मुख्यमन्त्री पौडेल भन्छन्-परियोजना बैंकको कार्यान्वयन छिट्टै हुन्छ
हेटौंडा । ३ नम्बर प्रदेशका मुख्यमन्त्री डोरमणि पौडेलले प्रदेश सरकारले शुरु गर्न लागेको परियोजना बैकलाई छिट्टै नै कार्यान्वयनको चरणमा लगिने बताएका छन् । आईतबार मुख्यमन्त्री तथा मन्त्रिपरिषदको कार्यालयमा भएको छलफलमा बोल्दै उनले पहिलो चरणमा प्रदेश सरकारले आफ्ना सातवटै मन्त्रालयले गर्ने कामका योजनाहरुलाई परियोजना बैंकमा राखेर मात्र कार्य प्रकृया अगाडि बढाईने बताए । योजनाहरु हरेकका खल्तीबाट आउन लागेको भन्दै मुख्यमन्त्री पौडेलले परियोजना बैंकमा समाबेश योजनाहरुलाई प्राथामिकतामा राखिने बताए । ‘परियोजना बैंक बनेपछि खल्तीबाट आउने योजनाहरुको अन्त्य हुनेछ’–मुख्यमन्त्री पौडेलले भने । व्यक्तिका खल्तीबाट आउने योजनाहरुलाई निरुत्साहित गर्दै संस्थागत योजनाहरु कार्यान्वयनमा परियोजना बैकको भूमिका महत्वपुर्ण हुने उनको भनाई छ । चालु आर्थिक बर्षका योजनाहरु सुरु भईसकेकाले आगामी आर्थिक बर्षमा परियोजना बैंकका योजनाहरु कार्यान्वयनमा लैजाने सरकारको तयारी छ । चालु आर्थिक बर्षभित्र नै परियोजना बैंक निर्माण गरी आगामी आवबाट लागू गर्ने गरी तयारी भएको राष्ट्रिय नीति तथा योजना आयोगका उपाध्यक्ष डा। खिमलाल देवकोटाले जानकारी दिए । बैंकको स्थापना पछि व्यक्तिगत स्वार्थ भन्दा पनि सामाजिक आबश्यकका आधारमा छनौट गर्ने र कार्यन्वनका चरणमा लैजाने पनि सरकारले योजना अगाडि सारेको छ । परियोजना बैंक योजना कार्यान्वयनमा विभिन्न समस्या हुने भन्दै प्रदेश सरकारले परियोजना बैंक स्थापनाको कार्यलाई तिब्रता दिन लागेको हो । परियोजना बैकको पहिलो चरणको खाका तयार पारेको आर्थिक मामिला तथा योजना मन्त्रालयका सचिब केबल भण्डारीले मुख्यमन्त्री तथा मन्त्री परिषदको कार्यालयमा प्रस्तुती समेत गरे । कार्यक्रममा विभिन्न प्रदेशका मन्त्रालयका सचिबहरु समेत सहभागि थिए ।
एनआईसी एशियाको शाखा सुनसरीको प्रकाशपुर र इनरुवामा
काठमाडौं । एनआईसी एशिया बैंकको २ नयाँ शाखा कार्यालय सुनसरीका प्रकाशपुर र इनरुवामा विस्तार भएको छ । इनरुवानगरपालिका वडा नं.१ शान्तिचोक स्थित इनरुवाशाखाको इनरुवा नगरपालिकाका मेयर राजन मेहताबाट र बराहक्षेत्र १०, सुनसरी स्थित प्रकाशपुर शाखाको बराह क्षेत्र नगरपालिकाका मेयर निलम खनालबाट समुद्घाटन भएको छ । मुलुकभर २७० शाखा कार्यालयहरु, २८६ एटिएम, ३७ वटा एक्सटेन्सन काउण्टर एवं २० वटा शाखा रहित बैंकिङ्ग ईकाई मार्फत बैंकिङ्ग सेवा प्रदान गरेको छ । बैंकको वासलातको आकार रू. २१० अर्ब भन्दा बढि पुगेको छ भने कुलनिक्षेप करिब रू. १६८ अर्ब तथा कर्जा रू. १५५ अर्ब पुगेको छ । हालसम्म यस बैंकमा ग्राहकको संख्या करिब १४लाख रहेको छ ।
