अमेरिकी डलरको बिक्रीदर १५२ रुपैयाँ, अन्य विदेशी मुद्राको दर कति ?
काठमाडौं । नेपाल राष्ट्र बैंकले मंगलबारका लागि विदेशी मुद्राको विनिमयदर सार्वजनिक गरेको छ। राष्ट्र बैंकका अनुसार अमेरिकी डलर एकको बिक्रीदर १५२ रुपैयाँ १५ पैसा र खरिददर १५१ रुपैयाँ ५५ पैसा कायम भएको छ। त्यस्तै, युरोपियन युरो एकको बिक्रीदर १७० रुपैयाँ ६८ पैसा र खरिददर १७० रुपैयाँ १ पैसा निर्धारण गरिएको छ। बेलायती पाउन्ड स्टर्लिङ एकको बिक्रीदर २०४ रुपैयाँ २२ पैसा र खरिददर २०३ रुपैयाँ ४१ पैसा रहेको छ। स्विस फ्र्याङ्क एकको बिक्रीदर १८५ रुपैयाँ ३३ पैसा र खरिददर १८४ रुपैयाँ ६० पैसा कायम भएको छ। अस्ट्रेलियन डलर एकको बिक्रीदर १०६ रुपैयाँ ८२ पैसा र खरिददर १०६ रुपैयाँ ४० पैसा रहेको छ। क्यानेडियन डलर एकको बिक्रीदर १०८ रुपैयाँ ९४ पैसा र खरिददर १०८ रुपैयाँ ५१ पैसा निर्धारण गरिएको छ। त्यस्तै, सिंगापुर डलर एकको बिक्रीदर ११९ रुपैयाँ र खरिददर ११८ रुपैयाँ ५३ पैसा रहेको छ। जापानी येन १० वटाको बिक्रीदर ९ रुपैयाँ ६३ पैसा र खरिददर ९ रुपैयाँ ५९ पैसा कायम भएको छ। चिनियाँ युआन एकको बिक्रीदर २२ रुपैयाँ ८९ पैसा र खरिददर २२ रुपैयाँ ८० पैसा रहेको छ। राष्ट्र बैंकले तोकेको विनिमयदर आवश्यकताअनुसार जुनसुकै समयमा संशोधन गर्न सकिने जनाएको छ। वाणिज्य बैंकहरूले निर्धारण गर्ने विनिमयदर भने राष्ट्र बैंकले तोकेको दरभन्दा फरक हुन सक्नेछ।
न्यायालयमाथि उठेका प्रश्नको अध्ययन गर्न बारले बनायो चण्डेश्वर श्रेष्ठ नेतृत्वमा समिति
काठमाडौं । न्यायाधीशहरूको आचरण, न्यायिक निष्पक्षता र पछिल्लो समय न्यायालयसँग जोडिएर सार्वजनिक भएका विवादबारे नेपाल बार एसोसिएसनले अध्ययन गर्ने भएको छ । न्यायपालिकामाथि उठेका प्रश्नहरूको तथ्यगत आधार पहिल्याउन तथा न्यायिक क्षेत्रको सुधारका लागि सुझाव दिन बारले पूर्वअध्यक्ष चण्डेश्वर श्रेष्ठको संयोजकत्वमा अध्ययन समिति गठन गरेको हो। सोमबार बसेको बारको कार्यसमिति र सल्लाहकार समितिको संयुक्त बैठकले श्रेष्ठको नेतृत्वमा समिति गठन गर्ने निर्णय गरेको महासचिव एवं वरिष्ठ अधिवक्ता केदारप्रसाद कोइरालाले जानकारी दिए। समितिमा सर्वोच्च अदालत बार एसोसिएसनका पूर्वअध्यक्ष पूर्णमान शाक्य, नेपाल बारका पूर्वउपाध्यक्षद्वय उषा मल्ल पाठक र सुरेन्द्रकुमार महतो तथा पूर्वसदस्य चन्द्रप्रसाद काफ्ले सदस्य छन्। बारका केन्द्रीय सदस्य बाबुराम अर्याललाई सदस्य सचिवको जिम्मेवारी दिइएको छ। समितिले न्यायपालिकासम्बन्धी पछिल्ला विवाद र सार्वजनिक टिप्पणीहरूको तथ्य संकलन तथा अध्ययन गर्नेछ। साथै, न्यायिक क्षेत्रको