केरुङ-काठमाडौँ रेलमार्गः सम्भाव्यता अध्ययनका लागि ३५ अर्ब लाग्ने
काठमाडौँ । केरुङ–काठमाडौँ रेलमार्गको सम्भाव्यता अध्ययनका लागि करीब ३५ अर्ब बराबरको खर्च लाग्ने देखिएको छ । नेपालीसहित चिनियाँ प्राविधिक टोलीले प्रारम्भिक अध्ययन गरी रेलमार्ग निर्माणका लागि उपयुक्त रहेको प्रतिवेदन दिइसकेको अवस्थामा सम्भाव्यता अध्ययन तथा विस्तृत परियोजना प्रतिवेदन तयारीका लागि उक्त परिमाणको रकम खर्च हुने देखिएको हो । प्रतिनिधिसभाको अर्थ समितिको बैठकमा भौतिक पूर्वाधार तथा यातायात व्यवस्था मन्त्रालयका सचिव मधुसुदन अधिकारीले आगामी आर्थिक वर्षका लागि कम्तीमा पनि १७ अर्ब बराबरको बजेट आवश्यक रहेको बताए । उनले सम्भाव्यता अध्ययनका लागि कम्तीमा दुई वर्ष लाग्ने जानकारी दिँदै साधन र स्रोत उपलब्ध भए तोकिएको समयमा नै रेलमार्ग निर्माणले गति लिने उल्लेख गरे । प्राविधिक रुपमा अध्ययन गर्न समय र पैसा दुवै लाग्ने भएकाले मन्त्रालयले सो आयोजनाका लागि आवश्यक बजेटको प्रबन्ध गर्नसमेत राष्ट्रिय योजना आयोग, अर्थ मन्त्रालयलाई समेत आग्रह गरेको समितिको बैठकमा उनले जानकारी दिए । सम्भाव्यता अध्ययन सकिएपछि उपयुक्त ढाँचाको छनोट गरी रेलमार्ग निर्माणको काम अगाडि बढ्ने छ । रेलमार्गका विषयमा नेपाली अधिकारी र चिनियाँ अधिकारीबीच पटकपटक छलफल भइरहेको छ । सो रेलमार्ग करीब ८० किलोमिटर हुने प्रारम्भिक अध्ययनबाट देखिएको छ । यस्तै रक्सौल–काठमाडौँ रेलमार्गको प्रारम्भिक अध्ययनको काम भारतीय पक्षले गरेको छ । सो रेलमार्गको सम्भाव्यता अध्ययनका लागिसमेत पाँचदेखि सात अर्ब बराबरको बजेट आवश्यक पर्ने सचिव अधिकारीको भनाइ छ । आवश्यक बजेट उपलब्ध भए तोकिएका ठूला आयोजना अगाडि बढाउन कुनै समस्या नभएको भन्दै सचिव अधिकारीले केरुङ–काठमाडौँ र रक्सौल–काठमाडौँ रेलमार्ग निर्माणसमेत प्रक्रियामा अगाडि बढ्ने बताए । तर ती आयोजनाका लागि हालसम्म कुन स्रोतबाट कसरी बजेट व्यवस्था गर्ने भन्नेबारेमा आवश्यक निर्णय भने भइनसकेको उनले बताए । उहाँले मनत्रालय मातहत रहेका कूल ३३ डिभिजन कार्यालयमध्ये १४ वटा प्रदेशलाई हस्तान्तरण गरिएको जानकारी दिए । आगामी आवका लागि मन्त्रालयको बजेट सीमासमेत बढेर आएको बताए । मन्त्रालयले थप आठ वटा डिभिजन कार्यालय थप गर्ने र सङ्गठन संरचनालाई मजबूत बनाउने तथा केही ठूला परियोजनालाई अगाडि बढाउनेसमेत समितिलाई उनले जानकारी गराए । रासस
