प्राइम-ओम मर्जर: राष्ट्र बैंकलाई तीनओटा पत्र, ओम मर्जरमा जानै नसक्ने, प्राइम जानैपर्ने
काठमाडौं । प्राइम कमर्शियल बैंक र ओम डेभलपमेन्ट बैंकबीचको मर्जर प्रक्रिया रोकिएको छ । ओम डेभलपमेन्ट बैंक मर्जर प्रक्रियाप्रति अनिच्छुक देखिएसँगै प्रक्रिया अघि बढ्न नसकेको हो । मर्जर प्रक्रिया अघि बढाउने तथा डिमर्जमा जाने सम्बन्धमा प्राइम र ओमका तर्फबाट ३ ओटा पत्र राष्ट्र बैंकमा पुगिसकेको छ । नेपाल राष्ट्र बैंकमा पठाइएको पत्रमध्ये ओम डेभलपमेन्ट बैंकका तर्फबाट डिमर्जमा जाने आशयसहितको पत्र, प्राइमका तर्फबाट मर्जर प्रक्रियामा सहजीकरण गरिदिने आशयसहितको पत्र रहेको बताइएको छ । एउटा पत्र संयुक्त मर्जर कमिटीको तर्फबाट पठाइएको भए पनि उक्त पत्रमा समेत दुई पक्षको फरक फरक मत रहेको बताइएको छ । राष्ट्र बैंक नियमन विभागका कार्यकारी निर्देशक नारायणप्रसाद पौडेलले मर्जर कमिटीको पत्रले बैंकहरु मर्जरमा जान चाहेको हो कि होइन स्पष्ट पार्न नसक्ने गरी पत्र प्राप्त भएकोे बताउँदै मर्जरका लागि निर्णय गर्ने समय बैशाख १३गतेसम्म रहेको र त्यसपछि आवश्यक सोधपुछ गर्ने बताए । ‘मर्जरको निर्णयका लागि १३ गतेसम्म समय छ, यो समय सकिएपछि हामी प्रश्न गर्छौ, डिमर्जमा जाने भए पनि त्यसको छुट्टै प्रक्रिया छ, सोही प्रक्रियाअनुसार अघि बढ्छ’ पौडलले विकासन्यूजसँग भने । उता, ओमले राष्ट्र बैंकलाई बुझाएको पत्रमा भने प्राइम बैंकले मर्जरपछिकाे सञ्चालक समितिमा आफ्नो प्रतिनिधित्व गराउन नमानेको, आफ्ना कर्मचारीहरुलाई मर्जरपछिको व्यवस्थापनमा उचित प्रतिनिधित्व नदिएको तथा प्राइम बैंकभित्र विभिन्न व्यवस्थापकीय समस्या देखिएकोले आफूहरु डिमर्जमा जान लागेको उल्लेख गरेको बताइएकाे छ । नेपाल राष्ट्र बैंकका डेपुटी गभर्नर चिन्तामणि शिवाकोटीका अनुसार ओमले त्यस्ताे व्यहाेराकाे पत्र पठाउँदा प्राइम बैंकले भने आफूहरुले मर्जर चाहेको र ओम भने प्रक्रियाबाट पछि हट्न लागेको भन्दै मर्जरमा सहजीकरण गर्न राष्ट्र बैंकलाई अर्को पत्र लेखेकाे छ । ओम डेभलपमेन्ट बैंकका प्रमुख कार्यकारी अधिकृत विश्वमाेहन अधिकारीले आफू मर्जर प्रक्रियामा सहभागी नभएको बताउँदै संयुक्त मर्जर कमिटीले राष्ट्र बैंकलाई पत्र पठाएको आफूले थाहा पाएको बताए । तर, पत्रमा के व्यहोरा छ भन्ने आफूलाई थाहा नभएको उनले दाबी गरे । तोकिएको चुक्ता पुँजी पुगिसकेका दुवै बैंकहरु यसअघि स्वेच्छिक रुपमा मर्जरको तयारीमा जुटे पनि ओमभित्र मर्जरमा जानै नहुने मत बलियो भएपछि मर्जर प्रक्रिया रद्द गर्ने निष्कर्षमा ओम डेभलपमेन्ट बैंक पुगेको बताइएको छ । ‘प्रक्रिया रोकिएको छ, राष्ट्र बैंकले एक्सन लिए केही हुन सक्छ, तर ओमले नचाहँदा नचाहँदै केही हुन सक्दैन, त्यसैले प्रक्रिया अघि बढ्ने सम्भावना कमजोर छ’– प्राइम बैंक स्रोतले भन्यो । प्राइम कमर्शियल बैंक लिमिटेडका सञ्चालक गजेन्द्र विष्टले पनि ओमसँगको मर्जर प्रक्रिया दुइ महिनादेखि नै अवरूद्ध भएकाे बताए । ‘माघ अन्तिम सातादेखि प्रक्रिया अघि बढेकाे छैन’ विष्टले भने-‘एउटा गाेरू बसेपछि अर्काे गाेरूबाट जाेत्न सकिदैन । राेपाइ राेकिएकाे छु।’
