अार्इएमर्इ ग्रुपले मौलाकालीमा केवलकार बनाउने, वातावरणीय प्रभाव मूल्याङ्कन सुरु
काठमाडौं । राजधानीको चन्द्रागिरीमा केवलकार स ञ्चालन गरिरहेको आईएमई ग्रुपले अर्को केवलकार बनाउने भएको छ । समूहले नवलपरासी पूर्व जिल्लाको धार्मिकस्थल मौलाकाली मन्दिरसम्म पुग्नका लागि केबलकार निर्माणको काम अघि बढाएको हो । आईएमई समूहले ५१ प्रतिशत लगानी गर्ने छ । ४९ प्रतिशत सर्वसाधारणको स्वामित्व हुने गरी लगानी संरचना तयार पारेको छ । मौलाकाली केवलकार प्राइभेट लिमिटेडले प्रस्तावित मौलाकाली केवलकार निर्माणका लागि वातावरणीय प्रभाव मूल्याँकन (ईआईए) को काम सुरु गरेको छ । केवलकारले सर्वसाधारणबाट ३० दिनभित्र रायसुझाव समेत मागेको छ । वन तथा वातारण मन्त्रालयबाट ईआईए स्वीकृति भएपछि केवलकार निर्माण अघि बढ्ने कम्पनीले जनाएको छ । केवलकार गण्डकी प्रदेशको नवलपरासी पूर्व जिल्लाको गैडाकोट नगरपालिकाको धारापानी टोलमा वेसस्टेशन तथा मौलाकाली मन्दिर परिसरमा टपस्टेशन रहने छ । ईआइए सकिएपछि विस्तृत आयोजना प्रतिवेदन डिपीआरको लागि काम अघि बढ्ने कम्पनीले जनाएको छ । यसअघि मनकामना र चन्द्रागिरी भालेश्वर मन्दिरमा केबलकार शुरु भैसकेका छन् । मैलाकाली मन्दिरमा केवलकार निमार्णको कागजी प्रक्रिया धेरै अघि बढीसकेको र सरकारका निकायहरुबाट उचित समन्वय भएमा एक वर्ष भित्रैमा केवुलकार सञ्चालन गर्ने तयारीमा रहेको आईएमई समूहका अध्यक्ष चन्द्रप्रसाद ढकालले बताइसकेका छन् । सार्वजनिक सुनुवाइमा उनले छिटै निमार्णको काम सुरु गर्ने जानकारी गराएका थिए । गैँंडाकोट मौलाकालिका मन्दिर फेदी धारापानी टोलमा १२ कठ्ठा जमीन खरीद गरी मौलाकाली केवलकार प्रालि दर्ता नै गरेर आइएमइ गु्रपले केवुलकार निमार्णका लागि अन्य प्राविधिक तयारी गरेको छ । मौलाकालिका मन्दिरमा दर्शनका लागि आन्तरिक र बाह्य गरी वार्षिक करीब १० लाख पर्यटक आउने गरेको अनुमान छ ।
बद्रीबहादुर खड्काको घरमा कौडा खेल्ने ६ जना यसरी परे पक्राउ
काठमाडौं । जुवातास खेलिरहेको अवस्थामा प्रहरीले छ जनालाई विदुरबाट पक्राउ गरेको छ । उनीहरूको साथबाट रु एक लाख ७६ हजार ७८५ समेत बरामद भएको जिल्ला प्रहरी कार्यालयका प्रमुख वसन्त कुँवरले जानकारी दिए । विदुर नगरपालिका–४ विदुर स्थित बद्रीबहादुर खड्काको घरमा उनीसहित छ जना ठूलो रकम बाजी राखेर तास खेलिरहेकोे अवस्थामा पक्राउ गरी कारबाहीका लागि अनुसन्धान शुरु गरिएको प्रहरीले जनाएको छ । पक्राउ पर्नेमा घरधनी ५४ वर्षका खड्का, ३२ वर्षीय कुमार लामा, ३६ वर्षीय हरि क्षेत्री, ४२ वर्षीय दीपक ओझा, ४७ वर्षीय बाबुराम तामाङ र ३४ वर्षीय सागर लामा छन् । उनीहरूले तास खेलिरहेको खाल स्थानबाट प्रहरीले नगद रु एक लाख ७६ हजार ७८५ समेत बरामद भएको जनाएको छ । रासस
