राजीनामा गर्न र तीन वटा कम्पनीको लाईसेन्स खारेज गर्न तयार छु- दिगम्बर झा
काठमाडौं । नेपाल दुरुसञ्चार प्राधिकरणका कार्यकारी अध्यक्ष दिगम्बर झाले आफू राजीनामा गर्न तयार भएको बताएका छन् । प्राधिकरणमा उनको नियुक्तीलाई लिएर प्रधानमन्त्री केपी शर्मा ओली, सूचना, सञ्चार तथा प्रविधि मन्त्री गोकुल बाँस्कोटाको सत्तारुढ पार्टीभित्रै चर्को आलोचना भएपछि उनले आफू राजीनामा दिन तयार भएको बताएका छन् । ‘यसअघिको प्रधानमन्त्री शेरबहादुर देउवा नेतृत्वको सरकारले गरेका सबै राजनीतिक नियुक्त खारेज गर्ने वर्तमान सरकारको निर्णय विरुद्ध म अदालत गए । अरु पनि अदालत गए । अरुले अदालतबाट पुर्नवहाली लिए । मैले मुद्दा नै फिर्ता लिए । पछि वर्तमान सरकारले पनि मलाई विश्वास गर्यो । मेरो क्षमताको पनि कदर गर्यो । सरकारले मलाई नियुक्ती दियो । मैले आफ्नो जिम्मेवारी निर्वाह गर्दै आएको छु ।’ बुधबार विकासन्युजसँगको कुराकानीमा झाले भने- ‘तर पछिल्लो समय मेरो नियुक्तीको विषयलाई लिएर मलाई, सम्मानित प्रधानमन्त्री, मन्त्री, नेता गणमाथि अनेक लाञ्छना लगाउने काम भयो ।’ झाको नियुक्तीका विषयमा सत्तारुढ नेपाल कम्युनिष्ट पार्टीको स्थायी समितिको बैठकमा प्रधानमन्त्री ओलीको चर्को आलोचना भएको छ । ‘सम्मानित नेताहरुको प्रतिष्ठा नै गिराउने काम राम्रो होइन, मैले राजीनामा दिएर उहाँहरुलाई काम गर्न सजिलो हुन्छ भने राजीनामा दिन्छु’ झाले भने । आफ्नो धारणा पत्रकार सम्मेलन गरी सार्वजनिक गर्न लागेको उनले बताए । तीन कम्पनीका लाइसेन्स खारेज गरिने झाले तीन वटा टेलिकम कम्पनीको लाईसेन्स खारेज गर्न लागिएको पनि प्रष्ट पारेका छन् । सिजी टेलिकम्यूनिकेशन, नेपाल स्याटलाइट टेलिकम, यूटिएलको लाईसेन्स खारेज गर्न लागेको उनले बताए । ‘लाइसेन्स लिने ६ वटा कम्पनी छन् । सेवा दिने २ वटा मात्र छ नेपाल टेलिकम र एनसेल । बाँकी ४ वटा कम्पनीले लाईसेन्स लिएर काम गरेनन्’ झाले भने- ‘तीन वटा कम्पनीका लाईसेन्स तत्काल खारेज गर्छु । स्मार्ट सेललाई बढीमा ६ महिना काम गर्न मौका दिन्छु ।’ स्मार्ट सेलका केही ग्राहक देखिएकोले तत्काल लाईसेन्स खारेज गर्दा ग्राहकलाई समस्या पर्ने भएकाले उसलाई प्राधिकरण समक्ष बुझाएको योजना अनुसार काम गर्न मौका दिने बताए । काम नगर्ने कम्पनीको लाईसेन्स खारजे गरी नयाँ कम्पनीलाई लाईसेन्स दिने उनले बताए । ‘विदेशी लगानीकर्ता आएका छन्, उनीहरुलाई लाईसेन्स दिन सकिन्छ । नयाँ कम्पनी ल्याएर बजारमा प्रतिस्पर्धाको वातावरण बनाउँछु । त्यसपछि उपभोक्ताले प्रतिस्प्रर्धाको लाभ लिन पाउनेछन् ।
चितवनको सौराहामा हात्ती महोत्सव सुरु, राष्ट्रपतिद्धारा उद्घाटन
