जलविद्युत उत्पादन क्षमतामा सुदूरपश्चिम सबैभन्दा अघि, प्रदेश २ कमजोर
काठमाडौँ । विकासका दृष्टिले पछि परेको सुदूरपश्चिम प्रदेशमा जलविद्युुत उत्पादन हुन सक्ने क्षमतामा भने सबैभन्दा धेरै देखिएको छ । प्रदेश ७ अर्थात सुदूरपश्चिम प्रदेशमा १८ हजार १ सय ४९ मेघावाट विद्युत उत्पादन क्षमता रहेको छ । समृद्ध नेपालका लागि जलविद्युत सम्बन्धी सोमबार आयोजित विचार गोष्ठीमा यस्तो तथ्याङ्क प्रस्तुत गरिएको हो । स्वतन्त्र उर्जा उत्पादकहरुको संस्था नेपाल(इप्पान) का अध्यक्ष शैलेन्द्र गरागाईँले यस्तो तथ्याङ्क प्रस्तुत गरेका हुन् । विद्युत उत्पादन हुन सक्ने क्षमताका आधारमा प्रदेश नम्बर २ सबैभन्दा कमजोर पाइएको छ । प्रदेश नम्बर २ मा २ सय मेघावाट मात्रै बिजुली उत्पादन क्षमता रहेको छ । प्रदेश नम्बर ५ मा १४ हजार ३०, प्रदेश १ मा १२ हजार ९ सय ५३, प्रदेश ३ मा १२ हजार ६ सय ३१, प्रदेश ६ मा ११ हजार ८ सय ३ र प्रदेश ४ मा १० हजार २ सय २८ मेघावाट बिजुली उत्पादन हुन सक्ने क्षमता रहेको छ । औद्योगिक क्षेत्रमा खपत कम विश्वको उर्जा खपतको अवस्थालाई हेर्दा औद्योगिक क्षेत्रमा सबैभन्दा बढी ५१ प्रतिशत उर्जा खपत भएको देखिन्छ । तर, नेपालमा भने सबैभन्दा बढी आवासीय प्रयोजनमा ८० प्रतिशत विद्युत खपत हुने गरेको छ । विश्वको अवस्था हेर्दा औद्योगिक प्रयोजनमा ५१ प्रतिशत, यातायातमा २६.६ प्रतिशत, आवासीय प्रयोजनमा १३.९ प्रतिशत र व्यवसायिक प्रयोजनमा ७.८ प्रतिशत विद्युत खपत भएको तथ्याङ्कले देखाउँछ । कार्यक्रममा अध्यक्ष गुरागाईँले प्रस्तुत गरेको तथ्याङ्क अनुसार नेपालमा आवासीय प्रयोजनका लागि ८० प्रतिशत, औद्योगिकमा ८ प्रतिशत, यातायातमा ७ प्रतिशत, व्यवसायिकमा ४ प्रतिशत र कृषिमा १ प्रतिशत मात्र विद्युत खपत हुने गरेको छ । पेट्रोलिम पदार्थको भण्डारण क्षमतामा नेपाल कमजोर इजरायलमा २७० दिनका लागि पेट्रोलियम पदार्थ भण्डारण क्षमता हुँदा दक्षिण कोरियामा २४०, जापानमा १३७, चीनमा १३५, अमेरिकामा १२०, स्वीडजरल्याण्डमा ९०, थाइल्याण्डमा ७०, फ्रान्समा ५५, भारतमा ५० र नेपालमा भने १७ दिनको मात्र भण्डारण क्षमता रहेको छ ।जसका कारण विगतमा भारतले गरेको नाकाबन्दीका बेला मुलुकमा खाना पकाउने एलपीजी ग्यासको हाहाकार भएको थियो । २० प्रतिशत मात्र सवारीका साधान सडकमा गुड्न सकेका थिए भने अस्पतालमा अक्सिजन र औषधीको हाराकार भएको थियो । आयोजना निर्माण स्वीकृतिमा झण्झटिलो प्रक्रिया कुनै आयोजना निर्माणका लागि स्वीकृति लिन खोज्यो भने हरेक कार्यालयमा कम्पनीमा पनि १० दिनदेखि बढीमा ६ महिनासम्म फाइल अड्कने गरेको कार्याक्रममा सहभागीले गुनासो गरेका थिए । ६-७ वटा मन्त्रालय, २३ वटा विभाग र ३६ वटा कानूनी धाराहरु टेकेर एउटा आयोजना निर्माण गर्नु पर्ने अवस्था रहेको कार्यक्रममा बताइयो ।
