राति २ बजे कुमारी बैंकमा तोडफोड
बाजुरा । कुमारी बैंकको एक शाखामा गएराति तोडफोड भएको छ । बाजुरा जिल्लाको गौमुल गाउँपालिकाको घटमुना बजारमा रहेको कुमारी बैंकको शाखा कार्यालयमा गएराति अज्ञात व्यक्तिद्वारा तोडफोड भएको छ । राति २ बजेको एक जना व्यक्ति बैंकमा प्रवेश गरेको र कम्प्युटर चोरी गरेको शाखाका प्रबन्धक शीतल रावतले जानकारी दिए । ‘एक जना व्यक्ति कार्यालयको मुल ढोका तोडफोड गरी बैंकमा प्रवेश गरेको र एउटा कम्प्युटर चोरी गरी लगेको सिसिटिभीमा देखिएको छ, प्रहरीले अनुसन्धान गरिरहेको छ,’ उनले भने । जिल्ला प्रहरी कार्यालय बाजुराले गए राति नै घटमुना बजारमा रहेका चार वटा पसलमा पनि चोरी भएको जनाएको छ । ‘बैंकमा एक जना मात्र सुरक्षाकर्मी रहेको र उनको राति ८ बजेसम्म मात्रै ड्युटी सकिएको जानकारी प्राप्त भएको छ । सुरक्षाकर्मी नभएको समयमा अज्ञात व्यक्तिले बैंकको मूल ढोका तोडफोड गरी बैंकभित्र प्रवेश गरेको देखिएको छ, अनुसन्धान सुरु भएको छ,’ जिल्ला प्रहरी कार्यालय बाजुराका निमित्त प्रहरी नायव उपरीक्षक रवीन्द्रसिं कार्कीको भने । गएराति नै गौमुल गाउँपालिका-६ मा रहेको सूर्योदय बहुउद्देश्यीय सहकारी संस्थाबाट ५० हजार समेत चोरी भएको सो सहकारीका अध्यक्ष श्याम रोकायाले बताए ।
नाडा अटो शोमा ट्राइम्फका १५० बढी मोटरसाइकल बुकिङ, हंसराज हुलासचन्द एण्ड कम्पनीलाई सफलता
काठमाडौं । यस वर्षको नाडा अटो शो २०२४ मा ट्राइम्फ मोटरसाइकलले उल्लेखनीय उपलब्धि हासिल गरेको छ । १५० भन्दा बढी संख्यामा भएको मोटरसाइकल बुकिङले ट्राइम्फकोे नेपाली बजारमा रहेको आफ्नो उपस्थितिलाई झल्काएको छ । नेपालमा ट्राइम्फ मोटरसाइकलको आयात नेपाली अटोमोटिभ क्षेत्रको अग्रणी नाम हंसराज हुलासचन्द एण्ड कम्पनी प्रालि ले गरिरहेको छ । कम्पनीको ट्राइम्फसँगको साझेदारीले नेपाली ग्राहकहरूलाई ट्राइम्फका मोटरसाइकलहरूमा पहुँच सुनिश्चित गरेको छ । ट्राइम्फ ब्राण्ड विशिष्ट डिजाइन, इन्जिनियरिङ उत्कृष्टता र बेजोड पर्फर्मेन्स लागि परिचित छ । यस नाडा अटो शोमा ट्राइम्फका नयाँ स्क्रेम्बलर ४०० एक्स र स्पीड ४०० सार्वजनिक गरिएको छ । मोटरसाइकल प्रेमीहरूको उत्साहजनक प्रतिक्रिया र अत्यधिक बुकिङ संख्याले नै ट्राइम्फको लोकप्रियताले ग्राहकवर्गको विभिन्न आवश्यकताहरू पूरा गर्ने तथा उच्च स्तरका मोटरसाइकलहरू प्रदान गर्ने ब्रान्डको प्रतिबद्धतालाई प्रस्ट बनाएको कम्पनीले जनाएको छ । ‘यस उपलब्धिले हामीलाई निकै गर्वित बनाएको छ । नाडा अटो शोमा पाएको अतुलनीय प्रतिक्रिया र १५० युनिट बुकिङ पुग्नुले मोटरसाइकल उत्साहीहरूको ट्राइम्फ ब्रान्ड प्रतिको विश्वासलाई झल्काएको छ,’ गोल्छा ग्रुपका डाइरेक्टर, अभिमन्यु गोल्छाले भने, ‘यो सफलताले हामीलाई हाम्रा ग्राहकहरूलाई झनै असाधारण उत्पादन र सेवाहरू प्रदान गर्न उत्प्रेरित गरेको छ । ट्राइम्फको मोटरसाइकलको आक्रमक बुकिङले बाइकिङ समुदायको ध्यान खिच्न सफल भएको छ । नेपालमा उत्कृष्ट मोटरसाइकल उपलब्ध गराउन तथा आफ्ना ग्राहकहरुका लागि असाधारण सवारी अनुभव प्रदान गर्न कम्पनी समर्पित रहेको छ ।
