सिभिल बैंकबाट ठूला प्रमोटर बाहिरिदै, साढे १७ लाख कित्ता सेयर लिलामीमा
काठमाडौं । सिभिल बैंक लिमिटेडको १७ लाख ५३ हजार ८५४ कित्ता प्रमोटर सेयर लिलामीमा राखिएको छ । प्रतिकित्ता न्यूनतम १०० रुपैयाँ तोकी बढाबढ मूल्यमा बिक्री गर्न लागिएको उक्त सेयर किन्नेले कम्तिमा २ लाख कित्ता आवदेन गर्नुपर्नेछ । उक्त सेयर जेठ ९ गतेसम्म आवदेन गर्न सकिने सिभिल क्यापिटलले जनाएको छ । शुक्रबार बैंकले दुई आर्थिक वर्षको साधारणसभा गर्दैछ । साधारणसभाले सञ्चालक समिति पनि चयन गर्दैछ । दुई आर्थिक वर्षको लाभांश लिने, साधारणसभामा भाग पनि लिने तर सेयर बेचेर निस्कने प्रमोटर को को हुन् भन्ने स्पष्ट भएको छैन । थोरै थोरै कित्ता सेयर जोडेर धेरै जनाले सेयर बिक्रीमा राखेको बैंक व्यवस्थापन समूह सम्बद्ध स्रोतको दावी छ । तर किन्नले नै कम्तिमा २ लाख कित्ता आवेदन गर्नु पर्ने सर्त भएका कारण सेयर बिक्रेता ठूलै लगानीकर्ता भएको अनुमान गरिएको छ । ठूलो मात्रामा सेयर अध्यक्ष इच्छाराज तामाङ र उनी निकट समूहसँग मात्र भएकोले उनीहरुले नै सेयर बिक्री गर्न लागेको हुन सक्ने प्रमोटर सम्बद्ध स्रोतले बतायो । ‘अध्यक्षज्यूको नाममा भएको सेयर बोर्डमा रहेको अवस्थामा बेच्च मिल्दैन । उहाँको टिमबाट कसैले बेच्न लाग्नु भएको भन्ने सुनेको छु’ स्रोतले भन्यो । अध्यक्ष इच्छाराज तामाङले बेच्च लागेको सेयर आफ्नो नभएको बताए । ‘बैंकको लाभांश दर कम छ । बैंकमा भन्दा अरु क्षेत्रमा गरिएको लगानीको प्रतिफल राम्रो हुन्छ भन्ने बुझेका साथीहरुले बैंकको सेयर बेच्च लागेको हुनसक्छ’ तामाङले विकासन्युजसँग भने । शुन्य दलमलव ५ प्रतिशतभन्दा बढी सेयरभएका सेयरधनीकाे सूचि राष्ट्र बैंकको नियम अनुसार १ प्रतिशतभन्दा बढी संस्थापक सेयर बेच्च केन्द्रीय बैंकको स्वीकृति लिनुपर्छ । ‘बैंकले सेयर बिक्रीमा राखेको छ । जसले बढी मूल्यमा सेयर किन्न आवेदन दिन्छ, उसलाई सेयर बेच्च मिल्छ कि मिल्दैन भनेर राष्ट्र बैंकले त्यतिबेला हेर्नेछ । कसले सेयर बेच्च लागेको त्यतिबेला मात्र थाहा हुन्छ’ राष्ट्र बैंकका सहायक प्रवक्ता गोविन्द नागेलाले भने । कोषले लिन सक्ने लिलामीमा राखिएको सेयर कर्मचारी संचय कोष वा नागरिक लगानी कोष वा बीमा कम्पनीले मात्र किन्न सक्ने देखिएको छ । न्यूनतम २ लाख कित्ता आवदेन गर्न कम्तिमा २ करोड रुपैयाँ चाहिने, उक्त रकममा लाग्ने कर तिरेको प्रमाण पेश गर्नु पर्ने, प्रमोटर सेयर लिन राष्ट्र बैंकले तोकेअनुसार सबै मापदण्ड पूरा गरेको हुनु पर्ने भएकोले व्यक्तिगत तवरमा उक्त सेयर किन्न सक्ने सम्भावना कम छ । यसअघि २७ लाख भन्दा बढी सेयर किनिसकेकोले सञ्चाय कोषले नै उक्त सेयर किन्न सक्ने अनुमान गरिएको छ । ‘वाणिज्य बैंकको सेयर १०० रुपैयाँमा किन्ने मौका राम्रो हो । बोर्डमा छलफल हुन्छ । अध्ययन हुन्छ, त्यसपछि किन्ने नकिन्ने निर्णय हुन्छ’ कोषका प्रशासक तुलसी गौतमले भने ।
