७ तल्ले अत्याधुनिक भवन बनाउँदै बीमा समिति, ८० करोड लागत
काठमाडौं । नियामक निकायमध्ये सबै भन्दा अत्याधुनिक भवन बीमा समितिले बनाउने भएको छ । समितिले ८० करोडको लागतमा ७ तले अत्याधुनिक भवन निर्माण गर्न लागेको हो । सो भवन बिभिन्न नियामक निकायहरु बस्दै आएको हालसम्मकै अत्याधुनिक हुनेछ । कुपण्डोलस्थिल समितिको वर्तमान भवनको पछाडी समितिको नयाँ भवन निर्माण हुनेछ । त्रिभुवन विश्वविद्यालयको इञ्जिनियरिङ संस्थानको कन्सल्टेन्सी सर्भिसेजले बीमा समितिको नयाँ भवनको डिजाइन तयार पारेको हो । एक तल्ला अण्डर ग्राउण्ड पार्किङ, भुई तल्लामा क्याण्टिनका साथै तालिम हल, पहिलो तल्लामा अन्तराष्ट्रियस्तरको सम्मेलन स्थल र दोश्रो देखि छैठौं तल्लासम्म समितिको कार्यालय रहनेछ । सातौ तल्लामा भने बीमा क्षेत्रमा काम गर्ने स्वदेशी तथा विदेशी कन्सल्टेन्सीहरुका लागि छुट्याइनेछ । बीमा समितिका निमिक्त कार्यकारी निर्देशक राजुरमण पौडेलका अनुसार ललितपुर महानगरपालिकामा नक्सा पासका लागि पठाईको छ । नक्सा पास भए लगत्तै विद्युतिय ठेक्का( ई बिडिङ) गरिनेछ । ३ रोपनी क्षेत्रफलमा बन्ने भवन आगामी साढे ३ बर्षमा निर्माण सम्पन्न गर्ने लक्ष्य तय भएको छ । समितिको नयाँ भवन ४६८६.३२ वर्गमिटर क्षेत्रफलको हुनेछ । समितिले केहि बर्ष अघि नेपाल बैंकसँग ४८ करोड रुपैंयाँमा ९ रोपानी जमिन खरिद गरेको थियो । सोही जमिनको ३ रोपनीमा नयाँ भवन बन्नेछ । नयाँ भवन निर्माण भएपछि नियामक निकायहरुमध्ये समिति सबै भन्दा अत्याधुनिक भवनमा सर्नेछ ।
हिमालय ऊर्जा विकास कम्पनीको आईपीओ कात्तिक ६ देखि, ४९०० कित्तासम्म आवेदन दिन पाइने
काठमाडौं । हिमालय ऊर्जा विकास कम्पनी लिमिटेडले साधारण सेयर (आईपीओ) निष्कासन गर्ने भएको छ । कम्पनीले कात्तिक ६ गतेदेखि आयोजना प्रभावित स्थानीयबासिन्दालाई ९ करोड ९० लाख रुपैयाँ बराबरको ९ लाख ९० हजार कित्ता आईपीओ निष्कासन गर्न लागेको हो । आईपीओ निष्कासन बन्द छिटोमा कात्तिक २० र ढिलोमा मंसिर ५ गतेसम्म तोकिएको छ निष्कासन तथा बिक्री प्रवन्धक नविल इन्भेष्टमेन्ट बैंकिङ लिमिटेडले जनाएको छ । न्युनतम ५० देखि अधिकतम् ४ हजार ९०० कित्तासम्म आवेदन दिन सकिने छ ।जलविद्युत आयोजनाबाट प्रभावित रामेछाप र दोलखा जिल्लाका स्थानीयबासिन्दालाई आईपीओ निष्कासन हुन लागेको हो । कम्पनीले १२ मेगावाटको उपल्लो खिम्ती र ७ मेगावाटको अपर खिम्ती जलविद्युत आयोजना निर्माण गरिरहेको छ । उपल्लो खिम्ति बनाउन १ अर्ब ९१ करोड र माथिल्लो खिम्तीमा १ अर्ब २३ करोड रुपैयाँ अनुमान गरिएको छ । आयोजनाबाट आउदो चैतसम्म विजुली उत्पादन हुने छ ।
भारतमा बैंक अफ बरौडा, विजय र डिना बैंकको असोज ३१ गते मर्जर हुदै, तेस्रो ठुलो बैंक बन्नै