माछापुच्छ्रे बैंकका ग्राहक बिगमार्टमा जाँदा विशेष छुट, २ सय रुपैयाँसम्म क्यासब्याक सुविधा
काठमाडौं । माछापुच्छ्रे बैंक र मेगा मार्ट (बिगमार्ट) प्रालिबीच डिजिटल कारोबार प्रवर्द्धन एवम प्रोत्साहन गर्ने उद्देश्यले सम्झौता भएको छ । सम्झौता अनुसार बैंकका ग्राहकहरूले बिगमार्टका आउटलेटहरूबाट सामान खरिद गरे बापतको भुक्तानी डिजिटल माध्यमबाट गर्दा आर्कषक सुविधा पाउने बैंकले जनाएको छ । हरेक सोमबार बैंकको डेबिड वा क्रेडिट कार्ड प्रयोग गरी पीओएसबाट बिगमार्टमा पेमेन्ट गर्दा एक पटकमा १० प्रतिशत वा बढीमा २ सय रुपैयाँसम्मको क्यासब्याक प्रदान गरिने बैंकको भनाइ छ । माछापुच्छ्रे बैंकले देशभरिका ३ सयभन्दा बढी संघसंस्था तथा व्यापार व्यवसायसँग व्यावसायिक सम्झौता गरी ग्राहकलाई आकर्षक छुट प्रदान गर्दै आइरहेको छ । सम्झौताबाट ग्राहकलाई डिजिटल कारोबार गर्ने प्रोत्साहन र व्यापार व्यवसाय गर्ने संघसंस्थालाई व्यापार प्रवर्द्धनमा सघाउ पुग्ने विश्वास बैंकले लिएको छ ।
एनआईसी एशियाले गैरबैंकिङ सम्पत्ति बेच्न खोल्यो वेबसाइट, अनलाइनबाटै बार्गेनिङ गर्न सकिने
काठमाडौं । एनआईसी एसिया बैंक लिमिटेडले लिलाम बिक्रीसम्बन्धी अनलाइन पोर्टल सार्वजनिक गरेको छ । बैंकका अनुसार अनलाइन पोर्टलबाट बैंकिङ सम्पत्ति, बैंकको नाममा रहेको गैरबैंकिङ एवम् धितो सुरक्षण सम्पत्ति लिलाम बिक्री लगायतका सूचनाबारे जानकारी लिन सकिने छ । ग्राहकहरूको सहजताका लागि लिलाम बिक्री सम्बन्धी प्रकाशित गरिएको सूचनामा रहेको क्यूआर कोड स्क्यान गरी आउने पोर्टल https://auctionassistance.nicasiabank.com भित्र लिलाम बिक्रीमा रहेका सम्पत्तिहरूको कित्ता नम्बर तथा क्षेत्रफल सहितको विवरण, फोटो, नक्सा एवम् उक्त सम्पत्तिको स्थान (लोकेसन) पहिचानका लागि गुगल म्याप सहितका विविध जानकारीहरू एकै ठाउँबाट प्राप्त गर्न सकिने बैंकको भनाइ छ । ग्राहकले लिलाम बिक्रीमा राखेको सम्पत्तिको पूर्ण विवरण हेरेपश्चात् खरिद गर्न चाहेको सम्पत्तिको बारेमा थप जानकारी लिन आवश्यक भएमा सोही सम्पत्ति विवरण रहेको ठाउँमा उपलब्ध म्यासेज बक्समा आफ्नो पूरा नाम, इमेल ठेगाना, मोबाइल नम्बर, सम्पर्क ठेगाना राखी म्यासेज समेत पठाउन सकिने व्यवस्था रहेको बैंकले जनाएको छ ।
अमेरिकी डलर र युरोको भाउ घट्यो, अन्य मुद्रा कतिमा हुँदैछ किनबेच ?
