२ वर्षभित्र बागमतीमा नुहाउन पाइने, मन्त्रीले भने-‘नत्र कारबाही हुन्छ’
काठमाडौं । आगामी २ वर्षभित्र बागमती नदी नुहाउन योग्य हुने भएको छ । बागमती सभ्यता एकीकृत विकास समितिले आगामी २ वर्षभित्र बागमति नदीलाई नुहाउन योग्य बनाउने प्रतिवद्धता जनाएको हो । आइतबारको बैठकमा शहरी विकास मन्त्री मोहम्मद इस्तियाक राईले बाग्मती सभ्यता एकीकृत विकास समितिलाई बोलाएर २ वर्षभित्र बागमती नदीलाई नुहाउन योग्य बनाउन निर्देशन दिए । मन्त्री राईले समय तोकेर कार्यायोजना ल्याउन निर्देशन दिँदै भने–‘२ वर्षभित्र बागमतिमा नुहाउन सक्नुपर्छ, कहाँ कहाँ र कतिवटा ट्रिटमेन्ट प्लान्ट राख्ने हो, त्यसको योजना बनाउनुस, नत्र अब सहेर बस्न सकिन्न ।’ उनले तत्काल ठोस योजना बनाएर पेश नगरे समितिका पदाधिकारीहरुलाई कारबाही गर्ने चेतावनी पनि दिएका छन् । उनले अगाडी थपे,‘बाग्मतीको पानी पिउन योग्न बनाउन समय लाग्ला तर नुहाउन योग्य बनाउने गरी कार्यायोजना ल्याउनुहोस्, मैले कहाँ गएर कुन मन्त्रालयसँग समन्वय गर्नुपर्छ त्यो गर्न म तयार छु ।’ मन्त्री राईले पहुँच र शक्तिकेन्द्रको प्रभावमा भन्दा पनि आवश्यकता र प्राथमिकताका आधारमा बाग्मती आयोजनाको काम अघि बढाउन आयोजना प्रमुखलाई निर्देशन दिए । बाग्मती लगायतका नदीको सफाईमा लामो समयदेखी अहाेरात्र खटिएका अभियन्तासँग समन्वय गरेर आवश्यकताका आधारमा बजेटको कार्यक्रम तय गर्न ध्यानाकर्षण गराउँदै मन्त्री राईले बाग्मतीका नाममा कसैले पनि राजनीति गर्न नहुने बताए । बैठकमा शहरी विकास मन्त्रालयका सचिव रमेश प्रसाद सिहंले सबै पक्षको समन्वयले बाग्मती सफाई अभियानले ३ सय हप्ता पार गरेको भन्दै यसलाई मुर्तरुप दिन आफ्नो मन्त्रालयले नेतृत्वदायी भूमिका खेल्ने बताए ।
शिवम् सिमेन्टको आईपीओ सोमबारदेखि, १५ हजारदेखि १७ कराेडसम्म लगानीकाे अवसर
काठमाडौं । शिवम् सिमेन्टको आईपीओ आज (सोमबार) देखि खुल्ला भएको छ । शिवमको ४६ लाख ७९ हजार कित्ता शेयर स्थानीयवासी तथा सर्वसाधारणका लागि खुल्ला गरिएको हो । सर्वसाधारणका लागि ३०० रुपैंया मूल्यमा ४१ लाख २० हजार कित्ता र २०० रुपैंया दरका ५ लाख ७९ हजार कित्ता शेयर स्थानीयवासीका लागि खुल्ला गरेको हो । शिवमले कुल ५० लाख कित्ता शेयरका लागि स्वीकृति पाएकोमा करिब ३ लाख ८० हजार कित्ता शेयर भने बिक्री भइसकेको छ । उक्त शेयरका लागि न्युनतम ५० कित्तादेखि अधिकतम ५ लाख ७९ हजार ६४० कित्तासम्म आवेदन दिन सकिने शिवम् सिमेन्टस्ले जनाएको छ । जसका लागि न्यूनतम ५ लाखदेखि अधिकतम १७ करोड ३८ लाख ९२ हजार रुपैंयासम्म खर्च गर्न सकिन्छ । उक्त शेयर सी–आस्वा प्रणालीमार्फत् आफ्नो शाखा रहेका बैंक तथा वित्तीय संस्थाका कुनै पनि शाखामार्फत् आवेदन गर्न सकिन्छ । उक्त सिमेन्टको आईपीओका लागि सिद्धार्थ क्यापिटल निष्कासन तथा बिक्री प्रबन्धक रहेकोमा एनआईबीएल एस क्यापिटल, ग्लोबल आईएमई क्यापिटल र सीआईबीएल क्यापिटलले शेयरको बिक्री सुनिश्चितताको प्रत्याभूति गरेका छन् । शिवम्ले निष्कासन गरिएको सुरुको दिनदेखि नै संस्थागत लगानीकर्तालाई समेत आवेदन खुल्ला गरेको छ । उक्त शेयर निष्कासन बन्द हुने मिति छिटाेमा फागुन ९ गते (बिहीबार) र ढिलोमा चैत ५ गते तोकिएको छ ।
गरिमा विकास बैंक चितवनको टाँडी र कञ्चनपुरको महेन्द्रनगरमा, थप ४ शाखा सञ्चालनमा
काठमाडौं । गरिमा विकास बैंक लिमिटेडले फागुन ५ गते आईतबार चितवनको टाँडी र कञ्चनपुरको महेन्द्रनगर शाखा कार्यालयको उद्घाटन गरेको छ । टाँडी शाखा कार्यालयको उद्घाटन रत्ननगर नगरपालिकाका नगर प्रमुख नारायण वन र महेन्द्रनगर शाखा कार्यालयको उद्घाटन भीमदत्त नगरपालिकाकी उपप्रमुख शुशिलाचन्द सिंहले गरेका हुन् । साथै, विकास बैंकले आईतबार नै चितनवको टाँडी र कञ्चनपुरको महेन्द्रनगर संगसंगै नुवकोटको बट्टार, लमजुङ्को बेसीशहर, बाँकेको चप्परगढी र सुर्खेतको बीरेन्द्रनगरमा समेत नयाँ शाखा कार्यालयहरु सञ्चालनमा ल्याएको छ । यस विकास बैंकको हाल देशभर ७२ शाखा कार्यालय सञ्चालनमा रहेका छन् । साथै, निकट भविष्यमा चितवनको मिलनचोक, कास्कीको हेम्जापर्साको वीरगञ्ज र दाङ्गको तुल्सीपुरमा समेत शाखा कार्यालय खोल्दैछ ।
भैरहवामा सुबिसुको नयाँ शाखा, सेवाग्राहीलाई ईन्टरनेट तथा टिभी सेवामा विषेश छुट
काठमाडौं । सुबिसु केवलनेट (प्रा) लि.ले आफ्नो नयाँ शाखा भैरहवाको मिलनचोकमा विस्तार गरेको छ । नयाँ शाखा कम्पनीका नेशनल सेल्स प्रमुख युवराज कार्की र सिद्धार्थ उद्योग वाणिज्य संघका महासचिब नेत्रप्रसाद आचार्यले उद्घाटन गरेका छन् । यस शाखाबाट सुबिसुले भैरहवा तथा यस क्षेत्र वरिपरिका ग्राहकहरुको आवश्यकतालाई मध्यनजर गर्दै सुबिसु सगँ सम्बन्धित सम्पूर्ण जानकारीहरु प्रदान गर्ने, कम्पनीका विभिन्न सेवाहरुको विक्रि तथा वितरण साथै सेवा पछिको आफ्ना दक्ष तथा अनुभवि