स्वास्थ्य चौकीको बर्थिङ सेन्टरमा बच्चा जन्माउने सुत्केरीलाई रु छ हजार ८०० भत्ता
काठमाडौं। कानेपोखरी गाउँपालिकाले स्थानीय स्वास्थ्य चौकीको बर्थिङ सेन्टरमा बच्चा जन्माउने सुत्केरीलाई रु छ हजार ८०० भत्ता दिने निर्णय गरेको छ । कानेपाखेरी–४ स्थित बयरवन स्वास्थ्य चौकीको बर्थिङ सेन्टरमा बच्चा जन्माउने सुत्केरीलाई गाउँपालिकाले रु पाँच हजार र स्वास्थचौकीले रु एक हजार ८०० उपलब्ध गराउने भएको हो । आर्थिक वर्ष ०७५÷७६ को बजेटमा परेको उक्त रकम साउन महिनादेखि दिने निर्णय गरिएको गाउँपालिकाका प्रवक्ता सुशील बुढाथोकीले बताउनुभयो । यो सुविधा जुनसुकै स्थानबाट आएका नेपाली नागरिकलाई दिइने छ । प्रसूतिगृहमा प्रसूति गराउन ल्याएर स्वास्थ्य चौकीले अर्काे अस्पतालमा सिफारिस गर्नुपरेमा त्यस्ता सुत्केरीलाई एम्बुलेन्सबापत रु दुई हजार भाडा समेत दिइने स्वास्थ्य चौकी सञ्चालन समितिका अध्यक्ष तथा वडा नं ४ का वडाध्यक्ष धनबहादुर राईले जानकारी दिनुभयो । स्वास्थ्य चौकीले प्रदान गर्ने रु एक हजार ८००को हकमा भने नियमित जाँच गराएको हुनुपर्ने स्वास्थ्य चौकीका प्रमुख कामेश्वर अधिकारीले बताउनुभयो । उक्त स्वास्थ्य चौकीले २४ सै घण्टा प्रसूति सेवा दिइरहेको छ । रासस
चावहिल-जोरपाटी-साँखु सडकमा माधव नेपाल र रघुबिर महासेठका २ घण्टा: १५ दिनमा हिलो र धुलो मुक्त बन्ने
काठमाडौं । बिहिबार बिहान ८ः३० बजेतिर पाँच सात वटा गाडीको लस्कर चावहिलबाट जोरपाटी तर्फ हुईकिन्छ । प्रहरीको साइरनसहित अघि बढेको टोली हायत भाटभटेनी नजिकै पुगेर रोकिन्छ, गाडीबाट ओर्लन्छन पुर्व प्रधानमन्त्री माधव कुमार नेपाल । उनको साथमै हुन्छन सोही क्षेत्रका प्रतिनिधी सभाका सदस्य कृष्ण राई, प्रदेश सभाका सदस्य रामेश्वर फुयाल र मणिराम फुयाँल, गोकर्णेश्वर नगरका मेयर सन्तोष चालिसे, शंखरापुर नगरका मेयर सुवर्ण श्रेष्ठ, कागेश्वर मनहराका मेयर कृष्णहरी थापा । साथमा थिए भौतिक पुर्वाधार तथा यातायात मन्त्री रघुबिर महासेठ र सडक विभागका महानिर्देशक रबिन्द्र श्रेष्ठ पनि । पुर्व प्रधानमन्त्री नेपाल र मन्त्री महासेठको टोलीले भाटभटेनी आसपास, वौद्ध र हायत होटल जोड्ने मोड, लामा पेट्रोलपम्प हुँदै थलीको मोडसम्म पुगेर करिब एक दर्जन ठाउँमा स्थलगत अनुगमन गरेको थियो । अनुगमनका क्रममा भौतिक पुर्वाधार मन्त्री महासेठले ठेकेदार सुकुन्तलाल हिराचनलाई सोधेः खाल्डा खुल्डी, धुलो र हिलो मुक्त कहिले हुन्छ ? हिराचनले प्रतिवद्धता जनाए–अर्काे पटक