रद्द भएको सुनकोशी–मरिणको ठेक्का नयाँ नियमअनुसार अघि बढाउन निर्देशन
काठमाडौं । प्रधानमन्त्री तथा मन्त्रिपरिषद्को कार्यालयले सुनकोशी-मरिण डाइभर्सन बहुउद्देश्यीय राष्ट्रिय गौरवको आयोजनाको ठेक्का प्रक्रिया संशोधित ऐन तथा नियमावली अनुसार तत्काल सुरु गर्न ऊर्जा, जलस्रोत तथा सिँचाइ मन्त्रालयलाई निर्देशन दिएको छ । सोमबार सिंहदरबार स्थित प्रधानमन्त्री तथा मन्त्रिपरिषद्को कार्यालयमा बसेको बैठकमा उक्त निर्देशन दिइएको हो । बैठकमा ऊर्जा, जलस्रोत तथा सिँचाइ मन्त्रालयका सचिव डा. जगदीश्वर कर्माचार्य, सिँचाइ विभागका महानिर्देशक दिनेश रजौरिया , आयोजनाका प्रमुख कृष्ण प्रसाद रिजाल र आयोजनाका इन्जिनियरहरूको सहभागिता थियो । बैठकमा मन्त्रालयले राष्ट्रिय गौरवको आयोजनालाई निर्धारित समयमै सम्पन्न गर्न आवश्यक प्रक्रिया अघि बढाउने प्रतिबद्धता जनाएको छ । यसअघि आयोजनाको ठेक्का प्रक्रिया प्रचलित ऐन तथा नियमावली विपरीत भएको पाइएपछि उक्त प्रक्रिया रद्द गरिएको थियो । अब संशोधित ऐन तथा नियमावली अनुसार ठेक्का प्रक्रिया तत्काल अघि बढाउन प्रधानमन्त्री कार्यालयले निर्देशन दिएको हो । सरकारले गत भदौ ३ गते सार्वजनिक खरिदसम्बन्धी नियमावली संशोधन गर्दै मूल नियमावलीमा नियम २६ क थप गरेको थियो । उक्त नयाँ व्यवस्थाअनुसार १ अर्ब ५० करोड रुपैयाँभन्दा बढी लागत अनुमान भएका ठूला तथा जटिल निर्माण कार्यका लागि प्राविधिक र आर्थिक प्रस्तावको अङ्कभार बोलपत्र (टेन्डर) कागजातमै अनिवार्य रूपमा उल्लेख गर्नुपर्ने व्यवस्था गरिएको छ । राष्ट्रिय गौरवको आयोजनाका रूपमा रहेको सुनकोशी-मरिण डाइभर्सन आयोजना समयमै सम्पन्न गर्न र ठेक्का प्रक्रियालाई कानुनसम्मत रूपमा अघि बढाउन सरकारले जोड दिएको छ।
चाबहिलसहितका क्षेत्रमा मंगलबार तीन घण्टा बिजुली जाने
काठमाडौं । मंगलबार (भोलि) बिहान चाबहिलसहित काठमाडौंका विभिन्न क्षेत्रमा तीन घण्टा विद्युत् आपूर्ति बन्द हुने भएको छ । नेपाल विद्युत् प्राधिकरणका अनुसार भोलि बिहान ५ बजेदेखि ८ बजेसम्म चाबहिल सबस्टेसनको ६६ केभी बस आइसोलेटर मर्मत गरिने भएकाले विद्युत आपूर्ति बन्द हुने भएको हो । मर्मतका क्रममा चाबहिल, पशुपति, गौशाला, मित्रपार्क, जयबागेश्वरीलगायत आसपासका क्षेत्रमा विद्युत् आपूर्ति बन्द रहने प्राधिकरणले जनाएको छ । प्राधिकरणका अनुसार निर्धारित समयभन्दा अगाडि नै मर्मतसम्भारको काम सकिए विद्युत् आपूर्ति पनि सोहीअनुसार चाँडै सुचारु गरिनेछ ।
