लुम्बिनीमा आयोजित नबिल निःशुल्क जलन शिविरमा ८५ जनाले पाए उपचार तथा परामर्श
काठमाडौं । दाङको घोराहीस्थित राप्ती स्वास्थ्य विज्ञान प्रतिष्ठानमा सञ्चालन भएको नबिल निःशुल्क जलन उपचार शिविरमार्फत ८५ जनाले उपचार तथा परामर्श सेवा प्राप्त गरेका छन् । नबिल बैंक लिमिटेड र राप्ती स्वास्थ्य विज्ञान प्रतिष्ठानको आयोजना तथा सुष्मा कोइराला मेमोरियल अस्पतालको सहकार्यमा यही वैशाख २५ देखि २८ गतेसम्म शिविर आयोजना गरिएको थियो । शिविरमा २५ जनाको शल्यक्रिया गरिएको बैंकले जनाएको छ । त्यसमध्ये जटिल किसिमका १२ जना बिरामीलाई काठमाडौं शाँखुस्थित सुष्मा कोइराला मेमोरियल अस्पतालमा थप उपचारका लागि रिफर गरिएको छ । नबिल बैंकले काठमाडौंमा कार्यरत विशेषज्ञ चिकित्सकमार्फत विभिन्न प्रदेशका दुर्गम स्थानमा रहेका जलनसम्बन्धी बिरामीलाई नि:शुल्क उपचार र परामर्श दिँदै आएको छ । जलनका घटनाका पीडितलाई तत्काल र विशेष हेरचाह आवश्यक पर्दछ । तर आफ्नै ठाउँमा जलन उपचार केन्द्र नहुँदा पीडितहरूले समयमै गुणस्तरीय उपचार नपाउने अवस्था छ । जलनका कारण पीडा भोगिरहेका व्यक्तिहरूलाई उपचार गरी उनीहरुको जीवनमा सुधार ल्याउने प्रयास स्वरुप शिविर आयोजना गरिएको बैंकको भनाइ छ । बैंकले यसअघि मधेश प्रदेशमा वैशाख १७ गतेदेखि आयोजना गरेको चार दिने शिविरबाट १५० जनाले उपचार तथा परामर्श पाएका थिए । यस्तै, गत फागुन १२ देखि १४ सम्म सुदूरपश्चिमको धनगढीमा सञ्चालन भएको शिविरमार्फत ६५ जना र चैत २७ गतेदेखि कर्णाली प्रदेशको सुर्खेतमा सञ्चालन भएको शिविरमा १९४ जनाले उपचार तथा परामर्श पाएका थिए ।
हुलास फिनसर्भ हायर पर्चेजको नाफा ६५.३५ प्रतिशतले वृद्धि
काठमाडौं । हुलास फिन सर्भ हायर पर्चेज लिमिटेड (साबिक हुलास फिन सर्भ लिमिटेड) ले चालु आर्थिक वर्ष २०८२/८३ को तेस्रो त्रैमाससम्मको अपरिष्कृत वित्तीय विवरण सार्वजनिक गरेको छ । कम्पनीले प्रकाशित अन्तरिम वित्तीय विवरणअनुसार उल्लेखनीय व्यवसायिक विस्तार र प्रभावकारी कर्जा असुलीका कारण नाफा तथा कर्जा लगानी दुवैमा उत्साहजनक वृद्धि हासिल गरेको जनाएको छ । कम्पनीले समीक्षा अवधिसम्म २४ करोड १३ लाख ४२ हजार रुपैयाँ खुद नाफा आर्जन गरेको छ । जुन गत वर्षको सोही अवधिको तुलनामा ६५.३५ प्रतिशतले बढी हो । यसै अवधिमा कम्पनीको कुल कर्जा पोर्टफोलियो १० अर्ब पुगेको छ । जुन व्यवसायको आकारमा ७५.१० प्रतिशतको वृद्धि हो । कम्पनीका अनुसार सशक्त व्यवसायिक विस्तार तथा प्रभावकारी रिकभरी व्यवस्थापनका कारण निष्क्रिय कर्जा (एनपीएल) अनुपात ४.