विश्वसनीयता, निष्पक्षता र संस्थागत सुधारका लागि आवश्यक सुझावसहितको प्रतिवेदन एक महिनाभित्र पेस गर्नुपर्नेछ। पछिल्लो समय सम्पत्ति शुद्धीकरणसम्बन्धी कसुरमा अनुसन्धानका लागि हिरासतमा रहेका इनम सापकोटा र न्यायाधीशहरूबीच भएको भनिएको भेटघाट तथा संवादको विषय सार्वजनिक भएपछि न्यायिक क्षेत्रको निष्पक्षतामाथि प्रश्न उठेको छ। मुद्दामामिलासम्बन्धी विषयमा सापकोटा र न्यायाधीश हरिप्रसाद फुयालबीच भएको कुराकानीको च्याट सार्वजनिक भएको थियो। त्यसपछि न्यायाधीश फुयालसहित केही व्यक्तिले होटल हिमालयमा भेट गरेको विवरणसमेत बाहिरिएको थियो। न्यायाधीश फुयालले सापकोटासँग कुराकानी र भेटघाट भएको स्वीकार गरेका छन्। यस प्रकरणमा सापकोटाबारे न्यायाधीश फुयालसहित केही व्यक्तिले सरकारलाई जानकारी गराएको र त्यसपछि उनी पक्राउ परेको दाबीसमेत सार्वजनिक भएको छ। तर, उक्त घटनाक्रमको वास्तविकता, भेटघाटको उद्देश्य र त्यससँग जोडिएका अन्य विषयमा आधिकारिक रूपमा तथ्य स्थापित हुन बाँकी छ। यसैबीच, सोमबार बसेको सर्वोच्च अदालतको पूर्ण अदालत (फुलकोर्ट) बैठकले पनि प्रकरणबारे चासो व्यक्त गरेको छ। बैठकले सम्बद्ध निकायलाई आवश्यक छानबिन गरी सत्यतथ्य सार्वजनिक गर्न आग्रह गरेको छ।
नेपाल एसबीआई बैंकको नाफा १०.१० प्रतिशत बढ्यो, विजनेश ग्रोथ ३.०२ प्रतिशत
काठमाडौं । नेपाल एसबीआई बैंकले चालु आर्थिक वर्ष २०८३÷८४ को पहिलो त्रैमासमा ५५ करोड २२ लाख रुपैयाँ खुद नाफा कमाएको छ । यो गत आर्थिक वर्षको सोही अवधिको तुलनामा १०.१० प्रतिशतले बढी हो । गत वर्षको असोजसम्म बैंकले ५० करोड १५ लाख रुपैयाँ खुद नाफा कमाएको थियो । बैंकको निक्षेप संकलन र कर्जा प्रवाह दुवैमा वृद्धि देखिएको छ । असोजसम्म बैंकको निक्षेप १२ प्रतिशतले बढेर २ खर्ब ३९ अर्ब ५२ करोड रुपैयाँ पुगेको छ । गत वर्षको सोही अवधिमा बैंकसँग २ खर्ब १२ अर्ब ८२ करोड रुपैयाँ निक्षेप थियो । त्यस्तै, बैंकको कर्जा तथा सापटी ३.०२ प्रतिशतले बढेर १ खर्ब ५० अर्ब ४९ करोड रुपैयाँ पुगेको छ । गत वर्षको असोजसम्म बैंकले १ खर्ब ४६ अर्ब ७ करोड रुपैयाँ कर्जा प्रवाह गरेको थियो । बैंकको खुद ब्याज आम्दानी भने ३.७१ प्रतिशतले घटेर १ अर्ब २६ करोड ९७ लाख रुपैयाँमा सीमित भएको छ । गत वर्षको सोही अवधिमा यस्तो आम्दानी १ अर्ब ३१ करोड ८६ लाख रुपैयाँ थियो । तर, खुद शुल्क तथा कमिसन आम्दानी १०.७९ प्रतिशतले बढेर ३६ करोड ७० लाख रुपैयाँ पुगेको छ । बैंकको कुल सञ्चालन आम्दानी सामान्य बढेर १ अर्ब ७६ करोड ५८ लाख रुपैयाँ पुगेको छ । गत वर्षको असोजसम्म यस्तो आम्दानी १ अर्ब ७६ करोड ४० लाख रुपैयाँ थियो । यस अवधिमा कर्जा नोक्सानी व्यवस्थाका लागि छुट्याइएको रकम २८ करोड ७५ लाख रुपैयाँबाट घटेर १८ करोड ४० लाख रुपैयाँमा झरेको छ । बैंकको सञ्चालन नाफा ९.