माछापुच्छ्रे बैंकमा महतोपछि ठूला सेयरधनी श्रेष्ठ पनि बाहिरिँदै
काठमाडौं । माछापुच्छ्रे बैंकका २० ठूला सेयरधनीहरूमध्ये गणेश बहादुर श्रेष्ठ पनि एक हुन् । तर, ठूला संस्थापक सेयरधनी रहेको श्रेष्ठ आफ्नो स्वामित्वको सेयर बिक्री गरेर बैंकबाट बाहिरिने भएका हुन् । श्रेष्ठले बैंकमा रहेको आफ्नो स्वामित्वको साढे १० लाख कित्ता सेयर बिक्रीमा राखेका हुन् । बैंकले श्रेष्ठको नाममा रहेको १० लाख ५६ हजार ९१७ कित्ता सेयर बिक्रीमा राखेको हो । बैंकको उक्त सेयरमा सर्वसाधारण जोकोहीले पनि आवेदन दिन सक्ने जनाएको छ । उक्त संस्थापक सेयर खरिद गर्न इच्छुक लगानीकर्ताले ७ दिनभित्र आवेदन दिनुपर्नेछ । यसअघि दुईपटकसम्म सार्वजनिक सूचना आह्वान गर्दा पनि खरिदका लागि कुनै आवेदन नपरेकोले पुनः बिक्रीमा राखिएको बैंकले बताएको छ । यसअघि गत वर्ष बैंकका सबैभन्दा ठूला सेयरधनी सुरेन्द्र महतोले आफ्नो स्वामित्वको सेयर बेचेर बाहिरिएका थिए । उनले १ करोड १२ लाख ३२ हजार कित्ता सेयर बिक्री गरेका थिए । उनले बिक्रीमा राखेको सेयर कर्मचारी सञ्चय कोषले प्रतिकित्ता ११३ रुपैयाँमा खरिद गरेको थियो ।
४ दिनमै अमेरिकी डलरको मूल्यले बनायो नयाँ रकेर्ड, यूरोको भाउ खस्किँदै
काठमाडौं । ४ दिनमै अमेरिकी डलरको मूल्यले नयाँ रकेर्ड बनाएको छ । नेपाल राष्ट्र बैंकले अमेरिकी डलरको मूल्य एकको खरिदर १३४.२२ रुपैयाँ र बिक्रीदर १३४.८२ रुपैयाँ तोकेको छ । जुन हालसम्मकै उच्च हो । यसअघि असोज २८ गते अमेरिकी डलरको मूल्यले नयाँ रकेर्ड बनाएको थियो । सो दिन डलरको मूल्य एकको खरिदर १३४.२० रुपैयाँ र बिक्रीदर १३४.८० रुपैयाँ थियो । युरोपियन यूरोको एकको खरिदर १४५.८५ रुपैयाँ र बिक्रीदर १४६.५० रुपैयाँ, युके पाउण्ड स्ट्रलिङ एकको खरिददर १७४.६७ रुपैयाँ र बिक्रीदर १७५.४५ रुपैयाँ, स्वीस फ्रयाङ्क एकको खरिददर १५५.४५ रुपैयाँ र बिक्रीदर १५६.१४ रुपैयाँ, अष्ट्रेलियन डलर एकको खरिददर ८९.९३ रुपैयाँ र बिक्रीदर ९०.३४ रुपैयाँ तोकेको छ । यस्तै, क्यानेडियन डलर एकको खरिददर ९७.४३ रुपैयाँ र बिक्रीदर ९७.८६ रुपैयाँ, सिङ्गापुर डलर एकको खरिददर १०२.२७ रुपैयाँ र बिक्रीदर १०२.७३ रुपैयाँ, जापानी येन १० को खरिददर ८.९७ रुपैयाँ र बिक्रीदर ९.०१ रुपैयाँ र चिनियाँ युआन एकको खरिददर १८.८५ रुपैयाँ र बिक्रीदर १८.९३ रुपैयाँ तोकेको छ । राष्ट्र बैंककाअनुसार साउदी अरेबियन रियाल एकको खरिददर ३५.७४ रुपैयाँ र बिक्रीदर ३५.९० रुपैयाँ, कतारी रियाल एकको खरिददर ३६.८१ रुपैयाँ र बिक्रीदर ३६.९८ रुपैयाँ, थाई भाट एकको खरिददर ४.०५ रुपैयाँ र बिक्रीदर ४.०६ रुपैयाँ, युएई दिराम एकको खरिददर ३६.५४ रुपैयाँ र बिक्रीदर ३६.७१ रुपैयाँ, मलेसियन रिङ्गेट एकको खरिददर ३१.१४ रुपैयाँ र बिक्रीदर ३१.२८ रुपैयाँ तोकेको छ । यस्तै साउथ कोरियन वन एक सयको खरिदद ९.