काष्ठमाण्डप पुर्ननिर्माणका लागि महानगरपालिकाले दियो पाँच करोड
काठमाडौँ । काठमाडौँ महानगरपालिकाका मेयर विद्यासुन्दर शाक्यले भूकम्पले भत्किएको काष्ठमाण्डप पुर्ननिर्माण महानगरपालिककै खर्चमा गर्ने बताउनु भएको छ । हनुमानढोका दरबार क्षेत्र संरक्षण कार्यक्रमले आज आयोजना गरेको पत्रकार सम्मेलनमा बोल्दै उहाँले यस्तो बताउनुभएको हो । मेयर शाक्यले काष्ठमाण्डप पुननिर्माण समितिलाई काष्ठमाण्डप पुर्ननिर्माणका लागि आज पाँच करोडको चेक हस्तान्तरण गर्दै बाँकी रकम विस्तारै दिदैँ जाने बताए । मेयर शाक्यले काष्ठमण्डप पुननिर्माण समितिका अध्यक्ष राजेशकाजी शाक्यलाई ५ करोड रुपैयाँको चेक हस्तान्तरण गरेका हुन् । काष्ठमाण्डप पुननिर्माणका लागि करीब १८ करोड लाग्ने भन्दै मेयर शाक्यले सो रकम कसैसँग पनि सहयोग नमाग्ने बताए । काष्ठमाण्डप पुननिर्माण तीन तलाको हुने काष्ठमाण्डप पुननिर्माण समितिले जानकारी दिएको छ । मेयर शाक्यले आगामी असार मसान्तासम्ममा कम्तीमा एक तला पुर्ननिर्माणको काम सम्पन्न गर्ने पनि दाबी गरे । ‘हामी आगामी असार मसान्तासम्ममा कम्तीमा एक तल्ला पुर्ननिर्माण सम्पन्न गर्नेछौँ,’ चेक हस्तान्तरणपछि मेयर शाक्यले भने, ‘काठमाडौँ हनुमानढोका दरबार क्षेत्र संघीय राजधानीमा रहेको ऐतिहासिक–सांस्कृतिक नगरी हो । मुलुककै सर्वाधिक सम्पदास्थलहरु रहेको यो क्षेत्रको संरक्षण गर्नु हामी सबैको दायित्व पनि हो ।’ उनले काष्ठमाण्डप पुर्ननिर्माणका लागि कसैसँग सहयोग नमाग्ने पनि दाबी गरे । धेरैले सहयोगका लागि तत्परता देखाए पनि आफूहरुले स्वीकार नगरेको उनको भनाई छ ।
म्याक्स हेल्थकेयर नेपालमा आयो; मेडिसिटी, बिएनबि र स्टार हस्पिटल स्थानीय साझेदार
काठमाडौं । उत्तर भारतको एक अग्रणी स्वास्थ्योपचार सेवाप्रदायक संस्था म्याक्स हेल्थकेयरले नेपालमा सेवा विस्तार गरेको छ । कम्पनीले शनिवार एक समारोहबीच काठमाडौंमा अत्याधुनिक सुविधा सम्पन्न विरामी सहायता केन्द्रको शुभारम्भ गरेको हो । केन्या, म्यानमार, इराक, इथियोपिया, नाइजेरिया र उजवेकिस्तानमा सेवा सञ्चालन गर्दै आएको कम्पनीले नेपालमा पनि सेवा विस्तार