पहाड फोडेर काठमाडौं र तराई/मधेश जोड्दै फास्ट ट्रयाक, युद्धस्तरमा काम गर्दै नेपाली सेना
काठमाडौं । तराई मधेश र पहाडको सिधा दुरी धेरै नभएपनि भौगोलिक अवस्थितीले निकै टाढा रहेको अनुभूति दिलाईरहेको छ । यतिबेला काठमाडौं र तराईलाई जोड्ने चार विकल्प छन, पहिलो हो नारायणगढ मुग्लिन हुँदै नागढुंगा सडक, दोश्रो सडक हो हेटौँडा दामन हुँदै नौबिसे काठमाडौं सडक । तेश्रो विकल्पका रुपमा हेटौँडा कुलेखानी काठमाडौं सडक । र, चौथो विकल्पका रुपमा बर्दिबास सिन्धुली धुलिखेल सडक । यी सबै सडकबाट तराई मधेश हुँदै काठमाडौं आईपुग्न कम्तिमा आधा दिन खर्चनु पर्छ । https://bikashnewscdn.prixacdn.net/uploads/2018/12/fast_rack.mp4 तर, अबको केहि बर्षभित्रै काठमाडौं र तराई मधेशको दुरी एक घण्टामै छोटिँदै छ फास्ट ट्रयाकबाट । काठमाडौंबाट निजगढको दुरीलाई फास्ट ट्रयाकले ७६.२ किलोमिटर दुरीमा सिमित गर्दैछ । अझै सुरुङको संख्या र लम्बाई बढाउँदो संघिय राजधानी र तराई मधेशको दुरी ७३ किलोमिटरमै छोटिँदैछ र यात्रा एक घण्टा भन्दा कम समयमै सम्पन्न हुँदैछ । हो, त्यति सडकको नाम हो काठमाडौं तराई मधेश द्रुत मार्ग जसलाई छोटकरीमा फास्ट ट्रयाकको नामले चिनिन्छ । यतिबेला नेपाली सेनाको टोलीले तराई मधेश र पहाड जोड्ने फास्ट ट्रयाक निर्माणका लागि धमाधम पहाड फोरिरहेको छ । महाभारत, शिवालिग र चुरे पर्वत फोेरेर सेनाले देश भित्रको दुरी मेट्दैछ । प्रतिकिलोमिटर १२० घण्टाको स्पीडमा यहाँ सवारी साधनहरु गुड्नेछन् । एसियाली मापदण्डको यो सडक देशको समृद्धिमा कोशे ढुंगा सावित हुनेछ । सेनाले १० ठाउँमा क्याम्प खडा गरेर युद्धस्तरमा काम गरिरहेको छ । सांसद टोली स्थलगत अध्ययनमा संघिय संसदको विकास तथा प्रबिधि समिति सभापति कल्याणीकुमारी खड्का नेतृत्वको संसदिय समितिले फास्ट ट्रयाक निर्माणको स्थलगत अध्ययन गरेको छ । पूर्व प्रधानमन्त्रीहरु माधवकुमार नेपाल र झलनाथ खनाल, पूर्व मन्त्री प्रभु शाह, अनिल झा, सांसदहरु दामोदर भण्डारी, गणेश पहाडी, इन्दु शर्मा सहित सञ्चार कर्मीहरुको टोलीले धमाधम निर्माण भैरहेको सडकको अवलोकन गरेका थिए । सेनाले युद्धस्तरमै काम गरेको देखेपछि सांसदहरुको टोलीले समयमै सडक निर्माण हुनेमा आशावादी रहेको प्रतिक्रिया जनाए । यद्यपी सेनाले निर्माण गरेका स्थायी प्रकृतिको भौतिक संरचनाले भने मितव्ययीतामा केहि प्रश्न उठाएको उनीहरुले बताए । त्यस्तै, सडक निर्माणका क्रममा वातावरणीय पक्षलाई पनि ध्यान दिनुपर्ने सांसदहरुको निष्कर्ष रह्यो । पूर्व प्रधानमन्त्री माधव नेपालले सेनाको कामबाट सडक निर्माणमा सन्तोष गर्ने ठाउँ देखिएको बताए ।