कल बाइपास गर्ने गिरोह पक्राउ
काठमाडौ‌ं । नेपाल प्रहरीको केन्द्रीय अनुसन्धान ब्युरो (सीआईबी) ले काठमाडौं र भक्तपुरका विभिन्न स्थानमा सञ्चालन भइरहेको अवैध अन्तर्राष्ट्रिय कल बाइपास (भीओआईपी) नेटवर्कमाथि कारवाही चार जनालाई पक्राउ गरेको छ । पक्राउ पर्नेहरूमा गोरखा अजिरकोट–५ का २२ वर्षीय प्रोशेस गुरुङ, काठमाडौं शंखरापुर–१ की २० वर्षीया मुना श्रेष्ठ, कञ्चनपुर कृष्णपुर–७ स्थायी घर भई भक्तपुर सूर्यविनायकमा बस्दै आएका २१ वर्षीय जेनित झुकाल तथा भक्तपुर सूर्यविनायक–१ का ३४ वर्षीय कृष्ण नगरकोटी रहेका छन् । प्रारम्भिक अनुसन्धानबाट पक्राउ परेकाहरूले दुरसञ्चार ऐन, २०५३ विपरीत भीओआईपी प्रविधि प्रयोग गरी अन्तर्राष्ट्रिय कल बाइपास गर्दै आएको खुलेको सीआईबीले जनाएको छ । अनुसन्धानका क्रममा बरामद भएका उपकरण तथा सामग्रीहरू NPR77casino.com, IME88.com र Khalti88.com लगायतका अनलाइन बेटिङ प्लेटफर्म सञ्चालनमा समेत प्रयोग भइरहेको तथ्य फेला परेकाले त्यसतर्फ पनि थप अनुसन्धान अघि बढाइएको प्रहरीले जनाएको छ । प्रहरीले उनीहरूको साथबाट १६ पोर्ट र ११२ पोर्टका सीम बक्स (भीओआईपी) डिभाइस, १९५ वटा एनसेल सिमकार्ड, ल्यापटप, मोबाइल फोन, राउटर, ब्याट्री, इन्भर्टर, यूपीएस, इन्टरनेट हबलगायत भीओआईपी सञ्चालनमा प्रयोग हुने ठूलो परिमाणका उपकरण बरामद गरेको जनाएको छ । सीआईबीका अनुसार प्रोशेस गुरुङ र मुना श्रेष्ठलाई साउन १४ गते काठमाडौंका विभिन्न स्थानबाट पक्राउ गरी जिल्ला अदालत काठमाडौंबाट पाँच दिनको म्याद थप अनुमति लिई अनुसन्धान भइरहेको छ । त्यस्तै, जेनित झुकाल र कृष्ण नगरकोटीलाई साउन १५ गते भक्तपुरबाट पक्राउ गरी जिल्ला अदालत भक्तपुरबाट सात दिनको म्याद प्राप्त गरेर अनुसन्धान अघि बढाइएको छ । प्रहरीका अनुसार उक्त समूहले भीओआईपी प्रविधिमार्फत गैरकानुनी रूपमा अन्तर्राष्ट्रिय कल बाइपास गरी राज्यलाई राजस्व नोक्सानी पु‍र्याउने गतिविधि सञ्चालन गरिरहेको आशंका गरिएको छ । यसबाहेक, बरामद भएका उपकरणहरू अनलाइन बेटिङ नेटवर्कसँग समेत जोडिएको देखिएकाले संगठित आर्थिक तथा साइबर अपराधको कोणबाट पनि विस्तृत अनुसन्धान जारी रहेको सीआईबीले जनाएको छ ।
पूर्वराष्ट्रपतिले गरिन् पूर्वप्रधानमन्त्री नेपाललाई सम्मान