२२ प्रतिशतबाट घटेर २.९४ प्रतिशतमा झरेको छ । कर्जा लगानी उल्लेखनीय रूपमा बढाउँदै लैजाँदा पनि सम्पत्ति गुणस्तर सुधार हुनु कम्पनीको वित्तीय व्यवस्थापनको सकारात्मक संकेत भएको कम्पनीले जनाएको छ । कम्पनीले आगामी दिनमा पनि सन्तुलित तथा दिगो व्यवसायिक वृद्धि, प्रभावकारी जोखिम व्यवस्थापन, कर्जा असुली सुदृढीकरण तथा सरोकारवालाको दीर्घकालीन हित संरक्षणमा केन्द्रित रहने प्रतिबद्धता व्यक्त गरेको छ ।
जबरजस्ती मुद्दामा मिलापत्र गराउने पूर्ववडाध्यक्षसहित ४ जना पक्राउ
काठमाडौं । जबरजस्ती करणीसम्बन्धी मुद्दामा मिलापत्र गराउने प्रयास गरेको आरोपमा कपिलवस्तुमा चार जना पक्राउ परेका छन् । पीडितको उजुरीका आधारमा अनुसन्धान भइरहेका बेला मिलापत्रका नाममा अनुचित प्रभाव पार्ने काम गरेपछि उनीहरू पक्राउ परेका हुन् । पक्राउ पर्नेमा पीडितकी आमा (परिवर्तिन नाम ५१), यशोधरा गाउँपालिका–५ का ५५ वर्षीय नइम भन्ने लईस पठान (पूर्ववडाध्यक्ष), मोहम्मद सफिक पठान र ४५ वर्षीय लेखन्दास राम वृक्ष कोहार रहेका छन् । कपिलवस्तु यशोधरा ५ का वर्ष २६ का इलियास पठानले २१ गते आफ्नै घरको कोठाभित्र लगेर जबरजस्ती करणी गरेको आरोप लागेको थियो । पीडितकी आमाले २३ गते जाहेरी दर्ता गराएपछि मुद्दा अघि बढाइएको थियो । २७ गते मिलापत्र कागज र मुद्दा फिर्ता गरिपाऊँ भन्ने निवेदनसहित पीडितकी आमा र अर्का एक व्यक्ति कार्यालयमा उपस्थित भएपछि प्रहरीले उनीहरूलाई नियन्त्रणमा लिएको जनाएको छ । प्रारम्भिक सोधपुछका क्रममा जग्गा सम्बन्धी विवादलाई झुट्टा कारण देखाई मिलापत्र गराउने कार्यमा प्रतिवादीका बुवा मोहम्मद सफिक पठानको समेत संलग्नता देखिएको प्रहरीले जनाएको छ । उनको साथबाट १ लाख ३ हजार ५५० रुपैयाँ बरामद गरिएको छ । प्रहरीका अनुसार पीडितलाई अनुचित प्रभावमा पारी जबरजस्ती करणीसम्बन्धी फौजदारी कसूरमा मिलापत्र गराउने कार्यमा संलग्न भएको आरोपमा चार जनाविरुद्ध थप अनुसन्धानका लागि अदालतबाट ५ दिनको म्याद लिइएको छ । साथै मिलापत्र कागज लेखेको आरोपमा राम वृक्ष कोहारलाई पनि पक्राउ अनुमति जारी भई अदालतबाट म्याद थप गर्ने तयारी भइरहेको छ ।
नेपाल–भारत पारस्परिक सहायता सम्झौता संसद्मा पेस
काठमाडौं । सरकारले प्रतिनिधिसभामा नेपाल सरकार र भारत सरकारबीच भएको फौजदारी विषयमा पारस्परिक कानुनी सहायतासम्बन्धी सम्झौता पेस गरेको छ । बुधबार बसेको प्रतिनिधिसभाको बैठकमा कानुन, न्याय तथा संसदीय मामिलामन्त्री सोबिता गौतमले उक्त सम्झौता पेस गरेकी हुन् । सम्झौता संसद्मा पेस गर्दै मन्त्री गौतमले यो सम्झौतापछि भ्रष्टाचार गरी अर्को मुलुकमा लुकाएको सम्पत्ति फिर्ता ल्याउने लगायत कार्यमा सहज हुने बताइन् । अपराधीलाई सजाय दिन र अपराधबाट कमाएको सम्पति फिर्ता ल्याउन सहज हुने बताएकी हुन् । यसले सम्पति शुद्धीकरणको कार्यमा समेत सहयोग पु‍र्याउने उनले बताइन् ।
ग्लोबल आउटसोर्सिङ सूचकांकमा नेपाल विश्वकै शीर्ष २० भित्र, फिलिपिन्स पहिलो नम्बरमा
काठमाडौं । ग्लोबल आउटसोर्सिङ सूचकांकमा नेपाल शीर्ष २० भित्र परेको छ । ‘ग्लोबल आउटसोर्सिङ टयालेन्ट इन्डेक्स २०२६’ को रिर्पोटअनुसार नेपाल शीर्ष २० भित्र परेको हो । रिपोर्टअनुसार १९३ देशमध्ये नेपालले १७४ देशलाई पछि पार्दै विश्वकै उत्कृष्ट २० देशभित्र स्थान बनाएको छ । रिपोर्टमा आउटसोर्सिङ प्रतिस्पर्धात्मकता मापन गर्न पाँच आधार प्रयोग गरिएको छ । नेपालले श्रम लागत, अंग्रेजी प्रोफेसेन्सी, ट्यालेन्ट अभाइलेवलिटी, डिजिटल इन्फ्रास्ट्रक्चर र बिजनेस स्टाविलिटी श्रम लागत, अंग्रेजी दक्षता, दक्ष जनशक्ति उपलब्धता, डिजिटल पूर्वाधार र व्यापार तथा राजनीतिक स्थायित्वगरी कुल ७९.६५ प्रतिशत अंक प्राप्त गरेको छ । सूचकांकमा फिलिपिन्स पहिलो नम्बरमा रहेको छ । दोस्रोमा मलेसिया र तेस्रो स्थानमा भारत रहेको छ । नेपालले श्रम लागतमा ९६, अंग्रेजी दक्षतामा ८०, प्रतिभा उपलब्धतामा ५०, डिजिटल पूर्वाधारमा ४० तथा व्यापार स्थायित्वमा ५०, डिजिटल पूर्वाधारमा ४०, व्यापार तथा राजनीतिक स्थायित्वमा ४० अंक प्राप्त गरेको रिर्पोटमा उल्लेख गरिएको छ । उत्कृष्ट २० देशहरुमा फिलिपिन्स, मलेसिया, भारत, चिली, साउथ अफ्रिका, नाइजेरिया, पेरु, इन्डोनिसिया, अर्जेटिना, रोमनिया, केन्या, डोमिनकन रिपब्लिक, ब्राजिल, पोल्याण्ड, इजिप्ट, पाकिस्तान, घना, नेपाल र बंगलादेश रहेका छन् ।
पोखराका आयुर्वेद अस्पतालमा गैरकानुनी औषधि छ्याप्छ्याप्ती
गण्डकी । पोखरामा सञ्चालित आयुर्वेद अस्पताल/क्लिनिकमा गैरकानुनी तथा गुणस्तरहीन औषधि निर्वाध रूपमा बिक्रीवितरण भइरहेको पाइएको छ । जिल्ला प्रशासन कार्यालय कास्कीको नेतृत्वमा आज गरिएको अनुगमनका क्रममा पोखरा महानगरपालिका–१० बुद्धचोक क्षेत्रमा रहेका आयुर्वेद अस्पताल र क्लिनिकमा त्यस्ता औषधि छ्याप्छ्याप्ती भेटिएका हुन् । औषधि व्यवस्था विभागबाट स्वीकृत नलिएका र म्याद गुज्रेका औषधि बरामद गरी नष्ट गरिएको सहायक प्रमुख जिल्ला अधिकारी चित्राङ्गत बरालले जानकारी दिए । 