४६ प्रतिशतले बढेर ७८ करोड ३४ लाख रुपैयाँ पुगेको छ । गत वर्षको सोही अवधिमा सञ्चालन नाफा ७१ करोड ५७ लाख रुपैयाँ थियो । कर्मचारी खर्च भने ५० करोड ७८ लाख रुपैयाँबाट बढेर ५२ करोड ७३ लाख रुपैयाँ पुगेको छ । बैंकको चुक्ता पुँजी ११ अर्ब ३३ करोड रुपैयाँ र रिजर्भ कोष २.१७ प्रतिशतले बढेर ९ अर्ब ६९ करोड रुपैयाँ पुगेको छ । बैंकको प्रतिसेयर आम्दानी १७ रुपैयाँ ७० पैसाबाट बढेर १९ रुपैयाँ ४९ पैसा पुगेको छ । प्रतिसेयर नेटवर्थ १९९ रुपैयाँ ६६ पैसा रहेको छ । यस अवधिमा बैंकको पुँजी पर्याप्तता अनुपात १४.३२ प्रतिशतबाट घटेर १३.६२ प्रतिशतमा झरेको छ । त्यस्तै, निष्क्रिय कर्जा अनुपात ३.०१ प्रतिशतबाट बढेर ३.१९ प्रतिशत पुगेको छ ।
११ वर्षदेखि अलपत्र सुखानी नदीको पुलको ठेक्का अन्त्य
काठमाडौं । इलामको सुखानी नदीमा मोटरेबल आरसीसी पुल निर्माण गर्ने ठेक्का सम्झौता सडक डिभिजन इलामले अन्त्य गरेको छ । निर्माण व्यवसायीले करिब ११ वर्ष ३ महिनादेखि निर्माण कार्य अधुरै छाडेर आयोजना अलपत्र पारेपछि डिभिजनले ठेक्का सम्झौता रद्द गर्ने निर्णय गरेको हो । सडक डिभिजन इलामले निर्माण व्यवसायी स्काई अजम्बर–शिवराम जेभी, नयाँ बानेश्वर, काठमाडौंसँगको ठेक्का सम्झौता अन्त्य गरिएको जनाएको छ । डिभिजनले कात्तिक १६ गते ठेक्का अन्त्य गर्ने निर्णय गरेको हो । बुढी सुखानी–लोडिया–च्यामी सडकखण्डअन्तर्गत सुखानी नदीमा पुल निर्माणका लागि गरिएको ठेक्का सम्झौताअनुसार निर्धारित समयभित्र काम सम्पन्न हुन सकेको थिएन । निर्माण व्यवसायीले लामो समयदेखि काम अधुरो छाडेर निर्माणस्थल अलपत्र पारेको र पटक–पटक लिखित पत्राचार तथा निर्देशन दिँदा पनि बाँकी काम पूरा गर्न ठोस पहल नगरेको डिभिजनको भनाइ छ । यसअघि उच्च अदालत पाटनले २०८२ फागुन १३ गते दिएको आदेशअनुसार बाँकी निर्माण कार्य सम्बन्धित निर्माण व्यवसायीबाटै सम्पन्न गराउने उद्देश्यले डिभिजनले पटक–पटक पत्राचार गरेको थियो । अदालतको आदेशको प्रमाणित प्रतिलिपिसहित आवश्यक अवसर र सहजीकरण उपलब्ध गराउँदा पनि निर्माण व्यवसायीले काम अघि बढाउन प्रतिबद्धता नदेखाएको डिभिजनले जनाएको छ । निर्माण व्यवसायीले म्याद थप गरी सुविस्ताको आधारमा ठेक्का अन्त्य गरिदिन निवेदन दिएको र सम्झौताअनुसारका दायित्वसमेत पूरा नगरेको भन्दै डिभिजनले अब बाँकी काम उसैबाट सम्पन्न हुने अवस्था नरहेको निष्कर्ष निकालेको छ । सोही आधारमा ठेक्का सम्झौताको जीसीसी क्लज ५८.