चैत ८ देखि भृकुटीमण्डपमा पुष्प मेला, ६० लाख रुपियाँको कारोबार हुने आयोजकको अपेक्षा
काठमाडौँ । फ्लोरिकल्चर एशोसिएशन नेपाल (फ्यान) ले ‘स्वच्छ वातावरण तथा आर्थिक सम्वृद्धिको लागि पुष्प व्यवसाय’ २२ औं फ्लोरा एक्स्पो (पुष्प मेला) २०७५ आयोजना गर्ने भएको छ । भृकुटी मण्डपमा चैत ८ गतेदेखि १० गतेसम्म आयोजना हुने सो एक्स्पोबाट ६० लाख रुपियाँ बराबराको कारोबार हुने रहेको फ्यानका अध्यक्ष कुमार कसजु श्रेष्ठले जानकारी दिए । एक्स्पोमा जम्मा ८४ वटा स्टल रहनेछन्, जसमा अफिसिल स्टलका लागि १० वटा हुनेछन् भने प्रतियोगितात्मक प्रदर्शनीका लागि ४, ल्याण्ड स्केपिङ्गका लागि ४ वटा र व्यवसायिक स्टलका लागि ६५ स्टल राख्ने अध्यक्ष श्रेष्ठले जानकारी दिए । मेलामा सहभागि भएका बिभिन्न पुष्प व्यवसायीहरुद्वारा उत्पादित फूल बिरुवाहरु बीच स्वच्छ प्रतिस्पर्धा गराई विभिन्न बिधाहरुमा प्रथम हुने पुष्प व्यवसायीलाई नगद १० हजार र पाँच हजार, सिल्ड तथा प्रमाण पत्रद्वारा पुरस्कृत गरिने उनले जानकारी दिए । फ्यानले सोमवार आयोजना गरेको पत्रकार सम्मोलनमा अध्यक्ष श्रेष्ठले लामो समयदेखि निरन्तर रुपमा पुष्प व्यवसाय सञ्चालन गरिरहेको पुष्प व्यवसायीहरु मध्येबाट वरियातको आधारमा १ जना छनौट गरी सो नर्सरी लाई कदर–पत्रद्वारा सम्मान समेत जानकारी दिए । देशका बिभिन्न उत्पादन भएको पुष्प तथा पुष्पजन्य बस्तुहरुको प्रबद्र्धन, विस्तार, नयाँ प्रविधि अनुसन्धानको राष्ट्रिय तथा अन्तराष्ट्रिय स्तरमा प्रचार प्रसार तथा जनचेतना जगाउनेको उद्देश्यले मेला आयोजना गर्न लागेको आयोजकले जनाएको छ । प्रदेश सरकार, प्रदेश नं. ३, भुमि व्यवस्था कृषि तथा सहकारी मन्त्रालय, कृषि ज्ञान केन्द्र ललितपुर र फ्यानको संयुक्त आयोजनामा हुने मेलाको उद्घाटन संघीय सरकार कृषि तथा पशुपंक्षी विकास राज्यमन्त्री रामकुमारी चौधरी र प्रदेश ३, भूमि व्यवस्था, कृषि तथा सहकारी माननीय मन्त्री दावा दोर्जे लामाले गर्ने जानकारी गराएको छ । अध्यक्ष श्रेष्ठले भने, पुष्प व्यवसायको क्षेत्रमा भए गरेका नयाँ नयाँ प्रविधि र उपलब्धि सहितका जानकारी मेला स्थलमा नै प्राप्त गर्नुको साथै अन्तराष्ट्रिय स्तरमा प्रयोग भईरहेको प्रविधिको बिषयमा समेत मेला स्थलमा जानकारी प्राप्त हुनेछ ।’ कृषि क्षेत्रमा काम गर्ने व्यावसायी, अनुसन्धानकर्ता, विद्यार्थीका लागि मेला उपयोगी हुने विश्वास गरिएको छ । साथैमेलामा मौसमी फूल, आलंकारीक बोटबिरुवा, कट फ्लावर, ड्राइफ्लावर, सुनाखरी, कम्पोष्ट मल, फूलको गानो, विउविजन, ग्रीनहाउस, कृषि औजार, उपकरण, प्याकेजिगंका सामाग्री, सुक्ष्म तथा थोपा सिचाई प्रबिधी, आधुनिक खेती प्रबिधी र जैबिक विषादीका प्रदर्शनी तथा विक्री कक्षहरु पनि रहने आयोजकले जनाएको छ । देशका ४३ जिल्लामा लगभग ६९७ पुष्प व्यवसायी रहेका छन् । करिव १५३ हेक्टर क्षेत्रफलमा व्यवसायिक रुपमा खेती भइरहेको फ्यानले जानकारी दिएको छ । यो व्यावसायीमा ४३ हजार भन्दा बढी व्यक्ति लागेका छन् । यस व्यवसायले आर्थिक वर्ष २०७४/७५ मा २ अर्व भन्दा बढीको कारोवार गरेको जनाएको छ । २०७४/७५ मा ११ करोड बराबरको पुष्प तथा पुष्पजन्य बस्तुको आयात भएकोे छ भने निर्यात तर्फ २.३७ करोड बराबरको रहेको छ । समग्रमा पुष्प व्यवसाय वार्षिक १० देखि १५% को हाराहारीमा बार्षिक बृद्धिदर रहेको आयोजकले जनाएको छ ।
झापा र मोरङमा प्रभु बैंकको नयाँ शाखा सञ्चालन
काठमाडौँ । प्रभु बैंक लिमिटेडले झापा जिल्लाको चन्द्रगढी नगरपालिका वडा नं. ७ र मोरङ्ग जिल्लाको उर्लाबारी नगरपालिका वडा नं. ७ मा सोमबार एकसाथ नयाँ शाखा कार्यालयहरु सञ्चालनमा ल्याएको छ । चन्द्रगढी शाखा कार्यालयको झापा जिल्लाका प्रमुख जिल्ला अधिकारी जनकराज दाहालले उद्घाटन गरे । त्यसैगरी, उर्लाबारी शाखा कार्यालयको उर्लाबारी नगरपालिकाका मेयर खड्ग फागोले उद्घाटन गरेका हुन् । आजदेखि सञ्चालनमा आएका चन्द्रगढी र उर्लाबारी शाखा कार्यालयबाट त्यहाँका स्थानीय तहका सेवाग्राही, सर्वसाधारणहरु, विभिन्न किसिमका व्यवसायिक एवम् व्यापारिक फर्म, कम्पनी तथा संघ संस्थाहरुले गुणस्तरीय सेवा उपभोग गरी लाभान्वित हुने बैंकले जनाएको छ ।
वनजंगल संरक्षणका लागि २९ लाख घरधुरी सक्रिय
काठमाडौं । नेपालमा वनजंगलको संरक्षणका लागि २२ हजार ३ यस सामुदायिक वन उपभोक्ता समूह क्रियाशील रहेका छन् । यी समूहमा आवद्ध २९ लाख ६१ हजार घरधुरी वनसंरक्षणका लागि क्रियाशील हुँदै आएका छन् । नेपालका ७ वटै प्रदेशमा सामुदायिक वन उपभोक्ता समूह क्रियाशील रहेका छन् । वन संरक्षणका लागि नेपालमा सामुदायिक वन उपभोक्ता समूह मार्फत भएको काम विश्व स्तर मै उदाहरणीय रुपमा लिइन्छ । सामुदायिक वन उपभोक्ता समूह वन संरक्षण र संवद्धनको हिसावले, सामाजिक विकास र नेतृत्व विकासको हिसावले अगाडि बढी रहेको सामुदायिक वन उपभोक्ता महासंघका सचिव ठाकुर भण्डारीले बताए । वातावरण संरक्षणका लागि २०४६ सालमा पहिलो पटक वन