फागुन सकिन लाग्दा पनि कम्पनीमा दर्ता हुन गएनन् यातायात व्यवसायी, मन्त्रीकाे नियतमा नै आशंका
काठमाडौँ । सरकार र यातायात व्यवसायीबीच गत मंसिर २९ गते सहमति गरियो र भनियो फागुन मसान्तसम्म कम्पनी ऐन, २०६३ लाई संशोधन गर्ने र सबै यातायाता व्यवसायीलाई कम्पनीमा दर्ता हुन समय दिने । सो अवधिसम्म सबै प्रकारका कानूनी तथा नीतिगत व्यवस्था गर्ने । तर फागुन मसान्त आउन केही दिन बाँकी रहँदासमेत विगतको सहमतिअनुसार कम्पनी ऐन, २०६३ लाई संशोधनको प्रक्रिया सुरु भएको छैन । केही नेपाल ऐन संशोधन सम्बन्धी विधेयक संघीय संसदमा पेश भयो र पारित पनि भइसकेको छ । तर सरकार र व्यवसायीबीच भएको सहमतिको मूल्य र मान्यतामा भन्दा पनि पुनः यातायात क्षेत्रमा सिण्डिकेट नै रहने अवस्था सिर्जना भएको छ । देशभरका यातायात व्यवसायीलाई कम्पनीमा दर्ता हुन फागुन मसान्तसम्मको समय दिइएको थियो । तर यस अवधिसम्म विगतमा दर्ता भएका भन्दा एकाध मात्रै व्यवसायी कम्पनीमा दर्ता हुन आएका छन् । विशेष गरी भौतिक पूर्वाधार तथा यातायात व्यवस्था मन्त्रालयले सरकारको नीति तथा निर्देशनलाई कार्यान्यन गर्न खेलाची गरेका कारण व्यवहारिक रुपमा सिण्डिकेट कायम हुने अवस्था सिर्जना भएको छ । सो मन्त्रालयको नेतृत्वमा रहेका मन्त्री रघुवीर महासेठले यातायात व्यवसायीको पक्षमा निर्णय गराउनका लागि समय गुजार्ने र अन्तिम समयामा आएर वार्ता र छलफल गरे जस्तो गर्ने गरेका छन् । गत मंसिर २९ गते भएको बैठकमा गृहमन्त्री रामबहादुर थापा संयोजकत्वमा भौतिक पूर्वाधार तथा यातायात व्यवस्था मन्त्री महासेठ, उद्योग वाणिज्य तथा आपूर्ति मन्त्री मातृकाप्रसाद यादवको समेत सहभागितामा यातायात सेवा सञ्चालन, दर्ता तथा पञ्जीकरण सम्बन्धमा एक निर्णय गरेको थियो । बैठकले साविकमा यातायात समिति अन्तर्गत सञ्चालित विभिन्न यातायात सेवालाई प्रालि अर्थात् कम्पनीमा दर्ता गर्न कम्पनी ऐन, २०६३ को दफा ९ मा रहेको प्रावधानमा केही संशोधन गर्न आवश्यक देखिएको र सो संशोधन गर्न केही समय लाग्ने भएकाले साविकका समिति अन्तर्गत सञ्चालनमा रहेका यातायात सेवालाई अनिवार्य रुपमा कम्पनी, उद्योग, सहकारीमा दर्ता गरी आ–आफ्नो यातायात सेवा पञ्जीकरण गरिसक्नुपर्ने म्याद २०७५ फागुन मसान्तसम्म थप गर्ने निर्णय गरेको थियो । विभागका सूचना अधिकारी गोकर्णप्रसाद उपाध्यायको हस्ताक्षरमा जारी भएको विज्ञप्ति विभागको बेबसाइटमा हाल पनि उपलब्ध छ । समय बित्यो, रात रह््यो अग्राख पलायो भने जस्तै सरकार र व्यवसायीबीच भएको सहमतिलाई कार्यान्वयन गराउने प्रमुख निकायको रुपमा रहेको