३५ करोड लगानीमा सौराहामा बन्ने भयो सिटीहल
भरतपुर । चितवनको पर्यटकीय नगरी सौराहामा सिटीहल बन्ने भएको छ । रु ३५ करोड २२ लाख ७० हजारको लागतमा एक हजार क्षमताको सिटीहल निर्माण हुने सङ्घीय शहरी तथा भवन निर्माण आयोजना चितवनका प्रमुख प्रकाश अर्यालले जानकारी दिएका छन् । उनले एउटा एक हजार क्षमताको ठूलो सिटीहलसँगै ५० जना अट्ने अर्को भवनसहित मिटिङहलसमेत निर्माण हुने बताएका छन् । रेलिगेर कन्स्ट्रक्शन प्रालि ललितपुरले निर्माणको जिम्मा पाएको छ । शहरी विकास मन्त्रालय, शहरी विकास तथा भवन निर्माण विभागमार्फत बन्न लागेको सो हलको मङ्गलबार पूर्वअर्थमन्त्री तथा चितवन क्षेत्र नं १ का सांसद सुरेन्द्र पाण्डेले शिलान्यास गर्दै सिटीहल निर्माणपछि सौराहाको पर्यटनले गति लिने बताए । सिटीहलले यहाँको सामाजिक तथा आर्थिक विकाससँगै सौराहाको पर्यटनलाई थप टेवा पु¥याउने उहाँले विश्वास व्यक्त गरेका छन् । रत्ननगर नगरपालिकाले अतिक्रमणमा परेको जग्गा फिर्ता ल्याएको ठाउँमा सरकारले सिटीहल निर्माण शुरु गरेको हो । कार्यक्रममा प्रदेशसभा सदस्य कृष्णप्रसाद खनाल, रत्ननगर नगरपालिका प्रमुख नारायण, उपप्रमुख विमला दुवाडी, वडा नं ७ का वडाध्यक्ष राजन भट्ट, नेकपाका नगर अध्यक्ष कुलप्रसाद लामिछाने, नेपाली काँग्रेसका नगर सभापति रुपनराज घिमिरेलगायतले मन्तव्य राखेका थिए । रासस
राष्ट्र बैंकमा चिन्तामणिका ३२ वर्षः अफिसमै ‘नजरबन्द’देखि खुल्लामञ्चमा जुत्ता पसलसम्म
काठमाडौं । २०४४ साल चैत ६ गते नेपाल राष्ट्र बैंकको जागिर सुरु गरेका चिन्तामणि शिवाकोटीको सेवा अवधि ३२ पुगेको छ । यो बीचमा हुने जागिर जीवनको असाध्यै धेरै उतारचढावको सामना गरे । शिवाकोटी विद्यार्थीकालदेखि नै कम्युनिष्ट राजनीतिसँग नजिक थिए । २०४६ सालमा प्रजातन्त्र पुनस्थापना भएपछि २०४८ सालमा आमनिर्वाचन भयो । सो निर्वाचनमा नेपाली काँग्रेसले सुविधाजनक बहुमतसहित सरकार बनायो । सरकारको नेतृत्व गिरिजाप्रसाद कोइरालाले गरे । कोइराला सरकार विरुद्ध तत्कालिन नेकपा एमाले निकट कर्मचारी आन्दोलित भए । सो आन्दोलनमा एमाले निकटसहित अन्य बामपन्थी विचारधारा निकट कर्मचारी पनि सहभागी थिए । यही सन्दर्भमा नेपाल राष्ट्र बैंकका कर्मचारी पनि आन्दोलित भए । कर्मचारी संघले नेपाल राष्ट्र बैंक व्यवस्थापनसँग केही माग राखेको थियो । तर, राष्ट्र बैंकले कर्मचारीका सबै माग पूरा गरिदियो । आफूहरुका माग पूरा भएपनि निजामती कर्मचारी आन्दोलित भइरहेकोले आन्दोलनमा ऐक्यबद्धता जनाउनु पर्ने परिस्थिति रहेको संघका तत्कालिन अध्यक्ष तथा राष्ट्रिय योजना आयोगका पूर्व उपाध्यक्ष दीपेन्द्रबहादुर क्षेत्री बताउँछन् । ‘हामीले राखेका सबै माग व्यवस्थापनले पूरा गरेपछि हामीले थप आन्दोलन गरिरनु पर्ने औचित्य नै बाँकी रहेको थिएन, तर निजामती कर्मचारी आन्दोलन रोकिएको थिएन, सो आन्दोलनमा ऐक्यबद्धता जनाउन हामी खोजिरहेका थियौं,’ नेपाल राष्ट्र बैंकका पूर्व गभर्नर समेत रहेका संघका तत्कालिन