काठमाडौं । पूर्वराष्ट्रपति विद्यादेवी भण्डारीले नेपाली कम्युनिष्ट पार्टी (नेकपा)का सहसंयोजक तथा पूर्वप्रधानमन्त्री माधवकुमार नेपाललाई सम्मान गरेकी छन् । नेपाल कम्युनिष्ट पार्टीका पूर्वमहासचिव तुल्सीलाल अमात्यको २९औं स्मृति दिवसका अवसरमा आइतबार काठमाडौंमा आयोजित विशेष समारोहमा पूर्वराष्ट्रपति भण्डारीले सम्मानपत्र प्रदान गर्दै नेपाललाई सम्मान गरेकी हुन् । तुल्सीलाल स्मृति प्रतिष्ठानद्वारा आयोजित कार्यक्रममा नेपालको कम्युनिष्ट आन्दोलन, लोकतान्त्रिक रूपान्तरण तथा सार्वजनिक जीवनमा पु‍र्‍याएको योगदानको कदरस्वरूप नेपाललाई सम्मान गरिएको हो । पूर्वराष्ट्रपति भण्डारी र पूर्वप्रधानमन्त्री नेपाल एकै मञ्चमा सहभागी भएको उक्त समारोहमा विभिन्न राजनीतिक दलका शीर्ष नेताहरू, पूर्वमन्त्री, सांसद, वाम आन्दोलनसँग आबद्ध नेताहरू, बुद्धिजीवी तथा समाजका विभिन्न क्षेत्रका व्यक्तित्वहरूको उल्लेखनीय उपस्थिति रहेको थियो । प्रतिष्ठानले प्रत्येक वर्ष अमात्यको स्मृति दिवसका अवसरमा विभिन्न क्षेत्रका योगदानशील व्यक्तित्वलाई सम्मान गर्दै आएको छ ।
युट्युबमार्फत भ्रामक सामग्री फैलाउने भुसाल पक्राउ
काठमाडौं । नेपाल प्रहरीको साइबर ब्युरोले युट्युबमार्फत भ्रामक तथा उत्तेजक सामग्री प्रसारण गरेको आरोपमा एक जनालाई पक्राउ गरेको छ । अर्घाखाँचीको सन्धिखर्क नगरपालिका–१ घर भई हाल रूपन्देहीको बुटवल उपमहानगरपालिका–१३ बस्दै आएका ३१ वर्षीय जनक भुसाललाई इलाका प्रहरी कार्यालय, बुटवलको सहयोगमा शनिबार बुटवलबाट पक्राउ गरिएको हो । साइबर ब्युरोका अनुसार ‘नेपाली खबर टीभी’ नामक युट्युब च्यानलमार्फत देशको विद्यमान परिस्थितिलाई प्रत्यक्ष असर पर्ने खालका भ्रामक भिडियो सामग्री तयार गरी प्रसारण गरिएको पाइएपछि पक्राउ गरिएको हो । ब्युरोले ती सामग्रीमार्फत अफवाह फैलाउने, जातीय तथा धार्मिक हिंसा भड्काउने, हिंसात्मक तथा ध्वंसात्मक गतिविधिमा संलग्न व्यक्ति तथा समूहलाई थप उत्तेजित बनाउने, साथै कानुनले प्रकाशन तथा प्रदर्शन गर्न निषेध गरेका सामग्री र विभिन्न जातजाति तथा समुदायबीचको सद्भाव खलबल्याउने प्रकृतिका सामग्री प्रसारण गरिएको जनाएको छ । ब्युरोका अनुसार भुसालविरुद्ध विद्युतीय कारोबार ऐन, २०६३ अन्तर्गत मुद्दा दर्ता गरी काठमाडौं जिल्ला अदालतबाट सात दिनको म्याद थप अनुमति लिएर थप अनुसन्धान भइरहेको छ। साइबर ब्युरोले सामाजिक सद्भाव, सार्वजनिक शान्ति तथा राष्ट्रिय सुरक्षामा असर पर्ने भ्रामक सामग्री उत्पादन वा प्रसारण नगर्न तथा त्यस्ता गतिविधिमा संलग्न नहुन सबैलाई आग्रह गरेको छ ।