भौतिक पूर्वाधार तथा यातायात व्यवस्था मन्त्रालयले सिण्डकेट पूर्ण रुपमा खारेज गराउनेतर्फ पहल गरेन । काठमाडौँ उपत्यकालगायतका शहरी तथा ग्रामीण क्षेत्रमा रुपमा सिण्डिकेट हटेपनि व्यवहारिक रुपमा अझै पनि हट्न सकेको छैन । यातायात मन्त्री महासेठकै कारण सिण्डिकेट हट्न नसकेको गुनासो यातायात व्यवसायीले गर्दै आएका छन् । मन्त्री महासेठले आफै समेत सहभागी भएको बैठकले गरेको निर्णय कार्यान्वयन गराउने तर्फ कुनै पहल गरेका छैनन् । जसका कारण सरकारले यातायात क्षेत्रमा हटाएको भनिएको सिण्डिकेट पुनः जवरजस्त रुपमा प्रस्तुत भएको छ ।
सोमबार नेप्से र कारोबार रकम दुबैमा वृद्धि, अधिकांश बैंकको बढी किनबेच
काठमाडौं । सोमबारको बजारमा नेप्से परिसूचक र कारोबार रकम दुबैमा वृद्धि भएको छ । आइतबार प्राविधिक समस्याका कारणले बजार खुलेकाे डेढ घण्टा मात्रै कारोबार भएको बजारमा सोमबार भने पुरा समय कारोबार भएको छ । सो दिन नेप्से परिसूचक १४.२८ अंकले बढेर ११४२ अंकमा पुगेको छ । जुन अघिल्लो दिनको तुलनामा १.२६ प्रतिशतले बढी हो । त्यस्तै, परिसूचक सँगै कारोबार रकममा पनि सुधार देखिएको छ । केहि समययता १५ देखि ३० करोडको हाराहारीमा कारोबार भइरहेको बजारमा सोमबार भने ४० करोड २८ लाख रुपैयाँ बराबरको सेयर किनबेच भएका छन् । कुल १७१ कम्पनीको कारोबार भएको बजारमा १३ लाख ४७ हजार कित्ता सेयर बिक्री भएका छन् । जसमध्ये ६ वटा वाणिज्य बैंकहरु सबैभन्दा बढी कारोबार गर्नेको सूचिमा परेका छन् । रकमका अधारमा सबैभन्दा बढी नेपाल लाइफ इन्स्योरेन्स कम्पनीको २ करोड ८९ लाख रुपैयाँ बराबरको सेयर किनबेच भएको छ । कम्पनीको सेयर मूल्य प्रतिकित्ता १११६ रुपैयाँ रहेको छ । त्यस्तै, एनआईसी एशियाको २ करोड २१ लाख, प्रभु बैंकको २ करोड १७ लाख, एनसीसी बैंकको एक करोड ८२ लाख, नबिल बैंकको एक करोड ११ लाख, एनएमबि बैंकको ९८ लाख र जनता बैंक नेपालको ८९ लाख रुपैयाँ बराबरको सेयर किनबेच भएका छन् ।
सप्तरीको फत्तेपुरमा एनआईसी एशियाले खोल्यो नयाँ शाखा
काठमाडौँ । एनआईसी एशिया बैंक लिले को सप्तरीको सप्तकोशी नगरपालिकामा नयाँ शाखा सञ्चालन गरेको छ । सो फत्तेपुर शाखाको सप्तकोशी नगरपालिकाका नगर प्रमुख उत्तमकुमार शर्माले फागुन २७ गते एक समारोहबीच उद्घाटन गरे । उक्त शाखाको उद्घाटन समारोहमा नगर प्रमुख शर्माले दुर्गम तथा ग्रामीण भेगमा समेत आफ्नो उपस्थिति सबल बनाउँदै गएको बैंकको प्रशंसा गरेका थिए । बैंकले मुलुकभर २७७ शाखा कार्यालयहरु, २८९ एटिएम, ३८ वटा एक्सटेन्सन काउण्टर एवम् २३ वटा शाखा रहित बैंकिङ्ग ईकाई मार्फत बैंकिङ्ग सेवा गर्दै आएको छ ।
मिथिला लघुवित्तको साधारणसभा चैत २३ गते, के के छन् विशेष एजेण्डा ?
