दाङमा अजोड इन्स्योरेन्स लिमिटेडको शाखा बिस्तार
काठमाडौँ । अजोड इन्स्योरेन्स लिमिटेडको दाङ्ग शाखा कार्यालयको उद्घाटन भएको छ । तुलसीपुर उपमहानगरपालिकाका प्रमुख घनश्याम पाण्डे, उद्योग वाणिज्य संघ तुलसीपुरका निवर्तमान अध्यक्ष बिमल रिजाल, उपाध्यक्ष रामप्रसाद चालिसे तथा अजोड इन्स्योरेन्स लि.का संचालक रामबहादुर गुरुङ्गले शाखा उद्घाटन गरेका हुन् । उक्त अवसरमा अजोड इन्स्योरेन्स लि.का दाङ्ग शाखा प्रमुख शिशिरकुमार लामिछानेले स्वागत मन्तव्य व्यक्त गरेका थिए । कार्यक्रम समापन गर्दै सभापति तथा संस्थाका नायब प्रमुख कार्यकारी अधिकृतसुरेन्द्र थापाले उपस्थित अतिथिहरुलाई मायाको चिनो प्रदान गरेका थिए ।
खुलारुपमा बिक्री हुने अप्रशोधित दुग्ध बिक्री वितरणमा प्रतिबन्ध
हेटौँडा । मकवानपुर जिल्लामा खुलारुपमा बिक्री हुने अप्रशोधित दुग्ध बिक्री वितरणमा प्रतिबन्ध लगाइएको छ । जिल्ला प्रशासन कार्यालय मकवानपुरले दुग्ध तथा दूधजन्य पदार्थको गुणस्तर निर्देशिका २०७५ लागू गर्नका लागि सो प्रतिबन्ध लगाएको हो । जिल्ला प्रशासन कार्यालयद्वारा दूध वितरण गर्ने सरोकारवालासँग बसेको बैठकले यही शुक्रबार १३ गतेदेखि खुला बिक्री हुने दुग्धमा रोक लगाउने निर्णय गरेको छ । जिल्ला प्रशासन कार्यालयका अनुसार खाद्य प्रविधि तथा गुणनियन्त्रण कार्यालय हेटौँडाका प्रमुखको संयोजकत्वमा गठित कार्यदलको टोलीले दिएको प्रतिवेदनको आधारमा सो निर्देशिका कार्यान्वयन गर्न लागेको हो । निर्देशिका २०७५ मा दूध प्रशोधन गरी उत्पादन मिति, उपभोग मिति, मूल्य र लेवलसहित आवश्यक जानकारीलगायत प्याकेजिङमा उल्लेखित दूधमात्र बिक्री वितरण गर्न पाइने व्यवस्था उल्लेख छ । निर्देशिका २०७५ कार्यान्वयनमा आएपछि खुला तथा प्लाष्टिकमा राखी रबरले बाँधेर प्याक गरेको दूध बिक्री गर्न नपाइने प्रशासनले जनाएको छ । सरकारले गत असोज ४ गते निर्देशिका पारित गरेको थियो भने गत चैत ४ गतेबाट नै लागू हुने सो निर्देशिका मकवानपुर जिल्लामा विभिन्न कारणले लागू हुन नसकेको प्रमुख जिल्ला अधिकारी आसमान तामाङको भनाइ छ । यस सम्बन्धमा दुग्ध विकास संस्थान, दुग्ध वितरण आयोजनाका प्रमुख गणेश यादवसँग निर्देशिकाबारे बुझ्दा निर्देशिका लागू भएमा किसानले उत्पादन गरेको दूध बाह्रै महीना खरीद गर्न सकिने र किसानलाई फाइदा हुनुका साथै विचौलियाबाट मुक्त हुने बताए । किसानले पाउने मूल्य र उपभोक्ताले खरीद गर्ने खुला दूधको मूल्यबीच ४० प्रतिशतभन्दा बढी फरक देखिएको र अन्य व्यक्तिले फाइदा लिएको स्वयं किसानको गुनासो छ । यो जिल्लामा आधा दर्जन डेरी उद्योग सञ्चालनमा छन् । रासस