अध्यक्ष क्षेत्रीले विकासन्युजसँग भने । निजामती कर्मचारीले आन्दोलनकै क्रममा भद्रकालीमा रिले अनसन गरे । सो अनसनमा नेपाल राष्ट्र बैंकका कर्मचारी पनि सहभागी भए । राष्ट्र बैंकबाट कर्मचारीको नेतृत्व संघका तत्कालिन अध्यक्ष क्षेत्री आए । युनियनका अन्य १५ जना सदस्य तथा पदाधिकारी पनि अनसनमा सहभागी भए । शिवाकोटी संघको सहसचिव थिए । आफूहरुले सबै माग पूरा गर्दा पनि कर्मचारीले आन्दोलन गरेको भन्दै राष्ट्र बैंक व्यवस्थापन रुष्ट भयो । अनि आन्दोलनमा सहभागी भएका कर्मचारीलाई सुर्खेत, जनकपुर जस्ता स्थानमा सरुवा गरियो । त्यो बेला राष्ट्र बैंक कर्मचारी नियमावलीमा युनियनका पदाधिकारीलाई सरुवा गर्न नपाइने व्यवस्था थियो । तर, व्यवस्थापनले सरुवा गरिदिएको थियो । यस्तैमा युनियनले तत्कालिन डेपुटी गभर्नर अच्युत प्रसाद पौडेलसँग युनियनका पदाधिकारीलाई सरुवा गर्न नपाइने नियम विपरित किन सरुवा गरियो भन्दै गम्भीर छलफल गरे । ‘युनियनका पदाधिकारीलाई सरुवा गरिएको निर्णय आएपछि यो निर्णय नियमविपरित भयो भनेर हामीले राती ९ बजेसम्म उहाँकै कार्यकक्षमा बसेर डेपुटी गभर्नर अच्यूत प्रसाद पौडेलसँग छलफल गर्यौं, उहाँले यो निर्णय भोलि सच्याउँछौं भन्नुभयो,’ तत्कालिन अध्यक्ष क्षेत्रीले भने । यसरी अबेर रातिसम्म छलफल भएपछि कर्मचारीलाई घर जाने सवारी साधन पाउन गार्यो भयो । डेपुटी गभर्नर पौडेल गौशाला नजिक बस्थे । त्यसैले उनले त्यतातिर जाने कर्मचारीलाई आफ्नै गाडीमा हालेर लगे । अन्यत्र जाने कर्मचारीलाई राष्ट्र बैंकको गाडीले घर पठाइयो । तर, कर्मचारीसँग छलफलमा बसेका कर्मचारीले उनलाई घेराउ गरेर बन्दक बनाए, अनि हाइज्याक गरे भन्ने सन्देश सरकारी अधिकारी समक्ष पुगेछ । अनि पौडेललाई राति नै अर्थमन्त्रालयमा बोलाइयो । छलफलमा सहभागी कर्मचारीलाई डेपुटी गभर्नरलाई हाइज्याक गरेको तथा ढुकुटीमा हातपात गरेर असुरक्षा पुर्याएको अभियोगमा कारबाही थालियो । अन्य १५ जना कर्मचारीसँग शिवाकोटी पनि निलम्बनमा परे । करिब १५ दिनपछि शिवाकोटीसहित केही कर्मचारीको निलम्बन फुकुवा भयो । तर, कारबाही फुकुवा भएपनि शिवाकोटीलाई राष्ट्र बैंकको पुरानो भवनको ३ तलामाथि एउटा कोठामा एक्लै, पत्रपत्रिका पढ्न नपाउने, अफिसकै कर्मचारी वा अन्य आगन्तुकले पनि भेट्न नपाउने, टेलिफोन प्रयोग गर्न नपाउने गरी राखियो । ‘कोरोना भाइरस लागेको व्यक्तिलाई अहिले जसरी राख्ने भनिएको छ, त्यतिबेला शिवाकोटीजीलाई पनि त्यसरी नै राखिएको थियो,’ क्षेत्रीले भने । तत्कालिन अध्यक्ष क्षेत्रसहित उपाध्यक्ष प्रेम पाण्डे, कोषाध्यक्ष, सदस्यहरु गरी ११ जनालाई राष्ट्र बैंकको जागिरबाट निकालियो । यसरी जागिर जानेहरुमा राष्ट्र बैंकको कार्यकारी निर्देशकबाट अवकाश पाएका नेपाल बैंक संचालक समितिका अहिलेका अध्यक्ष बासुदेव अधिकारी पनि थिए । कल्याणबन्धु अर्यालको पनि जागिर गयो । नागरिक लगानी कोषको अहिलेका कार्यकारी निर्देशक रमण नेपालको पनि जागिर गएको थियो । ढुकुटी लुट्न लागेको