‘यो सडकको ट्रयाक खोल्ने जिम्मा सेनालाई मेरै सरकारले दिएको थियो, शिलान्यास गर्न पनि मै आउने सोँचेको थिएँ तर भ्याइन, अहिले निर्माणको समेत जिम्मेवारी पाएको सेनाले जुन रफ्तारमा काम गरिरहेको छ, त्यसले आशा जगाएको छ’, पूर्व प्रधानमन्त्री नेपालले भने । समिति सभापति कल्याणी खड्काले पनि सेनाले गरिरहेको निर्माण कार्य सराह्रनिय भएको बताईन् ।‘नेपाली सेनाले द्रुतगतिमा काम गरिरहेको छ, यो गतिलाई अझै बढाउन हामीले सघाउनु पर्छ, समयमै काम सम्पन्न गर्न के सहयोग गर्नुपर्ने हो त्यसका लागि समिति तयार छ’, खड्काले भनिन् । यद्यपी वित्तिय अनुशासनका सवालमा भने समिति सधै चनाखो रहने सभापति खड्काले बताईन् । ठेकेदारमा पनि दंग बुदुनेमा पहाड काट्ने जिम्मेवारी पाएको मृत सञ्जीवनी कन्स्ट्रक्सनका सञ्चालक बिरबहादुर लामाले सेनाकै स्पीडमा काम गरिएको बताए । ‘एक दिन काम रोकियो भने सेनाको टोली घरमै लिन जान्छन्, हामी सेनाले जसरी नै युद्धस्तरमा काम गरिरहेका छौं,स्थानीय अवरोध पनि सेनाले नै हटाउँछ, पैसा भुक्तानीमा पनि कुनै समस्या छैन्’, ठेकेदार कम्पनीका सञ्चालक लामाले भने । बदुनेको पहाड फोड्ने आफ्नो जिम्मेवारी समयमै सम्पन्न गरेर सेनालाई हस्तान्तरण गर्न लागेको पनि उनले जानकारी दिए । युद्ध जस्तै कठिन कामः सेना सेनाको फास्ट ट्रयाक आयोजनाका प्रमुख योगेन्द्र खाँणलेपनि युद्ध जस्तै कठिन जिम्मेवारीलाई कुशलता पुर्वक सम्पन्न गर्ने बताए ।
गौतमबुद्ध अन्तर्राष्ट्रिय विमानस्थलको काम तीब्र, दोस्रो चरणको टेन्डर अन्तिम चरणमा
काठमाडौं । दोस्रो अन्तर्राष्ट्रिय विमानस्थलको रुपमा हेरिएको गौतम बुद्ध विमानस्थल निर्माणको काम तीब्र गतिमा अघि बढेको छ । नेपाल भ्रमण वर्ष २०२० लाई लक्षित गरी तीब्र गतिमा काम अघि बढाएको हो । अहिले हवाई पूर्वाधार र जमिन पूर्वाधारको काम धमाधम भैरहेको छ । पूर्वाधारका १२ विधामा ६० प्रतिशत काम सकिएको नागरिक उड्ययन प्राधिकरणका प्रवक्ता बिरेन्द्र श्रेष्ठले बताए । उनका अनुसार विमानस्थलमा हाल २४ घण्टा नै काम भैरहेको छ । कात्तिक १५ गतेदेखि सुरु भएको धावनमार्ग कालोपत्रेको काम अबको ६ महिनामा सकिनेछ । हाल विमानस्थलको ३ हजार मिटर लामो र ४५ मिटर चौडाइको रनवे, ट्याक्सी वे, घाङग्रा खोला, सहायक रोड, टर्मिनल बिल्डिङ, प्यासेन्जर बिल्डिङ, कन्ट्रोल टावर, एयर कार्गो, सब स्टेशन बिल्डिङको काम भैरहेको छ । आयोजनामा चालु आर्थिक वर्षको लागि ६ अर्ब ८३ करोड रुपैयाँ बजेट विनियोजन गरिएको छ । ५ महिनामा यस आयोजनामा ३ अर्ब ३९ करोड खर्च भैसकेको छ । विमानस्थलको टेक्निकल काम तर्फको टेण्डरको काम अन्तिम चरणमा पुगेको प्रवक्ता श्रेष्ठले बताए । टेक्निकल कामतर्फ भ्वाइस् कम्यूनिकेटिङ कन्ट्रोल प्रणाली, एटीएम कम्युनिकेशन, मेटोरोलोजिकल इक्युप्मेन्टस्, एटीएम कन्सोलेस्, इस्टुमेन्ट ल्याण्डिङ सिस्टम लगायत कामको लागि टेन्डर अन्तिम चरणमा पुगेको छ । यसका लागि एडीबीका प्रतिनिधि समावेश टोलीले केहि दिनमै कम्पनी छनोट गर्ने प्रवक्ता श्रेष्ठले बताए ।
राष्ट्रिय बीमा र नेपाल पुनर्बीमा कम्पनीबीच ५०प्रतिशत पुनर्बीमा सम्झौता
काठमाडौं । राष्ट्रिय बीमा कम्पनी र नेपाल पुनर्बीमा कम्पनीबीच भएको ५० प्रतिशत पुनर्बीमा सम्झौता भएको छ । कम्पनीको केन्द्रीय कार्यालय रामशाहपथ काठमाडौंमा राष्ट्रिय बीमा कम्पनीको तर्फवाट प्रमुख कार्यकारी अधिकृत बीरविक्रम रायमाझी र नेपाल पुनर्बीमा कम्पनीको तर्फवाट प्रमुख कार्यकारी अधिकृत चिरायु भण्डारीले यस सम्वन्धी सम्झौतापत्रमा हस्ताक्षर गरेका छन् । उक्त सम्झौतामा बीमा शुल्क तथा बीमा दाबीमा दुबै कम्पनीको समान सहभागिता रहेको छ । उक्त सम्झौता पश्चात कम्पनीले जारी गरेको कर्मचारी संचयकोषका ६ लाख संचयकर्ताहरुको वार्षिक १ लाख रुपैयासम्मको औषधोपचार र १० लाख रुपैयासम्मको घातक रोगको उपचारको लागि पुनर्बीमा ब्यवस्था भएको छ ।
घरेलु काममा रमाउँदै महिला श्रमिक, कस्तो काम गर्छन् ?
ललितपुर । वैदेशिक रोजगारीमा गएका श्रीमान फर्किएर पनि नआउने र उताबाट पैसा पनि नपठाउँदा अञ्जना पाठकले घरेलु श्रमिकका रुपमा काम गर्न थालेकी थिइन् । त्यतिबेला काम गर्दा अरुको भान्सामा काम गर्ने, भाँडा माझ्ने र लुगा धुने भन्दै धेरैले त्यो कामलाई अपहेलना गर्थे । समाजले सम्मान नगरेपनि बाध्यताले गर्दा उनले काम छाड्न सक्नुभएन र निरन्तरता दिइरहिन् । सामाखुशी र आसपासका परिवारमा काम गर्दागर्दै उनी श्रमिक सङ्गठनमा संलग्न भइन् । त्यतिबेला भन्दा अहिले मजदूर एक भएकाले मजदूरका अधिकार स्थापित हुँदै गएको उनको अनुभव छ । धेरै दिदीबहिनी विदेशमा घरेलु श्रमिकका रुपमा गएर दुःख पाएर फर्किरहँदा उनी भने खुशी भएर स्वदेशमै काम गर्छिन । आफ्ना दिदीबहिनी र साथीलाई समेत घरेलु श्रमिकका