काठमाडौं । शुक्रबारको तुलनामा आज अमेरिकी डलर र युरोको भाउ घटेको छ । नेपाल राष्ट्र बैंकले तय गरेको आजको विदेशी मुद्रा विनिमयदरअनुसार अमेरिकी डलर एकको खरिददर १३३ रुपैयाँ ८९ पैसा र बिक्रीदर १३४ रुपैयाँ ४९ पैसा रहेको छ । शुक्रबार अमेरिकी डलर एकको खरिददर १३३ रुपैयाँ ९० पैसा र बिक्रीदर १३४ रुपैयाँ ५० पैसा रहेको थियो । त्यस्तै हिजोको तुलनामा आज नेपाली बजारमा युरोको भाउ पनि घटेको छ । शुक्रबार एक युरोको खरिददर १४८ रुपैयाँ ५८ पैसा र बिक्रीदर १४९ रुपैयाँ २५ पैसा कामय रहेको थियो भने आज एक युरोको खरिददर १४८ रुपैयाँ ३९ पैसा र बिक्रीदर १४९ रुपैयाँ ०६ पैसा कामय भएको छ । आजको विदेशी मुद्रा विनिमयदरअनुसार पाउण्ड स्टर्लिङ एकको खरिददर १७६ रुपैयाँ ४५ पैसा र बिक्रीदर १७७ रुपैयाँ २४ पैसा रहेको छ । त्यस्तै, अस्ट्रेलियन डलर एकको खरिददर ९१ रुपैयाँ ०१ पैसा र बिक्रीदर ९१ रुपैयाँ ४२ पैसा रहेको छ । यसैगरी, सिङ्गापुर डलर एकको खरिददर एक सय दुई रुपैयाँ ७७ पैसा र बिक्रीदर एक सय तीन रुपैयाँ २३ पैसा कायम भएको छ । जापानी येन १० को खरिददर नौ रुपैयाँ २२ पैसा र बिक्रीदर नौ रुपैयाँ २६ पैसा रहेको छ । चिनियाँ युआन एकको खरिददर १८ रुपैयाँ ८८ पैसा र बिक्रीदर १८ रुपैयाँ ९७ पैसा कायम भएको छ । राष्ट्र बैंककाअनुसार साउदी अरेबियन रियाल एकको खरिददर ३५ रुपैयाँ ६८ पैसा र बिक्रीदर ३५ रुपैयाँ ८४ पैसा तोकिएको छ । त्यस्तै, कतारी रियाल एकको खरिददर ३६ रुपैयाँ ७३ पैसा र बिक्रीदर ३६ रुपैयाँ ९० पैसा रहेको छ । आजको विनिमयदरअनुसार थाई भाट एकको खरिददर तीन रुपैयाँ ९५ पैसा र बिक्रीदर तीन रुपैयाँ ९७ पैसा रहेको छ भने युएई दिराम एकको खरिददर ३६ रुपैयाँ ४५ पैसा र बिक्रीदर ३६ रुपैयाँ ६२ पैसा रहेको छ । मलेसियन रिङ्गेट एकको खरिददर ३० रुपैयाँ ९९ पैसा र बिक्रीदर ३१ रुपैयाँ १३ पैसा रहेको छ । साउथ कोरियन वन एक सयको खरिददर १० रुपैयाँ चार पैसा र बिक्रीदर १० रुपैयाँ नौ पैसा कायम भएको छ । स्वीडिस क्रोनर एकको खरिददर १३ रुपैयाँ ०८ पैसा र बिक्रीदर १३ रुपैयाँ १४ पैसा रहेको छ । त्यस्तै डेनिस क्रोनर एकको खरिददर १९ रुपैयाँ ८९ पैसा र बिक्रीदर १९ रुपैयाँ ९८ पैसा रहेको छ । आज हङकङ डलर एकको खरिददर १७ रुपैयाँ १७ पैसा र बिक्रीदर १७ रुपैयाँ २५ पैसा रहेको छ । कुवेती दिनार एकको खरिददर चार सय ३८ रुपैयाँ र बिक्रीदर चार सय ४० रुपैयाँ २९ पैसा रहेको छ । त्यस्तै, बहराइन दिनार एकको खरिददर तीन सय ५५ रुपैयाँ २१ पैसा र बिक्रीदर तीन सय ५६ रुपैयाँ ८० पैसा रहेको छ । राष्ट्र बैंकले तय गरेको विदेशी विनियमदर खुला बजारमा भने फरक पर्न सक्नेछ ।