अमेरिका-चीन व्यापार वार्ता हुँदै, अमेरिकी व्यापार प्रतिनिधि र अर्थमन्त्री बेइजिङ आउँदै
वासिङ्टन । संयुक्तराज्य अमेरिका र चीनबीचको व्यापार तनाबलाई वार्ता र सम्झौताद्वारा सुल्झाउने उद्देश्यले अमेरिकी उच्च अधिकारीहरु अर्को साता बेइजिङ प्रस्थान गर्न लागेको ह्वाइट हाउसले जनाएको छ । दुबै मुलुकका उच्च अधिकारीहरु व्यापार विवाद जतिसक्दो चाँडो टुङ्ग्याउन केही महिनादेखि वार्तामा छन् । ह्वाइट हाउसद्वारा जारी विज्ञप्तिमा अमेरिकी व्यापार प्रतिनिधि रोबर्ट लाइटीजर र अमेरिकी अर्थमन्त्री स्टिभेन मन्चिन अर्को साता चिनियाँ प्रतिनिधिसँग वार्ताका लागि बेइजिङ प्रस्थान गर्ने उल्लेख छ । चिनियाँ प्रमण्डलको नेतृत्व उपप्रधानमन्त्री लिऊ हेले गर्दै गर्देै छन् । बेइजिङ वार्तापछि वासिङ्टनमा फेरि आगामी मे ८ देखि अर्को चरणको वार्ता हुने पनि ह्वाइट हाउसले जनाएको छ । ह्वाइट हाउसका अनुसार आगामी वार्तामा बौद्धिक सम्पत्ति, जबर्जस्ती प्रविधि हस्तान्तरण, गैरकर अबरोध, कृषि, सेवा, खरिद र कानुन कार्यान्वयन समेतका व्यापारसँग सम्बन्धित विविध विषयमा छलफल हुनेछ । विश्व अर्थतन्त्रमै असर गर्नेगरी अमेरिका र चीनले एकअर्का मुलुकका करिब तीन खर्ब ६० अर्ब डलर बराबरका सामानमा करवृद्धि गरेका छन् । यो करवृद्धि हाल १० प्रतिशत रहे पनि व्यापार वार्तामा सहमति नभए २५ प्रतिशत पु¥याइने अमेरिकी राष्ट्रपति डोनाल्ड ट्रम्पले पटकपटक चेतावनी दिएका छन् । अमेरिकाले खासगरी अमेरिकी प्रविधि जबर्जस्ती चीनले चोरी गरेको, बौद्धिक सम्पत्तिको संरक्षण गर्न नसकेको, चिनियाँ बजार विदेशी कम्पनीहरुका लागि खुला नगरेको तथा चिनियाँ कम्पनीहरुलाई सरकारले अनेक सहुलियत उपलब्ध गराएर विदेशी कम्पनीको प्रतिस्पर्धी क्षमता कमजोर बनाएको आरोप लगाएको छ । चीनको संरक्षणमुखी नीतिकै कारण अमेरिकासँग चीनको व्यापार घाटा छ खर्ब डलरभन्दा माथि पुगिसकेको अमेरिकी भनाई छ । चीनले भने अमेरिकी आरोपको खण्डन गरिरहेको छ । चीनले खुला विश्व व्यापारमा अमेरिकी नीतिहरु बाधक बन्न थालेको र अमेरिकी राष्ट्रपतिका नीतिहरु संरक्षणवादी शैलीका रहेको बताउँदै आएको छ । रासस/एएफपी
चीनमा हुने अन्तर्राष्ट्रिय प्रबद्र्धन मेलामा नेपाल सहभागी हुने, ४ वटा स्टलमा नेपाली सामान प्रदर्शन गरिने