काठमाडौं । चितवनको पर्यटकीय नगरी सौराहामा चितवन हात्ती महोत्सव सुरु भएको छ । सबै तयारी समेत पुरा भएको आयोजक संस्था क्षेत्रिय होटल संघले जनाएको छ । महोत्सव समारोहका बीच राष्ट्रपति विद्यादेवी भण्डारीले उद्घाटन गर्ने कार्यक्रम रहेको छ । उद्घाटन अघि राप्ती नदी किनारदेखी विभिन्न जातजाती , संघसंस्थाको पहिचान झल्कने झाँकी सहितको शोभा यात्रा निकालिने छ । पर्यटकको चहलपहल सुरु भएसँगै होटलहरुको बुकिङ प्याक भएको छ । हात्ती महोत्सव अबलोकन गर्न स्वदेशी तथा विदेशी पर्यटकहरु सौराहा आउन थालेका छन । व्यवसायीहरु उत्साहित भएर पर्यटक लाई स्वागत गर्न तयारी अबस्थामा छन् । चितवनको पर्यटन प्रर्बद्धनका लागि हरेक बर्ष हुने सो महोत्सव यस बर्ष पन्ध्रौँ सस्करण हो । महोत्सव अन्तर्गत स्वदेशी तथा विदेशी पर्यटकलाई मनोरञ्जन प्रदान गर्न हात्ती फाष्ट वाक, हात्तीका छावाबीचको रोमाञ्चकारी फुटबल, हात्ती सुन्दरी प्रतियोगिता, हात्तीहरुको वनभोज, हात्ती पोलो, हात्ती पेन्टिङ प्रतियोगिता हुने क्षेत्रिय होटल संघ सौराहाका अध्यक्ष सुमन घिमिरेले जानकारी दिएका छन् । महोत्सवको आन्तरीक र वाह्य सम्पुर्ण तयारी पुरा भएको छ भने महोत्सवका लागि सौराहालाई सजाईएको छ । महोत्सवस्थल आकर्षक वनाईएको छ । हात्ती फाष्टवाकमा २० टिम, पोलोमा ४ टिम, फुटवलमा ४ टिम र हात्ती सुन्दरी प्रतियोगितामा ५ वटा हात्तीले सहभागिता जनाउने छन् । देशभरका कविहरुलाई सौराहा ल्याएर संरक्षणको सन्देश राष्टिय तथा अन्तराष्टिय स्तरमा फैलाउन कवि गोष्ठी आयोजना गरिएको महोत्सवका प्रवक्ता दीपक भट्टराईले बताएका छन् । बाघमारा मध्यवर्ती सामुदायिक वनमा १५ गते सम्म महोत्सव सञ्चालन हुने छ । यस्तै, हात्ती महोत्सवमा संरक्षणकर्मी र पर्यटन व्यवसायीलाई सम्मान गरिने भएको छ । महोत्सवको उद्घाटनका अवसरमा २/२ जना संरक्षणकर्मी र पर्यटन व्यवसायी लाई सम्मान गर्न लागिएको हो । महोत्सव आयोजक क्षेत्रीय होटल संघ नेपाल चितवनका अध्यक्ष सुमन घिमिरेले संरक्षण तर्फ चितवन राष्ट्रिय निकुञ्जका पुर्व सहायक वार्डेन नुरेन्द्र अर्याल र पुरुषोतम पाण्डे तथा पर्यटन व्यवसाय तर्फ अमरमान शाक्य र हरिहर शैजुलाई सम्मान गर्न लागिएको जानकारी दिएका छन्र ।अन्र्तराष्ट्रिय हात्ती दौडबाट सुरु गरिएको कार्यक्रम लाई परिमार्जन गर्दै व्यवसायीहरुले चितवन हात्ती महोत्सवको रुपमा स्थापित गराउन सफल भएका छन् । हात्तीको विभिन्न खेलहरु पर्यटकलाई देखाएर मनोरञ्जन प्रदान गरिन्छ ।
इन्भेष्टमेन्ट बैंकको सेयर ११५ रुपैयाँले घट्यो, आज किन्नेले बोनस नपाउने
नेपाल इन्भेष्टमेन्ट बैंककाे केन्द्रीय कार्यालय काठमाडौं । बुधबार नेपाल इन्भेष्टमेन्ट बैंकको सेयर मूल्य प्रतिकित्ता ११५ रुपैयाँले घटेको छ । मगलबार प्रतिकित्ता ६८१ रुपैयाँमा कारोबार बन्द भएको यस बैंकको सेयर बुधबार ५६६ रुपैयाँमा झरेको छ । बैंकले गत वर्षको नाफा वितरणका लागि आजबाट बुक क्लोज गरेको छ । आज सेयर किन्नले गत वर्षको नाफाबाट बैंकले दिन लागेको १८ प्रतिशत बोनस सेयरसहित ४० प्रतिशत लाभांश पाउने छैनन् । बोनस सेयरपछि नेप्सेले मूल्य समायोज गरि यस बैंकको सेयर प्रतिकित्ता ५७७ रुपैयाँ तोकेको छ । समायोजन मूल्यभन्दा ११ रुपैयाँ घटेर शुरुका कारोबार भएको छ ।