अभियोग लागेका क्षेत्री नेपाल राष्ट्र बैंकको गभर्नर भइसकेका छन् । ढुकुटी लुट्न लागेको अभियोग लागेका शिवाकोटी अहिले पनि राष्ट्र बैंकको बरिष्ठ डेपुटी गभर्नर छन् भने आगामी गभर्नरको लागि बलियो प्रत्यासी हुन् । शिवाकोटीलाई कोरोना भाइरस सक्रमितलाई आइसोलेसन वार्डमा राखिए जसरी करिब १५ दिन राखिएको थियो । उनलाई यसरी राखिएको विरोधमा कर्मचारी संघ नाराबाजी गर्ने गथ्र्याे भने अन्य कर्मचारीले पनि विरोध गरे । र, शिवाकोटीमाथिको कारबाही केही खुकुलो भएको थियो । तर, उनलाई काम गर्ने वातावरण दिइएको थिएन । मानसिक तनाब दिएर राखिएको थियो । शिवाकोटीको जागिर थामिए पनि क्षेत्रीलगायत ११ जनाको जागिर गएको थियो । जागिर जानेहरुले सर्वाेच्चमा मुद्दा दायर गरे । र, ‘भ्रष्टाचारीको गुणगान गाउनुभन्दा जनताको खुट्टा समाउनु बेस’ भन्दै सो समुहले खुल्लामञ्चमा जुत्ता पसल सुरु गर्यो । राष्ट्र बैंक व्यवस्थापनले कारबाही गरेका कर्मचारीहरुले संयुक्त लगानी गरेर सो जुत्ता पसल संचालन गरिएको थियो । अफिस समय सकिएपछि चिन्तामणि शिवाकोटी, राष्ट्र बैंकमै अझै कार्यरत राजेन्द्र रिमालहरु सो जुत्ता पसलमा जुत्ता बेच्न आउने गर्थे । रिमाललाई पनि व्यवस्थापनले निकै दुःख दिएको थियो । सो पसलको नाम ‘राष्ट्र बैंकबाट अन्यायपूर्ण रुपमा निकालिएका कर्मचारीहरुको दुकान’ नाम दिइएको थियो । सो दुकानको नाममा राजनीति गरिएको भन्दै प्रहरी प्रशासनले दुःख दिएको क्षेत्री सम्झन्छन् । कर्मचारीमाथि २०४९ सालको साउनमा कारबाही गरिएको थियो । भदौमा पसल सुरु गरिएको थियो । पसल राख्न ५ वटा जति फलमको डण्डी भोटाहिटीबाट ल्याउनु पर्ने र बेलुका फेरि त्यही लगेर लानु पथ्र्याे । जाडोको समयमा फलामको डण्डी बोकेर हिड्नुपर्ने, दिनभरी धुवा धुलो भएको ठाउँमा बस्नुपर्ने भएको कारण सबै कर्मचारी विरामी पर्न थाले । अनि पसल बन्द गरियो । अनि फेरि के गर्ने भन्ने समस्या आयो । केही कर्मचारीले फाइनान्स कम्पनी खोल्ने विकल्प सुझाए । तर, राष्ट्र बैंकले नै जागिरबाट निकालिएका कर्मचारीलाई राष्ट्र बैंकले नै लाइसेन्स दिएर फाइनान्स कम्पनी संचालन गर्न दिदैन भन्ने तर्क आयो । त्यो योजना पनि गर्भमै तुहियो । अनि कर्मचारीले आफूहरुको व्यानर पूर्व मेचीदेखि पश्चिम महाकालीसम्म पुर्याउने भन्दै बससेवा संचालन गर्ने योजना योजना बन्यो । अनि नेपाल बैंकबाट ऋण लिएर पूर्व पश्चिम चल्ने बससेवा सुरु भयो । कर्मचारीले २ वटाबाट सुरु गरेको बस ५ वटासम्म पुगिसकेको थियो । बसमा कर्मचारीको पनि सेयर लगानी थियो । शिवाकोटी पनि सेयरधनी थिए । बस सेवा संचालन गर्ने कम्पनीको नाम ‘स्वाभिमान परिवन सेवा’ थियो । कम्पनी दर्ता नै गरिएको थियो । तर, दुर्भाग्य सो वर्ष सबैभन्दा पहिला उनीहरुले संचालन गरेको बस नै त्रिसुलीमा खस्ने बस भयो । सो वसमा रहेका राष्ट्र बैंकका कर्मचारी बद्री अधिकारीको सो घटनामा निधन भयो । अधिकारी बसको कन्डक्टर थिए । त्यही वर्ष २ दिन अगाडि थाइ इन्टरनेसनलको जहाज ललितपुरको