गरेको हो । उपचारका लागि भारत जाने नेपालीहरुको संख्या उल्लेख्य भएकोले नेपालमा सेवा केन्द्र सञ्चालनमा ल्याएको कम्पनीले जनाएको छ । नेपालमा स्वास्थ्योपचार क्षेत्रमा निजी हस्पिटलहरु र डायग्नोस्टिक केन्द्रहरुको संख्यात्मक वृद्धि भएको अवस्थामा म्याक्स हेल्थकेयर नेपालमा आएको हो । ‘हामीले म्याक्स हेल्थकेयरमा नेपालबाट मात्रै वर्षेनी सयौं विरामीहरुलाई स्वास्थ्य सेवाप्रदान गर्ने गरेका छौं । यो नयाँ विरामी सहायता केन्द्र म्याक्स हेल्थकेयरले विश्वभरका विरामीहरुलाई विश्वस्तरीय स्वास्थ्यउपचार सेवा गर्न गरेको प्रतिबद्धताकै एक बिम्ब हो’ कम्पनीले जारी गरेको विज्ञप्तीमा भनिएको छ । कम्पनीका अनुसार विरामी सहायता केन्दको शुभारम्भसँगैं म्याक्स हेल्थकेयर, नयाँ दिल्लीद्वारा उपलब्ध गराइरहेको विश्वस्तरीय स्वास्थ्य उपचार सेवामा नेपालका जनताहरुको पनि पहुँचपुग्नेछ । विरामीहरुले टाढै बसेर टेलि–परामर्शको मद्दतले सम्भावित जिज्ञासाहरुको समाधान प्राप्त गर्न समर्थ हुनेछन् । यस विरामी सहायता केन्द्रले नेपालमा म्याक्स हेल्थकेयरका डक्टरहरुद्वारा शल्यक्रिया सम्बन्धी सुविधा पनि प्रदान गर्नेछ र म्याक्स हेल्थकेयरमा उपचार गराई फर्किएका नेपाली विरामीहरुलाई फलो–अप उपचार सेवा पनि उपलब्ध गराउनेछ । ‘हामीले प्रत्येक महिना ४० जना विरामीहरुलाई नजिकबाट हेरिरहेका छौं’ कम्पनीले भनेको छ ‘हामीसँग हरेक महिना ७०–८० जना विरामीहरुले सेवा लिने अपेक्षा गरिरहेका छौं ।’ ‘हाम्रो लक्ष्यभनेको स्थानीय स्वास्थ्योपचार सेवा प्रदायकहरु बिएनबि हस्पिटल, स्टार हस्पिटल, मेडिसिटी, आदिसँग नजिकमा रहेर काम गर्ने, क्लिनिसियनहरु र नर्सिङ स्टाफहरुको एक कार्यदल खडा गर्ने रहेको छ । एकीकृत कार्यक्रमअन्तर्गत डक्टर र स्टाफ प्रशिक्षण कार्यक्रमहरु, म्याक्स हेल्थकेयरका विज्ञहरुबाट स्थलगत परामर्शहरु र प्रक्रियाहरु एवं हस्पिटल व्यवस्थापनमा प्रभावकारिता अभिवृद्धि गर्ने रहेका छन्’ सिटिभिएस दिल्ली एण्ड एनसिआर, कार्डियाक साइन्स–कार्डियोथोरासिक एण्ड भास्कुलर सर्जरी, म्याक्स सुपर स्पेसियालिटी हस्पिटल, साकेतकासिनियर डाइरेक्टर डाक्टर रजनीस मल्होत्राले पत्रकार सम्मेलनलाई सम्बोधन गर्दै भने । म्याक्स हेल्थकेयरले उत्तर भारतको १२ स्थानहरुमा ३० वटाभन्दा बढी मेडिकल तहहरु संचालन गर्दछ । यसमध्ये दिल्ली र एनसिआरमा ९ वटा छन् भनें बाँकी अन्य मोहाली, बथिण्डा र देहरादुनमा रहेका छन् । म्याक्स हेल्थकेयरको सञ्जालमा रहेका १२ वटा हस्पिटलहरुसँग २,२०० डाक्टरहरु, ९,३ ०० कामदारहरुको संलग्नता छ भनें ८० भन्दा बढी राष्ट्रका २५ लाख विरामीहरुले उपचार गराएको रेकर्ड छ ।