भरतपुर अस्पतालमा खोप तथा औषधिको अभाव, विभाग र मन्त्रालयले चासो दिएन
काठमाडौं । आकस्मिक रुपमा प्रयोगमा आउने महत्वपूर्ण खोप तथा औषधिको चितवनमा चरम अभाव देखिएको छ । प्रायः स्वास्थ्य संस्थाहरुमा सहजै पाइने टिटानस खोप, डाइजेपाम, प्याथेडिन इन्जेक्सनहरुको यहाँ अभाव देखिएको हो । जिल्लास्थित भरतपुर अस्पतालमा समेत यस्ता औषधिहरु अकस्मात् प्रयोगका लागि स्टक रहेको तर, प्रशस्त मात्रामा भने नरहेको अस्पतालका मेसु डा.कृष्णप्रसाद पौडेलले बताएका छन्। केही दिनअघिदेखि नै अभाव भए पनि अहिले समस्या झनै चर्को बन्दै गएको छ । मेडिकल सिटी भनिने भरतपुरमै यस्ता औषधि जन्य वस्तुको अभाव भएपछि स्वास्थ्य क्षेत्रमा चर्चा हुन थालेको छ । महत्वपुर्ण र अत्यावश्यक औषधिको अभावबारे विभाग र मन्त्रालयमा जानकारी गराइएको तर, समस्या समाधान नभएको भरतपुर अस्पतालले जनाएको छ । अस्पतालका सूचना अधिकारी गोपाल पौडेलले टेन्डरमार्फत ल्याइएको यस्ता औषधिहरु सप्लायर्सले मागेजति दिन नसकेको बताए । यो देशभरिकै समस्या रहेको सूचना अधिकारी पौडेलले जानकारी दिए । टिटानस जीवाणुबाट हुन सक्ने संक्रमण हुन नदिनका लागि प्रयोगमा आउने टिटानस खोपको अभाव भएको छ । सामान्य खोपका रुपमा लिइने टिटानसको अभावले गर्दा उपचारमा समस्या भएको छ । जटिलदेखि सामान्य चोटपटक र घाउमा पनि टिटानस खोप लगाइन्छ । प्रायः फलामका खिया लागेका वस्तुका कारण हुने चोटपटकमा यो खोप लगाइने चिकित्सकहरु बताउँछन् । यसको असर सीधै नसामा पर्ने भएकाले टिटानस खोपको प्रयोग आवश्यक रहेको चिकित्सकहरु बताउँछन् । यता, भरतपुर अस्पतालका फार्मेसी शाखाका कर्मचारी रामहरी ढकालका अनुसार टिटानससँगै अत्यावश्यक प्रयोगमा आउने डाइजेपाम, प्याथेडिन इन्जेक्सन, ट्रमाडोलहरु पनि अभाव भएका छन् । यी सबै औषधिले दुखाइ कम गर्ने चिकित्सकहरु बताउँछन् । धेरै शरीर कम्पन भएर आउने बिरामीका लागि तत्काल डाइजेपाम दिई कम्पन नियन्त्रण गरिने चिकित्सकहरु बताएका छन्र ।
कर्मचारी सञ्चय कोषमा ३ खर्ब बचत, २ अर्ब १७ अर्ब कर्जा लगानी, सेयरमा १० कराेड नोक्सान
काठमाडौं । सबैभन्दा बढी बचत परिचालन गर्ने कर्मचारी सञ्चय कोषमा ३ खर्ब १ अर्ब बचत संचित भएको छ । कोषमा सञ्चयकर्ताको बचत २ खर्ब ८७ अर्ब रुपैयाँ भएको छ । जगेडा कोषमा १ खर्ब ९ अर्ब रुपैयाँ बचत भएको छ । अन्य दाहित्व करिब ४ अर्ब रुपैयाँ भएको कोषले जनाएको छ । बचत परिचालन मात्र होइन, कर्जा लगानीमा पनि कोष नेपालको सबैभन्दा ठूलो वित्तीय संस्थाको रुपमा देखिएको छ । सञ्चय कोषले असोज मसान्तसम्ममा २ खर्ब १७ अर्ब कर्जा लगानी गरेको छ । संचयकर्तालाई मात्र १ खर्ब ६९ अर्ब रुपैयाँ कर्जा प्रवाह