क्षेत्रमा पनि ३३ प्रतिशत महिला सहभागी हुनु पर्ने, वनको वरपर बस्ने मानिसलाई शासन गरेर होइन मालिकको रुपमा संरक्षण, सम्बद्र्धन गर्नका लागि नीति नियमको बारेमा निर्णयका भई स्थानीय स्तरका मानिसले सो सम्बन्धी हक प्रदान गर्न पाउने व्यवस्था लागु भएको थियो । सामुदायिक वनलाई नीति नियम निर्माणकर्ताहरुले बैंक, सहकारी तथा बित्तीय संस्थाको रुपमा हेर्दै आएको सामुदायिक वन उपभोक्ता महासंघका सचिव ठाकुर भण्डारीले बताए । सामुदायिक वनबाट कर लिने विषयलाई लिएर सामुदायिक वन उपभोक्ता महासंघले विरोध जनाएको छ ।
डिजिटल नेपाल निर्माणमा प्राधिकरणको भूमिका महत्वपूर्णः मन्त्री बाँस्कोटा
काठमाडौँ । सञ्चार तथा सूचना प्रविधिमन्त्री गोकुल बाँस्कोटाले ‘डिजिटल नेपाल’ निर्माणमा नेपाल दूरसञ्चार प्राधिकरण भूमिका अत्यन्त महत्वपूर्ण हुने बताएका छन् । प्राधिकरणको २१ औँ वार्षिकोत्सवका अवसरमा सोमबार आयोजित कार्यक्रममा मन्त्री बाँस्कोटाले सरकारले डिजिटल नेपालको अवधारणा ल्याएकोले त्यसको नीतिसहित पूर्वाधार निर्माणको नेतृत्व गर्न र यस क्षेत्रमा देखिएका बेतिथिलाई रोक्न प्राधिकरणको भूमिका महत्वपूर्ण हुन्छ भने । उनले सरकारले दूरसञ्चार क्षेत्रको लागि छुट्टै पूर्वाधार कम्पनी खोल्ने तयारी गरेको बताउँदै सरकारले नेतृत्व गरेका कुनै पनि दूरसञ्चारसम्बन्धी कम्पनि वा संस्थाहरु कमजोर नहुने दाबी गरे । मन्त्री बाँस्कोटाले निजी क्षेत्रप्रति नकारात्मक धारणा राख्ने भन्दा पनि समान व्यवहार गर्न आग्रह गरे । “मुलुकमा राजनीतिक स्थिरता भएन भने नीतिगत अस्थिरता पैदा हुन्छ, नीतिगत अस्थिरताले विकास निर्माणको सम्पूर्ण कामलाई ध्वस्त बनाइदिन्छ, सरकारले देश विकास गर्ने सङ्कल्प गरेकोले त्यो पूरा गर्छ”,उनले भने । मन्त्री बाँस्कोटाले परिणाम आउने गरी र जनतालाई प्रत्यक्ष लाभ हुने गरी उत्सुकताका साथ इमानदारीपूर्वक काम गरेको खण्डमा सरकारले सकारात्मक ढङ्गबाट सहयोग गर्ने प्रतिबद्धता व्यक्त गरे । सरकारले आफ्नै स्याटलाइन राख्ने तयारी गरिरहेको र त्यसको अर्को कानून नबन्दासम्मको लागि सञ्चालनको जिम्मा प्राधिकरणलाई दिने बताए । सरकारका प्रवक्ता समेत रहनुभएका मन्त्री बाँस्कोटाले सरकारले केही पनि गरेको छैन भन्नेभन्दा पनि केही न केही सुरुआत गरेको छ भनेर सकारात्मक ढङ्गबाट लिन आग्रह गरे । “प्राधिकरणसँग धेरै अवसर छन् तर फ्रिक्वेन्सी लिने काम नगर्ने, ठेक्का लिने काम नगर्ने, कागजको