मोज्तबा खामेनेई खोज्दै मोसाद र सीआईए, भेटिएन कुनै सुराक
काठमाडौं । इरानका सर्वोच्च नेता मोज्तबा खामेनेईको खोजीमा इजरायल र अमेरिकाका गुप्तचर निकायहरू सक्रिय रूपमा लागेको दाबी गरिएको छ । बेलायती अखबार ‘द टाइम्स’को रिपोर्टअनुसार इजरायलको मोसाद र अमेरिकाको सीआईएले संयुक्त रूपमा इरानका नयाँ सर्वोच्च नेताको लुक्ने स्थान पत्ता लगाउने प्रयास गरिरहेका हुन् । रिपोर्टका अनुसार गत फेब्रुअरीको अन्त्यतिर तत्कालीन सर्वोच्च नेता अली खामेनेईको हत्या भएपछि मोज्तबा सार्वजनिक रूपमा देखिएका छैनन् । उक्त आक्रमणमा उनी स्वयं पनि गम्भीर घाइते भएको दाबी गरिएको छ । विभिन्न रिपोर्टहरूमा मोज्तबा खामेनेईको स्वास्थ्य अवस्था राम्रो नरहेको उल्लेख गरिएको छ । उनका चोटपटकबारे गम्भीर घाइतेदेखि शारीरिक अवस्था बिग्रिएकोसम्मका फरक–फरक दाबी गरिएका छन् । उनलाई बोल्नसमेत समस्या हुने भएकाले हालसम्म कुनै सार्वजनिक सम्बोधन नगरेको र उनका सबै वक्तव्य लिखित रूपमा मात्र जारी हुने गरेको बताइएको छ । द टाइम्सका अनुसार मोज्तबाको यही मौनता नै मोसाद र सीआईएका लागि उनलाई खोज्न सबैभन्दा ठूलो चुनौती बनेको छ । रिपोर्टमा दाबी गरिएअनुसार उनले १५० दिनभन्दा बढी समयदेखि न त फोनमा कुरा गरेका छन्, न त ल्यापटप नै खोलेका छन् । उनी अज्ञात स्थानमा भूमिगत बंकरमा बसिरहेको बताइएको छ । रिपोर्टअनुसार मोज्तबा खामेनेई दिनको उज्यालोमा बंकरबाट बाहिर निस्कँदैनन् । अमेरिकी जासुसी उपग्रहले आफूलाई पहिचान गर्न सक्ने डरका कारण उनी बाहिर नआउने बताइएको छ । त्यसैले उनको खोजीका लागि इजरायल र अमेरिका इरानभित्र रहेका आफ्ना गुप्तचर सञ्जालमा निर्भर रहेको दाबी गरिएको छ । त्यस्तै, मोज्तबाको मृत्यु फेब्रुअरी २९ मै भएको वा पछि घाइतेकै कारण मृत्यु भएको हुन सक्ने चर्चा पनि चलिरहेको रिपोर्टमा उल्लेख छ । साथै इस्लामिक रिभोलुसनरी गाड्र्स कोप्र्स (आईआरजीर्सी)का अधिकारीहरूले उनी जीवित रहेको भन्दै गलत सूचना फैलाइरहेको आशंका पनि गरिएको छ । द टाइम्सका अनुसार मोसादले इरानभित्र रहेका आफ्ना एजेन्टमार्फत मोज्तबा जीवित छन् कि छैनन् र उनी कहाँ लुकेका छन् भन्ने पत्ता लगाउने प्रयास गरिरहेको छ । मोसादका एक पूर्वअधिकारीलाई उद्धृत गर्दै रिपोर्टमा भनिएको छ, ‘मोज्तबाले फोन प्रयोग नगरे पनि यदि उनी जीवित छन् भने कुनै न कुनै माध्यमबाट अवश्य सञ्चार गरिरहेका होलान्, जस्तै कागजी चिर्कटमार्फत सन्देश आदानप्रदान ।’ त्यसैले उनलाई पत्ता लगाउने मुख्य आधार मानव गुप्तचर नै हुने विश्वास गरिएको छ । रिपोर्टमा थप दाबी गर्दै भनिएको छ कि सीआईएले अल–कायदा प्रमुख ओसामा बिन लादेनलाई पनि सन्देश बोक्ने कुरियरमार्फत ट्र्याक गरेर पत्ता लगाएको थियो । मोसादका अर्का एक पूर्व अधिकारीका अनुसार मोज्तबा अत्यन्त गोप्य रूपमा बस्ने गरेका छन् र आईआरजीसीले उनको वास्तविक स्थान लुकाउन उनका डुप्लिकेटसमेत प्रयोग गरिरहेको हुनसक्छ । एआईले पाँच वर्षमै मानव बुद्धिलाई उछिन्ला ? मस्कको चेतावनी कत्तिको जायज ?
बीमा रकमका लागि ‘विवाह’ को नाटक गर्दै श्रीमतीको हत्या
काठमाडौं । भारतको उत्तर प्रदेशस्थित हमिरपुरमा एउटा यस्तो हृदयविदारक घटना सार्वजनिक भएको छ, जसले मानवीय संवेदनालाई नै स्तब्ध बनाएको छ । त्यहाँ एक व्यक्तिले आफ्नै श्रीमतीको नाममा रहेको ४४ लाख रुपैयाँ बीमा रकम हात पार्नका लागि उनको हत्या गरेको पुष्टि भएको छ । घटनाको भित्री पाटो केलाउँदा ती व्यक्तिले साढे दुई वर्षअघि मात्रै ती महिलासँग प्रेम विवाह गरेका थिए । यो महिलाको दोस्रो र पुरुषको तेस्रो विवाह थियो । योजनाबद्ध रूपमा गरिएको भनिएको उक्त विवाहलगत्तै ती पुरुषले श्रीमतीको ठूलो रकमको बीमा गराएका थिए । बीमा रकम हडप्न उनले आफ्ना साथीहरूसँग मिलेर हत्याको डरलाग्दो षड्यन्त्र रचेको भारतीय प्रहरीले जनाएको छ । गत जुलाई २९ को राति हमिरपुरको लालपुरा क्षेत्रमा सडकको छेउमा ती महिलाको शव फेला परेको थियो । सुरुवातमा प्रहरीले यसलाई सामान्य सडक दुर्घटना मानेको थियो । तर, अनुसन्धान गर्दै जाँदा जाँदा घटनाको ४८ घण्टाभित्रै रहस्यको पर्दाफास भयो । दुर्घटना नभई नियतवश गरिएको हत्या भएको र त्यसको मुख्य योजनाकार उनकै श्रीमान रहेको प्रमाण प्रहरीले फेला पारेको छ । हाल प्रहरीले अभियुक्त श्रीमान् र हत्यामा संलग्न उनका साथीहरूलाई नियन्त्रणमा लिएर थप कानुनी कारबाही अघि बढाएको छ । (भारतीय सञ्चारमाध्यमको सहयोगमा)
तालिममा लाखौं खर्च, जनचेतनामा शून्य