मेरो सुरक्षाले मोवाइल व्यवसायीलाई ११ लाखको निःशुल्क बीमा गरी दिने
काठमाडौँ । मेरो सुरक्षाले नयाँवर्षको अवसरमा निःशुल्क बीमा योजना सार्वजनिक गरेको छ । मेरो सुरक्षाको मोबाइल इन्स्योरेन्स अन्तरगत नयाँ योजना ल्याएको हो । यस योजनामा मेरो सुरक्षाको मोबाइल प्रोटेक्सन प्लानमा सहकार्य गर्ने मोबाइल व्यवसायी सहभागि हुन सक्छन् । मेरो सुरक्षाका अनुसार मोबाइल व्यवसायीको ११ लाख रुपैंया बराबरको निशुल्क बीमा हुनेछ । मेरो सुरक्षाका प्रमुखकार्यकारी अधिकृत प्रेम सुनुवारका अनुसार मोबाइल व्यवसायीले १० लाख रुपैंया बराबरको दुर्घटना बीमा तथा एक लाख रुपैंया बराबरको स्वास्थ्य उपचार बीमा निःशुल्क पाउने छन् । योजनामा सहभागि हुनका लागि मोबाइल व्यवसायीहरु मेरो सुरक्षाको मोबाइल प्रटेक्सन प्लानका बितरक हुनु पर्नेछ । बैशाख २० गतेसम्ममा मेरो सुरक्षासँग सम्पर्कमा आउने मोबाइल बितरकहरुलाई मात्र निःशुल्कबीमा योजनामा सहभागि गराइने बताइएको छ । मेरो सुरक्षाले प्रिमियर इन्स्योरेन्ससँगको सहकार्यमा निःशुल्क बीमा योजना ल्याएको हो । मेरो सुरक्षाले प्रिमियर इन्स्योरेन्ससँगकै सहकार्यमा मोबाइल प्रोटेक्सन प्लान सञ्चालन गरिरहेको छ । केही समय अघि मात्र चितवनमा शाखा बिस्तार गरेको मेरो सुरक्षाले बैशाखको पहिलो सातादेखि बुटवलमा पनिशाखा सञ्चालनमा ल्याउने जनाएको छ । कुनै कारणले मोबाइल फुटेमा, आगो वापानीले मोबाइलमा भौतिक क्षती पुगेर मोबाइल नचल्ने भएमा, हराएमा वा चोरी भएमा मेरो सुरक्षाले पहिलेको मोबाइलको डाटा सहित नयाँ मोबाइल सेट उपलब्ध गराउँछ । मोबाइलप्रयोगकर्ताले मेरो सुरक्षाको मोबाइल एप तथा वेबसाइटबाट सिधै मेरो सुरक्षा प्रोटेक्सन प्लान खरीद गरी आफ्नो मोबाइलको बीमा गराउन सक्छन् । मेरो सुरक्षाले मोबाइल प्रोटेक्सन प्लानमा सहभागि हुने सेवाग्राहीको १ लाख रुपैंयाको निःशुल्क दुर्घटना बीमा समेत गरि दिने जनाएको छ । मोबाइल प्रोटेक्सन प्लान लिनका लागि प्रत्येक वर्ष मोबाइलको खरिद मूल्यको ५ प्रतिशत रकम भुक्तान गर्नु पर्ने हुन्छ । मोबाइलको बीमा गर्दा लाग्ने शुल्क इसेवा, खल्ती, आई पेका साथै १५ वाणिज्य बैंकका अनलाइन बैंकिङबाट भुक्तान गर्न सकिन्छ ।
बैशाख १३ गतेदेखि ‘छक्का पञ्जा २’ पुन : प्रदर्शन हुने