जोमसोम विमानस्तरको स्तरोन्नति शुरु, नौ करोडमा ठेक्का सम्झौता
ठिनी । पर्यटकीय तथा हिमाली जिल्ला मुस्ताङको सदरमुकामस्थित जोमसोम विमानस्थल स्तरोन्नतिको काम शुरु भएको छ । नागरिक उड्डयन प्राधिकरणले विमानस्थलको धावनमार्ग (रनवे) को ग्रेड सुधार र कालोपत्र थप गर्न लागेको हो । आठ सय १५ मिटर रनवेमध्ये २१५ मिटरको ग्रेड सुधार गरिने आयोजना प्रमुख कृष्णप्रसाद पौडेलले जानकारी दिनुभयो । “ग्रेड नमिलेकाले जमीन काटेर लेभल (तह) मिलाउन लागेका हौँ”, पौडेलले भने, “विमानस्थलमा ओभरले (कालोपत्र थप) पनि हुन्छ ।” हाल तीन सेन्टिमिटर बाक्लो पिच भएको धावनमार्गमा थप चार सेन्टिमिटर कालोपत्र थप गरिने भएको छ । बीस वर्षअघि गरिएको कालोपत्रको म्याद सकिन लागेको थियो । प्रत्येक चार÷चार वर्षमा कालोपत्र गर्नुपर्ने प्राविधिक बताउँछन् । विमानस्थललाई कालीगण्डकीको कटान नियन्त्रणका लागि पर्खाल निर्माण र घेराबारलगायतका पूर्वाधार पनि बनाउन लागिएको छ । विमानस्थल स्तरोन्नति आयोजनाका लागि प्राधिकरण र एपेक्स कन्स्ट्रक्सनबीच गत असोजमा रु नौ करोडमा ठेक्का सम्झौता भएको थियो । चिसो र हिमपातका कारण कात्तिकको अन्तिम सातादेखि काम हुन सकेन । मौसममा सुधार आएपछि पर्याप्त मजदुर र उपकरण परिचालन गरेर कामलाई तीव्रता दिइएको एपेक्स कन्ट्रक्सनका इञ्जिनीयर लालध्वज लामाले बताए । गत असारमा १५ महिनाको आयोजना भए पनि अबको दुई महिनाभित्र सम्पन्न गरिसक्ने उनले बताए । विमान अवतरण नहुने समयमा स्तरोन्नतिको काम गरिएको छ । जोमसोम विमानस्थलमा दिउँसो अत्यधिक हावाहुरी चल्ने भएकाले सो समयमा जहाज आउँदैनन् । विमानस्थल स्तरोन्नति भएपछि जहाज अवतरणमा सहज भई दुर्घटनाको जोखिम न्यूनीकरण हुने अपेक्षा गरिएको छ । हाल धावनमार्गको कालोपत्र उप्किएको, ग्रेगर निस्किएर खाल्डाखुल्डी परेकाले विमान अवतरण गर्दा समस्या हुने गरेको छ । पोखरा–जोमसोम हवाईमार्गमा समिट र तारा एयरका जहाजले दैनिक पाँच उडान भर्दै आएका छन् । पर्यटक र तीर्थयात्री ओसार्ने हेलिकप्टरको चाप पनि बढ्दो छ । रासस
दुई कम्पनीको ७ लाख ८० हजार कित्ता बोनस सूचिकृत, हेरौँ क-कसकाे ?