घोप्टेभीमा ठोकियो । त्यो बेलाका डेपुटी गभर्नर हिरन्यलाल बज्राचार्य पनि बैंककबाट काठमाडौं फर्कदै थिए । उनी पनि सोही जहाजमा थिए कि भन्ने हल्ला फैलियो । के भएछ भनेर बुझ्न बीरगञ्जबाट काठमाडौंमा आउँदा अधिकारीको निधन भएको थियो । तर, डेपुटी गभर्नर बज्राचार्य सो जहाजमा आएका थिएनन् । पछि बसमा बेइमानी हुन थाल्यो । सबै ठाउँमा कर्मचारी बस्न सकेनन् । अनि कर्मचारीहरु ड्राइभरको नजिक क्याविनमा बस्न थाले । अनि बसका ड्राइभरले सो बस जथाभावी ठोक्न थाले । अनि ज्यान बचाउन भन्दै कर्मचारीहरुले संचालन गरेको बस सेवा बन्द भयो । पछि क्षेत्रीसहित सबैले सफाइ पाए । उनीहरुको जागिर जोडियो । यसरी अन्यायपूर्वक जागिरबाट निकालिएका क्षेत्री, रमण नेपाल, बासु अधिकारीसहित सबैको जागिर पुनस्थापना भयो । यसमध्ये क्षेत्री नेपाल राष्ट्र बैंकको गभर्नर भइसकेका छन् भने सो सबै प्रकरणमा सहभागी भएका चिन्तामणि शिवाकोटी अहिले बरिष्ठ डेपुटी गभर्नर छन् । र, ५ चैतदेखि खाली हुने आगामी कार्यकालको गभर्नरको लागि बलियो प्रत्यासी बनेका छन् ।
सिटिजन्स बैंकद्वारा विद्यालयलाई आर्थिक सहयोग
काठमाडौं । सिटिजन्स बैंक इन्टरनेसनलले मोहन्याल शाखाद्धारा मोहन्याल गाउँपालिका वडा नं. ४ खिमडी स्थित श्री भृकुटी माध्यमिक विद्यालयलाई एक लाख रुपैयाँ बराबरको आर्थिक सहयोग गरेको छ । बैंकले संस्थागत सामाजिक उतरदायित्व कार्यक्रम अन्तर्गत विद्यालयका छात्रछात्राहरुको पठनपाठनमा मद्दत हुने हिसाबले उक्त सहयोग हस्तान्तरण गरेको हो । बैंकले मंगलबार एक कार्यक्रमकाबीच सो विद्यालयलाई उक्त सहयोग रकम हस्तान्तरण गरेको हो । विद्यार्थीको सर्वागिंण विकासमा शिक्षाले ठूलो भुमिका खेल्ने भएकोले गर्दा सो कुरालाई ध्यानमा राखी यस बैंकले यो सहयोग गरेको छ । नेपाल सरकारले अवलम्बन गरेको ’सुखी नेपाली सम्बृद्ध नेपाल’ को अवधारणालाई साकार पार्न यस किसिमको सहयोग फलदायी हुने विश्वास बैंकले लिएको छ । भविष्यमा पनि बैंकले संस्थागत सामाजिक उतर दायित्व कार्यक्रम अन्तर्गत सामाजिक, आर्थिक, सांस्कृतिक, शैक्षिक आदि जस्ता क्षेत्रमा सकारात्मक परिवर्तन ल्याउनका निम्ति विभिन्न कार्यक्रम संचालन गर्ने कुरा जानकारी गराएको छ । बैंकले हाल ९३ वटा शाखा, ९० वटा ए.टि.एम. र १०३ वटा शाखा रहित बैंकिङ्ग एकाईहरुबाट करिव पाँच लाख ग्राहकवर्गलाई आधुनिक बैंकिङ्ग सेवाहरु प्रदान गर्दै आएको छ ।
कुमारी बैंक र टेस्ला डायगनोस्टिक क्लिनिकबीच सम्झौता
काठमाडौं । कुमारी बैंक र बालुवाटारस्थित टेस्ला डायगनोष्टिक क्लिनिकबीच स्वास्थ्य सेवामा छुट सम्बन्धी सम्झौता भएको छ । बैंकले आफ्ना ग्राहकहरुलाई स्वदेशमै गुणस्तरीय स्वास्थोपचारमा सहुलियत दिने उद्देश्यले उक्त सम्झौता गरेको हो । उक्त सम्झौता पत्रमा कुमारी बैंकका नायब प्रमुख कार्यकारी अधिकृत राजीव गिरी र टेस्ला डायगनोष्टिक क्लिनिकका प्रमुख कार्यकारी अधिकृत रिंकु श्रेष्ठले हस्ताक्षर गरेका छन् । जसअनुसार टेस्ला डायगनोष्टिक क्लिनिकका विभिन्न स्वास्थोपचार सेवा तथा औषधोत्पादन शुल्कमा ग्राहकले कुमारी बैंकको डेबिट तथा क्रेडिट कार्ड मार्फत भुक्तानी गर्दा १० प्रतिशतसम्मको आकर्षक छुट पाउने छन् । हाल बैंकले १२४ शाखा सञ्जाल, १२२ एटिएम, २१ शाखारहित ईकाई तथा ६ एक्सटेनसन काउन्टरबाट अत्याधुनिक बैंकिङ्ग सुविधाहरु प्रदान गर्दै आएको छ ।