आउँदा खाल्डा खुल्डी, धुलो, हिलो र डुबानको समस्या रहन्न । त्यतिकैमा पुर्व प्रधानमन्त्री माधव कुमार नेपालले भनेः अर्काे १५ दिनपछि म फेरी अनुगमनमा आउँछु नी । हिराचनले तुरुन्तै जवाफ दिए–१५ दिनपछि आउँदा ती काम भैसक्नेछन् । नेकपाका बरिष्ठ नेता नेपाल, मन्त्री महासेठ, सांसदहरु, नगरपालिकाका मेयरहरु, सडक विभागका महानिर्देशक श्रेष्ठ, आयोजना प्रमुख लगायतको टोलीले करिब २ घण्टा चावहिल जोरपाटी साँखु सडकको स्थलगत निरिक्षण गरेको थियो ।
एनआईसी एशिया बैंककोे पोखरामा शाखारहित बैंकिङ्ग सेवा
काठमाडौं । एनआईसी एशिया बैंकले गुल्मीको गुल्मीदरबार गाउँपालिकाको ठूलो पोखरामा १७ औंं शाखारहित बैंकिङ्ग सेवा संचालनमा ल्याएको छ । शाखारहित बैंकिङ्ग सेवाको समुद्घाटन गुल्मीदरबार गाउँपालिका वडा नम्बर ७ का वडा अध्यक्ष हिराबहादुर खत्रीको उपस्थितिमा सम्पन्न भयो । शाखारहित बैंकिङ्ग सेवाका प्रतिनिधिको रुपमा बैंकले खुमलाल अर्याललाई नियुक्त गरेको बैंकले जनाएको छ । शाखारहित बैंकिङ्ग सेवाबाट देशका विभिन्न ग्रामीण क्षेत्रका स्थानीय बासिन्दाले आफ्नो गाउँमै स्थानीय प्रतिनिधि मार्फत बैंकिङ्ग सेवा लिन सक्ने छन् । बैंकिङ्ग कारोबारको लागि स्थानीय बासिन्दाहरुलाई लामो दुरी सम्म हिड्नु पर्ने बाध्यताको अन्त्य गरी ग्रामीण र दुर्गम क्षेत्रहरुमा बैंकिङ्ग कारोबारको विकास हुने विश्वास बैंकले लिएको छ । यस्तो सेवाबाट स्थानीय बासिन्दाहरुले विभिन्न निक्षेप खाता खोल्ने, तोकिएको सीमासम्मको रकम जम्मा गर्ने तथा झिक्ने, मोवाईल रिचार्ज गर्ने, टेलिफोन, मोबाईल, एडिएसएल, डिस होमको महसुल भुक्तानी गर्ने, स्वीकृत सीमा भित्र रहि कर्जा कारोबार, कर्जाको साँवा तथा व्याज भुक्तानी गर्न सकिने बैंकले जनाएको छ । एनआईसी एसियाको मुलुकभर २३६ शाखा कार्यालयहरु, २२९ एटिएम, १४ वटा एक्स्टेन्सन काउण्टर एवं १७ वटा शाखारहित बैंकिङ्ग मार्फत बैंकिङ्ग सेवा छ । बैंकको वासलातको आकार १ खर्ब ७६ अर्ब रुपैयाँ पुगेको छ । बैंकको कर्जा लगानी १ खर्ब २० अर्ब र निक्षेप संकलन १ खर्ब ४९ अर्ब रुपैयाँ छ । बैंकमा ग्राहकहरुको संख्या करिब ११ लाख ७५ हजार रहेको छ ।
जनकपुर–जयनगर रेल सञ्चालनको परीक्षण