काठमाडौं । चीनको गोन्झाओमा हुने १२५ औं अन्तर्राष्ट्रिय प्रवद्र्धन मेलामा नेपाल सहभागी हुने भएको छ । नेपालले अन्तर्राष्ट्रिय बजारमा नेपाली बस्तुलाई प्रवद्र्धन गर्न ४ वटा स्टलमा आफ्नो सहभागिता जनाउने भएको हो । चीनको अन्तर्राष्ट्रिय प्रवद्र्धन मेलामा नेपालले दोस्रो पटक सहभागिता जनाउन लागेको हो । चीनको गोन्झाओमा बैशाख १८ देखि २२ गतेसम्म हुने अन्तर्राष्ट्रिय मेलामा नेपालका उत्पादकले पनि सहभागिता जनाउने व्यापार तथा निकासी प्रवद्र्धन केन्द्रले जनाएको छ । मेलामा सहभागिताका लागि २० लाख खर्च हुने केन्द्रले जानकारी दिएको छ । मेलामा हस्त निर्मित सामाग्री, अल्लो, थान्का, खोस्टबाट निर्माण गरिएका सामाग्री, लगायत ६ प्रकारका उत्पादन लिएर उद्यमीहरु मेलामा सहभागी हुने छन् । सो मेलामा १०० राष्ट्रका व्यवसायीको सहभागिता रहने बताइएको छ । केन्द्रका कार्यकारी निर्देशक शरदबिक्रम राणाले सो मेलामा सहभागिता जनाउँदा नेपालका हस्तकला सामाग्रीहरुको अन्तर्राष्ट्रिय बजारमा प्रवद्र्धन हुने बताए । साथै नेपाली बस्तु निर्यातमा सहयोग पुग्ने र पर्यटक पनि आकर्षित हुने बताए । अघिल्लो वर्षको मेलामा बिक्रेताहरुलाई लगिएकोमा यस वर्ष उत्पादकहरुलाई मात्र सहभागी गराउने उनले बताए । स्रोत र साधनको उपलब्धता भएपनि दक्ष जनशक्ति नभएको कारणले माग अनुसारको सामान निर्यात गर्न नसकेको राणाले बताए । नेपाल उद्यमशील महिला महासंघकी अध्यक्ष देविका बुढाथोकीले अघिल्लो वर्ष १० लाख झोलाको माग भएकोमा ४८ सय मात्रै निर्यात गर्न सकिएको बताईन् । यो वर्ष मागको ५० प्रतिशत निर्यात हुने बताइन् । उनले भनिन्– अघिल्लो वर्षको मेलामा नेपाल पहिलो पटक सहभागी भएको र हस्तकलामा थोरैमात्र दक्ष जनशक्ति भएकाले माग अनुसार सामान निर्यात गर्न नसकेको बताइन् ।
धनगढीमा खुल्यो अजोड इन्स्योरेन्सको प्रादेशिक कार्यालय
काठमाडौँ । अजोड इन्स्योरेन्स कम्पनीले धनगढीमा सुदुरपश्चिम प्रादेशिक कार्यालय शुरु गरेको छ । सुदुरपश्चिम प्रदेशका आन्तरिक मामिला तथा योजना मन्त्री झपडबहादुर बोहरा र संचालक सागर गुरुङले संयुक्त रुपमा सुदुरपश्चिम प्रादेशिक कार्यालयको उद्घाटन गरेका हुन् । उक्त अवसरमा सुदुरपश्चिम प्रदेशका आन्तरिक मामिला तथा योजना मन्त्री बोहराले कम्पनीले आफ्नो प्रोदेशिक शाखा कार्यलयको उद्घाटन गरेकोमा खुशी व्यक्त गरे । उक्त कार्यक्रममा बोल्दै कम्पनीका सहायक महाप्रबन्धक अनिलकुमार अर्याल संस्थाको परिचय, उद्देश्यका बारेमा जानकारी दिएका थिए ।
खल्ती डिजिटल वालेटले पायो राष्ट्र बैंकबाट अनुमति, अब मनि ट्रान्सफर सेवा शुरु गर्ने