चलचित्र उद्योगलाई राहत दिन संघको माग, अर्थमन्त्री भन्छन्- अध्ययन भइरहेको छ
काठमाडौं । नेपाल चलचित्र संघले विश्वव्यापीरुपमा देखिएको कोरोनाभाइरस (कोभिड-१९) ले नेपाली सिनेमा घरहरु तथा चलचित्र क्षेत्रमा पारेको असर बारेमा अर्थ, संचार तथा सूचना प्रविधि मन्त्री डा। युवराज खतिवडासँग भेट गरेको छ । संघले नेपाल उद्योग बाणिज्य महासंघको पहलमा अर्थ संचार तथा सूचना प्रविधि मन्त्रीलाई कोरोनाभाइरसले पारेको प्रभावको बारेमा ज्ञापनपत्र बुझाउँदै राहत प्याकेज घोषणा गर्न माग गरेको छ । सो भेटको क्रममा संचार तथा सूचना प्रविधि मन्त्री डा खतिवडाले कोरोनाभाइरसले नेपाली अर्थतन्त्रमा पार्नसक्ने प्रभावको बारेमा अध्ययन भईरहेको जानकारी दिए । उनले नेपाली चलचित्र उद्योग पनि सो असरबाट प्रभावित भएकोमा जानकार रहेको भन्दै सबै क्षेत्रको जानकारीहरु एकत्रित गरिरहेको र प्रभावबारे छलफल गरिरहेको स्पष्ट पारे । ‘पर्ख र हेरको अवस्थामा छौं, कुन तहको क्षति हुन्छ त्यहिअनुसार योजना गर्ने हो, आगामी १ महिना कठिनाई हुने देखिएकोछ, केन्द्रिय बैंकसँग बसेर छलफल चलाईरहेका छौं र त्यसलाई अगाडि लानेछौं,’ अर्थ, संचार तथा सूचना प्रविधि मन्त्री डा खतिवडाले भने । उनले चलचित्र संघका पदाधिकारीहरुलाई ज्यादै आतंकित हुनुपर्ने अवस्था नभएको आश्वासन दिँदै नेपाली चलचित्र उद्योगको लागि मध्यमकालिन र दिर्घकालिन रणनीतिमा पनि काम गरिरहेको बताए । अर्थमन्त्री खतिवडाले कोरोनाभाइरस रोक्न नाकाहरुमा उच्च सर्तकता अपनाईएको भन्दै मनोरन्जन क्षेत्रमा हाल लिनुपर्ने विभिन्न किसिमका अनुमतिहरुलाई एकद्धार प्रणालीमा लैजाने प्रयास गरिरहेको जानकारी दिए । त्यसअघि संघका अध्यक्ष मधुसुधन प्रधानले सिनेमा हलहरुमा कोरोनाभाइरसको जोखिम न्यूनिकरण गर्नका लागि उच्च सतर्कताका साथ सरसफाई गरिरहेको र स्यानिटाइजरको व्यवस्था गरिएको जानकारी गराए । उनले कोरोनाभाइरसको प्रभावले गर्दा हाल सिनेमा हलहरुमा दर्शकहरुको संख्या न्यून भएपनि दैनिकरुपमा विभिन्न किसिमका राजस्व तथा करहरु तिरिरहेको गुनासो गरे । ‘हामीले दैनिक ब्याज, भ्याट, मनोरन्जन कर, चलचित्र विकास करलगायत राजस्व तिरिरहेका छौं, अहिले कोरोनाभाइरले प्रभावित पारेको छ, अन्य उद्योग सरह राहत प्याकेज दिनुपर्यो,’ अध्यक्ष प्रधानले भने । भेटकाक्रममा नेपाल उद्योग बाणिज्य महासंघका वरिष्ठ उपाध्यक्ष शेखर गोल्छाले कोभिड-१९ को असर सबैभन्दा धेरै पर्यटन, होटल, रेष्टुरेन्ट क्षेत्रमा परेको भन्दै त्यसपछि प्रत्यक्षरुपमा सिनेमा हलहरु असर देखिएको अर्थमन्त्रीलाई जानकारी गराएका थिए। ‘प्रत्यक्षरुपमा