काठमाडौं । नेपाल स्टक एक्स्चेञ्ज(नेप्से)मा कूल ७ लाख ८० हजार ९५६ कित्ता बोनस सेयर सूचिकृत भएको छ । बुधबार मात्रै काबेली विकास बैंक र सिभिल लघुवित्त वित्तीय संस्थाको सो मात्राको सेयर नेप्सेमा थपिएको हो । काबेली विकास बैंकको ७ लाख ३७ हजार ६६ कित्ता र सिभिल लघुवित्तको ४३ हजार ८९० कित्ता बोनस सेयर नेप्सेमा सूचिकृत भएको हो ।
देवः विकास बैंकको भूरीगाउँ शाखा उद्घाटन
काठमाडौँ । देवः विकास बैंक लि.को ठाकुरबाबा नगरपालिका, वडा नं ०१ स्थित भुरीगाउँ बजारमा शाखा बिस्तार भएको छ । बैशाख २५ गते ठाकुरबाबा नगरपालिकाका प्रमुख, घननारायण श्रेष्ठले शाखा उद्घाटन गरे । बैंकका संचालक समितिका अध्यक्ष बज्र गुरुङ्गको सभापतित्वमा संचालन भएको उक्त कार्यक्रममा नगर श्रेष्ठले जनताहरुको घरघरमा बैंकिङ्ग सेवा पुर्याउन सकेमात्र समृद्ध नेपाल बनाउन सकिने कुरामा जोड दिए । उक्त कार्यक्रममा बैंकका नायब प्रमुख कार्यकारी अधिकृत लक्ष्मीप्रसाद श्रेष्ठले स्थानीय निक्षेपकर्ता, व्यवसायी, उद्यमीहरुलाई सरल, सुलभ तथा सुरक्षित बैकिङ्ग सेवा प्रदान गर्ने बताए । कार्यक्रममा शुभकामना मन्तव्य दिंदै संचालक समितिका सदस्य बिजयराज शर्मा भुसाल लगायतकाले मन्तव्य व्यक्त गरेको वरिष्ठ प्रबन्धक नवीनमुनि बज्राचार्यले बताए ।
गुराँस लघुवित्तको आईपीओ बाँडफाँड, दुई लाख बढीको हात खाली
काठमाडौं । गुराँस लघुवित्त वित्तीय संस्थाको साधारण सेयर (आइपीओ) बिहीबार बाँडफाँड भएको छ । बिक्री प्रबन्धक एनआईबिएल क्यापिटलका अनुसार २३ हजार ३६३ जना आवदेकले गोलाप्रथाबाट १० कित्ता सेयर पाएका छन् । उक्त आईपीओमा ३ लाख १ हजार ३९६ जनाले कूल ५५ लाख ४५ हजार ४५० कित्ता सेयर माग गरेको थिए । जुन संस्थाको माग भन्दा २३.८० गुणा बढी हो । कूल ३ लाख २ हजार ३८ जनाको आवेदन मध्ये ६४२ जनाले माग गरेको १४ हजार ८९० कित्ता सेयर रद्द भएको क्यापिटलले जनाएकाे छ । संस्थाले वैशाख १६ देखि २० गतेसम्म कुल २ लाख ३३ हजार ६३० कित्ता सेयर सर्वसाधारणलाई बिक्री गरेको थियो ।
कालोपत्र नभएको भन्दै बौद्धमा सडक बन्द, ‘धुवाधुलोबाट मुक्त हुने कहिले ?’