काठमाडौँ । खल्ती डिजिटल वालेटलाई नेपाल राष्ट्र बैंकले भुक्तानी सेवा प्रदायकको कार्य गर्ने अनुमति पत्र प्रदान गरेको छ । राष्ट्र बैंकको ‘भुक्तानी तथा फर्छ्यौट विनियमावली २०७२’ बमोजिम ‘खल्ती’ले दूरसञ्चार सञ्जाल तथा इन्टरनेटको माध्यमबाट डिजिटल भुक्तानी सेवाको कार्य गर्न अनुमति प्राप्त गरेको हो । डिजिटल भुक्तानीका साथै अब खल्ती मार्फत आन्तरिक मनि ट्रान्सफर र अन्य विभिन्न किसिमका मोबाईल वित्तीय सेवाहरू पनि उपलब्ध हुने छन् । नेपाली युवा उद्यमीहरुको समूहले सन् २०१७ मा स्थापना गरेको ‘खल्ती’ एउटा डिजिटल भुक्तानी सेवा प्रदान गर्ने स्टार्ट अप कम्पनी हो । सुरुवात देखि नै खल्ती नविनतम प्रविधि तथा सेवा मार्फत मानिसको जीवन सहज बनाउन केन्द्रित रहेको जनाइएको छ । राष्ट्र बैंकबाट भुक्तानी सेवा प्रदायकको आधिकारिक लाईसेन्स प्राप्त गरेपछि डिजिटल माध्यमबाट प्रदान गरिने सेवालाई अर्को तहमा पुर्याउन थप उत्प्रेरित बनेको कम्पनीले जनाएको छ । अब सबै प्रकारका भुक्तानी सेवाहरुलाई अनलाईन प्रविधिमा ल्याउन खल्तीको ध्यान केन्द्रीत हुनेछ । खल्तीले राष्ट्र बैंकबाट अनुमतीप्राप्त गरेको अवसरमा खुशी व्यक्त गर्दै कम्पनीका प्रबन्ध निर्देशक मनिष मोदीले भने,‘हामी अब देशका हरेक कुना काप्चाबाट सरकारको डिजिटल नेपालको सपनालाई साकार पार्न ‘डिजिटल नेपाल, समृद्धिको महाअभियान’भन्ने नाराका साथ भरपूर प्रयास गर्नेछौँ । बैंकिङ पहुँचमा नरहेको दूरदराजको जनसंख्यालाई समेत वित्तीय सेवाप्रदानगर्ने र उनीहरुको जीवन सरल बनाउने पनि हाम्रो उद्देश्य रहनेछ ।” खल्तीको मोबाईल एप तथा वेबसाइट प्रयोग गरी मोबाईल रिचार्ज, बिजुली र पानीको बिलभुक्तानी, इन्टरनेट तथा डीटीएचको बिलभुक्तानी, फिल्म टिकेटिङ, प्लेन टिकेटिङ, इभेन्ट्स टिकेटिङ, होटेल रुम बुकिङ आदि गर्ने, इ–कमर्स मार्फत किनिएको सामानको भुक्तानी, दैनिकपत्रिकाहरुको ग्राहक–शुल्कतिर्ने जस्ता अन्यथुप्रै सेवाहरु लिन सकिन्छ । साथै, खल्ती एप प्रयोग गरी साना–ठूला खुद्रा पसलमा क्यु–आर कोड मार्फत मोबाईलबाटै पैसा तिर्न सकिन्छ । हाल खल्ती प्रयोगकर्ताहरुको संख्या ८ लाख रहेको कम्पनीले जनाएको छ ।
नेप्से दोहोरो अंकले बढ्दा ९५ करोडको कारोबार, वाणिज्य बैंकको मात्रै ३४ करोड
काठमाडौं । बुधबारको नेप्से परिसूचक १९.१४ अंकले उकालो लागेको छ । कारोबार शुरु भएदेखि निरन्तर उकालो लागेको सो दिनको नेप्से अघिल्लो दिनको तुलनामा १.५२ प्रतिशतले बढेर १२७९.२९ अंकमा पुगेको छ । दोहोरो अंकले उकालो लागेको बजारमा कुल १७२ कम्पनीको ९५ करोड रुपैयाँ बराबरको सेयर कारोबार भएको छ । सो दिन ९ हजार ६०९ वटा कारोबारमा कुल ३४ लाख ८ हजार ३७४ कित्ता सेयर किनबेच भएका छन् । सो मध्ये वाणिज्य बैंक समूहको सबैभन्दा बढी सेयर कारोबार भएको छ । एकैदिन यो समूहको कुल ३४ करोड रुपैयाँ बराबरको सेयर कारोबार भएको छ । कुल ३ हजार ५२३ पटकको कारोबारमा सो मात्राको सेयर किनबेच भएको छ ।