काठमाडौं । मिथिला लघुवित्त वित्तीय संस्था आगामी चैत २३ गते १०औं वार्षिक साधारणसभामा जाँदै छ । सो प्रयोजनको लागि संस्थाले आगामी चैत ११ गते बुक क्लोज गर्ने निर्णय गरेको छ । उक्त सभाले सेयरधनीलाई गत असार मसान्तसम्म कायम रहेको चुक्ता पुँजीको १०.४५ प्रतिशत बोनस सेयर स्वीकृत गर्दै छ । सो अवधिमा संस्थाको चुक्ता पुँजी ६ करोड ५९ लाख ७७ हजार रुपैयाँ रहेको थियो । साथै, संस्थाले गत नवौं वार्षिक साधारणसभाबाट पारित ५० प्रतिशत हकप्रद सेयर जारी गर्ने छ । उक्त हकप्रद पश्चात संस्थाको चुक्ता पुँजीको ९ करोड ८९ लाख रुपैयाँ हुने छ । त्यस्तै, प्रस्तावित बोनस सेयरपछि संस्थाको कूल जारी पुँजी र चुक्ता पुँजी १० करोड ५८ लाख रुपैयाँ पुग्ने संस्थाले जनाएको छ । साथै, सभाले बोनस सेयरमा लाग्ने कर प्रयोजनको लागि संस्थाले ०.५४९ अर्थात ३ लाख ६२ हजार ८७८ रुपैयाँ नगद लाभांश वितरण गर्ने प्रस्तावलाई सभाले पारित गदैं छ । त्यस्तै, संस्थाको हाल कायम रहेको अधिकृत पुँजी १० करोडमा १० करोड थपेर जम्मा २० करोड रुपैयाँ पुर्याउने विशेष प्रस्ताव रहेको छ । संचालक समितिको उक्त प्रस्तावलाई साभाले पारित गर्ने भएको छ ।
प्रचण्डले भने-‘नेपालमा विस्फोट तथा हतियारको राजनीतिको अब कुनै अर्थ छैन’
पोखरा । नेपाल कम्युनिष्ट पार्टी (नेकपा)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले सरकार र सिके राउतबीच भएको सम्झौतामा शङ्का गर्नु नपर्ने बताएका छन् । प्रेस सङ्गठन नेपाल कास्कीद्वारा आज पोखरामा आयोजित पत्रकार भेटघाट कार्यक्रममा उनले पृथकतावादी आन्दोलन गरिरहेको समूहलाई मूलधारमा ल्याउने प्रयासस्वरुप सम्झौता भएको बताए । पार्टी बैठक र सरकारसँगको छलफल समेतका आधारमा संविधानको मूल मर्म र भावना, राष्ट्रिय एकता, स्वाधीनतालाई सम्मान गर्दै मूलधारको राजनीतिमा ल्याउने भावनामा सहमति भएको उनले बताए । सरकारले सबै राजनीतिक प्रवृत्तिलाई मूलधारको राजनीतिमा ल्याउनु जायज कुरा भएको बताउँदै उनले यसले समग्र राष्ट्रिय एकता, स्वाधीनता र सबैलाई समेट्न सरकार गम्भीर छ भन्ने देखाएको बताए । राष्ट्रिय एकताका लागि सकेसम्म सबैलाई समेट्ने लक्ष्यअनुरुप सम्झौता भएको बताउँदै उनले सम्झौताका भाषालगायतका विषयमा पनि धेरै विवाद गर्नुपर्ने अवस्था नरहेको उल्लेख गरे । जनअभिमत, जनमत सङ्ग्रहजस्ता विषय संसद्को दुईतिहाइ बहुमतबाट निर्णय गर्नुपर्ने उनले बताए । सरकारले सबैलाई समेटेर अघि बढ्ने बताउँदै उहाँले विप्लव नेतृत्वको पार्टीलाई कम्युनिष्ट नेतृत्वको वर्तमान सरकारसँग वार्ता गरी मूलधारको राजनीतिमा आउन आग्रह गरे । नेपालमा विस्फोट तथा हतियारको राजनीतिको अब कुनै अर्थ नरहेको बताउँदै उनले वर्तमान परिस्थिति गुणात्मकरूपमा परिवर्तित भइसकेको र विस्फोट तथा हतियारको राजनीति अब सम्भव नभएको र त्यस सम्बन्धमा राज्य चुप लागेर नबस्ने बताए । पार्टीको एकीकरणपछिका बाँकी काम अन्तिम चरणमा पुगेको र आफूहरू टुङ्ग्याउने क्रममा रहेको बताउँदै उनले सरकार पनि आफ्नो गतिमा अघि बढिरहेको बताए । थुप्रै कानून बनाउनुपर्ने आवश्यकताका कारण यसले सरकारका काममा केही अलमल भए पनि विकास निर्माणलगायतका काममा सरकार अघि बढिरहेको बताए । सामाजिक सुरक्षा, बेरोजगारी अन्त्यलगायतका क्षेत्रमा काम भइरहेको उनको भनाइ छ । जनताले नेकपाप्रति आशा एवं विश्वास गरेको बताउँदै उहाँले हालै रौतहटमा भएको कार्यक्रममा देखिएको जनताको उपस्थितिले उक्त कुरा पुष्टि गरेको धारणा राखे । रासस