एजेन्सी । भारतका ३ वटा वाणिज्य बैंक एकआपसमा गाभिने (मर्जर) भएका छन् । ३ वटै बैंकको सञ्चालक समितिले स्वीकृति प्रदान गरेपछि मर्जरमा जाने निश्चित भएको हो । असोज ३१ गतेदेखि एकिकृत बैंकिङ कारोबार गर्ने भएका छन् । मर्जरमा जानेमा बैंक अफ बरोडा, विजय बैंक र डिना बैंक रहेका छन् । यी ३ वटा बैंक गाभिएपछि पुँजीगत आधारमा भारतको तेस्रो ठुलो बैंक हुने भएको फाइनान्सियल एक्सप्रेसले जनाएको छ । ३ वटा बैंकलाई गाभेर मजवुत बनाउन सरकारले मर्जरमा लैजान लागेको हो । बरौडा र विजय बैंक मजवुत डिना बैंक कमजोर रहेको छ । यी मध्ये डिनाको खराबकर्जा अनुपात ११ प्रतिशत बरौंडाको ५.४ र विजयको ४.१ प्रतिशत छ ।
दुई वटा पेट्रोल पम्पमा सिलबन्दी
कलैया । गुणस्तर तथा नाप तौल क्षेत्रीय कार्यालय वीरगञ्जले मंगलबार बारामा सञ्चालित दुई वटा पेट्रोल पम्पमा सिल गरेको छ । कलैया उपमहानगरपालिका वडा नं १ स्थित अमित आयल स्टोर र कलैया उपमहानगरपालिका वडा नं १३ स्थित विजय आयल स्टोरमा सिल गरिएको क्षेत्रीय कार्यालयका प्रमुख शशिकान्त यादवले जानकारी दिए । अमित आयलले विसं २०७१ देखि जाँच नगराएको र १० लिटर पेट्रोलमा ३०० एमएल कमी भएको तथा पल्सर, गेयरमा समेत सिल नभएको हुँदा बाध्य भई नोजल सिल गरिएको प्रमुख यादवले जानकारी दिए । त्यसैगरी विजय आयलको डिजलमासमेत घटी भएको पाइएकाले त्यसलाई सिल गरिएको उनले भने । के-कति कारणले तेल कमी भएको हो, त्यस सम्बन्धमा अनुसन्धान भइरहेको क्षेत्रीय प्रमुख यादवले जानकारी दिए । रासस
पाटा नेपालका संस्थापक अध्यक्ष राणाले पाए ‘लाईफ टाईम अचिभमेन्ट’ अवार्ड
काठमाडौं । प्यासिफिक एसिया ट्राभल एसोशियसन (पाटा) नेपाल च्याप्टर अवार्ड फर ‘लाईफ टाइम अचिभमेन्ट’को अवार्ड पर्यटन व्यवसायी तथा पाटा नेपालका संस्थापक अध्यक्ष प्रभाकर समशेर राणाले पाएका छन् । पाटा नेपालले उनलाई नेपालमा गुणस्तरीय पर्यटन पवद्र्धन तथा पर्यटन सेवाको विविध क्षेत्रमा पुर्याएको योगदानको उच्च कदर तथा सम्मान गर्दै उक्त अवार्ड पदान गरेको हो । मंगलबार ४२औँ वार्षिक साधारणसभाको अवसरमा पाटाले उक्त अर्वाड प्रदान गरेको हो । यसका साथै, पाटा नेपालले अन्य २ वटा अवार्डहरु प्रदान गरेको छ । नेपाल वायुसेवा निगममा महाप्रवन्धक सुगतरत्न कंसाकारलाई ‘पाटा पर्सनालिटी अफ द ईयर २०१८’ अवार्ड प्रदान गरिएको छ । वर्तमान परिप्रेक्षमा नेपाली पर्यटन क्षेत्रको प्रवद्र्धनमा उल्लेख्य योगदान पुर्याएकोमा उनको भूमिकाको कदर गर्दै उक्त अवार्ड प्रदान गरेको हो । त्यस्तै, नेपाल एकेडेमी अफ टुरिजम एण्ड होटल म्यानेजमेन्ट (नाथम) लाई ‘वेष्ट स्टुडेन्ट च्याप्टर अफ द इयर’ अवार्ड प्रदान गरेको छ । पाटाले आफ्ना सदस्य शैक्षिक संस्थाहरुमध्ये पाटा नेपाल स्टुडेन्ट च्याप्टरको उद्देश्य र भावना अनुरुप उत्कृष्ठ कृयाकलापहरु गरेकोमा प्रशंसा गर्दै उक्त अवार्ड प्रदान गरेको छ । उक्त सभाले आगामी आर्थिक वर्षमा अन्तराष्ट्रिय मार्ट तथा सेल्स मिसन, तेस्रो हिमालयन ट्राभल मार्ट २०१९, मानव संशाधन विकास सम्बन्धी तालिमहरु, पर्यटन सम्बन्धी अनुसन्धान-स्रोत पहिचान, प्रडक्ट डेभलपमेन्ट, मिडिया तथा ब्लगर्सहरुको परिचयात्मक भ्रमण तथा डेस्टिनेसन इमेज वील्डिङ्ग अभियानलगायतका कार्यक्रमहरु गर्ने निर्णय गरेको पाटाका प्रमुख कार्यकारी अधिकृत (सीइओ) सुरेशसिंह बुडालले जानकारी दिए ।
साईनिङ्ग स्टार सहकारीबाट ४ करोड ठगी गरी काठमाडौंमा घर किन्ने अजय महर्जन पक्राउ
काठमाडौं । सहकारीको ४ करोड रुपैयाँ घोटला गरेका साईनिङ्ग स्टार सेभिङ्ग एण्ड क्रेडिट कोअपरेटिभ लिमिटेडका तत्कालिन संचालक समिति सदस्य अजय महर्जन पक्राउ परेका छन् । महर्जनलाई केन्द्रिय अनुसन्धान ब्युरो (सीआईबीले) पक्राउ गरको हो । काठमाडौं महानगरपालिका वडा नं १३ ताहाचल बस्ने महर्जनलाई ठगी मुद्दामा काठमाडौं जिल्ला अदालतको २०७२ बैशाख १७ गते ४० लाख ७८ हजार ८८१ रुपैयाँ जरीवाना र २ वर्ष ८ महिना जेल सजाय तोकेको थियो । अदालतको फैसलापछि उनी वेपत्ता भएका थिए । महर्जनलाई व्यूरोको टोलीले असोज २२ गते सोमबार राजधानीको ताहाचलबाट पक्राउ गरेको सीआईबीका प्रहरी नायव उपरिक्षक निरन्जनदत्त भट्टले बताए । उनका अनुसार सीआइबीले फैसला कार्यान्वयनका लागि मंगलबार जिल्ला अदालतमा पेश गरिएको जनाएको छ । पक्राउ परेका महर्जनलाई कैद भुक्तानको लागि केन्द्रिय कारागार कार्यालय सुन्धारामा पठाएको छ । सहकारीको तत्कालिन संञ्चालक समितिमा रहेका महर्जनले आकर्षक ब्याज र उपहारको झुटा प्रलोभनमा देखाई बिभिन्न मितिमा निक्षेपकर्ताहरुबाट संकलित ४ करोड १७ लाख ५८ हजार ७०० रुपैयाँ हिनामिना गरी आफ्नो नाउँमा घर जग्गा खरिद गरी, निक्षेपकर्ताको साँवा र सोको ब्याज समेत फिर्ता नगरी ठगी गरेका थिए । ठगीमा संलग्न रोशनकुमार खड्गी र प्रकृति श्रेष्ठ समेत दुई जनालाई गत साउन १० गते पक्राउ गरिएको थियो ।
स्वायत्तता जोगाउन बीमा समिति संघर्षमा, बीमा क्षेत्रको विकास र सुशासन मै चुनाैति
काठमाडौं । बीमा समितिका अध्यक्ष चिरञ्जीवी चापागाईँले समितिको स्वायत्तता जोगाउन संघर्ष गर्ने घोषणा गरेका छन् । बीमा समिति कर्मचारी युनियनको दशैं शुभकामना आदान प्रदान कार्यक्रमलाई सम्बोधन गर्दै उनले बीमा सम्बन्धी कानुनलाई संसोधन र एकिकरण गर्न बनेको बिधेयक २०७५ मा समितिको स्वायत्तता खोसिएको बताएका हुन् । उनले खोसिएको स्वायत्तता जोगाउन कर्मचारी युनियनले समेत सहयोग गर्नुपर्ने धारणा राखे छन् । ‘अर्थमन्त्रालयले संसदमा पठाएको बिधेयक देख्नु भएकै छ, सानो सानो काम गर्न पनि मन्त्रालयको स्वीकृति लिनुपर्ने व्यवस्था छ, समितिको