'अधिकांश अस्पताल र क्लिनिकमा गैरकानुनी औषधि बिक्रीवितरण भइरहेको पाइएको छ', उनले भने, 'आयुर्वेद उपचारका नाममा विकृति मौलाउँदै गएपछि अनुगमनमा कडाइ गरिएको हो, गलत गर्नेलाई कानुनअनुसार कारबाही हुन्छ ।' अनुगमनका क्रममा तोकिएको मापदण्ड पूरा नगरेका, दर्ता नवीकरण नभएका, दररेट नराखेका, चिकित्सक र स्वास्थ्यकर्मीलाई नियुक्तिपत्र नदिई काममा लगाएका अस्पताल तथा क्लिनिकलाई आवश्यक कागजपत्रसहित बुधबार जिल्ला प्रशासन कार्यालयमा उपस्थित हुन भनिएको सहायक प्रजिअ बरालले बताए । सञ्चालन अनुमतिपत्र नदेखिएपछि फेमिली आयुर्वेदिक क्लिनिकलाई बन्द गराई आवश्यक प्रक्रिया पूरा गरी अनुमतिपत्र लिन सचेत गराइएको उनको भनाइ छ । अनुगमन टोलीमा रहनुभएका गण्डकी आयुर्वेद अस्पतालका चिकित्सक विपिनबन्धु आचार्यले औषधि व्यवस्था विभागबाट अनुमति नलिई उत्पादन गरिएका कुनै पनि औषधि बेच्न नपाइने बताए । 'कानुनी मान्यता नपाएका र गुणस्तरहीन आयुर्वेद औषधि बजारमा भित्रने गरेको छ, औषधि किन्ने बेलामा अस्पताल स्वयं सचेत हुनुपर्छ', उनले भने, 'औषधि व्यवस्था विभागमा दर्ता छरछैन निश्चित गरेरमात्र औषधि खरिद गर्नुपर्छ ।' क्लिनिक र फार्मेसीहरूमा आयुर्वेद विषयको ज्ञान नै नभएका व्यक्तिले औषधि बिक्री गर्ने गरेकोसमेत पाइएको चिकित्सक आचार्यले बताए । पोखरामा हेल्दी होम्सका कविराज अस्मिना बञ्जराले अनुमति नलिई आयुर्वेद औषधि उत्पादन र बिक्रीवितरण गर्ने कम्पनीलाई राज्यले कारबाहीको दायरामा ल्याउनुपर्ने बताए । 'कतिपय कम्पनीले औषधि व्यवस्था विभागमा दर्ता छ भनेर झक्याउन सक्छन्, अबदेखि अस्पताल र क्लिनिकहरू यसमा सचेत हुनुपर्छ', उनले भने । धेरैजसो आयुर्वेद अस्पताल र क्लिनिक पोखरा–१० बुद्धचोक, अमरसिंहचोकलगायत क्षेत्रमा सञ्चालित छन् । अस्पताल भनेर सञ्चालन गरे पनि कतिपयमा अस्पतालको न्यूनतम पूर्वाधार पनि नरहेको पाइएको अनुगमनमा सहभागी उपभोक्ता मञ्च कास्कीका सचिव कमल पौडेल ‘अथक’ले बताए । अनुगमनलाई थप कडाइ गर्दै दोषी भेटिएका जोकोहीलाई कानुनी कारबाहीको दायरामा ल्याउनुपर्ने उनको भनाइ छ । यस्तै मापदण्डविपरीत अनावश्यक रूपमा होर्डिङ बोर्ड राखेका क्लिनिकलाई त्यस्ता बोर्ड तत्काल हटाउन भनिएको जिल्ला प्रशाससन कार्यालयले जनाएको छ । बुद्धचोकको नेचर केयर आयुर्वेद अस्पताल, साधना आयुर्वेद क्लिनिक, आरोग्य होमियो फार्मेसी, आरोग्य