फिल्म हलहरुमा पनि असर परेको छ भने अनिश्चित कालसम्म असर पर्ने देखिएको छ, त्यसैले चलचित्र क्षेत्रलाई पनि रिफाइनान्सिङ्गको व्यवस्था गर्नुपर्यो,’ वरिष्ठ उपाध्यक्ष गोल्छाले भने । महासंघका कार्यसमिति सदस्य अन्जन श्रेष्ठले कोरोनाभाइरसले हुने मृत्यु भन्दा त्यसको आर्थिक र मानसिकरुपमा पर्ने असरले मानिसहरुको मृत्यु हुने संख्या बढ्नसक्ने आशंका गरेका छन् । नेपाल चलचित्र संघका महासचिव अशोक शर्माले नेपाली चलचित्र क्षेत्रमा ठूलो लगानी रहेको भन्दै देशभरीका २०० भन्दा बढि हलहरुमा हाल असर परेको बताए । उनले अर्बौंको लगानी जोखिममा परेको भन्दै यसलाई संवेदनशिल भएर हेर्न मन्त्रीलाई अनुरोध गरे । संघका कार्यसमिति सदस्य भाष्कर ढुङ्गानाले सिनेमा हल निर्माण र यो उद्योगमा प्रत्यक्ष नेपालीहरुको लगानी र रोजगारी सिर्जना भएको भन्दै चलचित्र हलहरुले भने कर तिर्नुपर्ने तर अनलाइन स्ट्रिमिङ्ग सेवामार्फत सिनेमा देखाउँदा भने नेपालमा कर नतिर्ने अवस्था अन्त्य गरिनुपर्ने बताए । नेपाल चलचित्र संघका अध्यक्ष प्रधानको नेतृत्वमा गएको टोलीमा संघका महासचिव अशोक शर्मा, उप महासचिव गोपालकाजी कायस्थ, सदस्यहरु भाष्कर ढुङ्गाना, कलाकार दिपकराज गिरी तथा महासंघको तर्फबाट वरिष्ठ उपाध्यक्ष शेखर गोल्छा तथा कार्यसमिती सदस्य अन्जन श्रेष्ठ सहभागी थिए ।
बैंकहरूकाे ऋणपत्र र पुनर्बीमा कम्पनीको साधारण सेयरमा लगानीकाे अवसर गुमाउँदै लगानीकर्ता
काठमाडौं । सिडिएस एण्ड क्लियरिङ हाउसको सफ्टवयर नचल्दा पुँजी बजारका लाखौं लगानीकर्ता पीडित भएका छन् । अनलाईनबाट सेयर किनबेच हुने meroshare.cdsc.com.np आइतबारदेखि नियमित चलेको छैन । सिडिएसको मेरो सेयर नचल्दा साधारण सेयर किन्ने, ऋणपत्र किन्ने, बेचेको सेयर ट्रान्सफर गर्ने कार्यहरु प्रभावित भएको लगानीकर्ता अम्बिका पुडासैनीले बताए । मेरो सेयर नचलेपछि लगानीकर्ताहरुबाट धेरै गुनासो आईरहेको कालिका सेक्युरिटीका प्रबन्ध निर्देशक नरेन्द्रराज सिजापतिले बताए । सेयर बेचेको तीन दिनभित्र मेरो सेयरबाट ट्रान्सफर हुनैपर्छ । ट्रान्सफर ढिला भएमा धेरै जरिवाना हुन्छ । बजार घटेको बेलामा लगानीकर्ताहरु विभिन्न वहाना बनाएर खरिद अडरबाट भाग्न खोज्छन् । यस्तो बेलामा समयमा ट्रान्सफर भएन भने लगानीकर्ता झगडा गर्न आउँने गरेको सेयर ब्रोकर व्यवसायी बताउँछन् । पछिल्लो समय बैंक तथा वित्तीय संस्थाहरुको ऋणपत्रहरु नियमित निष्काशन भईरहेका छन् । यस्तो बेलामा सिडिएससीको मेरो सेयर नचल्दा बैंकहरुलाई पनि गाह्रो भएको छ । मंगलबार सिटिजन्स बैंक इन्टरनेशनलको ऋणपत्रमा लगानी गर्ने अन्तिम मिति हो । सर्वसाधारणले आश्वा प्रणालीबाट मात्र यस्तो ऋणपत्रमा लगानी गर्न सक्छन् । ‘मेरो सेयरबाट ऋणपत्रमा लगानी गर्न सकिएन भनेर धेरै लगानीकर्ताले फोन गर्नुभयो । तर हामीले त्यसमा केही गर्न सक्दैनौं’ बैंकका प्रमुख कार्यकारी अधिकृत गणेशराज पोखरेलले भने । ‘बैंकको ऋण पत्र लिनुहोस्, यसमा फाइदा छ भनेर हामीले धेरै खर्च