१, ५८.२ (क), ५८.२ (ङ) र ५८.२ (च) तथा सार्वजनिक खरिद ऐन, २०६३ को दफा ५९ (७) बमोजिम ठेक्का अन्त्य गरिएको डिभिजनले जनाएको छ । ठेक्का अन्त्यसँगै सार्वजनिक खरिद ऐनको दफा ५९ (८) र ६३, सार्वजनिक खरिद नियमावलीको नियम १४१ तथा ठेक्का सम्झौताका सम्बन्धित प्रावधानअनुसार थप कारबाही प्रक्रिया अघि बढाइएको जनाएको छ । यसैबीच, निर्माण व्यवसायीले सम्पन्न गरिसकेको र भुक्तानी हुन बाँकी रहेको स्वीकार्य कामको वित्तीय फरफारक गर्न १५ दिनभित्र डिभिजनमा उपस्थित हुन आग्रह गरिएको छ । तोकिएको अवधिमा निर्माण व्यवसायी वा उसको प्रतिनिधि उपस्थित नभए डिभिजन आफैंले आवश्यक प्रक्रिया अघि बढाउने जनाएको छ ।
एनपीएलमा आज विराटनगर-जनकपुर र लुम्बिनी-पोखरा भिड्दै
काठमाडौं । नेपाल प्रिमियर लिग (एनपीएल) अन्तर्गत आज पनि दुई खेल हुँदैछन् । कीर्तिपुरस्थित त्रिवि अन्तर्राष्ट्रिय क्रिकेट मैदानमा पहिलो खेल विराटनगर किंग्स र जनकपुर बोल्ट्सबीच हुनेछ भने दोस्रो खेल लुम्बिनी लायन्स र पोखरा एभेन्जर्सबीच हुनेछ । आज दिउँसो साढे १२ बजे हुने पहिलो खेलमा विराटनगर र जनकपुर आमनेसामने हुनेछन् । तीन खेल खेलेको विराटनगरले एकमा जित र दुई खेलमा हार बेहोरेको छ । चितवन र कर्णालीसँग पराजित भएको विराटनगरले सुदूरपश्चिमविरुद्ध भने जित निकालेको थियो । जनकपुरले पनि तीन खेल खेलिसकेको छ । उसले दुई खेलमा जित र एकमा हार बेहोरेको छ । पहिलो खेलमा कर्णाली याक्ससँग पराजित भएको जनकपुरले त्यसपछि काठमाडौं र पोखरालाई हराएको थियो । यसैगरी, आज दिउँसो साढे ४ बजे हुने दोस्रो खेलमा लुम्बिनी लायन्स र पोखरा एभेन्जर्स भिड्नेछन् । लुम्बिनीले खेलेका दुई खेलमध्ये एकमा जित निकालेको छ भने अर्को खेल वर्षाका कारण रद्द हुँदा चितवनसँग अंक बाँडेको थियो । सुदूरपश्चिमविरुद्धको पहिलो खेलमा लुम्बिनी विजयी भएको थियो । पोखराले भने आफ्ना दुवै खेलमा हार बेहोरेको छ । पहिलो खेलमा सुदूरपश्चिम र दोस्रो खेलमा जनकपुर बोल्ट्ससँग पराजित भएको पोखरा लुम्बिनीविरुद्ध पहिलो जित निकाल्ने लक्ष्यसहित मैदान उत्रनेछ ।
८.१० प्रतिशत बढ्यो प्रभु बैंकको नाफा, कर्जा नोक्सानी व्यवस्था ४१.३५ प्रतिशत घट्यो
काठमाडौं । प्रभु बैंकले चालु आर्थिक वर्ष २०८३÷८४ को पहिलो त्रैमासमा ६० करोड ३७ लाख रुपैयाँ खुद नाफा कमाएको छ । गत वर्षको सोही अवधिमा बैंकको नाफा ५५ करोड ८४ लाख रुपैयाँ थियो । बैंकले गत वर्षका तुलनामा चालु वर्षको असोजसम्म ८.१० प्रतिशत बढी खुद नाफा कमाएको हो । बैंकको खुद ब्याज आम्दानी १९.