होमियोप्याथिक अस्पताल, पञ्चम आयुर्वेद, पोखरा हेल्दी होम्स, रश्मी आयुर्वेद क्लिनिक र फेमिली आयुर्वेदिक क्लिनिकको अनुगमन गरिएको थियो । अनुगमन टोलीमा जिल्ला प्रशासन कार्यालय, पोखरा महानगरपालिका, गण्डकी आयुर्वेद अस्पताल, प्रोदशिक जनस्वास्थ्य केन्द्र, वडा प्रहरी कार्यालय बैदाम, उपभोक्ता मञ्चका प्रतिनिधिलगायत सञ्चारकर्मीको सहभागिता रहेको थियो ।
कक्षा १२ को प्रश्नपत्र सार्वजनिक गर्ने दुई जना पक्राउ
काठमाडौं । फेसबुक र ह्वाट्सएप ग्रुपबाट कक्षा १२ को प्रश्नोत्तर सार्वजनिक गर्ने दुई जना व्यक्ति पक्राउ परेका छन् । सोमबार ३७ वर्षीय निराजन शाही र ३० वर्षीय प्रेम कुमार श्रेष्ठलाई नेपाल प्रहरीको साइबर ब्यूरोले चाबहिलबाट पक्राउ गरेको हो । उनीहरूले राष्ट्रिय परीक्षा बोर्डद्वारा सञ्चालन गरिएको कक्षा १२ को प्रश्नपत्र परीक्षा सुरु अगावै प्रश्नोत्तर विभिन्न ह्वाट्सएप र फेसबुक ग्रुपबाट सार्वजनिक गरेका थिए । परीक्षा हुनुभन्दा केही समय अगाडि बाहिरिएको प्रश्नोतर अनुसन्धानको गर्न राष्ट्रिय परीक्षा बोर्डले निवेदन दिएको थियो । ब्यूरोले गरेको प्राविधिक विश्लेषण तथा अनुसन्धानबाट क्लास १२ म्यानेजमेन्ट वान्ली भन्ने ह्वाट्सएप र मेसेन्जर ग्रुपबाट उनीहरूले प्रश्नोतर बाहिर ल्याउने गरेका थिए । प्रश्न पत्रको गोपनीयता भंग गर्ने कार्यमा संलग्न रहेको आरोपमा दुवै जनालाई पक्राउ गरिएको ब्यूरोले जनाएको छ । विद्युतीय कारोबार ऐन, २०६३ अन्तर्गतको कसुरमा जिल्ला अदालत, काठमाडौंको आदेशले दिन चार दिनको म्याद थप गरेर अनुसन्धान भइरहेको छ ।
डीडीसीका कर्मचारीले अब सित्तैमा दूध-घ्यू खान नपाउने, २ करोड ८५ लाख जोगिने
काठमाडौं । दुग्ध विकास संस्थान (डीडीसी) का कर्मचारीहरूले सित्तैमा उपभोग गर्दै आएको दूध र घ्यूको सुविधा अब खोसिने भएको छ । कृषि तथा पशुपन्छी विकास मन्त्री गीता चौधरीले उक्त सुविधा तत्काल रोक्न निर्देशन दिएकी हुन् । डीडीसीका कर्मचारीहरूले दैनिक दूध र मासिक रूपमा घ्यू सित्तैमा घर लैजाँदै आएका थिए । मन्त्री चौधरीले निर्देशन दिएसँगै अब संस्थानको वार्षिक २ करोड ८५ लाख जोगिनेछ भएको छ । ‘संस्थान कर्मचारी पाल्नका लागि मात्र होइन, किसान र उपभोक्ताको सेवाका लागि हो,’ मन्त्री चौधरीले भनिन् । कर्मचारीको सुविधा कटौती गरेर जोगिएको यो २ करोड ८५ लाख रुपैयाँ अब किसानहरूको बाँकी बक्यौता भुक्तानी र दुग्ध उत्पादन वृद्धिका कार्यक्रममा खर्च गरिने मन्त्रालयले जनाएको छ ।