साँखु । लामो समयदेखि निर्माणाधीन चावहिल-साँखु सडकखण्ड कालोपत्र नहुुँदा मारमा परेका बौद्ध व्यापार सङ्घ र स्थानीयवासीले यातायात अवरुद्ध पारेका छन् । पाँच सयको सङ्ख्यामा रहेका स्थानीयवासी तथा व्यापारीले बिहान ८ बजेदेखि गरेका साङ्केतिक विरोध कार्यक्रमका कारण सडक अस्तव्यस्त भएको छ । आन्दोलनमा उत्रिएका स्थानीयवासीको एउटै माग छ चावहिल–साँँखु सडकखण्ड तत्काल कालोपत्र गरी धुवाधुलोबाट मुक्त हुनुपर्यो । विगत चार वर्षदेखि सडक धुलाम्मे र हिलाम्मे हुँदा सयौँ व्यवसायी विस्तापित भएको स्थानीय व्यवसायी तथा बौद्ध व्यापार सङ्घका अध्यक्ष दीपक चौलागाईंले दुखेसो पोखे । चौलागाईंले सडक धुलाम्मे र हिलाम्मे हुँदा व्यापार व्यवसाय ठप्प भएको मात्र नभई करोडौँ लगानी गर्ने दर्जनौँ व्यवसायी पलायन हुनुपरेको पीडा सुनाए । व्यापारी लक्ष्मण दुलालले भने, “यो साङ्केतिक विरोध कार्यक्रम मात्र हो, भोलिका दिनमा थप कडा आन्दोलनसहित हामी प्रस्तुत हुनेछौँ”, उनले भने, “सरकारले नागरिकको समस्याप्रति बेवास्ता गरिरहेको छ, हाम्रो एक सूत्रीय मागको तत्काल सुनुवाइ हुनुपर्छ ।” लामो समयदेखि सडकमा पानी हालेर धुलो कम गर्ने गरिरहेको बौद्ध व्यापार सङ्घले सो क्रममा पानी किन्न मात्र करीब रु ८० लाख खर्चिएको दाबी गरेको छ । सडकको कालोपत्र गर्नका लागि नेपाल निर्माण व्यवसायी महासङ्घका पूर्वअध्यक्ष सकुन्तलाल हिराचनको कम्पनीले ठेक्का पाएको थियो । बाटो कालोपत्र गर्ने विषयलाई लिएर धेरै पटक स्थानीय नेतासहितको टोली मन्त्रालय र सडक विभाग कार्यालय पुगिसकेको छ । तर मन्त्रालयले सडक विभाग, सडक विभागले ठेकेदार र ठेकेदारले स्थानीयवासीले मुद्दा हालेका कारण अदालतलाई दोष लगाउँदै पन्छिने काम मात्र गरिरहेका छन् । सरकारले यथास्थितिमा तत्काल सडक कालोपत्र गर्न निर्देशन दिएको थियो । सरकारले विसं २०७२ मा चावहिलबाट साँखुसम्म २२ मिटर चौडा चार लेनको सडक बनाउने योजना ल्यायो र काठमाडौँ उपत्यका सडक विस्तार आयोजनाले २०७२ जेठमा सडकखण्डको निर्माणको लागि बोलपत्र आह्वान गरेर असोजमा चार निर्माण व्यवसायीलाई ठेक्का दिएको थियो । कूल लम्बाइ ११ दशमलव ४६ किलोमिटर सडकखण्डमा चार कम्पनीले समयमै निर्माण नसक्ने भएपछि थप एक कम्पनी गरी पाँच ठेकेदार कम्पनीले यो सडकको विस्तारको जिम्मा पाएका थिए । तर अहिलेसम्म उक्त सडकखण्डले पूर्णता पाउन सकेको छैन । रासस
सुदूरपश्चिममा सिमेन्ट आयात बन्द, भारतसँगको निर्भरता हट्दै