डा. केसीका अधिकांश माग पूरा भएको शिक्षा मन्त्रालयको दाबी
काठमाडौं । शिक्षा तथा खेलकुद मन्त्रालयले डा. गोविन्द केसीले चिकित्सा शिक्षा र स्वास्थ्य क्षेत्रमा सुधारका लागि उठाएका अधिकांश माग कार्यान्वयन भइसकेको जनाएको छ । केही माग भने कार्यान्वयनको प्रक्रियामा रहेको मन्त्रालयले स्पष्ट पारेको छ । मन्त्रालयले सोमबार (आज) डा. केसीका माग र सरकारले गरेका सम्झौताको कार्यान्वयन अवस्थाबारे विवरण सार्वजनिक गर्दै चिकित्सा शिक्षा सुधारका विषयमा सरकार सुरुदेखि नै प्रतिबद्ध रहेको जनाएको हो । मन्त्रालयका अनुसार चिकित्सा शिक्षा आयोगको अनुगमन प्रतिवेदन र स्वीकृत मापदण्डका आधारमा मात्रै गेटामा एमबीबीएस, नर्सिङलगायतका कार्यक्रम सञ्चालन गर्न अनुमति दिइएको छ । न्यूनतम पूर्वाधार र मापदण्ड पूरा नगरी कार्यक्रम सञ्चालन गर्न दिन नहुने डा। केसीको मागलाई यसैगरी सम्बोधन गरिएको मन्त्रालयको भनाइ छ । त्यस्तै, अनुगमन प्रतिवेदनका आधारमा स्वीकृत मापदण्डभित्र रहेर मुख्यगरी सरकारी मेडिकल कलेजमा विद्यार्थीको सिट संख्या बढाइएको छ । ३०० शय्याको सहिद दशरथ चन्द स्वास्थ्य विज्ञान विश्वविद्यालयको शिक्षण अस्पताल पनि पूर्ण क्षमतामा सञ्चालनमा ल्याइएको मन्त्रालयले जनाएको छ । विश्वविद्यालयसम्बन्धी ऐनमा रहेका दलीय प्रभाव र विवादसँग जोडिएका प्रावधान संशोधन गर्न ‘केही नेपाल ऐन संशोधन’ को प्रक्रिया अघि बढाइएको छ । सार्वजनिक तथा निजी शिक्षण संस्थामा कानुनअनुसार छात्रवृत्ति व्यवस्था लागू गरिएको र चिकित्सा शिक्षा आयोगले तोकेको मापदण्डअनुसार मात्रै विद्यार्थी कोटा निर्धारण गरिएको मन्त्रालयको भनाइ छ । डा. केसीसँग २०८३ साउन ११ गतेसहित यसअघि भएका सत्याग्रहका क्रममा सरकारले गरेका सम्झौता कार्यान्वयनको अवस्था अध्ययन गर्न पनि कार्यदल गठन गरिएको छ । २०८३ साउन २७ गतेको मन्त्रीस्तरीय निर्णयअनुसार गठन भएको कार्यदलले प्रतिवेदनको मस्यौदा तयार गर्ने अन्तिम चरणमा पुगेको मन्त्रालयले जनाएको छ । त्यस्तै, २०८२ भदौ २४ गते देशका विभिन्न ठाउँमा भएका आगजनी, लुटपाट र तोडफोडका घटनाको छानबिन गरी दोषीमाथि कारबाही गर्ने प्रक्रिया सम्बन्धित निकायले अघि बढाइरहेको मन्त्रालयले जनाएको छ । इलाम, उदयपुर र डडेलधुरामा सरकारी मेडिकल कलेज वा स्वास्थ्य विज्ञान प्रतिष्ठान स्थापना गर्ने विषयमा पनि मन्त्रालयले काम भइरहेको जनाएको छ । सुर्खेत, बुटवल र बर्दिवासमा चिकित्सा शिक्षा संस्था स्थापना गर्ने काम