ठेक्का तोड्ने चेतावनीपछि काममा फर्कियो निर्माण कम्पनी
नवलपुर । राष्ट्रिय गौरवको आयोजनाका रूपमा रहेको पूर्वपश्चिम राजमार्गको नारायणगढ–बुटवल सडकको ठेक्का तोड्ने सरकारले चेतावनी दिएपछि निर्माण कम्पनी काममा फर्किएको छ । मनसुन सुरु भएपछि सडक विस्तारको काम ठप्प पारेको निर्माण व्यवसायीलाई काममा ढिला गरे ठेक्का तोड्ने भनेर चेतावनी दिइएको सडक विभाग आयोजना निर्देशनालय (एडिबी) का निर्देशक इन्जिनियर चुडाराज ढकालले जानकारी दिए । ‘निर्माण व्यवसायीले मनसुनका कारण ठेक्कामा घाटा भयो भनेर काममा ढिलासुस्ती गरेको थियो, अगस्त र सेप्टेम्बर महिनामा काम ढिला हुन्छ भनेर भन्दै थियो,’ उनले भने, ‘घाटानाफा हामी जान्दैनौँ सम्झौताअनुसार काम हुनुपर्छ, तुरुन्त काम सुरु गर्नु होइन भने हामी ठेक्का तोड्ने प्रक्रियामा जान्छौँ भनेपछि उनीहरु अहिले काममा फर्किएका छन् ।’ नारायणगढ–बुटवल सडक विस्तारको जिम्मा पाएको चाइना स्टेट कन्स्ट्रक्सन इन्जिनियरिङ कर्पोरेसन लिमिटेड चाइनाको सरकारी निर्माण कम्पनी भएकाले काम चाँडो गराउन कूटनीतिक पहल गरिएको उनले बताए । ‘निर्माण व्यवसायी चाइनाको सरकारी कम्पनी हो,’ उनले भने, ‘जसरी हुन्छ नारायणगढ बुटवल सडक विस्तारको काम थप भएको समयमा सक्नका लागि हामीले डिप्लोमेटिक पहलसमेत थालेका छौं ।’ निर्माण कम्पनीको दोस्रोपटक थप गरिएको म्याद गत साउन ८ गते सकिएपछि अहिले एक वर्षका लागि तेस्रोपटक म्याद थप गरिएको ढकालले बताए। अहिले थप गरिएको म्याद नै अन्तिम म्याद भएको भन्दै ढकालले थप भएको समयका काम पूरा नगरे ठेक्का तोड्ने प्रक्रियामा जाने बताए । निर्माण कम्पनीले असार लागेदेखि नै सडक विस्तारको काम स्थगित गरेर खाल्डाखुल्डी पुर्ने र मनसुनका कारण अवरुद्ध हुने सडक खुलाउने काम मात्रै गर्दै आएको थियो । मनसुनका कारण स्थगित भएको सडक कालोपत्र गर्ने काम मौसममा सुधार भएपछि पुनः सुरु गरिएको नारायणगढ(बुटवल सडक योजना पूर्वी खण्ड प्रमुख आशिष थापा मगरले जानकारी दिए । मनसुनअगाडि नै ‘सबबेस’ र ‘बेस’को काम सकिएको ठाउँमा कालोपत्रको काम पुनः सुरु गरिएको उनको भनाइ छ । अहिले नारायणगढ बुटवल सडकको पूर्वी खण्डमा पर्ने गैँडाकोट नगरपालिकाका विभिन्न स्थानमा कालोपत्र गर्ने काम भइरहेको थापा मगरको भनाइ छ । ‘मनसुन अगाडि सबबेस र बेस निर्माण गरेर राखिएको ठाउँको कालोपत्र गर्ने काम सकेपछि बाँकी रहेका ठाउँमा सबबेस र बेस निर्माण गर्ने निर्माण व्यवसायीको तयारी छ,’ उनले भने, ‘अब मनसुनले असर पुर्याएन भने काम तीव्र गतिमा हुँदैछ ।’ कालोपत्रको कामसँगै सडकका खाल्डाखुल्डी पुर्ने र सडकमा पानी छर्किने कामसमेत भइरहेको उनले बताए । नारायणगढबाट बुटवलसम्म ११४ किलोमिटर रहेको यस खण्डलाई दुई खण्डमा विभाजन गरी ठेक्का लगाइएको थियो । नारायणगढबाट दाउन्नेसम्म ६५ किलोमिटर पूर्वी खण्ड र दाउन्नेबाट बुटवलसम्म ४९ किलोमिटर पश्चिम खण्ड गरी सडक विस्तारको काम भइरहेको छ । ग्लोबल टेन्टरमार्फत दुवै खण्ड निर्माणको ठेक्का चिनियाँ निर्माण कम्पनी चाइना स्टेट कन्स्ट्रक्सन इन्जिनियरिङ कर्पोरेसन लिमिटेडले हात पारेको थियो । सडक विभाग आयोजना निर्देशनालय (एडिबी) ले जनाएअनुसार असार मसान्तसम्म पूर्वी खण्डमा ५२ दशमलव ५१ प्रतिशत भौतिक र ४६.०२ प्रतिशत वित्तीय प्रगति भएको छ । त्यस अवधिसम्म १७२ वटा कल्भर्ट निर्माण सम्पन्न, २२ वटा साना पुल निर्माण सम्पन्न भएको निर्देशनालयले जनाएको छ । एकतर्फी हिसाब गर्दा एक सय ३० किलोमिटर कालोपत्र गर्नुपर्ने यस खण्डमा करिब ४५ किलोमिटर कालोपत्र तथा ४० किलोमिटर नाली निर्माणको काम सकिएको निर्देशनालयले निकालेको विज्ञप्तिमा जनाइएको छ । यस खण्ड विस्तारका लागि विसं २०७५ माघमा सम्झौता भएर सोही वर्षको चैत ८ गते प्रधानमन्त्री केपी शर्मा ओलीले यस सडकको बुटवलमा शिलान्यास गरेका थिए । अहिले पुनः प्रधानमन्त्रीका रूपमा केपी ओली आएपछि उनले शिलान्यास गरेको यो सडक विस्तारको काम चाँडो सम्पन्न हुनेमा जिल्लावासी आशावादी छन् ।
ढोरपाटन सिकार आरक्षको करिब २ सय हेक्टर जमिन अतिक्रमण
म्याग्दी । पूर्वी रुकुम, बागलुङ र म्याग्दी जिल्लामा फैलिएको ढोरपाटन सिकार आरक्षको करिब दुई सय हेक्टर सार्वजनिक जमिन अतिक्रमण भएको छ । एक हजार तीन सय २५ वर्ग किलोमिटर क्षेत्रफलमा फैलिएको ढोरपाटन सिकार आरक्षको ६० प्रतिशत पूर्वी रुकुम, २६ प्रतिशत बागलुङ र १४ प्रतिशत भूगोल म्याग्दीमा पर्छ । आरक्षको आर्थिक वर्ष २०८०/८१ को वार्षिक प्रतिवेदनमा एक सय ८५ हेक्टर जमिन अतिक्रमण भएको उल्लेख छ। जग्गाधनी पुर्जा भएकै घरछेउमा जग्गा अतिक्रमण गरेर आफ्नो कम्पाउन्डमा भित्र्याउने क्रम बढेको हो । आरक्षको जग्गा बर्सेनि अतिक्रमित भए पनि सरोकारवाला निकायबाट यसलाई रोक्ने प्रयास भएको छैन । आरक्षका संरक्षण अधिकृत मण्डिप पँगेनीले ३४ स्थानमा तीन सय ११ घरधुुरीले एक सय ८५ हेक्टर क्षेत्रफल जमिन अतिक्रमण गरेका बताए । ‘सिकार आरक्षमा अतिक्रण मुख्य चुनौती बनेको छ,’ उनले भने, ‘अतिक्रमण पहिचान गरी खाली गराउन नेपाल सरकारका विभिन्न निकाय र सरोकारवालहरुसँग पहल गरेका छौं ।’ वन तथा खर्क क्षेत्रमा बसोबास र खेतीपातीका लागि अतिक्रमण भएको छ । रुकुमको रन्मा, मैकोट, हुकाम, तकसेरा र काक्री, म्याग्दीको जलजला र गुर्जाघाट तथा बागलुङको छेन्तुङ, स्यालपाखे, नवीलगायत गाउँमा पनि अतिक्रमण छ। अतिक्रमणमा परेको केही जमिनमा खेती लगाइएको छभने केही जमिन कम्पाउन्ड घेरेर मात्रै राखेका छन् । आरक्षको तथ्यांकमा विसं २०४७ देखि सामान्य अतिक्रमण सुरु भएको देखिन्छ। सशस्त्र द्वन्द्वको समयमा यो क्रम बढेको हो । सरकारले विसं २०३९ सालमा सिकार आरक्ष स्थापना गरेको थियो । अतिक्रमणसँगै संरक्षण अभावमा ढोरपाटनको रुद्रताललगायत केही संरचना लोप हुने अवस्थामा छन् ।
बैंकबाट कर्जा लिएर नाडा अटो शोमा गाडी किन्न १५ सयभन्दा बढीले दर्ता गराए नाम
काठमाडौं । यस वर्षको ‘नाडा अटो शो २०२४’ मा ७ वटा बैंकले सहभागिता जनाएका छन् । भदौ ११ गतेदेखि भृकुटीमण्डपमा चलिरहेको नाडा अटो शोमा नबिल बैंक, ग्लोबल आइएमई बैंक, हिमालयन बैंक, लक्ष्मी सनराइज बैंक, सानिमा बैंक, माछापुच्छ्रे बैंक र महालक्ष्मी विकास बैंकले सहभागिता जनाएका छन् । नाडा अटोमोबाइल एसोसिएसन अफ नेपालले आयोजना गरेको नाडा अटो शोको आज भदौ १४ गते चौंथो दिन हो । अटो शोमा सवारी साधन खरिद गर्न १५ सयभन्दा बढी ग्राहकहरूले बैंकमा कर्जाका लागि नाम दर्ता गराएका छन् । शुक्रबार ५ बजेसम्म १ हजार ५ सयभन्दा बढीले सवारी कर्जा लिन विभिन्न बैंकमा नाम टिपाएका छन् । अटो शोको अन्तिम दिनसम्म यो संख्या अझै बढ्न सक्ने अनुमान गरिएको छ । हिमालयन बैंकका प्रतिनिधि युवराज गुरागाईं नाडा अटो शोमा अधिकतम मार्केटिङ गर्नेभन्दा पनि इच्छुक ग्राहकहरूका लागि विशेष अफर ल्याएको बताउँछन् । सस्तो ब्याजदरमा कर्जा उपलब्ध गराउन बैंकहरूबीच ब्यापक प्रतिस्पर्धा भइरहँदा हिमालयनले विद्युतीय सवारी खरिद गर्ने ग्राहकलाई आधार दरमा ०.५० प्रतिशत प्रिमियम दर तोक्नेछ । साथै अन्य सवारी खरिदका लागि भने बैंकले आधार दरमा ०.६५ प्रतिशत प्रिमियम दर तोक्ने उनले बताए । उनका अनुसार बैंकले ८ वर्ष अवधिका लागि ८० प्रतिशतसम्म कर्जा उपलब्ध गराउनेछ । दैनिक ४०÷५० जनाले सवारी कर्जा लिन नाम टिपाइरहेको उनले जानकारी दिए । नबिल बैंकका विजनेश डेभलपमेन्ट अफिसर विबेक केसी नाडा अटो शोमा विशेष अफर ल्याएको बताउँछन् । बैंकले ५ वर्ष अवधिका लागि ८.