कर्मचारीहरुबाट प्रदान गर्नेछ । साथै, भैरहवा आसपासका उपभोक्ताहरुलाई समय र ग्राहकको चाहनाअनुसार नयाँ प्रविधी सहितको गुणस्तरीय तथा तीब्र गतिको एफटिटिएच ईन्टरनेट तथा क्लियर टिभी सेवा सहुलियत दरमा प्रदान गर्नेछ । क्लियर टिभी मार्फत २ सय ६५ भन्दा बढि (७० भन्दा बढि एच डि) च्यानलहरु हेर्न सकिने छ । साथै, एफटिटिएच सेवामा न्युनतम १५ एमबिपिएस गति देखि १ सय एमबिपिएस गति सम्मको ईन्टरनेट सेवा उपलब्ध रहेको छ । यसै अवसरमा कम्पनीले सो क्षेत्रका ग्राहकहरुलाई ईन्टरनेट तथा टिभी सेवामा विषेश छुट प्रदान गरेको छ ।
निसानले भित्र्यायो नयाँ किक्स गाडी, मूल्य ४७ लाख र ५९ लाख रूपैयाँमा पाइने
काठमाडाैं । नेपालका लागि निशान मोटर्सद्वारा उत्पादित गाडीहरुको आधिकारिक बिक्रेता पायो नियर मोटो कर्प प्रा.लि.ले फागुन ५ गतेदेखि निसानको नयाँ गाडी किक्स नेपाली बजारमा भित्र्याएको छ । उक्त गाडी नेपाली बजारमा ईन्टी लेभलको ४७ लाख ९९ हजारमा र टप लेभलको ५९ लाख ९९ हजार रुपैयाँमा पाइने कम्पनीले जनाएको छ । कम्पनीका अनुसार गाडीमा ८ इन्चको टचस्क्रिन जसलाई एन्ड्रोइड तथा एप्पल प्रणालीद्वारा सञ्चालन गर्न सकिन्छ । साथै, एलईडी प्रोजेक्टरको हेड ल्याम्प, अटोमेटिक क्लाइमेट कन्ट्रोल, कूल र इलुमिनेटेड ग्लोभ बक्स, क्रुज कन्ट्रोल, भ्वाइस रिकग्निसन, गाडी स्टाटकोलागि साँचो नचाहिने स्मार्ट कार्ड, चालकको लागि हाइट मिलाउन मिल्ने सिट, दुईवटा एयरब्याग र ईबीडी र बीए सहितको एबीएस समेटिएको छ । यो एसयूभी गाडी डिजेल ईन्जिनमा एक्सएल, एक्सभी र एक्सभी प्रिमियम गरी तीन प्रकारका र पेट्रोल ईन्जिनमा एक्सएल र एक्सभी गरी दुई प्रकारका रहेका छन् । यसैगरी, नयाँ निसान किक्स पर्ल ह्वाइट, ब्लेड सिल्भर, ब्रोजन ग्रे फायर रेड, एम्बर अरेन्ज, जीप ब्लु पर्ल र नाइट सेड गरी जम्मा ७ प्रकारका विभिन्न कलरमा पाइनेछन् । बिक्री शुरु कार्यक्रममा पायोनियर मोटो कर्पका प्रबन्ध निर्देशक सन्दीपकुमार सारदाले भने -“विश्वस्तरीय नयाँ सवारी साधनले नेपालीको अभिरुचि पूरा गर्ने र साथै यसबारे नेपालीहरुमा रहेको उत्सुकता पूरा गरेको छ र हामीलाई विश्वास छ र कार प्रेमी नेपालीहरुको मन जित्नेछ ।” यसको स्टाइलिस डिजाइनले यसको क्षमता र ड्राइभिङ्ग डाइनामिक्सलाई परिपूरकको काम गरेको छ । नयाँ निसान किक्सको पेट्रोल इन्जिनमा १.५ एचफोरकेको ५ स्पीड म्यानुअल ट्रान्समिसन रडिजेल इन्जिनमा १.५ के९के डीसीआईको ६ स्पीड म्यानुअल ट्रान्समिसनमा उपलब्ध छन् । माइलेज क्षमता उत्तम मानिएको यस गाडीको पेट्रोल इन्जिनले प्रतिलिटर १४.२३ किलोमिटर र डिजेल इन्जिनले प्रतिलिटर २०.४५ किलोमिटर गाडी चल्न सक्ने एआरएआईले प्रमाणित गरेको कम्पनीले जनाएको छ ।