७९ रुपैयाँ र बिक्रीदर ९.८४ रुपैयाँ, स्वीडिस क्रोनर एकको खरिददर १२.७७ रुपैयाँ र बिक्रीदर १२.८३ रुपैयाँ, डेनिस क्रोनर एकको खरिददर १९.५५ रुपैयाँ र बिक्रीदर १९.६४ रुपैयाँ, हङ्कङ डलर एकको खरिददर १७.२७ रुपैयाँ र बिक्रीदर १७.३४ रुपैयाँ, कुवेती दिनार एकको खरिददर ४३८.१५ रुपैयाँ र बिक्रीदर ४४०.११ रुपैयाँ र बहराइन दिनार एकको खरिददर ३५६.०० रुपैयाँ र बिक्रीदर ३५७.५९ रुपैयाँ कायम रहेको राष्ट्र बैंकले जनाएको छ ।
देशभर तापक्रम निरन्तर घट्दै, कोशी, बागमती र गण्डकीमा वर्षा हुने
काठमाडौं । हाल देशभर पश्चिमी वायुको प्रभाव रहनुका साथै कोशी, बागमती र गण्डकी प्रदेशको पहाडी भागमा स्थानीय वायुको पनि केही प्रभाव रहेको जल तथा मौसम विज्ञान विभागले जनाएको छ । देशबाट मनसुन बाहिरिएसँगै काठमाडौं उपत्यकालगायत देशका विभिन्न भागको तापक्रम क्रमशः घट्न थालेको छ । काठमाडौं उपत्यकाको अहिलेको तापक्रम १६ डिग्री सेल्सियस मापन गरिएको छ । आज यहाँको अधिकतम तापक्रम २६ देखि २८ डिग्री सेल्सियसका बीच रहने विभागको पूर्वानुमान छ । विभागका अनुसार कोशी, मधेस, बागमती, गण्डकी र लुम्बिनी प्रदेशका केही भागमा आंशिकदेखि साधारणतया बदली रहेको र बाँकी भागमा मौसम सफा रहेको छ । विभागले आज बिहान ६ बजे जारी गरेको मौसम बुलेटिन अनुसार आज दिउँसो देशका पहाडी भागमा आंशिकदेखि साधारणतया बदली रही बाँकी भागमा मौसम सफा रहने छ । कोशी, बागमती र गण्डकी प्रदेशका पहाडी भागका केही स्थान तथा बाँकी प्रदेशका पहाडी भागका एक/दुई स्थानमा मेघगर्जन र चट्याङसहित हल्का वर्षाको सम्भावना छ । त्यसैगरी आज राति कोशी, बागमती र गण्डकी प्रदेशको पहाडी भागमा आंशिकदेखि साधारणतया बदली रही बाँकी भागमा मौसम सफा रहनेछ । कोशी, बागमती र गण्डकी प्रदेशका पहाडी भागका एक/दुई स्थानमा मेघगर्जन र चट्याङसहित हल्का वर्षाको सम्भावना छ ।
सम्पर्कविहीन समस्याग्रस्त घोषित सहकारीका ऋणी
काठमाडौं । समस्याग्रस्त सहकारी व्यवस्थापन समितिको कार्यालयले समस्याग्रस्त घोषित सहकारी संस्थाका ऋणीलाई १५ दिनभित्र दायित्व भुक्तानी गर्न सार्वजनिक सूचनामार्फत आह्वान गरेको छ । समितिले सार्वजनिक सूचना प्रकाशित गरी समस्याग्रस्त घोषित सहकारी संस्थाका सञ्चालक, व्यवस्थापक, ऋणी सदस्य र कर्मचारीलाई पटकपटक ३५ दिने सूचना, पत्राचार गर्दा पनि केही ऋणीबाहेक अधिकांश सम्पर्कमा नआएकाले सार्वजनिक सूचनामार्फत १५ दिनभित्र दायित्व भुक्तानी गर्न निर्देशन दिएको हो । कात्तिक १ गतेदेखि १५ दिनभित्र पनि दायित्व भुक्तानी गर्न नआउने ऋणी तथा जमानीकर्ता र निजका एकाघरका परिवारका सदस्यको श्रीसम्पत्ति बैंक खाता रोक्का राख्ने, कालोसूचीमा राखेर रोक्का राखिएको श्रीसम्पत्ति र बैंक खाताबाट सहकारी ऐन, २०७४ को दफा ११५ को