बैंकर ज्योतिप्रकाश पाण्डे प्रहरी नियन्त्रणमा
काठमाडौं । बैंकर ज्योतिप्रकाश पाण्डे प्रहरी नियन्त्रणमा रहेको बुझिएको छ । नेपाल इन्भेस्टमेन्ट मेगा बैंकका प्रमुख कार्यकारी अधिकृत (सीईओ)समेत रहेका उनलाई प्रहरीले नियन्त्रणमा लिएको हो । नेपाल प्रहरीको केन्द्रीय अनुसन्धान ब्यूरो (सीआईबी)का प्रमुख मनोज केसीले उनलाई नियन्त्रणमा लिइएको जानकारी दिए । केसीका अनुसार स्मार्ट सेल प्रकरणमा पाण्डेको संलग्नता देखिएपछि अनुसन्धानका लागि नियन्त्रणमा लिइएको हो ।
सुनको मूल्य तोलामा ३ लाख २ हजार २०० रुपैयाँमा कारोबार
काठमाडौं । मंगलबारको तुलनामा स्थानीय बजारमा बुधबार सुनचाँदीको मूल्यमा सामान्य उतारचढाव आएको छ । सुन तोलामा ७०० रुपैयाँले घटेको छ भने चाँदीको मोल भने १५ रुपैयाँले बढेको छ । नेपाल सुनचाँदी व्यवसायी महासंघका अनुसार बुधबार छापावाल सुनको मोल प्रतितोला तीन लाख दुई हजार २०० रुपैयाँ र त्यति नै परिमाणको सेतो धातुको मूल्य पाँच हजार ७१० रुपैयाँ कायम भएको छ । हिजो मंगलबार एक तोला छापावाल सुन तीन लाख दुई हजार ९०० रुपैयाँ र त्यति नै परिमाणको चाँदी पाँच हजार ६९५ रुपैयाँमा खरिदबिक्री भएको थियो । अन्तरराष्ट्रिय सञ्चारमाध्यमका अनुसार आज अन्तरराष्ट्रिय बजारमा एक औँस सुन चार हजार ७२५ र त्यति नै परिमाणको चाँदी ८७ अमेरिकी डलरमा कारोबार भइरहेको छ ।
एसइईमा सिन्धुपाल्चोकका सात विद्यालयको नतिजा शून्य
चौतारा । माध्यमिक शिक्षा परीक्षा ९एसइई०मा सिन्धुपाल्चोकका सातवटा सामुदायिक विद्यालयको नतिजा शून्य आएको छ । शिक्षा विकास तथा समन्वय एकाइका अनुसार लिसङ्खुपाखर गाउँपालिकास्थित बुद्धोदय मावि, धर्मोदय मावि, चौतारा साँगाचोकगढी नगरपालिकाको वनदेवी मावि चौतारा, बलेफी गाउँपालिकाको वनसाँघु मावि, भोटेकोशी गाउँपालिकाको मार्मिङ मावि र भीमसेन मावि तथा हेलम्बुको हेलम्बु बोधिसत्व मोडल स्कुलमा साधारणतर्फ सबै विद्यार्थी ‘ननग्रेडेड’ भएका छन् । यीमध्ये लिसङ्खुको बुद्धोदय मावि, भोटेकोशीको भीमसेन मावि र हेलम्बुको हेलम्बु बोधिसत्व मोडल स्कुलमा प्राविधिक धारको समेत पठनपाठन हुने गरेको छ । प्राविधिक धारतर्फ भने केही विद्यार्थीमात्र ‘ग्रेडेड’ भएका थिए । सिन्धुुपाल्चोकमा रहेका १२९ सामुदायिक, ११ संस्थागत र तीन खुला विद्यालय गरी जम्मा १४३ विद्यालयले एसइई २०८२ मा सहभागिता जनाएका थिए ।
मन्त्रिपरिषद्को बैठक बस्दै
काठमाडौं । मन्त्रिपरिषद्को बैठक केही बेरमा प्रधानमन्त्री तथा मन्त्रिपरिषद्को कार्यालय, सिंहदरबारमा बस्दैछ । प्रधानमन्त्री वालेन्द्र शाहका प्रेस तथा अनुसन्धान विज्ञ दीपा दाहालले मन्त्रिपरिषद्को बैठक १०ः३० बजे प्रधानमन्त्री तथा मन्त्रिपरिषद्को कार्यालय सिंहदरबारमा बस्न लागेको जानकारी दिएका हुन् ।