गरेको कोषले विभिन्न परियोजना ४७ अर्ब ७७ करोड रुपैयाँ कर्जा लगानी गरेको छ । कोषले मुद्दतीमा ५५ अर्ब २० करोड रुपैयाँ लगानी गरेको छ । सरकारी ऋणपत्र तथा बचत पत्रमा १४ अर्ब ४६ करोड लगानी गरेको छ । संचय कोषले सेयर बजारमा भने तीन महिनामा १० करोड रुपैयाँ गुमाएको छ । कोषले सेयरमा गरेको लगानीको भ्यालु असार मसान्तसम्ममा ५ अर्ब ४८ करोड रुपैयाँ भएकोमा असोज मसान्तसम्ममा ५ अर्ब ३८ करोड रुपैयाँमा झरेको छ ।
स्मार्ट, युटिएल र सिजी टेलिकमको लाइसेन्स खारेजी प्रक्रियामा
काठमाडौं । दुर सञ्चार सेवा प्रदायक ३ वटा कम्पनीको लाइसेन्स खारेजी प्रक्रिया अघि बढेको छ । लाइसेन्स अनुसार सेवा प्रवाह नगरेको तथा बक्यौता रकम समेत नतिरेको भन्दै नेपाल दुर सञ्चार प्राधिकरणले लाइसेन्स रद्ध गर्ने प्रक्रिया अघि बढाएको हो । ‘आफैंले बुझाएको रोल आउट प्लान अनुसार सेवा विस्तार नगरेको र प्राधिकरणलाई बुझाउनुपर्ने दस्तुर समेत नतिरेपछि लाइसेन्स खारेजीको प्रक्रिया अघि बढाएका हौं’, नेपाल दुर सञ्चार प्राधिकरण उच्च श्रोतले भन्यो । प्राधिकरणको सम्बन्धित फाँटबाट लाइसेन्स खारेजीका लागि टिप्पणी समेत उठिसकेको श्रोतको दावी छ । ‘३ वटा कम्पनीलाई एक पटक जरिवाना गरिसकेका छौं, अहिले फेरि सेवा विस्तार गर्न नसक्नुको कारण र दस्तुर बुझाउन पुनः पत्र काटेका छौं’, प्राधिकरणका प्रवक्ता मिन प्रसाद अर्यालले विकासन्युजसँग भने । दुर सञ्चार प्राधिकरणले स्मार्ट टेलिकम, युनाईटेड टेलिकम लिमिटेड(युटिएल) र सिजी कम्युनिकेशन्सको लाइसेन्स खारेज गर्न लागेको हो । स्मार्ट र युटिएलसँग आधारभुत टेलिफोन सेवा र युनिफाइड लाइसेन्स छ । सिजी कम्युनिकेसन्सले भने लिमिटेड मोबिलीटी सर्भिसको लाइसेन्स लिएको छ । लामो समयदेखि लाइसेन्स नविकरण दस्तुर नतिरेको र आफैंले पेश गरेको योजना अनुसार सेवा विस्तार समेत नगरेपछि प्राधिकरणले लाइसेन्स खारेज गर्न लागेको हो । प्राधिकरणका अनुसार स्मार्ट टेलिकमले एक अर्ब ३७ करोड रुपैंयाँ तिर्न बाँकी छ भने युटिएलले ७७ करोड ७९ लाख रुपैंयाँ तिर्न बाँकी छ । त्यस्तै, सीजी कम्युनिकेशन्सले २३ करोड ४३ लाख र नेपाल स्याटेलाइटले ७१ करोड ७५ लाख रुपैंयाँ बुझाएका छैनन् । नेपाल स्याटेलाइटले आधारभुत दुर सञ्चार सेवाको लाइसेन्स लिएर कर्णाली र सुदुरपश्चिम प्रदेशका पहाडी जिल्लामा सेवा दिईरहेको छ । सेवा प्रदायक कम्पनीलाई सचेत गराउने, स्पष्टीकरण सोध्ने, जरिवाना गराउने र लाइसेन्स रद्ध गर्ने अधिकार कानुनले नै दिएको प्रवक्ता अर्यालले बताए ।‘प्राधिकरणलाई कानुनले दिएका अधिकारहरु उपयोग गरेर सेवाको गुणस्तर कायम गर्ने हो, प्राधिकरणले लाइसेन्स खारेजीको सम्म अधिकार पाएको छ’, प्रवक्ता अर्यालले भने ।
दूधकोशीमा बेलिब्रिज बन्ने, सोलुखुम्बु- विराटनगर-काठमाडाैं यात्रा सहज हुने