उपदफा (१) र सहकारी नियमावली, २०७५ बमोजिम असुलउपर गरिने पनि सूचनामा उल्लेख गरिएको कार्यालय प्रमुख केशवप्रसाद पौडेलले जानकारी दिए । भूमि व्यवस्था, सहकारी तथा गरिबी निवारण मन्त्रालयले सहकारी ऐन, २०७४ को उपदफा १०४ बमोजिम सहकारीलाई समस्याग्रस्त घोषणा गरिएको उनले सुनाए । समस्याग्रस्त घोषित भई सहकारी ऐन, २०७४ को उपदफा १०५ बमोजिम सम्पत्ति व्यवस्थापन तथा दायित्व भुक्तानीका लागि मन्त्रालयले समितिसमक्ष लेखी पठाएअनुसारको प्रक्रियामा काम भइरहेको पनि समितिले जनाएको छ । सरकारले करिब दुई दर्जन सहकारीलाई समस्याग्रस्त घोषणा गरिसकेको छ ।
सन नेपाल लाइफले पायो आईएसओ/आईईसी २७००१:२०२२ को प्रमाणपत्र, बीमा क्षेत्रमै पहिलो
काठमाडौं । सन नेपाल लाइफ इन्स्योरेन्सले आईएसओ/आईईसी २७००१:२०२२ को प्रमाणपत्र पाएकाे छ । कम्पनीले युकेएएस (युनाईटेड किङडम एक्रीडिएसन सर्भिस) बाट मान्यताप्राप्त एमटीभो लिमिटेड, यूकेबाट उक्त प्रमाणपत्र पाएकाे हाे । कम्पनीले आईएसओ/आईईसी २७००१:२०२२ को प्रमाणपत्रले कम्पनीकाे सूचना सुरक्षण व्यवस्थापन प्रणाली (इन्फरमेसन सेक्युरिटी मेनेजमेन्ट सिस्टम) अन्तर्राष्ट्रिय मापदण्डबमोजिम रहेकाे पुष्टि गरेकाे जनाएकाे छ । कम्पनीले नेपालको बीमा ब्यवसायमा यसरी अन्तर्राष्ट्रिय मापदण्डबमोजिम आईएसओ/आईईसी २७००१:२०२२ को प्रमाणपत्र प्राप्त गर्ने पहिलाे र एकमात्र जीवन बीमा कम्पनी रहेकाे दाबी गरेकाे छ । कम्पनीले आईएसओ/आईईसी २७००१:२०२२ को मान्यता प्राप्त गरेसँगै समयसमयमा हुने परीक्षणहरूबाट कम्पनीको सूचना सुरक्षण प्रणालीमा नियमित अनुगमन हुने जनाएकाे छ । साथै कम्पनीले निरन्तर रूपमा यसको पालना र अभ्यासबाट कम्पनीको सूचना सुरक्षा प्रणाली निरन्तर मजबुत हुँदै जाने विश्वास पनि लिएको छ ।
वालमार्टले भारतबाट बर्सेनि १० अर्ब डलरको सामान किन्ने
काठमाडौं । विश्वको सबैभन्दा ठूलो रिटेल कम्पनी वालमार्टले चाडपर्वको समयमा भारतीय बजारका लागि ठूलो निर्णय गरेको छ । कम्पनीले भारतमा लोकप्रिय ब्रान्डका खाना र स्न्याक्स उत्पादनको स्रोत बढाउने बताएको छ । जसमा ब्रिटानिया, बिकानो, बदाम, जयन्ती स्पाइसिस र हाइफनका उत्पादनहरू पर्छन् । यी उत्पादनहरू दीपावलीअघि अमेरिकी बजारमा उपलब्ध हुनेछन् । वालमार्ट राजस्वको हिसाबले विश्वको सबैभन्दा ठूलो कम्पनी हो । साथै यो विश्वको सबैभन्दा ठूलो रोजगारदाता पनि हो । वालमार्टले अमेरिकी ग्राहकहरूले मनपर्ने खाजा र खाद्य उत्पादनहरूको विविध दायरा पाउने बताएको छ । यसमा प्रिमियम चिया, खानाका लागि तयार र फ्रोजन फूड प्रोडक्टका साथै परम्परागत खाजा, मसला र फेस्टिभल प्याकहरू समावेश छन् । यो दीपावलीमा ब्रिटानिया र बिकानो उत्पादनहरू उपलब्ध हुनेछन् । रिगल किचन र बदामजस्ता ब्रान्डका उत्पादनहरू अमेरिकामा वालमार्टका