रुपमा काम गर्न उनी सल्लाह दिन्छिन् । उनले भनिन्, “विदेशको कानून फरक भएकाले दुःख भए पनि यहाँ काम गर्दा त्यस्तो समस्या पर्दैन ।” घरेलु श्रमिकका रुपमा काम गर्न विदेशमा भन्दा स्वदेशमा सजिलो भएको अञ्जनाले बताइन् । दिनभर काम गरेपनि बिहान साँझ आफ्ना सन्तानसँग टाढा हुनु पर्दैन । उनी एकै दिनमा दुई तीन वटा घरसम्म काम गर्छिन् । कुनै घरमा भान्साको काम मात्रै त कतै बालबालिका र कतै ज्येष्ठ नागरिकको हेरचाह गर्छिन् । उनी भन्छिन्, “विदेशिका आमाबुबा र छोराछोरी हेर्नु भन्दा थोरै पैसामा भए पनि नेपालीका घरपरिवारमा काम गरौं भनेर विदेशबाट फर्किएकालाई सम्झाउँछु ।” विदेश जानका लागि एक दशक पहिले काठमाडौँ आएकी मनिषा घिमिरे अहिले बसुन्धाराको एउटा घरमा काम गर्छिन् । अरुको लहैलहैमा उनी साउदी अरब जाने योजना बनाउँदै थिइन् । घरेलु श्रमिकका रुपमा गएका मानिसको त्यहाँ हत्या भएको सुनेपछि डराएर स्वदेशमै केही गर्ने योजना बनाइन् । नजिकैका घरबाट बोलाएपछि उनी बिहान साँझ यो काम गर्न थालिन् । अहिले भने पूरै समय एउटा परिवारका लागि काम गर्छिन् । यही कामबाट कमाएरै मनिषाले छोरालाई पढाएकी छिन् । । विदेशमा बगाउने पसिना यहीँ बगाउँदा राम्रो कमाउन सकिने उनको अनुभव छ । उनले भनिन्, “यहाँ पनि १८ घण्टा काम गर्दा उता बराबर कमाउन नसकिएला, तर परिवार पाल्न सक्ने कमाइन्छ ।” काठमाडौँ उपत्यकालगायतका शहरी क्षेत्रमा एकल परिवार बढ्दै जाँदा वा कामकाजी महिला बढ्दा घरेलु श्रमिकको सङ्ख्या बढ्दै छ । काम अनुसारको पारिश्रमिक नपाए पनि धेरै श्रमिकले यही कामबाट जीविकोपार्जन समेत गरिरहेका छन् । पहिले सम्मान नभएको कामका रुपमा लिइएको घरेलु श्रमलाई विस्तारै परिवार र समाजले स्वीकार गर्न थालेको घरेलु श्रमिक बताउँछन् । शर्मिला खत्री मैतीदेवीमा एउटी वृद्धाको स्याहार गर्छिन् । त्यस घरका श्रीमान श्रीमती नै कार्यालय गएदेखि फर्किएर आउँदासम्म वृद्धालाई खाना र औषधि खुवाउने, लुगा धुनेलगायतका काम गर्नुहुन्छ । श्रीमान्ले अर्को विवाह गरेपछि उनले यो घरमा काम शुरु गरेकी थिइन् । कतिपय महिला श्रीमानलाई आर्थिक रुपमा सहयोग गर्ने उद्देश्यले घरेलु श्रमिकका रुपमा काम गरेका छन् भने धेरैले श्रीमानले अर्को विवाह गर्दा, आर्थिक सहयोग नगर्दा वा श्रीमान नकमाउँदा काममा लागेका छन् । श्रीमान आर्थिक सहयोग नगर्दा पनि महिलाले खान बस्नदेखि सन्तानको शिक्षा यही कामबाट पूरा गरिरहेका छन् । रासस
स्ट्याण्डर्ड चार्टर्डको लाभक्रेडिट कार्ड धनीलाई भाटभटेनीले दियो पहिलो कारोबारमा २५ प्रतिशत छुट