महेन्द्रनगर, धनुषा । जनकपुर–जयनगरमा सञ्चालन गरिने रेलको बुधबार सफल परीक्षण गरिएको छ । विगत ४ वर्षदेखि पूर्णरुपमा बन्द रहेको देशको एकमात्र रेल सेवा पुनः सञ्चालनमा ल्याउने उद्देश्यले भारतीय पक्षले परीक्षण गरेको हो । भारतीय पक्षले नेपाल भू–खण्डको जयनगर रेलवे स्टेशनबाट खजुरीसम्म साढे आठ किलोमिटर लामो इन्जिन र बोगीसहित परीक्षण गरेको नेपाल रेल्वेका अभियन्ता विनोद ओझाले बताए। जयनगरबाट खजुरीसम्म इन्जिनसहित ५३ वटा बोगी गिट्टी (ब्लास्ट) बोकेर खजुरी स्टेशनसम्म पुगेको थियो । उक्त रेलले आवश्यक स्थानमा ब्लास्ट ओछ्याउने काम गर्नुका साथै सहज रूपमा आवत–जावत गरेको छ । सफल परीक्षणपछि रेल सञ्चालनमा अब द्विविधा नहुने उनले बताए। रेल हेर्न त्यस क्षेत्रका स्थानीयवासीको ठूलो संख्यामा भीड लागेको थियो । दुई मुलुक जोड्ने दक्षिण एसियाकै पहिलो रेल्वेको स्टेशनमा हेर्ने आउनेको भीड जम्मा भएको थियो । भारतको ७ अर्ब रुपैयाँको सहयोगमा जनकपुर हुँदै जयनगर–कुर्था ब्रोडगेज रेलसेवा निर्माण अन्तिम चरणमा पुगेको हो । रासस
ग्लोबल आइएमई बैंक र दिर्घायु गुरु अस्पतालबीच सम्झौता
काठमाडौं । ग्लोबल आइएमई बैंक र दिर्घायु गुरु अस्पताल एन्ड रिर्सच सेन्टरबीच अस्पतालले प्रदान गर्ने विभिन्न सेवा तथा सुविधाहरुमा दिइने छुट सम्बन्धी सम्झौतापत्रमा हस्ताक्षर भएको छ । बैंकले हस्पिटलसँग आफ्ना ग्राहकलाई स्वदेशमै गुणस्तरीय उपचारमा सहुलियत दिने उदेश्यले दुईपक्षीय सम्झौता गरेको हो । सेवा दिने सम्बन्धि सम्भौतापत्रमा दिर्घायु गुरुका प्रबन्ध निर्देशक सुरजबला श्रेष्ठ र ग्लोबल आईएमईका रेमिट्यान्स, कार्ड वितरण तथा बजार प्रर्वद्धन विभाग प्रमुख रविन्द्र ढकालले हस्ताक्षर गरेका छन् । ग्लोबलले आफ्ना ग्राहकहरुलाई बैंकिङ्ग सेवाको अतिरिक्त अन्य सुविधाहरु प्रदान गर्ने उद्देश्यले लामो समयदेखि विभिन्न संस्थासँग समन्वय गरी यस्ता विभिन्न खाले योजनाहरु ल्याईरहेको जनाएको छ ।दिर्घायु गुरु अस्पताल चावेलमा उपचार गराउँदा बैंकबाट डेबिट, क्रेडिट र प्रिभिलेज कार्ड लिएका बैैंकका ग्राहक तथा कर्मचारीले अस्पतालले प्रदान गर्ने विभिन्न सेवामा १२ प्रतिशत सम्म छुट पाउने छन् । ग्लोबल आइएमईको १३१ शाखा, १३४ एटिएम, ५ एक्सटेन्सन काउण्टर, १५ राजश्व संकलन काउण्टर, १०० शाखा रहित बैंकिङ्ग सेवा र देश बाहिर ३ प्रतिनिधि र कार्यालय माफर्त आफ्ना ९ लाख भन्दा बढि ग्राहकलाई बैंकिङ सेवा प्रदान गर्दै आइरहेको छ ।
नेपाल बङ्गलादेश बैंक र आईएमई लाईफ ईन्स्योरेन्सबीच बैंकास्योरेन्स सम्झौता