ग्राहकहरूका लागि पहिले नै उपलब्ध छन् । जयन्ती स्पाइसिस र हाइफन फूड्सका उत्पादनहरू पनि वालमार्टको ग्रेट भ्यालु ब्रान्ड लेबलअन्तर्गत उपलब्ध छन् । कम्पनीले के भन्छ ? वालमार्टका सोर्सिङका कार्यकारी उपाध्यक्ष एन्ड्रिया अल्ब्राइटले कम्पनी आफ्ना ग्राहकहरूलाई फरक उत्पादनहरू उपलब्ध गराउन प्रतिबद्ध रहेकाे दाबी गरिन् । उनका अनुसार सन् २०२७ सम्ममा भारतबाट १० अर्ब डलरको निर्यात पुर्याउने वालमार्टकाे लक्ष्य छ ।
ब्याजदर घटेको मौका छोप्यो निफ्राले, ६ प्रतिशत ब्याजमा ५ अर्ब ऋणपत्र जारी गर्दै
काठमाडौं । निक्षेपको ब्याजदर घटेको अवसरमा नेपाल इन्फ्रास्ट्राक्चर बैंकले सस्तो ब्याजदरमा ऋणपत्र जारी गर्न लागेको छ । बैंकले ७ वर्ष अवधिका लागि वार्षिक ६ प्रतिशत ब्याजदरमा ऋणपत्र जारी गर्न लागेको हो । उक्त ऋणपत्रको नाम ‘निफ्रा उर्जा ऋणपत्र ६%, २०८८/८९’ राखिएको छ । हाल बैंकहरूले निक्षेपमा बढीमा ५ प्रतिशतमात्र ब्याज दिइरहेको अवस्थामा निफ्राले ६ प्रतिशतमा जारी गर्ने ऋणपत्र बजारमा बिक्ने सम्भावना अधिक छ । दुई वर्षअघि बैंकहरूले मुद्दतीमा दिने ब्याजदरभन्दा १ प्रतिशत कम व्याजदरमा बैंकहरूले ऋणपत्र बिक्री गरेका थिए । तरलता अभावको समयमा वाणिज्य बैंकहरूले १० देखि १२ प्रतिशत ब्याजदरमा ऋणपत्र निष्काषन गरेका थिए । कुल ५ अर्ब रूपैयाँको ऋणपत्रमा ६० प्रतिशत परिपत्र विधिबाट संस्थाहरूको लागि र ४० प्रतिशत अन्य सर्वसाधारणका लागि सार्वजनिक निष्काषन गरिने बैंकले जनाएको छ । बैंकले ऋणपत्र निष्काषन गर्नका लागि एनआइएमबी एस क्यापिटल लिमिटेडलाई निष्काषन तथा बिक्री प्रबन्धकमा नियुक्त गरेको छ । उक्त सम्झौतापत्रमा निष्काषन कम्पनीका तर्फबाट नायब महाप्रबन्धक विनयनाथ न्यौपाने र निष्काषन तथा बिक्री प्रबन्धकका तर्फबाट महाप्रबन्धक सचिन्द्र ढुङ्गानाले हस्ताक्षर गरेका छन् । ऋणपत्र निष्काषनको लागि नेपाल धितोपत्र बोर्डको स्वीकृति लिने प्रक्रिया अगाडि बढेको बैंकले जनाएको छ ।
बाढीको चोटमा बीमकको मलहम, बीमितलाई एडभान्स भुक्तानी
काठमाडाैं । बाढी-पहिरोका कारण बीमा कम्पनीहरूलाई करिब ९ अर्ब रुपैयाँ आर्थिक दायित्व पर्ने भएको छ । बाढी-पहिरोका कारण बीमा कम्पनीमा ८ अर्ब ९८ करोड ३० लाख रुपैयाँ बढीको दाबी पेस भएको नेपाल बीमा प्राधिकरणले जनाएको छ । असोजको दोस्रो साता अविरल वर्षाका कारण आएको बाढी र पहिरोका कारण अरबौं रुपैयाँको क्षति भएको थियो । त्यसमध्ये उक्त रकम बराबरको दाबी बीमा कम्पनीहरूमा पेस भएको प्राधिकरणले उल्लेख गरेको छ । प्राधिकरणका अनुसार ३ हजार २४४ वटा दाबी कम्पनीमा परेको छ । जसमध्ये ९७ वटा दाबीको १७ करोड २८ लाख रुपैयाँ कम्पनीहरूले बीमितलाई भुक्तानी पनि दिइसकेको जनाएका छन् । जसमध्ये शिखर इन्स्योरेन्स्ले १७ करोड २४ लाख, हिमालयन एभरेष्टले २३ हजार , नेको इन्स्योरेन्सले ६६ हजार, सानिमा जिआईसी इन्स्योरेन्सले २ लाख १६ हजार र प्रभु इन्स्योरेन्सले ११ हजार गरी कुल १७ करोड २८ लाख रुपैयाँ दाबी भुक्तानी भएको प्राधिकरणले जनाएको छ । कुन कम्पनीमा कति दाबी पेस ? सबैभन्दा धेरै दाबी सिद्धार्थ प्रिमियर इन्स्योरेन्समा परेको छ । सिद्धार्थ प्रिमियरमा १ अर्ब ९५ करोड २९ लाख रुपैयाँको ४६१ वटा दाबी पेस भएको छ । यसैगरी, दी ओरिएन्टल इन्स्योरेन्समा १ अर्ब ४५ करोड ६८ लाख रुपैयाँको दाबी पेस हुँदा हिमालयन एभरेष्टमा १ अर्ब ८ करोड ८६ लाख, नेको इन्स्योरेन्समा ९६ करोड ८५ लाख, शिखरमा ९३ करोड ३६ लाख र सगरमाथा इन्स्योरेन्समा ६६ करोड १३ लाख रुपैयाँ दाबी पेस भएको छ । ५२ वटा जिल्लाबाट दाबी परेको प्राधिकरणले जनाएको छ । जसमध्ये सबैभन्दा धेरै काठमाडौं जिल्लाबाट दाबी परेको छ । काठमाडौंबाट मात्रै ३ अर्ब ९३ करोड ९९ लाख रुपैयाँको दाबी पेस हुँदा ललितपुरबाट २ अर्ब २७ करोड २१ लाख, चितवनबाट ६४ करोड ५८ लाख, मकवानपुरबाट ५१ करोड ७२ लाख र भक्तपुरबाट ४२ करोड ४२ लाख रुपैयाँ बीमा दाबी पेस भएको छ । छिटो भुक्तानी दिने तयारी बाढी-पहिरोले ठूलो धनजनको क्षति भएपछि नेपाल बीमा प्राधिकरणले बीमा कम्पनीहरूलाई दाबी भुक्तानी छिटो गर्न निर्देशन नै दिएको थियो । प्राधिकरणका अध्यक्ष सूर्यप्रसाद सिलवालले कम्पनीका प्रमुख कार्यकारी अधिकृतहरूलाई बोलाएर दाबी भुक्तानी सकभर छिटो गर्न आग्रह गरेका थिए । प्राधिकरणको निर्देशन बमोजिम आफूहरू दाबी भुक्तानीका लागि तयार भएको बीमा कम्पनीहरूको भनाइ छ । नेपाल बीमक संघका अध्यक्ष चंकी क्षेत्रीले दाबी भुक्तानीका लागि बीमा कम्पनीहरू तयार रहेको बताए । सगरमाथा लुम्बिनी इन्स्योरेन्सका सीईओ समेत रहेका क्षेत्रीले बाढी-पहिरोपछि दाबी पेस हुन थालेको र लगत्तै सबै सर्भेयरहरूलाई सर्भेका लागि खटाएको जानकारी दिए । सर्भे रिपोर्ट आउनासाथ दाबी भुक्तानी धमाधम दिने उनले बताए । ‘अहिलेसम्म कम्पनीहरूले १७ करोड दाबी भुक्तानी गरिसकेको अवस्था छ । सर्भे रिपोर्ट आएसँगै दाबी भुक्तानी धमाधम दिन्छाैं, ’उनले भने । उनले सर्भे रिपोर्ट ढिला आउने भएको अवस्थामा कम्पनीहरूले एडभान्स भुक्तानी पनि दिएको बताए । प्राधिकरणका निर्देशक सुशीलदेव सुवेदीले बीमाले विपदको घाउमा मलहम लगाउने गरेको बताए । नेपालमा बारम्बार आउने गरेका बाढी-पहिरो तथा भूकम्पले मानिसहरूको सम्पत्तिमा पुर्याएको क्षतिलाई उल्लेख गर्दै उनले यस्तो क्षतिको भरपाइ बीमा कम्पनीहरूले गर्ने बताए । यसले गर्दा पनि सबैले आफ्नो सम्पत्तिको बीमा गरेर बस्नु पर्ने धारणा व्यक्त गरे । प्राधिकरणका प्रवक्तासमेत रहेका सुवेदीले भने, ‘विपद भनेको कुन बेला आउँछ थाहा हुँदैन । प्राकृतिक विपदले निम्त्याउने आर्थिक क्षतिबाट बच्न बीमा गर्नुपर्दछ ।’