गरेर सर्वसाधारणसम्म सूचना पुर्यायौं । तर लगानीकर्ताले आवेदन गर्ने बेलामा सीडिएससीको अनलाईनले काम गरेन भन्ने सुन्दा हामीलाई दुःख लागेको छ’ पोखरेलले भने । लगानीकर्ताले नबिल बैंककाे ऋणपत्रमा पनि लगानी गर्न पाएका छैनन् । विभिन्न कम्पनीहरूकाे हकप्रद सेयर किन्नलाई पनि समस्या भएकाे छ । मंगलबारदेखि नै नेपाल पुनर्बीमा कम्पनीको साधारण सेयर बिक्री खुला भएको छ । तर सेयर किन्न चाहानेका प्रयास सबै बिफल भएका छन् । पुर्नबीमा कम्पनीका प्रमुख कार्यकारी अधिकृत शंकर रायमाझिले लगानीकर्ताले अनलाईनबाट सेयर आवेदन गर्न पाइएन भन्ने गुनासो गरेको र आफूले सिडिएस एण्ड क्लियरिङका अध्यक्ष चन्द्रसिंह साउदलाई समस्याबारे जानकारी गराएको बताए । यस विषयमा विकासन्युजले चन्द्रसिंह साउदसँग कुरा गर्न खोज्दा बोल्न मानेनन् । सीडीएसको अफिसका कुनै पनि फोन उठेनन् भने कामू सीईओ कन्चन सापकोटासँग सम्पर्क हुन सकेन । नेप्से र सीडिएसको सफ्टवयर गरिद गर्दा भ्रष्टाचार भएको र कामै नलाग्ने सफ्टवयर प्रयोग गरेकोले बारम्बार समस्या आउने गरेको जानकारहरु बताउँछन् ।
एनआईसी एशिया बैंकका ग्राहकले गोकर्ण फरेष्ट रिसोर्टमा १५ प्रतिशत छुट पाउने
काठमाडौं । एनआईसी एशिया बैंकका ग्राहकले काठमाडौंस्थित गोकर्ण फरेष्ट रिसोर्टका विभिन्न सेवामा १५ प्रतिशत छुट पाउने भएका छन् । सो सम्बन्धि दुई संस्थाबीच समझदारी(एमओयू) भएको छ । समझदारीपत्रमा बैंकको तर्फबाट सहायक प्रमुख कार्यकारी अधिकृत सन्तोषकुमार राठी तथा रिसोर्टको तर्फबाट रुम डिभिजनका निर्देशक रोजिन सापकोटाले हस्ताक्षर गरेका छन् । यो योजना एक वर्षको लागि लागू हुने बैंकका नायब प्रमुख कार्यकारी अधिकृत तथा प्रमुख सूचना अधिकारी सुधिरनाथ पाण्डेले जानकारी दिएका छन् । उक्त समझदारी बमोजिम यस बैंकको डेबिट/क्रेडिट कार्ड तथा मोबाइल बैंकिङ्ग प्रयोगकर्ताहरूले होटलको फूड एण्ड बेभरेज आउटलेटहरू तथा हार्मोनी स्पा सेवा प्रयोग गरे वापत रकम भुक्तानी गर्दा कारोबार रकमको १५ प्रतिशतसम्म छुट पाउनेछन् । साथै, यस बैंकका कर्मचारीहरूलाई पनि सो योजना अनुसारको छुट उपलब्ध हुनेछ । यसैगरी ग्राहकहरूले बैंकसँग आबद्ध भएका देशभरका २,४०० वटा भन्दा बढी अस्पताल, होटल तथा रेष्टुरेन्ट, डिपार्टमेन्ट स्टोर लगायतबाट सेवा लिई कारोबार रकमको ३० प्रतिशतसम्म छुट प्राप्त गर्न सक्नेछन् । बैंकले हाल ३१९ शाखा कार्यालयहरु, ४५५ एटिएम, १०८ वटा एक्स्टेन्सन काउण्टर एवं ६० वटा शाखारहित बैंकिङ्गमार्फत बैंकिङ्ग सेवा प्रदान गर्दै आएको छ ।
नेपाल घरेलु तथा साना उद्योग महासंघद्वारा घोषित कार्यक्रम स्थगित
