हिमपातका कारण दुई विदेशीसहित १० पर्यटक मेरापिक क्षेत्रमा फसे
हिमालपारिको जिल्ला मुस्ताङको घरपझोङ गाउँपालिका–३ स्याङ गाउँबाट निलगिरि हिमाल हेर्न मोटरसाइकलमा पुगेका पर्यटक सोलुखुम्बु । निरन्तरको वर्षातसँगै जिल्लाको उच्च हिमाली क्षेत्रमा हिमपात हुँदा दुई विदेशीसहित १० जना पर्यटक मेरापिक क्षेत्रमा फसेका छन् । जिल्लाको महाकुलुङ गाउँपालिकामा पर्ने मेरापिक आरोहण गरेर फर्कने क्रममा मङ्गलबार दिउँसोदेखि उनीहरु हिउँमा फसेको प्रहरीले जनाएको छ । जिल्ला प्रहरी कार्यालय सोलुखुम्बुका प्रहरी प्रमुख कबित कटवालका अनुसार निरन्तर परेको पानी तथा हिमपातका कारण पाँच हजार ७०० मिटरको मेराला ओडारमा चार, हाइक्याम्पमा चार र पाँच हजार ३०० मिटरको बेसक्याम्पमा दुईजना आरोही फसेका हुन् । प्राप्त जानकारीअनुसार मेरालामा फसेका चारमध्ये एक बेलायती नागरिक स्टु सियनसहित सोलुखुम्बुका आरोही गाइडहरु पासाङ छिरिङ, छेतेन शेर्पा र पासाङ शेर्पा रहेका छन् । त्यस्तै, हाइक्याम्पमा एक विदेशी पर्यटक, पूर्ण थापा मगरसहित नाम नखुलेका दुई र बेस क्याम्पमा नाम नखुलेका थप दुईजना अलपत्र परेका हुन् । उनीहरु एडभेन्चर भिक्टोरी र मकालु एडभेन्चरमार्फत मेरापिक आरोहणमा गएका थिए । मौसम प्रतिकूलका बीच पनि उनीहरुको उद्धारका लागि महाकुलुङको खारेबाट सातजना क्लाइम्बिङ गाइड मेराला ओडारमा पुगेका छन् । एडभेन्चर भिक्टोरी सञ्चालक लक्ष्मण मिसन कार्कीका अनुसार मेराला ओडारमा चारजना बसेको भए पनि उद्धारमा पुगेकाहरुले तीनजनालाई जटिल अवस्थामा भेटेको बताए । हाइक्याम्प र बेसक्याम्पमा रहेकासँग सञ्चित खानेकुरा भए पनि मेराला ओडारमा फसेकाहरुसँग कुनै पनि खानेकुरा नहुँदा समस्या भएको उनको भनाइ छ । “मेराला ओडारमा भेटिएका तीनजनाको अवस्था जटिल छ भन्ने खबर आयो”, उनले भने, “हिजोदेखि हेलिकप्टर तयारी अवस्थामा राखेर बसियो तर मौसम प्रतिकूल हुँदा समस्या भयो, अहिले पनि म नागरिक उड्डयन प्राधिकरणको कार्यालय काठमाडौँमै छु ।” मौसम अनुकूल हुनसाथ उद्धारका लागि हेलिकप्टर पठाइने बताइएको छ । रासस
उद्धारमा निजी हेलिकप्टर प्रयोग गर्ने तयारी
काठमाडौं । सरकारले तीन दिनको अविरल वर्षापछि आएको बाढीपहिरो र डुबानमा परेकाको खोज तथा उद्धारमा निजी हेलिकप्टर पनि प्रयोग गर्ने तयारी गरेको छ । अहिलेसम्म नेपाली सेनाको हेलिकप्टरले मात्रै उद्धार गरिरहेकामा अपुग हुने देखिएपछि निजी कम्पनीका हेलिकप्टर पनि प्रयोग गर्न लागिएको हो । मुलुकभर नै निरन्तरको वर्षातपछि आएको बाढी र पहिरो तथा भएको डुबानमा परेकाहरूको खोज तथा उद्धार कार्यका लागि निजी हेलिकप्टर पनि ‘स्ट्यान्डबाई’ राख्न लागिएको हो । गृह मन्त्रालयमा आज बिहान गृहमन्त्री बालकृष्ण खाँणको पहलमा गृहसचिव टेकनारायण पाण्डे, संस्कृति पर्यटन तथा नागरिक उड्डयन मन्त्रालयका सचिव यादवप्रसाद कोइराला, पर्यटन मन्त्रालयका वायुसेवा हेर्ने सहसचिव बुद्धिसागर लामिछाने, निजी वायु सेवा कम्पनीहरूको एसोसिएसनका कार्यकारी निर्देशक कमलेशकुमार वर्मा र गृह मन्त्रालयको शान्तिसुरक्षा महाशाखाका उपसचिव दिलकुमार तामाङसहितको बैठक बसेको थियो । बैठकमा वर्षात निरन्तर भइरहेको र सेनाको हेलिकप्टरले मात्रै विपद्मा परेकाको खोज तथा उद्धारमा कठिन देखिएपछि निजी