काठमाडौं । नेपाल बङ्गलादेश बैक र आईएमई लाईफ ईन्स्योरेन्स कम्पनी लिमिटेडबीच बैंकास्योरेन्स सेवा सम्बन्धि सम्झौता भएको छ । सम्झौतामा बैकको तर्फबाट बैकका नायव प्रमुख कार्यकारी अधिकृत सुरेन्द्रभुषण श्रेष्ठ तथा इन्स्योरेन्सका तर्फबाट सहायक महाप्रबन्धक दिनेश अमात्यले हस्ताक्षर गरेका छन् । सम्झौता पश्चात बैकका सम्पुर्ण ग्राहकहरुले बैँकका ७१ वटै शाखाहरुबाट छिटो, छरितो तथा सहज रुपमा जीवन बीमा लेख प्राप्त गर्न, प्रिमियम भुक्तानी गर्न, दावी भुक्तानी लगायत सम्पूर्ण बीमा सेवा प्राप्त गर्न सक्ने छन् ।
रत्नपार्क–महाराजगञ्ज भूमिगत विद्युत वितरण योजनामा अनियमितता, २५ प्रतिशत महंगोलाई ठेक्का दिने तयारी
काठमाडौं । नेपाल विद्युत प्राधिकरणले अनुमानित लागत भन्दा झण्डै २५ प्रतिशत बढी महंगो दर प्रस्ताव गर्ने कम्पनीलाई विद्युतीय वितरण प्रणालीलाई भूमिगत तथा अटोमेसन (अण्डरग्राउन्ड) गर्ने कामका ठेक्का दिन लागेको छ । अनुमानित लागत भन्दा २५ प्रतिशत बढी प्रस्ताव गर्ने भारतको लार्सन एन्ड टर्बो कम्पनी लिमिटेडलाई महाराजगञ्ज र केईआई इन्डष्ट्रिज लिमिटेडलाई रत्नपार्कको विद्युतीय प्रणालीलाई भूमितगत गर्न ठेक्का दिने तयारी भएको हो । अनुमानित लागत भन्दा धेरै बढी रकम प्रस्ताव परेपछि ऋण लगानीकर्ता एसियाली विकास बैंक (एडीबी) ले दुबैसंग वार्ता गरी घटाघट गराउने प्रयास गरेको थियो । तर लार्सन र केईआईले महाराजगञ्ज र रत्नपार्ककको प्याकेजको काम बाँडेर लिन आन्तरिक सहमति गरी ०.८ प्रतिशत मात्र घटाउन सकिने प्रस्ताव गरेका थिए । एडीबीले अनुमानित लागत भन्दा १५ प्रतिशतसम्म बढी प्रस्ताव गर्ने सबैभन्दा न्युनतम बोलपत्रदातालाई ठेक्का दिने गरेको छ । सबैभन्दा कम दर प्रस्तावकको अनुमानित लागत भन्दा १० प्रतिशत बढी आए मात्र वार्ताबाट ठेक्का सम्झौता गर्न सकिने व्यवस्था सार्वजनिक खरिद ऐनमा रहेको छ । खरिद ऐनअनुसार अनुमानित लागत भन्दा बढी दर प्रस्ताव भएमा पुनः बोलपत्र आब्हान गर्नुपर्ने हुन्छ । तर ढिला हुने भन्दै अनुमानित लागत भन्दा धेरै प्रस्ताव गर्ने लार्सन र केईआईलाई ठेक्का दिन प्राधिकरले तयारी गरेको छ । महाराजगञ्जमा अनुमानित लागत भन्दा बढी भएपनि लार्सन एन्ड टर्वोको सबैभन्दा कम र दोस्रो प्रतिस्पर्धीमा केईआई छ । यस्तै रत्नपार्कमा सबैभन्दा कम केईआई र दोस्रोमा चान्सु फेङफङ कम्पनी रहेका छन् । लार्सनले महाराजगञ्ज र केईआइले रत्नपार्कको ठेक्का हात पार्ने गरी सहमति गरेको स्रोतको भनाई छ । रत्नपार्कमा भुमिगत विद्युतीकरणको कामका लागि केआईईले ३ करोड १५ लाख डलर अर्थात ३ अर्ब १५ करोड र महाराजगञ्जमा लार्सन एन्ड टर्वोले ३ करोड ७५ लाख अर्थात ३ अर्ब ७५ करोड डलर प्रस्ताव