सरकारले कुलमानलाई हटाएपछि रविले बत्ति निभाएर मैनबत्ति बालेर गरे विरोध
काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले कुलमानलाई बर्खास्त गर्ने सरकारको निर्णयको विरोध गरेका छन् । उनले सोमबार राति फेसबुक लाइभमार्फत् कुनै शब्द नबोली बत्ति बन्द गरेर र मैनबत्ति जलाएर सरकारको निर्णयको विरोध गरेका हुन् । उनले भिडियोमा भनेका छन्, ‘कसलाई राख्ने, कसलाई हटाउने भन्ने अन्तिम निर्णय त जनताले लिन्छन् ।’ सोमबार बसेको मन्त्रिपरिषद् बैठकले नेपाल विद्युत प्राधिकरणका कार्यकारी निर्देशक कुलमान घिसिङलाई बर्खास्त गर्ने निर्णय गरेको थियो ।
राति १० बजे बालेनको स्टाटस : अबको एक हप्तामा कर्मचारीले तलब पाएन भने सबैलाई टुकुचामा गाडिदिन्छु
काठमाडौं । काठमाडौं महानगरपालिकाका मेयर बोलेन्द्र शाह (बालेन)ले काठमाडौं महानगरका सरसफाई कर्मचारीले विगत ३ महिना देखी तलब नपाएको गुनासो गरेका छन् । राति १० बजे फेसबुकमा स्टाटस राख्दै उनले यस्तो धारणा राखेका हुन् । उनले भनेका छन्, ‘काठमाडौं महानगरपालिकाको सरसफाई कर्मचारीले विगत ३ महिनादेखि तलब पाको छैन, सरकारको दम्भले । को-कोले के-के आन्दोलन गर्ने हो, मलाई थाह छैन, अबको एक हप्तामा हाम्रो कर्मचारीले तलब पाएन भने सबैलाई टुकुचामा गाडदिन्छु ! त्योपछि हेरौँला तिमीहरुको के-के तन्त्र हो ।’
कुलमानले भने : सरकारको निर्णयविरुद्द अदालत जान्छु, पहिला हातमा पत्र आओस्
काठमाडौं । नेपाल विद्युत प्राधिकरणका कार्यकारी निर्देशक कुलमानले आफूलाई हटाउने सरकारको निर्णयविरुद्द अदालत जाने बताएका छन् । उनले सरकारले आफूलाई बर्खास्त गर्ने निर्णय गरेको पत्र हात परेपछि अदालत जाने बताएका हुन् । ‘सञ्चारमाध्यमबाट हताएको समाचार पढेको छु, हातमा पत्र आउनेबित्तिकै अदालत जान्छु,’ उनले भने । यसअघि पटक-पटक स्पष्टीकरण सोधेर हटाउने योजना बनाइरहेको सरकारले पाँचौं पटक स्पष्टीकरण सोधेर बर्खास्त गर्ने निर्णय गरेको हो । सरकारले उनको स्पष्टीकरण चित्त नबुझेको भन्दै बर्खास्त गर्ने निर्णय गरेको हो । कार्यकाल सकिनु अगावै बिनाकारण पदबाट बर्खास्त हुनुपरेपछि उनी कानूनी बाटो रोज्ने निर्णयमा पुगेका हुन् ।
राम्रो काम गरिरहेकालाई हटाएर विवादित व्यक्तिलाई नियुक्ति, कस्ता पात्र हुन् हितेन्द्र र नारद ?