वाणिज्य बैंक मध्ये पनि नेपाल बैंक लिमिटेडको ९ करोड रुपैयाँ बराबरको सेयर कारोबार भएको छ । त्यस्तै, मंगलबार सबैभन्दा बढी कारोबार गर्नेमा अधिकांश वाणिज्य बैंक रहेका छन् । दोहोरो अंकले बढेको बजारमा पनि दुई समूहको सूचक राताम्मे भएका छन् । हाइड्रो पावर र उत्पादनमूल समूहको सूचक क्रमशः १०.६८ र २.६९ अंकले घटेका छन् । कारोबारमा आएका १० वटा समूह मध्ये होटल समूहको ६०.११ अंकले बढेर हरियो भएको छ । मंगलबार जस्तै बुधबार पनि एभरेष्ट इन्स्योरेन्स कम्पनीका लगानीकर्ताले सबैभन्दा बढी कमाएका छन् । बुधबार यी कम्पनीका लगानीकर्ताले ९.७७ प्रतिशत कमाएका छन् । इन्स्योरेन्सको सेयर मूल्य प्रतिकित्ता ४२७ रुपैयाँ रहेको छ । नेप्सेका साथै ‘क’ वर्गको मापन गर्ने सेन्सेटिभ इन्डेक्स पनि ४.८० अंकले उकालो लागेर २७६.९४ अंकमा पुगेको छ ।
साढे ३ अर्ब खराब कर्जा उठाउँदै कृषि विकास बैंक, ५१ बिगाहा धितो बेच्दै
काठमाडौं । कृषि विकास बैंकले साढे ३ अर्ब खराब कर्जा उठाउन सुरु गरेको छ । बर्षाैदेखि नउठेर खराब कर्जाका रुपमा रहेको ऋण उठाउन प्रक्रिया अघि बढाएको बैंकका प्रमुख कार्यकारी अधिकृत अनिल कुमार उपाध्यायले बताए । खराब कर्जाका रुपमा रहेको सो कर्जा उठेसँगै बैंकको वासलातमा व्यापक सुधार आउने प्रमुख कार्यकारी अधिकृत उपाध्यायले बताए । बैंकको ऋण उठाउनका लागि बासुलिङ्ग सुगर एण्ड जनरल इन्डष्ट्रिज कम्पनी लिमिटेडको कैलाली जिल्लामा रहेको ५१ बिघा १३ कठ्ठा ६ धुर जग्गा लिलामी हुने भएको छ । कृषि विकास बैंकको ऋण नतिरेपछि जग्गा लिलामी हुने भएको हो । कम्पनीले चिनी उद्योग खोल्नका लागि बैंकसँग लिएको ऋण साँवा र ब्याज समेत गरी ३ अर्ब ४६ करोड १ लाख ५३ हजार २ सय ६२ पुगेको छ । सो रकम असुली गर्न ऋण असुली न्यायाधिकरणले २०६७ पौष २८ गते गरेको फैसलाबाट ऋण तिर्न आदेश दिएको थियो । तर, कम्पनीले कुनै प्रतिक्रिया नजनाएपछि न्यायाधिकरणले ८ वर्षपछि धितो लिलामी प्रक्रिया अघि बढाएको हो । ऋण असुलीका लागि न्यायाधिकरणले ७ दिने सूचना जारी गरिसकेको छ । सूचनामा निवेदक वादी कृषि विकास बैंक र प्रतिवादी बासुलिङ्ग सुगर एण्ड जनरल लिमिटेड समेत भएको मुद्दा नं ७२/१४८१ अनुसार तोकिएको रकम ७ दिनभित्र असुली शाखामा बुझाउनु भनी उल्लेख छ । मुद्दामा प्रमुख प्रतिवादी के ११ कैलाश कोलोनी नयाँ दिल्ली ४८ भारत घर भै कैलाली चुहा गाविस वडा नं ३, हाल चुम्किचुहा नगरपालिका वडा नं ५ विजयनगर बस्ने विजय कुमारगोयललाई मानिएको छ । यस्तै, अन्य प्रतिवादीहरुमा अरुण चन्द, शुसिला राणा, हर्कबहादुर चन्द, राजेन्द्रबहादुर चन्द, गणेशदत्त भट्ट र अरुण मल्ल रहेका छन् । कम्पनीको चुम्किचुहा नगरपालिमा रहेको २८ वटा कित्ता लगायत अन्य जमिन लिलामी प्रक्रियामा अघि बढेको हो । अदालती आदेश अनुसार पहिले नै जग्गा लिलामी प्रक्रिया अघि बढ्नु पर्ने हो, तर न्ययाधिकरणको ढिला सुस्तीले काम अघि बढेन । हाल जग्गामा केहि मानिसहरुको समेत बसोबास रहेकाले जग्गा लिलामी प्रक्रिया केही असहज बन्ने न्यायाधिकरणका श्रेस्तेदार भेषराज कोइराला बताउँछन् । मालपोत कार्यालय कैलालीका अनुसार कित्ता नं. ४९८, ३३७, २७६, ३३८, २७४, २७५, ६६८, ६८७, ४१२, ६९१, १०८, १५२, ४९९, ५०१, ६८६, ६८५, ७१२, ५०३, ११३, ४२३, ५००, ५८५, ५०८, ६८८, ६६५, ५८१, ६५५, र ७१३ जग्गा कम्पनीको नाममा रहेको छ । न्यायाधिकरणले जग्गा मूल्याङ्कनको प्रक्रिया अघि बढाइसकेको श्रेस्तेदार कोइरालाले बताउँछन् । ‘पहिले जग्गाको मुल्याङ्कन काम सक्छौं, कारखाना सहित ५१ बिगा जग्गा लिलामी गर्नुपर्ने भएकोले यो किस्ता किस्तामा निकाल्नु पर्ने हुन्छ ।’ श्रेस्तेदार कोइरालाले भने–‘प्रक्रियाको हिसाबमा हामी केहि ढिलो भएका हौं । अब केहि दिनमै जग्गा मुल्याङ्कनको काम अघि बढ्ने छ ।’ कृषि बैंकको ऋण निकै ठूलो आकारको रहेकोले लिलामीमा केहि चुनौति भएको श्रेस्तेदार कोइराला स्वीकार गर्छन् । उता, कृषि विकास बैंकका प्रमुख कार्यकारी अधिकृत अनिलकुमार उपाध्यायले बासुलिङ्ग कम्पनीसँग ऋण असुली प्रक्रियामै रहेको बताए । ‘ऋणी कम्पनी हाम्रो सम्पर्कमा आइरहेको छ, पछिल्लो समय कम्पनीले प्रत्यक्ष वैदेशिक लगानी मोडेल एफडीआई बाट तिर्ने तयारी गरेको छ यसै प्रक्रियाको विषयमा हामी छलफल गरिरहेका छौं’ प्रमुख कार्यकारी अधिकृत उपाध्यायले विकासन्युजसँग भने । उनका अनुसार कम्पनीले आन्तरिक रुपमा विवाद मिलाई अदालती प्रक्रिया अन्त्य गर्ने प्रयास गरिरहेको छ । यसको लागि कम्पनीले बैंकलाई पत्राचार समेत गरिसकेको छ । कम्पनीले पत्रमा एफडिआई मोडेल(प्रत्यक्ष बैदेशिक लगानी)मा रकम ल्याउन प्रयास भैरहेको उल्लेख गरेको बैंकले जानकारी दिएको छ । बासुलिङ्ग कम्पनीसँग ऋण असुलीबारे बैंक व्यवस्थापनले पटक पटक छलफल गरिसकेको छ । मुद्दा अदालती प्रक्रियाबाट अघि बढ्ने भएकाले बैंकले अब कस्तो निर्णय गर्ने भन्ने विषयमा सञ्चालक समितिले छिट्टै निर्णय गर्ने प्रमुख कार्यकारी अधिकृत उपाध्यायले बताए । कम्पनीले सञ्चालन गरेको चिनी उद्योग लामो समयदेखि बन्द अवस्थामा रहेको छ ।