२५ प्रतिशत स्थिर ब्याजदरमा कर्जा उपलब्ध गराउने उनले बताए । साथै ७ वर्ष अवधिका लागि भने ८.४९ प्रतिशत स्थिर ब्याजदर तोकेको उनको भनाइ छ । विद्युतीय सवारीमा ८० प्रतिशत फाइनान्सिङ छ भने इन्धन सवारीमा ५० प्रतिशत मात्रै फाइनान्सिङ रहेको उनले बताए । उनका अनुसार सबै डकुमेन्ट उपलब्ध भएको तीन दिनभित्र कर्जा उपलब्ध गराउने बैंकको प्रतिवद्धता छ । हालसम्म १२० जनाभन्दा बढीले कर्जा लिन नाम नाम दर्ता गराएका छन् । सानिमा बैंकका प्रतिनिधि प्रतिक नेपाल ईभीमा ८० प्रतिशतसम्म फाइनान्सिङ गर्ने गरी कर्जा उपलब्ध गराउने बताउँछन् । बैंकले सवारी कर्जामा १० वर्ष अवधिका लागि ८.४९ प्रतिशत ब्याजदर निर्धारण गरेको छ । उनका अनुसार ईभी कर्जा लिने ग्राहकलाई ७ वर्ष अवधि तोकेको छ भने अन्य सवारीमा १० वर्ष अवधि कायम राखेको छ । ७ वर्षपछि भने आधार दरमा २ प्रतिशत प्रिमियम दर थप गर्ने उनले बताए । बैंकले सेवा शुल्कमा ०.२५ प्रतिशत छुट गरेर ०.५ प्रतिशत मात्रै लिने उनको भनाइ छ । साथै यो अफर दशैं तिहारसम्म चल्नेछ । हालसम्म कर्जा लिन्छु भनेर डेढ सय भन्दा बढीले नाम टिपाएका छन् भने अधिकांशले गाडी पनि बुक गरेका छन् । लक्ष्मी सनराइज बैंकका प्रतिनिधि धु्रव भण्डारीका अनुसार ईभीमा ७ वर्ष अवधिका लागि ८.९९ प्रतिशत ब्याजदरमा कर्जा उपलब्ध गराउनेछ । साथै ८० प्रतिशतसम्म फाइनान्सिङ सुविधा रहेको उनले बताए । नाडा अटो शोमा बुक भएका सवारी र नाम टिपाएका ग्राहकलाई तीन दिन भित्र कर्जा उपलब्ध गराउने उनको दाबी छ । साथै नाडा अटो शोमा बुक गरेका ग्राहकलाई एक वर्षसम्म भिजा कार्ड, एटीएम कार्ड, इन्टरनेट बैंकिङ र मोबाइल बैंकिङ निशुल्क हुने उनले जानकारी दिए । हालसम्म १ सय भन्दा बढी ग्राहकले बैंकबाट कर्जा लिन नाम टिपाएका छन् । जसमध्ये अधिकांश ईभी सवारी खरिदका लागि कर्जा लिने छन् । ग्लोबल आइएमई बैंककी प्रतिनिधि नोना आचार्यका अनुसार नाडा अटो शोमा २ किसिमको सवारीका लागि अफर राखिएको छ । बैंकले ईभी कर्जामा ५ वर्ष अवधिका लागि ७.९९ प्रतिशत र ७ वर्ष अवधिका लागि ८.४९ प्रतिशत ब्याजदर निर्धारण गरेको छ । इन्धनतर्फ भने बैंकले ५ वर्ष अवधिका लागि ८.४९ प्रतिशत र ५ वर्षमाथि अवधिका लागि ९.४९ प्रतिशत ब्याजदर निर्धारण गरेको छ । हालसम्म नाडा अटो शोमा कर्जा लिन २२५ जनाभन्दा बढीले नाम टिपाइसकेको उनले जानकारी दिइन् । साथै बैंकले घरकर्जाका लागि पनि अफर राखेको छ । ग्रिन होम लोन योजनामा ५ वर्ष अवधिका लागि ७.