३६ प्रतिशतले घटेर २ अर्ब ३३ करोड ४७ लाख रुपैयाँमा सीमित भएको छ । गत वर्षको असोजसम्म यस्तो आम्दानी २ अर्ब ८९ करोड ५२ लाख रुपैयाँ थियो । खुद शुल्क तथा कमिसन आम्दानी पनि ७० करोड ४७ लाख रुपैयाँबाट घटेर ६८ करोड ८४ लाख रुपैयाँमा झरेको छ । त्यस्तै, बैंकको कुल सञ्चालन आम्दानी ११.८८ प्रतिशतले घटेर ३ अर्ब ३७ करोड ६ लाख रुपैयाँ कायम भएको छ । गत वर्षको सोही अवधिमा यस्तो आम्दानी ३ अर्ब ८२ करोड ५१ लाख रुपैयाँ थियो । यद्यपि, कर्जा नोक्सानी व्यवस्थाका लागि छुट्याइएको रकम १ अर्ब ३ करोड ७८ लाख रुपैयाँबाट घटेर ५८ करोड ८६ लाख रुपैयाँमा आएको छ । यो गत वर्षको तुलनामा ४१.३५ प्रतिशत कम हो । कर्मचारी खर्च पनि सामान्य घटेर १ अर्ब १० करोड ५४ लाख रुपैयाँ कायम भएको छ । बैंकको सञ्चालन नाफा १ अर्ब १७ करोड २० लाख रुपैयाँबाट घटेर १ अर्ब १५ करोड ४५ लाख रुपैयाँमा झरेको छ । असोज मसान्तसम्ममा बैंकको निक्षेप ०.५७ प्रतिशतले बढेर ३ खर्ब ५० अर्ब २ करोड रुपैयाँ पुगेको छ । गत वर्षको असोजसम्म निक्षेप ३ खर्ब ४८ अर्ब ४ करोड रुपैयाँ थियो । तर, बैंकको कर्जा तथा सापटी १.५९ प्रतिशतले घटेर २ खर्ब ११ अर्ब १३ करोड रुपैयाँ कायम भएको छ । गत वर्षको सोही अवधिमा बैंकले २ खर्ब १४ अर्ब ५४ करोड रुपैयाँ कर्जा प्रवाह गरेको थियो । बैंकको चुक्ता पुँजी २३ अर्ब ५४ करोड रुपैयाँ छ भने रिजर्भ कोष ६.९९ प्रतिशतले बढेर १७ अर्ब ६ करोड रुपैयाँ पुगेको छ । बैंकको प्रतिसेयर आम्दानी ९ रुपैयाँ ४९ पैसाबाट बढेर १० रुपैयाँ २६ पैसा पुगेको छ । प्रतिसेयर नेटवर्थ १४३ रुपैयाँ ६४ पैसा रहेको छ । यस अवधिमा बैंकको पुँजी पर्याप्तता अनुपात १३.६० प्रतिशतबाट घटेर ११.८३ प्रतिशतमा झरेको छ । बैंकको निष्क्रिय कर्जा अनुपात भने ५.७८ प्रतिशतबाट बढेर १४.८० प्रतिशत पुगेको छ ।
थापाथलीमा तिहार विशेष रैथाने मेला, स्टल शुल्क ५ हजार
काठमाडौं । नेपाली मौलिक संस्कृति, रैथाने उत्पादन र स्थानीय उद्यमशीलताको प्रवर्द्धन गर्ने उद्देश्यले खाद्य व्यवस्था तथा व्यापार कम्पनी लिमिटेडले तिहार विशेष रैथाने मेला आयोजना गर्ने भएको छ । कम्पनीले आगामी कात्तिक २१ देखि २३ गतेसम्म काठमाडौंको थापाथलीस्थित बागमती प्रादेशिक कार्यालय परिसरमा तीनदिने मेला सञ्चालन गर्न लागेको हो । मेलामा आफ्ना मौलिक उत्पादनको प्रदर्शनी तथा बिक्री गर्न इच्छुक कृषक, कृषक समूह, कृषि सहकारी संस्था, महिला तथा युवा उद्यमी र रैथाने तथा स्थानीय उत्पादकबाट स्टल सहभागिताका लागि आवेदन आह्वान गरिएको छ । इच्छुकले ३ दिनभित्र आवेदन दिनुपर्नेछ । कम्पनीका अनुसार मेलामा तिहार विशेष परिकार तथा परम्परागत खाद्य सामग्री, फूल तथा माला, सजावटका सामग्री, परम्परागत पोसाक, हस्तकलाका सामग्री, माटाका भाँडाकुँडा, रैथाने बाली, कृषि उपज र अन्य स्थानीय तथा स्वदेशी उत्पादनलाई प्राथमिकता दिइनेछ । मेलामा सहभागी हुने एउटा स्टलका लागि पाँच हजार रुपैयाँ शुल्क तोकिएको छ । उक्त शुल्कमा मूल्य अभिवृद्धि कर (भ्याट) समावेश छैन ।