रिपोर्ट मात्र हाल्ने जनतालाई झुक्याउने, सरकारलाई झुक्याउने र संस्थालाई बदनाम बनाउनेलाई प्राधिकरणले टुलुटुलु हेरेर बस्न मिल्दैन ”, मन्त्री बाँस्कोटाले भने । प्राधिकरण कार्यवाहक अध्यक्ष पुरुषोत्तम खनालले खुल्ला बजार नीतिलाई आत्मसात गर्दै राज्यका शहरी र ग्रामीण क्षेत्रमा दूरसञ्चार सेवा सर्वसुलभ र भरपर्दो बनाउन प्राधिकरण प्रयत्नरत छ भने । राजेन्द्र थापालाई ‘प्राधिकरण सेवा पुरस्कार’ प्राधिकरणले यो वर्षको ‘प्राधिकरण सेवा पुरस्कार’ कर्मचारी राजेन्द्र थापालाई प्रदान गरेको छ । पुरस्कारको राशि १५ हजार छ । कार्यक्रममा नेपाल दुरसञ्चार स्वतन्त्र कर्मचारी यूनियनका अध्यक्ष विजय यादवले धन्यवाद ज्ञापन गरेका थिए । यस्तै, प्राधिकरणले आयोजना गरेको हट पोट्याटो, हाजिर जवाफ तथा फुटसलका विजेतालाई सम्मान पत्र प्रदान गरिएको थियो । दूरसञ्चार सेवालाई नियमित र व्यवस्थित गर्ने उद्देश्यले दूरसञ्चार क्षेत्रको नियामक निकायका रुपमा विसं २०५४ फागुन २० गते प्राधिकरणको स्थापना भएको थियो ।
मकवानपुरको रजैयामा सिटिजन्स बैंकको एक्सटेन्सन काउन्टर
काठमाडौँ । सिटिजन्स बैंक इन्टरनेसनल लिमिटेडले मकवानपुर जिल्लाको मनहरी गाउँपालिकाअन्तर्गत वडा नं. ९ रजैयामा एक्सटेन्सन काउन्टरको स्थापना गरेको छ । उक्त एक्सटेन्सन काउन्टरको आरम्भ समारोहमा उच्चपदस्थ सरकारी कर्मचारी, उद्योगी, व्यापारी, विभिन्न संघ संस्थाका प्रमुख तथा नागरिक समाजका अगुवाहरुको उपस्थिति रहेको थियो । बैंकले यस अघि नै मकवानपुरको हेटौंडा तथा मनहरी गरेर दुई स्थानमा आफ्ना शाखा कार्यालयहरु स्थापना गरिसकेको छ । उक्त रजैया एक्सटेन्सन काउन्टरबाट बैंकले उक्त क्षेत्रका ग्राहकहरुलाई बैंकले नगद जम्मा तथा भुक्तानी गर्ने, रेमिटेन्स भुक्तानी गर्ने तथा पठाउने, चेक क्लियरिङ गर्ने, एबिबिएस सुविधा लगायत विभिन्न बैंकिङ्ग सेवाहरु उपलब्ध गराउने जनाएको छ ।
सोलुखुम्बुको पासाङ ल्हामु गाउँमा नेपाल इन्भेष्टमेण्ट बैंकको एक्स्टेन्सन काउन्टर
काठमाडौँ । नेपाल इन्भेष्टमेण्ट बैंक लि.ले प्रदेश नम्बर १ अन्तर्गत सोलुखुम्बु जिल्लाको पासाङ ल्हामु गाउँपालिका वडा नं.