बाँदर धपाउन लालीगुराँस नगरपालिकाले दियो सार्वजनिक विदा
काठमाडौं । तेह्रथुमको लालीगुराँस नगरपालिकाले बाँदर धपाउनका लागि जेठ १ गते (शुक्रबार) सार्वजनिक बिदा दिने निर्णय गरेको छ । नगरपालिकाले सूचना जारी गर्दै जेठ १ गते अत्यावश्यक सेवाबाहेकका सेवा बन्द रहने जानकारी दिएको छ । बाँदरलाई सीमा कटाउन ठूलो जनपरिचालन आवश्यक पर्ने भएकाले सार्वजनिक बिदा आवश्यक भएको नगरपालिकाले सूचनामा उल्लेख गरेको छ । नगरपालिकाका अनुसार पछिल्लो समय बाँदरका कारण कृषिबालीमा व्यापक क्षति पुगेपछि समस्या समाधानका लागि सामूहिक रूपमा बाँदर लखेट्ने कार्यक्रम सञ्चालन गर्न लागिएको हो । सूचनामा किसानले उत्पादन गरेको कृषि उपजमा ठूलो नोक्सानी भएको, साथै बाँदर आतंकका कारण बालबालिका विद्यालय जानसमेत प्रभावित भएको उल्लेख गरिएको छ । नगरपालिकाले चालु आर्थिक वर्ष २०८२/८३ को स्वीकृत बजेटअन्तर्गत ‘कृषिमा बाँदरबाट परेको क्षति न्यूनीकरण’ कार्यक्रममार्फत विभिन्न क्षेत्रमा बाँदर धपाउने अभियान सञ्चालन गर्न लागेको जनाएको छ । वडा नं. ८ को रंगमञ्च क्षेत्र, वडा नं. ५ को सिङ्गाप्पा क्षेत्रलगायत स्थानमा कार्यक्रम तय गरिएको छ । जेठ १ र २ गते सञ्चालन हुने उक्त कार्यक्रममा किसान, जनप्रतिनिधि, कर्मचारी तथा सर्वसाधारणलाई सहभागी हुन आग्रह गरिएको छ । ठूलो जनपरिचालन आवश्यक पर्ने भएकाले जेठ १ गते सार्वजनिक बिदा दिइएको नगरपालिकाले जनाएको छ।
रास्वपाको पहिलो महाधिवेशन असार ७ देखि ९ गतेसम्म चितवनमा हुने
काठमाडौं । राष्ट्रिय स्वतन्त्र पार्टी रास्वपाले आफ्नो पहिलो राष्ट्रिय महाधिवेशन आगामी असार ७, ८ र ९ गते चितवनमा गर्ने निर्णय गरेको छ । रास्वपाका नेता नेता गणेश पराजुलकीका अनुसार रास्वपाले असार ७ गतेदेखि ९ गतेसम्म चितवनमा पहिलो महाधिवेशन गर्ने निर्णय गरेको हो । रास्वपाले पहिलो महाधिवेशनलाई संगठन विस्तार, नेतृत्व चयन तथा आगामी राजनीतिक कार्यदिशा तय गर्ने महत्वपूर्ण अवसरका रूपमा लिएको जनाएको छ ।
सर्वोत्तम सिमेन्टले सुनवलमा ४ करोडको स्वास्थ्य पूर्वाधार निर्माण गर्दै
काठमाडौं । सर्वोत्तम सिमेन्टले पश्चिम नवलपरासीको सुनवल नगरपालिकामा सुविधा सम्पन्न 'सर्वोत्तम इमर्जेन्सी अस्पताल' निर्माण कार्य सुरु गरेको छ । सोमबार आयोजित कार्यक्रमबीच सुनवल नगरपालिका–५ मा अस्पताल भवनको शिलान्यास सम्पन्न गरिएको हो । कोभिड–१९ महामारीको कठिन समयमा सर्वोत्तम सिमेन्ट र सुनवल नगरपालिका बीच अस्पताल निर्माणसम्बन्धी