काठमाडौं । ‘छक्का पञ्जा २’ पुन : हलमा प्रदर्शन हुने भएको छ । दिपाश्री निरौला तथा दिपकराज गिरीको निर्देशनमा रहेको सो चलचित्र सन् २०१७ अगस्ट १७ मा रिलिज भएको थियो । हालसम्म पनि युट्यबमा नआएको सो चलचित्र बैशाख १३ गते देखि पुनः प्रदर्शन हुने भएको छ । प्रदर्शन भएको २ वर्ष वितिसक्दा पनि युट्यबमा नआए पछि दर्शकले हर्ने इच्छा व्यक्त गरेकै कारण पुन प्रदर्शन गर्ने भएको चलचित्र निर्माण समुहले जानकारी दिएको छ । दिपकराज गिरी, केदार घिमिरे, प्रियका कार्की, जितु नेपाल, वर्षा राउत, बुद्धि तामाङ, स्वस्तिमा खड्का, स्वरुप पुरुष ढकालले यस फिल्ममा अभिनय रहेका थिए । १ घण्टा ३५ मिनेट सम्मको प्रदर्शन हुने सो फिल्म नेपाली समाजभित्रको चालचलन, रितिरिवाज, संस्कार लाई टपक्क टिपेर चलचित्रमा उल्लेख गरिएको थियो । सो चलचित्रले करिब १५ करोड आम्दानी गरेका बक्स अफिसले बताउँदै अब पुनः प्रदर्शनले थप आम्दानी बढ्ने जानकारी दिएको छ ।
सानिमा बैंक र म्याक्स हेल्थकेयरबीच सम्झौता, उपचार खर्चमा ५ प्रतिशत छुट
काठमाडौँ । सानिमा बैंक लिमिटेड र म्याक्स हेल्थकेयर ईन्स्टिच्युट लिमिटेडबीच स्वास्थ्य उपचार सुविधा सम्बन्धि सम्झौता भएको छ ।सम्झौता पत्रमा सानिमा बैंकको तर्फबाट प्रमुख डिजिटल बैंकिङ्ग, बिक्रम श्रेष्ठ र म्याक्स हेल्थकेयर ईन्स्टिच्युट लिमिटेडका तर्फबाट सेल्स तथा मार्केटिङ्गका उप-प्रबन्धक सुरज जोसेफले हस्ताक्षर गरेका हुन् । म्याक्स हेल्थकेयर ईन्स्टिच्युट लिमिटेड, भारतको दिल्लीमा अवस्थित स्वास्थ्य उपचारसम्बन्धि सेवा दिने चेन संस्था हो । हाल, यस संस्थाको १४ वटा साझेदार अस्पतालहरु छन् । उक्त सम्झौता अन्तर्गत सानिमा बैंकको डेबिट वा क्रेडिट कार्ड प्रयोगकर्ताले म्याक्स हेल्थकेयर ईन्स्टिच्युटमा साझेदार रहेका उत्तर भारतका विभिन्न अस्पतालहरुमा उपचारको क्रममा सहज रुपमा भुक्तानी गर्न सक्ने छन् । साथै सानिमा बैंकको कार्ड प्रयोग गरी विभिन्न उपचार खर्चहरुमा ५ प्रतिशत सम्म छुट पाउन सक्ने छन् ।
बैशाख ५ गते विप्लवको नेपाल बन्द
काठमाडौं। विप्लव माओवादीले बैशाख ५ गते नेपाल बन्दको घोषणा गरेको छ। सरकारले आफुहरुको कार्यक्रमलाई अंकुश लगाई दमन गर्न खोजेको बिरोध गर्दै उनिहरुले बन्द घोषणा गरेका हुन्। सरकारले फागुण २८ गते राती देखी विप्लवको कार्यक्रम बन्द गराई ३५ दिन भित्रमा आत्मासमर्पण गर्न आदेश दिएको थियो। विप्लवले बैशाख २ गतेबाट सुरु हुने कार्यक्रमको पहिलो दिन कोण सभा, बैशाख ३ गते अन्तरकृया, बैशाख ४ गते मशाल जुलुस, बैशाख ५ गते नेपाल बन्द र बैशाख ६ गते देखी प्रधानमन्त्री केपी शर्मा ओलीले सहभागी हुने देशका विभिन्न भागहरुमा बन्दको कार्यक्रमहरु आयोजना गर्ने बताएको छ।
नेपालीको एक बैंक खातामा बैंकहरुको साथ, कुन बैंकले के दिए नाम ?