काठमाडौं । विपन्न तथा न्यून आय भएका नागरिकलाई आर्थिक सुरक्षा प्रदान गर्ने मुख्य लक्ष्यसहित स्थापना गरिएका लघुबीमा कम्पनीहरूको प्राथमिकता सर्वसाधारणमा बीमासम्बन्धी जनचेतना फैलाउनुभन्दा आफ्ना अभिकर्ता र जनशक्ति बलियो बनाउनतर्फ बढी केन्द्रित देखिएको छ । विशेषगरी लघु जीवन बीमा कम्पनीहरूको ध्यान तालिममा बढी केन्द्रित भएको देखिन्छ । नेपाल बीमा प्राधिकरणले सार्वजनिक गरेको ‘नेपालको लघुबीमा क्षेत्रसम्बन्धी अध्ययन प्रतिवेदन, २०८३’ अनुसार लघुबीमा व्यवसाय मात्रै गर्ने गरी स्थापना भएका सातवटा लघुबीमा कम्पनीले २०८२/८३ फागुन मसान्तसम्ममा क्षमता विकास (तालिम), सामाजिक उत्तरदायित्व र जनचेतनाका क्षेत्रमा कुल ९२ लाख ३६ हजार ५२० रुपैयाँ खर्च गरेका छन् । तर, लघुबीमा कम्पनीहरूले जनचेतनामूलक कार्यक्रममा भने जम्मा ४ लाख ५५ हजार रुपैयाँ मात्रै खर्च गरेका छन्, जुन कुल खर्चको करिब ५ प्रतिशत हो । यसको तुलनामा कम्पनीहरूले तालिममा मात्रै ७८ लाख १९ हजार ८१४ रुपैयाँ खर्च गरेका छन् । यो कुल खर्चको ८४.६ प्रतिशत हो । ग्रामीण क्षेत्रका न्यून आय भएका तथा पछाडि परेका वर्गलाई लक्षित गरी ल्याइएको लघुबीमाले पर्याप्त जनचेतनामूलक कार्यक्रम सञ्चालन गर्न नसक्दा अपेक्षाअनुसार बजार विस्तार गर्न सकेको छैन । बीमा भनेको के हो र यसले कसरी आर्थिक सुरक्षा प्रदान गर्छ भन्नेबारे समेत जानकारी नभएका ग्रामीण क्षेत्रका विपन्न नागरिकलाई लक्षित गरी जनचेतना फैलाउने कार्यक्रममा लघुबीमा कम्पनीहरूले गरेको न्यून खर्च निराशाजनक रहेको सरोकारवालाहरू बताउँछन् । जनचेतनामूलक कार्यक्रममा ‘शून्य’ खर्च जनचेतनामूलक कार्यक्रममा लघु जीवन बीमकहरूको अवस्था झनै दयनीय देखिएको छ । प्रतिवेदनअनुसार लघु जीवन बीमा कम्पनीहरूले जनचेतनामूलक कार्यक्रममा एक रुपैयाँ पनि खर्च गरेका छैनन् । जनचेतनाका लागि भएको कुल ४ लाख ५५ हजार रुपैयाँ खर्चको शतप्रतिशत रकम निर्जीवन लघुबीमा कम्पनीहरूले मात्रै गरेका हुन् । यसको विपरीत लघु जीवन बीमा कम्पनीहरूले सीएसआर (सामाजिक उत्तरदायित्व) मा ६२.३२ प्रतिशत र तालिममा ६१.५२ प्रतिशत रकम खर्च गरेका छन् । प्रतिवेदनअनुसार लघु जीवन बीमक कम्पनीहरूले सामाजिक उत्तरदायित्वमा ५ लाख ९९ हजार र तालिममा ४८ लाख १० हजार रुपैयाँ खर्च गरेका हुन् । यो तथ्यांकले लघु जीवन बीमा कम्पनीहरू गाउँ–गाउँमा पुगेर सर्वसाधारणलाई बीमाबारे बुझाउने र जनचेतना फैलाउनेभन्दा आफ्ना कर्मचारी तथा अभिकर्ताको क्षमता विकास र अन्य सामाजिक गतिविधिमा बढी केन्द्रित रहेको देखाउँछ । कुन कम्पनीको खर्च कति ? आव २०८२/८३ को फागुन मसान्तसम्ममा