१९ सय रुपैयाँले घट्यो सुनको मूल्य
काठमाडौं । सुनको मूल्यको ओरालो यात्रा कायमै रहेको छ । नेपाली बजारमा मंगलबार (आज) सुनको मूल्य तोलामा १ हजार ९०० रुपैयाँले घटेको नेपाल सुनचाँदी व्यवसायी महासंघले जनाएको छ । आज सुन प्रतितोला २ लाख ६७ हजार २०० रुपैयाँमा कारोबार भइरहेको हो । हिजो सुन मूल्य तोलामा २ लाख ६९ हजार १०० रुपैयाँमा कारोबार भएको थियो । त्यस्तै, आज चाँदीको मूल्य पनि घटेको छ । तोलामा ३० रुपैयाँले घटी ३ हजार ४९० रुपैयाँमा कारोबार भइरहेको हो । सुन एक वर्षयताकै सस्तो, मूल्य घट्ने क्रम जारी
भाटभटेनीको टंगाल शाखा मंगलबारदेखि २४ सै घण्टा खुला
काठमाडौं । भाटभटेनी सुपरस्टोरको टंगाल शाखा आजदेखि २४ सै घण्टा सञ्चालनमा आएको छ । ग्राहकलाई रातिको समयमा समेत सहज रूपमा किनमेल गर्ने सुविधा उपलब्ध गराउने उद्देश्यले टंगाल शाखालाई २४ सै घण्टा खुला गरिएको भाटभटेनीका प्रमुख सञ्चालन अधिकृत (सीओओ) पानु पौडेलले जानकारी दिए । भाटभटेनीले यसअघि भक्तपुरको राधेराधे शाखाबाट चौबिसै घण्टे सेवा सुरु गरेको थियो । टंगालपछि ललितपुरको पाटन शाखालाई पनि २४ सै घण्टा सञ्चालनमा ल्याउने तयारी भइरहेको पौडेलले विकासन्युजसँग बताए । ४२ वर्षअघि काठमाडौंको टंगालबाट सुरु गरेको भाटभटेनी सुपरस्टोर अहिले देशभर विस्तार भइरहेको उनको भनाइ छ । हाल कम्पनीका २७ वटा स्टोर सञ्चालनमा छन् । कम्पनीले वार्षिक करिब ३२ अर्ब रुपैयाँ आम्दानी गर्दै आएको छ भने देशभरका स्टोरमा २२ हजारभन्दा बढीले प्रत्यक्ष रोजगारी पाएका छन् । जेनजी आन्दोलनका क्रममा ठूलो क्षति व्यहोरेको भाटभटेनीले त्यसपछि पनि आफ्नो व्यवसाय विस्तार र पुनर्निर्माणलाई निरन्तरता दिएको छ । २०८२ भदौ २३ र २४ गतेको आन्दोलनका क्रममा भाटभटेनीका १२ वटा स्टोरमा आगजनी, लुटपाट र तोडफोड भएको थियो । कम्पनीका अनुसार मेसिनरी तथा स्टकमा रहेका सामानसहित कुल १० अर्ब ८६ करोड रुपैयाँ बराबरको भौतिक क्षति भएको थियो । उक्त क्षतिको शोधभर्नाका लागि कम्पनीले बीमा कम्पनीहरूसँग करिब ८ अर्ब रुपैयाँ बराबरको दाबी गरेको छ । उक्त दाबी अहिले प्रक्रियामै रहेको कम्पनीले जनाएको छ । ठूलो क्षति भए पनि कम्पनीले कुनै कर्मचारीलाई रोजगारीबाट नहटाएको जनाएको छ । घटनाका क्रममा कुनै पनि कर्मचारीको मानवीय क्षति नभएको र घाइतेसमेत नभएको कम्पनीको भनाइ छ । प्रभावित