३६० केजी चरेससहित तीन भारतीय पक्राउ
धादिङ । नेपाल प्रहरीको लागुऔषध नियन्त्रण ब्यूरोबाट खटिएको प्रहरी टोलीले धादिङको गजुरीबाट जाँचका क्रममा ३६० किलो चरेससहित तीन भारतीय नागरिकलाई आइतबार पक्राउ गरेको छ । काठमाडौँबाट भारततर्फ लैजाँदै गरेको अवस्थामा गजुरीस्थित प्रहरी जाँच गर्दा एसआर५५एम ९४८४ नंको भारतीय कन्टेनरबाट बोरामा हालिएको अवस्थामा बरामद गरेको इलाका प्रहरी कार्यालय गजुरीका प्रहरी निरीक्षक नवराज ढुङ्गेलले बताए । भारतीय ट्रकलाई लागुऔषध नियन्त्रण ब्यूरोले शङ्का लागि जाँच गरेको थियो । ट्रकको क्याबिनको माथिल्लो भागमा फल्स बम बनाई ल्याइएको अवस्थामा बोरा जाँच गर्दा सो लागुऔषध चरेस बरामद भएको हो । प्रहरीले चरेस कारोवारमा संलग्न भएको आरोपमा भारत मैनपुरी जिल्ला सुरवली थाना उत्तरप्रदेश निवासी गाडी चालक ६४ वर्षीय ओमप्रकाश र साहु भारत, मोतिहारी जिल्ला तुमरीय टोल रक्सोलका ३४ वर्षीय गुलाफ खानलाई पक्राउ गरेको हो । प्रहरीले ट्रक सहचालकसमेत पक्राउ गरेको भए पनि नाम खुलाएको छैन । उनीहरुलाई इलाका प्रहरी कार्यालय गजुरीले हिरासतमा लिएको छ । सवारीसाधन र लागुऔषध बरामद गरिएकाले लागुऔषध ओसारपसारसम्बन्धी मुद्दा चलाइने प्रहरीले जनाएको छ । जिल्लामा प्रतिबन्धित लागुऔषध चरेस यति ठूलो मात्रामा बरामद गरिएको यो पहिलो पटक हो । सुन र चाँदीसहित भारतीय पक्राउ जनकपुरधाम । मोटरसाइकलको पेट्रोल ट्याङ्कीभित्र अवैध सुन र चाँदी लुकाइ नेपालबाट भारततर्फ लगिरहेका अवस्थामा प्रहरीले दुई भारतीय नागरिकलाई पक्राउ गरेको छ । जनकपुरधाम उपमहानगरपालिका–१५ स्थित कुवा गाउँबाट लोहनातर्फ जाने सडकमा उनीहरूलाई पक्राउ गरिएको जिल्ला प्रहरी कार्यालय धनुषाले जनाएको छ । पक्राउ पर्नेमा भारत विहार मधुवनी जिल्ला बासोपट्टी–४ का सुरेन्द्र महतो सुडीका ३७ वर्षीय छोरा कृष्णकुमार महतो सुडी र सोही ठाउँका परमेश्वर महतो सुडीका ३० वर्षीय छोरा रूपेश महतो रहेका छन् । बीआर ३२ एस ४३५७ नम्बरको पल्सर मोटरसाइकलको ट्याङ्कीमुनिबाट प्वाल बनाई प्वालमा ढोका जस्तो नट कसेको देखिएपछि शंका लागेर प्रहरीले सो नट खोलेर हेर्दा ट्याङ्कीभित्रमा सेतो रङको प्लास्टिकमा बेरेको सुन र चाँदी बरामद भएको प्रहरी उपरीक्षक शेखर खनालले जानकारी दिए । बरामद भएकामा सुनको बाला दुई थान र चाँदीको दाना नौ प्याकेट रहेका छन् । प्रहरी प्रधान कार्यालय तथा जिल्ला प्रहरी कार्यालयबाट खटिएको विशेष प्रहरी टोलीले आइतबार बेलुका ५ः४५ बजे लोहना हुँदै भारततर्फ जान लागेका अवस्थामा उनीहरूलाई पक्राउ गरिएको जनाइएको छ । प्रहरी उपरीक्षक खनालका अनुसार सुन चाँदी व्यवसायी सङ्घबाट बरामद भएका सुन र चाँदी परीक्षण गराउँदा सुनको टुक्रा १०० ग्राम र चाँदी २५ किलोग्राम तौल रहेको छ । पक्राउ गरिएकालाई हिरासतमा राखी आवश्यक कानुनी कारवाहीका लागि भन्सार कार्यालयमा बुझाउने कार्य भई रहेको जनाइएको छ । यस कारोवारमा अन्य को को संलग्न छन् भन्ने कुराको पनि अनुसन्धान भइरहेको प्रहरी उपरीक्षक खनालले जनाएको छ । रासस
६ वटा सम्पदा/बस्ती पुनर्निर्माण गर्न बजेट विनियोजन, अध्ययन गर्न १ करोड, पुनर्निर्माणका लागि कति ?