सबैभन्दा धेरै खर्च गार्डिएन माइक्रो लाइफ इन्स्योरेन्सले गरेको छ । कम्पनीले तालिम र सामाजिक उत्तरदायित्व शीर्षकमा कुल (२३ लाख ६० हजार रुपैयाँ खर्च गरेको छ । यो कुल खर्चको २६ प्रतिशत हो । त्यस्तै, लिबर्टी माईक्रो लाईफले तालिम तथा सामाजिक उत्तरदायित्व शीर्षकमा कुल खर्चको १८ प्रतिशत अर्थात १६ लाख ५२ हजार ६५६ रुपैयाँ खर्च गरेको छ । क्रेस्ट माईक्रो लाईफले तालिम, सामाजिक उत्तरदायित्व र जनचेनामूलक शीर्षकमा १३ लाख ९६ हजार २६४ रुपैयाँ खर्च गरेका छन् । यो कुल खर्चको १५ प्रतिशत हो । त्यसैगरी, प्रोटेक्टिभ माइक्रोले १३ लाख ७० हजार रुपैयाँ खर्च गरेको छ । यो कुल खर्चको १५ प्रतिशत हो । ट्रस्ट माइक्रोले कुल खर्चको ११ प्रतिशत १० लाख ४० हजार रुपैयाँ खर्च गरेको छ । सबैभन्दा कम खर्च स्टार माइक्रो इन्स्योरेन्सले गरेको छ । कम्पनीले कुल खर्चको ७ प्रतिशत अर्थात ६ लाख २७ हजार रुपैयाँ मात्रै खर्च गरेको छ । नेपालमा न्यून भएका, आर्थिक, सामाजिक तथा भौगोलिक रूपले पिछाडिएका वर्ग तथा समुदायलाई वित्तीय मूल प्रवाहीकरणमा समावेश गराउने उद्देश्यका साथ लघुबीमा निर्देशिका २०७१ जारी भएको थियो । यस नीतिगत व्यवस्थाअनुरूप ठूला बीमा कम्पनीहरूमार्फत लघु बीमा व्यवसाय हुँदै आएको थियो । ती बीमा कम्पनीहरूले लघुबीमाको उद्देश्यअनुरूप काम गर्न नसकेपछि लघु बीमा मात्रै व्यवसाय गर्ने गरी २०७९ र ८० सालमा लघु जीवन बीमार्फत ३ वटा र लघु निर्जीवन बीमामार्फत ४ वटा गरी कुल ७ वटा बीमा कम्पनी स्थापना भयो । सञ्चालनको करिब ३ वर्षको अवधिमा लघु बीमा कम्पनीहरूले पनि सोचेअनुसार ग्रामीण क्षेत्रमा गएर व्यवसाय गर्न सकेका छैनन् । सबै बीमा कम्पनीको व्यवसाय सहरकेन्द्रित नै हुँदै आएको छ । लघुबीमा क्षेत्रको समग्र सुधारको लागि नीतिगत तथा नियामकीय हस्तक्षेप आवश्यक रहेको प्रतिवेदनले औंल्याएको छ ।
कांग्रेस केन्द्रीय कार्यसमिति बैठक साउन २४ गते बस्दै
काठमाडौं । नेपाली कांग्रेसको केन्द्रीय कार्यसमिति बैठक आगामी साउन २४ गते बस्ने भएको छ । कांग्रेस केन्द्रीय कार्यालयले आइतबार (आज) जारी गरेको सूचनाअनुसार बैठक श्रावण २४ गते आइतबार दिउँसो १ बजे पार्टीको केन्द्रीय कार्यालय बीपी स्मृति भवन, बीपी नगर ललितपुरमा बस्ने तय भएको हो । बैठकमा केन्द्रीय कार्यसमितिका पदाधिकारी तथा सदस्यहरूको उपस्थिति अनिवार्य गरिएको छ । बैठकका एजेन्डाबारे भने पार्टीले विस्तृत जानकारी सार्वजनिक गरेको छैन । कांग्रेसका कार्यवाहक मुख्यसचिव कृष्णप्रसाद दुलालले बैठकमा उपस्थित हुन केन्द्रीय सदस्यहरूलाई निर्देशन दिइएको जानकारी दिए ।