राष्ट्र बैंकका पदाधिकारीलाई कारबाही गर्नुपर्छः पुर्व मन्त्री तामाङ
काठमाडौं । पूर्व मन्त्री शेर बहादुर तामाङले गलत तथ्यांक दिने राष्ट्र बैंकका पदाधिकारीहरुलाई कारवाही गर्न माग गरेका छन् । राजधानीमा आयोजीत एक कार्यक्रममा पूर्व कानुन मन्त्री तामाङले गलत आर्थिक परिसूचक सार्वजनिक गर्ने राष्ट्र बैंकका पदाधिकारीहरुलाई कारवाही हुनुपर्ने बताएका हुन । केही पत्रपत्रिकाहरुले राष्ट्र बैंकको हवला दिँदै अन्य तथ्यांक पेश गरेकोप्रति टिप्पणी गर्दै भने,‘सरकारलाई एउटा तथ्यांक दिने, अनि पत्रिकालाई अर्को तथ्यांक दिने काम राष्ट्र बैंकका पदाधिकारीहरु गर्नु हुँदैन । गलत तथ्यांक दिनेहरुलाई कारबाही गर्नुपर्छ ।’ प्रधानमन्त्रीले संसदमा प्रस्तुत गरेको ग्राफ हेर्दा आफूले सरकारलाई सफल भएको मान्ने पनि तामाङको भनाई थियो । उनले भने,‘म त यो ग्राफ हेर्दा सरकार सफल भएको देख्छु ।’ उनले सरकारले गर्नुपर्ने कामहरु गरेरै अघि बढेको पनि दाबी गरे ।
सन नेपाल लाइफ इन्स्योरेन्स र कामना सेवा विकास बैंकबीच बैंकास्योरेन्स सम्झौता
काठमाडौं । सन नेपाल लाइफ इन्स्योरेन्स र कामना सेवा विकास बैंकबीच बैंकास्योरेन्स सम्झौता भएको छ । उक्त सम्झौतापत्रमा सन नेपाल लाइफ इन्स्योरेन्स कम्पनीको तर्फबाट प्रमुख कार्यकारी अधिकृत राजकुमार अर्याल र कामना सेवा विकास बैंकको तर्फबाट प्रमुख कार्यकारी अधिकृत प्रविन बस्नेतले हस्ताक्षर गरेका हुन् । यस सम्झौता अन्र्तगत कामना सेवा विकास बैंकका सम्पूर्ण ग्राहकहरुले बीमा शुल्क भुक्तानी गर्न, बीमालेख लिन तथा बीमा दाबी भुक्तानी सहज रुपमा सन नेपाल लाइफ इन्स्योरेन्सबाट प्राप्त गर्न सक्नेछन् र उत्कृष्ट सेवासहित सरल, सुलभ तरिकाले सन नेपाल लाइफ इन्स्योरेन्स कम्पनीका विभिन्न बीमालेखहरु कामना सेवा विकास बैंकका सम्पूर्ण शाखाहरु मार्फत उपलब्ध हुनेछ ।
शाइन रेसुङ्गा बैंकको नयाँ शाखा रुपन्देही र नवलपरासीमा