काठमाडौँ । भूकम्पबाट क्षतिग्रस्त ६ वटा सम्पदा बस्ती अध्ययनका लागि कूल १ करोड २० लाख र पुनर्निर्माणका लागि कूल ३० करोड रुपैयाँ विनियोजन भएको छ । काठमाडौं उपत्यकाभित्रका तीन र बाहिरका तीन गरी ६ वटा सम्पदा बस्ती अध्ययनका लागि प्रत्येक बस्तीका लागि २० लाखका दरले तथा पुनर्निर्माणका लागि यस आर्थिक वर्षभित्र प्रत्येक बस्तीका लागि ५ करोड रुपैयाँ बजेट निकासा गरिएको हो । काठमाडौं उपत्यकाभित्रका खोकना (ललितपुर), बुङमती (ललितपुर) र साँखु (काठमाडौं) का परम्परागत सम्पदा बस्तीका स्मारक, पाटी, धारा तथा अन्य संरचना पुनर्निर्माणका लागि बजेट विनियोजन भएको राष्ट्रिय पुनर्निर्माण प्राधिकरण केन्द्रीय आयोजना कार्यान्वयन इकाई (भवन)का आयोजना निर्देशक नवराज प्याकुरेलले जानकारी दिए । आयोजना निर्देशक प्याकुरेलका अनुसार उपत्यकाबाहिर नुवाकोटको साततले दरबार स्क्वायर परिसर, गोरखाको गोरखा दरबार स्क्वायर तथा दोलखाको दोलखा बजार पनि यस कार्यक्रममा समेटिएका छन् । ‘यी सम्पदा बस्तीका परम्परागत स्मारक, पाटी, धारा तथा अन्य पूर्वाधार पुनर्निर्माणमा बजेट खर्च हुनेछ । यसबाट हाम्रा मौलिक सम्पदाको संरक्षण मात्र हुने छैन आन्तरिक तथा बाह्य पर्यटन प्रबद्र्धन भई जीविकोपार्जनमा पनि टेवा पुग्नेछ’, प्याकुरलेले भने । त्यसैगरी, भूकम्पबाट क्षतिग्रस्त सातवटा विश्व सम्पदा सूचीमा परेका क्षेत्रहरुको संरक्षण तथा विकास कार्यको अध्ययन तथा विकास कार्यका लागि पनि सोही परिमाणको अलग्गै बजेट विनियोजन गरिएको छ । यस कार्यक्रम अन्तर्गत प्रत्येक क्षेत्रको अध्ययनका लागि २० लाख र विकास कार्यका लागि यस आर्थिक वर्षभित्र ५ करोड बजेट परिचालन हुनेछ । यस कार्यक्रमअन्तर्गत पशुपति क्षेत्र, चांगुनारायण मन्दिर क्षेत्र, स्वयम्भुनाथ क्षेत्र र बौद्ध स्तुपा क्षेत्रको विकास कार्य हुनेछ । त्यसैगरी, उपत्यकाका तीन जिल्लाहरु भक्तपुर, ललितपुर र काठमाडौंका दरबार स्क्वायरहरुको संरक्षण र संबद्र्धन गरिनेछ । केन्द्रीय आयोजना कार्यान्वयन इकाई (भवन)का आयोजना निर्देशक नवराज प्याकुरेलले अध्ययन कार्य तुरुन्तै प्रारम्भ हुने र अध्ययनको प्रतिवेदनलगत्तै निर्माण कार्य सुरु हुने जानकारी दिए ।