अघि बढेको र त्यसका लागि थप बजेट व्यवस्थापनको प्रक्रिया चलिरहेको मन्त्रालयको भनाइ छ । त्यसैगरी, चिकित्सा शिक्षा आयोगका उपाध्यक्ष, विश्वविद्यालयका उपकुलपति र रजिस्ट्रारलगायत पदाधिकारीको नियुक्ति, योग्यता तथा निर्णयबारे उठेका प्रश्नमा सरकारले आवश्यक छानबिन गर्ने जनाएको छ । चिकित्सा शिक्षा सुधारका धेरै विषय कार्यान्वयनमा आइसकेकाले नेपालको चिकित्सा शिक्षा क्षेत्र आकर्षणको केन्द्र बनेको मन्त्रालयको दाबी छ । मन्त्रालयले बाँकी विषयमा पनि संवाद र सहकार्यबाट समाधान खोज्ने प्रतिबद्धता जनाउँदै जारी सत्याग्रह अन्त्य गरेर वार्तामा आउन पनि डा. केसीलाई आग्रह गरेको छ ।
सुदूरपश्चिमले चितवनलाई पाँच विकेटले हरायो
काठमाडौं । जारी नेपाल प्रिमियर लिग (एनपीएल) को तेस्रो सिजनमा सुदूरपश्चिम रोयल्सले दोस्रो जित निकालेको छ । चितवन राइनोजलाई पाँच विकेटले पराजित गर्दै सुदूरपश्चिमले दोस्रो जित निकालेको हो । सोमबार (आज) त्रिवि क्रिकेट रंगशालामा सुदूरपश्चिमले चितवनले प्रस्तुत गरेको १३० रनको लक्ष्य १६.४ ओभरमा पाँच विकेट गुमाएर पूरा गरेको हो । सुदूरपश्चिमको जितमा ब्रान्डन म्यामुलेनले ४३, इशान पाण्डेले २५, विनोद भण्डारीले ११, आरिफ शेखले २० र शेरफन रदरफोर्डले २१ रन बनाए । चितवनका लागि रञ्जित कुमारले ३ विकेट लिए । त्यसअघि चितवनले निर्धारित २० ओभरमा ६ विकेट गुमाएर १ सय २९ रन मात्र बनाउन सकेको थियो । चितवनका लागि रवि बोपराले ४९ रन बनाउँदा डेविड मलानले १६ रन बनाए । त्यस्तै, अर्जुन साउदले १५ रन बनाउँदा कप्तान सिकन्दर रजाले १५ तथा विवेक यादवले १७ रन बनाए । सुदूरपश्चिमका लागि स्कट कुग्लिङले २ विकेट लिँदा हेमन्त धामी, दीपेन्द्र सिंह ऐरी र अनिल खरेलले १(१ विकेट लिए । यसअघि सुदूरपश्चिमले ३ खेल खेल्दा २ खेलमा हार भोगेको थियो ।
प्रदर्शनमा सहभागी भएकोमा अभिनेता इमरानलाई अदालतको माफी माग्न आदेश
काठमाडौं । भारतको बम्बई उच्च अदालतले अभिनेता इमरान खानलाई प्रदर्शनमा सहभागी भएकोमा बिना सर्त माफी माग्न निर्देशन दिएको छ । अभिनेता खान मुख्य निर्वाचन आयुक्त ज्ञानेश कुमारविरुद्ध भएको प्रदर्शनमा सहभागी भएका थिए । भारतमा जारी विशेष सघन पुनरावलोकन (एसआईआर) प्रक्रियाको विरोधमा उक्त प्रदर्शन गरिएको थियो । लाइभ लको रिपोर्टअनुसार अदालतले इमरानलाई भविष्यमा कुनै पनि प्रदर्शनमा सहभागी नहुने प्रतिबद्धतासहितको शपथपत्रसमेत पेस गर्न भनेको छ । यद्यपि, अदालतले उनीविरुद्ध