धनगढी । स्वदेशमा उत्पादित सिमेन्टले बजार लिएपछि सुदूरपश्चिम प्रदेशमा भारतमा उत्पादित सिमेन्टको आयात बन्द भएको छ । यस क्षेत्रमा विगतमा ठूलो परिमाणमा भारतमा उत्पादित सिमेन्ट आयात हुने गरेकामा पछिल्लो समयमा आयात बन्द भएको व्यापारीले बताएका छन् । नेपालका सिमेन्ट उद्योगले बजारको मागअनुसारको परिमाणमा सिमेन्ट उत्पादन गर्न थालेसँगै सिमेन्टका लागि भारतसँग रहेको निर्भरता पनि हटेको छ । दाङस्थित सोनापुर मिनरल एण्ड आयल प्रालिका सञ्चालक श्याम तायलले सिमेन्ट उत्पादनका क्षेत्रमा पछिल्लोपटक नेपालमा भएको उपलब्धिले भारतीय सिमेन्ट आयात रोकिएको बताए । “नेपालमा सिमेन्टको निर्माण लागत भने भारतमा भन्दा बढी छ”, तायलले भने, “सरकारले कोइलाको आयात र बिजुली महसुलमा छुट दिन सके निर्माण लागत कम पर्ने भई उभोक्ताले हालको भन्दा सस्तोमा सिमेन्ट पाउन सक्छन् ।” उत्पादन गर्ने कम्पनीअनुसार सिमेन्टको गुणस्तर पनि फरक–फरक हुने गरेको बताइएको छ । नेपालमा हाल सञ्चालनमा रहेका ५० भन्दा बढी सिमेन्ट उद्योगले दैनिक झण्डै २० हजार टन सिमेन्ट उत्पादन गरिरहेको अनुमान गरिएको छ । नेपालका दाङ, भालुवाङ, भैरहवा, हेटौँडा, मिर्चैया, हिले, नवलपरासी, उदयपुरलगायतका क्षेत्रमा सिमेन्ट उद्योग सञ्चालनमा रहेका छन् । यस क्षेत्रमा नेपाली सिमेन्ट प्रतिबोराको बजार मूल्य हाल रु ७६० देखि ७८० सम्म छ । कैलाली भन्सार कार्यालयका भन्सार अधिकृत ईश्वरीप्रसाद अर्यालले भन्सार नाका हुँदै विसं २०७४ सम्म भारतीय सिमेन्ट आयात भएकामा त्यसपछि आयात बन्द भएको जानकारी दिनुभयो । सिमेन्ट आयात गर्दा मूल्य अभिवृद्धि कर भ्याट, भन्सार र अन्तःशुल्क लाग्ने गरेको छ । स्वदेशमा उत्पादिन सिमेन्ट सुदूरपश्चिम प्रदेशमा आयात नहुँदा २०७४ अघिसम्म यस क्षेत्रमा निर्माण गरिने भौतिक संरचनामा भारतबाट आयात हुने सिमेन्ट प्रयोग गर्ने गरिएको थियो । रासस
कोलगेटमा भेट्टियो क्यान्सर विकास गर्ने रसायन
काठमाडौं। भर्खरै निक्लिएको अनुसन्धानको रिपोर्टले कोलगेटमा ट्राईक्लोसा नाम गरेको घातक पदार्थ भएको देखाएको छ। यस पदार्थले समग्र स्वास्थ्यमा असर गर्नुको साथै क्यान्सर पनि विकास गर्न सक्ने क्षमता रहेको छ। टोक्सिकोलजी पत्रिकामा रासायनिक अनुसन्धानले भर्खरै प्रकाशित गरेको अध्ययन अनुसार ट्रिकोल्सानको उच्च मात्रामा प्रयोग हुँदा क्यान्सर लाग्ने कोशिकाहरु बढाउँदछ। यस अध्ययनले मात्र नभएर यस अगाडिको अध्ययनले पनि उक्त पदार्थ स्वास्थ्यको लागि हानिकारक रहेको पाईएको थियो। ट्रिक्लोसानले छालाबाट शरीरमा प्रवेश गरेर शरीरको हार्मोनमा असन्तुलन ल्याउने गर्दछ। २००८ मा २५१७ मानिसमा गरिएकोको टेस्टको नतिजा अनुसार ६ बर्ष देखी माथिको ७५ प्रतिसतको पिसाबमा ट्रिक्लोसान पाईएको थियो। यधापी अध्ययनले यस्तो देखाउँदा देखाउँदै पनि कोलेगेटले अझै पनि आफु स्वोस्थ टुथपेस्ट रहेको र यसले मानिसको स्वास्थ्यलाई कुनै पनि हानी नगरने दाबी गर्दै आएको छ। संसारमा प्रयोग हुने टुथपेस्टमा कोलेगेट प्रसिद्द टुथपेस्टमा पर्दै आएको छ।
