ये कुनै पनि रोगलागेको प्रमाणित भएमा उपचार खर्च बीमाङ्क वापतको रकम भुक्तानी गरिने छ । सम्झौताबाट बैंक अफ काठमाण्डौका ग्राहकहरुले बैंकिङ्ग सेवाका अतिरिक्त ज्योति लाईफ इन्स्योरेन्स कम्पनीको बीमा सेवा निःशुल्क प्राप्त गर्ने छन् ।