विदेशी क्षेत्रीय दर्ता कार्यालय (एफआरआरओ) ले जारी गरेको लिभ इन्डिया नोटिस कार्यान्वयन नगर्न दिएको अन्तरिम आदेशलाई निरन्तरता दिएको छ । इमरानलाई उक्त सूचनाबारे आफ्नो जवाफ पेस गर्ने अवसर नदिइएसम्म यो आदेश कायम रहनेछ । इमरान खानले एफआरआरओ, मुम्बईले जारी गरेको उक्त सूचना खारेज गर्न माग गर्दै बम्बई उच्च अदालतमा निवेदन दिएका थिए । सूचनामा उनलाई अक्टोबर २८ भित्र भारत छाड्न भनिएको थियो । यसअघि भएको सुनुवाइमा एफआरआरओले सोमबारसम्म उनीविरुद्ध कुनै कारबाही नगर्ने प्रतिबद्धता जनाएको थियो । मुद्दाको सुनुवाइका क्रममा मुख्य न्यायाधीश महेश चन्द्र त्रिपाठी र न्यायाधीश अद्वैत सेठनाको संयुक्त इजलासले इमरानसँग बिना सर्त माफी माग्न लगाउने मौखिक टिप्पणी गरेको थियो । अदालतले इमरान ओसीआई (ओभरसिज सिटिजन अफ इन्डिया) कार्डधारक रहेको र एसआईआर प्रक्रियासँग उनको प्रत्यक्ष सम्बन्ध नरहेको उल्लेख गरेको छ । त्यसैले उनले यस्तो प्रदर्शनमा सहभागी हुन नहुने अदालतको भनाइ थियो । यस मुद्दाको अर्को सुनुवाइ डिसेम्बर ७ मा हुनेछ ।
७ महिनामा सीमा क्षेत्रबाट १ अर्ब ३३ करोडको अवैध सामान बरामद
काठमाडौं । सीमा क्षेत्रमा सुरक्षा व्यवस्था कडा बनाउँदै सशस्त्र प्रहरीले अवैध सामानको ओसारपसार, लागूऔषध कारोबार, हातहतियार तस्करी र अन्य आपराधिक गतिविधिविरुद्ध कारबाही तीव्र पारेको छ । प्रधानमन्त्री बालेन्द्र शाह नेतृत्वको सरकार बनेपछि २०८२ चैत १३ देखि २०८३ कात्तिक १२ गतेसम्म सशस्त्र प्रहरीले सीमा क्षेत्रबाट १ अर्ब ३३ करोड २६ लाख रुपैयाँभन्दा बढी मूल्यका अवैध सामान बरामद गरेको छ । यस अवधिमा १७ थान अवैध हतियार बरामद भएका छन् भने आठ जना पक्राउ परेका छन् । त्यस्तै, लागूऔषध कारोबारमा संलग्न ४२१ जना पक्राउ परेका छन् । उनीहरूबाट गाँजा, चरेस, अफिम, खैरो हेरोइन, विभिन्न ट्याब्लेट र इन्जेक्सनलगायत लागूऔषध बरामद गरिएको छ । मानव बेचबिखन तथा ओसारपसारको जोखिममा रहेका १६७ जनाको पनि उद्धार गरिएको छ । उद्धार गरिएकामध्ये ११८ जना बालबालिका छन् । यसमा संलग्न ९१ जनालाई प्रहरीले पक्राउ गरेको छ । सीमा अतिक्रमण रोक्न पनि सशस्त्र प्रहरीले विभिन्न काम गरेको छ । दशगजाका ३५ स्थानमा रहेका २३७ वटा संरचना हटाइएको छ । त्यस्तै, १७ स्थानमा अतिक्रमण गरी खेती गरिएको ७.४४८ बिघा जमिन खाली गराइएको छ । सीमा क्षेत्रका २०४ स्थानमा ९४.५८८ किलोमिटर क्षेत्रमा सरसफाइसमेत गरिएको छ । सीमावासीसँगको सम्बन्ध सुधार र जनचेतना बढाउन यस अवधिमा २ हजार ८०६ वटा कार्यक्रम सञ्चालन गरिएको छ । सशस्त्र प्रहरीले सञ्चालन गरेका १४१ सहायता कक्षबाट ३ लाख ४९ हजार ९०८ जना र १३ वटा पर्यटक सहायता कक्षबाट १० हजार ६५४ जना लाभान्वित भएका छन् ।
