टिकट र पासपोर्ट विनै विमानमा युवा भेटिएको विषयमा गृहले छानबिन गर्ने
काठमाडौं । त्रिभुवन अन्तर्राष्ट्रिय विमानस्थलभित्र टिकट र पासपोर्ट विनाको युवा भेटिएको विषयमा गृह मन्त्रालयले छानविन गर्ने भएको छ । फागुन ९ गते त्रिभुवन अन्तर्राष्ट्रिय विमानस्थलबाट कतारको दोहा उड्न लागेको नेपाल वायुसेवा निगमको विमानमा पासपोर्ट, भिसा विनै एक व्यक्ति पुगेको भेटिएको थियो । सो घटनाले विमानस्थल सुरक्षाको दृष्टिले अति नै संवेदनशील विषय भएको भन्दै मन्त्रालयले छानविन गर्न समिति गठन गरेको हो । मन्त्रालयले अध्यागमन विभागका महानिर्देशकको नारायणप्रसाद भट्टराईको संयोजकत्ववमा ९ सदस्यीय छानविन समिति गठन गरेकोे हो । सो समितिलाई विमानस्थलको सुरक्षा अवस्था, विभिनन निकायको कार्यविभाजन, कमजोरी र सुधारका उपायहरु सम्बन्धमा कार्य आरम्भ गरेको मितिले ७ दिनभित्र प्रतिवेदन पेश गर्ने समय दिईएको छ । यसअघि बिहीबार नेपाल एयरलाइन्सले विमानस्थल सुरक्षा कमान्डर ध्रुवराज थापालाई निलम्बन गरेको छ । विमानस्थलको फलामे तालबार नाघेर दोहा उड्ने तयारीमा रहेको वाइडबडी जहाजमा रौतहटका असरफ आलम नामका एक व्यक्ति चढेका थिए ।
निर्मल पुर्जा नेपालको पर्यटनका लागि विश्व सद्भावना दूत नियुक्त
काठमाडाैं । संस्कृति, पर्यटन तथा नागरिक उडड्यन मन्त्रालयले हिमाल आरोही निर्मल पुर्जालाई नेपालको पर्यटनका लागि विश्व सद्भावना दूत नियुक्त गरेको छ । बिहीवार मन्त्रालयमा एक कार्यक्रमको आयोजना गरी संस्कृति, पर्यटन तथा नागरिक उडड्यन मन्त्री प्रेमबहादुर आलेले पुर्जालाई विश्व सद्भावना दूत नियुक्त गरेको घोषणा गरेका हुन् । कार्यक्रममा पुर्जालाई नेपाललाई विश्व सामु चिनाउनका लागि महत्वपूर्ण योगदान दिएको भन्दै सम्मान पनि गरिएको थियो । मन्त्री आलेले पुर्जालाई नेपालको पर्यटनका लागि सद्भावना दूत घोषणा गर्न पाउनु आफ्नो कार्यकालको सबैभन्दा खुशीको क्षण भएको बताए । उनले आरोही पुर्जाको साहसको सम्मान गर्दै आगामी दिनमा आफ्नै रेकर्डलाई ब्रेक गर्नेगरी अगाडी बढ्न शुभकामना दिए । कार्यक्रममा बोल्दै हिमाल आरोही निर्मल पुर्जाले मन्त्रालयले गरेको सम्मानले आफ्नो जिम्मेवारी थपिएको महशुस गरेको बताए । आगामी दिनमा पनि देशलाई विश्माझ चिनाउनका लागि आफुले योगदान गर्न चाहेको उनले उल्लेख गरे । पुर्जाले सर्वोच्च शिखर सगरमाथासहित ८ हजार मिटरभन्दा अग्ला विश्वका १४ वटै हिमालहरु आरोहण गरी विश्व किर्तिमान कायम राखेका छन् । उनकाे १४ पिक्स नथिङ इज इम्पोसिबल डकुमेन्ट्रीले विश्वभर चर्चा कमाएको छ ।
पोखराकेन्द्रीत उडान गर्न बुद्धले थप्यो नयाँ जहाज, थप ३ जहाज आउँदै
काठमाडौं । निजी क्षेत्रको लगानीमा सञ्चालित बुद्ध एयरले नयाँ जहाज थप गरेको छ । पोखरालाई हब बनाएर देशका विभिन्न गन्तव्यमा सिधा उडान गर्नका लागि बुद्धले नयाँ जहाज थप गरेको हो । ७२ सिट क्षमताको एटीआर जहाज बुधबार साँझ त्रिभुवन अन्तर्राष्ट्रिय विमानस्थलमा अवतरण गरेको हो । नयाँ जहाज थप भएसँगै बुद्धसँग १६ वटा जहाज भएको छ । जसअनुसार ११ वटा एटीआर–७२, ३ वटा एटीआर–४२ र २ वटा बिचएयरक्राफ्ट जहाज रहेका छन् । ठूला जहाजबाट उडान भर्दा सञ्चालन खर्च कम हुने र हवाईभाडादर पनि स्वतः सस्तो र सहज हुने बुद्धले जनाएको छ । यस्तै, बुद्धले गत जनवरीदेखि नै अन्तरर्राष्ट्रिय यात्रुतर्फको ‘डलर’ हवाई भाडादर ८० प्रतिशतले घटाएको छ । नेपालमै ६ महिना अवधि बसाई गरेका अन्तर्राष्ट्रिय नागरिकहरुको हकमा यसअघि ७५ प्रतिशतले बढी रहेको भाडादर पनि घटाएको छ । सस्तिएको भाडादरले पर्यटक भित्र्याउन ठूलो मद्दत गर्ने बुद्ध एयरले विज्ञिप्ति मार्फत जनाएको छ । यसबाट पर्यटन क्षेत्रलाई पनि ठूलो टेवा पुग्नेछ । बुद्ध एयरका बजार निर्देशक रुपेश जोशीले थप ३ वटा जहाज केही महिनामै भित्र्याउने तयारी भएको जनाए । उनका अनुसार बुद्धले पछिल्लोे समय पोखराबाट देशका विभिन्न गन्तव्यसँग सिधा उडान गर्दै आएको छ ।
