विनोद चौधरीलाई कोरोना लागेपछि भिभान्ता होटलमा त्रास, कर्मचारीको काेराेना परीक्षणमा लापरवाही
काठमाडौं । गएको शुक्रबार उद्योगी विनोद चौधरीले आफू कोरोना संक्रमित भएको भन्दै ट्वीट गरे । चौधरी आफ्नो ट्विटरमा लेख्छन् , ‘प्रिय साथीभाई तथा शुभचिन्तकहरु, आज बिहान मेरो कोरोना परीक्षणको नतिजा पोजेटिभ आएको छ । भगवानकाे कृपाले मलाई अहिलेसम्म कुनै पनि प्रकारको लक्षण देखिएको छैन । यद्यपी म डाक्टरको सल्लाह अनुसार आईसोलेसनमा बसेको छु । मसँग सम्पर्कमा आउनुहुने सबैजना आवश्यक सुरक्षा विधि अपनाउनु होला ।’ दिउँसोको १२ बजेर ५७ मिनेटमा गरिएको उनको ट्वीट धेरै सञ्चार माध्यमका समाचार बन्यो । सामाजिक सञ्जालमा पनि खुब चर्चा भयो । तर चौधरीले यसो भन्दै गर्दा झम्सिखेलस्थित भिभान्ता होटलमा ठूलो त्रास फैलियो । किनभने चौधरी आफै पनि होटलका संचालक रहेका कारण उनी होटलमा बारम्बार आईरहने गरेको होटलका कर्मचारीहरुले बताए । म्यानेजरको पिसिआर, सामान्य कर्मचारीको आरडिटी चौधरीमा संक्रमण पुष्टि भईसकेपछि होटलले आफ्ना कर्मचारीहरुको पनि परीक्षण गराउने निधो गर्यो । तर होटलले सबै कर्मचारीहरुको पिसिआर परीक्षण गराउनु पर्नेमा एन्टिबडिमा आधारित आरडिटी परीक्षण गराएर घर पठाइदिएको छ । होटलमा खटेका करिब ३५ जना कर्मचारीहरु मध्ये विभिन्न डिपार्टमेन्टका म्यानेजरहरुको पिसिआर र बाँकी सबैको आरडिटी परीक्षण गराइदिएको होटलका एक कर्मचारीले बताए । म्यानेजरहरुको सानेपास्थित स्टार अस्पतालमा पिसिआर परीक्षण गरिएको र अन्य कर्मचारीको पुल्चोकस्थित निदान अस्पतालमा आरडिटी परीक्षण गरिएको स्रोतले बतायो । सरकारले केही महिना अघि मात्र आरडिटी परीक्षणको नतिजा विश्वासिलो नभएको भन्दै एन्टिबडिमा आधारित आरडिटी परीक्षणलाई बन्द गराइसकेको छ । स्वास्थ्य तथा जनसंख्या मन्त्रालयको सहप्रवक्ताको डा समिरकुमार अधिकारीले एन्टिबडिमा आधारित आरडिटी परीक्षण अब अनुसन्धानको लागि बाहेको कोरोना पुष्टि गराउनको लागि प्रयोग नहुने बताए । उनको अनुसार सरकारले एन्टिजेन्टमा आधारित आरडिटी परीक्षणलाई मात्र परीक्षण गर्न पाउने गाईडलाइन्समा राखेको छ । उनी भन्छन, ‘यदि कसैले पनि एन्टिबडि आरडिटी गराइरहेको पाईएमा नियम अनुसार कारवाही हुनेछ ।’ हाल सरकारले आवश्यक बाहेक सबै सेवाहरु बन्द गर्नु भनिरहेको अवस्थामा होटलले आफ्नो सेवा भने कहिले पनि बन्द नगरेको सोही कर्मचारीले बताए । उनको अनुसार निशेधाज्ञको समयमा पनि धेरै मानिसहरु होटलमा आउने गरेका छन् ।
वर्षदिनमा पर्यटन मन्त्रालयको प्रगति कति ?