सोलुखुम्बु । जिल्लाको तीन गाउँपालिका जोड्ने दूधकोशी नदीमा बेलिब्रिज निर्माण हुनेभएपछि स्थानीयवासी हर्षित भएका छन् । पुस ५ गतेको मन्त्रीस्तरीय बैठकको निर्णयले सोताङको पावै र थुलुङ–देउसा जोड्ने दूधकोशी नदीमा बेलिब्रिज निर्माण गर्ने निर्णय गरेपछि यहाँका बासिन्दा खुशी भएका हुन् । कोशी पारीको सावीक पाँच गाविस पावै, सोताङ, बुङ, छेस्काम र गुदेल रहेको उक्त क्षेत्रमा तीन वर्ष अगाडि नै सडक सञ्जाल पुगीसकेको छ । गत वर्षदेखि ह्युमपाइप राखेर सडक सञ्चालन गरिएको भए पनि सहज नभएको बस चालक बलराम थापा बताउँछन्। नदीमा १६ ह्युमपाइप राखेर सडक सञ्चालन गरिएको थियो । “बेलिब्रिज जस्तो सहज हुँदैन,” उनले भने। पानी बग्ने सबै क्षेत्रमा ह्युमपाइप छैन । आधा पानीमै हिँड्नुपर्ने हुँदा समस्या हुने गरेको छ । दूधकोशीमा बेलिब्रिज निर्माण भए जिल्ला सदरमुकाम, सङ्घीय राजधानी काठमाडाैं र प्रदेश राजधानी विराटनगर आवतजावत गर्न सहज हुनेछ । कृषि उपज बजार लैजान तथा बाह्य सामग्री ल्याउन सहज हुने छ ।
बेलायतमा साना उद्योग बन्द हुँदा १५० हजार रोजगारी गुम्यो, कति नेपाली प्रभावित ?
बेलायत । संयुक्त अधिराज्य (यूके) मा समस्याग्रस्त अवस्थामा रहेका फुटकर व्यवसायीहरुले सन् २०१८ मा एक लाख ५० हजार रोजगारका अबसरको कटौति गरेका छन् । व्यवसायिक सम्पत्तिमाथि लगाइएको उच्च कर, फुटपाथ व्यवसायको विकास र बढ्दो अनलाइन कारोबारका कारण रोजगारीका अबसरलाई कटौति गर्नुपरेको सोमबार सार्वजनिक एक अध्ययनले देखाएको छ । बेलायतमा करिब २० हजार पसल तथा रेष्टुरेण्ट बन्द भएपछि एक लाख ४८ हजार १३२ जनाको जागिरमा कटौति गरिएको बेलायतको प्रेस एसोसिएसन न्यूज एजेन्सीले सेन्टर फर रिटेल रिसर्च (सिसिअनर) जनाएको छ । बेलायतको यूरोपेली यूनियनबाट हुन लागेको बहिर्गमनले पार्ने प्रभाबबारे विभिन्न प्रक्षेपणहरू भइरहँदा फुटकर व्यवसायको भविष्य थप अन्धकारतर्फ धकेलिइरहेको बताइएको छ । “बेलायती संसदमा बहिर्गमनका प्रभावबारे छलफलहरू चलिरहेका समय व्यापार दर र निम्न वृद्धिदरका कारण फुटकर र महङ्गा पसलहरूमा निकै नकारात्मक प्रभाव परिरहेको छ,” सीआरआरका निर्देशक प्राध्यापक जोसुवा बामफिल्डले बताए । “हामीलाई के कुराको महशुस भएको छ भने यदि सरकारबाट अनलाइन व्यापारी र ‘आइ स्ट्रिट’ कुनै प्रभावकारी कदम चालिएन भने सन् २०१९ मा पनि व्यापकरूपमा रोजगारका अवसर कटौति हुने खतरा देखिएको छ ।” यो बर्ष व्यवसायिक करमा गरिएको वृद्धि तथा घरभाडामा बजेट विस्तारका कारण बेलायती फुटकर व्यापारीहरूले अनलाइन व्यापारीसँगको प्रतिस्पर्धामा पीडित बन्नुपरेको छ र यि सबै घटना ब्रेक्जिटबारे अन्यौल देखिइरहेका समय भएका छन् । नेपालबाट अध्ययनका लागि बेलायत गएका धेरै विद्यार्थीहरुले त्यस्तै साना उद्योग व्यवसायमा काम गर्दै आईरहेका छन् । साना उद्योग व्यवसाय बन्द हुन थालेपछि नेपाली विद्यार्थीलाई समेत प्रभाव पर्ने बताइन्छ ।