स्टोरका कर्मचारीलाई अन्य शाखामा स्थानान्तरण गरी व्यवस्थापन गरिएको थियो । आन्दोलनका क्रममा पूर्ण रूपमा क्षतिग्रस्त भएको टंगाल शाखाको पुनर्निर्माण तथा मर्मत सम्पन्न गरी गत असोज ५ गतेदेखि पुनः सञ्चालनमा ल्याइएको थियो । अहिले त्यही शाखालाई चौबिसै घण्टा सञ्चालनमा ल्याइएको हो । भाटभटेनीले अब देशका ७७ वटै जिल्लामा आफ्नो सेवा विस्तार गर्ने लक्ष्य अघि सारेको छ । पहिलो चरणमा स्टोरको संख्या ५० पु¥याउने र ५० हजार नेपालीलाई प्रत्यक्ष रोजगारी दिने कम्पनीको योजना रहेको पौडेलले बताए । ‘विगतको घटनालाई हामीले गुनासोका रूपमा लिएका छैनौं,’ पौडेलले भने, ‘हामीले त्यसलाई एउटा पाठ र अझ बलियो हुने अवसरका रूपमा लिएका छौं ।’ ठूलो आर्थिक क्षतिपछि पनि कर्मचारीको रोजगारी जोगाउँदै स्टोरहरू पुनः सञ्चालनमा ल्याएको भाटभटेनीले आगामी दिनमा देशव्यापी विस्तार र रोजगारी सिर्जनालाई प्राथमिकतामा राखेको जनाएको छ ।
राष्ट्रिय कर दिवसमा १९ विधाका उत्कृष्ट करदाता सम्मानित, सूर्य नेपालदेखि नबिल बैंकसम्म
काठमाडौं । राष्ट्रिय कर दिवसको अवसरमा सरकारले विभिन्न १९ विधामा उत्कृष्ट करदातालाई सम्मान गरेको छ। मंगलबार (आज) काठमाडौंमा आयोजित एक विशेष कार्यक्रममा अर्थमन्त्री डा. स्वर्णिम वाग्लेले उत्कृष्ट करदातालाई सम्मान गरेका हुन् । सरकारले मूल्य अभिवृद्धि कर ऐन, २०५२ लागू भएको दिन २०५४ मंसिर १ गतेको सम्झनामा २०६९ सालदेखि हरेक वर्ष राष्ट्रिय कर दिवस मनाउँदै आएको छ । कर दिवसका अवसरमा करदातालाई करप्रति प्रोत्साहित गर्ने उद्देश्यले विभिन्न विधामा सबैभन्दा बढी कर दाखिला गर्ने करदातालाई सम्मान गर्ने गरिएको छ । यस वर्ष निकायहरूमध्ये सबैभन्दा बढी आयकर दाखिला गर्ने करदाताका रूपमा सूर्य नेपाल प्रालि सम्मानित भएको छ । एकलौटी फर्मतर्फ थर्ड आई इन्टरनेशनल सम्मानित हुँदा वस्तु निर्याततर्फ डाबर नेपाल प्रालिले सम्मान प्राप्त गरेको छ । त्यस्तै, सूचना प्रविधि सेवा निर्याततर्फ इन्फाइनाइट सफ्टवेयर सर्भिसेस नेपाल, कृषि तथा पशुपन्छीजन्य उद्योगतर्फ ओसीबी फुड्स एन्ड फिड्स प्रालि र बैंकिङ क्षेत्रतर्फ नबिल बैंक लिमिटेड सम्मानित भएका छन् । स्वास्थ्य तथा शैक्षिक संस्थातर्फ नोबेल मेडिकल कलेज टिचिङ हस्पिटल, पर्यटन व्यवसायमा सोल्टी होटल र वस्तु व्यापारतर्फ सीजी इम्पेक्स प्रालिले सबैभन्दा बढी