काठमाडाैं । संस्कृति, पर्यटन तथा नागरिक उड्डयन मन्त्रालयले कोभिड–१९ महामारीका बीच पनि अघिल्लो आर्थिक वर्षमा सकारात्मक प्रगति हासिल गरेको छ । आर्थिक वर्ष २०७६/०७७ मा समग्रतामा ६० प्रतिशत प्रगति हासिल गरेको मन्त्रालयले मङ्गलबार सार्वजनिक गरेको वार्षिक प्रगति पुस्तिकामा उल्लेख छ । मन्त्रालयले आव २०७६/०७७ संस्कृति, पर्यटन र नागरिक उड्डयनका क्षेत्रमा केही महत्वपूर्ण कार्य गरेको छ । नीतिगत सुधार र सुशासन प्रवद्र्धनमा गहन कार्य भएका छन् । अन्तरनिकाय संस्कृति संरक्षण तथा प्रवद्र्धन, पर्यटकीय पूर्वाधार निर्माण, सम्पदा पुर्ननिर्माणको काम भएको छ । भर्चुअल बैठकमार्फत वार्षिक प्रगति पुस्तिका सार्वजनिक गर्दै पर्यटनमन्त्री योगेश भट्टराईले सबैभन्दा बढी पूँजीगत खर्च तथा वित्तीय र भौतिक प्रगति हुनुपर्ने समयमा प्रतिकूल परिस्थिति सिर्जना भएकाले अपेक्षित प्रगति हुन नसकेको बताए । “कोभिड–१९ महामारीका कारण पुस/माघ महिनादेखि असार/साउन महिनासम्म धेरै काम हुन पाएन, त्यसैले मन्त्रालयको वार्षिक प्रगति विवरणमा यो वर्ष मन्त्रालयको पूँजीगत खर्च ६४ प्रतिशत र वित्तीय खर्च ५४ प्रतिशत गरी समग्रमा झण्डै ६० प्रतिशत मात्र प्रगति भएको छ । चालु खर्चमा ८० प्रतिशत प्रगति भएको छ”, मन्त्री भट्टराईले भने । मन्त्रालयले नीतिगततर्फ हवाई सेवा प्राधिकरण विधेयक, २०७७ र नेपाल नागरिक उड्डयन प्राधिकरण विधेयक, २०७७ सङ्घीय संसद्मा पेश भई छलफलको क्रममा रहेको छ । हवाई नीतिको मस्यौदा बनेको छ । मन्त्रालयको आव २०७५/०७६ मा कूल बजेट रु ३३ अर्ब १३ करोड ३७ लाख रहेको थियो । आव २०७६/०७७ मा रु २१ अर्ब २१ करोड ६९ लाख कूल बजेट रहेको छ । आव २०७५/०७६ मा ८१ प्रतिशत रहेको औसत खर्च २०७६/०७७ भने ४९ प्रतिशत मात्र रहेको मन्त्रालयको वार्षिक प्रतिवेदनमा उल्लेख छ । वित्तीय व्यवस्थापनतर्फ दोस्रो अन्तर्राष्ट्रिय विमानस्थलमा ठूलो रकम विनियोजन भई खर्च हुन नसक्नु तथा गौतमबुद्ध अन्तर्राष्ट्रिय विमानस्थलको रकम भुत्तानी हुन नसक्नुले वित्तीय व्यवस्थातर्फ कम खर्च हुन गई समग्र बजेट खर्च घटेको हो । यसका साथै कोभिड–१९ महामारीका कारण खर्च प्रभावित हुन पुगेको मन्त्रालयले जनाएको छ । राष्ट्रिय गौरवका आयोजनाको उल्लेख्य प्रगति मन्त्रालय र मातहत निकायको मुख्य काम र खर्च हुने समयमा कोरोनाको प्रभावले नेपालको पर्यटन क्षेत्रलाई नराम्ररी असर पार्यो । त्यसको प्रत्यक्ष असर मन्त्रालयको वार्षिक योजना कार्यक्रम कार्यान्वयनमा देखियो । तथापि महामारीकै बीच मन्त्रालय मातहतका राष्ट्रिय गौरवको आयोजनामा उल्लेख्य प्रगति देखिएको छ । पशुपति क्षेत्र विकास कोषको ७० प्रतिशत, लुम्बिनी विकास कोषको ९५ प्रतिशत, भैरहवामा निर्माणाधीन गौतमबुद्ध विमानस्थलको ८५ प्रतिशत र पोखरा क्षेत्रीय अन्तर्राष्ट्रिय विमानस्थलको ६१ प्रतिशत प्रगति