हेलिकप्टर प्रयोग गर्ने विषयमा छलफल भएको थियो । निजी वायुसेवा कम्पनीको एसोसिएसनका कार्यकारी निर्देशक वर्माले विपद्मा परेकाहरूको खोज तथा उद्धार गर्ने दायित्व आफूहरूको पनि भएको भन्दै सरकारले खोजेमा आफूहरु सेवा दिन तयार रहेको बताएका थिए । उनले बैठकमा निजी वायु सेवा कम्पनीसँग ३५ हेलिकप्टर रहेको समेत जनाएका थिए । त्यसपछि बैठकमा ती हेलिकप्टर कहाँ छन् भन्ने लोकेसन एसोसिएसनले गृह मन्त्रालयलाई उपलब्ध गराउने र गृहले आवश्यकताअनुसार खटाउने भएको छ । त्यसको समन्वय गृह मन्त्रालयको शान्तिसुरक्षा महाशाखाले गर्ने छ । निजी हेलिकप्टर प्रयोग भएबापतको भुक्तानी गृह मन्त्रालयले दिनेछ । बैठकमा गृहमन्त्री खाँणले राष्ट्रिय विपद्को सामना गर्दै नागरिकको जीवन रक्षा गर्न सरकार प्रतिबद्ध रहेको बताएका थिए ।
लयमा फर्कदै उडान, एक महिनामा ५ लाख बढी हवाई यात्रु
काठमाडौं । सेप्टेम्बर महिनामा अन्तर्राष्ट्रिय उडानतर्फ करिब डेढ लाख यात्रुले हवाई यात्रा गरेका छन् । त्रिभुवन अन्तर्राष्ट्रिय विमानस्थल कार्यालयको तथ्यांक अनुसार सेप्टेम्बर महिनामा आन्तरिक तथा अन्तर्राष्ट्रिय उडान मार्फत ५ लाख ३० हजार बढी यात्रुले उडान गरेका छन् । त्रिभुवन अन्तर्राष्ट्रिय विमानस्थल कार्यालयका अनुसार एक महिनामा अन्तर्राष्ट्रिय उडान तर्फ १ लाख ४२ हजार ८९५ जना र आन्तरिक उडान तर्फ ३ लाख ८७ हजार ५ सय ७९ यात्रुले सेवा लिएका हुन् । जसमध्ये अन्तर्राष्ट्रिय तर्फ ५४८ वटा उडान तथा ५४५ अवतरण गरी १ हजार ९३ उडान मार्फत १ लाख ४२ हजार ८९५ जनाले यात्रा गरेका हुन । जसमा ६५ हजार १०९ जना नेपाल भित्रिएका छन् भने ७७ हजार ७८५ जना नेपाल छाडेर अन्य देश पुगेका छन् । कोरोना महामारीका कारण लामो समयसम्म बन्द भएको एयरलाइन्स तथा मुलुकमा जारी निषेधाज्ञाका कारण विगतको तुलनामा कम संख्या यात्रुले यात्रा गरेका हुन् । यात्रु बोक्ने पहिलो बन्यो कतार एयरलाइन्स विमानस्थल कार्यालयको तथ्यांक अनुसार सेप्टेम्बर महिनामा सबैभन्दा बढी कतार एयरलाइन्सले यात्रु ओसारपसार गरेको छ । कतार एयरलाइन्सले एक महिनामा यात्रा गर्ने कुल यात्रुमध्ये २३.८ प्रतिशत अर्थात् ३४ हजार ४३ जना यात्रुलाई सेवा दिएको छ भने दोस्रो नम्बरमा रहेको हिमालयन एयरलाइन्सले १८.८ प्रतिशत अर्थात् २६ हजार ८१० जना यात्रुलाई सेवा दिएको छ । तेस्रो नम्बरमा रहेको नेपाल एयरलाइन्सले १८ प्रतिशत अर्थात् २५ हजार ७८८ जना र एयर अरेबियाले ८.९ प्रतिशत अर्थात् १२ हजार ६९३ जना यात्रु ओसारपसार गरेको छ । आन्तरिक तर्फ ३ लाख ८७ हजार अन्तर्राष्ट्रिय उडानको तुलनामा आन्तरिक उडान झन्डै दोब्बर भएको छ । कार्यालयको तथ्यांक अनुसार एक महिनाको अबधिमा ३ लाख ८७ हजार ५ सय ७९ यात्रुले सेवा लिएका छन् । जसमध्येमा काठमाडौंबाट बाहिरिने १ लाख ९४ हजार ९ सय ५२ यात्रु रहेकोमा भित्रिनेको संख्या १ लाख ९२ हजार ६ सय २२ रहेका छन् । आन्तरिक तर्फ एकछत्र सेवा दिदैं आएको बुद्ध एयरले मात्रै २ लाख २० हजार ८ सय ९६ यात्रुलाई सेवा दिएको छ । दोस्रोमा यति एयरलाइन्सले ८४ हजार २ सय ७५, तेस्रोमा श्री एयरलाइन्सले ५९ हजार ९ सय ९ यात्रुलाई सेवा दिएको छ । यस्तैगरी, गुण एयरलाइन्सले १ हजार २ सय १३, तारा एयरलाइन्सले १ हजार ५ सय १६ यात्रुलाई सेवा दिएको छ ।