काठमाडौं । शाइन रेसुङ्गा डेभलपमेण्ट बैंकले रुपन्देहीको देवदह खैरेनी र नवलपरासीको सुनवल नयाँ शाखा कार्यालयको उद्घाटन गरेको छ । खैरेनी शाखाको देवदह नगरपालिकाका नगर प्रमुख हिराबहादुर खत्री र सुनवल शाखाको सुनवल नगरपालिकाका नगर प्रमुख भिमबहादुर थापाले छुट्टाछुट्टै कार्यक्रमबीच उद्घाटन गरेका थिए । देवदह शाखाको उद्घाटन गर्दै नगरप्रमुख खत्रीले बैंकले सामाजिक उत्तरदायित्व अन्र्तगत गरेका कार्य अनुकरणीय रहेको उल्लेख गर्दै अव देवदहको आर्थिक विकास र समृद्धिका लागि सरकारले अघि सारेका अनुदान र सहुलियतका कार्यक्रमलाई वडा वडामा लैजान बैंकलाई आग्रह गरेका थिए । समाजसँग बैंक अभियान सञ्चालन गरेको बैकले स्थानीय जेष्ठ नागरीकलाई बैकमा जेष्ठ नागरिक खाता खोली दिई चेक हस्तान्तरण गर्नुका साथै दोसल्ला ओढाई कदर–पत्रबाट सम्मान गरिएको थियो । यसरी सम्मानित हुनेमा देवदह खैरेनी शाखा अन्र्तगत देवदह वडा नं. ५ का ९८ बर्षीय टिकाराम तिवारी, वडा नं. ७ का ९५ बर्षीय मोतिलाल अधिकारी, वडा नं. ५ का ८९ बर्षीय चित्रकली थापा, वडा नं. ७ का ८४ बर्षीय भिमलाल खरेल र वडा नं. ५ का ८० बर्षीय सुना कुमारी राना सम्मानित भएका छन् । कार्यक्रमका प्रमुख अतिथि देवदह नगर प्रमुख खत्री, बैकका अध्यक्ष राजेन्द्रप्रसाद श्रेष्ठ, संस्थापक अध्यक्ष थानेश्वर पौडेल र प्रमुख कार्यकारी अधिकृत प्रकाश पौडेलले सम्मान गरेका थिए । त्यस्तै, सुनवल शाखाको उद्घाटन गर्दै सुनवल नगरपालिकाका प्रमुख भिमबहादुर थापाले समृद्ध नगर हाम्रो अभियानका साथ कृषि, पर्यटन, उद्योग र व्यापारलाई प्रमुख प्राथमिकता दिएर नगरपालिका अघि बढ्न लागेको अवस्थामा शाइन रेसुङ्गा डेभलपमेण्ट बैंकले सामाजिक उत्तरदायित्व सहित शाखा सञ्चालन गरेकोमा प्रसन्नता व्यक्त गर्दै बैंकसंग मिलेर नगरपालिका अघि बढ्ने बताए । नगरप्रमुख थापाले महेशपुर नाकाको स्तरबृद्धि पश्चात नवलपरासीमा आर्थिक बिकासको सम्भावना बढेको बताउदै बैंक तथा बित्तीय सस्थाको भुमिका पनि बढ्दै गएको जानकारी दिएका छन् । सुनवल उद्योग वाणिज्य संघका अध्यक्ष रमेश कर्माचार्यले सुनवलको संभावनालाई सार्थक बनाउन बैंकको लगानी उत्पादन र रोजगारमुलक क्षेत्रमा केन्द्रीत गर्न आग्रह गरेका हुन् । बैंकका प्रमुख कार्यकारी अधिकृत प्रकाश पौडेलले स्थानीय पूँजी, स्थानीय श्रम, स्थानीय विकास, स्थानीय सम्बृद्धि भन्ने मूल नाराका साथ यस क्षेत्रमा सञ्चालित बैंकले स्थानीय जनताको आवश्यकताका आधारमा गुणस्तरीय र सर्बसुलभ बैकिङ्ग सेवा प्रवाह गर्दै आइरहेको छ ।