आयकर दाखिला गर्ने करदाताको सम्मान पाएका छन् । वार्षिक कारोबार ५० करोडदेखि १०० करोड रुपैयाँसम्म गर्ने करदातामध्ये फुड एन्ड बेभरेज टेक्नोलोजी रिसर्च सेन्टर प्रालि सम्मानित भएको छ । ऊर्जा उद्योगतर्फ भोटेकोशी पावर कम्पनी, रेमिट्यान्स तथा मनी ट्रान्सफरतर्फ आईएमई लिमिटेड र व्यक्तिगत आयतर्फ राजबहादुर शाह सम्मानित भएका छन् । त्यस्तै, मूल्य अभिवृद्धि करतर्फ हिमालयन डिष्टिलरी लिमिटेड, वार्षिक ५० करोड रुपैयाँसम्म कारोबार गर्ने करदातामध्ये इम्पेरियल सेक्युरिटिज कम्पनी लिमिटेड र विशेष उद्योगतर्फ वरुण बेभरेज नेपाल प्रालि सम्मानित भएका छन् । जीवन बीमा क्षेत्रतर्फ लाइफ इन्स्योरेन्स कर्पोरेसन (नेपाल) लिमिटेड, निर्जीवन बीमातर्फ सिद्धार्थ प्रिमियर इन्स्योरेन्स लिमिटेड र लघुवित्त क्षेत्रतर्फ छिमेक लघुवित्त वित्तीय संस्था लिमिटेडले सम्मान प्राप्त गरेका छन् । राष्ट्रिय कर दिवसमा सम्मानित १९ करदाता १. निकायहरूमध्ये सबैभन्दा बढी आयकर दाखिला गर्ने: सूर्य नेपाल प्रालि २. एकलौटी फर्ममध्ये: थर्ड आई इन्टरनेशनल ३. वस्तु निर्याततर्फ: डाबर नेपाल प्रालि ४. सूचना प्रविधि सेवा निर्याततर्फ: इन्फाइनाइट सफ्टवेयर सर्भिसेस नेपाल ५. कृषि तथा पशुपन्छीजन्य उद्योगतर्फ: ओसीबी फुड्स एन्ड फिड्स प्रालि ६. बैंकिङ क्षेत्रतर्फ: नबिल बैंक लिमिटेड ७. स्वास्थ्य तथा शैक्षिक संस्थातर्फ: नोबेल मेडिकल कलेज टिचिङ हस्पिटल लिमिटेड ८. पर्यटन व्यवसायतर्फ: सोल्टी होटल लिमिटेड ९. वस्तु व्यापारतर्फ: सीजी इम्पेक्स प्रालि १०. ५० करोडदेखि १०० करोड रुपैयाँसम्म वार्षिक कारोबार गर्ने करदातामध्ये: फुड एन्ड बेभरेज टेक्नोलोजी रिसर्च सेन्टर प्रालि ११. ऊर्जामूलक उद्योगतर्फ: भोटेकोशी पावर कम्पनी प्रालि १२. रेमिट्यान्स तथा मनी ट्रान्सफरतर्फ: आईएमई लिमिटेड १३. व्यक्तिगत आयतर्फ: राजबहादुर शाह १४. मूल्य अभिवृद्धि करतर्फ: हिमालयन डिष्टिलरी लिमिटेड १५. ५० करोड रुपैयाँसम्म वार्षिक कारोबार गर्ने करदातामध्ये: इम्पेरियल सेक्युरिटिज कम्पनी लिमिटेड १६. विशेष उद्योगतर्फ: वरुण बेभरेज नेपाल प्रालि १७. जीवन बीमा क्षेत्रतर्फ: लाइफ इन्स्योरेन्स कर्पोरेसन (नेपाल) लिमिटेड १८. निर्जीवन बीमा क्षेत्रतर्फ: सिद्धार्थ प्रिमियर इन्स्योरेन्स लिमिटेड १९. लघुवित्त क्षेत्रतर्फ: छिमेक लघुवित्त वित्तीय संस्था लिमिटेड