काठमाडौं । सरकारले राम्रो काम गरिरहेका नेपाल विद्युत प्राधिकरणका कार्यकारी निर्देशक कुलमानलाई बर्खास्त गरेर विवादित व्यक्तिलाई नियुक्ति दिएको छ । सोमबार बसेको मन्त्रिपरिषद् बैठकल घिसिङलाई बर्खास्त गर्दै उनको ठाउँमा हितेन्द्रदेव शाक्यलाई नियुक्त गर्ने निर्णय गरेको हो । कुलमानले एक कार्यकाल सफलताका साथ सम्पन्न गरेर दोस्रो कार्यकालको अन्तिममा थिए । उनले दोस्रो कार्यकालमा पनि विद्युत प्राधिकरणलाई विद्युत उत्पादन तथा व्यवसायमा अब्बल संस्थानका रुपमा देखाएका छन् । आव २०७२/७३ मा ८ अर्ब ८९ करोड वार्षिक घाटामा रहेको प्राधिकरणलाई कुलमानले नेतृत्व गरेपछि निरन्तर नाफामा लगेका थिए । प्राधिकरणले गत आव २०८०/८१ मा १४ अर्ब ४६ करोड रुपैयाँ नाफा गरेको थियो । चालु आर्थिक वर्ष (आव) २०८१/८२ को पहिलो ६ महिनामा ११ अर्ब ३६ करोड रुपैयाँ नाफा गरिसकेको छ । प्राधिकरणका अनुसार प्राधिकरणले यस अवधिमा विद्युत बिक्री, ब्याज तथा अन्यबाट कुल ७० अर्ब ४४ करोड रुपैयाँ आम्दानी गरेको छ । अहिले नाफाबाट प्राधिकरणले विद्युत् उत्पादन, प्रसारण र वितरणतर्फका पूर्वाधार विस्तार एवम् सुदृढीकरण र विद्युतीकरणतर्फका आयोजनाहरुमा लगानी गरिरहेको छ । यो किसिमको फड्को मारिरहेको प्राधिकरणको नेतृत्वलाई सरकारले प्रतिसोध साँध्दै बर्खास्त गरेको हो । कुलमानलाई हटाएर सरकारले हितेन्द्र शाक्यलाई नियुक्त गरेपछि अहिले सामाजिक सञ्जालमा व्यापक आलोचना भइरहेको छ । शाक्यको प्राधिकरणमा कार्यकारी निर्देशकका रुपमा यो दोस्रो कार्यकाल हो । शाक्यको स्थायी घर इलाम हो । उनी प्रधानमन्त्री केपी शर्मा ओली निकट हुन् । उनी ओलीको श्रीमती राधिका शाक्यको भाइ हुन् । लामो समय उपकार्यकारी निर्देशक भएर काम गरेका उनी पछि प्राधिकरणको कार्यकारी निर्देशक बनेका थिए । तर, सरकारले उनलाई उर्जा मन्त्रालयमा तानेर कुलमानलाई प्राधिकरणको जिम्मेवारी दिएको थियो । उनी सो निर्णयको विरुद्द अदालत पनि पुगेका थिए । उनीमाथि कमजोर व्यवस्थापको रुपमा पनि आलोचना हुने गरेको छ । यस्तै, सोमबार बसेको मन्त्रिपरिषद् बैठकले नेपाल स्टक एक्सचेन्ज (नेप्से) को प्रमुख कार्यकारी अधिकृतमा नारद लुइँटेललाई नियुक्त गरेको छ । उनी पनि विवादित पात्र हुन् । लुइँटेल यस अगाडि तारागाउँ विकास समितिको सदस्य सचिव रहँदा नै विवादित थिए । उनी पनि एमाले निकट मानिन्छन् ।
नेप्सेको सीईओ बने नारद लुइँटेल