प्रतिबद्धता पत्रमा हस्ताक्षर भएको थियो । तत्कालीन नगरप्रमुख भिमबहादुर थापाको कार्यकालमा सुरु गरिएको उक्त प्रतिबद्धता अब कार्यान्वयनमा आएको हो । सर्वोत्तम सिमेन्टले महामारीका बेला नगरपालिकालाई १७ वटा भेन्टिलेटर उपलब्ध गराएको थियो । निर्माण सम्पन्न भएपछि ती उपकरणहरूको आवश्यक सर्भिसिङ गरी अस्पतालमै व्यवस्थापन गरिने कम्पनीले जनाएको छ । लिफ्टसहितको तीनतले अस्पताल करिब ४ करोड रुपैयाँ लागतमा निर्माण गरिनेछ। निर्माणको सम्पूर्ण खर्च सर्वोत्तम सिमेन्टले नै व्यहोर्नेछ । कम्पनीका महाप्रबन्धक नेत्र प्रसाद घिमिरेका अनुसार एक वर्षभित्र निर्माण सम्पन्न गरी अस्पताल सुनवल नगरपालिकालाई हस्तान्तरण गरिनेछ । बालमैत्री तथा अपाङ्गमैत्री डिजाइनमा निर्माण गरिने अस्पतालमा आवश्यक स्वास्थ्य उपकरणहरू समेत उपलब्ध गराइनेछ । साथै, अस्पताल सञ्चालनपछि मर्मत–सम्भारको जिम्मेवारी समेत कम्पनीले नै लिने जनाएको छ । सुनवल नगरपालिकाकी नगरप्रमुख बिमला अर्यालले यसअघि जग्गा अभावका कारण परियोजना अघि बढ्न नसकेको उल्लेख गर्दै हाल आवश्यक जग्गा उपलब्ध भएपछि निर्माण प्रक्रिया सुरु गरिएको बताइन् । स्थानीय नागरिकलाई सहज, गुणस्तरीय तथा आपत्कालीन स्वास्थ्य सेवा उपलब्ध गराउने उद्देश्यसहित निर्माण हुन लागेको यस अस्पतालले सुनवल क्षेत्रको स्वास्थ्य सेवामा महत्वपूर्ण योगदान पु¥याउने विश्वास लिइएको छ ।
गरिब र जेहेनदार विद्यार्थीलाई काठमाडौं महानगरको राहत, छात्रवृत्तिका लागि यसरी दिनुहोस् आवेदन
काठमाडौं । काठमाडौं महानगरपालिकाले आर्थिक अवस्था कमजोर भएका तथा जेहेनदार विद्यार्थीलाई लक्षित गर्दै संस्थागत (निजी) विद्यालयमा कक्षा ११ र १२ अध्ययनका लागि छात्रवृत्ति आवेदन खुला गरेको छ । महानगरपालिकाको शिक्षा विभागले बुधबार सूचना जारी गर्दै प्रतिस्पर्धात्मक परीक्षा प्रणालीमार्फत योग्य विद्यार्थी छनोट गरी छात्रवृत्ति प्रदान गरिने जनाएको हो । महानगरको यो कार्यक्रमले निजी विद्यालयमा अध्ययन गर्न चाहने तर आर्थिक अभावका कारण अवसरबाट वञ्चित हुने विद्यार्थीलाई राहत पुग्ने अपेक्षा गरिएको छ । पछिल्ला वर्षहरूमा महानगरले छात्रवृत्ति वितरणलाई व्यवस्थित र पारदर्शी बनाउन परीक्षा प्रणालीलाई प्राथमिकता दिँदै आएको छ । शिक्षा विभागका अनुसार इच्छुक विद्यार्थीले जेठ १ गते बिहान १० बजेदेखि जेठ १० गते राति ११ः५९ बजेसम्म अनलाइन आवेदन दिन सक्नेछन् । आवेदन महानगरपालिकाको आधिकारिक वेबसाइटमार्फत भर्नुपर्ने व्यवस्था गरिएको छ । विद्यार्थीले आवेदन फाराम भर्दा आवश्यक शैक्षिक विवरण तथा व्यक्तिगत जानकारी सही रूपमा उल्लेख