स्वायत्तता पुरै खोसेको छ, अब हामीले स्वायत्तता फर्काउन एकिकृत पहल गर्नु पर्नेछ, संघर्ष गर्नुपर्नेछ’, अध्यक्ष चापागाईँले भने । उनले बीमा समितिप्रति अर्थमन्त्रालय अनुदार देखिएको संकेत समेत गरेका थिए । बीमा ऐन २०४९ ले दिएको अधिकार समेत खोसेको चापागाईँले आरोप लगाए । ‘हामीले हाल प्राप्त गरिएको भन्दा पनि धेरै स्वायत्तता खोजेका थियौं तर बिधेयकले अहिलेका अधिकार समेत घटाएको छ, यसले बीमा क्षेत्रको विकास र सुशासनमै कमी आउन सक्छ’, अध्यक्ष चापागाईँले भने । उनले बीमा समितिको नियामकिय क्षमतामा उल्लेख्य सुधार भैरहेको, बीमा क्षेत्रको वृद्धि विकासमा पनि बढोत्तरी भएको बताएका थिए । ‘अहिले बीमा क्षेत्रको वृद्धि विकासले एउटा गति लिएको छ, हामी त्यसको उचित नियमनको प्रयास गरिरहेका छौं तर प्रस्तावित ऐनको बिधेयकले हाम्रो मनोबल उच्च बनाउने देखिएको छैन’, अध्यक्ष चापागाइँले कर्मचारीहरुसँग भने । उनले दशैं सकिए लगत्तै समितिको स्वायत्तताका लागि संघर्ष सुरु हुने धारणा पनि राखे । बीमा समितिका सबै कर्मचारी सहभागी रहेको शुभकामना आदान प्रदान कार्यक्रममा निमित्त कार्यकारी निर्देशक राजुरमण पौडेलले पनि शुभकामना दिएका थिए । कर्मचारी युनियनका अध्यक्ष पदम सोडारीले स्वायत्तता प्राप्तिका लागि समितिको नेतृत्वले चाल्ने हरेक कदममा युनियनले सहयोग गर्ने प्रतिवद्धता व्यक्त गरेका थिए ।
व्यापारिक तनावका कारणा विश्वको आर्थिक वृद्धिदर खुम्चदै, नेपालकाे वृद्धिदर ६ प्रतिशत नाघ्ने
वासिङ्टन । अन्तर्राष्ट्रिय मुद्रा कोषले बढ्दो व्यापारिक तनाव र ऋणको भारका कारण यस वर्ष (सन् २०१८) को विश्वको आर्थिक वृद्धिदर ३ दशमलव ७ प्रतिशतको हाराहारीमा रहने नयाँ प्रक्षेपण सार्वजनिक गरेको छ । आगामी वर्ष आर्थिक वृद्धिमा कमी आउन सक्ने कोषको भनाइ छ । संयुक्तराज्य अमेरिका र चीनबीचको बढ्दो व्यापार तनावले व्यापार क्षेत्रको वृद्धिमा कमी आउने भएकाले पनि कोषले सन् २०१८ र २०१९ को विश्वको आर्थिक वृद्धिदर ३ दशमलब ७ प्रतिशत कायम गरेको छ, कोषले सोमबार सार्वजनिक गरेको विश्व आर्थिक परिदृश्य प्रतिवेदनमा भनिएको छ । प्रतिवेदनमा विकासशील अर्थतन्त्र रहेका मुलुकहरुको आर्थिक परिदृश्यमा खासै वृद्धि नहुने अनुमान गरिएको छ । सन् २०१९ मा चीन र संयुक्तराज्य अमेरिकाको पनि आर्थिक वृद्धिमा कमी आउने कोषको अनुमान छ । संयुक्तराज्य अमेरिका र चीनबीचको व्यापार युद्धले चीन सहित अरु एसियाली मुलुकहरु र अर्जेन्टिना, टर्की तथा ब्राजिल समेतका मुलुकमा जोखिम निम्त्याउने छ । तर नेपालकाे वृद्धिदर भने ६ प्रतिशत भन्दा बढी हुने विश्व बैंकले जनाएकाे छ । विश्व बैंकले नेपालमा अागामी तीन वर्षसम्म अार्थिक वृद्धिदर ६ प्रतिशतभन्दा माथि रहने प्रक्षेपण गरेकाे छ ।