काठमाडौँ । साक्षरता अभिवृद्धि तथा हरेक नेपालीको एक बैंक खाता लक्ष्य साकार तुल्याउने सरकारको नीतिलाई कार्यान्वयन गर्न बैंकहरु सक्रिय भएका छन् । विभिन्न बैंकहरुले छुट्टा छुट्टै नाम दिएर बचत खाता सञ्चालनमा ल्याएका छन् । एनएमबी बैंकले ‘सबैको सहारा बचत खाता’सञ्चालनमा ल्याएको छ । ललितपुरमा पत्रकार सम्मेलन गरेर उक्त बैंकका प्रमुख कार्यकारी अधिकृत सुनिल केसीले शून्य मौज्दातमा खाता खोल्न सकिने र त्यसमा बैंकले तत्काल रु एक सय जम्मा गरिदिने जानकारी दिँदै ‘समृद्ध नेपाल सुखी नेपाली’ वर्तमान सरकारको परिकल्पना साकार पार्न सहयोग गर्ने उद्देश्यले बैंकले यस्तो अभियान सञ्चालन गरेको बताए । त्यसैगरी ज्योति विकास बैंक लिमिटेडले ‘ज्योतिसमृद्धि बचत खाता’ संचालनमा ल्याएको छ । वार्षिक ७% ब्याजदर दिने बचत खातामा अन्य बैंक वित्तीय संस्थाहरुमा खाता नहुने ग्राहकहरुले खाता खोलेमा रु. १०० बैकको तर्फबाट प्रदान गरिने बैंकले जनाएको छ । यता, सिटिजन्स बैंक इन्टरनेसनल लिमिटेडले नयाँ बचत योजना ‘सिटिजन्स सरलबचत खाता’ सर्वजनिक गरेको छ । यस योजना अन्तर्गत खाता खोल्ने ग्राहकहरुलाई बैंकको तर्फबाट रु १०० खातामा राखिदिने ब्यवस्था गरिएको खातामा दैनिक मौज्दातमा वार्षिक ५%ब्याज दर प्रदान गरिने बैंकले जनाएको छ । यसैगरी, नेपाल बङ्गलादेश बैंकले समृद्धिसंग जोडौ नाता, सबै नेपालीको बैंक खाताको नारा सहित रजत बचत खाता सञ्चालनमा ल्याएको छ । उक्त रजत बचत खाता खोले वापत आकर्षक प्रतिफलहरु पाउन सकिनेछ । उक्त खाता मात्र रू. २५ मा खाता खोल्न सकिने, बैंकद्वारा रू. १०० थप प्रदान गरिने, बचत कर्ता र इच्छाएको व्यक्तिलाई रू. १ लाख सम्मको स्वास्थ्य बीमा सुबिधा र नेपाल भरिका अस्पतालहरुमा उपचार सेवा जस्ता आकर्षक सुविधाहरु रहेका छन् । त्यसैगरी, नेपाल क्रेडिट एण्ड कमर्स बैंक(एनसीसी बैंक)ले ‘एनसीसी नेपाली नागरिक बचत खाता’ सञ्चालनमा ल्याएको छ । २०७६ वैशाख १ गते देखि लागु हुने उक्त बचत खाता खोल्ने व्यक्तिहरुलाई बैंकले आफ्नै तर्फबाट रु १ सय खातामा जम्मा गरिदिने जनाएको छ । यता, जनता बैंक लिमिटेडले ‘सबै नेपालीको खाता’ सञ्चालनमा ल्याएको छ । यसमा खाता खोल्दा बैंकले १०० रुपैयाँ जम्मा गरिदिने र वार्षिक ब्याज दर ६.५ प्रतिशत दिने बैंकले जनाएको छ । यसैगरी सनराइज बैंकले ‘सनराइज समृद्घि बचत खाता’ ग्राहक समक्ष ल्याएको छ । जस अन्तर्गत खाता खोल्दा १०० रुपैयाँ बैंकले नै जम्मा गरी दिने जनाएको छ ।
वृद्ध भत्ता एक हजार बढ्ने, अर्काे बर्षदेखि महिनामै ३ हजार