भारतबाट बढेर आयो पेट्रोलियम पदार्थको मूल्य, सञ्चालक समितिको बैठक नबस्दा नयाँ मूल्य रोकियो
काठमाडौं । भारतबाट पेट्रोलियम पदार्थको नयाँ खरिद मूल्य प्राप्त भएको दुई दिन बितिसक्दा पनि नेपाल आयल निगमले नयाँ खुद्रा बिक्री मूल्य सार्वजनिक गरेको छैन । यसपटक खरिद मूल्यमा उल्लेख्य परिवर्तन भएकाले निगम सञ्चालक समितिको निर्णयपछि मात्र नयाँ मूल्य लागू गरिने भएको हो । नेपाल आयल निगमले सामान्यतया हरेक अङ्ग्रेजी महिनाको १ र १६ तारिखमा इन्डियन आयल कर्पोरेसन (आईओसी) बाट प्राप्त नयाँ मूल्य सूचीका आधारमा मूल्य समायोजन गर्दै आएको छ । आईओसीले प्रत्येक महिनाको अन्तिम दिन र १५ तारिखमा नयाँ खरिद मूल्य पठाउने गर्दछ । सोहीअनुसार शुक्रबार नै नयाँ मूल्य प्राप्त भए पनि निगमले हालसम्म संशोधित मूल्यसूची सार्वजनिक गरेको छैन । निगमको स्वचालित मूल्य प्रणालीसम्बन्धी कानुनी व्यवस्थाअनुसार प्रतिलिटर दुई रुपैयाँसम्म मूल्य समायोजन गर्ने अधिकार व्यवस्थापनलाई मात्र छ । तर, दुई रुपैयाँभन्दा बढीले मूल्य बढाउन वा घटाउनुपर्ने अवस्था आएमा भने सञ्चालक समितिको बैठकबाट निर्णय गराउनुपर्ने अनिवार्य व्यवस्था छ । आईओसीबाट प्राप्त नयाँ खरिद मूल्यमा उल्लेखनीय परिवर्तन (दोहोरो अंकको वृद्धि) भएकाले सञ्चालक समितिको बैठक बसेर निर्णय भएपछि मात्र नयाँ मूल्य सार्वजनिक गरिने निगमका प्रवक्ता मनोजकुमार ठाकुर बताउँछन् । उद्योग, वाणिज्य तथा आपूर्ति मन्त्रालयका आपूर्ति सचिव नारायणप्रसाद शर्मा दुवाडी अध्यक्ष रहेको निगम सञ्चालक समितिमा अर्थ मन्त्रालय, गुणस्तर तथा नापतौल विभाग, वाणिज्य विभागका प्रतिनिधि, विज्ञ सदस्य, निगमका कार्यकारी प्रमुख र ट्रेड युनियनका प्रतिनिधिहरू सदस्य रहेका छन् । अन्तर्राष्ट्रिय बजारमा कच्चा तेलको मूल्य बढेकाले यसपटक भारतबाटै इन्धनको मूल्य उल्लेख्य बढेर आएको निगम स्रोतले जनाएको छ । शनिबार र आइतबार सार्वजनिक बिदा परेका कारण सञ्चालक समितिको बैठक बस्न नसकेको र बैठक बस्नासाथ निर्णय गरी नयाँ मूल्य लागू गरिने निगमले जनाएको छ । भारतबाट खरिद मूल्य बढेर आएका कारण नेपालमा पनि इन्धनको खुद्रा मूल्य बढ्ने निश्चित जस्तै छ ।