गरेका छन् । प्राधिकरणका उपकार्यकारी निर्देशक मनोज सिल्वालले पारदर्शी प्रक्रियाबाट ठेक्का सम्झौता हुन लागेको बताए । लगानीकर्ता एडीबी, कम्पनी र प्राधिकरणबीच छलफल भइ सहमतिमा पुगेको बताए । दोस्रो पटक बोलपत्र आब्हान गर्दा यो दर भन्दा महंगो आउने संभावना भएकाले सस्तो दर प्रस्तावकलाई दिने तयारी भएको उनले सुनाए । उनले निर्णय भइनसकेको जानकारी दिए । यसअघि नवलपरासीको वर्दघाटदेखि बुटवलसम्म २२० केभी क्षमताको प्रसारणलाइन बनाउदा अनुमानित लागत भन्दा बढी आएपछि पुनः प्राधिकरणले बोलपत्र आब्हान गरेको थियो । यस्तै सडकलगायत अन्य आयोजनाको ठेक्कामा अनुमानित लागत भन्दा बढी आएपछि पुनः बोलपत्र आब्हान हुने गरेको छ । भूमिगत योजनाका लागि एसियाली विकास बैंक (एडीबी)ले साढे १५ अर्ब रुपैयाँ दिने भएको छ । सरकारले पनि एडीबीको १५ अर्ब ४० करोड रुपैयाँ ऋण लिने निर्णय गरेको छ । वितरण सञ्जाल क्षमता बढाउने, बिजुलीका तारलाई भुमिगत र वितरण प्रणालीलाई अटोमेशन गर्ने तयारी प्राधिकरणको छ । बोलपत्रदाताले भूमिगत वितरण प्रणालीको खाका (डिजाइन) समान आपूर्ति, जडान र सञ्चालन गर्नुपर्ने बोलपत्रमा उल्लेख छ । पहिलो चरणमा महाराजगञ्ज र रत्नपार्क वितरण केन्द्रका मुख्य सडकमा ११ केभी र ४ सय भोल्टका प्रणालीलाई भुमिगत र अटोमेसन गर्नुपर्ने हुन्छ ।
सनराइज बैंक र मनमोहन मेमोरियल अस्पतालबीच सम्झौता, १० प्रतिशत छुट पाउने
काठमाडौं । सनराइज बैंकले आफना ग्राहकलाई स्वास्थ्य बीमा योजना प्रदान गर्न देशभरका ८० भन्दा बढी निजी अस्पतालसँग सम्झौता गरेको छ । बैंकका ग्राहकहरुले स्वास्थ्य परीक्षण गराउँदा ५ प्रतिशतदेखि २० प्रतिशतसम्म विशेष छुट पाउन सक्ने छन् । तोकिएका अस्पतालमा छुट पाउनका निम्ति ग्राहकहरुले बैंकको भिसाकार्ड (डेविट वा क्रेडिट कार्ड) देखाउनु पर्नेछ । साथै ग्राहकको सहजताको लागि बैंकले १ वर्ष सम्मको लागि भिसाकार्ड निःशुल्क प्रदान गरेको छ । यसै क्रममा बैंक र मनमोहन मेमोरियल सामुदायिक अस्पतालबीच स्वास्थ्य उपचारमा १० प्रतिशत छुट प्रदान गर्ने सम्झौता गरेको छ । उक्त सम्झौतापछि ग्राहकहरुले सुविधा पाउने अस्पतालको संख्या ८४ पुगेको छ । तोकिएको अस्पतालमा भर्ना भई औषधोपचार गर्दा ग्राहकहरुले बैंकबाट १ लाख रुपैयाँसम्मको स्वास्थ्य बीमा सुबिधा तथा ५ लाख रुपैयाँ सम्मको दुर्घटना बीमा सुबिधा समेत प्राप्त गर्न सक्नेछन् । यी सबै बीमा सुबिधा ग्राहकहरुले निःशुल्क प्राप्त गर्न सक्ने बैंकले जनाएको छ ।