निजी लगानीमा कोल्डस्टोर निर्माण अन्तिम चरणमा, बैशाखदेखि सञ्चालमा आउने
बाँके । बाँकेको खजुराखुर्दमा निमार्णाधीन शीत भण्डार (कोल्ड स्टोर) सञ्चालनको अन्तिम तयारीमा रहेको छ । डेढ वर्षदेखि निर्माण शुरू गरिएको उक्त शीत भण्डारको क्षमता १० हजार टन रहेको छ । जानकी गाउँपालिकाको खजुराखुर्दमा २५ करोड रुपैयाँको लागतमा निजी क्षेत्रबाट निर्माण भइरहेको उक्त शीत भण्डारमा पहिलो चरणमा सात हजार टन मात्र वस्तु राखिने बताइएको छ । आगामी वर्षदेखि सञ्चालनमा ल्याउने गरी तयारी भइरहेको शीत भण्डारका सेयर सदस्यसमेत रहेका जडीबुटी व्यवसायी सङ्घका महासचिव टङ्क शर्माले जानकारी दिए । नेपालगञ्जबाट झण्डै पाँच किलोमिटर पश्चिम खजुराखुर्दमा दुई बिघा जग्गामा नेपालगञ्ज कोल्ड स्टोरेज एण्ड वेयर हाउस प्रालिको निर्माण अन्तिम चरणमा पुगेको उनले बताए। उनका अनुसार अब निर्माण भएको भवनको रङ्गरोगनलगायत करीब २० प्रतिशत मात्रै काम बाँकी रहेको छ । जग्गा खरिद भई निर्माण कार्यको औपचारिक सुरुवात २०७१ सालदेखि भएपनि गत वैशाखदेखि निर्माण कार्यलाई तीब्रता दिइएको थियो । उक्त भण्डारमा कर्णालीको स्याउ, तरकारी र आलु भण्डारण गर्ने लक्ष्य रहेको छ । साविकका मध्य र सुदूरपश्चिमका किसानको उत्पादनलाई भण्डारण गर्ने लक्ष्यसमेत राखिएको छ । शीत भण्डारको अभावमा यस क्षेत्रको जडीबुटी भण्डारणका लागि भारतको लखनउलगायतका शहरमा निर्भर हुनुपर्ने बाध्यता अन्त्य हुने अपेक्षा राखिएको छ । सरकारले अहिलेसम्म उक्त भण्डार निर्माणका लागि ९९ लाख रुपैयाँ सहयोग उपलब्ध गराएको छ । नेपालगञ्जका विभिन्न ८ व्यवसायीको लगानीमा निर्माण भएको उक्त भण्डारमा आधुनिक एसी प्रविधिबाट वस्तुलाई चिस्यान दिइनेछ । उक्त भण्डारमा बाँके, बर्दिया, कर्णाली र सुदूरपश्चिम प्रदेशबाट उत्पादन भई आउने तरकारी, फलफूलका साथै जडीबुटीलाई समेत राखिने जनाइएको छ । रासस
कृषि उत्पादनको क्यानिङ र प्याकेजिङ उद्योग खाेल्न ७० प्रतिशत सरकारी अनुदान