गर्नुपर्ने महानगरले जनाएको छ । महानगरपालिकाले सार्वजनिक गरेको सूचनाअनुसार छात्रवृत्तिसम्बन्धी विस्तृत विवरण वेबसाइटमा राखिएको छ । त्यहाँ विषयगत अङ्कभार, विद्यालयअनुसारको छात्रवृत्ति कोटा, परीक्षा केन्द्र तथा आवेदन प्रक्रियासम्बन्धी जानकारी उपलब्ध गराइएको छ । शिक्षा विभागले आवेदन दिनुअघि सम्बन्धित विवरण राम्रोसँग अध्ययन गर्न विद्यार्थी र अभिभावकलाई आग्रह गरेको छ । छात्रवृत्ति छनोटका लागि हुने परीक्षा जेठ १७ गते बिहान ८ बजेदेखि १० बजेसम्म सञ्चालन गरिनेछ । माध्यमिक शिक्षा परीक्षा (एसईई) अन्तर्गत कक्षा १० को पाठ्यक्रममा आधारित हुनेछ । परीक्षामा १०० वटा वस्तुगत बहुवैकल्पिक प्रश्न सोधिनेछन् । महानगरका अनुसार परीक्षा निष्पक्ष, पारदर्शी र प्रतिस्पर्धात्मक ढङ्गले सञ्चालन गरिनेछ । महानगरपालिकाले शिक्षा क्षेत्रमा सुधार ल्याउने उद्देश्यले निजी विद्यालयहरूलाई कानुनी रूपमा तोकिएको छात्रवृत्ति कोटा अनिवार्य कार्यान्वयन गराउँदै आएको छ । यसले गर्दा विगत केही वर्षयता छात्रवृत्ति प्राप्त गर्ने विद्यार्थीको सङ्ख्यामा उल्लेखनीय वृद्धि भएको महानगरको दाबी छ । महानगरका अनुसार गत शैक्षिक सत्र २०८० मा मात्रै संस्थागत विद्यालयका २० हजारभन्दा बढी विद्यार्थीले छात्रवृत्ति सुविधा प्राप्त गरेका थिए । कानुन कार्यान्वयन सुरु भएको पहिलो वर्ष १३ हजार विद्यार्थीले छात्रवृत्ति पाएका थिए भने दोस्रो वर्ष यो संख्या बढेर १९ हजार पुगेको थियो । पछिल्लो विवरणअनुसार कक्षा १ देखि १० सम्मका १६ हजार ९८० र कक्षा ११ का ३ हजार ३०२ विद्यार्थी गरी कुल २० हजार २८२ जनाले छात्रवृत्ति सुविधा पाएका थिए । महानगरपालिकाले शिक्षा पहुँच विस्तारसँगै गुणस्तरीय शिक्षामा समान अवसर सुनिश्चित गर्ने लक्ष्य राखेको जनाएको छ । आर्थिक रूपमा विपन्न, श्रमिक, दलित, जनजाति तथा सीमान्तकृत समुदायका विद्यार्थीलाई विशेष प्राथमिकतामा राखेर छात्रवृत्ति वितरण गरिँदै आएको महानगरको भनाइ छ । शिक्षाविद्हरूले पनि महानगरको यस्तो पहलले निजी विद्यालयमा अध्ययन गर्ने अवसर सबै वर्गका विद्यार्थीमा विस्तार हुने बताएका छन् । उनीहरूका अनुसार पारदर्शी परीक्षा प्रणालीमार्फत छात्रवृत्ति वितरण हुँदा वास्तविक आवश्यकतामा रहेका विद्यार्थी लाभान्वित हुने सम्भावना बढ्छ । काठमाडौँ महानगरपालिकाले आगामी वर्षहरूमा छात्रवृत्ति कार्यक्रमलाई अझ प्रभावकारी र पहुँचमुखी बनाउने योजना रहेको जनाएको छ । महानगरले शिक्षा क्षेत्रमा गरिरहेको लगानी र निगरानीका कारण निजी विद्यालयहरूमा कानुनी दायित्व कार्यान्वयनमा समेत सुधार आएको दाबी गरिएको छ ।