ई-जीपी प्रणाली ह्याक गरी ठेक्काका आर्थिक प्रस्ताव हेरफेर गर्ने तीन जना पक्राउ
काठमाडौं । सार्वजनिक खरिद अनुगमन कार्यालयको विद्युतीय खरिद प्रणाली (ई-जीपी) मा अनधिकृत पहुँच पु‍र्याएर ठेक्काका आर्थिक प्रस्तावका कागजात हेरफेर गरेको आरोपमा तीन जना पक्राउ परेका छन् । नेपाल प्रहरीको साइबर ब्युरोले प्राविधिक अनुसन्धान तथा विश्लेषणका क्रममा संलग्नता खुलेका तीन जनालाई पक्राउ गरेको हो । ब्युरोका अनुसार उनीहरूले ठेक्काको आर्थिक प्रस्ताव खोल्नुअघि नै त्यससँग सम्बन्धित कागजात परिवर्तन गरेको पाइएको हो । सार्वजनिक खरिद अनुगमन कार्यालयले सञ्चालन गर्दै आएको ई–जीपी प्रणालीमा अनधिकृत पहुँच पु‍र्याएर विभिन्न ठेक्काका विवरण हेरफेर गरिएको सम्बन्धमा ब्युरोमा उजुरी परेको थियो । उक्त उजुरीमाथि अनुसन्धान गर्दा तीन जनाको संलग्नता खुलेपछि काठमाडौं जिल्ला अदालतबाट पक्राउ अनुमति लिइएको थियो । ब्युरोबाट खटिएको प्रहरी टोलीले उनीहरूलाई आइतबार काठमाडौं उपत्यकाका विभिन्न स्थानबाट पक्राउ गरेको हो । पक्राउ परेका तीनै जनामाथि विद्युतीय कारोबार ऐन, २०६३ अन्तर्गतको कसुरमा अनुसन्धान भइरहेको ब्युरोले जनाएको छ । ब्युरोका अनुसार काठमाडौं जिल्ला अदालतबाट म्याद थप गरी थप अनुसन्धान अघि बढाइएको छ ।
सुदूरपश्चिमलाई चितवनले दियो १३० रनको लक्ष्य
काठमाडौं । नेपाल प्रिमियर लिग (एनपीएल) को तेस्रो सिजनमा चितवन राइनोजले सुदूरपश्चिम रोयल्सविरुद्ध १३० रनको लक्ष्य प्रस्तुत गरेको छ । सोमबार (आज) कीर्तिपुरस्थित त्रिवि क्रिकेट रंगशालामा चितवनले सुदूरपश्चिमविरुद्ध निर्धारित २० ओभरमा ६ विकेट गुमाएर १२९ रनको योगफल खडा गर्यो । चितवनको लागि कप्तान रवि बोपाराले सर्वाधिक ४९ रन बनाए । ४० बलमा तीन चौका र दुई छक्का प्रहार गरेका उनी अर्धशतक प्रहार गर्न एक रनले चुके । पावर प्लेमा ओपनर देव खनाल सात र अर्जुन साउद १५ रन बनाएर पभेलियन फर्किए । डेविड मलानले १७ बलमा एक चौका प्रहार गर्दै १६ रन मात्र जोड्न सके । विवेक यादवले १५ रन बनाए भने शिकन्दर राजाले १५ रन बनाए । सुदूरपश्चिमका निम्ति स्कटले दुई विकेट लिए । त्यसैगरी, हेमन्त धामी र दीपेन्द्र र अनिल खरेलले समान एक विकेट लिए ।