काठमाडौं । कृषि उपजको व्यवसायीक र बजारीकरणका लागि सरकारले क्यानिङ तथा प्याकेजिङ उद्योग स्थापना गर्नेलाई ७० प्रतिशत पुँजीगत अनुदान दिने भएको छ । कृषि तथा पशुपंक्षी मन्त्रालयले लागत सहभागिताका आधारमा क्यानिङ तथा प्याकेजिङ उद्योग स्थापनाका लागि निजी क्षेत्रबाट प्रस्ताव आब्हान गरेको छ । उद्योग स्थापना गर्न चाहाने उद्योगीले ३१ दिनभित्र शिलबन्दी प्रस्ताव आब्हान गरेको छ । कृषि उपजको उत्पादनपछिको क्षति न्युनिकरण, गुणस्तर प्रवद्र्धन, व्यवसायिक तथा औद्योगिक उत्पादन र बजारिकरणमा सहयोग पुर्याउन परियोजनाले उद्योग स्थापना गर्नका लागि अनुदान दिने तयारी गरेको हो । मन्त्रालय अन्तर्गतको प्रधानमन्त्री कृषि आधुनिकीकरण परियोजनाले पहिलो चरणमा काभ्रे जिल्लामा प्रतिस्पर्धाका आधारमा अनुदान सहयोग गरेर उद्योग स्थापना गर्न लागेको हो । उद्योगीले ३० प्रतिशत स्वपुँजी लगानी गर्नुपर्ने छ । सो लगानी कम्पनीको जग्गा र चालुखर्चमा समावेश गर्न नपाइने भएको छ । उद्योग स्थापनाको अवधि, क्षमता र प्रकृतिअनुसार बढीमा २ वर्षको हुने प्रधानमन्त्री कृषि आधुनिकीकरण परियोजनाले जनाएको छ । उद्योग स्थापना गर्न आवश्यक जग्गा सञ्चालकको आफनै हुनुपर्ने भएको छ । उद्योग स्थापना हुने प्रस्तावित जग्गामा सडक, बिजुलीलगायत पुर्वाधार तयार हुनुपर्ने परियोजनाले जनाएको छ । उद्योगलाई अनुदान दिन छनौट गर्दा प्रतिस्पर्धाका आधारमा मूल्याँकन गरिने भएको छ । उद्योगीले प्रस्ताव गर्ने व्यवसायिक योजनामा कार्यविधिले तोके बमोजिम न्युनतम उत्तिर्ण अंक सहित कम्तिमा ७० प्रतिशत अंक प्राप्त गर्नुपर्ने परियोजनाले जनाएको छ । कृषि उपजको उत्पादनपछिको क्षति न्युनिकरण, गुणस्तर प्रवद्र्धन, व्यवसायिक तथा औद्योगिक उत्पादन र बजारिकरणमा सहयोग पुर्याउन परियोजनाले उद्योग स्थापना गर्नका लागि अनुदान दिने तयारी गरेको हो ।
सामाजिक सञ्जाल फेसबुक पनि ह्याकरको पहुंँचमा, ३ करोड प्रयोगकर्ताको विवरण चोरी
सानफ्रान्सिस्को । विश्वकै सबैभन्दा चर्चित सामाजिक सञ्जाल कम्पनी फेसबुक इंकले आफ्ना करिब २ करोड ९० लाख प्रयोगकर्ताको व्यक्तिगत विवरणमा ह्याकरको पहुँच रहेको जनाएको छ ।फेसबुकले यसअघि साइबर आक्रमणका कारण ५ करोड प्रयोगकर्ताका एकाउन्टमा प्रभाव परेको जनाएको थियो । “अहिले हामीले के थाहा पाएका छौं भने सोचिएभन्दा केही कम व्यक्तिलाई असर परेको छ,” फेसबुकका उपाध्यक्ष गाए रोसेनले बताए । पहिचान अझै नखुलेका केही व्यक्ति (ह्याकर) ले करिब १ करोड ५० लाख फेसबुक प्रयोगकर्ताको नाम, फोन नम्बर र इमेल ठेगाना चोरेको उनले जानकारी दिए ।