दीपावलीमा स्वदेशी फूल र माला बिक्रीका लागि काठमाडौं महानगरले तोक्यो ३३ स्थान
काठमाडौं । दीपावली पर्वलाई लक्षित गर्दै काठमाडौं महानगरपालिकाले स्वदेशी फूल तथा माला बिक्री वितरणका लागि महानगर क्षेत्रभित्र ३३ स्थान तोकेको छ । नेपाली किसानले उत्पादन गरेका फूल र मालाको बिक्रीलाई प्रोत्साहन गर्ने उद्देश्यले महानगरले व्यवसायी तथा सर्वसाधारणका लागि बिक्रीस्थल निर्धारण गरेको हो । महानगरपालिकाले दीपावलीका अवसरमा प्लास्टिकजन्य फूल, माला तथा सजावटका सामग्री बिक्री वितरण नगर्न आग्रह गरेको छ । स्वदेशी फूल र मालाको बिक्रीलाई प्राथमिकता दिन व्यवसायी, व्यापारी तथा सर्वसाधारणलाई अनुरोध गर्दै महानगरले सूचनाको अवज्ञा गरी प्लास्टिकजन्य वा गुणस्तर कायम नभएका फूल, माला तथा सजावटका सामग्री बिक्री गरेको पाइएमा जफत गर्ने चेतावनीसमेत दिएको छ । महानगर प्रहरी बलले सरोकारवाला निकायसँग समन्वय गरी नेपाली किसानले उत्पादन गरेका फूल तथा माला बिक्री गर्न विभिन्न स्थान तोकेको जनाएको छ । नयाँ बानेश्वरस्थित एनबी सेन्टर र आइप्लेक्स मल, शंखमुलस्थित बिगमार्ट, मध्य बानेश्वरस्थित सेल्सबेरी, बत्तीसपुतलीस्थित फोनेक्स टावर, तीनकुने चौर, सिफल चौर, चाबहिल, स्वयम्भू, कालीमाटी, कलंकी, नयाँ बजार र माछापोखरी क्षेत्रमा बिक्रीस्थल तोकिएका छन् । त्यस्तै, हाँडीगाउँ, सामाखुशी, महाराजगञ्ज, गोंगबु, बालुवाटार, कमलादी, पुतलीसडक, अनामनगर, टेबहाल, सुन्धारा, न्यूप्लाजा, लगन, जैसिदेवल र भृकुटीमण्डपलगायतका स्थानमा पनि फूल तथा माला बिक्री गर्न सकिने व्यवस्था गरिएको छ । महानगरले केही बिक्रीस्थलका लागि सम्पर्क व्यक्ति र फोन नम्बरसमेत सार्वजनिक गरेको छ । नयाँ बानेश्वरको एनबी सेन्टरका लागि आकृति श्रेष्ठ, शंखमुलको बिगमार्टका लागि विपिन रावल, आइप्लेक्स मलका लागि शिशिरकुमार पोखरेल, मध्य बानेश्वरको सेल्सबेरीका लागि सपना सिजापती र बत्तीसपुतलीको फोनेक्स टावरका लागि सुरज थापालाई सम्पर्क व्यक्ति तोकिएको छ । त्यस्तै, चाबहिलको एसी कम्प्लेक्सका लागि गोविन्दराज गिरी, गणेशस्थान तरकारी बजारका लागि अज्जन श्रेष्ठ र केएल टावरअगाडिका लागि चेतना गुरुङलाई सम्पर्क गर्न सकिने महानगरले जनाएको छ । अन्य बिक्रीस्थलका लागि पनि महानगरले सम्पर्क व्यक्ति तथा फोन नम्बर उपलब्ध गराएको छ ।