९९ प्रतिशत ब्याजदर र सोभन्दा माथिको अवधिका लागि आधार दरमा १.७५ प्रतिशत प्रिमियम दर तोकिनेछ । यस्तै निश्चिन्त आवास योजनामा १० वर्ष अवधिका लागि ७.९९ प्रतिशत र सोभन्दा माथिको ८.४९ प्रतिशत ब्याजदर तोकिएको छ । १५ वर्ष भन्दा माथिको लागि ८.९९ प्रतिशत ब्याजदर निर्धारण गरेको छ । नेपाल इन्भेष्टमेन्ट मेगा बैंकका अनुसार हालसम्म ३ सय बढीले सवारी कर्जा लिन नाम दर्ता गराएका छन् । बैंकले ईभी कर्जामा आधार दर ७.६४ प्रतिशतमा १ प्रतिशत प्रिमियम तोकेर कर्जा उपलब्ध गराउनेछ । जसमा ८० प्रतिशत फाइनान्सिङको सुविधा रहेको बैंकले जनाएको छ । पेट्रोल तथा डिजेल सवारी कर्जा लिँदा भने ८० प्रतिशतभन्दा कम फाइनन्सिङ रहेको छ । कृषि विकास बैंकका प्रतिनिधि उपेन्द्र महतका अनुसार सवारी कर्जाका लागि ब्याजदरमा भारी छुट अफर रहेको छ । बैंकले फ्लटिङ दरमा ७.९९ प्रतिशत र स्थिर ब्याजदरमा ८.९९ प्रतिशत तोकेको छ । साथै कर्जा प्रक्रिया शुल्कमा ०.३३ प्रतिशत छुट दिएको उनले जानकारी दिए । कर्जा भुक्तानी अवधि ५ वर्षदेखि ७ वर्ष रहेको छ । व्यावसायिक सवारी कर्जामा फलटिङ दरमा ८.४९ प्रतिशत र स्थिरमा ९.४९ प्रतिशत ब्याजदर निर्धारण गरेको छ । व्यक्तिगत नाममा सवारी कर्जा लिँदा ५० प्रतिशत र कम्पनीको नाममा लिँदा ८० पतिशत फाइनान्सिङ सुविधा रहेको उनले बताए । उनका अनुसार हालसम्म कर्जाका लिनका लागि १६० भन्दा बढीले नाम टिपाएका छन् । तर, स्टल भिजिट गर्ने धेरै छन् । नाम टिपाएका अधिकांश कर्जा लिने मनसायमा रहेको उनको भनाइ छ । माछापुच्छ्रे बैंकका अनुसार हालसम्म बैंकले आधार दरमा १ प्रतिशत प्रिमियम दर तोकेर ब्याजदर निर्धारण गर्नेछ । इन्धन सवारीमा ५० प्रतिशत र ईभीमा ८० प्रतिशतसम्म फाइनान्सिङ सुविधा रहेको बैंकले जनाएको छ । बैंकले कर्जा चुक्ता गर्न ईभीमा ६ वर्ष र इन्धनमा ८ वर्ष अवधि दिएको छ । हालसम्म सवारी खरिद गर्न बैंकबाट कर्जा लिन २५० भन्दा बढीले नाम दर्ता गराएको बैंकले जनाएको छ । महालक्ष्मी विकास बैंकका प्रतिनिधि निरज विष्ट नाडा अटो शोमा ९.९९ प्रतिशत अफरसहित सवारी कर्जा उपलब्ध गराउने बताउँछन् । ईभीमा ८० प्रतिशत फाइनान्सिङ सुविधा छ भने १० वर्ष अवधिका कर्जा दिइनेछ । बैंकले इन्धन सवारीमा ८ वर्ष अवधिका लागि ९.९९ प्रतिशत ब्याजदरमा कर्जा उपलब्ध गराउनेछ । साथै तीन दिनभित्र कर्जा भुक्तानी गर्ने उनको भनाइ छ ।