अरु १ करोड ४० लाख प्रयोगकर्ताका विवरण पनि जोखिममा रहेका छन् । फेसबुकले साइबर आक्रमणकारीले प्रयोगकर्ताका अरु विवरणहरु जस्तै लिङ्ग, धर्म, गृहनगर, जन्ममिति र स्थान तथा हालै भ्रमण गरेका ठाउँ पनि सङ्कलन गरेको जनाएको छ । यस आक्रमणबाट फेसबुकले सञ्चालन गरेका मेसेन्जर, मेसेन्जर किड्ज, इन्स्टाग्राम, ह्वाट्सएप, ओक्युलस, वर्कप्लेस, पेजेज, पेमेन्टमा असर नगरेको कम्पनीले बताएको छ ।क्यालिफोर्नियास्थित फेसबुक कम्पनीले यस घटनाका सम्बन्धमा अमेरिकी सङ्घीय जाँच ब्यूरो (एफबीआई), अमेरिकी सङ्घीय व्यापार आयोग, आइरिस डाटा प्रोटेक्सन कमिसन तथा अरु निकायसँग छलफल थालेको छ । रासस÷एएफपी
नेपालमा वाथ रोगीको संख्या बढ्दो; धुम्रपान, बढी तौल र विलासी जीवनशैली मुख्य कारण
काठमाडौ । मानिसको जीवनशैलीमा आएको परिवर्तनका कारण बाथरोगले दिनानुदिन बढी व्यक्तिलाई ग्रसित पार्दै छ ।विश्व बाथरोग दिवशका अवसरमा नर्भिक अस्पतालले गरेको जनचेतनामूलक कार्यक्रममा दिइएको जानकारी अनुसार सबै उमेर समूहका मानिस बाथरोगबाट ग्रसित हुँदै आएका छन् । बाथरोग र अस्थिपञ्जर सम्बन्धी रोग झण्डै २०० भन्दा बढी प्रकारका रहेका छन् । बाथरोग लागिसकेपछि सामान्यतया रोग लागेको भाग वा अङ्ग दुख्ने, चलाउन कठिन पर्ने, कक्रक्क पर्नेआदि समस्या देखा पर्दछ । धूमपान, बढी तौल तथा अनावश्यक मोटोपना, वंशानुगत कारण मानिसमा बाथरोग लाग्ने जोखिम बढ्ने गर्छ । बाथरोग सम्बन्धी जनचेतनाको अभिवृद्धि गराउन सो अस्पतालले आज बिहान एक प्रभातफेरी कार्यक्रमको आयोजना गर्यो । नर्भिक प्राङगणबाट शुरु भई थापाथली, त्रिपुरेश्वर, सुन्धारा, न्यूरोड गेट, कमलपोखरी, कालोपूल, जयवागेश्वरी, गौशाला, पुरानो बानेश्वर, बबरमहल हुँदै नर्भिकको प्राङगणमा आएर समापन भएको थियो । कार्यक्रममा बाथरोगीका अलावा सर्वसाधारण, चिकित्सकसहित करीब १५० जनाको सहभागिता थियो । विश्व बाथरोग दिवस हरेक वर्ष अक्टोबर १२ मा विश्वभर मनाइन्छ । सोही अवसरमा नर्भिकका नायब महाप्रबन्धक आरपी मैनालीले प्रत्येक तीन नेपालीमध्ये एकलाई जीवनको कुनै न कुनै क्षणमा कुनै न कुनै प्रकारको बाथरोगले दुःख दिने गरेको बताए। बाथरोग वा मांशपेशी र अस्थिपञ्जरसम्बन्धी रोग लागिसकेका वा लाग्नसक्ने जोखिममा रहेका व्यक्तिलाई उपचारतर्फ उन्मुख गराई सजग गराउनु, रोग रोकथाम तथा नियन्त्रणतर्फ उन्मुख गराउनका लागि कार्यक्रम गरेको नर्भिकका बाथरोग विशेषज्ञ डा अरुणकुमार गुप्ताले बताए।नेपालमा करीब १० लाख भन्दा बढी जनसङ्ख्या यस रोगबाट पीडित भएको अनुमान गरिएको छ । रासस