काठमाडौं । स्ट्याण्डर्ड चार्टर्ड बैंक नेपाल र सुपर मार्केट भाटभटेनी सुपर मार्केट डिपार्टमेन्ट स्टोरबीच व्यापारिक सहकार्यमा भएको छ । स्ट्याण्डर्ड चार्टर्ड लाभक्रेडिट कार्ड धनीले भाटभटेनीमा पहिलो पटकको कारोबारमा २५ प्रतिशत नगद फिर्ता पाउनेछन् । यसका अतिरिक्त, सह–ब्राण्डको कार्डबाहकहरुले भाटभटेनी सुपर मार्केटहरुमा किनमेल गर्दा पहिलो ३ महिनाको लागि तत्काल १० प्रतिशत छुट प्राप्त गर्नेछन् । यो सह–ब्राण्डको कार्ड योग्य ग्राहकहरुलाई स्ट्याण्डर्ड चार्टर्ड बैंक नेपालद्वारा निःशुल्क उपलब्ध गराइनेछ । सहकार्यलाई स्मरणीय बनाउन स्ट्याण्डर्ड चार्टर्ड बैंकले आफ्ना सबै क्रेडिट कार्ड धनीहरुका लागि भाटभटेनी सुपरमार्केटमा विद्युतीय उपकरणहरुको खरीदमा ० प्रतिशत स्टा बाइ प्रदान गर्ने घोषणा गरेको छ । स्ट्याण्डर्ड चार्टर्ड बैंक नेपालका प्रमुख कार्यकारी अधिकृत जोसेफ सिल्भानसले भाटभटेनी सुपरमार्केटसँग यसप्रकारको साझेदारीको घोषणा गर्न पाएकोमा स्ट्याण्डर्ड चार्टर्ड साझेदारीले दुई संस्थाहरुबीच समन्वय सिर्जना गर्न मद्दत पुग्ने बताएका छन् । सोही अवसरमा भाटभटेनी सुपरमार्केटका अध्यक्ष एवं प्रबन्ध निर्देशक मिनबहादुर गुरुङ्गले स्ट्याण्डर्ड चार्टर्ड बैंक जस्तो अन्तर्राष्ट्रिय ख्याति आर्जन गरेको बैंकसँग साझेदार गरि अगाडी बढ्दा व्यापक लाभ उठाउने बताएका छन् ।
उपत्यकामा सिसी क्यामराबाट निगरानी बढाइँदै, स्थानीय निकायसँग नेपाल प्रहरीले गर्यो समन्वय
काठमाडौँ । स्थानीय तहसँगको समन्वय तथा नेपाल प्रहरीको आफ्नै स्रोत परिचालन गरी काठमाडौँ उपत्यकामा निगरानी बढाउन थप सिसी टिभी क्यामरा जडानका लागि प्रहरीले आवश्यक प्रक्रिया थालेको छ । सरकारी योजनाअनुसार क्यामरा जोड्न महानगरीय प्रहरी कार्यालय काठमाडौँले संवेदनशील क्षेत्रको पहिचान गर्ने काम थालेको हो । स्थान पहिचानलगत्तै आन्तरिक स्रोतबाट ठेक्का आह्वान गरी पहिलो चरणमा ७५ स्थानमा क्यामरा जडान गर्ने तयारी गरिएको महानगरीय प्रहरी कार्यालय काठमाडौँका प्रहरी नायब महानिरीक्षक शैलेश थापा क्षेत्रीले जानकारी दिए । क्यामरा जडानमा स्थानीय तहलेसमेत उच्च प्राथमिकता दिँदै आएका छन् । केही महिनाअघि गृहमन्त्री रामबहादुर थापाकै उपस्थितिमा प्रहरी उच्च अधिकारीसँग भएको छलफलमा समेत उपत्यकाको स्थानीय तहका प्रमुखले सिसी क्यामरा जडानलाई प्राथमिकता दिनुपर्नेमा जोड दिँदै आवश्यक खर्चको जोहो गर्न तयार रहेको प्रतिबद्धता जनाएका थिए । क्यामरा राख्ने कामको