काठमाडौं । नेपाल स्टक एक्सचेन्ज (नेप्से) को प्रमुख (सीईओ) मा नारद लुइँटेल नियुक्त भएका छन् । सोमबार साँझ बसेको मन्त्रिपरिषद् बैठकले लुइँटेललाई सीईओमा नियुक्त गरेको हो । उनी तारागाउँ विकास समितिको सदस्य सचिव भइसकेका व्यक्ति हुन् । नेप्सेको सीईओ नियुक्तिको लागि गठित सिफारिस समितिले फागनु १२ गतेदेखि फागुन २५ गतेसम्म आवेदन आह्वान गरेको थियो । नेप्सेको सीईओ बन्न १० जनाले आवेदन दिएका थिए । सीईओ नियुक्तिको लागि गठित सिफारिस समितिले चुडामणि चापागाईं, नारद कुमार लुईंटेल, पूर्णप्रसाद आचार्य, बद्री प्रसाद प्याकुरेल र हेमन्त बस्याललाई छनोट गरेको थियो । छनोट भएका उम्मेदवारहरूलाई व्यावसायिक कार्य योजनाको प्रस्तुतीकरण तथा अन्तवार्ताका लागि चैत ६ गते अर्थमन्त्रालयमा बोलाएको थियो । व्यावसायिक कार्य योजनाको मूल्याङ्कन प्रस्तुतीकरण तथा अन्तवार्ताको आधारमा उच्चतम अंक प्राप्त गर्ने ३ जनालाई सीईओका लागि सिफारिस गरेको थियो ।
कुलमानलाई हटाएर प्राधिकरणको प्रबन्ध निर्देशकमा हितेन्द्र शाक्य नियुक्त
काठमाडौं । नेपाल विद्युत प्राधिकरणको प्रबन्ध निर्देशकमा हितेन्द्र देब शाक्य नियुक्त भएका छन् । सोमबार बसेको मन्त्रीपरिषदको बैठकले शाक्यलाई नियुक्त गर्ने निर्णय गरेको हो । साथै, आजै बसेको मन्त्रिपरिषद् बैठकले कार्यकारी निर्देशक कुलमान घिसिङलाई बर्खास्त गर्ने निर्णय गरेको थियो ।
सरकारले कुलमानलाई गर्यो बर्खास्त
काठमाडौं । सरकारले नेपाल विद्युत प्राधिकरणका प्रबन्ध निर्देशक कुलमान घिसिङलाई बर्खास्त गरेको छ । सोमबार बसेको मन्त्रीपरिषदको बैठकले घिसिङलाइ बर्खास्त गर्ने निर्णय गरेको हो । यसअघि सरकारले उनलाई ५ पटक स्पष्टीकरण सोधेको थियो । उनको स्पष्टीकरण चित्त नबुझेपछि हटाएको हो ।
धितोपत्र बोर्डले बढायो मर्चेन्ट बैंकरको अण्डरराइटिङ सीमा
काठमाडौं । नेपाल धितोपत्र बोर्ड (सेबोन)ले धितोपत्र व्यावसायी (मर्चेन्ट बैंकर)हरूको धितोपत्र प्रत्याभूति (अण्डरराइटिङ)को सीमा बढाएको छ । बोर्डले धितोपत्र व्यवसायी नियमावली, २०६४ को अुनसूचीमा भएका व्यवस्थालाई संशोधन गर्दै अण्डरराइटिङको सीमा बढाएको हो । मर्चेन्ट बैंकरहरूले संगठित संस्थासँग सम्झौता गरी संगठित संस्थाले निष्काशन गरेको धितोपत्रहरु बिक्री नभएको अवस्थामा त्यस्तो धितोपत्रहरु स्वीकार गरी धितोपत्रको मूल्य भुक्तानी गर्ने लगायत प्रत्याभूति सम्बन्धी अन्य कार्य गर्न पाउँछन् । बैंक तथा वित्तीय संस्था वा बीमा कम्पनीको सहायक कम्पनी र त्यस्तो कम्पनीको मुख्य कम्पनीबीच मुख्य कम्पनीले दायित्व सकार्ने गरी करार सम्झौता भए मुख्य कम्पनीको पछिल्लो लेखापरीक्षण भएको वित्तीय विवरण बमोजिमको नेटवर्थमा नबढ्ने गरी मर्चेन्ट बैंकरले प्रत्याभूति गर्न सक्ने संशोधित नियमावलीमा उल्लेख गरिएको छ । बोर्डका अनुसार बैंकको सहायक कम्पनीको रूपमा स्थापना भएका मर्चेन्ट बैंकर कम्पनीहरूले माउ कम्पनीको नेटवर्थसम्मको अन्डरराइटिङ गर्ने सक्नेछन् । हाल मर्चेन्ट बैंकरले आफ्नो नेटवर्थको ३ गुणासम्म मात्रै अन्डरराइटिङ गर्नसक्ने व्यवस्था रहेकोमा अब मुख्य कम्पनीको पनि नेटवर्थसम्म अन्डरराइटिङ गर्न पाउनेछन् ।