भएको छ । यीमध्ये पोखरा र गौतमबुद्ध विमानस्थल आयोजनाको काम महामारीका बीच निरन्तर भए । भैरहवा विमानस्थल सन्निकट सञ्चालनको तयारीमा छ । पर्यटनमन्त्री भट्टराईका अनुसार बत्ती जडान तथा केही उपकरण जडानको काम मात्रै बाँकी छ । अबको तीन देखि छ महिनाभित्र विमानस्थल व्यावसायिक सञ्चालनमा आउनेछ । विदेशी प्राविधिक चाहिने भएकाले केही महिना काममा विलम्ब भएको जनाइएको छ । भूकम्पछिको पुनःनिर्माणमा तीव्रता भूकम्पबाट क्षतिग्रस्त सम्पदाको पुनःनिर्माणमा सकारात्मक प्रगति भएको छ । हालसम्म ४५३ सम्पदाको पुनःनिर्माण कार्य सकिएको छ । सुन्धारास्थित निर्माणाधीन २२ तले धरहराको काम तीव्र गतिमा भइरहेको छ । हालसम्म ११ तला बनिसकेको छ । रानीपोखरी निर्माणको काम पनि अन्तिम चरणमा पुगेको पर्यटनमन्त्री भट्टराईले जानकारी दिए । पुरातात्विक स्थल संरक्षण सातवटै प्रदेशमा अघि बढाइएको छ । ग्रेट हिमालयन ट्रेलको ७७ किलोमिटर निर्माण सकिएको छ । एक सय २७ किलोमिटरको विस्तृत आयोजना प्रतिवेदन तयार भएको छ । मन्त्रालयद्वारा घोषित स्थापित तथा नयाँ विभिन्न १९२ गन्तव्यमध्ये १२२ को सतप्रतिशत र ७० गन्तव्यको ५० प्रतिशत पर्यटकीय पूर्वाधारको काम सम्पन्न भएको छ । बहुप्रतीक्षित निजगढ दोस्रो अन्तर्राष्ट्रिय विमानस्थल निर्माणका लागि अहिले विमानस्थल निर्माण क्षेत्रमा पर्ने १९ हेक्टर क्षेत्रफलमा पर्ने रुख कटानका लागि हालसम्म ६० हजार रुख गणना भइसकेको छ । निगमको सम्पत्ति ५४ अर्ब १७ करोड राष्ट्रिय ध्वजाबाहक नेपाल वायु सेवा निगम (नेपाल एयरलाइन्स) को कूल सम्पत्ति रु ५४ अर्ब १७ करोड रहेको छ । त्यस्तै रु ४५ अर्ब ९४ करोड ऋण रहेको छ । निगमको खुद सम्पत्ति रु आठ अर्ब २३ करोड रहेको छ । यस बीचमा निगमले महत्वपूर्ण गन्तव्य जापानको नारितामा सिधा उडान शुरु गरेको छ । कोभिड–१९ महामारी अन्त्यपछि निगमले साउदी अरेबियाको रियाद, दक्षिण कोरियाको सिओल र चीनको ग्वाङ्जाओ उडान गर्ने तयारी गरेको छ । निगममा रहेका चिनियाँ जहाजको व्यवस्थापनका लागि अर्थ मन्त्रालयमा राय मागिएको पर्यटनमन्त्री भट्टराईले बताए । आन्तरिक उडानमा निगमको बलियो उपस्थिति चाहिने भएकाले आन्तरिक र अन्तर्राष्ट्रिय उडानमा जहाज थप्ने कार्य पनि अघि बढेको उनले जानकारी दिए ।
वायुसेवा निगमको सम्पत्ति ५४ अर्ब १६ करोड, ऋण ४५ अर्ब ९३ करोड
काठमाडौं । नेपाल वायुसेवा निगमको सम्पत्ति ५४ अर्ब १६ करोड ८६ लाख रुपैयाँ भएको बताएको छ । संस्कृति पर्यटन तथा नागरिक उडड्यन मन्त्री योगेश भट्टराईले निगमको कुल सम्पत्तिको मूलयाकैन गर्दा सो रकम बराबरको सम्पत्ति भएको बताएका छन् । संस्कृति पर्यटन तथा नागरिक उडड्यन मन्त्रालयले गत आर्थिक वर्ष २०७६/०७७ मा गरेको प्रगतिका बारेमा गरेको कार्यक्रममा उनले सो कुरा बताएका हुन् । उनले निगमको ३९ अर्ब ८० करोड ९६ लाख ऋण भएको बताए ।