गति भने सुस्तरुपमा अगाडि बढिरहेको छ । यद्यपि काम तीव्ररुपमा अघि बढेको प्रहरीको भनाइ छ । “उपत्यकाका तीनै जिल्लाका आवश्यक क्षेत्रलाई सिसीबाट निगरानी गर्ने योजना हो, तर एकैचोटी सकिन्न, विस्तारै प्राथमिकताका आधारमा क्यामरा राख्दै जान्छौँ”, थापाले भने, “केही प्रहरीकै स्रोत परिचालन हुन्छ, अन्य स्थानीय तहको समन्वयमा जडान गरिन्छ ।” महानगरीय प्रहरी कार्यालय काठमाडौँले तीनै जिल्लाका संवेदनशील क्षेत्र पहिचान गरेर कति सिसी टिभी क्यामरा चाहिने हो, त्यसको विवरण पठाउन महानगरीय ट्राफिक प्रहरी महाशाखा, महानगरीय प्रहरी परिसर काठमाडौँ, ललितपुर र भक्तपुरमा पत्राचारसमेत गरिसकेको छ । विवरण आएपछि प्राथमिकताका आधारमा क्यामरा जडान हुने कार्यालयका प्रवक्ता पूजा सिंहले जानकारी दिए । हाल काठमाडौँ उपत्यकामा ४६० को हाराहारीमा क्यामरा प्रयोग भइरहेको छ । काठमाडौँमा मात्रै ४०२ क्यामरा प्रयोगमा छ । भक्तपुरमा ३४ र ललितपुरमा २४ क्यामरा प्रयोगमा छन् । “जनघनत्व बढिरहेका बेला उपत्यकामा यति क्यामरा अत्यन्त न्यून हो, त्यही पनि दैनिक बिग्रिने र मर्मत गर्नेक्रम चलिरहेकै हुन्छ, त्यसैले थप क्यामरा आवश्यक हुन्छ हामी त्यसैको प्रक्रियामा छौँ”, प्रवक्ता सिंहले भने । थप गर्न लागिएको क्यामरा कस्तो खालको चाहिने, कति जिबीको आवश्यक पर्छ भनेर प्रहरी प्रधान कार्यालयसँग माग गरेको बताउँदै सिंहले त्यहाँबाट इञ्जिनीयरले दिएको सुझावका आधारमा क्यामरा खरीद गरिने जानकारी दिए । क्यामरा जोड्न स्थान छनोटका लागि गठन भएको समितिले अहिले आवश्यक काम गरिरहेको छ । मुख्यतः सिसी क्यामराको निगरानी महानगरीय प्रहरी कार्यालय काठमाडौँले गरिरहेको छ । विभिन्न क्षेत्रमा सञ्चार नेटवर्कसँग जोडेर नियन्त्रण कक्षबाट क्यामराको निगरानी हुँदै आएको छ । यसका लागि ७२ वटा कन्ट्रोल रुप भेइकल (सिआरभी)को समेत प्रयोग गरिएको महानगरीय प्रहरी कार्यालय काठमाडौँका प्रहरी नायब महानिरीक्षक थापाले जानकारी दिए । सिसी क्यामराकै कारण धेरै आपराधिक गतिविधिको निगरानी तथा अपराधमा संलग्न व्यक्ति पक्राउ परेका उदाहरण छन् । महानगरीय ट्राफिक प्रहरी महाशाखाका प्रवक्ता जयराज सापकोटाले पत्र आइपुगेकाले क्षेत्र पहिचान गरेर पेश गर्ने तयारी गरिएको बताए । सवारी दुर्घटना गराएर फरार भएका चालक पक्रन र अदालतमा प्रमाण पेश गर्नसमेत प्रहरीका लागि सिसी क्यामराले ठूलो सहयोग गर्ने गरेको छ । तर आवश्यकमात्रामा क्यामरा नहुँदा भने घटनाको अनुसन्धानमा समस्या भइरहेको प्रहरीको भनाइ छ ।