काठमाडौं । पछिल्लो समय कोरोना भाइरसले ल्याएको विषम परिस्थितिलाई मध्यनजर गर्दै नेपाल घरेलु तथा साना उद्योग महासंघले आफ्ना घोषित कार्यक्रमहरुलाई स्थगन गरेको छ । नेपाल सरकारले सार्वजनिक सभा, सम्मेलन, समारोह, महोत्सव लगायत भीडभाड हुने कार्यक्रम नगर्न सार्वजनिक आव्हान गरिसकेको सन्दर्भमा सो आव्हानलाई मध्येनजर गर्दे यस महासंघले घोषित आफ्ना कार्यक्रमहरु स्थगित गरेको हो । अन्य मुलुकको तुलनामा नेपालमा हालसम्म न्यून संक्रमण देखिएको भएतापनि सजगता र सावधानी अपनाइएन भने यसले हाम्रो मुलुकमा पनि महामारीको रुप लिन सक्ने भएकाले यसतर्फ सजग रहन सबैसमक्ष महासंघले अपिल गरेको छ । विश्वव्यापी रुपमा फैलिएको कोरोना भाइरस (कोभिड–१९) को संक्रमणका सम्बन्धमा विश्व स्वास्थ्य संगठनले नेपाललाई पनि उच्च जोखिम मुलुकको दर्जामा राखेको छ । महासंघद्घारा घोषित कार्यक्रम अन्तरगत यही चैत १४, १५, १६ राजधानीमा राष्ट्रिय महाअधिवेशनका साथै प्रदेश तथा जिल्लास्तरीय औद्योगिक प्रदर्शनीहरु रहेका थिए । कोरोना भाइरसका कारण नेपालको औद्योगिक क्षेत्र, पर्यटन व्यवसाय तथा सानो पूँजीमा संचालित लघु, घरेलु तथा साना उद्योगहरु धाराशायीमा परेको तथा भ्रमण वर्ष २०२० समेत स्थगनमा परेको छ । संक्रमणको त्रासले नेपालको औद्योगिक क्षेत्रमा प्रत्यक्ष असर परिरहेको भन्दै महासंघले छिमेकी राष्ट्र भारतसँग जोडिएका चार वटा नाका मात्र खोलेकोले उद्योग क्षेत्रलाई आवश्यक पर्ने कच्चा पदार्थ आयातमा असर परिरहेको महासंघका कार्यवाहक अध्यक्ष उमेश प्रसाद सिंहले बताए । यसैगरी नेपालको औद्योगिक क्षेत्रमा कार्यरत विदेशी श्रमिकहरु सुरक्षाका लागि आफ्नो मुलुक फर्किएका र स्वदेशी जनशक्ति समेत सुरक्षित स्थानतर्फ लागेकाले उद्योग क्षेत्रमा जनशक्तिको अभाव हुँदै गएको उनले बताए । कच्चा पदार्थ, जनशक्तिको अभाव, सन्त्रासको वातावरणका कारण उत्पादकत्वमा कमी भई नेपालको औद्योगिक क्षेत्रमा विचलन आएको भन्दै महासंघले यस्तै अवस्था अरु केही समय रहेमा उद्योगहरु बन्द गर्नुपर्ने अवस्थाको सिर्जना हुन सक्नेतर्फ सरकारको ध्यानाकर्षण गराएको छ । कोरोना भाइरसका कारणले औद्योगिक क्षेत्रलाई असर पारेता पनि उद्योगहरुले कर्मचारी तथा मजदुरहरुलाई पारिश्रमिक दिइनुपर्ने, प्रशासनिक खर्च भइरहने र बैंकको व्याज लागिरहने भएकाले उद्योग क्षेत्र खास गरेर लघु, घरेलु तथा साना उद्योगीहरु मर्माहत भएको महासंघले जनाएको छ । तसर्थ कोरोना भाइरसबाट पीडित लघु, घरेलु तथा साना उद्योगका लागि विभिन्न व्यवस्था गरिदिन नेपाल सरकारसँग महासंघले आग्रह गरेको छ । कोरोना संक्रमण अवधिमा लागेको बैंकको व्याज तथा हर्जाना छुट हुनुपर्ने तथा चैत मसान्तसम्म बुझाउनु पर्ने आयकरको किस्ता बुझाउने म्याद अर्को तीन महिनाका लागि थप गर्नुपर्ने महासंघले जनाएको छ । उद्योग नविकरण गर्ने म्याद हाललाई कम्तिमा छ महिना थप गरि नविकरण शुल्क मिनाहा गरिनुपर्ने, वैदेशिक रोजगारबाट फर्केकाहरुलाई स्वदेशी उद्योगमा प्रतिस्थापन गर्न वा नयाँ उद्योग संचालनका लागि प्रोत्साहन गर्न उचित सीप विकास तालिम प्रदान गर्नुपर्ने महासंघको आग्रह छ । राज्यका संयन्त्रबाट दिईने अन्य छुट, सुविधा वा सहुलियतको लागि निर्णय हुनुपर्ने भन्दै सरकारले सार्वजनिक स्थलहरुमा स्यानिटाइजर तथा माक्सको व्यवस्था गरि दिनुपर्नेमा महासंघको जोड छ ।