काठमाडौं । सरकारले वृद्ध भत्ता एक हजार वृद्धि गर्ने तयारी गरेको छ । आगामी आर्थिक बर्षको बजेट मार्फत वृद्ध भत्तालाई एक हजार वृद्धि गर्ने तयारीमा सरकार जुटेको हो । हाल ७० बर्ष कटेका वृद्ध वृद्धाहरुले मासिक १ हजार वृद्धि भत्ता र एक हजार स्वास्थ्य उपचार शुल्क वापत कुल २ हजार पाउँदै आएका छन् । सरकाले आगामी आर्थिक वर्षको बजेट मार्फत त्यसलाई वृद्धि गरेर मासिक ३ हजार बनाउने गरि बजेट निर्माणको प्रारम्भिक छलफलमा कुरा उठिरहेको अर्थ मन्त्रालय श्रोतले बतायो । प्रधानमन्त्री केपी ओलीले पनि वृद्ध भत्ता बढ्ने प्रष्ट संकेत दिईसकेका छन् । निर्वाचनको घोषणा पत्रमा पाँच बर्षभित्र वृद्ध भत्तालाई ५ हजार पुर्याउने उल्लेख गरेको बामपन्थी सरकारले चालु आर्थिक बर्षमा भत्ता वृद्धि नगर्दा आलोचना खेपेको थियो । अर्थ मन्त्रीका आर्थिक सल्लाहकार डा. रामशरण खरेलले भने–‘चुनावी घोषणा पत्रमा लेखिएका प्रतिवद्धताहरु पुरा हुने गरि बजेट निर्माणको प्रारम्भिक छलफल भैरहेको छ ।’हाल दलित ज्येष्ठ नागरिकले ६० वर्षदेखि नै मासिक २ हजार रुपैंयाँ पाउँदै आएका छन् भने विधवा तथा एकल महिला, अपांग, लोपोन्मुख जातिले पनि त्यस्तो भत्ता पाउँदै आएका छन् । नेपालमा समाजिक सुरक्षा भत्ता लिनेहरुको संख्या २४ लाख ९८ हजार ५ सय ३२ जना रहेका छन् ।
स्पर्श लघुवित्तको नाफा ९ गुणाले बढ्यो, १ वर्षमा व्यवसायको आकार तेब्बर
काठमाडाैं । स्पर्श लघुवित्तले तीन महिनामा आफ्नो नाफा ९ गुणा बढाएको छ । पुस मसान्तमा ६ लाख २१ हजार रहेको स्पर्शको नाफा चैत मसान्तमा आइपुग्दा ६० लाख ३९ हजार पुगेको हो । स्पर्शले प्रकाशन गरेको चालु आर्थिक वर्षको तेस्रो त्रैमासको वित्तीय विवरण अनुसार लघुवित्तले अघिल्लो वर्षको चैतमा रहेको ५६ लाख रुपैंया घाटाको अवस्थालाई सुधारेर १ वर्षमा उक्त आकारमा नाफा पुर्याएको हो । नाफासँगै स्पर्शले रिजर्भको आकार पनि ८ लाखबाट बढाएर ६२ लाख रुपैंया पुर्याएको छ । लघुवित्तले उक्त अवधिमा व्यवसायको आकार तेब्बर बनाएको छ । अघिल्लो वर्ष चैतमा रहेको २ अर्ब ६३ करोडको ऋण लगानीलाई यो वर्ष ७ अर्ब ५३ करोड ८८ लाख रुपैंया ऋण लगानी गरेको छ जसका लागि लघुवित्तले ८ करोड २९ लाख रुपैंया चुक्ता पुँजी, १३ करोड ८८ लाख रुपैंया सदस्यहरुको बचत र ५ अर्ब ९९ करोड ऋणमार्फत् जुटाएको छ । लघुवित्तको पुँजी पर्याप्तता अनुपात १४.९९ प्रतिशत, कस्ट अफ फण्ड ११.०५ प्रतिशत, निष्क्रिय कर्जा अनुपात ०.४६ प्रतिशत छ । स्पर्शले गत चैतमा जारी गरेको आईपीओको सूचीकरण नै बाँकी रहेकोले मूल्य आम्दानी अनुपात भने उपलब्ध छैन ।