१ स्थित खरीखोलामा आफ्नो १२औं एक्स्टेन्सन काउन्टर खोलेको छ । खुम्बु पासाङल्हामु गाउँपालिकाका ल्हाक्पा छिरी शेर्पाले उक्त एक्स्टेन्सन काउन्टरको उद्घाटन गरे । उद्घाटनपछि गाउँपालिकाका प्रवक्ता शेर्पाले गाउँबासीमा बचत गर्ने बानीको बिकास हुनुको साथै वित्तीय साक्षरतापनि अभिबृद्धि हुने कुरा प्रकाश पारे । बैंकले खुम्बुपासाङ ल्हामुगाउँपालिकाअन्तर्गत ५ मध्ये ३ वटा वडामा बैंकिङ सेवाप्रदानगरिसकेको र सोहीगाउँपालिका अन्तर्गत वडा नं. ५ नाम्चेमापनि छिट्टै एक्स्टेन्सन काउन्टर खोल्ने तयारी गरेको छ । एक्स्टेन्सन काउन्टरबाट खुम्बु पासाङ ल्हामु गाउपालिका, माप्यदुधकोशी गाउपालिका र सोलु दुधकुण्ड नगरपालिकाका बासिन्दाहरूलाई बैंकिङ कारोबार गर्न सहज हुनेछ । काउन्टरले रकम जम्मा गर्न र भुक्तानी गर्न सहयोग गर्नुका साथै स्थानीयमा बित्तीय साक्षरता अभिबृद्धि गर्न सहयोग गर्ने बैंकले जनाएको छ ।
‘एनसेल सुपर सेलर’ योजना, उपहारमा कार र युरोप भ्रमणको अवसर
काठमाडौं । एनसेल प्राईभेट लिमिटेडले आफ्ना देशभरी रहेका खुद्रा बिक्रेताहरुलाई लक्षित गरी ‘एनसेल सुपर सेलर’योजना ल्याएको छ । यस योजना अन्तर्गत खुद्रा बिक्रेताले बम्पर उपहार स्वरुप कार, युरोप भ्रमण र आईफोन एक्स जस्ता आकर्षक उपहारहरु जित्न सक्छन् । यो योजना चैत्र १ गतेबाट लागु भएको छ र १० महिना सम्म संचालनमा रहने कम्पनीले जनाएको छ । यस योजनामा सामेल हुनका लागि खुद्रा बिक्रेताले एनसेलको रिचार्ज कार्ड, सिम कार्ड वा भिएफटी (भर्चुअल फण्ड ट्रान्सफर) खरिद तथा बिक्रीको कारोबार गरी आफ्नो प्रत्येक कारोबारका आधारमा अंक जम्मा गर्दै गई निश्चित अंक संकलन गर्नु पर्दछ । यो योजना अन्तर्गत खुद्रा बिक्रेताहरुले प्लाटिनम, गोल्ड, सिल्भर र ब्रोन्ज गरी चार प्रकारका समुह मध्य कुनै एक समुहमा आफुलाई सहभागी गराई उपहार पाउन सक्छन् । बम्पर उपहार बाहेक खुद्रा बिक्रेताहरुले निश्चित अंक संकलन गरेपछि बाईक, स्कुटर, ५५ ईन्चको स्मार्ट टिभी, एअर कन्डिसनर, आईप्याड, ईलेक्ट्रिक ट्रेडमिल, वाशिङ्ग मशिन र ल्यापटप लगायतका विभिन्न उपहारहरु जित्न सक्नेछन् । ‘एनसेल सुपर सेलर’ योजना लागु भएको ६ महिना पश्चात खुद्रा बिक्रेताहरुले आफुले संकलन गरेका आवश्यक अंकका आधारमा उपहार दाबी गर्न सक्नेछन् । यस योजनामा सहभागिता जनाउनका लागि खुद्रा बिक्रेताहरुले रिचार्ज कार्ड, सिम कार्ड वा भिएफटी एनसेलको सेल्स एण्ड डिष्ट्रिब्युसन एप बाट खरिद गरेको हुनुपर्नेछ । यस योजनाको चार समुह अन्तर्गत खुद्रा बिक्रेताहरुले ३,७०० भन्दा बढी उपहारहरु जित्नेछन् । साथै योजनामा सहभागी मध्ये उत्कृष्ट १०,००० खुद्रा बिक्रेताहरुलाई पनि एनसेल गिफ्ट ह्याम्पर प्रदान गरिने कम्पनीले जनाएको छ ।
